الأربعاء، 5 سبتمبر 2012

التكيف القاتل


طبعا التكيف اختراع جبار
وبسبب كم التكيفات اللي فيكي يامصر
بيقطعوا عننا الكهرباء
يعني بيبقا
لاتكييييييييف
ولا حتي المروحة
لكن ليه هو قاتل
لألألألألأ
مش علشان الانفلونزا
علشان خرطوم التكيف
اي نعم
خرطوم التكيف اللي عمال ينقط نقطه نقطه
زي حنفية ست سنية
اللي اغلب الجيل الحالي مايعرفهاش
العواجيز اللي زي بس اللي يعرفوها
الخراطيم دي عماله تنقط علي المناور
وعلي تكيفات الجيران وعلي الحيطان
وطبعا نقطة الميه دي مع الاستمرار هتدمر الحيطان والاساسات
جربوا تحطوا جردل كبير تحت خرطوم التكيف كده لمدة يوم
وشوفوا الكم الهائل من الماء اللي بيتحوش
هتتصدموا
لازم حل
العمارات الجديدة اغلبها عملوا مواسير تلم مياه التكيفات
وعلي المجاري عدل
مع انها ماء مقطر
ممكن يتسقي منها الزرع او يتغسل بيها السلم والعربيات
المباني القديمة واغلب الحديثة ابقوا اتفرجوا عليها وانتوا ماشيين
وشوفوا التكيفات عملت فيها ايه
لو كل عمارة لمت خراطيم التكيفات وعملت شبكة
هيرحموا المباني من التلف
وهي اصلا مش سالمة كفاية اللي عملاه الحمامات في العمارات
وهيكون عندنا ميه نسقي بيها الزرع ونمسح السلم والعربيات
العمارة اللي انا فيها من كل الاتجاهات ادمرت
ولا حد سمع ولا كأن الموضوع يخصهم
ربنا يستر
نفسي نتعلم نعمل الصح

هناك 52 تعليقًا:

سواح في ملك اللــــــــــــــــــه- يقول...

اقتراح جميل ياشموسة

بس المشكلة انا العمارات بيبقي فيها مليون شريك واحد مهتم

والتاني مش فارقة معاه

والتالت بيفكرها حاجة بسيطة رعم ان هي علي المدي البعيد بيبان اثرها

عيبنا ان احنا شطار في استعمال واستهلاك التكنولوجيا

ومبنعالجش اثارها السلبية

فهلوة بقي

موناليزا يقول...

فكرة حلوة جدا

Unknown يقول...

(نفسي نتعلم نعمل الصح)
وانا كمان والله نفسى نتعلم نعمل الصح

عمرو يسرى يقول...

لسه بدى علينا اوى عشان نعرف انه صح اصلا عشان نعمله
احنا محتمع ميئوس منه

شمس النهار يقول...

*سواح في ملك اللــــــــــــــــــه

المشكلة ان العمارة بعد كده ياتقع علي دماغهم ياتحتاج ترميم بمبالغ كبيرة في حين لو المشكلة اتحلت من اولها هتبقا بتكاليف بسيطة جدا

شمس النهار يقول...

*موناليزا

بس يارب ننفذها
والا البيوت هتبقا بايشة
:)

شمس النهار يقول...

*norahaty

كل عقلأ البلد نفسهم نعمل الصح
:))
نورتيني يادكتورة

شمس النهار يقول...

*عمرو يسري
لألألأ

بلاش تشاؤم كده
:))

مصطفى سيف الدين يقول...

و من التكييف ما قتل :)

مصطفى سيف الدين يقول...

عجبني اقتراحك صحيح على فكرة

eng_semsem يقول...

كلام جميل ومظبوط وبيتعمل في كتير من المباني الحديثه وبتستخدم في ري جناين حوالين المباني او ما شابه
تحياتي

شمس النهار يقول...

*مصطفي سيف الدين

ياهلا ياهلا

الفكرة حلوة بس السكان كل واحد حاططت ايده في جيبه مش عايز يطلعا
:))

شمس النهار يقول...

*eng_semsem

ايوة ماانا قلت ده في التدوينة ان اغلب المباني الحديثة عاملة شبكة
بس عاملينها ترمي في المجاري
مش لسقي الزرع
انا نفسي يسقوا بيها الزرع او يمسحوا السلم والعربيات

أندروميدا يقول...

الحقيقة لازم احيي حضرتك علي قائمة الافكار الرائعة اللي بتنوهي عنها بقالها فترة ... واكيد لو اتنفذت هاتصنع صورة مختلفة اكثر نفعا واشراقا .

بس برضه احنا عندنا داء ... اسمه القانون المعطل ... والمحليات اللي نايمة في العسل .... لو في فكرة نقدر نتخلص بيها من هذا الداء .... اظن ساعتها هاتبقي اي فكرة مثمرة .. قابلة للتنفيذ .


تحياتي العطرة ... وفي انتظار المزيد

رحاب صالح يقول...

والله انا عارفة حكاية الخرطوم دي
كنت بلاحظها دايما عندنا ف جامعة كفر الشيخ لما كنت بزور اختي فيها
ف جامعة القاهرة مكنتش بشوف الحكاية دي لاني كنت بقعد ف مكان بعيد عنها ههه
المهم ان فعلا كلامك مظبوط
بس علي اساس مين يطبقه....؟؟!!!
العيب فينا احنا يا اختي العزيزة
والله العظيم ما تتخيلي كمية القهر والغيظ اللي بشوفه من موظفين بنروح نخلص ورق منهم بيعملوا اية ...وقلنا الثورة هتغير كتير ...ممغيرتش الا قليل لان العيب فينا
بحييك علي موضوعاتك الجميلة ...
وانا مشغولة الايام دي بالشغل بس مش ناسية الفكرة الي قلت لك عليها
سيبيني شوية لغاية ما اظبطا واقولك
اوك
مسائك وصباحك بنفسج

شمس النهار يقول...

*اندروميدا

:)
شكرا علي مجاملتك اللطيفة

عارف مش هتتعدل المايلة الا لما يبقا فعلا قلبنا علي بعض وعلي البلد
بقول لواحدة من السكان العمارة ممكن تتهد تكيفات 13 دور عمالة تنقط علي الاساس والحيطان تقولي ماتتهد هو انا ساكنة فيها لوحدي

شمس النهار يقول...

*re7ab.sale7

طبعا العيب في اغلبنا
ومابنعرفش نعمل عمل جماعي خالص
ربنا يستر والعمارة ماتقعش بينا

ومستنياكي تفضي للفكرة :))
مساكي هنا

zeze يقول...

فعلا عندك حق
احنا حاطين التكيف بتاعنا جوا البلكونة وتحت الخرطوم علبة كبيرة مفيش يوم والتاني بتكون اتملت يعني بعد كام يوم هيكون فيه ميه كتيرة اتجمعت
وربنا يصلح لنا الحال بارك الله فيكي

شمس النهار يقول...

*zeze

تخيلي بقا ان المية دي مقطرة

وكمان كام تكيف في مصر بيطلع المية دي دي ميه من الهوا
ممكن نستغلها بس تقولوا ايه
:)

أسطى في زمن البلي يقول...

أستاذتي الكريمة


طبعا الفكرة كويسة جدا و مطبقة من زمان في بلاد تركب الأفيال

لكن .. ليا توضيح

الميه الناتجة دي مش مقطرة

ازاي ؟ و ليه ؟

في الواقع .. الميه دي أصلها بخار ماء عالق في الجو .. بيتكثف على الأجزاء الباردة جدا في دورة التكييف .. يعني ها تكون ميه و بيها عوالق من تراب و صدأ و ربما كيماويات و غيره ..

علشان كدا .. ممكن حد يستعمل الميه دي استعمال مباشر .. غسيل إيد أو وش .. يلاقيه حصل له مرض جلدي

دا رأيي في القضية يعني

.

Bent Men ElZman Da !! يقول...

فكره جميله والله
بس مين اللى يسمع بقى !!

شمس النهار يقول...

*اسطي في زمن البلي
ياهلا ياهلا
ازيك فينك من زمان:)
يارب تكون بخير

لو تلاحظ اني قلت نسقي بيها الزرع او نمسح سلم العمارة او نغسل بيها العربيات
وماتخافش هي ماء نظيف جدا انا بسقي بيها الزرع عندي في البيت والزرع زي الفل
وكمان في المعرض موجهه الخرطوم لزرع الجنينه وبرضوا زي الفل
:)
المهم نبعد بيها عن المباني

شمس النهار يقول...

*Bent Men ElZman Da !!

بالظبطت بس مين ينفذ

Foxology يقول...

صباح الخير شمس البلوجر

الموضوع ده فعلا خطير جداً أعرف كذا عمارة الواجهات اتدمرت بسبب مياه التكييف .. الفكرة فى إعادة استخدام المياه دى حلوة جداً جداً ياريت تتنشر

تحياتى

شمس النهار يقول...

*Foxology

اهلا بيك ياباشمهندس
انت فين غايب
يارب تكون بخير انت واسرتك الكريمة

العمارة عندي المنور والاربع واجهات ادمروا
شوف 13 دور في تلات شقق وكل شقة مش اقل من اربع تكيفات تخيل كم الميه بقا

كريمة سندي يقول...

موضوعك جميل جدا وهام .. جزاك الله خير الجزاء

شمس النهار يقول...

*كريمة سندي

شكرا ليكي ياجميلة

فشكووول يقول...

مين يقرأ ومين يسمع
قلت لهم ياجماعه عايزين نوضب السلم عشان السلم قرب يبوظ وكل واحد 100 جنيه
كلهم طلعوا لى لسانهم ولاحد عبرنى
يبقى عايزه نعمل مجارى عشان التكييفات
مسكت الخراطيم بتاعة التكييفات وثبتهم على ماسوره فى الحيط عشان يرمى الميه بعيد عن الجدار بشبر يا دوب
الغزاله تغزل برجل حمار
والحاجه ام الاختراع

هناء محمود يقول...

الكل بيبقى شايف المشكلة .. بس طول ما حاسس ان لسه فى شوية وقت قبل المصيبة ما تحصل بيفضل يريح دماغه . ومفيش حد بيتحرك إلا فى الوقت الحرج جداا .. فى الوقت الضايع


فكرتك حلوة أوى وللمصلحة العامة بس مين يسمع وينفذ

Eno يقول...

موضوعك جميل
بس بجد انتي وحشتيني اوي ياشموسة
سلامي لاسرتك الجميله
ربنا يباركك فيهم :)

L.G. يقول...

عندك حق ممكن زرع ممكن عربيات ممكن اي حاجة غير انها تسقط في الشارع وخلاص ومتهيالي ممكن شرب كمان
اساسا ما بين العربيات المركونة والمية على الرصيف الواحد مش عارف يمشي فين بجد هي الحكومات مبتفكرش زي البني ادمين العاديين ليه ؟

لازم نتصرف من غير حكومة بجد

momken يقول...

...

انك اسمعت ان ناديت حياً..ولا حياه لمن تنادى

عجبنى موضوع التكيف بتاع العربيه

الصيف فى مصر عاوز نركب للعربيه دايره فريزر وتتحول تلاجه

تحياتى

صيدلانيه طالعه نازله يقول...

عندى اصحاب كتير عملوا خزانات فعلا لميه
التكييفات ونفعتهم جدا ايام قطع الميه
اقتراحك حلووو ومفيد يا شموسى

وحشتييينى كتيير

شمس النهار يقول...

*فشكووووول
اهلا بيك ياعمنا

عارف عمارتكم هيتحركوا امتي؟
لما السلم يقع تماما
او حد يقع يتكسر من السكان
ده اللي بيحصل مابنتحركش غير وقت الغرقة

شمس النهار يقول...

*ام...بوبة

ايوة صح كلامك صح الصح
مش عارفة ليه عندنا العادة دي
مانتصرفش غير لما المصيبة تحصل

شمس النهار يقول...

*Eno
اهلا اهلا يااينو
انتي كمان وحشتيني جداااا
يارب تكونوا بخير
انتوا من اجمل الناس اللي قابلتهم في حياتي
وياريت ترجعي التدوين تاني

شمس النهار يقول...

*momken

ياهلا ياهلا
انا شايفة ان الطيور المهاجرة ابتدت ترجع بلوجر تاني
:)
مصر كان جوها جميل
بقينا محتاجين تكيفات حتي في المطابخ

شمس النهار يقول...

*L.G
المشكلة انها لما بتتساب كده
مع الوقت هتبوظ العمارات والاساسات والشوارع كمان
المشكلة انك لماتقولي لحد يعمل نفسه مش من البلد دي
:)

شمس النهار يقول...

*صيدلانية طالعة نازلة

يامرحبا يامرحبا
بحبايبنا الغايبين
انتي فين قلقاني عليكي ووحشاااااني جدا
مبسوطة انك هنا وياريت ترجعي التدوين
هنا اجمل

صيدلانيه طالعه نازله يقول...

حبى انا رجعت وكتبت وانتى جيتى عندى ونورتينى
هدور على ايميلك هنا وابعتلك رقمى الجديد
هتجنن واسمع صوتك
اوهبعتهولك على الفيس

شمس النهار يقول...

*صيدلانية طالعة نازلة

ايوة ماانا عارفة بس فين الاستمرارية
:))
ابعتيلي علي هنا رقمك انا عاملة اشراف
انتي كمان وحشاني وعايزة اطمن علي اخبارك

غير معرف يقول...

لو ده مكتوب في مشروع النهضه .... يبقى سيري على بركه الله ..

لو مش مكتوب ... يبقى هنتنقط مش هنروي بالتنقيط :))

شمس النهار يقول...

*فتاة من الصعيد
:))
تصدقي انا حاولت افهم مشروع النهضة ده احوليت ومافهمتش حاجة

:))

اكيد همه بقا فاهمين ماهي بقت بلد ابوهم
ورثوها من الحزب الوطني
:)))
ومن هنا لهنا ياقلبي لاتحزن

غير معرف يقول...



مشكور علي مجهودك القيم
http://www.alsadiqa.com




http://www.assayyarat.com/
thank you



جزاك الله خير
http://www.mawahib.net

بنوتة مصرية يقول...

موضوع كويس

ذو النون المصري يقول...

عاملين الكلام ده هنا في السعودية
كل عام انتم بخير

لــــ زهــــــراء ــــولا يقول...

روعة روعة روعة
ربي يبارك فيكِ وفي افكارك


لولا

شمس النهار يقول...

*Dina Elghedany

اهلا بيكي يادينا
وشكرا ليكي
وياريت لينك مدونتك علشان ماعرفتش اوصلها

شمس النهار يقول...

*بنوتة مصرية
شكرا ليكي:)

شمس النهار يقول...

*ذو النون المصري

هنا في مصر في المباني الجديدة عاملين كده بس علي المجاري عدل
وانت بالف خير وصحة وسعادة

شمس النهار يقول...

*لولا وزهرا
تسلمي يالولا ياجميلة
:)

العاب النادي يقول...

يعطيك العافية