السبت، 20 أبريل 2013

الفيوم :)

سافرت الفيوم في عمري 3 مرات
اول مره سنة 70 وقعدت اسبوع
شوفت السبع سواقي الجميلة 

وبحيرة قارون
ووادي الريان
ووادي الحيتان 

والاوبيرج الي اخر المعالم الجميلة اللي في الفيوم
ورحت تاني في 78 
بس ده كان يوم واحد ولما خيرت اروح مكان واحد بس 
:) 
قلت البحيرة وكان موسم البط 
ومااجمل منظر البط وهو طاير في تشكيلات جميله في السما وخصوصا قبل الغروب بساعه ونص
وامبارح كنت هناك !!!
ان ديش ان ديش
لاقيت فيوم راااااااابع
:)
والصورة اللي فوق خالص اول واحدة
 صورتها واحنا داخلين الفيوم علي الطريق
سألت السواق ياعم عزب انت متأكد ان دي الفيوم
ضحك وقالي ياباشمهندسه ايوة بس الخواجاتي :)
اعتقد ان الفيوم فقدت نص هويتها
زي كل مكان في مصر
فقد نص هويته
مليون استعمار من كل شكل ولون ماعرفوش يغيروا هويتنا وسحبناه وفرمناهم في هويتنا
ودلوقتي سبحان الله من غير استعمار ولا حاجه
 احنا بنغير هويتنا وبمزجنا 
عاااااادي كده
عارفين ربع الجمال اللي كان في الفيوم 
واللي بقي ربعه 
لو في امريكا كان بقا حاجه تانيه خالص
دول عندهم بحيرة كده شبه طشت الغسيل بتاع زمان
 اللي ساعة الغسيل الاسبوعي يبقا طشت غسيل 
وفي رمضان يبقا طشت عجن الكحك:)
وفي الطشت ده 
قصدي البحيرة دي شوية بط شكلهم يجنن 
وكاتبين ممنوع تأكل البط 
علشان ماتغيرش طبيعته في البحث عن طعامه
 يعني ماتلعبش في فطرة البط
وينهااااار ابيض 
علي اللي عاملينه حواليها
دكك خشب جميلة اماكن للشوي 
اماكن للعب الباسكت نضافه ايه 
ومافيش كافيتريا ولا حاجه 
عايز تيجي تقعد علي الليك هات حاجتك معاك 
عملوا من الطشت مكان ساحر رايق 
وقبل ماتمشي ياحلو لم اي شئ عملته
ونظف مكانك
والا هتاخد مخالفه توجع قلبك قبل جيبك
ماعلينا
انصحكم تلحقوا تروحوا الفيوم الساحرة
تستمتعوا بجمال الطبيعة والفطرة 
و باللي باقي وموجود منها
قبل مايتغير هو كمان 
وبدل ماتبقا محافظة الفيوم في جمهورية مصر العربيه 
تبقا( فا يو مو)
 الولاية ال54 من امريكا المحطة:)

هناك 25 تعليقًا:

L.G. يقول...

من أيام الجامعة كان نفسي اروحها ولحد دلوقتي محصلش نصيب عادي من ضمن الحاجات البسيطة اللي مبتتحققش في الحياة

متي بخير
سماح

ابراهيم رزق يقول...

شمس الشموس

انا اول مرة سافرت الفيوم مخرجتش من المحطة و رجعت تانى
اصلى كنت مزوغ من المدرسة

عندك حق و مش الفيوم بس

فى المطرية فى مسلة اللى هى مسلة الملك سوناسرت
ابص على المسلة دى و ابص على المسلة الموجوده فى باريس
مثل الفرق بين معاملة الكلب البلدى و الكلب الجريفون
ابص على المسلة و اقولها يعنى لو اى ملك اهداكى للندن و لا باريس كان بقى ده حالك كان زمانك عايشه فى دلع

تحياتى

Gamal Abu El-ezz يقول...

شمس النهار البوست جميل وبصراحة أنتى شوقتينى لزيارة الفيوم ولكن لا أعتقد أن اليوم سوف ياتى عليها وهى فيومو ولكن للأسف مفروض نكتب للمصرين لوحة فى كل مكاان حتى على سريره نقولهمرفقا بالطبيعه

مصطفى سيف الدين يقول...

لما الانسان نفسه في طريقه للاندثار بقيمه و اخلاقه و ابداعه
يبقى هندور على الطبيعة؟
كله بيفقد هويته دلوقت انت اسلامي او ليبرالي
سعودي وقطري او امريكي و غربي
مفيش حاليا انسان مصري
كل حد بيبص للتاني بالشكل ده

شمس النهار يقول...

*L.G
صباح الفل ياسماح :)

ملحوقه خططتي لرحله مه الاهل ومش هتندموا
علي ضمنتي :)

شمس النهار يقول...

*ابراهيم رزق

كلامك مظبوط جدااااااا ياابراهيم
في سان فرنسيسكوا
تمثال تقليد طبعا لحورس كبير جدا
لو تشوف الناس بتتصور جنبه ازاي
تضحك لما تشبع

عارف انا مشكلتي في مصر اننا بندخل علي فطرة الطبيعه بنوئدها

زماااااان سنة 77 رحنا جمصة بابا وانا وصديق ليه علشان كان عايز يستثمر هناك
مش ممكن علي الطبيعه والجمال ومنطقة التقاء البحر بالنهر خرافه
رجعت احكي لكل الناس علي اللي شوفته سنة 90 ماما قالت ماتيجوا نشوف جمصه دي ايه طبعا انا وافقت علي طول من غير تفكير
ورحنا ورجعنا تاني يوم
ماتت جمصة

صباحك فل ياابراهيم

شمس النهار يقول...

* Gamal Abu El-ezz

:))
صدقني مش هتندم

منطقة وادي الريان دي كانت من اجمل الاماكن الطبيعيه اللي ممكن تشوفها

المنظر راااائع
بس المشكلة مابنسبش حاجه علي حالها

حزب اعداء الطبيعة والفطرة :)

شمس النهار يقول...

*مصطفي سيف الدين

صباح الفل يادكتور
كلامك صح :))
يعني مثلا انت قناوي وانا منياويه:))

دي بقت خيبه عمر المصرين ماكانوا كده
مصر استضافت جاليات كتيييير

واي حد بيجي مصر مابيبقاش عايز يمشي من كتر مااحساسه بالغربه راح

online.lb7 يقول...

السياحة بمصر رائعة جدا

ليلى الصباحى.. lolocat يقول...

اليوم كنت اتكلم مع بابا وماما عن ريف مصر وازاى اتغيرت ملامحه عن زمان ومهما تعالوا فى البنيان وابتعدوا عن المظهر القديم للريف فكل جديد لن يكون له روح الماضى ورائحته الطيبة

لكن مثل ماقال مصطفى ( سيف التدوين ) كل شىء بيتغير واولها الانسان :)

صباحك ياسمين اختى الحبيبة واشكرك على رحلتك الرائعة التى شاركتينا فيها والصور الجميلة بارك الله فيك

تحياتى بحجم السماء

eng_semsem يقول...

للاسف يمكن ظروف الحياه مش مخلينا نستمتع بالاماكن الجميله في مصر رحلتنا الداخليه بالنسبه للاماكن الجميله الكتير في مصر تعتبر قليله جدا
تحياتي

همس الاحباب يقول...

بيدى لا بيد عمرو
مع الاسف نحن ننسلخ من ماضينا الجميل وتراثنا الرائع وهويتنا الجميلة الى اشياءغريبة ودخيلة علينا

re7ab.sale7 يقول...

عاااااااااااااااا
بحقد عليك جداااا
نفسي اووي اني اروح هناك بس ازاي
اذا كنت اتحايلت علي بابا اني اروح لصاحبتي الي عشرة 17 سنة واكتر يقوللي لاء هي تجيلك انت متروحيش العريش
احمد اخويا راح الفيوم قبل كدة وجنني من كلامه عنها واتحايلت عليه اروح معاه بس بردو موافقش
شكلي بعد كلامك هتجنن واهرب م البيت واروح الفيوم واكون شهيدة الطبيعة هناك ^_^

faroukfahmy يقول...

يا شمس انتى بتعايبى عليا من كتر حزنى على مصرنا والاقيكى على نفس المنوال
مصر لم يتغير مكانها ومكانتها ولكن الذى تغير الاحساس بها
لك الله يا مصر وما بها من فيومو قيوم
الفاروق

شمس النهار يقول...

*online.lb7

طبعاااااااااا

مصر فيها اماكن ساحره جميلة

شمس النهار يقول...

* ليلى الصباحى.. lolocat

صباح الهنا والياسمين

المشكلة ان في تراث كامل هنا بيندثر

يعني الفلاحه اللي بتخبز العيش الجميل هتبقا بس في المتاحف
احي اهل النوبه اللي محافظين علي تراثهم من الاندثار

نورتي

شمس النهار يقول...

* eng_semsem

مافيش في مصر حاجه اسمها سياحه داخليه اطلاقااا

حتي السياحه الخارجيه
بيجيبوا السواح يودوهم الاقصر واسوان وخلاص

شمس النهار يقول...

* همس الاحباب

اهلا اهلا ياابو همسه

فينك ايه الغيبه دي

بلوجر نور
:)

اكيد انت كمان لامس الموضوع ده بتنقلك بين القاهرة والاقاليم

شمس النهار يقول...

* re7ab.sale7

:))

اعقلي ماتهربيش واحنا ننظم رحلة للمدونين للفيوم

بس ياتري مين اللي يقدر يقوم بالمهمه دي:))

شمس النهار يقول...

* faroukfahmy

مين قال:)) انامااقدرش اعيب خالص
كلنا هذا الرجل

كلنا نحبها حب حزين

:)

asmaa fathy يقول...

فينك ياشموسه كل ده بترتاحي من رحلة الفيوم
هو المشوار طويل شوية بس مش عايزينه ييجي علي حساب المدونه كده بقى مش هنطلعك رحلات تاني :))

تحيــــــــــاتي

well يقول...

شمس النهار ..
..
رحلة سعيدة وان شاء الله تكرر تانى وتكون مصر والفيوم فى افضل حالتهم
..
والله معلوماتى عن الفيوم انها اسمها "الف يوم" .. ومؤسسها هو سيدنا يوسف عليه سلام الله .. وعرفت ناس كتير من الفيوم شاغلين فى القاهرة واستغربت انهم ما يعرفوش الكلام ده
..
رحلة سعيدة وربنا يقدرنا ونعمل بنصيحتك
..
تحياتى

شمس النهار يقول...

* asmaa fathy

:))
موجودة اهو بس تعبانه علي مشغولة :))

شمس النهار يقول...

well

ماشاء الله علي المعلومات القيمة
انا برضوا اول مره اسمع موضوع الف يوم ده
بس عارفه موضوع سيدنا يوسف وكمان بحيرة قارون دي تحتها بيت قارون لما ربنا خسف بيه وبداره الارض وطلعت البحيرة دي وهي ليها سمك من نوع خاص وكانوا بيملحوه وقريت مره ان ده سمك موسي اللي كان مملح ولما لقي اليم صحي وجري عليه والله اعلم

رشيد أمديون. أبو حسام الدين يقول...

الأماكن الجميلة مع الزمن تفقد جمالها ورونقها، لا أعرف هل هي السبب أم العوامل النفسية هي التي تظهر ذلك، أم أن الفعل البشري هو السبب...
تدوينة تظهر وتكتم أشياء..
مودتي