الخميس، 29 سبتمبر، 2011

جمال عبد الناصر اشمعنا

اشمعنا السنة دي
ذكري عبد الناصر محتفلين بيها كده
حتي الناس العادية برضوا فاكرين وبيتكلموا
يمكن علشان مصر في لحظة تاريخية
ومحتاجة فيها شخص زي عبد الناصر الان وزعامته
يمكن
حد عارف اشمعنا دلوقتي بنحتفل اوي كده
؟؟؟؟؟
انا فاكرة اليوم ده كويس جدا كان عندي12 سنة
وقلت قصيدة في الاذاعة المدرسية
(ايام ماكان في اذاعة مدرسية بحق وحقيقي)
ارثيه بيها كانت كتباها والدتي
وطبعا اكيد سمعتوا اغنية الوداع ياجمال ياحبيب الملايين
الاتحاد الاشتراكي ساعتها عملها والناس كانت بتغنيها
كده من غير فرقة موسيقية
زي اغاني الفولكلور
ومش هنسي منظر الناس وهي لابسه اسود كلهم
وماشيين في الشوارع يبكوا
وفيم اللي بيلطم
الشعب ساعتها كان حاسس انه اتيتم
اللي حبه واللي ماحبوش عيط عليه وبحرقة
الدول العربية وخصوصا
شعب ليبيا والسودان كانوا زينا واكتر
حتي الشاعراحمد فؤاد نجم
رثاه بقصيدة من اروع الكلمات
والمعاني
رغم ان جمال مات واحمد في المعتقل
قال ايه عم فؤاد في اخر القصيدة
====
ابوه صعيدي و فهم قام طلعه ظابط
ظبط على قدنا و ع المزاج ظابط
فاجومي من جنسنا
ما لوش مرا عابت
فلاح قليل الحيا
اذا الكلاب سابت
ولا يطاطيش للعدا
مهما السهام صابت
عمل حاجات معجزه و حاجات كتير خابت
و عاش و مات وسطنا
على طبعنا ثابت
و ان كان جرح قلبنا كل الجراح طابت
ولا يطولوه العدا
مهما الأمور
جابت

=====
ده كليب فيه لقطات من اليوم ده

=====
لو دخلتوا علي اليوتيوب هتلاقي كلبات كتير عن الموضوع ده
وانا بقلب فيهم لاقيت ميدان التحرير
وكوبري قصر النيل
قلت عجبت لك يازمن صور المكانين الان علي اليوتيوب بس بثورة 25 يناير
وتعيشي وتفتكري يامصر

هناك 34 تعليقًا:

sabry abo-omar يقول...

معلش ياشمس علشان خاطرنا والنبى ممكن يكون فيه شبه شوية بس مش عايزين زيه بالضبط يعنى .. معلش إحنا بنتكلم بس مش تقولى لحد

beautiful mind يقول...

رغم ان ليكي وجهة نظر تانيه خالص عن شخص جمال عبد الناصر
اكيد كل شخص ليه مميزات وعيوب
بس هو فعلا كان شخصية قويه
لكن احنا مش محتاجين زيه ولا حاجه
مصر فيها احسن واقوي واعقل
تحياتي

Ramy يقول...

مع الحترام لكل الموجودين


صعب يجى حد زيه

و صعب يكون فى شعب زى اللى كان موجود ساعتها

عارفه حضرتك

زى ما كنا نقول ان ام كلثوم نجحت علشان كانت وسط عمالقة من شعراء و ملحنين

عبد الناصر كان كده وسط عمالقة اللى هما الشعب المصرى وقتها صدقوه

........

بالرغم من أخطائه الكتييير برضه بس الناس كانت بتحبه

شمس النهار يقول...

*sabry abo-omar

:)))

مش لازم كوبي بيست منه
بس حد يشكم الثورة دي
بدل ماهي متبهدله كده

ولا كأنها ثورة
ماحصلتش حتي ثورة التصحيح بتاعت السادات
:)))
شبه يانهار ابيض هي ناقصة عسكر تاني
:)))

شمس النهار يقول...

*beautiful mind

علي فكرة انا كنت بفكر معاكم بصوت عالي
وبقول يمكن

وعبد الناصر رغم ان كان له غلطات بس فعلا كان له حاجات كويسه برضوا
بس علشان العسكر مالهومش في السياسة
وعاملين انهم فاهمين في كل حاجة
الدنيا باظت

:)))

ومعاك ان مصر فيها ناس احسن بس المهم الكاريزما
مافيش كارزما خالص

شمس النهار يقول...

*Ramy

وجووووووون يارامي
انت بتتكلم صح
الشعب نفسه ساعتها كان غير الشعب الان
كان لما حد يخبط حد يعتذر
دلوقتي بدل مايعتذر يقوله مش تفتح ياحمااااار
:))))

وايوة زي ماقلت في البوست بكاه من احبه ومن اختلف معاه

نور القمر يقول...

مساء الخير ...
ياريت يجي واااااحد زيه ربي يرحمه ..
كان رجل عظيييم اوي ..
مع تحياتى
نور

شمس النهار يقول...

*نور القمر

مساء النور يانور

مش لازم حد زيه بالظبط
بس عايزين حد عنده كاريزما
كده
وحقاااااني

لورانس يقول...

سلام الله على شمس النهار .طبعاً موضوع جميل كا لعادة والاجمل ان حضرتك مبتأخريش علينا بمواضيع الجميلة,بس اشمعنا السنة دى ؟ممكن ذى محضرتك قولتى ان مصر فى لحظة تاريخية محتاجين فيها حد ذى عبد الناصر ,بس انا بعتقد انهم عاوزيين يغيظو مبارك مش ممكن برده والله ممكن عارفة ياماما شمس الشعب كل تفكيرة ننتقم من مبارك ونغيظة .التوفيق دائما يارب

ابراهيم رزق يقول...

احببت عبد الناصر

احببت عبد الناصر من حب ابى و امى له
احببت عبد الناصر من حواديت ابى و امى و بالذات ابى الظابط الذى خاض مع ناصر حرب اليمن و اسر و حرب 67 و اسر و شرب من الماء العفن و اصيب و مات بعدها بسنوات متأثرا بتلك الاصابة
رغم الاصابة الا انه مات عشقا فى عبد الناصر
تحكى لى امى ان الجنائز كانت فى كل بيت ممنوع تشغيل الراديو و التلفزيون حزنا على ناصر
مشت امى من منزلنا الى كوبرى القبة على اقدامها لكى تحضر جنائزته
احببت ناصر من كل محل بقالة او جزماتى او حلاق او كشك صغير مازال يضع صورته رغم كل هذه السنوات
احببت عبد الناصر من حبه للقومية العربية مش زى احمد زفت عز لما قال فى مجلس الشعب اللى عايزنا نحارب يدفع
احببته من موقفه بعد النكسة و اعادة ترتيب الجيش و حرب الاستنزاف التى شهدت بطولات خارقة و كبدت الصهاينة الكثير
احببته من موقفه من مذبحة ايلول الاسود و دعوته الى قمة عربية و مات بعد توديع اخلر رئيس عربى بالمطار و مات كمدا و حزنا
احببته لاخلاصه لوطنه و امته رغم ان له اخطاء الا ان ما يغفر له انه احب وطنه و اخلص
احببته و احببته و احببته

مصطفى سيف الدين يقول...

اكتر حاجة لفتت انتباهي في البوست انك كنتي كالبة شطورة وبتتكلمي في الاذاعة المدرسية والميكروفون ده مكنش اي حد بيمسكه :)
عبد الناصر زي اي حد كان له مزايا بس عيوبه اخطر
في ناس تقول احنا خسرنا في 56 عسكريا وانتصرنا سياسيا بعكس 73 كسبنا عسكريا وخسرنا سياسيا
محدش ينكر ان عبد الناصر كان مصيتنا برة وجوة كمان عمل كتير سد عالي وقناة سويس ومصانع والفلاح اخد شوية من حقه بس قصاد كده كانت دولة بوليسية مكمومة الافواه دولة الصوت الواحد
ربنا يرحمه

شمس النهار يقول...

*ابراهيم رزق

ايه ياابراهيم
هتغني بحبها بحبها والا ايه
:))))
حبيته غيابي ياابراهيم
:))))
طيب ليه ماردتش علي سؤال الحلقة
اشمعنا السنة دي
:))

ابراهيم رزق يقول...

المخلوع كانت اكبر خصاله السيئة انه مبيحبش حد كويس او محترم جنبه او له شعبية
و تابعى باالترتيب
منصور حسن
سعد الشاذلى
احمد رشدى
ابو غزالة
احمد جويلى
كمال الجنزورى
عمرو موسى
فلو تم الاحتفال او ظهر اسم او تاريخ عبد الناصر لظهر قامته الحقيقية نصف قزم او ربع قزم
تحياتى

شمس النهار يقول...

*مصطفى سيف الدين
ضحكتني يامصطفي ايوة كنت من ضمن فريق الاذاعة المدرسية
كنت الست المذيعة
:))))
من ابتدائي الي ثانوي
وفي ثانوي كان ياويلهم ياظلام ليلهم
:)))
كانوا بيعرفوا ان ده يومي امسك الاذاعة من دخلتهم لباب المدرسة كنت بذيع بعد القرآن الكريم فيروز الي ان يدق جرس طابور الصباح وفي الاستراحة برضوا كنت بذيع فيروز تخيل بقا مدرسة بتسمع فيروز ساعة الاربه في الاستراحة(ايوة ساعة الا ربع علشان كان عندنا داخلي والاستراحة موعد الغداء بتاع الداخلي)
:)))

سواح في ملك اللــــــــــــــــــه- يقول...

هو عبد الناصر كان زعيم بجد

اصل ياشموستنا الراجل النزيه اللي يموت

وفي خزنته علي ماقرات تلاتين جنيه

حتي لو ليه اخطاؤه الناس بتتجاوز

عنها

لانها بتحس بصدقه

تاني حاجة كان فريد من نوعه

فلم يعرف التاريخ زعيما

يخرج علي الناس ويعلن مسئوليته عن

هزيمة بلاده

فانا اراها شجاعة نادرة

وحين احس الناس بصدقه تمسكوا به

شمس النهار يقول...

*ابراهيم رزق

:))
شكرا يدوم العز

كان نفسي حد يعلق ويقول كده
:)))
كان عايز ماحدش يكون بطل غيره

ولاحظ طريقة الاحتفال بذكري السادات والسينين الاخيرة كان بافريا المملوكة لأحد افراد اسرته كان بينشر الاعلان علي حسابه
حتي السادات اداله كتف قانوني
اللي هو المفروض ينسب اليه 6اكتوبر

شمس النهار يقول...

*سواح في ملك اللــــــــــــــــــه

كلامك جميل ياسواح
بس اشمعنا السنة ادي يعني
الذكري مسمعه اوي كده
:))

سواح في ملك اللــــــــــــــــــه- يقول...

هو ابراهيم كلامه صح جدا

فقد اصاب كبد الحقيقة

تحيتي

شمس النهار يقول...

*سواح في ملك اللــــــــــــــــــه
يبقا اجماع كده ياسواح

:)))
مبارك كان بصرم
:)))

لـــولا وزهـــراء يقول...

لان مصر في اشد وامس الاحتياج لزعيم
تعيشي وتفتكري يا مصر
لولا

فتاه من الصعيد يقول...

انا مصدوووومه في مشاعيري تجاهك :(((

وانا اللي كنت فاكراكي من بتوع الله يخرب بيت مجانيه التعليم :(

عبد الناصر كان راجل علشان هو صعيدي عادي يعني :))

الله يرحمه .... هو له اخطاء كتير بس له اعمال كبيره برضو

Haytham Alsayes يقول...

كان عظيم المجد والاخطاااااااااااااااء

:)

haneen nidal يقول...

تعرفي يا شمس مش بس مصر الي تيتمت العرب كلهم اتيتمو من بعدوا و خصوصا نحنا بفلسطين بعدي ملقناش حد حميلنا ظهرنا الله يرحموا :(

انا لما جيت من ايطاليا كان عندي 7 سنين كانت صورتو معلقة في بيت جدي . . . فاول حاجة جت في بالي انو يكون جدي

و لحد هسا الصورة معلقة عندهم ع الحيط كلما نجتمع هوناك يقعدوا يتريقوا عليا جدك اهو

و هو بالفعل جدنا و مجدنا رحمه الله

sony2000 يقول...

ماما بتقعد
تحكيلي عن ايامه كتير

وبقعد اقارن
في فرق كبير فعلا

ربنا يرزقنا بحد كويس بجد
يارب

مامة مازن يقول...

اما يا شموسه ابنه المهندس عبد الحكيم كان جايب له فيديوهات على قناة التحرير
مش ممكن الروعة والجمال والقوة والحزم اللى فى شخصيته

احنا عايزين حد مننا تعبان فيها وطالع عينه زينا وشايف الاخطاء وعنده حلها
عارفنا ومننا وحاسس منا
اعظم انجازاته العدالة الاجتماعية مفيش عليها اختلاف

الازهرى يقول...

السبب فى كلمة واحدة

إلهاااااااااااااااء

شمس النهار يقول...

*لـــولا وزهـــراء

ايوة مصر محتاج اليومين دول قائد
صح

شمس النهار يقول...

*فتاه من الصعيد

:)))

ليه بس الصدمة ماانا برضوا اتعلمت في ابو مجانية التعليم فترة مش قليلة
:))))


ايوة عبد الناصر كان صعيدي دمه حامي وهو ده اللي فرق معاه

شمس النهار يقول...

*Haytham Alsayes

صدمتني ياهيثم
ده انا كنت فاكره انك
هتصول وتجول
وتحلل الموقف
:))

شمس النهار يقول...

*sony2000

لو الشعب اتحد وبقا كويس
ربنا هيبعت لنا حد كويس
لكن لو قعدنا كده متفرقين
ومختلفين
كل شئ هيضيع
وهيتولا شؤنا الف فاسد وفاسد

شمس النهار يقول...

*مامة مازن

انا دخلت اليوتيوب واسترجعت بعض الذكريات
وازاي البلد كان فيها عدالة

وازاي كمان الناس كانت خايفة من خيالها

كنا عايشين معادلة غريبة
:)

شمس النهار يقول...

*الازهرى
تقدر تقول لي انت فين وماردتش علي الموبايل ليه
كان معايا ناس النهاردة ولا اللي وخداهم حديقة الاندلس
:))

ريري كربكه يقول...

والله يا شموسه احنا بنتمنى يجلنا ذي جمال عبد الناصر بس ده هنجيبوا منين
اللي فات مات بقى وخلاص
الله يرحمه انا مكنتش موجوده وقتها بس طبعا عارفه تاريخه
كان راجل عظيم كفايه سرته الكويسه بين الناس غير صاحبنا ده

شمس النهار يقول...

*ريري كربكه

لأ طبعا عبد الناصر ده
غير اللامباااااارك خالص

اللامبارك ده مايتقارنش ولا حتي بالملك فاروق
ماحدش سرق مصر قده