الجمعة، 23 سبتمبر، 2011

الكركدية


صديقة علي تويتر كتبت تعبااااانة من الحموضة
فاكتبت لها اشربي كركدية بسرعة
وان شاء الله علي تالت او رابع كوب هيكون خلاص

عملت كده ورجعت
ولاقيتها بتقول لي شكراااااااااا
اول مره اعرف ان الكركدية بيضيع الحموضة

بسرعة كده
فا لاقيت اصدقاء كتير بيقول لي نفس الكلام
فاقلت انشر بوست عن الكركدية هذا المشروب المصري الاصيل
من ايام الفراعنة والمصري بيشرب كركدية
وعلشان مااطولش عليكم
ده لينك مدونة الطب البديل
مختصر لطيف بيتكلم عن الكركدية
واللي عايز يتعمق اكتر يدور علي جوجل
=====
وعايزة اقول لمستخدمي الحنة

حته علي جنب
لو طحنتي كوب كركادية لحد مايبقا بودرة وخلطية بالحنة وزيت الزيتون
هتلاقي نتيجة جميلة جدا
---
الكركدية يخفض ضغط الدم
وذلك عند شربه بارداً
كوب في الصباح وآخر في المساء،
ويرفع الضغط عند المرضى انخفاض الضغط
إذا شرب على الساخن كما يشرب الشاي
بمعدل كوب مرة في الصباح ومرة في المساء।
والله الموفق والمستعان
:)))
اي خدمة

هناك 32 تعليقًا:

المعتصم يقول...

السلام عليكم ورحمة الله وبركاته
تحياتى للست شموسه
بجد ظريف موضوع الكركديه ده انا اول مره اعرفالمعلومه دى فعلا انا حكاية الضغط انما موضوع الحموضه جديد عليا
افادكم الله
تقبلى مرورى وتحياتى
ســــــــــــــــــلام

نسرين شرباتي "أم سما" يقول...

معلومة أول مرة بعرفها
شكراً كتير :)

bombona يقول...

انا بحبه فعلا كمشروب لكن ماقدرشى استخدمه على شعرى لانى دايما عامله صبغه ولو استخدمته على الصبغه هايخلى شعرى لون شعر بتوع الاداب ههههههههههه

Sarah .. يقول...

شكرا لحضرتك على المعلومة
بس تجاربى معاه .. مش لطيفة خالص
سواء كان سخن أو بارد
بتجيلى حالة أقرب لانها تكون إغماء .. فمنعته :)

فتاه من الصعيد يقول...

انا بحبه بارد صيفا ساخن شتاءا :)

Carmen يقول...

انا بشربه وانا زوري تاعبني ^_^ معلومة جميلة تسلم ايدك
تحياتي

norahaty يقول...

أى أى أى
أنـا اروح
أشوفلى حتـة
تانية اعيشلى
فيها مابقاش لى
عيش ولا شغل هنا:)
كلامك صح لكن ما نقدر
نعتمد على النباتات
ومستخلاصاتها فى كل
شىء الدواء(شر)
لابد من أحياناً

SHAPE YOUR LIFE (ABOALI) يقول...

جمييييييييييييل الكلام
ولكن
الطب عموما هو تكامل بين كل الافرع
سواء طب بالعشب او طب دوائى مخلق
فالانسان الذى يعانى مثلا من المغص العارض
فى البداية يشرب نعناع وان استمر المغص
يذهب الى الطبيب ولا مانع من استمرار اخذ النعناع كمكمل غذائى

لذا عند ذكر الحموضة يجب قبل اجراء الوصفات
معرفة ان كانت عارضة ام لها اسبابها الطبية
من تهتك جدار المعدة المؤدى الى قرحة
او زيادة فى افراز الاحماض
او اسلوب غذائى خطأ يعتاد عليه الشخص

ولان اضافة السكر الى المشروبات الطبيعية ومنها الكركدية يزيد من فرص زيادة الحموضة لذا يجب شرب المشروب بدون سكر لانه يزيد الحموضة
وحيث ان الكركديه حامضى فى التاءثير
لذا شربه سيؤدى الى الحموضة وليس العكس
لذا الوصفات عموما هى وصفات عندما تكون الشكوى عارضة وليس نتيجة خلل عضوى فى الجسم ذاته او خلل هرمونى او نفسية مضطربة


بس جميل اننا نشرب المشروبات الطبيعية مع جعل امورنا طبيعية ايضا

كل التقدير لانسان قدير

سواح في ملك اللــــــــــــــــــه- يقول...

افادك اله ياست الكل

هناك مشروبات عشبية تاثيرها

بيبقي اكتر من الدواء

والميزة ان مش بيبقي ليها اعراض جانبية

تحيتي

لـــولا وزهـــراء يقول...

ست الكل شمس النهار

الله عليكى والله نتعلم الذوق منك

تسلم الايادى وربنا مش يحرمنا منك يااااااااااارب


زهراء

ابراهيم رزق يقول...

لازم تقولى الكركديه بتاع اسوان
عشان فى انواع كركديه ليس له علاقة بالكركديه

تصدقى انا شفته مزروع على النيل فى الاقصر و قطفته و هو طرى قبل ما ينشف و وضعته فى فمى و كان طعمه مش بطال
تحياتى لمواضيعك
ملحوظة
لو عايزة كركدبه كويس من عند اولاد غيطة انتى عارفاهم و لا لا
نفسى تقولى مش عارفاهم
هههههههههههه
تحياتى

شمس النهار يقول...

*المعتصم

وعليكم السلام ورحمة الله وبركاته

اهلا بيك

ايوة هو مفيد جدا في ارتفاع الضغط
وكمان الحموضة العابرة
اما الحموضة المرضية يجب ان تعالج ثم الكركادية يساعد في العلاج

وعليكم السلام

شمس النهار يقول...

*نسرين شرباتي "أم سما"

الشكر لله
اهلا بيكي نورتيني

شمس النهار يقول...

*bombona

لا ماالحنة ساعتها بتبقا مش برتقاني ولا حمرا
بتبقا بين البنين
وبعدين ده عايز شعر اسود
علشان يدوب يدي ضي

لكن اللي شعرهم ابيض هيديهم احمر مسخسخ

:)))))

شمس النهار يقول...

*Sarah ..

يبقا ضغطك منخفض

وفي الحالة دي هيخفض لك الضغط اكتر
يبقا انتي تشربي عرق سوس
ده بيعلي الضغط جداااااا

شمس النهار يقول...

*فتاه من الصعيد

طبعا الصعايدة وصلوا

الصعايدة بيحبوه

:))

شمس النهار يقول...

*Carmen

فعلا ياكارمن هو جميل للزور
وخصوصا ان الزور لما بيبقا تعبان بيرمي علي المعدة
هنا هو بيصلح من تعب المعدة الطارئ

شمس النهار يقول...

*norahaty

واحنا برضوا نقدر يادكتورة

ده انتي نوارتنا

معاكي الدواء شر لابد منه
لكن مثلا لما تيجي حموضة طارئه كده علي الماشي
نشرب كركدية
شوية مغص اديلوا كمون
مش كل حاجة نجري علي الادوية
وخصوصا اللي اصلا معدته ولا الكلي ولا الكبد تعبان
يبقا حبه من ده علي ده
:)))

شمس النهار يقول...

*SHAPE YOUR LIFE (ABOALI)

كلامك جميل وخصوصا انه من متخصص

بس فعلا كتير الاعشاب بتجيب نتيجة جميلة

وخصوصا مع الناس اللي مابتحبش الدواء اصلا
زي بنتي نمره اتنين لايمكن تاخد دواء ابدا
فابتعامل معاها بالطريقة دي
:))

شمس النهار يقول...

*سواح في ملك اللــــــــــــــــــه

ايوة صح
مالهاش اعراض جانبيه

الادوية في الحاجات السريعه دي
مش مفضلة

يعني حد جاله مغص ماياخد كمون او نعناع
الحياة ختمشي
لكن لو طولت خلاص يرجع للدكتور والادوية
:))

شمس النهار يقول...

*لـــولا وزهـــراء

:)
شكرا ياجميلة علي كلامك اللطيف

وزيارتك

ربنا يكرمك

شمس النهار يقول...

*ابراهيم رزق

طبعاااااااا
كركدية اسوان
اجمد كركدية

مين ولاد غيطة دول
:))))
لأ مش عرفاهم بجد

تصدق انت شرير
:))))

beautiful mind يقول...

الحمد لله انا من هواة شربه
سواء كان ساقع اوساخن
ربنا يكتر من فوايده كمان وكمان
تشكراتنا

شخصٌ مَا يقول...

اممممم تقريبا تقصدي الكركديه بارد
لان اي مشروب ساخن وفيه سكر ممكن يزود الحموضة والله اعلم
على اي حال انا مش متأكد
بس عشان انا متعود على الاعتراض قلت "افتي" في الموضوع
شكرا على المعلومة وان شاء الله نجربه عند الضرورة

شمس النهار يقول...

*beautiful mind

هو ماشاء الله مفيد جدا

وكل الحاجت اللي زيه
زي الخروب والتمر هندي
بس هو ميزته انه بيتشرب سخن وساقع
وعلي كل حالة له شئ شكل يعالجه

شمس النهار يقول...

*شخصٌ مَا
ايوة ياريس
قلت لها تشربه بار
وياريت لو ساقع ومن غير سكر

واعترض زي ماانت عايز من حقك تعترض
:))))
موافقين انك تعترض
ومعترضين انك ماتعترضش
:)))))

Bent Men ElZman Da !! يقول...

جديده معلومه الحموضه دى فعلا
شكراً لحضرتك بجد على المعلومه

مصطفى سيف الدين يقول...

بس في عيب بالنسبة للكركديه لازم توضحيه
ان فيه نسبة اوكسالات كالسيوم عالية علشان كده اللي عندهم حصوة او املاح زايدة لا ينصح ان يزود منه

مدونتــــى يقول...

رائع جدا

شمس النهار يقول...

*Bent Men ElZman Da !!

الشكر لله نورتيني

:))

شمس النهار يقول...

*مصطفى سيف الدين

ده لو كتر منه
وهياخده علي طول
لكن لو حموضة عابرة وهو يوم وخلاص
مايضرش

:)

شمس النهار يقول...

*مدونتــــى

شكراااااااا
:))