الخميس، 15 ديسمبر، 2011

العيال بتوع التحرير والحلابوظا


وماحدش يسألني يعني ايه الحلابوظا
اصلها ماتتشرحش يعني ناس في البلالة
وماحدش يسألني يعني ايه بلالة
اهي حاجة هلامية كده مالهاش معالم ولا لون ولا ريحة ولا اي حاجة
حاجة حلابوظة كده
المهم نرجع للعيال بتوع التحرير
اللي خربوا البلد
وقفلوا ميدان التحرير وعطلوا العجلة
مع ان ميدان التحرير ده اتقفل اكتر من مره
مره 77 ومرة لما كانوا بيعملوا متروا الانفاق
وماحدش جاب سيرة العجلة
ومصر الجديدة نصها مغلق بسبب اعمال المترو
والدنيا اخر زهق وماحدش جاب سيرة العجلة
وهنا بقا عايزة اسأل
دلوقتي بقوا العيال بتوع التحرير خلاص
بقوا وحشين وكخة
بعد ماطلع علي حسهم اللي ماكناش بنسمع لهم حس
ولانعرف لهم وجود اصلا
وكله ركب الموجة ولحقله حته من التورته
دلوقتي بقوا هيخربوها بعد مااتسحلوا واتسجنوا
وضاع نور عينيهم
علشان الحرية والكرامة والعدالة
دلوقتي بتخدوهم منهم
لما اترستأتوا وبقا لكم وجود بتدوروا الدفة عليهم وتقوموا الناس عليهم
وبقوا من اول اعمال منافية .......حتي التمويل الخارجي وكمان يتسموا
وكأن المصري مش مصدق ان في مصري تاني عنده دم وممكن يثور للكرامة والحرية
لازم يبقا قابض
الاول اتفرجتوا عليهم ومن بعيد لبعيد
اهو لو نجحوا نبقا كنا معاهم ولو فشلوا واحنا مالنا
ولما نجحوا فضلتوا تتمسحوا فيهم وتزيحوهم شوية بشوية
لحد ماتمكنتم
زحتوهم خالص طلعوا مابيتزاحوش
قلتوا بس الخطة القديمة شوه ياجدع علي قد ماتقدر
ودس في وسطهم شوية مشبوهين يتحسبوا عليهم
الحملة الاعلامية ضد العيال بتوع التحرير واضحة ومعروفة المعالم
ياريت تلعبوا غيرها
علشان العيال بتوع التحرير دول(شباب وبنات) ارجل من اي راجل في مجلسكم الموقر
والعيال بتوع التحرير دول ايمانهم بالقضية احسن من اي تيار طلع لنا في المقدر والمكتوب
علشان همه بيعملوا لمصر
وانتوا بتعملوا لأهداف خاصة
وكلمة بقولها ومش هبطلها
الشعب المصري مش هيضحك عليه تااااااااااااااااااني
------
سؤال في السريع
هو حملة اشتري المصري دي فعلا هنشتري المصري ولا هنلاقي اللي بنشتريه صيني؟؟؟
-------
بعتذر عن عدم الرد علي التعليقات لضيق الوقت وهرد في اقرب فرصة ان شاء الله

هناك 34 تعليقًا:

سواح في ملك اللــــــــــــــــــه- يقول...

ياشموستنا

الثورة تقوم مرة واحدة

المفروض يبقي التحرير ده رمز جميل لثورة

يناير

لايستطيع الشباب بتوع التحرير دول

منع البلطجية والباعة الجائلين

وكل اللي عايز يشوه رمزية الميدان

الجميلة من الوجود في الميدان

بصي ياشموسة

الثورة مش نهج كل منزعل من حد نثور ونعتصم

فبعد الثورات يبقي هدف واحد

هو اعادة ترتيب البيت

واعادة الترتيب دي متجيش برغبة طرف واحد او مجموعة

واحدة او حزب واحد لا

تيجي بتوافق كل اللي عايشين في البيت

ابراهيم رزق يقول...

شمس الشموس

صلى على النبى
زيدى النبى صلاه

جيتى على اكبر جرح بيوجعنى
لما حد يكون قاعد تحت الباطنية و بيتفرج على التلفزيون و بيسمع الكوميديان عكاشة و هو بيستضيف النجم اسبايدر و يقعد يتكلم و يفتى
عندما ينام فى الصقيع و البرد شباب بعضهم يمتلك فيلل فى الشروق و اكتوبر و القطامية اعرف بعضهم
و عندما يكون طلبة جامعيون يتلحفوا الفضاء بينما رئيس الوزراء يطلب ان يجلس معهم و يرفضون ليس استعلاء منهم و لكنها وجهة نظر و هدف مبدء
نعم اغلب من فى التحرير لا تبغى سوى مصلحة مصر و فقط
لو كانوا يبغون مصلحتهم لداسوا على مصلحة مصر مثل البعض الذى تفرغ لحصد الكراسى
نظرية الثائر الحق محتاجة اعادة نظر لانه لم يتحقق اى هدف من اهداف الثورة
بدليل ان علاء عبد الفتاح فى سجن طرة و ابو علاء مبارك فى مركز طبى عشر نجوم و يحاكم بسرعة اقل مئة مرة من سرعة السلحفاة
عام الثورة هو عام تاريخى لانه على ما اعتقد انه العام الوحيد الذى شهد عشرة مواقع
بدء من موقعة كنيسة القديسين ثم موقعة الجمل ثم موقعة كنيسة اطفيح فموقعة محافظ قنا ثم موقعة البالون ثم موقعة ماسبيرو فموقعة محمد محمود ثم موقعة الحواوشى
الفاعل فى جميع هذه المواقع جهة واحدة هى القلة المندسة يا ترى لم يقبض على اى فرد من هذه القلة المندسة سوى علاء عبد الفتاح
ارحمنا يا رب

sony2000 يقول...

بتوعجني
لما الاقي مصري
بيتكلم عن مصري
بشر:(

rona ali يقول...

اولا مش يهمك موضوع الرد كفايه انك بتدينا الفرصه ندخل نقول اللي عايزينه

بصي انا عمرى مانزلت التحرير ولاعمرى عرفته الا من خلال التلفزيون بس عمري برضوا ما شوفت اللي هناك عيال رغم انى محرم عليا انى اروح هناك
بس صراحتآ اللي يقول عليهم عيال بعد كل اللي عملوا دة علشانا كلنا يبقي لامؤاخذه هو العيل

ومعلش كل يوم بيتثبت ان عندهم حق يكملوا ويثوروا للاخر لحد مايتحقق كل اللي عايزينه لان اللي بيمسك البلد دى مابيجيش غير بالضغط

برضوا من ضمن المواقف اللي ضحكتنى جدآ كنت داخله سوبر ماركت اشتري حاجه ولقيت راجل كبير بعكاز كدة بيتكلم مع صاحب السوبر وبيقولوا هو بقي في بلد انتوا مخلتوش في بلد والراجل صاحب السوبر ماركت كبير اصلا ومعاه شاب كدة عمال يضحك علي اسلوب الراجل العجوز انا مكنتش اعرف الحوار إيه من الاول بس لقيتنى برد بتلقائيه قلتله هو كان في بلد من الاول علشان تقول انهم مخلوش في بلد يعنى بتحرم ابنك من ميراث مش موجود اصلا
قعد بقي بجبرنى اقر ان مبقاش في بلد ههههههههههه هو راجل عجوز اوى واسلوبه يفطس من الضحك بس بجد انا ماشيه بضحك من اسلوبه بس مخنوقه ان حد فقد عينيه ولا اتصاب او اسرة شهيد تسمع الكلام دة حسيت ساعتها ان حد طخنى في دهري بيجد يعنى

بالنسبه لاشتري مصري هما حددوا حاجات مصريه وقالوا اتاكد يعنى ان المنتج مصري مش صنع بلد تانيه
بس انا اعتقد انه هيبقي مصري صينى اكيد ههههههههههههه

ربنا يسترها

Foxology يقول...

" العيال " بتوع التحرير هما اللى زاحوا مبارك وعصابته بس للأسف مقدروش على كلابه وتعابينه !!!

" العيال " بتوع التحرير دول ذنبهم فى رقبة الـ 85 مليون بالظبط لما كان ذنب الـ 85 مليون ف رقبة مبارك !!

لعن الله قوما ضاع الحق بينهم !

تحياتى

rack-yourminds يقول...

يا سيدتي عندما قامت الثوره اشترك الملاييين من ابناء هذا الشعب العظيم مطالبين باسقاط النظام ,وبالفعل سقطت رؤوس النظام وسيسقط الباقي عندما تكتمل مؤسسات الدوله ,لكن اليوم ولنكن صرحاؤ ثمة قله متطرفه من الثوار يريدون احتكار الثوره وتحقيق اهدافهم حتي ولو كانت علي جثة الوطن
امام مجلس الوزراء عشرات من الثوار هل هؤلاء هم الملايين الذي قاموا بالثوره
,يا سيدتي سمعت اليوم من واحد منهم يحتقر ويزدري الشعب ويرفض الانتخابات ويري الشعب المصري امي وجاهل ولا يحسن الاختيار ,هم يريدون رحيل العسكر وكلنا لنا نفس المطلب ولكن كيف يرحل العسكر ؟هل يرحل فورا ونترك البلد للمجهول ,ام يرحل العكسر عير خريطة الطريق التي رسمها الاستفتاء,يا سيدتي لا يجب ان ننافق كل من ذهب ووقف في الميدان ,فمصر اكبر منا جميعا

كيــــــــــــارا يقول...

خربتوا البلد كتكوا القرف
دا منظر حضاري دا دول همج

وبس بئا لاني علي الاخرررررررررررر

ستيتة يقول...

أمممممممممممممم
طبعا امبارح كان اشتري المصري
بس متعرفيش مصداقا لقول الله تعالى
وشروه بثمن بخس دراهم معدودة وكانوا فيه من الزاهدين
ولا للكلمات القائلة
اشتروني واشتروا خاطر عيوني .. ها تفقعوني

صباح الفل

eng_semsem يقول...

اختي العزيزه ارى اناس اتجهوا للعمل لنهضة الدوله وبنائها وبناء منظومه تعبر عن الشعب وتتهم بانها تريد مصلحتها الشخصيه واناس يستمرون في ثوره من اجل ماذا ولن اقول انهم هم من يثيرون الفتن ولكن يجلس بينهم من يثير الفتنه ويشعل النار كلما هدات وان كان تعبير من يعترض او يشتم او يلعن او يموت في حريق اشعله من يجلس بجواره لقب ثائر فانا اظن انهم لوثوا الثوره اكثر مما افادوها وهم يجلسون في الميدان لانهم لا يعرفون طريق اخر فهم لا يملكون فكر ولا تنظيما لاقامة حزب يعبر عن رايهم ولا يجدون من يتفق معهم لذلك لا يهتمون بالانتخابات لان النتيجه محسومه وليست في صالحهم
وانا لا اشكك في صدق نواياهم ولكن ارى ما يفعلون له تاثير سلبي على كل المصريين
ولا يقومون بدور ايجابي يخدم الوطن
وتحياتي لرايك وقلمك

infowksl يقول...

جرس الإنذار يدق أبواب بلاد المسلمين فكونو يدا واحدة جميعا وابتعدو عن السياسين حتى لو جائكم مصحوبين بالآيات والأناجيل اللهم ارحمنا وجنبنا الفتن ما ظهر منها وما بطن الله آمين

zizi يقول...

شمس الشموسة الجميلة ....وحشتيني جداً جداً جداً أمممممممممممممممممممدي قبلة عظيمة على خدك وحضن كبير قوي ..وبعدين معلش انا حاعلق على حاجات كتير اثلجت صدري وانتي افصليها براحتك ..اولاً التحرير ربنا يسترهاويسلم التحرير ومصر كلها من اللي بيحصل ..ثانياً الف الف الف مبروك جواز بنتك التانية وربنا يسعدها ويسعدك بيها ..ومبروك لكيمو وربنا يسعده هو وكل الشباب اللي زيه ..اما مسألة الشمع الأحمر فدي طريقة من ايام اجدادنا الفراعنة ولعلمك هم بيسموه الجمع بتلات نقط وبيقولوا قمنا بالتجميع بالجمع الأحمر..ونيجي بقى لمسك الختام بنوتك الحلوة الخريجة أد الدنيا انتي عارفة لما بتحكي بأقول ان لسه في في مصر حاجات حلوة وافتكرت يوم تخرج بنتي من كلية الإعلام ..وياريت تكون في مصر حاجات حلوة اكتر واكتر ..واتمنى اني اكون علقت على كل ما قريت وماكونش نسيت حاجة...وماتتصوريش زيارتك لي اسعدتني اد إيه وطبعاً كنت حانسى اهم حاجة انا جاية عشانها اني اهنيكي بالحج والرجوع سالمة غانمة وجعله الله حجاً مقبولاً وذنباً مغفوراًان شاء الله ..اما عن البضايع فأنا باشك انها مصريةالا ما عصم ربي ...ومن اظرف الإعلانات عن البضايع المصرية اعلان من عامر جروب : كل اللي يشتري شاليه من مجموعته حا يديله الفرش كله هدية ...ههههههههههههههههههههههههه...بذمتك مش هم يضحك وهم يبكي ...بس خلاص ولو سمحتي اعمليلي معاكي كوباية شاي مضبوطة ...

صوت من مصر يقول...

المطلوب داتا بالأسم والتليفون لأسماء الكتاب ومدوناتهم ..
موقع الفجر
http://www.elfagr.org
الباب
http://www.elfagr.org/Detail.aspx?nwsId=0&secid=19&vid=2
للتواصل معى 01225171958 كيمو
مامتى ياريت شير للناس ......

وجع البنفسج يقول...

عجلة الانتاج تتوقف لأسباب اتفه من التافه أحيانا .. وهي الآن حجة من لا حجة له ..

بالنسبة اشتري المصري .. بصراحة مارأيناه كان أكبر بكثير .. وكان المشهد " اللي ما يشتري يتفرج "

يبدو أن مصر الحزينة موعودة مع الحزن اليومي ..

قلوبنا معكم دائما ..

فشكووول يقول...

كل اللى قلتيه صح بس ما تنسيش ان الثوره كانت ثورة الشعب المصرى بالكامل مش ثورة شباب زى ما بيقولوا .. والشباب كانوا فى المقدمه .. الجيش ما هو كله شباب .. يعنى نسميه جيش الشباب .. والمنتخب الوطنى كله شباب .. يعنى نسميه منتخب شباب الكوره .. فيه اخطاء .. لكن التحرير هو الاصل .. هو اللى حررنا .. بس لازم نراجع اعمالنا وافعالنا .. وانا دى وجهة نظرى ..

شمس النهار يقول...

*سواح في ملك اللــــــــــــــــــه

نعيد ترتيب البيت ازاي
والنظام لسه موجود
ماحدش ساب مكانه

في 23 يوليو نسفت الحمام القديم
احنا لسه النظام القديم يحكمنا

شمس النهار يقول...

*ابراهيم رزق

اللهم صلي وسلم وبارك علي الحبيب المصطفي صلي الله عليه وسلم

ماخلاص ياابوزياد
الثورة شوهت وفرغت وسرقت
الناس مش قادرة تستوعب الفرق بين القيام بثورة والقيام بحركة اصلاح

ده السادات الله يسامحه اللي جلبلنا التيارات الاسلامية
لما عمل ثورة التصحيح
شال كل الرؤوس الكبيرة في جميع المواقع
ماخلاش من اول رئيس تحرير لرئيس مخابرات مرورا بالجامعات والبنوك والاعلام الخ الخ
واحنا قمنا بثورة ومن يحكمنا الان من فريق مبارك وعصابته

الازهرى يقول...

يعنى إيه بقى حلبوظا ؟؟؟؟؟؟؟؟

الاحلام يقول...

متى ستشرق شمس الحريه
هل لابد من استشهاد كثير من الشباب حتى تشرق
ام لابد من عمل كثير من المليونات حتى نستمتع بدف الشمس
ام ماذا لابد ان يحدث
هل الامل اصبح بعيدا ام مازال هناك امل كى نشعر باننا سنعيش حياه كريمه
تحياتى ابوداود

dreem يقول...

ازيك يا شموسة
حمد الله على سلامتك ومعلش متأخرة بس ملهية انا فى حاجات كتييييير انا اسفة على التأخير والتقصير ... حج مقبول وذنب مغفور ان شاء الله وربنا يتقبل منك صالح الاعمال ,, حمد الله على سلامتك يا حبيبتى
كل التحية لشخصك الرقيق

شمس النهار يقول...

*sony2000

المصرين ينفردوا بده
من اول التخوين الي التعرض للأعراض

شمس النهار يقول...

*rona ali

الوضع بقا في مصر غريب
غسيل مخ علشان الثوار يبقوا كخه
ماخلاص اللي طلع طلع علي اكتافهم

:(
وادي الشباب بيتساقط
والبنات بتتسحل
لصالح مين؟
ربنا يسترها علي مصر
من العصابات اللي مش عايزة الثورة تكمل

شمس النهار يقول...

*Foxology

تفتكر مبارك اتزاح فعلا!!؟؟

البلد بقا عمال ينهش فيها اللي ينهش
تحس ان في شئ بيتوضب
بس ويمكرون ويمكر الله والله خير الماكرين

شمس النهار يقول...

*rack-yourminds

انا ارفض ان يخون بعضنا البعض

او يحتكر احد القرار او الثورة

وماينفعش نبقا مختلفين اوي كده
نختلف اه لكن للختلاف حدود

وعلشان ده يتم ويحصل توافق لابد من الحوار البناء
وليس حوار الصراع
في النهاية مصر فوق الجميع
وفوق المصالح الشخصية

شمس النهار يقول...

*كيــــــــــــارا

كلنا مخنوقين ياكوكي الوضع بقا

غريب جدا
ربنا يستر

شمس النهار يقول...

*ستيتة

وحياتك اشتري المصري
كان كله صيني وتركي وبلاد تركب الافيال

البنات رجعوا من المحلات مااشتروش حاجة
اصلا

واطبخي ياجارية كلف ياسيدي

مساء الهنا

شمس النهار يقول...

*eng_semsem

الايام هتبين
وهنعرف ايه اللي بيحصل
والدنيا هتمشي لفين

بس ثقتي في الله كبيرة
ومتفائلة

والزمن بيبين
الحلو هبان والعفش هيبان علي راي الصعايدة

شمس النهار يقول...

*infowksl

للهم ارحمنا وجنبنا الفتن ما ظهر منها وما بطن الله آمين

دعاء جميل

آآآآمين

شمس النهار يقول...

*zizi

اهلا اهلا بالحبايب

وحشتيني ووحشني وجودك حدانا
:)

وشكرا علي تعليقك الجميل
االشامل الجامع

:))

وعقبال مااهنيكي بالحج
ربنا يكرمك
نورتيني

شمس النهار يقول...

*صوت من مصر

هعمل بالمعلومات دي بوست
وانشر الخبر
دي فكرة لطيفة جداااااااااااا

منور ياعريس
:))

شمس النهار يقول...

*وجع البنفسج

اهلا بيكي

رحت ازورك واسلم لاقيت المدونة
اجازة
:)
اجازة ماشي لكن غيبة مش ماشي
:))

العجلة مايلة اصلا من زمان

شمس النهار يقول...

*فشكووول

ايوة الثورة ثورة الشعب المصري كله
وكنت كتبت بوست عن ده
من كتر ما الاعلام المصري قعد يمدح ويسبح
لكن هو مافيش وسط خالص
ياامجد وامدح
يااخسف بيهم الارض
وليه الشعب المصري لغي تفكيره كده

وكلامك صح
بس مين بيراجع افعاله ده لو لفت نظر حد انه غلطان بتبقا سنة سوخة:)))

شمس النهار يقول...

*الازهرى

:)))
تيجي منك انت:)))))

انت مش شوفت نور الدين:)))
هو ده حلابوظا

مالوش في البلاله
:))))

اخبار المسيرة لخطوبة كيمو ايه:))))

شمس النهار يقول...

*الاحلام

ان شاء الله هنعيش حياة كريمة

بس موضوع مليونيات عمال علي بطال ده فقد تأثيره

لابد من تقنين الخروج
لمنع الصدام

ونكتفي برموز تقف وقفات احتجاجية
وان مانفعتش تبقا مليونية

شمس النهار يقول...

*dreem

اهلا اهلا بالحبايب

مافيش تقصير
الدنيا تلاهي والوقت فعلا مابيقضيش
:)
والله يسلمك عقبالك ياجميلة ماتحجي ان شاء الله

نورتي المدونة