الأحد، 9 أكتوبر 2011

الهجرة


من دواعي افتخاري وحبي لمصر
اني متاح لي ان اهاجر وبسهولة وارفض
والحمد لله
ولي صديق من ايام الكلية مثلي ممكن ان يهاجر وبسهولة هو واسرته
ويرفض متمسك بتراب مصر
وزوجته الحبيبة تصر علي تربية اولادهم في مصر
لما بنقعد في وسط اصحابنا المشتركين بيتريقوا علينا
ويقولوا في حد يلاقي الفرصة دي ويقول لأ
لكن
النهاردة جاني منه تليفون بيقولي
انه هيبتدي يعمل ورق الهجرة ويلتحق بأخواته في كندا
بجد اتخضيت
وقلت له ليه كده ومراتك موافقه ؟؟
سألته لعلمي انها اكتر مني عايزة اولادها يتربوا في مصر
قالي ايوة واكتر مني
ليه كده ؟؟
ده من دواعي فخري تمسكنا بمصر
قال لي مصر ماعدتش زي الاول
ومش امان للمسحيين
الكلمة وجعت قلبي
قلبي موجوع عليكي يامصر

هناك 22 تعليقًا:

ابراهيم رزق يقول...

رغم ان قلبى موجوع من مقالك

الا انى افتكرت حاجة الجمعة اللى فاتت كنا طول اليوم قاعدين انا و فاتيما مع مينا و مين اللى بيكلمنا بالتيلفون عشان يطمئن علينا رامى
قولى له مصر بخير طول ما فيها مينا و رامى و فاتيما و شمس النهار
و بكرة لينا لان ظلام الدنيا لا يقدر على حجب ضوء شمعة
لو هنولع فى نفسينا هنور الظلام

تحياتى

سواح في ملك اللــــــــــــــــــه- يقول...

شموستنا

مصر رغم كل الاضطرابات اللي حدثت اخيرا

لكنها اامن بلد في الدنيا

انا مش عارف زميل حضرتك ده بيوصفها

انها مش امان بناءا علي ايه

حاتم عبدالفتاح يقول...

قلبنا كلنا موجوع على مصر
ربنا يرحم الشهدا أقباط ومسلمين
وينتقم من الظالم

ريهام المرشدي يقول...

فعلا قولتى الكلمة التي تصف ما نحسه
قلبي موجوع عليكي يا مصر :(

شمس النهار يقول...

*ابراهيم رزق

كتبتلهم امبارح علي تويتر لما طبعا ابتدا اللطم علي الاحداث

همه اللي بيضربوا في بعض دول مسيحين زي اصحبنا وحبايبنا
ومسلمين زي قرايبنا واصحبنا
ولادول ايه

مين الكمبارس دول بيجيبوهم منين؟؟؟
وكل ده ليه
وايه السيناريو المرعب ده اللي كل مايتزنقوا يطلعولنا بيه
وهو هو نفس السيناريو
الفتنة الطائفية
للدرجة دي همه بيلعبوا بينا ولا العرايس الماريونت

بس برضوا عندي امل وحاسة ان بكره احلي

شمس النهار يقول...

*سواح في ملك اللــــــــــــــــــه

صديقي ده ياسواح له قصص مع الفتنة المفتعله بصراحة

هو ساكن في فيصل
واختة كانت في احداث كنيسة اسيوط

وكل شوية قلاقل
وطبعا زينا كده كلنا حزين من اللي بيحصل
ومارضتش اكتر معاه امبارح قلت لما الدنيا تهدي نتكلم كويس

شمس النهار يقول...

*حاتم عبد الفتاح

ان شاء الله هينتقم منهم ربنا
زي مااخد اللامبارك وعصابته اخد عزيز مقتدر
هياخدهم همه كمان

شمس النهار يقول...

*ريهام المرشدي

بيقطعوا فيها
مش مهنينها علي حريتها
الغربان زعلانين ان الشعب بكل تياراته بقا ايد واحدة

مصطفى سيف الدين يقول...

في تلك اللحظات يجب الروية وتفهم ما يجري قبل الحكم على الاحداث
قبل اتخاذ قرارات مصيرية يجب ان نعلم ما الذي حدث ولماذا حدث
ومن هؤلاء ومن اين اتوا
قبل التفكير فيما سيحدث غدا يجب ان نعلم ما الذي حدث بالامس
تحياتي

سبايدرمان يقول...

ان شاء الله ازمه و هتعدي
بس عايزه الى يتعامل بقوه وحزم مع الناس الى بتحاو تعمل فتنه و تخرب البلد

شمس النهار يقول...

*مصطفي سيف الدين

كنت بقول كده امبارح علي تويتر
لازم نهدي علشان نفهم علشان نقدر نتصرف صح

الموضوع مش لطيف
مش كل مايحبوا يولعوا في البلد
تبقا الولعة سهلة كده

شمس النهار يقول...

*سبايدر مان

ده لازم
بس القوة لازم تكون في محلها
مع المخربين
مش مع السلميين
وفي نظري المجلس تهاون مع المخربين والبلطجية
وادي النتيجة

haneen nidal يقول...

ربنا يكون في العون

و ان شاء الله تكون غمامة و تعدي

yasmina يقول...

بجد قلوبنا كلنا موجوعه فعلا بجد اوى على مصر

ربنا يحميها بقى ونعدى الايام اللى جاية على خير

تحياتى دايما

نور القمر يقول...

ربنا معاكم يا اهل مصر وانتم شعب وااااااااحد ايد وااااااحده كلكم مع بعض .. وربي يستر
نور

شمس النهار يقول...

*haneen nidal

ان شاء الله تعدي

وحاسة ان بعدها فرج

شمس النهار يقول...

*yasmina

كل المصريين الحق الشرفاء

قلبهم موجوع علي الجرح

شمس النهار يقول...

*نور القمر

شكرا علي مشاعرك يانور
ربنا يكرمك يارب

وجع البنفسج يقول...

اللهم أنى أستودعتك مصر..♥ رجالها و شبابها .♥.

نساءها و فتياتها .♥. أطفالها و شيوخها .♥.

اللهم أنى أستودعتك ممتلكاتها و مبانيها و منشآتها .♥.

اللهم أنى أستودعتك نيلها و اراضيها و خيراتها .♥.

اللهم أنى أستودعتك أمنها و أمانها و أرزاق اهلها .♥.

اللهم أنى أستودعتك حدودها و بحورها و جنودها .♥.

فأحفظهم بحفظك يا من لا تضيع عنده الودائع و أنت خير الحافظين .

الجوكر يقول...

صديقتى شمس

انا لست مع كلام صديقك

لماذا هذا الخوف

فنحن نتعايش بحب منذ الاف السنين

فلى جيران واصدقاء مسيحيين

يجمع بيننا الحب والإحترام المتبادل نشاركهم اعيادهم وافراحهم واحزانهم

كما انهم ايضا يشاركونا كل المناسبات

كما ان المسيحيين الآن اصبح لهم صوت عالى ومسموع اكثر من ذى قبل

والدولة تسمع لهم اكثر مما تسمع من المسلمين

وبعدين ياسيدتى

ما يحدث الآن من بلطجة لايطال المسيحيين فقط

فكلنا فى الهم سواء

وان شاء الله عندما يتم بناء المؤسسات الدستورية والتسريعية

ويصبح لنا رئيس دولة منتخب يتوافق عليه الالجميع

ستكون هناك حكومة قوية

تعيد الأمن والأمان لبلدنا الحبيب

...

شمس

لكِ تقديرى

ديارا المصرى يقول...

بجد أن حزنت جدااااااا من اللى حصل
.......حزنت على مصر
مصر مش تستحق اللى بيتعمل فيها ده...فتنة ....تخوين ....فساد ....ظلم
لكـِ الله يا مصــــــــــــــــــر

غير معرف يقول...

يا سلاام؟
طب ماهي كمان مش أمان للمسلمين دلوقتي!!
مش بيقولولك نطلعهم برده ودي بلدنا إحنا ونطلب منهم الاعتذار عن قرآنهم..يبقى نسيبها كلنا ونهج أحسن عشان محدش يزعل...
المسيحي يسيبها عشان خايف من المسلم والمسلم يسيبها عشان خايف من المسيحي وعلى مصر السلام!!