عبرنا الهزيمة يا مصر ياعظيمة

كتير فكرت اني اكتب عن الهزيمة والنصر وخصوصا اني عيشتهم مابين عدم الفهم و الدهشة والمشاركة
وأخيرا قررت ان ادون عنهم
هي رحلة اثرت وشكلت في نفسي الكثير
نبدأ بيوم 5يونيه كنت طفلة شفت الناس بتهلل كل متسمع خبر من الراديو والتليفزيون
وفرحانين جدا وكلمة حرب علي كل لسان وطبعا كطفلة سالت امي عن معناها

وبعد كتير لاقيت امي تبكي و امي من النساء القوية التي لا تبكي ابدا الا للشدائد
وأبي حزين جدا وكان لي عم لسه متوفى افتكرت حد تاني مات
وبعد شويه مظاهرات في كل مكان والرئيس جمال يخطب و ابي جالس هو وأمي وعمي بيسمعوا ووقف عمي غاضب ولن انسي كلماته الغاضبة (لا تعملوها وتسبوها تخرب)

و انا مش فاهمه حاجه
و كل مانروح حته ألاقي الناس زعلانه ولما يبتدوا يتكلموا يبكوا
و الاسرة مجتمعه لفقد اتنين من الاسرة وسمعت أول مرة كلمت اسر
حتى بوابنا في يوم من الايام لاقيت مراته عماله تصوت وتصرخ وهو يبكي بشده
ولما بابا سأله قال له ابني مفقود (وللآن لم يعود)

انا مش فاهمه حاجه حد يفهمني
وواحدة واحده ابتديت افهم وشفت الشباب بيلفوا يدهنوا الزجاج ازرق وكل عمارة بتبني قصدها طوب عالي
وعاد اسير من العائلة واستشهد الاخر
وكان كل شويه اشوف ناس شايله عفشها وبيسكنوا في كل مكان نروح فيه

ولما سالت قالوا دول المهجرين من علي مدن القناة
اللي عنده عمارة كان بيشطبها بسرعة عشان الناس المهجرة تسكن
ما هي بيوتهم اتهدت وبلادهم اصبحت علي خط المواجهه
وكنت بسمع عن الاولاد اللي مش لاقين ورقهم عشان المدارس وحاجات ما كنش عقلي قادر ساعتها يستوعبها
وكبرت مع هذا الهم والحزن العام وما كنش حد بيتكلم في الموضوع ده خالص عار لازم ما نتكلمش عنه
عاشت مصر في سرادق عزاء كبير جدا واجزم انه لم تزف عروس بفرح هذه السنه
ومرت السنين
ومات عبد الناصر والحزن بقا اكبر والبكاء في كل بيت
حتى جدي الذي لم يحب الرجل يوما(بسبب التأميم وأشياء اخري)
بكاه وسمعته بيقول الله يرحمه
وكتبت امي قصيده صغيرة قرأتها في الاذاعة المدرسيه بنفسي
ومرت الايام وتابعنا حرب الاستنزاف وحكايتها التي لا تنقطع
وقبل مااتكلم عن حرب اكتوبر

عايزة احكي قصه سمعتها من احد طيارين 67
كانوا في مطار الاقصر وضربت طيارتهم علي الارض وهمه بيتفرجوا مالحقوش حتى يعملوا اي حاجه دك المطار وسوي بالأرض
وهمه راجعين في القطار ونفسيتهم في الحضيض اتكسفوا يقعدوا علي الكراسي من غير اتفاق لاقوا نفسهم كلهم قاعدين علي الارض منكسي الرؤوس
حسوا انهم اتخدوا علي خوانه ماحربوش عشان يخسروا
همه دول نفس الطيارين اللي جابوا النصر ومحوا العار في73
وللحديث بقيه