خلصت الحرب بكل ما فيها من بطولات وفضلت روح اكتوبر ترفرف علي الوطن العربي ومصر والكل سعيد
وعايزة اتكلم عن الوضع العربي في اكتوبر
بصراحة الوضع العربي كان جميل ومشرف واتحاد كان نفسنا يفضل
من مساعدات حربيه لقطع البترول الي اخر المساعدات
بس العرب دفعوا تمن الاتحاد ده غالي اوي
نستعرض الوطن العربي بعد 73
بعد الحرب السادات ابتدأ يفاوض علي السلام
وانقسم العرب طبعا مع ان اللي رفضوه زمان رضوا بأقل منه الان بس مش ده موضوعنا
اللي يهمني ان العرب انقسموا علي بعض وعزلوا مصر عربيا عنهم
ده غير الحرب اللي كانت هتقوم بين مصر وليبيا
ووضع الجيش علي الحدود مع ليبيا
وابتدأت الانقسامات الداخليه علي كل بلد
ابتدأت بلبنان والكل عارف الحرب الاهليه اللي ابتدأت شرارتها مع اواخر 74 ورسميا 75
وفضلت لبنان متقطعة
شعبها يقتل في بعض
ولما كانت ألازمه هتنفرج ويلاقوا حل
اسرائيل اجتاحت الجنوب اللبناني واحتلته
ده غير هيمنة سوريا علي لبنان وما يسببه هذا من مشاكل داخليه
والجزائر نفس القصه انقسم الشعب علي بعضه
وفتنه مابعدها فتنه
وبرضه شعبها يقتل في بعض
ده غير مشكلتها مع المغرب ده غير مشكلة المغرب مع الصحراء وقضية الحكم الذاتي
والسودان وقضية الجنوب وبرضوا الشعب بيقتل في بعضه
نروح لليمن حدث ولا حرج شعب مسلح ضد بعضه وضد الحكومه
ونروح علي الخليج العربي ماسلمش برضه
قطر والبحرين وقضية الحدود والخناقه علي جزيرة صغيرة
ونوصل للقضيه والمصيبه الكبري
الحرب بين العراق وايران
وبعد كده غزو العراق للكويت ومسمار جحا
الذي اتي بالقواعد الامريكيه الي الوطن العربي مره اخري
اوماااال هو امريكا وأوروبا هيسيبوا معركة تاني تقوم بين العرب واسرائيل من غير مايكونوا موجودين في المنطقه وبسرعه يدافعوا عنها ويربوا اللي يفكر يمسها
وجت القواعد رسمي الوطن العربي
ومش كده وبس ويدفع لها اموال للحمايه من البعب
ده غير القصه الجديده كل المسلمين ارهابين
وبعدها علي طول الحرب علي العراق وتقسيم العراق
وتفتيته حته حته علي رواقه ونهب ثرواته
فضلت حته علي الماشي كده يخدوها في السكه
هي
الانقسام الحاصل للفلسطينيين وبدل ما ينتبهوا لقضيتهم الاساسيه يقتلوا ويتخنقوا مع بعض
عشان القضية تفضل معلقه علي مايكملوا الاستيطان
فاااضل مييييين
مصر
هنسيبها ؟
لا طبعا !!
مصر فيها اكتر من قضيه مهمله
والحكومه لابتحل ولاتربط فيها
ده غير ان شعبها عايش في امان الله
طيب نعمل له ايه؟
نوقعها مع الفلسطينيين ونعمل مشاكل علي الحدود
ونبتدي نزرع الفتنه بين المسلمين والمسيحين اللي طول عمرهم ماحدش بيعرف ده من ده
وبعدين نقلب المسلمين نفسهم علي بعض والمسيحين علي بعض
وبعدين نشوف بقا قبائل سيناء ونقلبهم علي النظام
وبعد كده ننزل علي الجنوب ونزرع مشكله بين مصر والسودان ونحي مشكلة قديمه اسمها حلايب وشلاتين المحلوله اصلا من ايام عبد الناصر
وفاضل حته علي الماشي ماحدش واخد باله منها
النوبه الجميلة
واهل النوبه وحقهم الضايع ومشاكلهم اللي ماحدش سامعها اصلا
وبعدين ندخل علي نهر النيل ونقلب دول الحوض كلهم علي مصر
ومش عايزة اجيب سيرة الكورة اللي اتخدت زريعه علشان نفرق بين شعبين زي مصر والجزائر
ومصر وتونس ومصر والسودان
مافيش اي حاجه صغيره الا وتقلب الناس علي بعض
حتي الدول الصغيره في الوطن العربي اللي كانت حبيبه بيقلبوها علي مصر ويفهموها ان بفلوسهم هيقدروا يتطاولوا علي مصر
مش كل دي فتن؟
علي فكرة
الكلام ده مش سياسه الكلام ده من قلب مواطنه مصريه عربيه قلبها موجوع بسبب ان الوطن العربي اللي اتحد في وش امريكا والغرب وانتصر يكون ده حاله النهارده
الا من رجل رشيد
هييييييييييييه
ردحذفالأول
الأول
الأول
يانهاااااااااااااااار أبيض
ردحذفوكسبنا البرييييييييييييييييموووووووووووو
ردحذفالسلام عليكم للاسف هزمناهم عسكريا وهزمونا نفسيا واحنا مستسلمين لهم زي متقولي كده مخدريننا القاعده العربيه بتقول (فرق تسد) وامريكا عشلن تسود العالم فتت الاتحاد السوفيتي القوه المنلفسه اللي كانت عامله توازن تخياتي
ردحذفاهلا اهلا
ردحذفالاول اهو من غير واسطه
:)
*سواح في ملك الله
ردحذفالمشكله ان اذا كان احنا عارفين ده والتاريخ فيه عبر كتير للدسائس والمؤمرات علي الشعب العربي والمسلم
ليه سبناهم يعملوا كده
هو ده السؤال
السلام عليكم
ردحذفاختنا العزيزه
قلتى اللى جوانا كلنا بجد
ايه اللى فاضل
اردد كلمه محمد صبحى حينما قال
الاسوء لم ياتى بعد
لسه فى امل فينا اننا نحاول نفكر بقلب وعقل كبار ازاى نوحد نفسنا ونمع الفتنه انها تتزرع فى ارضنا شوفتى حوار رئيس لمخابرات الاسرائليه المقال قال اننا زرعنا بذور الفتنه فى مصر على مدار30سنه فاتت فتنه طائفيه وانتشار الارهاب
مصر اقل بلد فيها اقتتال طائفى فى العالم كله مش زى باقى الدول لا بيض ولا سود ولا اصليين ومتطفلين
احنا الاصل الحمد لله لسه فينا الخير
الحمد لله
يارب الطف بحالنا يارب
علشان سيبنا ديننا اللي قال لنا في الايه الكريمه ( واعدوا لهم ماستطعتم من قوة) صدق الله العظيم
ردحذف"فرررررق .. تسد "
ردحذفولعبوها فعلاً صححححح
الاحتلال العسكرى اهون بكتييييير من الاحتلال اللى احنا فيه الايام دى
احتلال واضح وكلنا شايفينه عشان كده كنا بنتحد ضده
اما دلوقتى .. احتلال من تحت لتحت ... اه صحيح كلنا عارفين اهدافهم او يعنى معظمنا بس مع ذلك بنتناساها
عارفين ان كلللل همهم يفرقونا ومع ذلك مع اول ماتش كوره نقتل فى بعض وهاتك ياشتايم فى بعض
بيتهيألى بروتوكولات حكماء صهيون لازم تتقرى قبل وبعد كل وجبه عشان نفتكر دايما انهم بيكرهونا وعشان نتعلم
هنقول ايييييه ؟
لكى الله يامصر
بداية البوست
ردحذفلا توحى أبداً بنهايته
الحقيقية المؤلمة
أأأأأأأه يا قلبى
بس الحمد لله احنا بنساعدهم بطريقة جيده
ربنا يحفظنا
أنا لها
ردحذفأنا لها
ما من ألم إلا وسيزول
وإن كنت الآلم شديدة الوجع
فهذا من كبر الرجح
والحل الكي
حتي نستفيق
ونتحد تحت رايه الإسلام
ويعيش الجميع مسلمين ومسيحي بكافة معتقداتهم
تحت ظل راية واحدة أنه " لا اله إلا الله "
ماشاء الله يا شمس
ردحذفشرحتى الموضوع و فندتيه كويس اووى
فعلا لغايه اكتوبر 73 كان الوطن العربى قمه الاتفاق و التفاهم
كل المشاكل بدأت بعد معاهده السلام
مع انى من اشد المؤيدين ليها
فعلا كلنا مشاكل بل و كوارث ايضا
ربنا يهدينا و يجمعنا على كلمه واحده ان شاء الله
السلام عليكم مقدرش أقول ما حصلش وفعلا حاجة توجع القلب لكن انا بس عايز اسأل سؤال الاهم من وجهة نظرى لية وصلنا للحال دة لية بقينا كدة وبالله عليكم محدش يقولى عشان بعدنا عن الدين تحياتى
ردحذفالله يفتح عليكى
ردحذفحقيقى كلامك حكم
وبستمتع وانا بين سطور قصتك
ربنا يبارك فيك
بس ياقلبى انا معاكى فى كل كلمه
بس الامل دايما موجود
لاننا مصريين
وجنودنا خير جنود الارض
وانا اثق فى رجالنا الشرفاء المثقفين حتى لو كانوا قله
وليكى هديه عندى
عيد حب سعيد عليكى وعلى اسرتك
تحياتى
التأريخ السريع لاحداث عظام
ردحذفمهارة احسدك عليها
فهي ملخص دسم مركز ينفع الاجيال الجديدة المغيبه عن تاريخنا العريق
تحياتي
"وانقسم العرب طبعا مع ان اللي رفضوه زمان رضوا بأقل منه الان بس مش ده موضوعنا"
ردحذفاصدق كلمة اتقالت حصرتني من جوايا وافتكرت فيلم ايام السادات لما الريس كان بيحلق وقال للحلاق لو حد جه وطلعك برة محلك وانا جيت وحطتلك كرسيين جوا المحل وقلتلك ده بتاعك تعمل ايه قاله بشطرتي اجيب باقي حقي لكن فلسطين معملتش كدا ماستغلتش ترنح اسرايل بعد الحرب قالت لكل الارض لبلاش وقالت علينا خونة وعملا ربنا يسامحهم ويرجعلهم ارضه
لولا
ليس منهم رجل رشيد
ردحذفالسلام المر
ردحذفهو من جعل الطور يخرج من الحظيرة كما قال الشاعر احمد مطر وعندما خرج الطور توقعنا ان يدخل مرة اخرى فاذا بباقي الحيوانات يقلدونه ويخرجون من الحظيرة للتحالف مع السيد الاكبر في المنطقة هكذا الوضع
ياريت حضرتك تتفرجي علي التيوب برنامج تحت المجهر بيتكلم عن السلام وحقيقته
كل المصايب في رأى بعد المعاهدة المشئومة
عارفة حضرتك جمال حمدان ليه كلمة دايما في ذهني بيقول ان مصر قدر عليها الزعامة ولو تخلت عنه يبقي دة اسمه انتحار
شوفي بقي مصر بتنتحر دلوقت في اليوم مليون مرة
ربنا يستر
بس متأكد ان الطور مسيره يدخل الحظيرة ويقتل السيد الاكبر
تحياتي
جميل استعراضك لجمال ومزايا الاتحاد والاخاء
ردحذفواد ايه كان ليه ثماره الرائعة
ولما رجعنا العصبية والانا
جدث التفكك كما ذكرتى فى سياق الكلام
كلامك كان اطلالة على حالة نحيا فيها
ونراها باءعيننا
ولكن الحكومة ترى غير ذلك وكله تمام
علشان كده دورنا الحالى اننا ننقل لاءودنا
حب الوحدة والايجابية والتعاون
ونعرفهم اهمية التاءلف
وكمان نشارك فى الانتخابات يمكن نغير ان شاء الله
الامل لسه موجود اننا نبقى افضل
لك كل التقدير على تلك النافذة التى اضاءت لنا الكثير من الامور
اللهم اهدنا وجمع شتات شملنا
ردحذفوبصرنا دروب الحق وسبل الرشاد
اللهم آمين
مش عارف حكاية العروبة نفسها كتير مش بتركب معايا لاسباب كتير حتي من اللي حضرتك ذكرتيهم
ردحذفكل ده وتقولى مش سياسه امال السياسه تبقا ايه تانى متخفيش مش هنبلغ عنك هههه
ردحذفبجد كل اللى حضرتك قولتيه حصل فعلا ولسه هيحصل كتير بس مش دى المشكلة
المشكله ان احنا بنبقا عارفين ان اللى بنعمله غلط ورغم ذلك برضو بنعمله
معاهدت السلام كانت غلط وكنا عارفين انها غلط ومع ذلك اتعملت
كنا شبه متحدين وكنا قوة وكنا عارفين ان الفرقه والاختلاف مش من مصلحتنا ورغم ذلك اختلفنا وتفرقنا وبقينا زى الخراف الضالة
تحياتى اليكى
الراجل الرشيد موجود بس مشغول اليومين دول حبتين
ردحذففى حاجة لذيذة قوى بأقغد أضحك عليها لما أقعد أقرأ فى تاريخ الفترة اللى فاتت أو أقعد مع حد نتناقش
وهى الزحمة
الفترة اللى فاتت كانت زحمة جدا فى أحداثها فى المنطقة واللعبة السياسية فيها كبيرة جدا بس للأسف
الحكام معزولين والشعوب نايمة
والبلاد ضايعة فى النص
وحتى اتفاقية السلام اللى عملها السادات ضاعت فى الرجلين بداية من الانفتاح الهممجى اللى حصل أيامها وانتهاء بكل ما هو سىء وردىء من حوالينا
ولا حول ولا قوة إلا بالله
صباح الخير يا شمس يا شموسه
ردحذفالله ينور عليكى
حسبنا الله ونعم الوكيل..
ردحذف"وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ"42 إبراهيم
"لَا يَغُرَّنَّكَ تَقَلُّبُ الَّذِينَ كَفَرُوا فِي الْبِلَادِ (196) مَتَاعٌ قَلِيلٌ ثُمَّ مَأْوَاهُمْ جَهَنَّمُ وَبِئْسَ الْمِهَادُ (197)" آل عمران
موضوع متميز اختى
ردحذفعشت مع القصه لحظه بالحظه
ابدعتى
ابقى زورينى
جميلة جدا يا شموسة سلسلة عبرنا الهزيمة وسردك للأحداث بارع
ردحذفربنا يسلمك يارب يا شموسة من كل شر
كل الحب
الشوكولاتة وصلت ربنا يخليك حبيبتي يارب
السلام عليكم
ردحذفطيب كل التخطيط ده والأنتقام من العرب لوحدتهم فى أكتوبر
يبقى فيه مؤامره على العرب والمسلمين ومستمره ولا لأ
وبعدين همه وجدوا اننا صالحين وقابلين للتعارك والتعدى بل والتطاول على بعضنا البعض
لأننا شعوب عربيه ولسنا شعب واحد فمذاجنا وثقافتنا وأحلامنا ليست واحده
ورغم وحدتنا اللغويه فنحن لم نتعلم بعد وحده المصالح
ولانستطيع التواصل مع بعضنا البعض عند الأختلاف
وطبعاً الأختلاف فن لا نجيده
لقد أنتصرت مصر والعرب عندما وحدتهم وحده المصالح لاغير
ودمتِ بخير حال
حمداً لله على سلامتكم :)
ردحذفبغض النظر عن أقل منه ... هو في أقل من اللي إحنا فيه دلوقتي؟
هو طالما كان مؤمن بإن 99% من الأوراق في إيد أمريكا ومفيش أسباب تانية ممكن ياخدها يرضي بيها ربنا ... كانت طبيعي النهاية المؤسفة دي
والإنقسامات الداخلية كان مخططط لها في رأيي ... يعني طابورهم الخامس في كل دولة اتحرك وضرب ضربته
علشان يخلوا الأصوات العاقلة تندم لأنها عارضت السادات في استسلامه المسمى بالسلام
متهيألي الرجل الرشيد اللي هيخفف وجع القلب مش هيبقى موجود بسهولة لأن العام والشائع هو أمة مهترئة
لكن في رأيي المتواضع إن كل رجل رشيد هو اللي هيربي أولاده وينشئ أسرة يكون عنوانها الإسلام خلقاً وعلماً ... دنيا ودين ... يبقوا إسلام يسير على قدمين ويتناوبوا على حمل الرسالة أجيال بعد أجيال لحد ما عدوى الخير واجتناب الشبهات والفهم الصحيح للدين وتبعاً لذلك الدنيا ...
ده رأيي يعني وعوداً حميداً وعقبال البقية :)
احييكى على التدوينة وفكرتنى بمقالة قرأتها للأستاذ فهمى هويدى من حوالى يومين كان بيتكلم فيها عن محاضرة لرئيس الموساد والمسؤل عن ملف مصر واللى كان بيفتخر فى المحاضرة دى بأن الموساد قدر يدمر مصر داخليا وواضح انه مخطط قديم جدااا وماشى تمام اوى والبركة فى النظام !!
ردحذفالشعوب العربية معروف مشكلتها:::
آفة العرب السيادة ودى الثغرة اللى كل العالم عارفها ماعدا العرب !!
وطبيعى جدا ان اسرائيل واللى وراها يكونو عارفين الثغرة دى وطبعا برضه معرفوش يعملو اللى عملوه الا عن طريقها وفرق تسد
القيامة قربت والعلامات واضحة ولا جدال المهم ان ربنا يرحمنا
تحياتى
*محمود(باحث عن حب)
ردحذفللأسف يامحمود مصر من بعد ماكانت عايشه في سلامه وامن من الفتن شوف كم الفتن اللي فيها ادخل اليوم السابع وشوف تعليقات الناس علي خبر الوقفه السلميه امام سفارة العراق
بجد حزنت جدا
وصلنا ان المصرين بقوا يدوروا علي ده اصله منين وده اصله منين
ربنا يستر
* سواح في ملك الله
ردحذفعلي فكرة مااستطعتم من قوة هنا مش بس الاسلحه والمدافع والطيارات
لا في اسلحه اقوي من ده بكتير
لو تشوف فرق العدد بينا وبينهم ناكلهم اكل
بس همه بيحربونا باسلحه فكريه علميه اعلاميه
شبابنا اليوم مش زي الامس اغلب شبابنا اليوم متفرنج يتباها ان مش بيعرف يتكلم عربي ولا يكتب عربي ومابيقراش عربي
ماسابوش حاجه ماغزوناش بيها
ماذا اعددنا لهم من اسلحه فكريه واعلاميه وثقافيه
؟؟؟؟
* دعاء العطار
ردحذفمين قال اننا مش محتلين عسكريا يادعاء
اومال كم القواعد الموجوده في الوطن العربي دي ايه
يعني احنا الان محتلين عسكريا وثقافيا
والمصيبه ان لو حاكم عربي طلع عن الطوع يبقا عبره زي صدام
ربنا يستر
* Ramy
ردحذفانت صح يارامي احنا خير معين لهم علي تنفيذ خططهم
الصهيونيه
* MR.PRESIDENT
ردحذففي ايه ياريس خير؟؟
:))))
هتكوينا اكتر من كده ايه
ماالحال نااااار والحمد لله
لو الدنيا ولعة مش هتقوم للشرق قومه تاني ياريس
هو كان لبنان فاق من 75 الي الان
؟؟؟
* صيدلانيه طالعه نازله
ردحذفاهلا يادكتوره مبسوطه انك رجعتي المدونه تاني
:)
المشاكل بدأت بعد معاهدت السلام علشان ماحدش عرف فيها ايه
والشعب مش فاهم حاجه والانسان عدو مايجهل
لكن هل حصل تطبيع ماحصلش يعني انتي مالكيش جار صهيوني مثلا
المشكله مش في اتفاقية السلام المشكله في ان العرب تفرقوا بعدها
و رجعوا عملوا اتفاقيات مع الصهاينه كل واحد علي جنب
* elsha3er
ردحذفلا ياشاعر بعدنا عن الدين ده واحد من الاسباب
والاسباب كتير
منها ان العدو دارس الشعوب العربيه كويس اوي
وعارف يولعها بينهم منين
ودارس الحكام العرب كويس وعارف انهم ممكن يعملوا اي حاجه في سبيل الحفاظ علي كراسيهم
المشكله مش بس في احكام
المشكله في الشعوب العربيه مع بعضها
مابقاش حد طايق حد
* جايدا العزيزي
ردحذفالامل طبعا موجود ياجايدا
بس ياريت نصحي شويه ونحترم الاخر
عدم احترمنا للراي والراي الاخر هو ده سبب التفرقه
شكرا علي هديتك الجميلة وورد مقبول ياجميله
:))
* أحــوال الهـوي
ردحذفشكرا علي كلامك ومجاملتك
هي دي مهمتنا اننا نعرف الجيل باللي حصل
لو كنت اقدر افضل احكي عن بطولات الشعب المصري في كل الحروب اللي خضها ضد الصهيونيه كنت عملتها
* لـــولا وزهـــراء
ردحذفهو ده اللي محزن اللي زي اللي حضروا الايام دي
كان المستعمرات تكاد لاتذكر
وكان روايح وعزة النصر موجوده
اللي زي بيحس ان اللي حاصل ده مهزلة
انقسام الفلسطينين وتنازعهم علي السلطه
مهزلة وفضيحه
تقلق شهداء القضيه في قبورهم
* ذو النون المصري
ردحذفانا بعمل اللي عليا وبنادي
وعارفه ان لاحياة لمن تنادي
:)
ردحذف* Haytham Alsayes
ردحذفانت دارس للتاريخ ياهيثم
وماتنساش ان ربنا قال في سورة الاسراءان اليهود هيعلوا علوا كبيرا
اليهود دلوقتي في العلو الكبير ده
يمكناحنا مش هنشوف ده
لكن وعد الله اتي لامحال
* SHAPE YOUR LIFE (ABOALI)
ردحذفشكرا علي كلامك
الحقيقه الواضحه اللي ماقدمناش غيرها اننا نصلح من نفسنا
علي مستوي القيادات الشعبيه مش الحكوميه
بتوعية الشباب بخطر الفتنه
وتوحيد الخطاب الديني في الاتجاه الصح
مش لو دخلنا برجلنا اليمين الجامع صح ولا غلط
اسبح بايدي الشمال ولا ده حرام؟؟؟!!!!
يجب ان كون الخطاب الديني موحد وصح في وجه الارهاب الفكري اللي هيقود مصر لفتنه
* محمد الجرايحى
ردحذفاللهم آمين
دعاء جميل يااستاذ محمد
* adel
ردحذفمش انت بس اللي كده ياعادل
كتير من الشباب علشان ماشفتهاش وبالتالي ماحستهاش
ومش اللي قضي عليها الشعوب بس
لا الحكام اكتر ناس موتوها في الشعوب
العروبه موجوده بس زي الجنيه الدهب اللي مردوم في التراب
محتاجين مليار ايد تزيح عنه التراب
* عباس ابن فرناس
ردحذف:)
لاصدقني دي مش سياسه دي عين مواطنه شاهده علي الاحداث مش اكتر
لكن ايه اللي في دهاليز السياسه ربنا وحده اللي اعلم
فعلا بقينا زي الخراف الضاله
وصولونا نقول لو حاربنا هنحارب بايه وبمين وهنحارب مين بالظبط وانت عندك قواعد لأكتر من دوله محوطاك
* الازهري
ردحذففعلا الفترة دي كانت زحمه جداااااااا
احداث كتير سياسيه واقتصاديه وثقافيه والاعلاميه
كانت هوجه
قرارات كتييييير ونصها غلط والصح ماتنفذش صح
عارف الفتره دي كانت زي حد محبووووووس وانفجر
وهتكلم عنها البوست اللي جاي
* mrmr
ردحذفصباح الفل يامرمر
شكرا ياجميلة
:))
* Dr Ibrahim
ردحذفعجبني اختيارك للأيات الداله علي الوضع فعلا
* حسن
ردحذفاهلا بيك في اول زياره
وشكرا علي تعليقك
ولقد قمت بالزياره
:)
* ماما أمولة
ردحذفاهلا بيكي ياماما اموله
شكرا علي كلامك الجميل
والحمد لله انها وصلت حبيت ابعت لك تحيه صغيره كده
مش قد المقام بس مبعوته مع ست البنات
يعني ورده موصله شوكلاته لقمر المدونات
:)
* واحد من العمال
ردحذفهمه درسونا كويس اوي
وعرفوا يفرقونا ازاي
فاقوا من خضة وحدتنا مع بعض
وخططوالنا كويس اوي
في مقال لأنيس منصور النهارده ياريت حضرتك تقراه
* Diyaa'
ردحذفالله يسلمك ياضياء
انا موجوده بس في مشاغل كتير اوي اليومين دول
ولسه في اقل من اللي احنا فيه طبعا بكتير
وعايزة اقول لك ياضياء تبقا غلطان زي كتير من العرب لو فصلت بين امريكا واسرائيل
امريكا يهوديه بشكل فج وواضح وده انا شفته لما كنت هناك
الطابور الخامس كمان كان له فرع في مصر
علشان كده السادات انفرد بالاتفاق معاهم
بس مصر ساعتها كل الناس كانت مرحبه بالسلام عكس ما اي حد يقول انت عارف سياسة القطيع الناس بتقول عكس اللي جواها علشان ماتكنش خالفت القطيع
لكن كل بيت كان فرحان ان الحرب خلاص خلصت
ومش هنحارب تاني
كون ان السلام لم يصنع صح الصح ده موضوع تاني
المناخ ساعتها كان مناخ سلام قوي لكن تشتت العرب وانقسامهم خلاه سلام ضعيف
ولو اتحدوا ساعتهاوشاركوا في اتفاقيات السلام كان السلام هيكون زي ماربنا قال في كتابه العزيز
لكن العنجهيه بتاعت الحكام العرب والبحث عن القياده والصيد في الماء العكر
قلبت الموازين وجاء سلام باهت
وانا معاك في موضوع التربيه
:)
* Foxology
ردحذفكلامك صح
وعلي فكره كلام الراجل ده ماصدمنيش
ماكله مكتوب في كلام حكماء صهيون
المشكله في الهبل اللي فيه العرب عارفين طيب وعملنا ايه بالمعرفه
وصح دي من علامات الساعه علو اليهود في البلاد
اقراء سورة الاسراء
كان الله في العون :)
ردحذفوبالتأكيد أنا مدرك تماماً إن الصهاينة هم نفسهم الساسة الأمريكان ... والشعب الأمريكي مغسول دماغه بالسيطرة الصهيونية الماسونية على الإعلام وعلى مصادر الثروة عموماً في البلد الرهيب ده
والله أعلم العرب غلطوا ولا لأ بس كان باين قوي انبطاح السادات لهم من الأول
رغم إنه المفروض يكون واثق إن السوفييت مكانوش هيسمحوا باحتلال أمريكي لمصر مثلاً. والأمريكان ميقدروش عليه برضه متنسيش لأن مصر جو صحرا وتقنياً هم مكانوش مؤهلين ساعتها لحرب صحراوية زي دلوقتي بعد تطور الطيارات والصواريخ
فمش عارف هو كان خايف ليه كده بس ما علينا هو راح لربنا
ربنا يصلح الحال بقى ويهدينا
بمناسبة الكلام الكبير ده :$
ردحذفإيه رأي حضرتك في المقاطعة لأقصى درجة؟
على قد ما نقدر؟ يعني في الحاجات اللي مش حياة أو موت أو في الحاجات اللي ليها بديل :)
مقاطعة أمريكا وبريطانيا تحديداً
* Diyaa'
ردحذفصدقني السادات كان قاري الموقف وقاري تاريخ كويس
وعارف ان العرب هيخزلوه
تفتكر لو قامت حرب دلوقتي ياضياء العرب هيتحدوا؟؟؟؟
وكان عارف انه بعد كده هيحارب امريكا
وعلي فكره امريكا اغلبها جبال وصحراء وعندهم خبره جيده ف ده من ايام الرجل الابيض ماحط رجله في امريكا المكتشفه وحارب السكان الاصليين
السوفيت ماوقفوش جنبنا اصلا في الحرب والثابت تاريخيا انهم رفضوا يدونا قطع غيار للأسلحه والمهندسين المصريين حلوها
مش بقول لك في بطولات غير معلنه
السوفييت وقفوا
كون انهم يسمحوا او لايسمحوا
من زمان وامريكا اقوي من روسيا
والدليل انهيار الاتحاد السوفيتي وبقاء اتحاد الولايات الامريكيه
امريكا زي ماتقول كده شغل يهود تكتكه علي كبير
يهود بقا
:)
هو ماكنش خايف هو كان عايز يستثمر الموقف ويرجع كل شبر في مصر اللي انهكتها الحروب
واكلت اقتصادها والشعب كان مطحون
وشادد الحزام
واغلب الشعب مهجر
قال لك اقفل عليا بابي احسن لي
ولي مقوله بايخه اللي مش عاجبه اللي عمله السادات بغض النظر انه صح ولا غلط مايرحش يتفسح في سيناء والبحر الاحمر
:))
وعايزة اقول لك العرب غلطوااا ايام اتفاقية السلام ودفعوا التمن غالي ولسه هندفع تمن الغلطه دي والسلام المنقوص ده
* Diyaa'
ردحذفبالنسبه للمقاطعه
مصر ايام جمال عبد الناصر قاطعت كل الشركات اللي كانت بتتعامل مع الكيان الصهيوني علشان كده مصر ماكنش فيها حاجات كتير وسلع كتير
المقاطعه الشعبيه اثبتت فشلها
ياعم ضياء احنا مش عارفين نتفق علي هلال العيد هنعرف نقاطه مع بعض
طيب والشباب الجميل بتاع دلوقتي هيعرف يقاطه البيبسي والكاتشب اللي الحياة من غيرهم مالهاش طعم
ونبي سمعني صلاة النبي
:))
اما المقاطعه انامؤمنه بيها جدا
بس ايدي علي كتفك
ونزرع قمحنا ونبطل نمد ايدنا
نحن شعب غير حر ياضياء
للأسف
هممم هقول لحضرتك معلومة بسيطة :$
ردحذفالسوفييت أصلاً الحزب بتاعهم كان 95% من قياداته يهود.
هم مش هيساعدوا المصريين يكسبوا الصهاينة. بس مش هيسيبوا أمريكا تحتل مصر. ومرة تانية بقول لحضرتك الأمريكان مش هيسدوا في طبيعة صحراوية أو مزدحمة بالسكان لأنهم ببساطة جبناء والخسائر البشرية بتفرق معاهم قوي
الناس دي بتعشق الحروب المضمونة. لأنهم جربوا نتيجة المواجهة في
WW2
وكذلك في فييتنام.
وأظن خسائرهم فيها مقابل اللي قتلوهم من المدنيين والمقاومة بقنابلهم وكوارثهم بتدل على خوفهم الشديد على أرواحهم لحسن شعبهم يفوق
وأنا مش محتاج العرب قوي كده وأظن حسن نصر الله تعامل بهذا المبدأ وربنا نصره فعلاً والصهاينة خرجوا معترفين بهزيمتهم وبفضيحتهم وأقالوا الحكومة وتحقيقات ما زالت مستمرة.
واعترف القادة هناك إن ضرب لبنان كان مدبر له واللي حصل بس إن الضربة بدأت بدري شوية كرد فعل انتقامي.
يعني الراجل مجابش الخراب لبلده بل بالعكس استقبل الضربة وهو مستعد بعد ما فرض شروطه . وأظن لبنان نصها على الأقل أصلاً عملا وبيعشفوا أسيادهم في أمريكا وتل أبيب.أتكلم عن القوى الرأسمالية والسياسية والإعلامية
موقفه اسوأ مننا ومخافش وكسب ويقدر يكسب تاني :)
لكن السادات خاف وبنى في عقله أسطورة أمريكا ومكانش عنده ثقة فينا ولولا إن الحرب متحضرلها من أيام حرب الاستنزاف أراهن إنه ما كانش هيبدأ بيها. لأن زي ما في مصر طابور خامس. في رجالة كتير محترمة في الجيش والمخابرات على الأقل وقتها كانوا كتير. دلوقتي الله أعلم هم نسبتهم كام
وأظن العالم كله دلوقتي ضد إيران ومحدش فيها طلع قال 99% من أوراق اللعبة في إيد الأمريكان. وفييتنام مين كان جنبها؟ كانت محاصرة
اقتصاد إيه اللي عمله بعدم الحرب؟ ده اختار اسوأ إنسان في مصر يبقى نائب ليه ونسبة اللي مش لاقيين ياكلوا دلوقتي كام؟
مظاهرات 1977 واللي سماها انتفاضةالحرامية. نتيجة إيه؟ ماليزيا في منتصف السبيعينات كانت أفقر مننا
واليابان بدأوا من تحت الصفر. كوريا كانت زينا في آخر الستينات. بس استمرت لفوق قوي
بخصوص سينا. روحت شرم وشفت العري والعهر. بصراحة ميشرفنيش اتمتع بجمال طبيعتها لما يبقى ده السعر
لما تبقى سينا مجرد صحرا باستثناء بعض أوكار العري تحت مسمى الحرية والسياحة وقبول الآخر اللي بيفرض نفسه.
السياحة المفروض تبقى مورد رزق ثانوي مش أساسي. ولو اتقال لي طيب هات بديل. هقول لهم لو أنا حرامي وقلت يا رب مش هتوب قبل ما ألاقي شغلانة بديلة. هيبقى منظري إيه قدام ربنا؟
مصري أغنى من إنها تتسول سياح مش بيحترموا أهلها عكس الهند اللي منعت الملابس العارية أو شبه العارية بداية من السنة دي ومع ذلك معدلات السياحة بتزيد شهرياً لأنها بلد احترمت أهلها وتقاليدها. وبعدين ما الصهاينة مبرطعين في طابا وشرم وبيتعاملوا كأن البلد بلدهم والبانجو والمخدرات واخدين راحتهم في سينا
سينا ما رجعتش كاملة لينا خالص. رجعت بنسبة بس وبسعر فادح
لأن الصهاينة مش فاضيين يتكاثروا ويحكموا سيطرتهم على مساحة شاسعة زي دي في حين إن قلب كيانهم المحتل لسه فيه مقاومة
وبخصوص المقاطعة. لأ بتنجح. لما مشتريش بيبسي وكولا وأعمل منتج زي راني. وأدعمه
أكيد الشركات دي هتلاقي إن توكيلاتهم في مصر بدأت تخسر وهتسحب إيدها من السوق والسوق هيتحول
وما ننساش إن المشروبات الغازية ما هي إلا هراء صحي محض ولا فائدة منه على الإطلاق غير وهم ري العطش لبضع دقائق وبعد كده نعطش تاني
يعني أصلاً مش حاجة أساسية ولا شبه أساسية والحمد لله عايش طبيعي أهو مش بشربها بقالي كذا سنة إلا لو حد عزيز شوية صمم وكان اشترى خلاص
بتكلم عن مقاطعتي كـ إنسان بيعمل اللي عليه
مش هخسر حاجة لو تناولت ال
junk food
في كوك دور بدل ماك أو كنتاكي أو غيرهم
مش هخسر حاجة لو شربت جرعة الكافيين _الغير صحية_ في سيلانترو بدل كوستا أو ستارباكس
مش هخسر حاجة لو شربت شاي إيزيس بدل شاي ليبتون
مش هخسر حاجة لو جبت عربية ياباني
بتكلم عن نفسي. مش المفروض نبدأ بنفسنا أولاً. مش بيتقال الأول نبطل كدب ونفاق وغش وانتهازية وبعدين نبص لغيرنا؟
فبعامل نفسي في موضوع المقاطعة ده كده. ولما قوس قزح ربنا يكرمها نبهتني إن فيروز بتنتجها نفس الشركة بتاعة إعلان الزفت: استرجل، واللي بتعبي خمور وبتصنعها وبتعمل بيرة. بطلت فيروز كمان
ليه ماخدش موقف بيني وبين نفسي. مين عارف يمكن بعد 100 سنة أكون من اللي بدأوا ومتأثروش باللي حواليهم؟
لو كل مصر بتمشي بطئ في الحارة الشمال هفضل أمشي بطيء في الحارة اليمين
والشباب الجميل بتاع هاينز وكولا وماك. هيتحاسب لوحده قدام ربنا ومحدش هيتحاسب بدالي :)
معلش طولت على حضرتك ويا رب دايماً بخير :)
السلام عليكم
ردحذفطبعا يا حاجه .. فيه رجل رشيد طبعا .. انا .. بس هما مش شايفينه.
انت لخصتى الموضوع من جميع جوانبه .. بس عايز اقول ان احنا السبب واحنا مخنا صغير وبنسمح ان يتعمل فينا كدا .. حل دا عشان ما فيش فينا رجل رشيد .. انت فاكره التصريح الامريكان عقب غزو العراق وان الدور على سوريا ثم ايران ثم لبنان وأخيرا الجائزه الكبرى مصر .. وجائزه كبرى ليه يا خويا .. ما هى مصر فى ايديكم واللى بتقولوا عليه بتعملوه .. ومصر حتديكم ايه اكتر من اللى بتاخدوه منها وهى اصلا حيلتها ايه .. دى بقت على رأى جابر القرموطى قليلة الحيله
شوفى ياهانم .. هما بيلفوا حوالين مصر من كل الاتجاهات بس مستنيين لما يخلصوا على السودان ويعملوا الانفصال بين الشمال والجنوب وبعدين حيشوفوا دار فور وبعدين يفضوا بقى لمصر ..
لو بصيتى على الخريطه حتلاقى ممشكله كبيره سياسيه فى كل دوله تكاد تعصف بها ولا يستثنى ولا دوله عربيه ولا حتى اسلاميه حتى ملاييزيا اللى بعيده عننا عندها مشكلة الملايو واندونيسيا عندها مشكلة الانفصاليين مش فاكر اسمهم ايه .. هما عشان احنا مخنا صغير وعقلنا مش بيفهم قادرين يعملوا لنا عفريت فى كل حته .. تصورى يا هانم ان ما فيش فى مصر مشكلة للاخوان المسلمين
طب خدتى بالك اليومين دول ان القنوات اللى بيقولوا عليها ليبراليه عماله تقطع فى الاخوان المسلمين .. وما حدش فكر احنا مشكلتنا الاصليه ايه فى مصر .. هما الاخوان المسلمين حكموا مصر ولا هشوا ولا نشوا ولا عملوا اى حاجه طول عمرهم غير المؤامرات الصغيره اللى على قدهم يا دوب اكتر حاجه يعملوها يفكروا يغتالوا شخص .. انا يا هانم مش مع الاخوان ولا ضدهم ولا حانتخبهم اصلا .. كمان انا اكره الحزب الوطنى كره العمى .. بس انا شامم انهم متفقين الاتنين اتفاق جنتلمان انهم يخلصوا على الشعب المصري
ردحذفاخدتى بالك انت من ان القنوات الليبراليه اصبحت تذيع شريط الاخبار اللى تحت الشاشه وفى مقدمة الاخبار اخبار الرئيس حسنى مبارك ..
كله عاد سيرته الاولى والسلام عليكم ورحمة الله وبركاته ولا اراكم الله مكروها فى عزيز لديكم
كل سنة وانت بخير
ردحذفمعلش كنت بعيد ع النت الفترة اللى فاتت لانى رجعت من السفر وحاليا بشرم الشيخ
مرة تانية كل سنة وانتة طيبة
تحياتى
Diyaa'
ردحذفتعليقك لطيف جدا
بس انت محسسني ان امريكا دي فريق كشافه بيحارب ليه؟؟
:))
وطول ياسيدي زي ماتحب المدونه مدونتك
:))
*فشكووول
ردحذفوعليكم السلام ورحمة الله وبركاته
كلامك كله مظبوط والله
وفعلا لاحظت موضوع الاخوان ده
وبعد زماااااان كتير هيعدي هنعرف ليه
ربنا يدينا طولة العمر زي ماعرفنا المصايب اللي حصلت في عهد جمال والسادات
:)
* ذو الوجه المبتسم
ردحذفحمد الله علي السلامة يااستاذ ناجي
نورت المدونه
كل سنه وانت طيب
ما هو لو نقرا تاريخ صح نفهم حاضر صح و نعرف مستقبلنا رايح على فين
ردحذفمعظم الأحداث دى أنا مشفتهاش...أنا أصلا أتولدت يوم غزو العراق للكويت و أسمع عنها بس....بس الأحداث اللى بتحصل دلوقتى أعرفها كويس
و زى ما حضرتك قلتى ...واجعة كل مواطن مصرى عربى
بس يا رب الجاى يكون أفضل
ملناش غير أننا نعيش بالأمل و نحاول يصدقه العمل
* dina
ردحذفماهي دي المصيبه ان ماحدش بيقرا واللي بيقرا مابيحاولش يفهم
والحقيقه تايه اصلا
وانا زيك عندي امل
سيدتى اشكر احساسك بجميل مصر وان مصر سنة 1973 كانو ناس عاوز تعيش ايام حلوة وجميلة
ردحذفاما هذا الايام فان النصر سار بلا نخوة وترحيب
لان اصبحت مصر مجرد بلد نعيش فيها بس لانها ليست للفقراء بل للاغنياء فقط
انا اعيش فيها للانها امر يوجد فية اشياء كتيرة وهم اولادى بس فقط وليس الا
تحياتى لكى بترحيب مصر
حسن الشيخ
كل طبخة سياسية في المنطقة أمريكا تعدها وروسيا توقد تحتها وأوروبا تبردها وإسرائل تأكلها والعرب يغسلون الصحون. محمد الماغوط
ردحذف:)
بخصوص فريق الكشافة ... قلنا إنهم جبناء في حالة لو مكانوش بيدافعوا عن بلدهم فعلاً. وفييتنام والعراق وأفغانستان خير دليل
وحتى لو مش جبناء. الخساير البشرية بترعب الغرب جداً لأنهم أصلاً عندهم أزمة في تعداد السكان ... وعندهم تقدير عالي للأرواح
فعلشان يحارب حرب ما. لازم تكون مضمونة
بتقنيات أول السبعينيات. مكانش يضمن أي حرب بخسائر قليلة إلا في حالة واحدة بس. قنابل نووية. غير كده طائراتهم كانت في المتناول :)
الموضوع كبير .. ومقدمتة انسانه واعيه وناضجة جدا
ردحذفاقبلى تحياتي ولى عودة قريبا لقراءة كل ماتكتبين لأن قلمك يستحق هذا ..وبما ان وقتى الان ضيق للاستعداد للحج فلن أقدر ان اظلم قلمك بكتابة كلمتين وانتهى الامر
فلى عدودة اذا سمحتى
عيد سعيد
كوني بخير
سياسة فرق تسد نخرت في أمتنا يا شموسة وقادر كريم نقدر نتصدى لها ونتحد مرة بقى علشان ننتصر وربنا ينصرنا
ردحذف