بقينا اخر الشهر

كنت بوضب بوست عن الورد معشوقي
علشان اخليه اخر بوست
وخصوصا انه هيستني فتره علي ماانشر بوست تاني
علشان ان شاء الله هسافر اسبوع
لكن الوضع الان علي الساحة مؤلم وماخلاش للواحد مزاج في حاجة
بس عايزة اقول استمتعت جدا اني اكتب تدوينة كل يوم
التزامي بالاشتراك خالاني مهما كان عندي من مشاغل او مشاكل التزم اني اكتب
وبالتالي كتبت كل ملاحظاتي عن الاحداث يوم بيوم
وبشكر اصحاب الفكرة اللطيفة اللي خالتني كمان اكتشف مدونات جميلة لناس اجمل
وهسجل هنا اللي كتبته ساعة انلاع احداث التحرير علي الفيس وتويتر

======

=تاني تاني تاني خلاص بقا كده خلصت ياداااااخلية وجنت علي نفسها براكش بتتشطروا علي امين شرطة مهربينه وتدوه اعدام وسايبين اسياده يخربوا في البلد

--------------------------

=النظام القديم ندم ان ماعملناش زي ليبيا وسوريا واليمن وحب يقلب الترابيزة ولا ايه دي بلدنا تعدادهم ربع شبرا ده المصريين هيقرقشوا مبني الدخلية

------------------------------

سؤاااااااااااال هو البلطجية دول مصريين يعني زينا كده بني ادمين ولا دول شحتناهم من مكان تاني

------------------------------
إبراهيم عبدالمجيد: هناك من جلب بلطجية بالسيوف للاعتداء على أهالي الشهداء والمتضامنين معهم في عابدين
-----------------------

أ. إبراهيم عبدالمجيد: عندما اعتدى محامي على وكيل نيابة أخذ 5 سنين في أسبوع .. وبعد 5 شهور لم تصدر أحكام على من قتلوا ألف شهيد

----------------------------------------

القصااااااص الحل هو القصاااااااااص ماتمرمتناش علشان في النهاية مبارك يجيله ناس من المانيا والعصابة قاعدة لحد دلوقتي بندلعها

----------------------------

حاسة الجو هو هو بتاع اللامبارك مش فاضل غير مبارك يطلع يقول خطاب ويقول لنا انتوا صدقتم نفسكم انا اهووووووووو رجعت لكم

---------------------------

حد يديني عقله الناس اللي عايزة تدخل بالعافية البالون لحقوا يأجروا تلات اوتوبيسات امتي وجابوا العصيان منين

----------------------------------

قولوا للي في التحريرماتركبوش المصابين الاسعاف اقول لكم من الاخر كل الاحتياطات اللي كانت ايام الثورة اعملوها دلوقتي واضح ان مبارك نفسه معانا

----------------------------------

إمام مسجد عمر مكرم ينادي في ميكوفون المسجد مطالبا الشرطة بالإنسحاب الفوري من ميدان التحرير

------------------------

بلطجية بتقولوا بلطجية مش همه دول اللي طلعتوهم من السجون والاقسام علشان يربونا ماقبضتوش عليهم ليه اشربوا اهو شباب الثورة طلع لكم ياشرطة سايبة

------------------------------------

قبل ماتكرموا اهالي الشهداء وتعملوا لهم حفلة تضحكوا بيها عليهم هاتوا حق اولادهم اللي لحد دلوقتي راح هدر

---------------------------------

تاااااااااااااني ياشرطة بتضربي شباب مصر تاني واي ظابط ضرب شاب مصري هيدفع تمنه غالي عايزين تبينوا انهم بلطجيه علشان كده قتلتوهم طيب اشربوابقا

---------------------------------------

مين حسام عمار ده المتحدث بأسم ائتلاف الثورة هو الفقي رجع ماسبيرو من ورايا ولا ايه؟؟؟؟؟؟؟؟؟؟؟؟هو بيتكلم عن انهي شرطة

--------------------------------

هيعملوا المباراة في موعدها علشان اللي في التحرير يروحوا المباراة يايرجعوا يتفرجوا عليهااااااا:)))شغل الستينات هيبتدي:)))

---------------------------

التحرير الان يحتاج رجالة جدعان مش رجالة اغبية

----------------------------------------------------------

الضرب بغباوة في الشوارع الجانبيه عند الداخلية ده

كلام موثوق فيه من اللي في التحرير الان

-------------------------------------

الناس بترجع علي التحرير كل كلمة بكتبها هنا علي الووول من ناس في التحرير مش من اي قناة او اي حته غير ارض الواقع

----------------------------

وائل بيناشد الناس تنزل ميدان التحرير

----------------------------------

الشرعية من ميدان التحرير وياريت نتعامل بشفافية مع الشعب هناك اطراف تريد نتشويه من في ميدان (وائل عباس)من ميدان التحرير

------------------------------

اصل خبطة المحليات دي جامدة اصل اخونا البعدا كانوا معتمدين عليهم مع كبار قادة الشرطة في الانتخابات الجاية كده فوتنا عليهم الفرصة

---------------------------

الاحزاب الكرتونية نااااااااااااااااااااااااااااااايمة ننه هووووووووووو

--------------------------

الحل للوضع الان ياشرطة اطلعوا باللي عمل الليلة دي واعتذروا للشعب والظابط اللي شتم امبارح في الميكريفون يتعرف ويتحاكم والشعب يعرف

-----------------------------
ايه ده ايه الشعب اللي كله بلطجية دكاترة ومهندسين ومحاسبين ومحاميين ومدرسين وادباء وسياسييين وفنانين ايه الشعب الغريب ده
----------------------
الغريب المريب ان الكباتن بتوع الترشيح للرياسة والاخوان والسلفيين وال........الخ من التيارات اللي طلعت لنا في المقدر ساكت ومافيش حس ولا خبر
-----------------------
كله اشاعات هنبتدي بقا البسطاويسي في الميدان ولا مش في الميدان المهم الناس اللي في الميدان وبيضربوا
----------------
الناس اللي طلعه لنا كل شوية في الفضائيات يرغوا لوك لوك لوك نايمين لسه ولا ايييييييييييييييييييه فين كلمة عصام شرف ولا نفس الصمت اياه
--------------------
رد علي البيان65 الشعب يهيب بالمجلس ان يعجل بمحاكمة القتلة والحرامية اللي في طره وبره طره
----------------------
ياخوفي لا البلطجيه يعملوا مليونية يبرؤ بيها نفسهم من الزج بهم في كل صغيرة وكبيرة
--------------------
الحل للوضع الان ياشرطة اطلعوا باللي عمل الليلة دي واعتذروا للشعب والظابط اللي شتم امبارح في الميكريفون يتعرف ويتحاكم والشعب يعرف
--------------------------
واضح ان الاستوديو اللي ادوه لقناة الجزيرة في مدينة الاعلام عامل شغل كويس والجزيرة موجبه مع المجلس
----------------------
خيم تاااااااااااااني فين عصام شرف ينزل الميدان ويعمل حاجه مش هو من الميدان اصلا وقال لوعجزت هنزل معاكم تاني ماكنتش حابة اعتصام تاني
----------------
علاقتي بالكورة زي علاقتي باللغة اليابانية بس اناشد كل الكويرة في البلد مهما كانت نتيجة المبارة ارجوكم بلاش شغب مصر فوق الكورة والجميع ارجوكم
----------------
اسلمي يامصر وربنا يستر كان نفسي مايبقاش في اعتصامات تاني
حسبي الله ونعم الوكيل
ربنا ينتقم من كل انسان يريد شر بهذا البلد

تااااااااااااني ياشرطة

الحل للوضع الان

ياشرطة اطلعوا باللي عمل الليلة دي واعتذروا للشعب

والظابط اللي شتم امبارح في الميكريفون يتعرف

ويتحاكم والشعب يعرف

============
في عرض دين النبي الشعب يريد اسقاط النظام
وتاني ياشرطة تاني
بتضربوا الشعب تاني
هو احنا خلصنا من الاولاني علشان نبتدي تاني
مش حزرتكم وقلت لكم الحل في البوست ده من زمان
كان زمنا اتصالحنا وخلصنا
لكن واضح ان جهاز الشرطة عندنا من بلد اخر ليس علي كوكب الارض
بحس في الفديوهات اللي جاية من التحرير ان دي غزة فرع التحرير
ليه العنف الشديد ده يعني ايه تضرب متظاهر بالمنظر ده
ونرجع بقا للفيلم من الاولجمعية(مع العلم ان جميع الجمعيات الاهلية والخيرية والتعاونية كانت تتبع المدام سوزان)
تحب تكرم اهالي الشهداء في مسرح البالون مااعرفش باقي اهالي الشهداء عرفوا منين راحوا مأجرين تلات اوتوبيسات وياله هيلا بيلا علي مسرح البلون اشمعنا احنا يحاولوا يدخلوا الامن ماارضاش ليه مش عارفة
المهم يروحوا هوووووبا داخلين المسرح ومكسرين الدنيا بالعصيان اللي معاهم
(لطاف اوي اهالي الشهداء اللي رايحين عايزين يتكرموا ومعاهم عصيان دول)
وبعد كده يلموا نفسهم هيلا بيلا تاني ورايحين علي الداخلية عدل
ويضربوا الشرطة هناك
وتحصل هوجه ويخطلت الحابل بالنابل
وبعد كده يقول لك بلطجية
حد صدق الكلام اللي كتبته فوق ده
مش حاسين ان في حاجه غلط كده وان السيناريوا هابط حبتين
عموما البلطجية دول اللي ابتدوا القصة انتوا اللي عملتوهم ياشرطة سايبة
والبلطجية دول انتوا اللي سايبنهم للنهارده مامسكتوهمش علشان تستخدموهم وقت ماتحبوا
تقدروا تقولوا لي ايه البلطجي الوطني ده اللي يفرح بالشهادة ويتصدي للشرطة المسلحة وهو اعزل الا من طوبة ان لاقاها
حسبي الله ونعم الوكيل
اللي بيحصل ده نتيجة التهاااااااااون بدماء الشهداء
نتيجة اخبار مبارك المستفزة
نتيجة المحاكمااااااااااااات الغريبة المريبة اللي بتحصل ومتشطرين علي امين شرطة غائب الله اعلم مين اللي مغيبه
الحل في القصااااااااااااااص
العدل ياوزير العدل
العدل ياعصام ياشرف
التااااااااار كبير بين الشرطة والشعب
فين الكفن والخروف

مهاتير محمد

قبل مانبتدي البوست
الاستفتاء علي اختيار البوست اللي هشترك بيه في كتاب 100 تدوينة
شغااااااااال
ويكون من تدوينات شهر يونيو فقط
مافيش حد اختار غير
سواح في ملك الله اختار اسلمي يامصر
وفوكسلوجيا اختار قهوة سادة
=====
مصر محتاجة رجل جدع بمعني كلمة جدع والرجل الجدع ده هو مهاتير محمد ان شاء الله مهاتير محمد ضيف الاخت مني الشازلي النهارده
وربنا يستر علي اللقاء والرجل وماتنونوش النهارده وتماء ماء
وتبص علي اللهم احفظنا اللي بتبص عليهم فوق دول وهي بتتكلم
تقريبا مخاوية ولا ايه واللي مصبرني ان طقم الاعداد طقم ممتاز وبيحضر لها حلقة حلوة
وهي بكل فخر بضيعها لما بيكون معاها شخصيات من العيار التقيل المهم مش ده موضووووووووووعنا احنا موضووووووعنا
الرائع مهاتير محمد لما عملت بحث عن الرجل
لاقيت عاااااااااااااااااادي مواطن عاااااااااااادي
مكاااااااااااااافح بيبيع موز علشان يقدر يتعلم
له احلام ومتطلبات حاول وبكل حزم ان يحققها ولاقيت ان اللي ساعده مش جن ولاعفاريت
اللي ساعده حاجتين سندوا احلامه وخلوها واقع
الشعب وقااااااااااااااااااانون
اتطبق بكل صرامة علي الصغير زي الكبير الغني قبل الفقير ومافيش فيصال ولا ونبي ولا معلش وعمل يعني عمل وصحاهم بدري يشتغلوا مش اروح المحل الساعة 12 يقولوا لي اصل الاسطي بيفتح بعد الساعة واحدة السااااااااااااااعة واحدة
وعايزين تنمية ونعيش في بحبوحة من العيش اه ان شاء الله في كتيييييييييير من الشعب المصري
عايز ينام في البيت وتهبط عليه الفلوس من السما مش هو ده اللي بيشوفوا في الافلام والمسلسلات خبطة واحدة وهوبااااااااالفوق وان شاء الله يحصل بتوع طرة لاند المهم احنا بقا عايزين الحاج مهاتير شوية عندنا نستضيفه قد كده عشرة عشرين سنة ومش عيب مستشار
وما اغلب الشركات والمدارس في مصر اللي مليانة اجانب والفنادق العالمية في مصر مين اللي بيديرها ولا هنحشر الخبراء الاجانب في كل حاجة
ونيجي علي مصلحة البلد ونقول يعني هي مصر مافيهاش حد زيه
لا ياسيدي فيها بس احنا محتاجين ده بالذاااااااااااااات الرجل عنده تجربة جبارة اللي عايز يعرف اكتر عن اندونيسيا
والحاج مهاتير محمد
يدخل علي اللينك ده هينبهر النت عليه كتير بس اللينك ده مجمع وملخص وعلي فكرة الرجل لما اطمن علي بلاده ساب كل حاجه وقعد
مش بقا كبس علي نفسهم
وقال زي الاخ اللي مايتسمي القذافي انا دافع تمن قعادي ويارب مصر عايزة رااااااااااااجل جدع يحكمها ويشكمها

عيد ميلاد

النهاردة عيد ميلادي
بقالي 52 سنة كابسه علي نفس الدنيا والدنيا كابسة علي نفسي
عمالين نقاوح في بعضينا
:))
تغلبني مره واغلبها مره
تنكد عليا مره وانكد عليها مره
تسعدني مره واسعدها مره
:)))
زي توم وجيري بتبططني وارجع اقوم تاني زي الفل واقوي من الاول
عارفين ليه علشان مؤمنة ان ربنا بيجازي العبد علي صبره
وان اي مكروه بيحصل للعبد بعدين بيعرف انه كان فيه الخير
وعلشان دايما ضميري مرتاح
والسنة دي هحتفل ومعايا حفيدي الاول ربنا يبارك فيه
====
عايزة اضحكم مع عيد ميلادي
عارفين اذاعة ام كلثوم؟؟
دي كانت محطة بتبتدي الساعة 5 وتقفل 12
كانت تبتدي بأغنية لأم كلثوم وبعدين عبد الوهاب
ثم فريد الاطرش ثم عبد الحليم
ثم يتتابع باقي المغنيين الي ان تذاع اغنية السهرة لأم كلثوم
وتقفل الساعة12 بعد منتصف الليل
المهم
كنت بوضب لعيد ميلادي انا وصحبتي المدمنة لهذه القناة
فقالت لي ليه مش مشغلة اذاعة ام كلثوم تعالي نشغلها ونشوف حظك ايه في الاغاني (حركات كانت البنات بتعملها زمان)
شغلناها لاقينا اييييييييييييه؟؟
:))
فريد الاطرش بيقول جئت يايوم مولدي عدت ايها الشقي
باااااااالمنا الاول في ذهول
وبعد كده
ضحكنا ضحك
وتصدقوا عملتها تلت سنين الاقي نفس الاغنية في نفس التوقيت
:)))المهم ادينا عايشين نرازي في الدنيا والدنيا ترازي فينا
وماحدش يسألني يعني ايه ترازي دي
بس اعتقد ان معناها ندايق بعض برخامة
:))))))
=========
خبر لطيف
في عمل لطيف هيتم
يجمع اهل البلوجر مع بعض في عمل جماعي
كتاب المائة تدوينة
عن شهر يونية شهر عيد ميلادي
:))
وهطلب منكم طلب
ياريت تختاروا بوست من تدوينات شهر يونيو
اشترك بيه في الكتاب
واكتر بوست هياخد تصويت منكم هو اللي هشترك بيه
مافيش ديمقراطية اكتر من كده
بقا
:))))

قهوة سادة

الفن الهادف يفرض نفسه
عرض قهوة سادة الراقي الجميل
اللي اتعرض في ساقية الصاوي من كام سنة
يندرج تحت معادلة صعبة للغاية
ازاي نعمل فن هادف يقول شئ ينتقد سلبيات المجتمع بدون خدش حياء المشاهد
يعني فن راقي رائع بدون ملل
وكان التحدي هنا بفنانين لا يعرفهم الجمهور
ومع هذا
العرض نجح نجاح ساحق
وده يثبت ان مقولة الجمهور عايز كده مقوله فاشلة
يعلق مروجي الهبوط الفني عليها نشرهم للعري والاباحية ليخربوا النفوس لجلب الفلوس
-------
اتمني في الفترة الجاية ان ينتبه
صانعوا الفن
للجودة ويتخذوا من قهوة سادة
منهج لهم
ويحترموا عقلية المتلقي
ويرحمونا من كليبات العري
والغندورة اللي صوتها مش حلو
وعايزة تعمل كليب وتغني
يرحموها ويرحمونا
ويكون عندهم ضمير شوية
---------
ورمضان علي الابواب
ياريت التلفزيون المصري
والفضائيات العربية
يتذكروا انه شهر عبادة مش شهر مسلسلات
ونرجع زي زمان
يحتل المسلسل الديني والتاريخي
الصداااارة
والبرامج الدينية المعتدلة ترجع تاني
والابتهالات الراقية اللي اتربينا عليها
وياريت يتعمل مليونية العبادة في رمضان
ماتلهوش الناس عن خير رمضان
صحيح كل واحد عقله في راسه يعرف خلاصه
بس الزن علي الودان مش حلو
والنفس اماره بالسوء
اللهم بلغنا رمضان

اتكلمي +تحدييييث هاااااااااام:))))

عملنا اتكلمي

عملوا اتكلم
والمدون ابراهيم رزق صاحب مدونة سالزياد دخل عرين الاسد وكتب
البوست ده
وانا بهدي النفوس وبنصح بنات البلوجر يدخلوا يجاملوا في البوست ده
وياريت يقروا التعليقات
:))
================
اكتشفت بالصدفة ان في حملة اتكلمي
اي فضفضي
انا مش عايزة اتكلم ولا افضفض
حاسة ان اللي بيحصل للستات في مجتمعنا العربي بقا اكبر من الكلام
وكل ست فينا او بنت اللي جواها اكبر من الكلام
يمكن في ناس بتعرف تعبر وتتكلم
وفي ناس زي كتير اللي جواها بيكون اكبر من قدرتها علي الكلام
انا مش بقول غير حسبي الله ونعم الوكيل فوضت امري اليك يارب
وكتير من الناس بتفتكر ان حسبي الله ونعم الوكيل ده دعاء علي حد
بالعكس ده الانسان بيقول انا حسبي الله مش العبد انا بوكل ربنا في امري مش العبد
ونشوف كده كل من قالها ربنا اعطاه ايه
ونشوف هنا كمان
======
" حسبي الله و نــِـعم الوكيل "
دعاءٌ قاله المسلمون يوم أُحد
{ فَانْقَلَبُوا بِنِعْمَةٍ مِنَ اللَّهِ وَفَضْلٍ لَمْ يَمْسَسْهُمْ سُوءٌ وَاتَّبَعُوا رِضْوَانَ اللَّهِ }
و ثبتهم الله رغم الجِراح

==
وهو ده اللي انا مؤمنة بيه اني لما اقولها ربنا بيعطيني نعمة ماتخطرش علي بالي وبحس اني لما بقولها وبصبر
فعلا بنول اتباع رضوان الله
وبحس بالرضا دائما
هو في اجمل واقوي وانفع من الانسان دائما يكون وكيلة الله
القوي المتين الحق المنتقم الجبار العليم الغفور الفتاح الرزاق
مالك الملك ذو الجلال والاكرام
===
هي دي فضفتي ومشاركتي في اتكلمي

المهر

كلمتني صديقة عزيزة جدااااااا علي وكانت منزعجة

الحقيني شكل جوزي هيفركش الجوازة

ليه بس في ايه ان شاء الله خير
قالت لي ابوها مصر يكتب المهر في القسيمة جنيه مصري واحد نظير ان الولد مايكتبش قايمة
قلت لها جميل وبعدين
ابو الولد بيقول :يعني ايه ادفع المهر ده كله ومايتكتبش افرض انهم ماتوفقوش يضيع علينا المهر
يرد ابوها: يعني ايه اجهز ده كله واحط فوق مهركم مرتين وتاخدوا بنتي وبعد شوية ترجعوها ويضيع علينا كل الفلوس دي
يرد ابوه :طيب هنكتب لك قايمة بالحاجات
يرد ابوها :ايه اللي هيفيد بنتي من شوية كراكيب
انا:الي اخر الحوار الغريب السخيف اللي بيتكرر في كل جوازة علي ارض مصر
بصرحة تحولت اي جوازة لمباراة في موضوع المهر والقايمة والمؤخر
اساس المهر ان تأخذه العروس حق لها
والزوج هو اللي بيأسس منزل الزوجة
المصريين اخترعوا ايه بقا علشان الحالة الاقتصادية وعلشان همه عجبه حبتين
العروسة تاخد المهر وتجهز بيه وفوقه حبتين تلاته كمان
والغريب بقا ان المؤخر في اغلب
لا
السواد الاعظم من حالات الطلاق لايدفع المؤخر للمطلقة
بالرغم انه دين علي الزوج الي يوم الدين
واذا توفي وهي علي زمته بيأخذ من التركة
وبعدها تقسم
وفي مصر ام العجايب الارملة بترفع بيه قضية علي الورثة
اللي في الغالب بيكونوا هي واولادها وطبعا بتكسبها
وبتاخد المؤخر من التركة وبعدها باقي التركة بتتقسم حسب الشرع
قلت لها احتكموا لحد من الشيوخ الازهريين وان شاء الله خير
وبصراحة لازم اهل العريس يكونوا اكتر منكم حفاظا علي حق العروسة ويتبعوا حدود الله علشان دي حقوق كل طرف هيتحاسب امام الله علي مااعطي ومااخذ
ومش منطقي ان العريس اللي بعد كده بيبقي الكبتن المخلوع
يتجوز ويخلف وهو ماشي ياخد المهر بتاعه كمان
وماحدش يقول لي ده الشرع
لالالالالا
الشرع ان الزوج يكون زي الفل وعلي خلق ومتدين وطيب ولاتعيب عليه ازوجة عيب
وهي اللي عايزة تطلق علشان مش بتحبه او متوافقه معاه
هنا بقا تفتدي نفسها وتديه مهره وتخلع
لكن مش الزوج يطلع روح زوجته ويسود عيشتها والمسكينة علشان تشتري نفسها
ياتخلع وتديه مهره
ياتبريه وتتنازل عن المؤخر
بجد المصريين بجد محتاجين ان الخطاب الديني في الحتة دي يتظبط شويتين تلاته
انتوا ايه رأيكم
؟؟؟؟؟؟