صباح التهييييييييسسسسسسس

ياصباح التهييس
في ايه يامدونيين مصر
كل ماادخل عند حد يالاقي حزن وفراق وهموم
ياناس خايفه تحب ماله الحب الحب جميل بس لما بيكون صح هو احنا نحب غلط وبعد كده نلوم علي الحب وكماقالت الست العيب فيكم يافحبايبكم اما الحب اما الحب ياعيني عليه وفي روايه اخري علي لسان الست برضه ياروحي عليه
واللي عايز يعرف الحب صح يسمع الست(ام كلثوم طبعا)
ومن محاسن ونورهاتي الخيفين الي كيارااللي كتبت وصيتها الاخيره وضد التيار اللي مهييسه علي الاخر ونعزيها في موبايله المنتحر من الدور التالت
مرورا بالازهري اللي عنده الحرب التدوينيه وقبيلة فشكول الاعظم اللي واقعين في حرب اهلييه مش عارفه ليه
لرومنسي وروقانه ومجنون اللي كان نفسه يطلع احلا دكتور عيون واحوال الهوي واشعاره واختنا حبيبتنا ابي وبوستها الحزين الشقي زيها اول مره اشوف حزن شقي
وعاشقه وغلبانه اللي الحب محيرها اليومين دول وعامله بوستين احلا من بعض
وحبيبتي عاشقة الرومانسيه اللي كاتبه رسائل رقيقه تقطع القلب عشان الريس يرجع ومابيرجعش
وست الكل صبرني يارب اللي لاقتها عايزه تولع في البلوجر باللي فيه اظاهر من كتر ماجت علي اطفش (الشهير بأشرف ) بتاع القصه لعنته طالتها
ومخنوقه اللي ربنا يشفيلها عينها ويفك خنقتها...وجت اينو(رقة الاحساس) كملت المنظر ولاقيت حتي الاطفال مهييسين ده غير (الغد ات )المهيييسه ياجدعان... وسمكه واحده واعلان التهييس
ودواير دعاء مواجهات.. وليلة العمر اللي عند فاروق اللي قلبها غم علي دماغ العروسه
والرايق دائما عمرو بدر حبشتكانات اللي كتب لنا بوست النهارده اخر رواقه يابخته
تحسوا ان البلوجر كله مهييس الناس كسلانه خالص في ملل
طب ايه رئيكم لو نعمل بوست مشترك كل واحد وواحده يدخل يعلق ويكتب موقف حلو كده مضحك نفتكره مع بعض ونقراه ونضحك مع بعض يمكن التهييس ده يفك

الحج

تحديث : انا باعتذر لكل اللى علق على البوست انى مردتيش النهارده علشان انا لسه راجعه من المستشفى بماما و ان شاء الله حارد بكره و عاوزه اشكر ضد التيار و كيارا على سؤالهم على ماما بالتليفون
و شكر خاص لمحاسن صابر اللى اتصلت بيه و انا فى المستشفى تسال على ماما
و مش عارفه اشكر عمرو بدر ازاى اللى اتصل بالتليفون و لما لقى ان الوضع عندى حرج و انى لوحدى لاقيته فجأه عندى فى المستشفى بشهامة ابن البلد و ماسبنيش ابدا و اصر انه مايمشيش غير اما اطمن ان الامور استقرت و اننا خلاص حنغادر المستشفى و مش عارفه اشكره ازاى ؟
بطمنكوا ان ماما دلوقتى بخير بعد ما العمليه الغلط اتصححت تانى على يد نفس الطبيب اللى اجراها اول مره و اللى باحييه على شجاعته و اعترافه بغلطه و تصحيحه

عايزه اتكلم معاكم عن الحج كل ما اجي اتكلم عن الحج يحصل حاجه
غزه وبعدين السفينه وعملية ماما والميل اللي اتسرق
المهم نتكلم عن رحلتى فى الحج
الحقيقه كانت الرحله من الناحيه التنظيميه جميله جدا وكله كان بتوقيت ونظام
انا مش هحكي عن الرحله الايمانيه لا انا هحكي عن مواقف ظريفه حصلت لي مع الجنسيات المختلف اللي قابلتها
اول حكايه كانت مع بنتين من الفلبين اتعرفنا علي بعض والانجليزي بتاعهم لطيف قوي وبينطقوا بطريقه غريبه كده
المهم بعد التعارف واللذي منه سألتنى واحده منهم سؤال غريب جدا
قالت: رحتي مارينا ؟
انا:بستغراب شديد جدا واستنكار (لا)ودماغي عماله تودي وتجيب البنت دي كانت شغاله عندنا في مصر والا مارينا مشهوره قوي كده والا انا شكلي مارينيه والا ايه ؟
هي:هتروحي بعد الحج ؟
انا:لا طبعا اروح ليه ؟
هي:مستنكره(ليه مش عايزه تروحي) ؟
انا: مابحبهاش ومش عايزه اروح
البنت كانت عايزه تضربني وسألتني سؤال استنكاري تحذيري وكأني مجنونه
هي:ازاي تحبي الكعبه وربنا وتحجي وماتحبيش الرسول ؟
انا:لا تعالي هنا استهجي مارينا بتاعتك دي
اتضح انها تقصد مدينه يعنى المدينه المنوره وبتنطقها مارينا
وطبعا لما فهمتها قعدت تضحك لما اخدتلها شوية نظرات من المحيطين بينا استنكاريه و كانت هتنطرد من الكعبه
---------------------------------------------------------------------------------------------
كان دايما حظي مع بتوع شرق اسيا ليه مش عارفه
واحده اندونيسيه صغننه حجما بس كبيره جدا سنا
قالت لي بشخط الرحمن وانا مش فاهمه طب ياحاجه بتتكلمي انجليزي لا طب عربي مافيش هي اللي طالع عليها الرحمن اللي جنبي قالت لي يمكن عايزه سورة الرحمن
اول ماقريتها ابتسمت جدا وحيتني بالطريقه بتاعتهم
شويه ولاقتها نايمه علي رجلي انادي عليها ياحاجه ياستي ايه اللي حصل هي ماتت والا ايه
تقوم من النوم تضحكلي وتهز دماغها وتشخط فيا الرحمن وفضلنا انا اقرا وهي تنام وانا اصحيها
مانجدنيش منهاغير الادان
-------------------------------------------------------------------
جت جنبي تاني بنت باكستانيه ووالدتها البنت قالت لي ان والدتها عايزه تتعرف عليا اتعرفنا وتبادلنا كلمات لطيفه وسألتني متزوجه ؟ قلتلها عندي 3بنات
لاقيتها رفعت ايديها للسماء وهي بتتكلم بتأثر بلغتهم طبعا وتبصلي وتبتسم سألت بنتها في ايه ؟ قالت لي انها بتدعي لي انجب ولد
فهمتها انه ماينفعش وان بناتي كبار و واحده منهم متزوجه والباقي مخطوبين راحت رافعه ايدها تاني وعملت نفس القصه
فسألتها في ايه تاني مش طلع ماينفعش اجيب ولد خلاص ؟
قالت لي بتدعي لبناتك يخلفوا همه الولد الصالح
--------------------------------------------------
وكان في حاجه لطيفه جدا كنت بلاحظ ان الناس بتوع شرق اسيا بيقروا القران حلو جدا وصح وهمه مابيعرفوش لا يتكلموا عربي والا يقروا عربي
ولما اتكلمت مع واحده هنديه شرحتلي انهم بيتعلموا القران بالشكل والحروف والمعني بيتعلموه بلغتهم
زي كده ماطفل يتعلم يغني اغنيه بالانجليزيه وهو مش عارف معناها والا يقراها والا بيتكلم انجليزي اصلا
------------------------------------------------------------------------------
وكان في حديث شيق حصل بيني وبين مدرسة لغه عربيه ايرانيه
واتكلمنا في كل حاجه وقالت بالرغم انها مختلفه مع السادات في كل اللي عمله بس هي مش عجبها موضوع الفيلم اللي اتعمل عنه
وانها زعلانه انها مش قادره تيجي مصر بالرغم انها بتحبها جدا عشان مصر مابتسمحش بدخول الايرانيين للسياحه
واتكلمنا علي العراق وقالت ان اللي بيخرب هناك مش عراقيين
وعندها امل ان العراق ترجع قويه تاني
---------------------------------------------------------
وكان في موقف لطيف من زميله مصريه لطيفه جدا
واحنا في الساعه الاخيره من يوم عرفه والكل مشغول في الدعاء لاقيتها بتنادي عليا في فزع
هي:شمس النهارده الاحد
انا:طب ماشي في ايه ان النهارده الاحد عندك موعد والا حاجه ؟
هي:قالت لي لا بس وضعنا ايه واحنا واقفين عرفه يوم احد ؟
انا:طب في ايه يابنتي قالت لي اصل الحديث بيقول ان عرفات يوم جمعه يغفر لمن في الموقف
طب النهارده الوضع ايه ؟
انا:رديت عليها قلت لها طب نرجع مصر بسرعه ونيجي السنه الجايه
طبعا كل اللي في الخيمه ضحكوا وفرجنا علينا الخلق
-----------------------------------------------------------------------------------
قبل ما اسافر كل اللي يقول لي ادعيلي اكتب اسمه وايه الدعاء اللي عايزه
لحد مالاقيتني معايا فوق المتين اسم ده غير ان انا اللي ماطلبش برضه كتبته وكتبت كل اللي اعرفهم من يوم ما اتولدت لحد دلوقتي يعني تلات اربع الشعب المصري
وعملت الورق ده مع بعضه زي رول الفارمانات بتاع زمان وربطته بشريطه خضراء ساتان
انا طلعت الرول وفردته واللي في الخيمه ضحكوا ضحك
اعمل ايه وانا هفتكر دول كلهم ازاي
------------------------------------------------------
لينا واحده صديقه علي سجيتها شويه جوزها اداها ريالات وقال لها الريال ده زي الجنيه عندنا
راحت اشترت قلم كحل من المحل البياع قال لها القلم ده بريال اديته الريال واداها القلم وفضلت مستنيه البياع استغرب قال لها في شئ ؟ قالت له فين 80 قرش باقي الجنيه
طبعا كل اللي في المحل ضحكوا علي الموقف
---------------------------------------------------------------------------
عقبالكم كلكم لما تحجوا الحج رحله جميله كلها طاعه وحب لله وتنفذ اوامره بدون تفكير او شك طاعه للطاعه
اجمل حاجه كان منظر السماء في اخر يوم عرفه كانت لوحه ابدعها الرحمن عمري ماشفت والا هشوف زيها
حسيت ان ربنا بيقول لنا غفرتلكم ياعبادي

اعتذار

انا بعتذر ياجماعه عن حاجه ما عملتهاش اصلا
في حد دخل علي الميل بتاعي ازاي مااعرفش
وبعت ميلات للناس اللي عندي في الميل كلها كلام غريب لايمت لي بصله
اي حد وصله ميل مني غريب او في اي تجاوز بعتذر له
وكلكم عارفين اسلوبي والمفروض انه كان اللي يوصله ميل مني يقول لي
العجيب ان الموضوع ده من ساعة مارجعت من الحج والميلات بتتبعت
والغريب انها بتتبعت بشمس الخبيثه
معقول انا هبعت ميل بأسم شمس الخبيثه
انا بعتذر وربنا يهدي وغيرت الباص وورد تاني وانا مش فاهمه ايه اللي حصل

صالحت بيك أيامى

Get this widget Track details eSnips Social DNA

بجد حاسه النهارده أنى عاوزه أسمع المقطع ده طول الوقت و عاوزاكم كمان تشاركونى سماعه لكن بتمعن و سلطنه لو سمحتوا :)

المهندس المصاب

تحديث
--------
بشكر كل اللي علق علي البوست بس مش من حقي انا اللي ارد عليكم اتمني ان المهندس نفسه هو اللي يقرا ويعلق
البوست ده عشانه هو و هو اللي من حقه يعلق
------------------------------------------------------------------------
احب دايما ارجع البوستين الاخرنيين عشان لوحد من الاخوه المدونين كان علق هناك ارد علي تعليقه
والنهارده برجع لبوست الخراطيم لاقيته منور
المهندس المصاب الله اعلم عرف منين موضوع البوست لاقيته عامل مدونه ودخل شكرنا كلنا علي التعليقات واننا اتكلمنا عنه التعليق موجود في بوست الخراطيم السابق
وبقوله البلوجر كله نور وان دي اقل من اقل حاجه ممكن نعملها اننا نشكره
وياريت كان في ايدينا حاجه نعملها
بشكره وبحييه انه دخل المدونه عشان يشكرنا
حتي في دي برضه شهم واخلاق

ثلاث قمرات نوروني

امبارح كان يوم لطيف جدا جدا
اتفقنا( محاسن وضد التيار وكيار)
اننا نتقابل وعشان انا عجوزه قررنا المقابله تكون عندي في م نصر
واول من حضر كيار الجميله وقعدنا في كوستا ووجدت بنوته مصريه بكل ما تحمل الكلمه من خفة دم وتلقائيه وثقافه عاليه جدا تحسد عليها في سنها وثقه واعتزاز عالي جدا بالنفس
وبعد مده (ها ياضد ركزي علي مده دي )وصلت اخيرا ضد التيار وجدتها بنوته مصريه زي القمر داخله علينا وكأنها اميره فرعونيه ووجدتها توجت هذا الجمال بالثقافه والخلق الكريم والثقه بالنفس وخفة الدم
استمتعت جدا بالحوار والصحبه وجلسنا معا وكأننا نعرف بعض من زمن طويل وبنوتي الصغيره كانت معانا والفتهم هي الاخري ودعتهم ان تكون الجلسه القادمه عندنا في البيت
بجد انا بشكركم انكم سمحتولي اتعرف عن قرب بكم بفرح جدا لما بلاقي بنات بالثقافه دي والادب

اكيد لاحظتم ان فين محاسن
محاسن كانت في يوم الرؤيا واتأخرت واهدتني زياره خاصه لبيتي
وطبعا عشان هي شرقاويه اصيله جت ومعاها تورته لطيفه
وكانت احلا زياره استقبلت فيها احلا شخصيه ممكن الواحد يلتقي بيها
ومحاسن ياجماعه ام مصريه بما تحوي الكلمه فعلا لو تشوفوا محاسن مع ابنها نعم الام
ده غير ان احنا قعدنا نرغي مع بعض من اليمين والشمال وبصراحه الواحد مايشبعش من الحوار مع هذه الحوريه الجميله اللطيفه ذو الملامح المصريه الجميله
وبشكرك يامحاسن علي الكلام اللطيف اللي كتبتيه في التعليقات علي البوست السابق عندي عني وعن الزياره وبقولك اهو انت كل الكلام الجميله ده اللي كتبتيه واكتر
ربنا يكرمك ويعوضك خير في ابنك انت تستهلي كل خير
وكان المفروض ينضم لنا عمرو بدر بس في اخر لحظه اعتزر بادب جم كعادته وقال خليكم براحتكم اول لقاء والمره الجايه نكون كلنا سوا وقال هكتفي انكم تطلبوني لما تتجمعوا نتعرف علي بعض بالتليفون الاول
المهم انه كان يوم لطيف جدا جدا
وبشكرهم انهم شرفوني