أم مصرية للأمن في مظاهرات 25 يناير أخص عليكم ضيعتوا مصر

ابلغ من اي كلااااااااااااااااااااااااام

نوارة نجم تتحدث عن يوم الغضب للجزيرة .. نهاية مبارك

وداعا استاذي

انا عارفة ان مصر كلها مشغولة

بس احلف لكم انه لو كان عايش كان زمانه معاكم في الشارع قبل الكل

رحل استاذي
الفنان التشكيلي ابراهيم عبد الملاك

وهو عزيز جدا علي قلب دفعتي بالذات
كان فنان بجد وعن جداره مش بالكوسة

مصر يامه يابهيه

تفتكروا ايه اللي بيحصل دلوقتي ده؟؟

هيسيبوا الناس تصرخ وتطلع الشحنة اللي فيها شويه وخلاص يعني علاج كده زي الزار

ولا هيستجيبوا لطلبتهم ؟؟

ولا هيسحلوهم واللي يتسجن يستجن وخلاص ؟؟

بس اصل اللي بيحصل النهارده ده جديد وخصوصا اني حضرت مظاهرات كتييييييير اوي من زمان ماشوفتش اللي بيحصل ده

حتي موضوع الصلاة دي جديدة

هقول ايه ربنا يستر وياخبر بفلوس بكرة يبقا ببلاش

احلف بسماها وبترابها

حتي الكوسة في الفن

لو نيلك صلصة مش هتكفي تطبخ الكوسة اللي فيكي يامصر

(كلمة قريتها علي الفيس)
*********
الباشمهندس وزير الثقافه الفنان عمل معرض
بصراحه ماكنتش عايزة اتكلم عليه
علشان موضوع تونس وكمان مايستهلش
لحد امبارح اتصلت بيه صديقة دفعتي بتشتغل في وزراة الثقافه
قالت لي المعرض مكسر الدنيا
!!!!!!!!!!!!!
فاحبيت اعرض عليكم بعض لوحات هذا المعرض اللي مكسر الدنيا
المشكلة عندي اني مش بس خريجة فنون جميلة
ولا ان اللوحات لاترقي اصلا لأي نوع من انواع الفن
المشكلة اني لما دخلت اعمل بحث عن المعرض
لاقيت كبار النقاد والصحفيين كاتبين كلام كبير جدا
ده غير ان مافيش فنان فيكي يامصر ولا صحفي ولا رجل اعمال ماكنش هناك
ايه ده ايه ده
انا هسيبكم انتوا تحكموا
بس في صورتين ابلغ من اي كلام
صورة لرجل الاعمال ابو العينين عايز يقول له ايه ده ياروقه ايه النيله دي

تهيييس ثوري :)

السيناريو ده جاني علي الميل الحقيقه شيلت منه كلمات غير لائقه علي قد ماقدرت
بس حسيت ان لازم تشاركوني فيه

*******

سيناريو ل 2 من “الشباب” المصري المتحمس

, قصة قصيرة

*****

تامر: شفت تونس؟

وائل: شفت

تامر: ايه رأيك

وائل: ناس جامدة

تامر: انت عارف ابتدت ازاي؟

وائل: شاب عنده 26 سنة أخدوا عربية الخضار بتاعته, اتخنق وولع في نفسه, راحت الناس كلها سخنت

تامر: طب ما تيجي نفكر ازاي نعمل الموضوع ده هنا

وائل: أنا شغال, بس عايزين حاجة كده زي الولد بتاع عربية الخضار ده برضه

تامر: انت ممكن تولع في نفسك عشان مصر؟

وائل: لأ طبعا, وأصلا حتي لو عملتها مش هفرق مع حد غير أهلي

تامر: طب ممكن نولع في مين؟

وائل: ايه رأيك أولع في أمي يوم عيد الأم؟

تامر: في واحد الريدي قتل أمه وهي بتصلي قبل كده عشان 50 جنيه, الناس مش هتتأثر قوي, عايزين حاجة قريبة من الناس

وائل: طيب ايه رأيك نولع في كشري التحرير

تامر: اتعملت قبل كده, لازم حاجة تأثر علي الناس المفكرين

وائل: تيجي نولع في الاوبرا؟

تامر: قديم قوي انت يا مان, ولعت قبل كده, عايزين حاجة ليها معني سياسي

وائل: خلاص لقيتها, نولع في مجلس الشوري

تامر: يابني انت فاقد الذاكرة؟ ما النواب ولعوا فيه من كام سنة, عايزين حاجة برة القاهرة, وتوصل وتسمع مع الناس المثقفين

وائل: بص بقي هي دي, احنا نولع في قصر الثقافة

تامر: يابني ارحم أمي بقي, ما ولع في بني سويف قبل كده, فكر في حاجة توحد طوائف الشعب

وائل: لقيتها

تامر: قول

وائل: احنا نولع في كنيسة

تامر: ايه التقليد ده, ما دي بيعملوها كل سنة الريدي, بقت أنيوال ايفينت خلاص, وهيقولوا اللي عملها متخلف عقليا, عايزين حاجة جديدة

وائل: طيب ايه رأيك حد فينا ينتحر في ميدان عام؟

تامر: ما تجمع شوية, ما لسة واحد دماغه نضيفة سبقنا وراح منتحر من كام شهر عشان معهوش فلوس يتجوز البنت اللي بيحبها, ومفيش بتي أدم اتحرك, الحاجات دي أخرها الاخوان المسلمين يعملوا بيها فيديو مع كمانجة حزينة ويحطوه علي يوتيوب

عايزين حاجة الناس بتتأثر بيها كل يوم

وائل: بس خلاص, استني استني

تامر: قول يا زفت

وائل: تيجي نولع في قطر؟

تامر: دولة قطر؟

وائل: لأ قطر, قطار يعني من بتاع الركاب

تامر: انت طلعت عين أمي, ما لسة قطر العياط مولع, ده من كتر القطورات اللي بتولع الناس بقت بتستني علي شريط القطر عشان يعملوا باربيكيو

وائل: طب يا مان ما كل حاجة كدة الريدي ولعت

تامر: مش عارف, تفتكر ايه ممكن يولع عشان الناس تسخن؟

وائل: مش عارف, سيبني أفكر, انت هتعمل ايه دلوقتي؟

تامر: ها أعدي علي دينا نروح نتعشي وبعد كده سينما, بس فاضي باليل, انت هتعمل ايه؟

وائل: هاروح موبينيل أدفع الفاتورة, وأبص علي أي فون 4, وهاروح لا بوديجا مع سارة

تامر: طب كلمني لما تخلص نروح نلعب طاولة

وائل: خلاص قشطة, وكلمني بكرة بقي عشان نكمل موضوع الثورة ده

تونس الخضراء

شالوا الدوااااااا جابواااااا شاهين
الشعب التونسي قال مانتوش لاعبين

دوسوا هنا شوفوا الخبر ده رغم اعلان الطوارئ

خبر حلو علي الصبح اهو+تحديث

الف مبروك لأخوتنا وحبيبنا اصحاب
مجلة
الكرمة
ان شاء الله بالتوفيق والنجاح
*********
ياريت نقرا المقال ده

انترنت بلا فتنة(من عند مدونة يوميات شحات)

عمرو خالد يعلن بدء حملة انترنت بلا فتنة

اتفرج ياسلاااااام

الخبر ده ابلغ رد علي اللي بيقولوا ان اسرائيل مالهاش دعوة بموضوع القرش ولا موضوع الكينيسه
هو انتوا فاهمين ان اليهود اللي طردهم عبد الناصر من مصر وماعهومش غير 200 دولار وباعوا املاكهم بعد ماكانوا ملوك هنا زي شملا وصدناوي وبوابجيان هيسكتوا ويسيبوا المسلمين علي المسحيين يعيشوا بسلام كده

طيب اقروا الخبر ده بتمعن

كل سنة وانتم طيبين

عليه العوض ومنه العوض

عليه العوض ومنه العوض

رسالة الي من يهمه الامر

http://news.maktoob.com/article/5898150

اهي كملت اهي

اهي كملت واوباما هيبعتلكم مساعده يالا افرحوا

ماتيجوا نسيبها للمخابيل من الطرفين
مخابيل المسلمين ومخابيل المسحيين

ياله اخربيهوا اكتر ماهي مخروبه

خلاص شربتوا الطعم خلاص اتخليتوا عن حبكم لبعض وهنبقا عراق ولبنان وسودان

ده بدل مانطلع كلنا يوم الميلاد مع بعض ونوريهم اننا اهو مع بعض
واولعوا انتوا
اتمني من كل القوي السياسيه اللي بتطالب بالتغيير انها تعمل منظر وتحسسنا بمصدقيتها وبوجودها
والازمة دي يانثبت فيها اننا فعلا شعب واحد ياعلي الدنيا السلام

بجد انا حزيييييينة جداااااااااااااااااااااا
مش مصدقه
لا مصدقه اللي بيحصل عي الفيس من شباب المسلمين
ولا شباب المسحيين
وبحيي الشباب اللي طلع في شبرا واسكندريه
مسحيين ومسلميين الايد في الايد
بجد شعاع نور وسط الضلمة اللي طلعت لنا

من امتي ؟؟؟

من امتي مصر بيتفخخ فيها سيارات لكنايس؟؟؟
هي السيارة دي لما تتفخخ لكنيسه هتفرق اللي ماشي في الشارع ده مسلم ولا مسيحي؟؟؟؟
بيبقا فرح في الكنيسه مسحيين ومسلمين
بيبقا ميت في الكنيسه مسلمين ومسحيين
اللي عمل كده مايعرفش ان اللي ماشي في الشارع مصري(مسيحي مسلم)
واللي جوه الكنيسه مصري(مسلم مسيحي)
الانفجار مافرقش مانقاش
ماتفوقوا
اللي بيحرس الكنيسه مصريين(مسلمين مسيحيين)
فين بقا شباب الاحزاب فين شباب 6 ابريل وبتوع التغيير والاخوان وكفايه وكل الناس دي فين دورهم ؟؟؟؟؟
ماهي مصر اهي بيقطعوا فيها ماتعملوا وقفه
مايطلع شباب المسلمين مع شباب المسحيين اللي همه مصريين مع بعض الايد في الايد ويدفعوا عن استقرار البلد دي عن مستقبلهم
ولا عيزنها لبنان تاني ولا عراق تاني
لمصلحة مين

للدرجة دي مصر غيظاهم للدرجة دي مطلوب ان مصر تقع

حسبي الله ونعم الوكيل