الجمعة، 8 مايو 2009

سألتك حبيبى

نتكلم بقا علي االلي بيهد الحب ويموته ويوأده ويدبحه ....الي اخر وسائل القتل العمد
ايوه في رأيي ان قتل الحب بيكون مع سبق الاصرار والترصد
ليه...؟
عشان قديما قالوا اللي عقله في راسه يعرف خلاصه :)
ايوه !!
كل واحد عارف ايه الصح وايه الغلط وكل واحد عارف ايه اللي يتعس ويسعد حبيبه
كمان اكتر الناس عارفه عيوبها وميزاتها الشاطر اللي بيحاول يتغلب علي عيوبه
واللي مش فارقه معاه هو اللي بيقول انا كده وحبيبي يتقبلني زي ما انا
المهم
**اول حاجه تهد الحب الكذب ان الحبيب يكتشف كذب الحبيب عليه
في اي حاجه او علي اي حاجه والكذب كذب يعني مااسمعش (اصلي خفت تسيبيني )
(لو عرفت الحقيقه مش هنكمل)
وكلام كتير كله مبررات واهيه للكذب.
**تاني حاجه الخداع والخداع هنا غير الكذب.عشان الكذب ممكن يكون لسبب اوعله المحب خايف منها
لكن الخداع ده شئ ما شاء الله يجمع بين الخبث والكذب يعني كدب للكدب والضحك علي الطرف الاخر
**تالت حاجه الاهمال مش معقول ان احد الطرفين يهمل الطرف الاخر علي طول الخط
وعايزه يفضل يحبه اكيد حبه هيفضل يقل واليأس يسيطر عليه
وكتير زيجات بتفشل بسبب الموضوع ده يا الزوج يا الزوجه يهمل استنادا علي ان كده كده الحياه الزوجيه اهي ماشيه
ماشى اهي ماشيه بس ماشيه ازاي وكتير من الازواج بيهرب من البيت بسبب الكلام ده وترجع الزوجه يا تندم وترجع لعقلها
وهي وحظها يا الزوج كان مرتاح ماديا وجرئ وتزوج عليها !!! ياكان علي قده ومخلص مش بمزاجه :)
**رابع حاجه الانانيه احد الطرفين يكون مابيفكرش غير في نفسه واحتياجاته هو وبس مش مهم الطرف التاني لاهو عايز ايه والامحتاج ايه؟
والا مبسوط والا لأ؟
والغريب في الموضوع ده ان الاناني ده بيكون له منطق غريب في كل حاجه يبرر بيه مايصنع
**خامسا بخل المشاعر يعني من قبيل لو (حسستها بحبي اكتر من كده هتدلع عليا وتسوق الدلال ومااعرفش امشي عليها كلمه)
(لالا انا لو طلب عشر حاجات اعمل له اربعه بس عشان ما اعودوش ان كل اللي يطلبه يلاقيه)
منطق غريب واسلوب اغرب للحياه
**سادس حاجه المن اكتر حاجه بتضيع اي حاجه حلوه بتتعمل
يعني هناك واجبات علي كل من الطرفين لابد ان يقوم بيها هي من بديهيات الحياه
يعني الزوج بمناسبه وبدون مناسبه يمن علي اسرته انه بيتعب ويشقي عشانهم مش فاهمه يعني يجيبوا حد تاني يعمل كده بداله
والزوجه كمان تمن علي اسرتها بماتقوم به من واجبات عليها طيب ازاي الحب هنا هيستمر
ومش بس المن في حالات الزواج لا في فترة الخطوبه كمان في حاجات كده برضه
*سابع حاجه ان القول لايوافق الفعل اللي بيكون من نتائجه فقد الثقه بين الطرفين وبالتالي فقد الحب
ازاي ممكن احب من لااثق به ولا بكلامه ولا بفعله
الثقه هي من اهم الاعمده اللي بتقوم عليها اي علاقه من اي نوع شراكة عمل او صداقه او حب.....
**ثامن حاجه الضعف واللامبالاه ان يكون الحبيب ضعيف الانسان الضعيف لايستطيع ان يبقي علي اي شئ وعند اقل مشكله مايقدرش يتصرف
------
دي الاسباب اللي من وجهة نظري بتهد الحب وكمان كل الاسباب اللي ذكرناها انها بتقوي الحب عكسها تماما بتهده
اتمني اني اكون قلت وجهة نظري وشرحتها كويس
انا شخصيا استمتعت جدا بالبوستات دي وبالحوار مع الجميع وبشكر كل اللي اشتركوا معايا في الحوار
والمناقشات واللي افادونا كثيرا
فاضل بوست واحد هنشره بعد مانخلص مناقشة البوست ده وهيكون مفاجأه لطيفه جدا للجميع


s2ltk Upload Music

هناك 68 تعليقًا:

عمرو يقول...

صباح الخير يا برنسيس :)
و الله الأسباب اللى بتهد الحب أكتر بكتير من الأسباب اللى ذكرتيها بس طبعا أوافقك على أسبابك اللى لا يختلف عليها أتنين ..
تسمحى لى أقول أهم سبب فى رأيى لهدم الحب و هو رغبة طرف فى الاٍستحواذ كلية على الطرف التانى
بمعنى رغبته فى أن لا يكون لحبيبه أى شكل من أشكال الخصوصيه يعنى لا أصحاب و لا حياه اٍجتماعيه و لا حتى يمكن أسره
أعرف صديق بيهوى كرة القدم و كان بيواظب على مقابلة أصدقائه القدامى علشان يلعبوا ماتش كوره كل يوم خميس بالليل لكن زوجته منعته من الهوايه دى و أصرت على أن ينسى أصدقائه تماما و شويه شويه خنقته بحاجات تانيه و فى الآخر اٍنفصلوا لأن الجدع ماقدرش يتعايش مع هذه الزوجه المستحوذه على كل حياته بالعافيه لما ماسابتلوش طاقه صغيره يطل منها على الدنيا
الأسباب كتير يا برنسيس و يطول الكلام فيها و بأشكرك على سلسلة البوستات الهامه و المفيده اللى أهدتينا بيها و كمان على أغنية فيروز الجميله اللى خلت الصباح آخر بهججه رغم عدم وجود نيسكافيه :)
تقبلى تحياتى و تقديرى

بسنت صلاح الدين يقول...

متألقه كالعاده،اكتر حاجتين بيقتلوا الحب بخل المشاعر دى بتقتل الحب و المشاعر فعلا،و الاهمال كفيلين بأن يجيبوا بأجدع حب الأرض،حاجه كمان الخيانه طبعا سبب كل المأسى و ساعتها بنقول على الثقه و الاحساس بالأمان يا رحمن يا رحيم،مستنيين البوست اللى جاى على احر من الجمر يا قمر

tarek momen يقول...

ننتظر البوست المفاجاة
فيه سحب علي جوايز
تحياتي

son's egypt يقول...

السلام عليكم
فعلا الحب ممكن يتهد بكل سهولة بسبب ممكن يكون بسيط جدا
ممكن احد الطرفين مكينش واخد باله منه
الحب في الاساس بيعتمد علي الثقة المتناهية بين الطرفين والصدق لان العاملين دول هم الاساس في ان الحب كون مستمر
لان الثقة في الفعل والقول بتخلي الطرف التاني يزداد ثقة في الطرف الاخر علي عكس اذا تم اكتشاف انه في عدم صدق في الكلام فبالتالي حتروح الثقة وحيروح الحب بالتبعية

Eno يقول...

بجد ياشموسه ربنا يكرمك عندك حق في كل اللي قولتيه
البوست ده فكرني بي بوست قريته من كام يوم اللينك بتاعه اهو ارجو الاطلاع عليه :)لاني شخصيا استفدت منه :)
http://karim4life.blogspot.com/2009/05/blog-post.html

د. ياسر عمر عبد الفتاح يقول...

جزاكِ الله خيراً
السلسلة دي مفيدة جداً
ومتابع غن شاء الله دايماً

MǿиY El-Shreef يقول...

خامسا بخل المشاعر يعني من قبيل لو (حسستها بحبي اكتر من كده هتدلع عليا وتسوق الدلال ومااعرفش امشي عليها كلمه)
(لالا انا لو طلب عشر حاجات اعمل له اربعه بس عشان ما اعودوش ان كل اللي يطلبه يلاقيه)

الموضوع ده يضايق اوي

و ف الحياه عموما مش ف الحب بس

وهو لو ماتعودش عليكي هيتعود ع مين

كلامك كله صح ياشمس

بس في ناس بجد قتل الحب بيبقى لمصلحتهم

ماحدش عارف فين الخير

بس الاسباب الي ذكرتيها ممكن تبقى بجد غصب عن الواحد خصوصا بعد الجواز وضغط الحياه

بس سوا هيعدي كل شئ

مستنيين المفاجأة ياجميل

:)

ليكوريكا يقول...

انا متابع معاكي اكيد

سلسه جميله اوي

ربنا يوفقك .

رئيس التحرير يقول...

السلام عليكم ورحمه الله وبركاته
الموضوع مهم وليس من السهل الكلام فيه دون ان نعيش حاله الحب ما هي حاله الحب التي نحياها الآن كي نعرف طعم ولذه الحب .
حب الله ورسوله ( أرهابي و متخلف )
حب الوطن فرض عليا
حب الناس ( وهم يأكلون بعض بالربا والنميمه )
حب الأولاد ( ونحن لا نستطيع ان نوفر لهم الحد الأدني من الحياه الكريمه )
حب الذات ( أنانيه )
حب ...حب ...حب ايه ؟

صوت من مصر يقول...

ده انا م حد تانى وللاسف
الى عقله فى راسه يعرف خلاصه
يا امى شكرا للنصائح
وتعددت الاسباب والحب واحد

موناليزا يقول...

نسيتى اهم حاجة
افشاء الاسرار
يعنى لو الاتنين زعلوا من بعض تلاقيه ادق الاسرار فى ثانية عند كل الناس
وحتى لو مازعلوش فيه واحد مثلا مايعرفش يخبى حاجة على امه وفيه واحدة مثلا ماتعرفش تخبى حاجة على صاحبتها وهكذا
يعنى الخلاصة المفروض اللى بينهم مهما كان بسيط محدش غيرهم يعرفه

♥نبع الغرام♥♪≈ يقول...

السلام عليكم
شموسه أخبارك ايه
اسفه على تأخيرى بس غصب عنى كنت مخنوقه شويه ورجعت تانى
جميل قووى البوست ياشموسه متألقه دايمآ
ومنتظرين بقا المفجأة الكبيره فى البوست القادم
تحياتى لكى
إيناس

صبرني يارب يقول...

تصفيق حد للبرنسيس هنا يا جماعه

كل الى قلتيه تمام وطبعا فى حاجات تانيه كتير

بس عارفه اكتر نقطه اهميه من وجهة نظري ايه

الانانيه

هى دى الى بتهدم اي علاقه
سواء علاقه حب او صداقه او اقل او اكثر من ذلك

الايثار فعلا هو اهم حاجه لانجاح العلاقه

لازم تفكر فى شريكك اكتر ما بتفكر فى نفسك والا تبوظ العلاقه

ببساطه سعادتك لو ما كانتش نابعه من سعادة الشريك هاتبقى سعاده منقوصه جدا

تحياتي ليكى على الطرح الجميل جدا يا حجوجتي

انا اهو

صبرني يارب يقول...

اه صحيح وايه مفجأه دي ؟؟

طب مافيش حاجه حصريا ؟

طب خليها لبعد يوم الجمعه يمكن انا اعرفها من الكنترول لوووووووو جيت

يارب يارب اجي

الوردة البيضا يقول...

السلام عليكم
دائما مشرقة ودافئة يا شمس النهار
الموضوع جذاب جدا، وأتفق معك في كل ما ذكرتيه من عوامل تهدم الحب وتدمره تدميرا، وكلها مرجعها عدم الثقة بالنفس أو بالحبيب، وهي حالة دمرت حياتنا جميعا في ظل الظروف التي نحياها والتي لم يعد أحد فيها يأمن للآخر مهما كان قريبا إلى قلبه.
أعذريني عن الغياب، وقد أضفت لينك مدونتك عندي لأتمكن من متابعتك دائما
سلامي وتحياتي لك يا صديقتي

ابو بدر الدين يقول...

سلام الله على الجميع
المؤمن لا يكذب ابدا
هذا ما اخبرنا به نبينا محمد صلى الله عليه وسلم
"عليكم بالصدق فإن الصدق يهدى الى البر، وإن البر يهدى الى الجنة وما يزال الرجل يصدق ويتحرى الصدق حتى يكتب عند الله صديقا. وإياكم والكذب فإن الكذب يهدى الى الفجور، إن الفجور يهدى الى النار، ومايزال الرجل يكذب، ويتحرى الكذب حتى يكتب عند الله كذابا" رواه أحمد
الكذب يهدم كل شئ واول شئ يهدمه هو الايمان في القلب
نسأل الله ان يرزقنا الصدق في كل شئ
ولكم جزيل الشكر
معلش طولت عليكم

شاب كــ طخين ـــــا يقول...

السلام عليكم
اخيرا التعليق اشتغل معاى (وش بيتنطط)ههههههه

كل الأسباب الاقولتيها ياشموسه هانم بتهد الحب وبتجيب عاليه واطيه
بس بالأخص الكذب والخداع ده حاجه بيكون حتى التسامح فيها مش كتير
دايما هيفضل الواحد بداخله شك ان الطرف التانى معتاد الكذب ودة العادى بتاعه

منتظرين المفاجأة:D
دمت فى رعايه الله
سلام

عمرو جويلى يقول...

الأخت الفاضلة
أنا أتفق معك فى فى كل ما قلتيه عن ما يهدم الحب لأن الحب من وجهة نظرى هو عطاء بلا حدودبين الطرفين
فإن إختل هذ العطاء سواءا عطاء المشاعر أو البخل أو بالكذب أو بالخداع إنتهى الحب
سلم قلمك ودمت بكل الخير

عاشقه الرومانسيه يقول...

اييييييييييييييه ده؟
البوست ده نزل امتى؟
انا شفته بالصدفه فى الريدر
ماعلينا
نيجى للبوست
الكلام المره دى جاى على الوجع ياشموسه
):
وكل الاسباب دى كانت سبب فى قتل حبى وذبح قلبى عمداااااااا
الكذب
الخداع
الاهمال
الانانيه
القول لايوافق الفعل
الضعف واللامبالاه وحطى تحت النقطه دى مليووووون خط
كل الحاجات اللى ذكرتها دى كانت اداه الجريمه وقلبى المجنى عليه والجانى عايش حياته ولا على باله


تعليقك على بوست هو و انت
صحححححححححح
مليون %


بحبك ياشموسه
اموووووووووووووووه

شمس النهار يقول...

*عمرو
شوف انت جيت في المفيد موضوع حب الامتلاك ده فظيع فعلا
المشكله ان حتي الرجل او الست اللي بيعمل كده مابيقدمش بديل
(اهو كده تقعد في البيت زي ماانا قاعده)
تملك واستحواذ للعكننه وخلاص

الحريه بين الطرفين قليل من الحريه
هو يخرج مع اصحابه ,هي تمارس هوايتها
مايبقاش كله وتيره واحده

:)مافيش نيسكافيه ؟انا معلوماتي ان دي جريمه لاتغتفر
جرب الشاي الاخضر بداله وادخل علي النت وشوف فوايده
انا بقول لك كده وانا اصلا مدمنة نيسكافيه وشاي ولبن

شمس النهار يقول...

*بسنت صلاح الدين
عندك حق اما موضوع الخيانه الحقيقه ماحبيتش اكلم فيه في البوست حبيت يجي في سياق التعليقات
اكتفيت بذكر الكذب والخداع وفقدان الثقه
ودول قوام الخيانه اصلا

ان شاء الله البوست الجديد هيعجبكم جدا

شمس النهار يقول...

*طارق مؤمن
ايوه ياحاج في جوايز طبعا بس للي تابع وعلق واشترك
مش اللي تابع ومااشتركش :(

شمس النهار يقول...

*ابن مصر
كلامك صح
مش ممكن تحت اي منطق ان حد يستمر مع حد هو اصلا مش واثق في اي حاجه بيعملها او يقولها

شمس النهار يقول...

*اينو
اهلا بيكي
وشكرا علي اللينك وهزور المدونه دي حالا

شمس النهار يقول...

*دكتور ياسر عمر عبد الفتاح

اهلا بيك وتنور يادكتور

شمس النهار يقول...

*دكتور ياسر عمر عبد الفتاح

اهلا بيك وتنور يادكتور

شمس النهار يقول...

*موني الشريف

صدقيني ياموني مافيش حاجه اسمها غصب عن الواحد

انت عارفه مجرد المحاوله انك ترضي اللي قدامك حتي لو فشلتي هو بيحس انك حاولتي ومانجحتيش ده في حد ذاته بيرضيه
غير ما يحس انك حتي مابتحوليش تعملي حاجه خالص وسلبيه
وبتقولي واعمل ليه ماانا مش عارفه وانت اصلا مابتحوليش
فهمتي حاجه:)

شمس النهار يقول...

*ليكوريا
اهلا بيك ياشاعرنا اللطيف

تنور

شمس النهار يقول...

رئيس التحرير
اهلا بيك في اول زياره للمدونه
نورتنا

شمس النهار يقول...

*صوت من مصر
يعني ايه اول سطر ياكيمو


وبعدين حسستني ان الموت قصدي الحب علينا حق :)

شمس النهار يقول...

*موناليزا
عندك حق
والكلام ده يندرج تحت الثقه ماهو لو طرف مش واثق انه كلامه مش هيطلع بره مش هيثق يحكيه او حتي يظهره

شمس النهار يقول...

عاشقة الاحزان
اهلا بيكي وحمد الله علي السلامه

ان شاء الله البوست القادم يعجبكم

حـــــ الــجــنــة ـــــور يقول...

توت توووووووووووووت انا جيت

شموسة حبيبة قلبي وحشاني قوي جدا بزاف برشا بكووو ههههههههههههههه

ازيك ياقمور عساك بخير وصحةة؟
جيت اسلم وعايزة دعاااء جامد ياقمر

دمتي بخير لا ينقطع ومعذرة على التقصير

شمس النهار يقول...

*صبرني يارب
اهلا بيكي وسهلا

وشكرا علي كلامك
وصح يخرب بيت الانانيه اللي بقا اغلب المصريين فيها

مش بس في الحب لا في كل حاجه

وبعدين البوست ده مفاجأه
اقوله ازاي يعني
حاولي في يوم الجمعه ده بجد

شمس النهار يقول...

*الورده البيضاء
حمد الله علي السلامه ونورتي

شكرا علي تعليقك واتمني انك ماتغبييش تاني

شمس النهار يقول...

*ابو بدر الدين
اهلا بيك وطول زي ماحضرتك عايز هو في احلا من كلمات يستدل عليها بالله ورسوله الكريم

شمس النهار يقول...

*امبارح كان عمري عشرين
ايه ده هو التعليق كان عنكم مقطوع احنا كمان كان الميه عندنا مقطوعه:)

اهلا بيك
فعلا الثقه مهمه ماهو مش معقول استمر في علاقه مع حد وطول ماانا ماشيه اقول له
قول والله العظيم هقول الحق :)


الثقه مهم جدا

والبوست اللي جاي فاااااظيع الفاااظيعين ياحوده

شمس النهار يقول...

اللؤلؤه
شكرا ليك علي كلامك

والحمد لله ان السلسه عجبتكم بصراحه انا استمتعت بالحوار معاكم وبينكم جدا

شمس النهار يقول...

عاشقة الرومانسيه

اهلا بيكي
ماهي دي المشكله ان الجاني بيعيش والا همه اي حاجه ماهو لو كان كويس ماكانش يبقا في مشكله
والا ايه ؟
بوست هو وانت
عجبني جدا جدا هو حلو وبيحصل كتير جدا

تامر علي يقول...

أكتر حاجة تهد الحب هو "العبـــــط"

أنا مش بهزر دي حقيقة

لما واحد من الطرفين يكون عقله صغير فعمر الحياة بينهما منتهية وبقائها مسألة وقت مش أكتر ..... أكبر مشكلة في الحياة الغباء :)

تحياتي :)

صوت من مصر يقول...

السطر الاول بيقول
ده انا مش حد تانى
بمعنى انها قصتى انا زى بقيت الناس كلنا عايشين الحب

Unknown يقول...

أقسى حاجة وأصعب حاجة ان الواحد يصل لقرار ان الحب ده لازم يتقتل كفاية عليه كده ..ده بالظبط زي قرار قتل الإبن هو حد يقدر يقتل ضناه..
السبب الي أحيانا ممكن يوصل لهدم الحب من أحد الطرفين التحول من الحب كمشاعر للحب كعادة وقتها يولد السأم والتحول ده بيتم بآلية معينة وهيا الرتم المتكرر وعدم التأجديد في روح الحياة
خالص تحياتي وربنا يكفينا شر هدم الحب
مودتي

MaNoOoSh يقول...

ياااااااااااااااه يا شموسة
كلامط حقيقى فعلا
كل الحاجات دى بتقتل الحب
واكتر حاجة انا بحس بيها "الضعف واللامبالاه" لانها حتى بتقتل المشاعر الانسانية بين افراد الاسرة وتموت الحب اللى بينهم.. مش لازم بس الحب اللى بيت الحبيبين
تحياتى يا قمر

MaNoOoSh يقول...

وانا مع راى تامر على جدااااااااااااااا
العبط والغباء من الاسلحة القاتلة للحب
واذا الواحد صبر عليهم شوية فمش ممكن يتحملهم كتير

شمس النهار يقول...

*حور الجنه
اهلا اهلا
حمد الله علي السلامه
وانت كمان وحشتيني
بس ايها الشاعره لم تقولي رأييك في السلسله

شمس النهار يقول...

*تامر علي
انا معاك بس الست الذكيه غالبا حياتها بتكون صعبه
يعني شوية غباء فطري مش وحشيين

لكن الرجل لو غبي قول يارحمن يارحيم
الدنيا كده اتهدت

بس علي فكره في ناس بتقول علي الطيبه عبط
ولازم تكون ناصح وانت بتتعامل مادلعهاش قوي كده .....الخ

الكلام ده مش عبط العبط ان احد الطرفين يبخل بمشاعره اعتقادا انه كده هيبقا مفتح ومش عبيط

شمس النهار يقول...

*صوت من مصر
تمام كده تنورت المحكمه

شمس النهار يقول...

*كاتب مصري
فعلا بس الحب الحقيقي لايمكن يصيبه الملل لو الاتنين كانوا فهمين ووعيين لده

اما قرار الفراق فاده فعلا اصعب قرار
بس كتير بيكون هو العلاج
زي الجراح اللي يسيبك تقرر انه يبتر حته منك عشان تعيش

شمس النهار يقول...

*مانوش
طبعا مش معقول اكمل مع حد لافارق معاه اكون موجوده او مش موجوده
مش فارق معاه اي حاجه
والابيشاركني همي والا فرحي
وعند المشاكل سلبي وغير فعال

حب مشاركه

ذو الوجه المبتسم يقول...

السلام عليكم ورحمة الله وبركاته
اولا : عاوز قبل ما اتكلم اشوف ابتسامتك
يلا ياست انتى ابتسمى
مش كده
اضحكى بجد
ثانيا:
كل اللى انتى ذكرتيه جميل وبالرغم من ان فيه حاجات تانية كتير بس تقريبا انتى جبتى الخلاصة
1- الكذب : فعلا بيهدم مش الحب بس
بيهدم البيوت كمان .... بس ايه رايك لو الواحد قال لحبيبته انتى اجمل ست بالدنيا ... بذمتك مش كذب حلو هههه
2- الخداع : بصراحة باكره الشئ ده جدا لان اللى بيخدع اصلا لا يستحق لقب حبيب ....
3- الاهمال : اتفق معاكى ولكن احيانا الاهمال بيكون غصب عن الزوجة مثلا وبخاصة لما يكون عندها اولاد كتير او اهتمامات كتير وبالرغم من كده لا اعفيها انها تهتم بنفسها من اجل زوجها
وكذلك الزوج يجب عليه ان يكون مهتم وليس مهمل
4- الانانية حب الذات ده شئ خطير لكن ايه رايك بالانانية بالحب بمعنى عاوز حبيبى لي لوحدى حب تملك يعنى ههههه
5- بخل المشاعر : النقطة دى خطير ة جدا جدا
لان من اسم العلاقة حب يعنى المفروض ان المشاعر تكون فياضة وليست بشكل محدد او بخل زى ما بتقولى ونصيحتى لكل حبيب او انه يقول كل مشاعره يفضفض يكون مبذر فى المشاعر .. هى المشاعر بفلوس يا ناس .. امال ايه مالكم .. قولوووو واتكلم هههههههه
6- المن : هادم هادم
علشان كده بانصح اى حبيب او زوج يبعد عن خصوصيات حبيبته او زوجته وبخاصة المادية الملموسة طبعا الكل فاهمنى
7- الضعف واللامبالاه
يمكن الضعف واللامبالاه ده بسبب الحبيب نفسه وعدم تفهمه لمشاعر الطرف الاخر
8- حب التملك
قد تكون غيرة قوية وقد يكون حب التملك فى حد ذاته شئ جميل ولكن كل شئ لما بيزيد عن حده بينقلب لضده ولا ايه رايكم

اختى شمس
تقبلى تحياتى وابتساماتى

على فكرة وانا باكتب التعليق ده كنت باكتب استقالتى من العمل هنا بالسعودية بجد لانى خلاص زهقت من الغربة وقرفت ونفسي ارجع بلدى مصر واشتغل فيها بكل جهدى بس اتمنى مصر تكون مصر
تحياتى

mostafa rayan يقول...

اتفق معك خاصة فى نقطتى البخل والمن
تحياتى لك

وردشان smilyrose يقول...

السلام عليكم

وحشتينى يا شموسة

وبجد موضوع تحفة

ودايما جميلة كالعادة

بس عارفة يا شموسة لو الزوجين بينهم

حب صادق وحقيقى مفيش حاجة تقدر تاثر

عليه ودا كله بيتوقف على طاعة الله

دمتى حبيبتى

smilyrose

وردشان

روح الحب الصادق

SHAPE YOUR LIFE (ABOALI) يقول...

اتفق جدااااااااااا
فى الاسباب التى رتبت ترتيب منطقى
ولكن
ان كنا فى قرارة انفسنا لو جلسنا قليلا نستشنق عبير الحياه فى جو طبيعى نسبيا

الا يمكن ان نقول اننا سنستنتج العديد من الاسباب التى تنقض عرى استكمال الحياه فى ود ووئام وحب

اذا جمعنا ما تبقى من فكرنا وعقلنا
يقينا ستعود لنا بقية الذاكرة

فنحن الان نفكر وكاءننا فى غيبوبه

وبعد ان تقع المشاكل نجر اذيال الندم

فعلا محتاجين دعوة للتفكير واحياء الحب

احيييكى على الطرح الراقى

من غير عنـــوان يقول...

حب التملك... يقتل الحب

ضمان الحب... يقتل الحب

إنتظار الفعل لكي يبدأ رد الفعل... يقتل الحب


أمنياتي

صوت من مصر يقول...

وانا تحت اوامر وكيل النيابه
هههههههههههههههههههه
اقول ايه
انا محتاج حد يفهمنى بسرعه بقى
بمضى حضورى

Maha Shahen يقول...

بالفعل عندك حق يا شموسه بس وحياتك لو كان فى حد بيسمع او بيجرب مكنيش نشرتى الموضوع دا ههههههههههه
بس يا رب يعمل فرق وفى ناس بالفعل تعمل بيه
وبينى وبينك كتير الواحد بيلتزم جدا بالاخلاق ولما يلاقى اللي قدامه يعمل فيه فصل بارد يقول عليا وعلي اعدائى اهو دا عيب العقول الغريبه بتاعتنا
ربنا يصبرنا عليها وعلي نفسنا
وربنا يخليكى لينا دايما تفكرى لينا ومعانا
تحياتى ليكى

شمس النهار يقول...

*ذو الوجه المبتسم
اهلا بيك واسفه علي التأخير في الرد علي التعليق كنت ولازلت تعبانه شويه

كل كلامك صح

بس ايه موضوع انك هتستقيل وترجع مصر انت ماكملتش سنه هناك

في ايه خير ان شاء الله
كنت استخرت ربنا الاول

عموما ربنا يوفقك لما فيه الخير

شمس النهار يقول...

*ذو الوجه المبتسم

بشكرك جدا علي اشتراكك الفعال في السلسله
كانت اسألتك مفيده جدا للحوار
شكرا ليك

شمس النهار يقول...

*مصطفي ريان

الحمد لله اننا متفقين يادرش
علي فكره البوست الجاي هيعجبك جداان شاء الله

شمس النهار يقول...

*اسمايلي روز
اهلا بيكي حمد الله علي السلامه
طولتي الغيبه جدا

شكرا علي كلامك اللطيف

وصدقتي ياعزيزتي فعلا اهم حاجه في اي علاقه طاعة الله فامابالك بالازواج

شمس النهار يقول...

*ابو علي
كلامك منطقي
بس تفتكر ان في حد بيحب يتعس نفسه
مااعتقدش

بشكرك علي المجامله اللطيفه

شمس النهار يقول...

*من غير عنوان

اتفق معك
واعتقد ان حب التملك مش بس بيقتله ده بينهي اي امل ان الانسان ده اللي عنده حب التملك يحتفظ بأي حبيب
وعادتا بيقرن بالغيره الشديده

شمس النهار يقول...

*صوت من مصر
:)
ان شاء الله ربنا هيبعتلك حدايه تفهمك كويس:)

كويس انك جيت قبل مانشطب البوست ده
عشان هنعزل للبوست اللي بعد منه

شمس النهار يقول...

*نور شاهين
اهلا بيكي انتي فين يابنتي غايبه

كلامك مظبوط
ساعات الانسان بيلاقي ان اخلاقه بتتفهم غلط
بس اقول لك ماتحوليش تعاملي الناس من منطلق اخلاقهم همه
لا خللي التعامل يكون من منطلق اخلاقك انت وفهمك للحياه

Kiara يقول...

الله ينور ياشموستي بالفعل دي الاسباب الرئيسيه اللي بتهد اي حب غير بقي انها بتختلف من شخص لاخر

وكمان الامتلاك زي مااستاذ عمرو وضح

اما اروح اشوف بوست النهايه

شمس النهار يقول...

*كيارا
ايه ده
انت جيتي وكمان متأخره
ماشي بس انت اتكتبتي غياب خلاص ياماما

Kiara يقول...

عاااااااااااااااااااااااااا

لا انا حاضره اهو بلااااااااش غياب

شمس النهار يقول...

*كيارا
وكمان بتعيطي
ماشي خلاص ماتعيطيش
ماهو انا عيبي قلبي ابيض