الجمعة، 5 مارس، 2010

لييييييييييييه(تحديث علي الماشي)

معلش عارفة اني مقصره بس ظروف
بس جايه وجايبه لكم هديه حلوة بوست قريته ومش راضي يروح من دماغي حبيت تشركوني فيه عارفه ان كتير شافوه بس برضه
اتمعنوا فيه كده
هنا

معلش هنأجل بوست الرحلة شوية
علشان انا ست كبيرة وكمان شايلة المرارة
ولازم ولابد اتكلم في الموضوع ده بالرغم اني مش بأحب اتكلم علي
السياسة واخواتها
ايه القصة
ليه صديقة بتموت في السياسة وكأنها من عيلتها
قعدت تقول لي ادخلي اليوتيوب وشوفي العاشرة مساء مع البرادعي
وانا اصلا مش فاضيه خالص
المهم
اخيرا لما فضيت شويه اتفرجت وبصراحة استغربت جدا
ليه
التركيبة غريبه حبتين تلاته اربعة
البرادعي ودريم بتاعت احمد بهجت ناسبنا الحكومة
ازااااااااااايي
بقا هو احمد بهجت هيلمع البرادعي
؟؟؟؟؟؟؟؟؟؟؟

المهم الرجل طبعا عارف بيقول ايه وبيعمل ايه
وهات ياتمجيد وتفخيم في كليب صغير
في البرادعي
وهوب

الست مني شويه تخبطه في الاخوان يطلع منها وشويه تخبطه في اليساريين
يطلع منها طب الاسلاميين مافيش طب الشعب البسيط مافيش
طب السياسيين راح قايل لها انا دخلت في معارك مع امريكا يبقا اي معركة في الداخل هتكون لعب اطفال
هوبا
بصراحة ماكنتش فهماااااانه حاجه خالص
هو في ايه
لحد ما كل شئ انكشفن وبااااااااااان
الهدف من البرناااااامج
كلمتين من صاحب الشأن
انا سني كبر 66سنه ومااعتقدش اني ممكن اطمع في منصب سياسي
ده خليه للشبااااااااااااااااب

(يعني ياريت اللي عمالييين يعملوا شقلباظات
يتهدوا ادي صاحب الشأن
وتوته توته خلصت الحدوته)

ماعلينا
بس اللي زعلني حاجتين

الاولي:ان الرجل لم يرشح من قبل مصر بلده لمنصبه
بالعكس مصر رفضت ترشحه
والمجموعه الافريقيه هي اللي رشحته

الثانيه: لم يتم نقل حفل نوبل من قبل مصر
ولم يحظي الخبر بالاهتمام الاعلامي المناسب

ياريت تدخلوا علي اليوتيوب وتشوفوا الرجل ده وتواضعه وادبه وعلمه
بس خلاص طلعت الكلمتين اللي ضيقوني
::(((

هناك 56 تعليقًا:

Muhammad Saber Abdou يقول...

حمدا لله على السلامة أولاً

البرادعي رجل محترم وجرئ

أمل حمدي يقول...

من غير ليه يا شموسة

المفروض كنت حطيتي الاغنية

هههههههههههههه

ولا انا ليه في السياسة

أه هو راجل محترم وعلم واخلاق وكل حاجة حلوة فيه
بسسسسسسسسسس

ماينفعش وياريت يفهموها بقى المطبلتية

سلام

صوت من مصر يقول...

السياسه دى هتجنن الناس يا ماما
انا بكرهها جدا
البرادعى ده وحش وحش
مبارك ده سكر وعليه عسل

صيدلانيه طالعه نازله يقول...

الراجل بصراحه و بامانه خساره فينا
هو جاى و عنده امال عريضه انه يخرج بينا و معانا من الفساد اللى استفحل و مع كده تلاقى ناس بتضربه تحت الحزام و تهاجمه
اسمعوه يا جماعه و بعد كده ليكم حق الاعتراض

ghorBty يقول...

لا حول ولا قوة الا بالله

لنا الله

Eno يقول...

انا سمعت في الراجل ده اشعار انا مش بحب السياسة بس زي اي مصرية بتمني اني بلدي تكون احسن بلد في الديا

فا يارب لو في وجوده خير لينا يقمه عن غيره :)

تحياتي ياشموسه :)

Haytham Alsayes يقول...

البرادعي راجل محترم بس اخوانا العفاريت مش عيبوه في حالة
وانا رايى المتواضع لو الراجل دة فعلا مخلص ربنا عينصره بس في شرط للنصر الل احنا نبقي يد واحدة معاه بس خلاص
تقبلي مرورى
تحياتي

واحدة مفروسة يقول...

يا شموسة
اولا ازيك
ثانيا انا كمان ماليش فى السياسة خاااالص

بصي الراجل ما قالش يا رياسة خاااالص
الراجل محترم و مهذب و مستواه راقي
ما ينفعشي مع اغلب الشعب المصري الصراحة
الراجل بيقول نغير حاجات تنفع البلد
نفس اللى كان قالة زويل
بس بطريقة تانية
الفكرة بقا فى الناس اللى عمالة تجعجع من وراة
و عاوزة تخبطه فى الحيط
و هو غالبا مش حيتخبط لأنه هو عارف هو بيعمل ايه
هو عاوز يغير حاجات فى الدستور و بس
زي ما انا كده عاوزة الناس تبطل تفرسنى و ترمي زبالة فى الشارع
و يبطلوا يغشوا بعض
و يسرقوا بعض
و يكسروا الاشارات و يمشوا عكس الطريق
و يتكلموا كويس مش ببلطجة
و بلاش المآوحة فى الغلط
يووووووووووووووووووه
حاجات كتيرة
تحياتي

SHAPE YOUR LIFE (ABOALI) يقول...

لييييييييييييييه

ده عنوان ولا سؤال
لانه لو كان عنوان
يبقى فيه منك اجابه
ولو كان سؤال
يبقى نجتهد ونقول بسم الله

من اراد ان يخدم وله رسالة اراد ان يصلها الى غيره
سيعرف يقينا انه سيتعب ويجب ان يكد
السن ليس مقياس فى اى شيىء
هو مجرد عمر
ولكن حجم العطاء هو الذى يكون المعيار

من اراد ان يخدم فاليتقدم الصفوف
ويعلن عن افكاره ويستغل حالة الالتفاف حولة ويحاول ان يدير الدفة لعل وعسى
ولكن
الفرقعة والجعجعة الاعلامية الغير مستغلة لصالح ذلك الوطن
يقينا سترسخ قيم الانقسام والتقوقع داخلنا

التقرب من المشكلة هو الذى يعطينا الحل
ام التكلم عنها فهو مجرد كلام لا يسمن ولا يغنى

وبلاش بقى اكمل
علشان مرارتى
ومش قادر اطلع قرار علاج على نفقة الدولة واروح المانيا

اه اه اه اه اه المرارة المرارة
زودى السكر شوية حرام

أحمد شريف يقول...

السلام عليكم
حقيقة لا أود أن أقحم نفسي في نقاش حول البرادعي
هو رجل يحترم وإن كنت لا أراه رئيساً لمصر لكن الأهم من وجهة نظري أن ننظر للقوانين الأكثر حاجة وأولوية للشعب المصري .. مثل قانون التأمينات والمعاشات والتأمين الصحي والمحليات والأنشطة النووية والإشعاعية وقانون الوظيفة العامة .. هذه قوانين تناقش الآن في المجلس ويوجد حزمة أخرى من القوانين ذات الأولوية والـاثير المباشر على الشعب
وكنت أتمنى من هؤلاء التي سيق في الجمل التي طرحت هنا عن أنهم مطبلتيه أن يلتفتوا لها ويناقشوها بدلاً من هذه الأحاديث السفسطية وإدعاء وقصر الوطنية والنضال عليهم وكأننا في دنيا غير الدنيا

دمتِ بكل ود

طوبه فضه وطوبه دهب يقول...

هو بنى ادم محترم بمعنى الكلمه بس ياترى هو المانسب ولا لا الله اعلم وحشانى سا اجمل شموسه ياصينيه بسبوسه

dr.lecter يقول...

افديه بروحي وبدمي

راجل محترم وفارس الامل في بلد مليانه ياس

ندى الياسمين يقول...

شموسه الى وحشاني موووووت


اقولك انا بقى الحقيقه

احمد بهجت يا ست الكل ما بقاش على الحجر الايام دي

وانطرد من جنتهم وبدأولوا فى سكة التنغيص من زمان

وطلبوا منه يقفل القناه كمان

قالهم انا فتحتها بالامر ومش هاقفلها بقى الا بمزاجي

ومن هنا تعرفي هما ليه جايبين البرادعي


اما البردعي انا لما شوفت كلامه بجد هو حد محترم واهمال الحكومه له وابعاده من الساحه
دليل على انه كويس فعلا وانه بيهددهم
وده كويس برضه

وحلاوتك فى السياسه يا جميل

ايه ده ا نتى شايله المراره زيي برضه ؟؟

والحوس شالها برضها بعد ما فقع مرارة الشعب كله

أحــوال الهـوي يقول...

من غير ليه

هو كده
الراجل محترم ايوة نفسيا متوازن
لكنه ليس رجلا سياسيا

و اراه لا يصلح لهذه اللعبة لانها لغبة تعرف كيف تنتقي لاعبيها


و يبدو انها قد تخطئ احيانا و تبتلينا بالعاهات امثال مبروك
الذي طال به العمر و لم يفهم كيف يكون سياسيا و لن يعرف دهاليز هذه اللعبة

انا مثلك لا احب السياسه

و لكنك وحشتيني جدا بكتاباتك و احترامك و شموخ تواضعك

تحياتي

م/ الحسيني لزومي يقول...

ظاهرة البرادعي تكشف الشعب المصري علي حقيقته لأنه هو الوحيد القادر علي التغير بقطع النظر عن من هو الرئيس القادم

فتاه من الصعيد يقول...

لا مفيش تلميع ولا حاجه ... الراجل كان هيفطس من ذنقاتتها

بس برضو كشفلنا اللقاء جوانب كتير محدش كان فاهمها

تحياتي

وجه جديد د.أحمد عثمان يقول...

شمس النهار

يبدو انه قد فاتك الكثير
من اخبار السياسة

للمعلومة
أحمد بهجت و الحكومة لا يتقابلان
و ان بدا من نجاح الاول انه من الموالين
لكنه يمكن ان تصفيه بالمستقل
لا المناوئ و لا المعارض

اما عن البرادعي
فهو ظاهرة ايجابية
تدل ان هناك بدائل صالحة
و ان النظام هش للغاية
لذلك يتزلزل مع اول وطأة قدم
لرجل صلب

تحياتي

حنين الذكريات يقول...

البردعى راجل محترم وكويس فى منصبه اللى فات لكن مش ممكن ينفع رئيس للبلد
ومحدش هيقدر على التغيير لواحده التغيير هيكون من الشعب نفسه بمعنى ان الاصلاح نابع من الفرد لنفسه

شمس النهار يقول...

*Muhammad Saber Abdou

الله يسلمك
طبعا فعلا هو رجل محترم جدا
ولو اتفرجت علي الحلقة هتعرف قد ايه الرجل ده فخر لمصر

سلامي

شمس النهار يقول...

*امل حمدي

ازيك ياجميلة

الحقيقه الموضوع مش انه ماينفعش لا هو ينفع
بس الرجل من كتر ماعنده من علم وثقة وتفهم
قال انا سني كبر علي هذه الاعباء
فاهم هو كويس ان الرياسه مش هيلمان دي حمل علي الاكتاف عايزه شاب

وقصدي من البوست ان ياريت المطبلتيه زي ماقلتي يسكتوا وكفانا بقا هبل وفرقه علشان مانتغماش عن اللي بيحصل بجد

سلامي

شمس النهار يقول...

*صوت من مصر
تصدق فتصتني علي نفسي من الضحك

:::::::::))))))))))

شمس النهار يقول...

*ghorBty

ازيك انتي فين
اخبارك ايه

شمس النهار يقول...

*Eno
ازيك ياعروسة البلوجر

::))

كلنا بنتمني لبلدنا كل خير
بس في ناس عايزة الخير ليها مش للكل

نورتي

سلامي

شمس النهار يقول...

*Haytham Alsayes
اهلا بيك
مش علشان هو كويس ومحترم يبقا يصلح
مع اعتقادي انه فعلا يصلح
لكن الرجل عارف البير وغطله وقال كلمته مش عااااايز

يبقا المفروض نحترم رغبته وانتهي ومانجبلوش الكافيه

سلامي

شمس النهار يقول...

*واحدة مفروسة

الله يسلمك
ازيك انتي

ضحكتيني يامفروسه
عايزة ده كله وفي مصر
الناس بتقول الحكومة
وهي الحكومة هي اللي بترمي الزبالة في الشارع
العيب فينا اولا
نتصلح وبعد كده نحاسب الحكومة
الناس زمان قبل الثورة كانت كويسه ليه
علشان كان الانسان مسؤل عن نفسه يشتغل هيجيب فلوس
هيذاكر ويجتهد هيكمل تعليمة

لكن الثورة دلعت الناس عملتلهم ماما
فالشعب باااااظ

كده اديني انا كمان اتفرست


سلامي

شمس النهار يقول...

*SHAPE YOUR LIFE (ABOALI)

لاهو عنوان ولا سؤال
ده عياط

ليه
علشان هنضيع الرجل المحترم في وسطنا

مش فاهمه مين اللي ورا الموضوع ده اصلا
انا كنت فهمه ان الرجل جاي وهيرشح نفسه فعلا وناوي

لاقيت حاجه تانيه خالص

فاصرخت قلت ارحموا شيبته

ياريت تتفرج علي الحلقة
هتعمل زي

سلامي

شمس النهار يقول...

*احمد الشريف

ايوه عندك حق

المصريين اغلبهم اساتذه في بذل المجهود الضخم في غير محلة


نورتني
سلامي

شمس النهار يقول...

*طوبه فضه وطوبه دهب

ااازيك

انتي اللي وحشاني اخبارك ايه ياجميلة

ايوه هو كل حد كويس يبقا ينفع
مش لازم هو يوافق الاول

::))

سلامي

شمس النهار يقول...

*dr.lecter

ازيك
ماهو كويس بس مش عايز
الرجل بعد الحروب اللي خاضها في حياته مش عايز يكون ريس
عايز يعيش في هدوء تام


سلامي

شمس النهار يقول...

*ندى الياسمين

اهلا بيكي ياجميلة

السياسة هو في اجمل من السياسة::::))))

بتفكرني بمسرحية المتزوجون

::))

نورتيني

سلامي

شمس النهار يقول...

*أحــوال الهـوي

حمد الله علي السلامة يادكتور

اوافقك الراي

وشكرا علي كلامك

نورتني

سلامي

شمس النهار يقول...

*م/ الحسيني لزومي

اهلا بيك

تصدق انت جبت الفايده
ماحدش بيغير حاجه غير الشعوب
بس الشعب المصري
مش عايز حاجه من دنيته غير دعاء الوالدين
خلاص هو اكتفا بكده

سلامي

شمس النهار يقول...

*فتاة من الصعيد

ازيك ياصعيدية زي

::))
ماهو انا الاول لما ابتدي البرنامج ولاقيت كليب تلميع استغربت وبعد كده لاقيتها كل شويه تخبطه في حد
وهو مين
بقا مني الشازلي هتقدر علي رجل زي ده
حاور العتاه من بشر السياسه
ايه ياجميل انتي ماقريتيش مابين سطور البوست

نورتيني

سلامي

شمس النهار يقول...

*وجه جديد د.أحمد عثمان


اهلا بيك
الحقيقه مالييش في السياسه

لكن اللي اعرفه ان الرجل لما اخد فلوس جايزة نوبيل
تبرع بيها لفقراء بلده
دي في حد ذاتها سياسه


نورتني

سلامي

شمس النهار يقول...

*حنين الذكريات

فعلا

لازم احنا الاول نتغير
وعلي فكره انه يصلح او لايصلح مش هنقدر نعرف
يعني هو احنا اخترنا اللي قبله ولا اللي قبله ولا اللي قبله وكنا نعرف يصلح او لايصلح

المدونه نورت

سلامي

عمرو جويلى يقول...

السلام عليكم
من الأصل يا حاجة إن هو
حتى لو حب يرشح نفسه مش
هيعرف عشان المادة 76، 77
من الدستور اللى مفصلها
النظام على مقاسه حتى لا
يترشح أحد وإحنا عارفين واحد
زى أيمن نور لما خرج عن ما
حددوه له حصله إيه
خالص تقديرى

شمس النهار يقول...

**صيدلانيه طالعه نازله

اولا بعتذر ان ردي علي تعليقك مااتنشرش
وهعيده تاني

نوتي المدونة

الحقيقه انا مش عارفة ليه كل الهيصه دي
لما الرجل نفسه ماقالش انه هيرشح نفسه اصلا
عمالين يعملوا كده ليه

سلامي

شمس النهار يقول...

*عمرو جويلي

وعليكم السلام

اهلا بيك

بالظبط

ماهو علشان كده لازم الناس تعرف الحقيقه
وده الغرض من البوست
ان هناك اسباب كتير مش هيرشح نفسه علشانها

اولها انه مش عايز

نورتني سلامي

norahaty يقول...

المهم أنتى كويسة؟
طمنينا عنك لانك
بتغيبى كتير عننا
الايام دى. اما
أحنا وبلدنا
متهيأللى
محتاجين
معجزة من
ربنا سبحانه
وتعالى تخرجنا من
اللى أحـــنا فيه.

أمل حمدي يقول...

البقاء لله يا شموسة

وإنا لله وإنا إليه راجعون

ذو الوجه المبتسم يقول...

السلام عليكم

انا متابع من بعيد موضوع السياسة

رغم انى شايف ان فيه ناس كتير مؤيد للبردعى وفكرة التجديد ولازم النظام كله يتغير

معاك ان لازم من التغيير لكن المهم فعلا ازاى نغير ومين يتغير وبايه نغيره

الموضوع مش سهل يا جماعة ومش مجرد كلام ولا تمنى

الفساد زاد نعم
السرقة زادة نعم
الخراب فى البلد زاد نعم
حاجات كتير سلبية فى البلد نعم

لكن مين اللى هيغير وفين هو

اعتقد مش البردعى لانى بدون زعل مش مقتنع انه ممكن يغير شئ والدليل على كلامى انه عمل ايه لمصر
ولا حتى هيعمل ايه لمصر
كله كلام بتاع ناس فاضية

طولت معلش

قريت تعليق الاخت صيدلانية طالعة نازلة وبتقول الراجل بصراحة خسارة فينا
مش معاكى يا صيدلانية
لو فيه الخير كان عمل كتير قبل كده

احنا عاوزين صلاح الدين او قطز او حد عمل لنا حاجة قبل كده علشان نصدق انه ممكن يعمل لنا حاجة بعد كده

تحياتى

طوبه فضه وطوبه دهب يقول...

تسلم ايدك ياشموسه بجد بوسه اكتر من رائع

طوبه فضه وطوبه دهب يقول...

اقصد البوست اللى انت نقلاه عن ابو منعم ربنا يخليه ليه يارب ويطرح له فيه البركه

شمس النهار يقول...

*norahaty

الحمد لله كويسه
في مشاكل بس الحمد لله

وبغيب غصب عني
انتي ازيك عاملة ايه

يارب تكوني بخير يارب

وشكرا علي سؤالك
سلامي

شمس النهار يقول...

*أمل حمدي

شكرا ياامولة علي كلامك

الله يخليكي
انتي نعم الاخت

ياتري بيوصلك سلامي

سلامي

شمس النهار يقول...

*ذو الوجه المبتسم

اهلا بيك
ازيك عامل ايه

انت عارف مالييش في السياسه خالص

بس كانوا كلمتين في زوري

عارف احنا محتاجين رضا ربنا علينا
بس ياريت نعمل حاجه علشان ننوله

نورتني
سلامي

شمس النهار يقول...

*طوبه فضه وطوبه دهب
ازيك

شوفتي جميل ازاي

نفسي كل الناس اللي علي النت يقروه

سلامي

micheal يقول...

مش حيترشح وواضحة جدا بالنسبة لي..اللي جاي من الوثني يعني من الوثني..للأسف فيه ناس كتير في إيديها سلطة من مصلحتها الاستمرار بالوضع ده !
تحياتي

شمس النهار يقول...

*micheal
ازيك
الحمد لله اني اطمنت عليك

يارب تكون بخير وسعادة

طبع واضح جدا

بس اللي ملخبطني ليه الازعرينا دي كلها
حوالين الرجل وهو اصلا مش عايز


نورتني
سلامي

Sharm يقول...

الراجل فعلا مؤدب و محترم جدا

شمس النهار يقول...

*Sharm

طبعا مؤدب جدا
وده واضح من طريقته المؤدبة في الرد علي الست المذيعة

سلامي

Lyssandra يقول...

إزي حضرتك ؟ :)

الظاهر حضرتك كنتي علقتي علي البوست اللي قبل الجديد عل الهامش :) وأنا رديت عليه هناك
يارب المرة الجايه تكوني معانا :)
وبالنسبه للمدونة فهي موجودة فعلاً والجديده أنا مشرفه فيها بس لانشغال صاحبتها :)

تحياتي لحضرتك :)

Lyssa

بحر الالوان يقول...

حمد الله علي السلامة ..... وميرسي علي ذوقك يا ست الكل

وربنا يبعدنا عن السياسة:)

تحياتي

زهور الامل يقول...

يااااااااااه يا شموسة وحشاني بجد
ووحشاني مغامراتك ومدونتك اوي

والله الواحد مابقاش عارف الحقيقة فين

البرادعي شوفتله حوارات كتير اوي وحاسة فعلا ان الراجل ده لو مسك هيعمل حاجة كويسة للبلد دي

وساعات بخاف من اللي ماسكينها من المنافقين اللي ممكن يقضوا عليه وعلى حلمه

بجد الواحد بقى متلخبط ومش عارف المركب دي هترسى بينا على فين بالظبط
واهي ماشية واحنا ماشين معاها وربنا يسترها

تحياتي

gogo!sf يقول...

والله اللى انا شيفاه ان منى بتهاجم البرادعى بطريقه مستفذه جدا وده لازم تعمله عشان ما طرش

محسسانى انها مش عايشه فى مصر ولا شايفه اد ايه الناس تعبانه بتتريق على الراجل عشان زعلان انه شاف جزء بسيط من الناس اللى عايشه فى عشش وبتنام فى الشارع

مهى الست منى وبعض الناس اللى زيها ميحسوش بالناس دى
ولما يجى حد يقول لاء ويحاول انه يعمل الصح ينفوة تماما

انا شايفه ان البرادعى ده راجل محترم جدا وحاسس بالبلد اوى وعايز فعلا يعمل حاجه ويخلى البلد فى صورة افضل بكتير من اللى هى فيه

بجد نفسى اوى اوى يمسك الرئاسه بدال البهدله اللى احنا فيها

تحياتى ليكى يا شموسه

وخلى قلبك جريىء يا قمر

انا كنت بحب زمان مبارك لكن دلوقتى عكس زمان

جوجو عاشقه الاحزان

واحد من العمال يقول...

السلام عليكم
د/ البرادعى حتى لو لم يترشح
سيظل رمزاً للرغبه فى التغيير للأفضل
وبعد أعلانه تأسيس الجمعيه الوطنيه للتغيير وضحت رؤيه الرجلفهى ليست للمطالبه بتغيير الرئيس أو الحزب الحاكم فقط بل تغيير النظام الذى يفرز حكامنا نظام ديمقراطى حر نشاهد به رئيس سابق وعلى المعاش ده حلم فعلاً
ولازم يكون لنا كلنا فى السياسه
ووحشتينا

ودمتِ بخير حال