السبت، 1 يناير 2011

من امتي ؟؟؟


من امتي مصر بيتفخخ فيها سيارات لكنايس؟؟؟
هي السيارة دي لما تتفخخ لكنيسه هتفرق اللي ماشي في الشارع ده مسلم ولا مسيحي؟؟؟؟
بيبقا فرح في الكنيسه مسحيين ومسلمين
بيبقا ميت في الكنيسه مسلمين ومسحيين
اللي عمل كده مايعرفش ان اللي ماشي في الشارع مصري(مسيحي مسلم)
واللي جوه الكنيسه مصري(مسلم مسيحي)
الانفجار مافرقش مانقاش
ماتفوقوا
اللي بيحرس الكنيسه مصريين(مسلمين مسيحيين)
فين بقا شباب الاحزاب فين شباب 6 ابريل وبتوع التغيير والاخوان وكفايه وكل الناس دي فين دورهم ؟؟؟؟؟
ماهي مصر اهي بيقطعوا فيها ماتعملوا وقفه
مايطلع شباب المسلمين مع شباب المسحيين اللي همه مصريين مع بعض الايد في الايد ويدفعوا عن استقرار البلد دي عن مستقبلهم
ولا عيزنها لبنان تاني ولا عراق تاني
لمصلحة مين

للدرجة دي مصر غيظاهم للدرجة دي مطلوب ان مصر تقع

حسبي الله ونعم الوكيل

هناك 27 تعليقًا:

همس الاحباب يقول...

حسبى الله ونعم الوكيل
.1007

adel يقول...

كل سنة وحضرتك طيبة
وانا مش قصدي اتريق

بس معنديش اي تعليق الا ده

Dr Ibrahim يقول...

من الاشياء التى يسعى وراءها أعداء الوطن هو اشعال نار الفتنة ودق أسفين بين المسلمين والمسيحيين...ولكن لاتحسبن الله غافلاً عما يعمل الظالمون..

Unknown يقول...

السلام عليكم اختي شمس

معك في كل علامات الاستفهام..

وكتبت رأيي في الموضوع وفي تصور من وراءه في أكثر من تعليق عند إخواننا المدونين..

لكن اسمحي لي أن أقول: أليس مبكرا بعض الشيء لومك للفئات التي ذكرتيها وطالبتيها برد فعل تجاه الموضوع؟

طبعا أنا مقدر لحرقتك، لكن فقط اقولها من باب التذكرة..

تحياتي أختي الكريمة.
----------------
ملحوظة فنية بشأن المدونة: أنا أستخدم متصفح جوجل كروم، وكلما حاولت فتح رابط مدونتك يعطيني رسالة تحذيرية بوجود خطر في الموقع (أي خطر فيروسات).. فأرجو التنبه.

momken يقول...

حسبنا الله ونعم الوكيل

مافيش دين ولا مله ولا اى حيوان ولا اى كافر يقول كده

ولاحتى عبده الشيطان ممكن توافق على الفعل ده

تحياتى

shimaa elkholy يقول...

لا احنا نعز الهلفطه بس يا شمس

وعموما محتاجين ككل مسلمين ومسحيين ننضف قلوبنا ونعرف ان احنا مش من مصلحتنا الى بيحصل ده

المسلمين يبطلوا يقولوا كلام فارغ مش من دينا
والمسحيين يبطلوا هما كمان يصدقوا فينا

شمس النهار يقول...

*همس الاحباب

استاذ خالد

احنا محتاجين وقفه كبييييرة اووووي من الشعب كله يوقل ولو مرة وااااحدة لااااا

شمس النهار يقول...

* adel

مااعتقدش ياعادل ان ممكن اعتقد انك ممكن تتريق في موقف زي ده

ومش هنقدر ننكر ان المتطرفين من الجانبين هيستغلوا الموقف

وده دور الناس المعتدله
واعتقد ان كفايه محركها مصري مسيحي
وباقي الحركات مصرين مسيحين مسلمين

مصر في خطر حقيقي ياعادل
واحده صحبتي بتقول لي مش القاعدة وبس ده رد من اليهود علي موضوع ابو حصيرة

ياخوفي السنه الجايه مانعرفش نقول لبعض كل سنه واحنا طيبين

شمس النهار يقول...

* Dr Ibrahim

تفتكر يادكتور اليهود اللي اتطردوا من مصر هيسيبوا المصريين مسلمين ومسيحين ينعموا بالراحة؟؟؟

مع انهم مبرطعين في سيناء

شمس النهار يقول...

* ماجد القاضي

مش معاك ان اللوم مبكر

علشان اللي بيحصل النهارده ده مش النهارده بس

ده بقالوا كام سنه

موضه جديده

وكلنا ساكتين
وكل شويه حد يطلع يقول لنا مصر بخير
والوحدة بخير

فين النقابات
فين الجمعيات فين مش عارفة مجمعه ايه وحوار ايه مع ايه

كل الحاجات اللي بنسمع عنها
ومش شايفين لها اي قماره

ولا لازم مصيبه جامدة اوي تحصل علشان نتحرك

بالنسبه لموضوع التحذير الحقيقه مش عارفه ومش عارفه اتصرف ياريت حد يقول لي اتصرف ازاي يبقا كتر خيره فعلا

شمس النهار يقول...

* momken

لازم يكون في تحرك شعبي
لازم يكون في خطاب ديني يواجه الفعل ده ويوجه المتطرفين من الجانبين

شمس النهار يقول...

* ندى الياسمين

مش هينصلح الحال الا لو المسؤلين تخلوا عن هبلهم ونزلوا للشباب

ورجال الدين اتكلموا صح مع الشباب

لازم وقفه مش هينفع كده
هنبقا عراق ولبنان

مصر هتولع مش هينفع

لــــ زهــــــراء ــــولا يقول...

اللى حصل بجد مش ينفع يتوصف ولا لاقيه كلمه تعبر عنه
هو الارهاب عاوز ايه مننا
هى مصر قرفاهم اوى كده ليه

حسبى الله ونعم الوكيل


زهراء

adel يقول...

انا ضد اننا نقول اسرائيل ويهود
حلينا واضحين
دي استغلال من السلطة واضح قوي قوي قوي يعني
القنبلة فرقعت بشكل معين
معملتش اضرار مادية غير عربيتين تاني
الاصابات بشرية فقط
الانتخابات جاية
نلهي الشعب ونلعب معاهم
سوري انا بجد ضد حكاية اليهود والموساد دي
وخصوصا بعد بيان الداخلية ان التفجير حصل بواسطة انتحاري
وكل الفيديوهات وشهود العيان قالوا عربية مفخخة واللي ركنها جري منها ومحدش كلمه
يبقي ده اسمه ايه ؟؟

شمس النهار يقول...

* لـــولا وزهـــراء

اصل يازهراء لبنان والعه والعراق والعه
والسودان والعه

مصر بقا الدور عليها

لازم هي كمان تولع

اومال يعني تتساب كده في حالها

شمس النهار يقول...

* adel

معقول ياعادل

ان الامن يصل بيه الصفاقه ان يضحي بكل الناس دي والاستقرار والامن علشان انتخابات محسومه اصلا

ويولعا وهي اصلا والعه

واحدة بتقولي انها رد علي ابو حصيره
لو الامن كان ممكن تتعمل حاجه اقل من كده
الغباء اقل من كده عندهم مش للدرجة دي
ده امن مصر ياعادل مش لعبه

المصوراتي يقول...

السلام عليكم

من الواضح انك تتحدثي من قلبك اكثر من عقلك

من الفاعل هل تعلمين ؟؟

1- الجماعات السلفيه المتشدده
2- الحكومة المصرية
3- القاعدة
4- الكيان الصهيوني

من ؟؟

بالامس بالامس دخلت علي عدد من المواقع الاخباريه حتي اري اخبار غزه و فلسطين و هل سيقوم اليهود بإذائهم ككل عام

اول ما فتحت لقيت الخبر في مصر و شويه و لقيت العراق و كمان نيجريا !!!

الموضوع مش واقفه اكتر من انها رسالة عاوزين نفهما سواء مسلم او مسيحي

من المقصود المسيحيين !! لا اظن انما هم الضحايا فقط
لكن المقصود مصــــــــــر

اجاب انا عن السؤال الذي طرحته من الفاعل ؟؟

1- الامن المصري قادر علي الوصول لهم و معرفتهم و من الفاعل منهم فلن تتكرر هذه الحادثة مره اخري لو هم الجناه فعلا

2- الحكومة المصرية ( عجيب ) قانون الطواريء نسيناه اللي بسببه كتير من الشرفاء اتأذوا , عشان يجددوا للقانون في شكله و مدته

3- القاعدة : كانوا طلعوا و قالوا انهم اللي عملوا الموضوع دا زي العراق ما قالوا و سعتها مش حتكون في فتنه لكن سمعته الامن المصري ستكون في الحضيض

4-الكيان الصهيوني و هذا ما اخشي بشده لان الدور جي علي مصر
خاصة بعد استفتاء السودان و بالتالي زعزعة امن مصر من الجنوب

اما عن الاخوان فقالوا : استنكرت جماعة الإخوان المسلمين بمحافظة الإسكندرية الحادث الأليم الذي وقع صباح اليوم، وما تم من تفجيرات آثمة أمام كنيسة القديسين بالإسكندرية؛ أودت بحياة أعداد من المسيحيين والمسلمين من أبناء الوطن وإصابة العشرات.

البرادعي قال :
سلام الله على شهداء كنيسة القديسين. كفانا استخفافا بعقول الشعب، نظام عاجز عن حماية مواطنيه هو نظام آن الأوان لرحيله - محمد البرادعي

و عن المسلمين علي الفيس بوك في مصر
منهم من قال : والله لو علمت من فعلها ما كفاني فيه دمه
و ايضا قالوا

الارهاب .. انا مصري .. انا ضده

تحياتي و اقدر الحالة التي انتي فيها و لولا اني منشغل لكتبت موضوع علي مدونتي
اسف جدا يا شمسنا

المصوراتي يقول...

اختي سلام عليكِ

من الواضح ان الموضوع الهب دموع قلب و اوقف تفكير عقل

حسبنا الله و نعم الوكيل

لكن دعينا نفكر بصوت عالي و ربنا يستر :)

من الفاعل ؟؟

1- جماعات سلفية متشدده
2- القاعدة
3- الحكومه المصرية
4- الكيان الصهيوني
بالامس دخلت لاري اخبار فلسين خايف ان اسرائيل تعمل حاجه فيهم زي كل سنة
لقيت الخبر في مصر و العراق و نيجريا

دعيني ارد علي السؤال
1- لو هم الفاعلون فالامر قد يكون غير مقلق فالامن المصري يعرفهم جيدا و يجيد التعامل معهم و لن تتكرر هذه الحادثة مره اخري

2- كانوا اعلنوا مسؤوليتهم و دول كمان مصر تعرف تتعامل معهم جيدا

3- ليه لأ قانون الطواريء حنحتاجه الفتره القادمه مع التوريث

4- الكيان الصهويني و هذا ما اخشاه خاصة بعد فعلته في شرم الشيخ و وجود القروش هناك
و ايضا لان مصر الدور عليها بعد السودان و انفصالالجنوب الذي يعني زعزعه الامن الجنوبي لمصر

اما عن الفئات التي تحدثتي عنهم

استنكرت جماعة الإخوان المسلمين بمحافظة الإسكندرية الحادث الأليم الذي وقع صباح اليوم، وما تم من تفجيرات آثمة أمام كنيسة القديسين بالإسكندرية؛ أودت بحياة أعداد من المسيحيين والمسلمين من أبناء الوطن وإصابة العشرات.

سلام الله على شهداء كنيسة القديسين. كفانا استخفافا بعقول الشعب، نظام عاجز عن حماية مواطنيه هو نظام آن الأوان لرحيله - محمد البرادعي

انا اعلم و اشعر بك جدا لاني بكيت بالامس عليهم بين الناس اللي ماتوا كمان مسلمين و في المصابين في مسلمين

و لو كان لي متسع من الوقت لكنت كتبت موضوع عن الحادث و الرؤيه السياسه لنتاج هذا الحادث تفصيلياً

تحياتي لكِ يا شمسنا

Haytham Alsayes يقول...

شمس
اسمحيلي ارد علي عادل
وانا مقدر موقفه
مين اللي قال ان اسرائيل والموساد عادى كدة مش مصلحته ان يوقع الدنيا في بعض
اذا كان رئيس الموساد السابق قال كدة بالعلني
احنا شغالين من سنة 79 علي خلق بيئة متوترة بين المسلمين والمسيحيين
واصدار فتاوى متطرفة لضرب الجانبين
وبعدين مهما وصل درجة الالهاء مش هتبقي بالدرجة دى
ممكن يلهونا بمتش كورة
قضية الحضرى
قضية مصر والجزائر
لكن كدة لا
لان كدة اسمه لعب بالنار
اسرائيل وامريكا لهم المصلحة الاولي والاخيرة في كدة

حاجة تانية لو تخدوا بالكوا منها
خطة الشرق الاوسط الجديد بتاعة الست كوندليزا كانت بترسم حدود جديدة في الشرق الاوسط
علي اسس عرقية وطائفية
مصر هتتقسم وفق الخطة لثلاث دول
اسلامية في الشمال
مسيحية في الصعيد
النوبة في اسوان وشمال السودان

وليه انتوا متصورين ان تقسيم السودان عادى حرب اهلية وانتهت بالتقسيم
لا مش عادى
دة المقصود بيه مصر اولا واخيرا
ربنا يستر علي الايام الجاية
الخطة ماشية تمام
ومحدش يقولي انت مؤمن بنظرية المؤامرة زيادة عن اللزوم
لان المؤامرة واضحة زي الشمس
ولو عاوزين تثبتوها اقروا
وثائق ويكليكس وترجموها وافهموا اللي فيها
الخطر علي الابواب ياسادة

حسبنا الله ونعم الوكيل

SHAPE YOUR LIFE (ABOALI) يقول...

بهدوء ومنطقية ناخد الامور
السنين اللى فات شهدت ناس كتيرة فكرهم سيىء ليهم اهداف سياسية خبيثة غرضها نشر الفرقة بين اطياف الشعب
العودة الى صحيح الاديان وتبادل الفكر فى احترام هو النافذة الحقيقة للخروج من دوامات التوتر
لان المواضيع دى هاتتتكرر تانى
طول ما فيه عدم رضا عن او توافق بين ابناء الجسد والوطن الواحد
المسئولية مشتركة من الكل
واهمها تخفيض حالة الشحن من اى انسان
يريد المساومة والاصطياد فى الماء العكر

اللى فاهم دين صح وحياه
هايفهم انى اى شخص يعمل كده بعيد عن اى دين

لانه فى النهاية لا يقتل معتنق لدين
بل يقتل انسان
لله الحق فقط ان يزهق روحه او طبقا لعدالة حكمة


تقديرى
وياااااااااااارب يرفع الغمة عن بلدنا

رحاب صالح يقول...

وفي ناس كتير تقولك ومالوا فيها اية يعني دول مسيحين ....وماداموا مش مسلمين يبقي ف داهية انشاله تولع كل كنايس مصر ولا يهمنا....
والله العظيم ده كلام واحدة قريبتي حالا دلوقتي واحنا بنتكلم ف الموضوع واحدة متعلمة مش امية ولا جاهلة بس تقولي اية ...
ولما اتكلمت معاها تقولي انت بتدافعي عنهم كأنك منهم...كدة ليه ...
انا ردي واحد انا انسانة وربنا مقالش كدة والاسلام مقالش كدة ...
انا انسان ومن حقي اعيش وفقط لي حقوق وعليا واجبات ...
من امتي مصر بيحصل فيها ده....
من امتي ده بيحصل ....
انا حاسة وخايفة فعلا لا نتحول للبنان اخر ونتجزأ ...
حسبي الله ونعم الوكيل

موناليزا يقول...

ومين قال ان اللى عمل كده مصريين!!
عندى احساس قوى ان مفيش مصرى عاقل ممكن يعمل كده

صبح يقول...

ده شغل صهاينة الله يحرفهم

مصر مش ناقصة عشان يزيدو عليها الفتن الطائفية

بس هو شغل بيستوي على نار هادية بقاااالو كتير

يعني ايه مسلمين يمنعو اولادهم يلعبو مه مسيح طب لو في بلد غربي تمنعو لا طبعا لحسن حكومتهم ترحلك في اول طيارة
انما احنا في بلدانا بنعك براحتنا
يعني مش هاممنا نسئ لاسلامنا او نزرع بغضاء اهو عايشين حسب رجعية مش عارفه حتودينا فين

انما التفجير فده سياسة متعملة في جميع الدول اللي تنشا فيها فتن
مفروض الكنيسة تعرف ان مش مسلمين اللي عملو كده لان لو مسلم زي ماقلت هو بعملو ده حيموت مسلمين كمان
لنمل دول صهاينة مصلحتهم تولللللع في كل البلدان العربية عشان يتاخر النصر

بس على مين

ربنا قادر على كل شئ

انا عن نفسي مسلمة و بقول للمسيحين

اسف مش حيرجع اللي ماتو

بس اعرفو ان الاسلام برئ من التعصب ده

و حسبنا الله و نعم الوكيل في اللي بيزرع الفتن

فتــافيت (رحاب الخضري) يقول...

تكتيك جديد بجد

عايزينا زي سنة وشيعة العراق
او نحصل السودان ونتقسم!!!

ربنا يستر.......

دخلة مدونتك من عند سحساوي
تقبلي مروري...

sony2000 يقول...

كل دا عارفينوا
بس مين وقت الغضب بيفكر صح
ياريت بجد حد يفكر صح
السوداان
ورراها احنا
بس خلاص

dr.lecter يقول...

ومين قال ان محصلش

امبارح حصل والنهارده هيحصل ويوم الجمعه هيحخصل

مين قال ان مصر مافيهاش تفخيخ؟

ده من زمان من ايام جماعه الجهاد في التمانينات وبيعملوا كده

العقول الوسخه المعفنه اللي حاطه شعار قال الله وقال الرسول

ادي اخره القنوات السلفيه اشربوا بقي وخلي الشيوخ ينفعوا مصر

faroukfahmy يقول...

شمس لاشك ان اسرائيل وامريكالهم يد ومصلحة فيماحدث وما سيحدث وهم فعلا متحدين لتحقيق حلم كوندليزا بتقسيم مصر ولكن ستظل مصرنا الحبيبةدائما متحدة وسنقضى على فكرة شتتت تسد منهم لله