بس حسيت ان لازم تشاركوني فيه
*******
سيناريو ل 2 من “الشباب” المصري المتحمس
, قصة قصيرة
تامر: شفت تونس؟
وائل: شفت
تامر: ايه رأيك
وائل: ناس جامدة
تامر: انت عارف ابتدت ازاي؟
وائل: شاب عنده 26 سنة أخدوا عربية الخضار بتاعته, اتخنق وولع في نفسه, راحت الناس كلها سخنت
تامر: طب ما تيجي نفكر ازاي نعمل الموضوع ده هنا
وائل: أنا شغال, بس عايزين حاجة كده زي الولد بتاع عربية الخضار ده برضه
تامر: انت ممكن تولع في نفسك عشان مصر؟
وائل: لأ طبعا, وأصلا حتي لو عملتها مش هفرق مع حد غير أهلي
تامر: طب ممكن نولع في مين؟
وائل: ايه رأيك أولع في أمي يوم عيد الأم؟
تامر: في واحد الريدي قتل أمه وهي بتصلي قبل كده عشان 50 جنيه, الناس مش هتتأثر قوي, عايزين حاجة قريبة من الناس
وائل: طيب ايه رأيك نولع في كشري التحرير
تامر: اتعملت قبل كده, لازم حاجة تأثر علي الناس المفكرين
وائل: تيجي نولع في الاوبرا؟
تامر: قديم قوي انت يا مان, ولعت قبل كده, عايزين حاجة ليها معني سياسي
وائل: خلاص لقيتها, نولع في مجلس الشوري
تامر: يابني انت فاقد الذاكرة؟ ما النواب ولعوا فيه من كام سنة, عايزين حاجة برة القاهرة, وتوصل وتسمع مع الناس المثقفين
وائل: بص بقي هي دي, احنا نولع في قصر الثقافة
تامر: يابني ارحم أمي بقي, ما ولع في بني سويف قبل كده, فكر في حاجة توحد طوائف الشعب
وائل: لقيتها
تامر: قول
وائل: احنا نولع في كنيسة
تامر: ايه التقليد ده, ما دي بيعملوها كل سنة الريدي, بقت أنيوال ايفينت خلاص, وهيقولوا اللي عملها متخلف عقليا, عايزين حاجة جديدة
وائل: طيب ايه رأيك حد فينا ينتحر في ميدان عام؟
تامر: ما تجمع شوية, ما لسة واحد دماغه نضيفة سبقنا وراح منتحر من كام شهر عشان معهوش فلوس يتجوز البنت اللي بيحبها, ومفيش بتي أدم اتحرك, الحاجات دي أخرها الاخوان المسلمين يعملوا بيها فيديو مع كمانجة حزينة ويحطوه علي يوتيوب
عايزين حاجة الناس بتتأثر بيها كل يوم
وائل: بس خلاص, استني استني
تامر: قول يا زفت
وائل: تيجي نولع في قطر؟
تامر: دولة قطر؟
وائل: لأ قطر, قطار يعني من بتاع الركاب
تامر: انت طلعت عين أمي, ما لسة قطر العياط مولع, ده من كتر القطورات اللي بتولع الناس بقت بتستني علي شريط القطر عشان يعملوا باربيكيو
وائل: طب يا مان ما كل حاجة كدة الريدي ولعت
تامر: مش عارف, تفتكر ايه ممكن يولع عشان الناس تسخن؟
وائل: مش عارف, سيبني أفكر, انت هتعمل ايه دلوقتي؟
تامر: ها أعدي علي دينا نروح نتعشي وبعد كده سينما, بس فاضي باليل, انت هتعمل ايه؟
وائل: هاروح موبينيل أدفع الفاتورة, وأبص علي أي فون 4, وهاروح لا بوديجا مع سارة
تامر: طب كلمني لما تخلص نروح نلعب طاولة
وائل: خلاص قشطة, وكلمني بكرة بقي عشان نكمل موضوع الثورة ده
هناك 51 تعليقًا:
ههههههه
عايزين يعملوا ثوره والناس تولع فى بعض هى ناقصه ولعه اكثر من كده
الشخص اللى ولع فى نفسه قدام مجلس الشعب دا النهارده اكيد شخص مختل عقليا مش اللى اطلق الرصاص على قطار سمالوط
ربنا يرحم ويهدى الحال اصلها مش ناقصه تتشعلل اكثر من كده
* mrmr
اللي عمل السيناريو ده يامرمر قاصد يتريق علي شباب مصر
لاحظي اخر السيناريو لخص لك اهتماماته ايه سينما وكافيهات وبنات وموبايلات ويتعشي برة ويسهر وطاولة ودماغ فاضيه وخلاص
وان الشعب المصري بقا متبلد مابيحركوش حاجه خلاص
السيناريو من النوع الصادم جدا
ادى التهييس و لا بلاش
بس تصدقى حضرتك
الناس بتكلم صح
على رأى منير
كُل اللى ممكن أعمله معاكى اتعمل
(:
ههههههههه
احسن له يولع سيجارة
ويتنيل علي عينه
ههههههههه
تحيتي
* Ramy
ايوة يارامي تفعيل لنظرية محمد صبحي في مسرحية الجوكر
لعبته السبع لعبااااااات
مانفعش
:))
* سواح في ملك الله
:))))
هو هيتنيل ايه اكتر من كده هو وصديقه منيلنها علي الاخر
ايه التخريف ده
للاسف دول بيشوهوه سمعة المصريييييييين
لكى الله يامصر
وهتفضلى غاليه علينا رغم انف الحااااقدين
هههههههههههههههههههه
شباب سيس اخر حاجة ههههههههههه
طيب السناريو دة جايب من الاخر
بس هما نسيوا واحد مهم المفروض الكل يفكر يولع فيه
طبعا زين العابدين مش حد تاني هههههههه
عارفة حضرتك اللي بيحصل دة اسمه المقاومة السلبية وهو دة اللي مصبر المصريين النكت
واليوتيوب والاميلات والنت والمدونات
بعتبر حسني اذكي من زين العابدين انه سايب الشعب يتكلم عشان الحلة البرستو متنفجرش
فلاح ارارى
مع الاحترام للفلاحين المحترمين طبعا
تحياتي
* نبع الغرام
طبعا همه عايزين يقولوا ده اللي احنا فالحين فيه مش اكتر
يعني دي كل اهتمامات الشباب المصري
* Haytham Alsayes
:))))
ايوة بالظبط انت لاخصت كده ياهيثم
سيب الشعب يتسلي ياوديع يعني هيبقا من كله
:)))))))
هههههههههههه مش قادره أبطل ضحك هههههههه
واقعيه ميه ميه هي دي مصر يا عبله
شكراً على التهييس:)
تحياتي لك يا شمس المدونات
علي الفيس عاملين ايفينت يوم 25 -1 يوم ثورة
اول مرة اشوف حد كاتب تاريخ ثورة
كنت عاوز ااقولهم والساعة 4 نروح نتغدا في ماك ونرجع نكمل وعلي بالليل نحتفل بالانتصار في الكوربة
طيب نولع منولعش انتحر منتحرش
اقتتلها مقتلهاش
تونس ثارت ليه معرفش
بو عزيزي مات و لا مامتش
مين بو عزيزي دا ؟
انت شفت اللي حصل في تونس و لااااااا ؟
ميهمكش
25 يناير الناس حتطلع و لااا لأ ؟
ماذا فهمت الشعوب العربيه من الثوره التونسيه ؟
الاجابه : اذا انتحرنا يسقط الديكتاتور !!
الشباب كدا فعلا
ليس الكل طبعا لان هناك من يخشي علي هذه البلد
بس ....................
مش عارف
انا مضحكتش علي الشات خالص لاني بتعامل مع الناس دي
و لو اللي عمل كدا بيتريق
فاهو عمل حاجة خايبة
تامر و صاحبه عملوا !!!!!!
علي الاقل جعلنا تتحدث علي ما كتبه :(
مأسف
عذرا تهييس الامتحانات بعيد عنكم
تامر: انت ممكن تولع في نفسك عشان مصر؟
وائل: لأ طبعا, وأصلا حتي لو عملتها مش هفرق مع حد غير أهلي
تامر: طب ممكن نولع في مين؟
وائل: ايه رأيك أولع في أمي يوم عيد الأم؟
طبعا مصيرهم معروووووووووووف
مجنوووووووووووووووووووون هههههههه
وخصوصا فى مصر
اشكرك
تحياتى
لخصت الامور طاولة طاولة حتى النصر
شموسة
اللى حاطط السيناريو ده
نسي يحط سيناريو تاني
لناس عايشين برة مصر و بيتكلموا و بيحفزوا الناس على انهم يعملوا ثورة من ورا شاشة الكمبيوتر
و بعدين يقفلوها و يروحوا يستمتعوا بحياتهم الرغداء
انا بطلب منك تقري البوست اللى انا منوهه عنه فى مدونتى اعتقد انه حيعجبك
تحياتي ليكي
السلام عليكم
السيناريو دة يزعل فعلا شئ فينا غلط أية هو حقيقى مش عارف انا حاسس انى بقيت حد غيرى بقيت حاجة كدة شبه الأنسان من برة لكن من جوة مش عارف انا أية معرفش انا بس اللى حاسس كدة ولا الكل لدرجة
أنى مش عارف أضحك ولا عارف أبكى ولا عارف أكتب انا حاسس بالعجز التام زهقان قرفان مخنوق مكبوت بس اللى مخلينى حاسس انى لسة جوايا بقايا انسان انى خايف :D
السيناريو وصلنى برضه وفعلا بيلخص حالة الشعب المصرى وخصوصا فئة الشباب مهو الشباب دلوقتى 3 فئات
الفئة الأولى : الناس اللى من نوعية أبطال السيناريو ده الحياة بالنسبة لهم خروج كافيهات بنات شات الخ الخ وطبعا بابى ومامى بيصرفو ربنا يخليهم لهم
الفئة التانية : الطبقة الموشكة على الانقراض فيما كانت تسمى بالطبقة الوسطى ودول طبعا من البيت للشغل ومن الشغل للبيت وأقصى أمانيهم انهم يعرفو يعيشو وياكلو مرتين لحمة فى الأسبوع ويلاقو حق العلاج وطبعا حق المخدرات اللى بيشربوها علشان يقدرو ينسو الهم اللى هم فيه
الفئة التالتة : الشباب الضايع اللى عبارة عن مسوخ نشأت فجأة وترعرعت فى البيئة المصرية المتعلقة بالفساد والعشوائيات والمخدرات ودول كتير جدا جدا جدا كل امانيهم انهم كل ليلة يشربو حشيش والقسم ميبعتش حملة تاخدهم !!
للأسف هو ده حال الشباب وعلى رأى الريس ... خليهم يتسلو
تحياتى
االملاحظة على التهييس ده
انه كل تهيس سلبى
تفكير فى حرق
تفكير فى قتل
تفكير سرقة
تفكير فى نهب
تفكير فى كذب
تفكير جذب الانتباه
وهكذا
بغض النظر عن دور الشباب الاساسى فى الاحتفاظ ببناء وطنه ومحاولة اعطاء وفرض حلول ايجابية وطرح افكاره للحل قبل تصدير المشاكل
فعندما ياءتى احد بمشكلة لابد ان يكون معه بعض التفكير فى حلها
ويعلم نفسه طريقة التحاور من اجل ايصال فكرته ويعرف من الذى يستقبل افكاره وطريقة عرضها
بدل من حالة التهيس ومصاحبة جلساء السوء
المرض الذى اصابنا ليس هو التنبلة وعدم المبالاة
المرض الذى اصابنا هو الكسل وعدم الرغبة فى العمل
الكل يحتاج الى السيارة والفيلا وبنات حواء فى عدد من السنون صغير لا يتناسب مع مجهوده
ليس المجمل اعرف ولكنهم نسبة غالبة
بدل ان نكتل المشاكل حولنا نطرح لها اسلوب حل
كم من بنى الانسان عرفوا ان يغيروا غيرهم بالقدوة الصالحة
دخل الاسلام الهند بالتجارة واخلاق التجار ومن هنا كانت الثورة الحقيقة المعتمدة على المبادىء والاسس
ربنا يوفقك الناس للفهم ولك جزيل الشكر
* شيرين سامي
:))
هي للأسف ده بعض شباب مصر ودي اهتماماته
* adel
ليه كده يادوله حرقت المفاجأأأأأة
طيب مادام عرفت خاللي بالك ان الملابس هتكون بلاك اند وايت
والانطلاق من وندر لاند
:))))))))))
عالم في البلاااااله بجد
ماعندكش فكرة الموضوع ده مضحكني بصراحة جدا ازاي
* المصوراتي
:))))))))))
هو انت امتحنت ولا مامتحنتش
هو البوست عن ايه اصلا
هو في بوست ولا مافيش
هي مين تونس دي
انت مين؟؟؟
كل امتحانات وانت بخير وعقبال البكاري
:))))))
* جايدا العزيزي
:)))
اصلها موضه
كل ماحد يعمل حاجه في مصر يطلع مجنون او مختل عقليا مش عارفه ايه الفرق بس اكيد الحكومه عارفة
:)))
* واحد من الناس
ولما بيزهقوا بتبقا دومنيو دومنيو حتي النصر
وبالروح بالدم نفديكي ياكافيهاتنا
:))
* Mafrousa
حبيبتي الازمة في مصر مش بس ازمة حكم وحكومة الازمة في مصر في الاتنين
حكومة وشعب
المصريين اتغيروا جدا
لفه في الشوارع كده وبصه علي اخلاق الناس مع بعض في الشارع وحالة التحفز والانانيه
انا رحت وقريت البوست هو كاتحليل جميل بس هناك في تونس ماحدش عارف في ارض الواقع ايه اللي بيحصل او ايه اللي هيحصل الثورات دائما غير معروف نهاياتها
اصلا ان حد كان يعتقد ان تونس يحصل فيها كده كان شئ مستبعد جدا
بس ماحبش مصر يحصل فيها كده لأسباب كتير جداااااااا
وعلشان كل بلد ليها طبيعتها
* elsha3er
وعليكم السلام
كلنا زيك كده خايفين من بكره
مش حاسين بالامان
سواء الكبار او الصغار او الشباب
ماحدش حاسس بالامان
بس فرج ربك قريب
* Foxology
بحييك ياابو يوسف علي تعليقك
بجد انت لخصت حال الشباب تماما
ربنا يفرجها ويعدلها املنا في الشباب اللي زيكم انتم
ربنا يبارك فيكم
* SHAPE YOUR LIFE (ABOALI)
همه اصلا شباب سلبي عاله علي المجتمع
ومع تهييسهم استعرضوا بعض الاحداث اللي حصلت في المجتمع ومع ذلك المجتمع ماتهزش وماعملش حاجه
وطبعا اوافقك في باقي التعليق ياريت نرجع نفكر كده تاني ياريت
شباب مزفلط علي الاخر
ههههههههههه
يعني كل حاجه حصلت و مفيش اي حاجه محصلتش
طب امتي تقوم ثورة
و الله حاجه تحير
لكن اظن ان بئر الصبر لدي المصريين لازال يضخ المزيد من الصبر
الفرق بيننا و بين تونس ان حاكم تونس غشيم
يعني بيعتدي علي الناس و عقائدهم عيني عينك
لكن هنا مثله تماما لكن كل اعتداءاته علي حقوقنا بالسياسه و الناس بتنسي
السلام عليكم
هههههههههههههههههههههههههه
كان لازم الضحكة الطويييلة دي لأني بالفعل ضحكت لما بطني وجعتني...
اصل فعلا عندنا ناس ضايعة كده...!
وأخطر حاجة إني اكتشفت إننا فعلا كل حاجة ممكنة عندنا ولعت حتى البني آدم وما فيش فايدة برضه!!!!! :)
تحياتي أختي الكريمة على النقل.
الواد اللي اسمه تامر ده باين عليه راجل اوي وثوري :) بس مش كل اللي اسمهم تامر كده يعني :)
ربنا يرحمنا!
هو القادر على
تخليصنا مما نحن فيه
ومن أمثال وائل وتامر!
ههههههههههههههههههههه
حوار مضحك جداااااا
مشكلتنا دلوقتى اننا مش فاهمين معنى التغير ..الحقيقه ان عقولنا هى اللى محتاجه تتغير عايزين نحرق نفسنا وخلاص لفرقت معانا ان ربنا حرم ازهاق النفس ولا حتى فارق معانا اهلنا ..حقيقى العيب مش فى مبارك واللى وراه العيب فينا احنا اى بلد فى الدنيا بأهلها مش برئيسها وحكومتها الثورة يجب ان تكون داخلنا نحن عشان تقدر تكون ثورة على مبارك واللى زيه او على اى حاكم مستبد ..
بعدنا عن الدين ونسينا رحمه ربنا واستبدلنها بالشعارات فى المظاهرات فى حين ان العدد اللى بيتجمع فى مظاهرة دة مبيتجمعش فى الصلاة ..الثورة يجب ان تكون على محاربه انفسنا نحن ..للاسف غاب مفهومنا عن التغيير واصبح يعلق فى اذهاننا جروب ولا صفحه على الفيس بوك تجمعنا يوم 25 يناير ههههههه وهل يعقل يا ناس ان ثورة تقوم على المعرفه ...
لا حقيقى معارضه محترمه اوى بتستأذن من الحكومة عشان الحكومه تجهز نفسها كويس لاستقبلهم ...
يجب ان نعرف من نحن وماذا نعنى لآنفسنا وماذا نعنى للآخرين ..لو ادركنا الجمله دى كويس والله ليكون التغير ...
وبالنسبه لبوعزيزى لا يصح ان نقلد فعلته لآن تونس غير مصر ولكل قاعدة شواذ ولازم نفهم ونتعلم مش نفضل مستمرين فى السير فى الطريق الخطأ تاركين شعاع الضوء عن عقولنا تماماَ ..الجهل ساد للاسف
وامثال تامر ووائل هنلاقيهم كثير اوى ودة بقى دور المثقفين اللى فى البلد انهم يوجهوهم صح ... مش ثقافتهم تفتصر على التعامل مع المثقفين امثلهم ..
اسفه انى طولت فى الكلام
تحياتى
ربنا يهدينا جميعا..دا حوار تريقة على شباب مصر وان هدفهم حاجات تاينة خالص..
أو قصده الإحباط
ولكن برده الدنيا لسه فيها خير
شمس النهار
معلش انا ليا راي يمكن مختلف شويه
طبعا الفئه دي من الناس موجوده وصعب اننا نفي وجودها
والاعلام والظروف تسببت في غياب الوعي عن ناس كتيره
لكن ده ميمنعش ان فيه ناس كتير جاده وبتتحرك لاصلاح البلاد بشكل عملى مش مجرد كلام بس
كمان موضوع الانتحار مش حل
كمان شفنا فى مصر المظاهرات الكثيره عشان احوال البلاد وكمان المشاركه فى انتخابات 2005 و2010 زادت والناس عملت كتير عشان توصل صوتها وتفضح التزوير
مش كل الناس زي في القصه دي
عارف ان فيه كتير كده وان كنت شايف ان دي خطوه مهمه بين اللامبالاه وبين الايجابيه
يمكن تتطور للايجابيه
بيتكلموا بس
ربنا يصلح الاحوال
ربنا يكرمك ويوفقك
كويس انها انتهت بلعب الطاولة
===============
الفتنة تجارة نتنة يبيع المشارك فيها شرفه/
ويفتح باب المتاعب فيقفل باب الامل درفه/
فيخدم الاعادى بما يملك من ايادى وسمه طرفه/
ولتحجر عقله لا يقدر حجم حجم ذنبه اللى اقترفه/
فقل معنا لا لتيار الفتنه لنرجع ما قد جرفه/
وتعود الاوضاع لطبيعتها من سمو ما نعرفه
قريت القصة ديه ع الفيس واستفزتني بصراحة
سخرية من الواقع ..بنضحك عشان مش عارفين نتصرف..مش كفايا نضحك على نفسنا وبس..
قلقانة اوي من يوم 25 مش عارفة ليه ربنا يسترها بقى
اه صح نسيت...ازيك بقى :)
و الله ما عارفه اضحك و لا اعيط
1- كل حاجه ولعت و مافيش فايده
2- مابقاش في حاجه في اي مجال ماولعتشي
3- اذا كان هما اصلا مش فارقه معاهم و هيروحوا لدينا و سارة و يسيبوا الثورة مستنيين ليه ان حد غريهم يقوم
4- و طبعا هما نموذج مصغر لمعظم الشباب و معظم الشعب
ربنا يرحمنا و يعافينا اللهم امين
سيدتي شمس النهار
تحية طيبة
في الحقيقة أن العرض لواقع الشباب ـ رغم الأسلوب الطريف في عرضه ـ هو واقعي للأسف ، كله كلام في كلام .
ونجد الواقع أن أغلب أهتمامات الشباب هي الآمور الفاضية للأسف الشديد .
موضوع جميل
لك تقديري
* ذو النون المصري
:))
شباب مكبر دماغه علي الاخر مش ذنبه مالقاش قدوة
حتي في الجامعه ماترباش ولا كان في اتحاد طلبة حقيقي
ولا الاديكورات الاحزاب علمته حاجه
* ماجد القاضي
ده واقع اغلب شباب مصر للأسف
مغيبين بيفكروني باللي اتعمل في شباب الاندلس
استعمرونا بس في اغلب امخاااااخ شبابنا
* تامر علي
يعني تامر مش هيثور يوم 25
:)))))))))
* norahaty
اهلا اهلا يادكتورة
غايبه عننا فين الفيس بوك اخدك مننا خلااااااص
وهقول ورا كلامك آمين يارب العالمين
* بنوتة مصرية
تصدقي انتي قلتي المفيد
عمالين نقول التغيير التغيير
ومابنغيرش في نفسنا الاول
مش كل حاجه الحكومه
ايوه الحكومه غلطانه في مليون حاجه بس احنا كمان غلطانين في مليون تانين
يعني الحكومه اللي رمت الزباله في الشوارع
الحكومه اللي قالت للشباب اتخرج ولما تتخرج ماتشتغلش اي حاجه لازم تشتغل مدير
* Dr Ibrahim
انا معاك انه جزء احباط علي جزء تريقه
علي جزء مافيش فايده
بس جزء منه حقيقه وحقيقه مفجعه كماااان
* م/محمود فوزى
فعلا ان زي مادول موجودين برضوا دول موجودين
وهو ده اللي عادل الميزان في مصر
مصر فيها كل شئ عجب
فيها المتدينين جدا والغير
فيها المثقفيين جدا والغير
حضرتك في برنامج بيجي لفتت نظري ليه صديقه اسمه ماتفتيش
قد ايه حسسني ان اغلب الشعب المصري عايش عيشه غريبه جدا
* كلام على بلاطة
ماهم لايملكون غير لعب الطاولة
والفتنة لعن الله من اشعلها
* طالبة مقهورة ..درجة أولى
انا الحمد الله
انتي عامله ايه دلوقتي يارب تكوني بخير
ايوه هو ده الشعب المصري ماحلتوش غير النكت
* دعاء عويضه
كلنا الحقيقه مش عارفين نضحك ولا نعيط
بس هو ده واقعنا ومش هنعرف نهرب منه
نورتيني
* أفلح اليعربي
ايوه للأسف هو ده واقع الشباب
بس مش كفايه اننا نعترف
ياريت نعترف ونحاول نغيره
إرسال تعليق