الثلاثاء، 27 يناير 2009

وعد وشهر غريب

تحديث:
اخيرا الحمد لله خلص شهر يناير وهل علينا شهر فبراير الجميل شهر لطيف كده وصغير فيه كمان عيد الحب والجمال والحنيه
بس احب اقول لكم ان انا راضيه بقضاء الله وبحمد الله علي كل شئ
وعمري ماتطيرت خالص انا حبيت اسخر من كل الاحزان اللي حصلت لي في شهر يناير
بدل مااكتب بوست حزين والناس مش ناقصه
بس انا فعلا كل يوم من شهر يناير عبر السنين اللي فاتت له عندي ذكري مش لطيفه وبفتكرها مع كل ورقة نتيجه انتزعها
بس السنه دي الاصابات كانت اقل شويه وكمان حصل لي فيه حاجه جميله جداجدا بحمد ربنا عليها ليل نهار وربنا يدمها عليا نعمه
كمان اخيرا ربنا فك اسر محاسن صابر وده شئ اسعدني جدا
واعتقد انها كمان سعيده ربنا يسعدها ويسعد ابنها
وبشكرها انها ذكرتني في البوستين اللي فاتوا
وبقول لها لاشكر علي واجب انا فعلا بحس انها بنتي
وكل سنه وانتم طيبين والسنه الجايه هندخل علي اول فبراير علي طول وده الجديد بتاع السنه الجديده ان شاء الله
---------------------------------------------------------------------------
---------------------------------------------------------------------
بقالي 26 سنه شهر يناير يمثل لي ازمه مابعدها ازمه

في كده بينا وبين بعض تار بايت بايت فين وعند مين مش عارفه
الشهر الغير لطيف ده ماشاء الله مايشرفنيش غير لما علي مايمشي بالسلامه غير مأسوف عليه يكون سايب لي مصبتين تلاته كده علي الماشي وهو كده والا همه وبقلب بارد
يعني انا مش عارفه يجري ايه يعني لما السنه تيجي كده من غيره ونبتدي بفبراير بلاش فبراير مارس واهو بتاع الامهات وتبقا السنه حلوه كده بدعاء الامهات
يعني لو السنه جت من غيره الناس هتعيط ابدا ده حتي التلاميذ والطلبه هيفرحوا جدا ماهم مش هيمتحنوا
طب بلاش السنه تبتدي من غيره عشان مانزعلش اخواته الشهور ولو اني اشك انهم بيحبوه ماهو الاخ الشرير
نعمله 15 يوم ماهو كمان من رخمته عامل نفسه كمان 31 علي ايه يعني اليوم الزياده ده
هذا الشهر اللي مش بيحبني والا انا بحبه رحل فيه اتنين من احب الناس الي قلبي اللي لما رحلوا تركوا لي حزن وفراغ بوسع خرم الاوزون وكان هيرحل التالت لولا ستر ربنا اعاده لي واعاد معه روحي
ماهو مش معقول كل مايشرف يترك لي عاهه
ده غير الحوادث والعمليات والمهاترات
لاياجماعه مش بحبه
واهو هانت قرب يمش باقي من الزمن 4ايام بس عيزاكم تركزوا معايا كده وتشوفوا رخامة الاربع ايام دول وبطئ ساعاتهم زي ماتكون الساعه كسلانه ومش عايزه تمشي
المهم طولت عليكم بس اصلي مش بحبه
زي النهارده ياحبيبي يابابا انت رحلت عن عالمي سبتني كده وانا مزهوله وانا واقفه قدامك والاجهزه الكتير دي مش عارفه اعمل حاجه
همه خرجوني من الغرفه بزعم ان الطبيب يقدر يمارس عمله بس انا كنت عارفه اني مش هشوفك تاني وانك رحلت عني
اصلهم مش فاهمين اننا كان في بينا وصله كده خفيه مخبينها احنا الاتنين ماحدش يعرف عنها حاجه غيرنا
8سنين ياحبيبي عدوا
وبعمل زي ماوعدتك وزي طلبك
بس عايزه اقول لك انت وحشتني
وعايزه اطمنك علي اني كويسه وعمري ماكنت كويسه زي اليومين دول والا فرحانه زي اليومين دول

هناك 108 تعليقات:

dina يقول...

ربنا يرحمه يا رب و يرحم كل الاموات....بس مش عاوزاكى تزعلى من يناير...كان ممكن نفس الاحداث دى تحصل فى فبراير او حتى مارس شهر الامهات دا...هو بس قدر و كان حيحصل حيحصل فى اى شهر و فى مكان...مش بيقولوا اللى مكتوب على الجبين لازم تشوفه العين...يناير مالهوش دعوة يا حبيبتى

رئيس جمهوريه نفسى يقول...

ربنا يرحمة ويرحم موتى المسلمين جميعا ان شاء الله ويدخلهم فسيح جناته انا بقاء شهر 7 قمة الشهور الغريبه عندى اتوفي فيه 3 عمام اية بشكل غريب بس هى اقدار واعمار مش شهور زى ما بتقول dina

أحــوال الهـوي يقول...

رحم الله موتانا و موتي المسلمين و اسكنهم فسيح جناته

قلبت علي المواجع في و فاة وامي و ابي

اشعر دائما باني كنت مقصر معهم و كان المفروض اكون بجانبهم

كلاهما توفاهما الله و انا بالغربه

و رغم هذا لا اشعر بالضغينه تحاه الغربه

انا اعرف ان الناس بتسمي فبراير فقراير ؟؟؟؟

تحياتي

blue-wave يقول...

معلش
ربنا يرحمه يارب
ويسكنه فسيح جناته
ويصبرك على يناير

elsha3er يقول...

انا لله وانا الية راجعون

ربنا يرحمه


احمد الشاعر

romansy يقول...

ربنا يرحم امواتنا جميعا واموات المسلمين انتى انسانه طيبه ومتدينه تعرفى القضاء والقدر
كويس
ربنا معاكى

عمرو يقول...

تعيشى و تفتكرى يا برنسيس
رحمة الله عليه و على أموات المسلمين و يجعل مثواهم الجنه و واضح أنه كان بيحبك جدا خاصة أنك اٍبنته الوحيده
أنا من رأيى أنك ما تربطيش الأيام بالمواقف و الذكريات المحزنه فكلها أيام الله و لله الأمر من قبل و من بعد و كمان ماتنسيش أننا أمرنا بعدم التطير و الأيام اللى ممكن نكون بنتضايق منها نلاقيها تحمل فى طياتها بشائر الفرح و السعاده
ربنا يديم علينا و عليكى الفرح و السعاده :)

عاشقه وغلبانه يقول...

يعني ينفع الشهر يبات كده بره من غير اذن
بصي بقي ياروح قلبي
اول مره اشوف شهر يمر عليا بالكئابه دي
ملل وزهق وقرف ودموع
يااااااااااارب يخلص احسن حاسه اني هاديه باللي في رجلي
شهر بجد ممل
وخدي معاه اخر 4 ايام من الشهر اللي فات

Empress appy يقول...

ربنا يرحمه برحمته يا رب
ويغفر به

SHAPE YOUR LIFE (ABOALI) يقول...

اول السنه كده دراما
هههههههههه
وكمان دراما حزينه
ربنا معاكى
بس كل انسان بتكون ليه احداث لا يحبها تحدث فى وقت وزمن معين اكيد مش هايكون مبسوط بيها او بوجود الوقت ده من اساسه

لذا انتى شعرتى بكل تلك الاحاسيس

على العموم الولد الصالح
(ادم او حواء) هو العزاء الوحيد لكل من مات وكان عزيز علينا
لذا اراكى نعمة الابنه الصالحة لاءبيها
ولا ازكيكى على الله
ولنا فى الموت حكمة
وفى الحياه حكم

وتلك هى الدنيا

تحياتى

بسمة انور يقول...

ربنا يرحمه ويرحمنا جميعا
وهذا هو قضاء الله وقدرة

تحياتى
بسمة

ادم المصرى يقول...

فبراير او اى شهر كلها شهور الله

والقدر مش بيفرق بينهم وافتكرو عام الحزن الذى توفه فيه عم النبى وزوجته صلى الله عليه وسلم واذاى اصابك مكروه فى اى حبيب اذكرى ما اصابك برسول الله صلى الله عليه وسلم والبقاء الله ورحمه الله عليهم جميعا وان لله وان اليه راجعون انهم ذهبو للحبيب

أمل حمدي يقول...

تعيشي وتفتكري ربنا يرحمه ويرحم كل اموات المسلمين اللهم امين

دمتي بكل الخير يا شموسة

Dr. Ibrahim يقول...

اللهم أرحم موتى المسلمين وأسكنهم مساكن الشهداء والصديقيين والأنبياء..

tarek momen يقول...

الله يرحمه و اموات المسلمين ان شاء الله
ماتزعليش من يناير لأنه مالوش ذنب
ثم ان عدة الشهور عند الله ماهياش يناير و اخواته
عموما تعيشي و تفتكري
تحياتي

أنا - الريس يقول...

أولا ربنا يرضي عنهم .. ويرحمه ويسكنه الفردوس الأعلي .. ويشرب من حوض النبي .

ثانيا انا عايز اسال سؤال يعني لو حضرتك بعد الشر بعد الشر .. حصلت مصيبة كل شهر .. ده مبرر إن يكره السنة كلها .. لا طبعاً .. والرسول قال لا تطايروا .. فبلاش طيره .. الإرادة تصنع المعجزات .. طبعا اديمة بس .. انتاج سيادتكم هيقل في الشهر ده جامد بسبب المود .. هتخلي مزاجك اللي يتحكم فيكي مش انتي اللي تتحكمي في مزاجك مشكورة جزيلا علي الموضوع المؤثر

kmt يقول...

السلام عليكم ورحمة الله وبركاته

ربنا يعدي الشهر دا علي خير انا بقول برده هو طول ليه ؟:)

اصعب شيء الفراق ربنا يلهمنا التعايش معاه
تحياتي
الي اللقاء

صبرني يارب يقول...

الله يرحمه ويرحم موتانا وموتى المسلمين جميعا

شموسه ما تزعليش من شهر يناير ولا تخافي منه بليز هو ما لوش ذنب

اوعى يكون ده تطير عشان احنا منهيين عنه

وربنا يعوضك خير يارب ويسترها معاكي ومع كل حبايبك ويسعدك كمان وكمان

فارس القمر يقول...

ربنا يرحم كل اموات المسلمين

واعفر لهم واعف عنهم يااارحم الراحمين

مش هتكلم على الشهر دا لانى زيك

مش بحبوا

الا انى هقولك على المصارحه الجميله اللى فى اخر البوست جميله جدا

mohamed ghalia يقول...

العيب عمره مكان من الشهور
هى الحياة فيها الحلو والمر
دمتى فى سعادة واسعد الله أيامك دائما
دمتى بكل الود

عاشقه الرومانسيه يقول...

حبيبتى شموسه
رحم الله والدك ووالدى وجميع اموات المسلمين

نفس الوصله اللى كانت بينك وبين والدك
كانت بينى انا وبابا الله يرحمه
الحمد لله انك كويسه وبتطمنيه عليكى
انا بقى بعد بابا حاسه ان دنيتى وقفت
حاسه انها مجرد ايام باقضيها علشان اروح له واشوفه
هتقوليلى انتى لسه صغيره ولازم تعيشى حياتك و...و....و
كلام سمعته كتير ودايما باحس ان الجرح اللى جوايا من بعده عنى مش واصل لحد
فبقيت بافضل انى ما اتكلمش مع حد عنه

اسفه للاطاله
بس انتى دوستى على الجرح

وحشنى كلامك

تحيــــــــاتـى

حاسوباتيه يقول...

الله يرحمه يارب وعند حضرتك حق فعلا هو شهر طوييييييل ورخم حتى ماما زي حضرتك مش بتحبه وبتعد كل يوم تقول ياه لسه في يوم كزا هو الشهر مش هيعدي بقى ده

Foxology يقول...

الله يرحم امواتنا واموات المسلمين جميعا

هانت كلها كام يوم ويروح لحاله

تحياتى :)

شمس النهار يقول...

*دينا
الله يرحمهم جميعا
انا عارفه ان يناير مالوش دعوه
بس الذكريات بتفرض نفسها ولما تلاقي في شهر واحد كل يوم يمر تفتكري ذكري مش لطيفه بيكون شئ مؤلم

شمس النهار يقول...

*رئيس جمهورية نفسي
هقولك نفس الرد اللي رديته علي دينا
انا عارفه ان يناير مالوش دعوه
بس الذكريات بتفرض نفسها ولما تلاقي في شهر واحد كل يوم يمر تفتكري ذكري مش لطيفه بيكون شئ مؤلم

شمس النهار يقول...

*احوال الهوي
رحم الله امواتنا جميعا
بصراحه انا مابحبش الغربه خالص
بتحرمان من حاجات كتير نحضرها مع الاهل

خمسة فضفضة يقول...

السلام عليكم ورحمة الله وبركاته

الله يرحمه ويرحم موتانا وموتي المسلمين

ويارب يديم عليك السعاده والفرحه

مش عارفه انا بحس ان يناير دايما بيعدي بسرعه رهيبه يعني كنا لسه امبارح بدأين السنه بقينا انهارده 28 ، مع اني زيك برضو مش بحبه عشان البرد والسقعه والحبسه في البيت


كل يناير وانت طيبه يا قمر


سلام

شمس النهار يقول...

*بلو واف
ايوه يصبرنا جميعا علي كل الشهور الرخمه

شمس النهار يقول...

*احمد الشاعر
ازيك انت كنت فين
ياريت تكتب كده قصيده زم في الايام السيئه في اي شهر كانت
يعني عن الذكريات الكئيبه

شمس النهار يقول...

*رومنسي
الحمد لله علي كل حال
صدقني انا مش معترضه بس الذكريات
وخصوصا الذكريات الحلوه مع الاحباب
وانت عارف فراق الاحباب صعب ازاي

شمس النهار يقول...

*عمرو
مااعتقدش ان في انسان يقدر ينسي كل حاجه
الاحباب مابيتنسوش ذكراهم بتفضل في القلب والروح
وعلي فكره ساعات كتير الذكريات الحلوه بتكون مؤلمه زي الذكريات السيئه
انا عمري مااعترضت علي حكم الله بس الحزن شئ مباح
والا ايه

شمس النهار يقول...

*عاشقه وغلبانه
ايوه شهر رخم وكسول انت عارفه التجار مسمينه اه بدل يانير يانايم
عشان بيكون في ركود
هانت ياستي
بس المهم يعدي علي خير

شمس النهار يقول...

*ابي
ويرحم اموات المسلمين

شمس النهار يقول...

*ابو علي
شكرا لك علي كلماتك اللطيفه
وصدقني انا مش بفتري علي يناير
انا كل يوم فيه بيحمل لي ذكري افظع من اللي قبلهامن اول يوم في الشهر
والحمد لله رب العالمين انا مش بتطير والا حاجه انا بتكلم علي الذكريات بس

شمس النهار يقول...

*بسمه
اهلا بيكي في اول زياره

شمس النهار يقول...

*ادم المصري
رحم الله امواتنا جميعا
بس هي ذكري الاحباب والحنين ليهم دائما
وده شئ مشروع يعني هندعلهم واحنا ناسينهم
لازم نفتكرهم

شمس النهار يقول...

*ماما اموله
دمتي بخير
ونورتي المدونه

شمس النهار يقول...

*دكتور ابراهيم
ويرحم الاحياء كمان
والله ياابراهيم الاحياء محتاجين الدعاء اكتر من الاموات

شمس النهار يقول...

*طارق
ارتبطنا بالشهور الميلاديه وارتباطها بفصول السنه الثابته
وكتير من الناس لما تسألهم احنا كام عربي مايعرفش احنا شهر ايه اصلا
هي الذكري بس ياحاج

شمس النهار يقول...

*مستر بريزيدن
الحمد لله علي كل شئ
انا عمري مابتطير وراضيه بقضاء الله وقدره
بس ماحدش بيقدر يمنع نفسه من تذكر الاحداث
وانا الحمد لله شهر يناير عندي كله احداث غم والحمد لله
هات لي حد قدر ينسي فراق الاحباب
واهلا بيك في اول زياره للمدونه

شمس النهار يقول...

*كيمت
خلاص هانت قرب يمشي
ويريحني من اني كل يوم وانا بقطع ورقة النتيجه افتكر حدث اغرب من اللي قبله

شمس النهار يقول...

*صبرني يارب
حتي انتي بتقولي لي تطير
ده سخريه من الاحداث مش اكتر
لما تلاقي نفسك كل يوم وانتي بتقطعي ورقة النتيجه تقولي يله ده النهارده من كام سنه حصل كذا وحش والا مات فلان
فاببقا عيزاه يعدي بسرعه
وكفايه كده

شمس النهار يقول...

*فارس القمر
تصدق انك اول واحد ياخد باله من اخر سطر
مع ان ده هو البوست نفسه
والباقي تريقه علي الشهر
انا كتبت البوست ده اكتر من مره وامسحه ماحبتش انه يكون مؤلم وخصوصا ان الناس مش ناقصه
لاقيتني بكلم بابا بحزن شديد زي مايكون لسه الموضوع النهارده
قلت اقلبيها تريقه علي شهر يناير الكل قال لك ده تطير
بشكرك انك قريت البوست صح

شمس النهار يقول...

*محمود غاليه
الله يكرمك
ويغفر لينا جميعا

شمس النهار يقول...

*عاشقه الرومنسيه
انا حاسه بيكي جداجدا
بس هقول لك حاجه انا لما مات بابا حسيت فعلا باليتم مع اني كنت كبيره
بس اليتم الحقيقي في الكبر وخصوصا للبنات المرتبطه بوالدها
عشان بيكون هو ده الدنيا والسند والحب اللي من غير غرض والرحمه والايثار
المهم
لما ده حصل قلت لازم اعمل حاجه الحزن مش هيخليه مطمن عليا
وبقيت ادور علي كل عمل يوصلني بيه
وكل مااعمل حاجه ارتاح نفسيا واحسن انه مبسوط ومتطمن
وخصوصا الاعمال اللي بتوصله هو بالدنيا(ولد صالح يدع له)
ودايما اسأل علي اصحابه واوصل احبابه وابر اهله بالسؤال عليهم
وحاجات كتير هبعتلك ميل بيها عشان ترتاحي وتحسي انك عايشه في الدنيا وهو معاكي وموصوله بيه وان الموت مافرقكمش عن بعض
واخيرا
شوفي كل حاجه كان بيحبها فيكي واعمليها

شمس النهار يقول...

*حاسوبتيه
الحمد لله ان في حد تاني مش بيحبه زي
اكيد برضه ليها في ذكريات بايخه

شمس النهار يقول...

*فوكسلوجيا
الحمد لله هانت ماانا قلت اشكر فيه شويه قبل مايمشي

شمس النهار يقول...

*خمسه فضفضه
انت قلتي المفيد
هو شهر امتحانات وبرد ومطر ولو ان السنه دي مامطرتش
هانت قرب يخلص

Unknown يقول...

السلام عليكم ورحمه الله وبركاته
============ستي الحاجه شمش الشموسه===
والله كلك خير وبركه يا حاجه..تعيشي وتفتكري ...وربنا يرحم والدينا ووالديكي ...ويرحمنا كمان.
أمر المؤمن كله خير...في السراء يحمد الله وفي الضراء يصبر وفي الكل خير . ربنا يجعلنا واياكم من اهل الحمد والصبر .
اشكرك سيدتي الفاضله علي زيارتك الكريمه ...ربنا يبعد عنا وعنك شر(كانون ثاني)يناير...أهو خلص ...

صوت من مصر يقول...

للاسف انا من مواليد يناير
وعارف انه نحس ؟

الازهرى يقول...

شموستنا الغالية

رحمه الله تعالى رحمة واسعة وتغمده بفضله الغامر واسكنه الفردوس الاعلى من الجنة


بصراحة موضوع الشهور ده مش على مزاجى لانى لو حكمونى اشيل مع يناير اغسطس نوفمبر
اسوأ ثلاث اخبار فى حياتى كانوا فيهم لكن اعمل ايه
لا تسبوا الدهر فانا الدهر

تحياتى وخالص مودتى

Sweet Violet يقول...

الله يرحم امواتنا واموات المسلمين جميعا

الصراحة الشهر ده رغم انه اول شهر فى السنه يعنى المفروض يكون كويس الى حد ما

الا انه اغرب و اوحش شهر فى السنة مش عارفة ليه ):

انا كمان ليا ذكريات معاه مش حلوة و الحمدلله كل سنة بتزيد الذكريات اللى فيه اللى بتبقى مش حلوة )):

بس اعتقد هو كده لان احنا نفسنا من كتر اللى بيحصل فيه من اشياء صعبة فحاطين فى دماغنا انه هيجى بكل وحش بالتالى بناخد بالنا قوووى وبالتالى برضه بيحصل فيه اللى بنتوقعه

وحشااانى موت ياشموستى (:

شمس النهار يقول...

*فركشاوي ناوي
لاشكر علي واجب محبب اليه
هحاول اعمل تحديث اشرح فيه اني مش بتطير والا حاجه انا بسخر من الشهر الغريب اللي كله عندي ذكريات الله يسامحها

شمس النهار يقول...

*الازهري
ازيك
اخبار الامتحانات ايه تمام
ياعم انت هتلبسني قضيه
دهر ايه اللي هسبه
انا بتريق عليه بس ومش علي الدهر لا علي شهر يناير
مش عارفه حسيت انه قريب المدونين

شمس النهار يقول...

***صوت من مصر
اهلا بيك
علي فكره انا والدي كان من مواليد يناير برضعه
وكل مواليد يناير يتمتعوا بالاخلاص والحنيه الجارفه والصدق
ورغم ان يناير برد الا ان مواليد هذا الشهر يتمتعوا بحديث دافئ عادتا

شمس النهار يقول...

ضد التيار
ازيك
انت كمان وحشتيني
اهي هانت وخلاص قرب يخلص
ونحتفل بقدوم شهر فبراير

princess يقول...

تعيشى وتفتكرى يا جميلة
وباى باى يناير

شمس النهار يقول...

*برينسس
ايوه خلاص باي باي يناير

leeno يقول...

تصوري

انا والدي رحل قبل عيد ميلادي باربع ايام

شهر ميلادي من اصعب الشهور اللي بمر فيها !!

بنوتة يقول...

السلام عليكم
ربنا يرحم والدك ويرحمنا جميعا
تحياتى ليكى

فشكووول يقول...

يا ترى لو قلت لك البقيه فى حياتك تكون متأخره شويه .. الامر لله ما هو انا ما كنتش عارف .. على العموم هانت النهارده 30 منه وباقى يوم واحد وخلاص ويعدى شهر يناير ..
تحياتى يا حاجه شمس

عاشقه الرومانسيه يقول...

شموسه ممكن بعد اذنك اخد ايميلك واعمل لحضرتك اضافه عندى؟
علشان الحاجات اللى قلتى عليها هتبعتيها لى على الميل
واكيد هكون شاكره لكى لو تكونى جنبى لانى بجد محتاجه حد زى حضرتك فى حياتى
واكيد مش هكون تقيله عليكى
لان بطبعى مش باحب اكون تقيله على حد والله
ومنتظره زياره حضرتك لمدونتى وهكون سعيده

خالص حبى وتقديرى

من غير عنـــوان يقول...

أولا رحمة الله عليه وعلى أموات المسلمين...
ثانيا لا تتطيروا... أي لا يوجد عند المسلمين تشاؤم... إنما استبشار بما هو آت ( خير ) بإذن الله تعالى...

بالمناسبة.. أنا كمان والدي رحمه الله توفي في يناير... إنما عمري ما أخدت في بالي

تحياتي

شمس النهار يقول...

*لينو
بتحصل كتير ان ذكري جميله تقترن بذكري مؤلمه
بس عايزه اقول حاجه ان الاحباب الراحيلين ليهم علينا حق ابسطه اننا نكون سعداء عشان يطمنوا علينا ده اعتقادي

شمس النهار يقول...

*بنوته
اهلا بيكي
والله يرحم اموات المسلمين جميعا

شمس النهار يقول...

*فشكول
الله يخليك
ويرحم اموات المسلمين
خلاص اخر يوم بكره ان شاء الله

شمس النهار يقول...

*عاشقة الرومنسيه
هبعت لك الميل دلوقتي
ويشرفني وجودك في المدونه ويشرفني صداقتك

شمس النهار يقول...

*من غير عنوان
حضرتك انا لااتطير
لابتشائم والا بتفائل
بس بعتقد بالعلامات
انا كل الحكايه عندي ذكريات كتير مؤلمه في شهر يناير
وكل يوم اقطع ورقة النتيجه اجد يوم كان لي في ذكري مش لطيفه
ولما جيت اكتب البوست مسحته اكتر من مره عشان لاقيته حزين
والناس مش ناقصه
فارحت قلباها تريقه علي شهر يناير
والرد ده انا رديته علي اكتر من تعليق بس حضرتك ماقريتش تعقيبي علي التعليقات

من غير عنـــوان يقول...

العزيزة شمس...
أنا متأكد,بس كمان مالحقتش اقرا التعليقات,, انت حبايبك كتير...

ربنا يسعد أوقاتك

وبلاش حكاية ورق النتيجة.. لتجنب اجترار الذكريات المؤلمة

أمنياتي

الوردة البيضا يقول...

عزيزتي شمس النهار
رحم الله والدك وأسكنه فسيح جناته،وتعيشي وتفتكري، وزي ما قالت صديقتنا ديناإن ده كان ممكن يحصل في أي وقت في السنة وإن يناير مظلوم وملوش ذنب لأن ده قدر وكان لازم يحصل ما دام ربنا أراد.
أتمنى لك كل الخير والسعادة في كل شهور السنة
تحياتي

شفـقــة و إحســــان يقول...

ربنا يرحمه يارب ويغفر له
بس عايزة اقولك تفائلوا ولا تشائموا
خليكى متفائلة
تحياتى

شمس النهار يقول...

*من غير عنوان
حصل خير
بس الانسان مابيقدرش يمنع نفسه من التذكر
ممكن يكون للعبره وممكن يكون لغلاوتهم وممكن يكون ان الالم اللي حصل مايتنسيش
واصل يناير ده كله حوادث معايا بيعزني قوي
هو مالوش ذنب دي المشيئه بس ادينا بنفضفض وخلاص

شمس النهار يقول...

*الورده البيضه
الذكريات مش لازم تكون مؤلمه عشان توجع ساعات كتير الذكريات اللي كانت ساعتها حلوه بتؤلم برضه
المهم ان يناير خلص السنه دي وسايب لي ذكريات مؤلمه وسعيده

شمس النهار يقول...

*شفقه هانم واحسان بيه
الحمد لله انا متفائله جدا دايما وحمده ربنا وشكراه
انا حبيت اتريق علي شهر يناير مش اكتر

شخـا بيــط مـحـجـوب يقول...

تعيشي وتفتكري ربنا يرحمه ويرحم كل اموات المسلمين

تحياتى ليكى شخابيط mahgoub

maxbeta3zaman يقول...

خلاص نسيبنا من يناير وكمان فبراير ونخلى ينا مع السنة الفارسى " اولها النيروز وهو فى مارس " أو الصينى التى تسمى بأسماء كده غريبة ..
رحم الله كل الأحبة المنقولين الى عالم لا نصب فيه ولا هموم ولا زمن ولا أحداث
" قال كم لبثتم قالوا يوما أو بعض يوم"

فشكووول يقول...

الحاجه شمس .. تحياتى
بعيد عن شهر ينايى الازهرى كان عندى واهدانى لينك عشان اقراه وفتحت اللينك اتاريخ لمدونة شمس النهار وبتتكلم فيه عن معنى يعنى ايه كلمة وطن واكتشفت ان كلمة وطن يعنى بواكير كل شيئ واول كل شيئ .. كلام من شهور لكن كلام حلو .. عشان كدا لك منى التحيه متأخره شهور
تحياتى يا حاجه

د/ رامي شهاب الدين يقول...

ربنا يرحمه ويسكنه فسيح جناته هو وكل أموات المسلمين


ثم أما بعد .. كلامك ده فكرنى بنفسى ، بس أنا مختلف عنك شوية لأن مصايبى مش بتيجى فى شهر معين ، دى بتيجى مع رقم سبعة (7)..يعنى شهر سبعة وأيام 7و17و27 من كل شهر..الحمد لله إن الشهر مش 37 يوم

أنا لا أؤمن بموضوع التشاؤم والتفاؤل لأن التطير حرام شرعا ..بس برجع أسأل نفسى :هل معقولة إن كل إللى بيجرى لى ده مجرد صدفة؟؟..حتى الآن معنديش إجابة

دمتى بكل الود .. تحياتى

شمس النهار يقول...

*شخابيط محجوب
الله يخليك
ويرحم اموات المسلمين

mahasen saber يقول...

ياه يا شموسه طب بتكرهى الشهر ذنبى ايه تقلبى عليا مواجع والالالم وفاة الاب

عارفه يا شموسه من وفاة بابا لحالا دلوقت عمرى ما نسيته لحظه ودايما فكراه بالدعاء ربنا يرحمه ويرحم والدك ويرحم جميع اموات المسلمين


ويصبرك على فراق والدك برغم مرور 8 سنيين لانى عارفه ان الفراق وبالذات عن اليى بنحبهم عمره ما بيصبره شئ ولا بيسد فراغهم اى شئ

شمس النهار يقول...

*ماكس بتاع زمان
موافقه نسبنا من يناير بس مش موافقه نسبنا من فبراير
لو سبنا فبراير يفضل لنا ايه
كده السنه هتبقا باظت
الله يرحم اموات المسلمين

شمس النهار يقول...

*فشكول
الله يخليك ياسيدي
وبشكر ازهري انه افتكر البوست القديم

شمس النهار يقول...

*د/رامي
اهلا بيك نورتني
وحمد الله علي السلامه
الله يرحم اموات المسلمين جميعا
مالك بقه ومال رقم 27 ده احلا رقم في الدنيا ده عيد ميلادي
في حاجات كتير مابيكنش لها اي تفسير بتكون صدفه متكرره ليس الا

شمس النهار يقول...

*محاسن صابر
ازيك ياحبيبتي
عامله ايه دلوقتي
فعلا الا فراق الاحباب
عشان همه من غلاوتهم مابيتنسوش
بالعكس ده كل المده مابتطول بيوحشونا اكتر

Eno يقول...

ربنا يجعل كل ايام وشهور السنه سعيده علي حضرتك ان شاء الله :)

دمتي بسعاده :)

جلال كمال الجربانى يقول...

السلام عليكم ورحمته وبركاته

تعيشى وتفتكرى ياشمس النهار
وربنا يرحم موتانا وأحيائنا

ودمت أختى بخير

Kiara يقول...

ربنا يسعد ايامك

عارفه بقي انا مش بحب يوم الاحد كل الكوارث حصلتلي فيه

واولهم اني اتولدت يوم الاحد ههههههه

وبعد كدا وفاة جدي كان يوم الاحد

لؤلؤة الاسلام يقول...

شمس النهار

السلام عليكم و رحمة الله و بركلته

بجد بجد مدونة حضرتك وحشتنى اوى لانها بصراحة من احلى المدونات اللى انا بحبها

و ربنا يرحمه ان شاء الله و يجمعكه بيه في الجنة ان شاء لله
و تحيااااااااااااااتى

من غير عنـــوان يقول...

مبروك علينا شهر فبراير
... أصله بالنسبه لي موسم شغل.. عشان أنا عندي ( بالإضافه للهندسه) محلين للهدايا دباديب وحاجات
(:

وبنشتغل الحمدد لله كويس في عيد الحب.. كل سنه والناس كلها بتحب يعضها...

أمنياتي

شمس النهار يقول...

*اينو
ويجعل كل ايامك انت وفوكس كلها سعاده ورضا

شمس النهار يقول...

*واحد من العمال
شكرا ليك ومانجيلكش في شهر يناير
بس انت ليه لحد دلوقتي سايب بوست اوباما
ده حتي قرب يمشي

عمرو يقول...

أيوه فعلا يا برنسيس فبراير شهر جميل جدا خاصة أن عيد ميلادى فى أول فبراير :)
متشكر ليكى ..

شمس النهار يقول...

*كيار
الجميله
علي فكره انا بحب يوم الاحد
وكفايه انك اتولدتي فيه عشان تحبيه
ربنا يسعد ايامكم
اوعوا تنسوا يوم الجمعه

شمس النهار يقول...

*خديجه
ازيك
حمد الله علي السلامه
وشكرا ليكي علي المجامله اللطيفه

شمس النهار يقول...

*من غير عنوان
انا فعلا لما بيخلص يناير
بفرح بفبراير جدا
بس سؤال صغير كده
ايه اللي جاب الهندسه للدباديب

شمس النهار يقول...

*عمرو
كل سنه وانت طيب وبصحه وسعاده
وعلي فكره اغلب الناس العظيمه اللي قابلتهم في حياتي كانوا من مواليد فبراير
والحمد لله فرقت معاك يوم ان مااتولدتش في يناير
كل سنه وانت طيب ياراجل ياطيب

عمرو يقول...

و أنتى طيبه بجد يا برنسيس
و لو كنت أتولدت فى يناير كنت حأغير تاريخ ميلادى علشان ماحدش يزعل :)

شمس النهار يقول...

*عمرو
لا لا مش للدرجه دي
انت هتزعل مواليد شهر يناير مني والا ايه
علي فكره بابا الله يرحمه كان مولود في يناير ومات في يناير برضه
ربنا يخليك ويبارك فيك

prince4ever يقول...

التعليق ال100
اتأخرت على مدونتك الجميلة فتره لا بأس بها...بس انا اللي خسران و الله
و الحمدلله ان شهر يناير مر بسلام المره دي... انا عندي بقى عقده اسوأ... شهر يناير بييجي مره في السنه...انما يوم التلات بييجي كل اسبوع...ملوش حل بجد...

مممم...انا بس حابب اخد رأي حضرتك في حاجه لأني بعتبرك من الملهمين بالنسبه لي... انا جبت وسيلة اتصال بدار نشر محترمه اشتهرت بأدبائها الشباب... وهما قالولي راسلنا و كده... تفتكري انا كتاباتي تستحق اني انشرها سواء القصص او الرومانسيه...و لا اصرف نظر و اكتفي بالمدونه و بلاش اخلى حد يتريق عليا...
انا بجد محتار و قلت ألجأ لحضرتك...
بس... و ارجو انك تكوني في أتم صحة و سعاده
و كل فبراير و انتي طيبه

من غير عنـــوان يقول...

الزمن...
أصل أنا مش بأشتغل معماري إلا بمزاجي...

أما الدباديب فدي بحبها... وبمزاجي برضه.. بس أكل عيش

تحياتي

شمس النهار يقول...

*برنس فور افر
انا بشكرك علي الثقه الغاليه دي
بالنسبه ليوم التلات ماتحطش في دماغك وممكن تبتديه بأنك تقرا سورة ياسين
بالنسبه لموضوع دور النشر
انت ليه خايف مع انك موهوب فعلا بشهادة كل المدونين اللي بيعلقوا علي قصصك مش همه دول برضه من الناس اللي هيقروا القصص لما تتنشر اعتقد ان ده استفتاء علي سكيل صغير وشهادة نجاح اوليه
وبعدين لو كل واحد موهوب ومقتنع بموهبته (وده انت والا ماكنتش كتبت)قال لامش هظهر موهبتي دي لحسن حد يتريق عليا ماكناش شفنا والا اي ابداع
وماله لما تاخد شوية نقد علي تريقه
عبد الحليم اول مره يغني ضربوه بالطماطم والبيض
لو كان غضب ويأس وقال خلاص
كنا اتحرمنا من احلا واذكي صوت في الدنيا
انا بعتبر اي انسان ربنا منحه موهبه
ان دي بتكون مسؤليه علي عاتقه مش من حقه انه يستخسرها في الباقي اللي ماعندوش نفس الموهبه
جرب والخبطه اللي ماتكسرش بتقوي
الدنيا محاولات وتجارب ساعات بتصيب وساعات بتخيب
واعتقد ان انشاء الله هتصيب معاك
وهدعيلك ربنا يوفقك
بس اول كتاب يتطبع يكون من نصيبي

شمس النهار يقول...

*من غير عنوان
انا مش معترضه والله بس انا استغربت من موضوع الدباديب بس وعلاقتها بالمعمار
بس طالما بتحبها خلاص
واهو كله يخضع لمظلة الفن
هو حضرتك زعلت من السؤال

من غير عنـــوان يقول...

طبعا لأ حضرتك
أنا مازعلتش خـــالص

بالعكس... ضحكت

أمنياتي

Mohamed Hesham Safa يقول...

ربنا يكتر أفراحك ... وأهه يناير عدى أهه الحمد لله ...

ولكل منا ( ينايره )

...............

والسـ ختام ــلام

شمس النهار يقول...

*محمد هشام
ازيك
انت كنت فين مختفي
حمد الله علي السلامه

mahasen saber يقول...

شموسه الحبيبه

قلنا بلاش بنتى دى لانى لو مشيت جنبك هتبانى انتى اليىبنتى

انا مشفتش ست فى رقتك وجمالك الطاغى والهادى

انا لو مشيت معاكى هنقبك ههههههههه

mahasen saber يقول...

انا بحبك يا شموسه فى الله من اول معرفه ليا بيكى يعنى من قرايتى لتعليقاتك ولمواضيعك فى مدونتك استشفيت ان ورا الكلمات الصادقه المعجونه بالعقل دى
روح شفافه ورقيقه وسبحان الله لما شفتك امبارح واستمتعت بالحوار معاكى وجها لوجها الصوره مااختلفتش بتاتا غير ان الواقع اروع كمان بكتير من ما كنت متخيله

انتىهبه جميله من ربنا لاى حد انه يعرفك بس كده مجرد معرفه ما بالك باليى يعرفك عن قرب

ربنا يبارك لينا فيكى ويباركلك فى كل من تحبين
يا اجمل وارق نساء الارض قاطبتا

شمس النهار يقول...

*محاسن صابر
ياحبيبتي اهو انت اللي كل ده ياجميله
انت اللي نورتي البيت عندي
وكلنا ابسطنا جدا من وجودك في وسطنا
انت شخصيه جميله وانسانه مهذبه جدا والبنات مبهورين باللي عملتيه مع ابنك انك تعلميه انه يتعود يعتذر
وياريت تتكرر انا استمتعت جدا بصحبتك
وفعلا حسيت انك فعلا بنتي وبتكلمه معاها