الحج

تحديث : انا باعتذر لكل اللى علق على البوست انى مردتيش النهارده علشان انا لسه راجعه من المستشفى بماما و ان شاء الله حارد بكره و عاوزه اشكر ضد التيار و كيارا على سؤالهم على ماما بالتليفون
و شكر خاص لمحاسن صابر اللى اتصلت بيه و انا فى المستشفى تسال على ماما
و مش عارفه اشكر عمرو بدر ازاى اللى اتصل بالتليفون و لما لقى ان الوضع عندى حرج و انى لوحدى لاقيته فجأه عندى فى المستشفى بشهامة ابن البلد و ماسبنيش ابدا و اصر انه مايمشيش غير اما اطمن ان الامور استقرت و اننا خلاص حنغادر المستشفى و مش عارفه اشكره ازاى ؟
بطمنكوا ان ماما دلوقتى بخير بعد ما العمليه الغلط اتصححت تانى على يد نفس الطبيب اللى اجراها اول مره و اللى باحييه على شجاعته و اعترافه بغلطه و تصحيحه

عايزه اتكلم معاكم عن الحج كل ما اجي اتكلم عن الحج يحصل حاجه
غزه وبعدين السفينه وعملية ماما والميل اللي اتسرق
المهم نتكلم عن رحلتى فى الحج
الحقيقه كانت الرحله من الناحيه التنظيميه جميله جدا وكله كان بتوقيت ونظام
انا مش هحكي عن الرحله الايمانيه لا انا هحكي عن مواقف ظريفه حصلت لي مع الجنسيات المختلف اللي قابلتها
اول حكايه كانت مع بنتين من الفلبين اتعرفنا علي بعض والانجليزي بتاعهم لطيف قوي وبينطقوا بطريقه غريبه كده
المهم بعد التعارف واللذي منه سألتنى واحده منهم سؤال غريب جدا
قالت: رحتي مارينا ؟
انا:بستغراب شديد جدا واستنكار (لا)ودماغي عماله تودي وتجيب البنت دي كانت شغاله عندنا في مصر والا مارينا مشهوره قوي كده والا انا شكلي مارينيه والا ايه ؟
هي:هتروحي بعد الحج ؟
انا:لا طبعا اروح ليه ؟
هي:مستنكره(ليه مش عايزه تروحي) ؟
انا: مابحبهاش ومش عايزه اروح
البنت كانت عايزه تضربني وسألتني سؤال استنكاري تحذيري وكأني مجنونه
هي:ازاي تحبي الكعبه وربنا وتحجي وماتحبيش الرسول ؟
انا:لا تعالي هنا استهجي مارينا بتاعتك دي
اتضح انها تقصد مدينه يعنى المدينه المنوره وبتنطقها مارينا
وطبعا لما فهمتها قعدت تضحك لما اخدتلها شوية نظرات من المحيطين بينا استنكاريه و كانت هتنطرد من الكعبه
---------------------------------------------------------------------------------------------
كان دايما حظي مع بتوع شرق اسيا ليه مش عارفه
واحده اندونيسيه صغننه حجما بس كبيره جدا سنا
قالت لي بشخط الرحمن وانا مش فاهمه طب ياحاجه بتتكلمي انجليزي لا طب عربي مافيش هي اللي طالع عليها الرحمن اللي جنبي قالت لي يمكن عايزه سورة الرحمن
اول ماقريتها ابتسمت جدا وحيتني بالطريقه بتاعتهم
شويه ولاقتها نايمه علي رجلي انادي عليها ياحاجه ياستي ايه اللي حصل هي ماتت والا ايه
تقوم من النوم تضحكلي وتهز دماغها وتشخط فيا الرحمن وفضلنا انا اقرا وهي تنام وانا اصحيها
مانجدنيش منهاغير الادان
-------------------------------------------------------------------
جت جنبي تاني بنت باكستانيه ووالدتها البنت قالت لي ان والدتها عايزه تتعرف عليا اتعرفنا وتبادلنا كلمات لطيفه وسألتني متزوجه ؟ قلتلها عندي 3بنات
لاقيتها رفعت ايديها للسماء وهي بتتكلم بتأثر بلغتهم طبعا وتبصلي وتبتسم سألت بنتها في ايه ؟ قالت لي انها بتدعي لي انجب ولد
فهمتها انه ماينفعش وان بناتي كبار و واحده منهم متزوجه والباقي مخطوبين راحت رافعه ايدها تاني وعملت نفس القصه
فسألتها في ايه تاني مش طلع ماينفعش اجيب ولد خلاص ؟
قالت لي بتدعي لبناتك يخلفوا همه الولد الصالح
--------------------------------------------------
وكان في حاجه لطيفه جدا كنت بلاحظ ان الناس بتوع شرق اسيا بيقروا القران حلو جدا وصح وهمه مابيعرفوش لا يتكلموا عربي والا يقروا عربي
ولما اتكلمت مع واحده هنديه شرحتلي انهم بيتعلموا القران بالشكل والحروف والمعني بيتعلموه بلغتهم
زي كده ماطفل يتعلم يغني اغنيه بالانجليزيه وهو مش عارف معناها والا يقراها والا بيتكلم انجليزي اصلا
------------------------------------------------------------------------------
وكان في حديث شيق حصل بيني وبين مدرسة لغه عربيه ايرانيه
واتكلمنا في كل حاجه وقالت بالرغم انها مختلفه مع السادات في كل اللي عمله بس هي مش عجبها موضوع الفيلم اللي اتعمل عنه
وانها زعلانه انها مش قادره تيجي مصر بالرغم انها بتحبها جدا عشان مصر مابتسمحش بدخول الايرانيين للسياحه
واتكلمنا علي العراق وقالت ان اللي بيخرب هناك مش عراقيين
وعندها امل ان العراق ترجع قويه تاني
---------------------------------------------------------
وكان في موقف لطيف من زميله مصريه لطيفه جدا
واحنا في الساعه الاخيره من يوم عرفه والكل مشغول في الدعاء لاقيتها بتنادي عليا في فزع
هي:شمس النهارده الاحد
انا:طب ماشي في ايه ان النهارده الاحد عندك موعد والا حاجه ؟
هي:قالت لي لا بس وضعنا ايه واحنا واقفين عرفه يوم احد ؟
انا:طب في ايه يابنتي قالت لي اصل الحديث بيقول ان عرفات يوم جمعه يغفر لمن في الموقف
طب النهارده الوضع ايه ؟
انا:رديت عليها قلت لها طب نرجع مصر بسرعه ونيجي السنه الجايه
طبعا كل اللي في الخيمه ضحكوا وفرجنا علينا الخلق
-----------------------------------------------------------------------------------
قبل ما اسافر كل اللي يقول لي ادعيلي اكتب اسمه وايه الدعاء اللي عايزه
لحد مالاقيتني معايا فوق المتين اسم ده غير ان انا اللي ماطلبش برضه كتبته وكتبت كل اللي اعرفهم من يوم ما اتولدت لحد دلوقتي يعني تلات اربع الشعب المصري
وعملت الورق ده مع بعضه زي رول الفارمانات بتاع زمان وربطته بشريطه خضراء ساتان
انا طلعت الرول وفردته واللي في الخيمه ضحكوا ضحك
اعمل ايه وانا هفتكر دول كلهم ازاي
------------------------------------------------------
لينا واحده صديقه علي سجيتها شويه جوزها اداها ريالات وقال لها الريال ده زي الجنيه عندنا
راحت اشترت قلم كحل من المحل البياع قال لها القلم ده بريال اديته الريال واداها القلم وفضلت مستنيه البياع استغرب قال لها في شئ ؟ قالت له فين 80 قرش باقي الجنيه
طبعا كل اللي في المحل ضحكوا علي الموقف
---------------------------------------------------------------------------
عقبالكم كلكم لما تحجوا الحج رحله جميله كلها طاعه وحب لله وتنفذ اوامره بدون تفكير او شك طاعه للطاعه
اجمل حاجه كان منظر السماء في اخر يوم عرفه كانت لوحه ابدعها الرحمن عمري ماشفت والا هشوف زيها
حسيت ان ربنا بيقول لنا غفرتلكم ياعبادي