الثلاثاء، 24 فبراير 2009

الحج

تحديث : انا باعتذر لكل اللى علق على البوست انى مردتيش النهارده علشان انا لسه راجعه من المستشفى بماما و ان شاء الله حارد بكره و عاوزه اشكر ضد التيار و كيارا على سؤالهم على ماما بالتليفون
و شكر خاص لمحاسن صابر اللى اتصلت بيه و انا فى المستشفى تسال على ماما
و مش عارفه اشكر عمرو بدر ازاى اللى اتصل بالتليفون و لما لقى ان الوضع عندى حرج و انى لوحدى لاقيته فجأه عندى فى المستشفى بشهامة ابن البلد و ماسبنيش ابدا و اصر انه مايمشيش غير اما اطمن ان الامور استقرت و اننا خلاص حنغادر المستشفى و مش عارفه اشكره ازاى ؟
بطمنكوا ان ماما دلوقتى بخير بعد ما العمليه الغلط اتصححت تانى على يد نفس الطبيب اللى اجراها اول مره و اللى باحييه على شجاعته و اعترافه بغلطه و تصحيحه

عايزه اتكلم معاكم عن الحج كل ما اجي اتكلم عن الحج يحصل حاجه
غزه وبعدين السفينه وعملية ماما والميل اللي اتسرق
المهم نتكلم عن رحلتى فى الحج
الحقيقه كانت الرحله من الناحيه التنظيميه جميله جدا وكله كان بتوقيت ونظام
انا مش هحكي عن الرحله الايمانيه لا انا هحكي عن مواقف ظريفه حصلت لي مع الجنسيات المختلف اللي قابلتها
اول حكايه كانت مع بنتين من الفلبين اتعرفنا علي بعض والانجليزي بتاعهم لطيف قوي وبينطقوا بطريقه غريبه كده
المهم بعد التعارف واللذي منه سألتنى واحده منهم سؤال غريب جدا
قالت: رحتي مارينا ؟
انا:بستغراب شديد جدا واستنكار (لا)ودماغي عماله تودي وتجيب البنت دي كانت شغاله عندنا في مصر والا مارينا مشهوره قوي كده والا انا شكلي مارينيه والا ايه ؟
هي:هتروحي بعد الحج ؟
انا:لا طبعا اروح ليه ؟
هي:مستنكره(ليه مش عايزه تروحي) ؟
انا: مابحبهاش ومش عايزه اروح
البنت كانت عايزه تضربني وسألتني سؤال استنكاري تحذيري وكأني مجنونه
هي:ازاي تحبي الكعبه وربنا وتحجي وماتحبيش الرسول ؟
انا:لا تعالي هنا استهجي مارينا بتاعتك دي
اتضح انها تقصد مدينه يعنى المدينه المنوره وبتنطقها مارينا
وطبعا لما فهمتها قعدت تضحك لما اخدتلها شوية نظرات من المحيطين بينا استنكاريه و كانت هتنطرد من الكعبه
---------------------------------------------------------------------------------------------
كان دايما حظي مع بتوع شرق اسيا ليه مش عارفه
واحده اندونيسيه صغننه حجما بس كبيره جدا سنا
قالت لي بشخط الرحمن وانا مش فاهمه طب ياحاجه بتتكلمي انجليزي لا طب عربي مافيش هي اللي طالع عليها الرحمن اللي جنبي قالت لي يمكن عايزه سورة الرحمن
اول ماقريتها ابتسمت جدا وحيتني بالطريقه بتاعتهم
شويه ولاقتها نايمه علي رجلي انادي عليها ياحاجه ياستي ايه اللي حصل هي ماتت والا ايه
تقوم من النوم تضحكلي وتهز دماغها وتشخط فيا الرحمن وفضلنا انا اقرا وهي تنام وانا اصحيها
مانجدنيش منهاغير الادان
-------------------------------------------------------------------
جت جنبي تاني بنت باكستانيه ووالدتها البنت قالت لي ان والدتها عايزه تتعرف عليا اتعرفنا وتبادلنا كلمات لطيفه وسألتني متزوجه ؟ قلتلها عندي 3بنات
لاقيتها رفعت ايديها للسماء وهي بتتكلم بتأثر بلغتهم طبعا وتبصلي وتبتسم سألت بنتها في ايه ؟ قالت لي انها بتدعي لي انجب ولد
فهمتها انه ماينفعش وان بناتي كبار و واحده منهم متزوجه والباقي مخطوبين راحت رافعه ايدها تاني وعملت نفس القصه
فسألتها في ايه تاني مش طلع ماينفعش اجيب ولد خلاص ؟
قالت لي بتدعي لبناتك يخلفوا همه الولد الصالح
--------------------------------------------------
وكان في حاجه لطيفه جدا كنت بلاحظ ان الناس بتوع شرق اسيا بيقروا القران حلو جدا وصح وهمه مابيعرفوش لا يتكلموا عربي والا يقروا عربي
ولما اتكلمت مع واحده هنديه شرحتلي انهم بيتعلموا القران بالشكل والحروف والمعني بيتعلموه بلغتهم
زي كده ماطفل يتعلم يغني اغنيه بالانجليزيه وهو مش عارف معناها والا يقراها والا بيتكلم انجليزي اصلا
------------------------------------------------------------------------------
وكان في حديث شيق حصل بيني وبين مدرسة لغه عربيه ايرانيه
واتكلمنا في كل حاجه وقالت بالرغم انها مختلفه مع السادات في كل اللي عمله بس هي مش عجبها موضوع الفيلم اللي اتعمل عنه
وانها زعلانه انها مش قادره تيجي مصر بالرغم انها بتحبها جدا عشان مصر مابتسمحش بدخول الايرانيين للسياحه
واتكلمنا علي العراق وقالت ان اللي بيخرب هناك مش عراقيين
وعندها امل ان العراق ترجع قويه تاني
---------------------------------------------------------
وكان في موقف لطيف من زميله مصريه لطيفه جدا
واحنا في الساعه الاخيره من يوم عرفه والكل مشغول في الدعاء لاقيتها بتنادي عليا في فزع
هي:شمس النهارده الاحد
انا:طب ماشي في ايه ان النهارده الاحد عندك موعد والا حاجه ؟
هي:قالت لي لا بس وضعنا ايه واحنا واقفين عرفه يوم احد ؟
انا:طب في ايه يابنتي قالت لي اصل الحديث بيقول ان عرفات يوم جمعه يغفر لمن في الموقف
طب النهارده الوضع ايه ؟
انا:رديت عليها قلت لها طب نرجع مصر بسرعه ونيجي السنه الجايه
طبعا كل اللي في الخيمه ضحكوا وفرجنا علينا الخلق
-----------------------------------------------------------------------------------
قبل ما اسافر كل اللي يقول لي ادعيلي اكتب اسمه وايه الدعاء اللي عايزه
لحد مالاقيتني معايا فوق المتين اسم ده غير ان انا اللي ماطلبش برضه كتبته وكتبت كل اللي اعرفهم من يوم ما اتولدت لحد دلوقتي يعني تلات اربع الشعب المصري
وعملت الورق ده مع بعضه زي رول الفارمانات بتاع زمان وربطته بشريطه خضراء ساتان
انا طلعت الرول وفردته واللي في الخيمه ضحكوا ضحك
اعمل ايه وانا هفتكر دول كلهم ازاي
------------------------------------------------------
لينا واحده صديقه علي سجيتها شويه جوزها اداها ريالات وقال لها الريال ده زي الجنيه عندنا
راحت اشترت قلم كحل من المحل البياع قال لها القلم ده بريال اديته الريال واداها القلم وفضلت مستنيه البياع استغرب قال لها في شئ ؟ قالت له فين 80 قرش باقي الجنيه
طبعا كل اللي في المحل ضحكوا علي الموقف
---------------------------------------------------------------------------
عقبالكم كلكم لما تحجوا الحج رحله جميله كلها طاعه وحب لله وتنفذ اوامره بدون تفكير او شك طاعه للطاعه
اجمل حاجه كان منظر السماء في اخر يوم عرفه كانت لوحه ابدعها الرحمن عمري ماشفت والا هشوف زيها
حسيت ان ربنا بيقول لنا غفرتلكم ياعبادي

هناك 91 تعليقًا:

عمرو يقول...

تقبل الله يا برنسيس
و ربنا يستجيب اٍن شاء الله لدعاء الأم الباكستنيه و يرزقك بالولد :)

Teawater يقول...

ههههههههههه
عثل عثل
لا تووووووحفه تقبل الله يا شموسة يا قمر
وربنا يكرمنا كلنا
ويرزق بناتك بالخلف الصالح ويباركلك فيهم

بحبك ياكيارا يقول...

تقبل الله

kmt يقول...

السلام عليكم ورحمة الله وبركاته

مش لاقية تعليق يناسب
ربنا يعزك ويتقبل منكِ
آمين

تحياتي
الى اللفاء

موناليزا يقول...

يااه ربنا يكتبهالنا يارب

عاشقه وغلبانه يقول...

اول واخر موقف وقعوني من الضحك
ههههههههههههههههههههههههه

مارينا والريال

بس انتي ايه حكايتك مع شرق اسيا
ههههههههههههههههههه

mohamed ghalia يقول...

ربنا يتقبل
وربنا يتقبل دعائك ونكون من الحجيج السنة الجاية
دمتى بكل الود

Foxology يقول...

والله مواقف جميلة بجد وظريفة جداااا

ربنا يتقبل منك ويكتب لنا الحج ان شاء الله :)

تحياتى :)

leeno يقول...

ربنا يتقبل منك و يباركلك و يبارك فيكي

حج مبرور باذن المولى


فكرتيني بمواقف العمرة
كانت رحلة جميلة و تجربة من اجمل تجارب حياتي اللي نفسي ارجع اعيدها


عقبال ما تحجي مع بناتك و جوازهم يارب

mahasen saber يقول...

شموستنا الرقيقه اليى مصدعاها بمشاكلى دايما وبمشاعرى برضه

انا وضعت قدمى فى البلوجر اخيرا
بس ايه الجمال ده انا ضحكت بشكل على موضوع مارينا والريال قوى

ربنا يسعدك دايما يا شموسه

بس شوفتى حتى الاسيويين مش مصدقين انك ام لبنات كبار
قلتلك اليى يشوفك ميديكيش اكتر من 28 سنه واههى جت من شرق اسيا كمان يعنى مش انا بس اليى بقول كده

ربنا يزيدك جمال وحيويه بس جمال روحك هو اليى عامل كل ده يا جميله

عاشقه الرومانسيه يقول...

المواقف كلها جميله وانتى دمك شربات
وبالذات لما قلتى نرجع مصر بسرعه ونيجى السنه الجايه
ولا كمان
مش طلع انى ماينفعش اجيب ولد؟
ردودك على المواقف جميله وبتعكس خفة ظل مالهاش مثيل

تقبل الله

حاسوباتيه يقول...

تقبل الله يارب وفعلا هي رحله رائعه وممتعه وعقبالنا يارب

Sweet Violet يقول...

ههههههههههههههههههههههه

انا موت ضحك بجد لما قولتى طب نرجع مصر و نيجى السنه الجايه ((:

لالا بس بجد المواقف كلها جميييلة قوووى

تقبل الله ياشموستى (:

أحــوال الهـوي يقول...

تقبل الله منك دعائك
و المرة الجايه ان شاء الله ابعث لحضرتك اسمي و اسم امي الله يرحمها علشان تدعيلي و ايه يعني 3|4 الشعب المصري +وحد

في الحج تختلط الاصوات و اللهجات و لو انصت لقول لبيك اللهم لبيك تصدر من افواه الناس بشتي اللغات تقولي سبحان الله

تحياتي

SHAPE YOUR LIFE (ABOALI) يقول...

اد ايه الدنيا دى صغيرة
فيها البشر الوان
كلما قراءت بوستك
تذكرت
وجعلناكم شعوبا وقبائل لتعارفوا
ان اكرمكم عند الله اتقاكم


فسبحان الحى القيوم

تقبل الله منك ان شاء الله

لؤلؤة الاسلام يقول...

هههههههههه


فعلا حكايات ظريفة
و تقبل الله منا و منكم

و ان شاء الله يرزقنا ربنا ان احنا نحج
و جزاكم الله خيرا
و تحياتى

Eno يقول...

حجا مبررورا وذنبا مغفورا بأذن الله

حكاياتك حلوه اووووووي بجد يامدام شمس

ضحكتني كتيرررررر :)

ربنا يجعل كل ايامك سعيده في طاعة الله :)

دمتي بالخير :)

من غير عنـــوان يقول...

تقبل الله.. وعقبال العوده إن شاء الله

حكاوي جميله.. فيها مغزى دون أن ندري...وكلها حب ووصل..

وأكيد إنت كنت محبوبه هناك زي ما إنت محبوبه هنا..

وطبعا الحكايات كلها دمها خفيف...

أمنياتي

Empress appy يقول...

ربنا يتقبل منك يا شموس يا رب ويرزقنا احنا كمان

أمل حمدي يقول...

ربنا يتقبل منك اللهم امين يا شموسة

ويكتبها لي ولكل مشتاق يارب

سلام

وردشان smilyrose يقول...

الله عليكى يا شموسة

بجد شوقتينا اكتر من شوقنا

لزيارة الحبيب وزيارة بيت الله

وزيارة مسجده والاماكن المقدسة

ربنا يتقبل منك يا شموسة

ويوعدنا بزيارته معاكى يارب

smilyrose

روح الحب الصادق

عاشقه وغلبانه يقول...

الف الف الف سلامه علي مامتك
والله ماعرف غير حالا
ومش معايا رقم تليفون ولا حتي ايميل
انااسفه والله ماكنت اعرف

انا لما تدخلي هاخد ايميلك وتليفونك لو امكن وهابقي اتصل اطمن

romansy يقول...

الف الف سلامه على الحاجه
ودايما اللى يعرفك ميقدرش يسبك فى الظروف دى
يارب نحج زيك ونزور مكه والمدينه ويتقبل الله منا ومنكم ان شاء الله

Unknown يقول...

تقبل الله منا ومنكى
ويارب يارب يارب ازور البيت دا انا بحلم بجد يومياً انى ازورة
كويس انك فكرتينى علشان بجد نفسى ازوره
المدونة اكثر من رائعة وتقبلى تحياتى اختى الكريمة

الربان يقول...

تحياتي

الف لا بأس علي ماما...طهور ان شاء الله و أجر وعافية...شفاها الله و عافاها.


دائما ما تكون ذكريات الحج جميلة ...و فرصة للتعارف و التألف بين الناس...
حج مبرور و ذنب مغفور ان شاء الله...

تحياتي و تقديري

من غير عنـــوان يقول...

ألف سلامه على ماما
وحمدا لله على سلامتها

تحياتي

عمرو يقول...

لله الحمد من قبل و من بعد و يكفى رحمة من الله أن الموضوع جه على قد كده و تم تداركه
يا برنسيس أنا ماعملتش سوى أقل ما يمكن عمله فى ظرف زى ده
لكن أحب أحييكى على شجاعتك و صلابتك اللى أظهرتيهم فى موقف حقيقى صعب خاصة أنه بيمس الأم اللى هى أغلى اٍنسانه فى الوجود
حمدا لله على سلامتها و ربنا يشفى كل مريض

Sweet Violet يقول...

الف الف سلامه عليها و الحمدلله ان العمليه اتصححت و بقت بخير

حمدلله على سلامتها ياشموستى سلامى ليها كتيييير

شمس النهار يقول...

*عمرو
ان شاء الله يرزق ولادنا بالخلف الصالح
ويجعل فيهم العوض

شمس النهار يقول...

*تويتر
شكرا ليك انت اللي لطيفه وزوق
ويرزقك انت كمان بالزوج الصالح والذريه الصالحه

شمس النهار يقول...

*بحبك ياكيارا
تقبل الله منا ومنك صالح الاعمال والاقوال

شمس النهار يقول...

*كيميت
كلامك حتي لو مااتكتبش برضه وصل
وعقبالك ان شاء الله لما تحجي

شمس النهار يقول...

*موناليزا
ان شاء الله تحجي وتفرحي بزيارة الحبيب المصطفي

شمس النهار يقول...

*عاشقه وغلبانه
لا ده انا حصلي مواقف اكتر من كده بكتير بس ماحبتش اطول عليكم
وفعلا كان دايما بتوع شرق اسيه همه اللي يحبوا يتكلموا معايا
عقبال ماتحجي كده ان شاء الله

شمس النهار يقول...

*محمد غاليه
ان شاء الله يامحمد تروح تحج وتستمتع بالجو الايماني هناك

شمس النهار يقول...

*فوكس لوجيا
ربنا يكتبها لك انت واينو ان شاء الله انت عارف كان من ضم الرحله معانا اتنين عرايس لسه متزوجين
وكنا فرحانين بيهم جدا

شمس النهار يقول...

*لينو
شكرا ليكي واكيد انت طالماروحتي العمره
بتحني لهناك اكتر من اللي مارحش هناك خالص
عقبال ماتحجي ان شاء الله

شمس النهار يقول...

*محاسن صابر
انت علي طول رافعه من روحي المعنويه كده
انت اللي جميله فرغم كل مشاكلك شايفه كل حاجه جميله

شمس النهار يقول...

*عاشقة الرومانسيه
شكرا علي كلامك اللطيف الرقيق زيك
وعقبال ماتحجي ان شاء الله

شمس النهار يقول...

*حاسوباتيه
عقبالك ان شاء الله
وتبقي الحاجه حاسوباتيه

شمس النهار يقول...

*سويت فيوليت
عقبالك لما تحجي ان شاء الله
ورجعي ضد التيار يا سويت

شمس النهار يقول...

*احوال الهوي
انا دعيتلك بأسمك عشان انا عارفاه وموضوع الدعاء بالام ده مش عارفه فيه اختلاف ناس تقول لا ادعوهم لأبائهم وناس تقول لا بالأم
المهم ان انا دعيتلك وكمان بالدكتور عصام صاحب مدونة احوال الهواعشان الدعوه ماترحش هنا والا هنا
انت عارف تشابه الاسماء

شمس النهار يقول...

*ابو علي
فعلا الحج تعارف في ناس بتروح وترجع ماتكلمش حد خالص انت لو تعرف انا اتكلمت مع الناس دي كتير جدا وعرفت منهم معلومات كتير جدا ماكنتش هعرفها من الكتب والا النت
اتكلمت مع ناس من الهند وبكستان واندونيسيا والفلبيين وتركيا والجزائر وتونس والمغرب وليبيا وسيريلانكاوايران وعرب 48 بفلسطين اللي عايشيين جوه الكيان الاسرائيلي

شمس النهار يقول...

*خديجه محسن
عقبالك ان شاء الله وتحسي بالجمال والجلال
هي رحله من احلا الرحلات الايمانيه في الحياه رحلة طاعه للطاعه

شمس النهار يقول...

*اينو
شكرا ليكي وعقبال ماتحجي انت وفوكس ان شاء الله
ربنا يبارك فيكم ويرزقكم بالذريه الصاتلحه

شمس النهار يقول...

*من غيبر عنوان
عقبالك ان شاء الله
انا حصلي مواقف كتير اكتر من كده بس ماحبيتش اطول
وخصوصا مع الاسياويين
وشكرا علي المجامله

شمس النهار يقول...

*ابي
عقبالك ان شاء الله
وانا بنصحكم كلكم ان الحج يكون في السن الصغير عشان هو محتاج مجهود جسماني كبير
وصدقييني كمان بيفرق في الشخصيه بعد كده

شمس النهار يقول...

*ماما اموله
ان شاء الله تحجي
وربنا يكرمك بيها

شمس النهار يقول...

*سميلي روز
ان شاء الله تحجي
بس ياريت تحجي في سن صغير عشان الحج ده محتاج مجهود كبير

شمس النهار يقول...

*عاشقه وغلبانه
شكرا ليكي ربنا يكرمك
الحقيقه انا واقفه الميل دلوقتي خالص ولما اعمل غيره ان شاء الله هبعتلك وده شئ يشرفني جدا
وشكرا علي سؤالك

شمس النهار يقول...

*رومانسي
شكرا علي سؤالك هي دلوقتي احسن الحمد لله
وعقبال ماتحج

شمس النهار يقول...

*اصحي يامصر..اسلام ديو
اهلا بيك في اول زياره
وشكرا علي كلامك
وان شاء الله تحج

شمس النهار يقول...

*الربان
شكرا ليك سؤالك علي ماما
وهي الحمد لله احسن دلوقتي
وربنا يكرمك بالحج

شمس النهار يقول...

*من غير عنوان
شكرا ليك سؤالك علي ماما
هي احسن الحمد لله بعد خضتنا امبارح والحمد لله ان الموضوع عدي بسلام
شكرا لحضرتك

شمس النهار يقول...

*عمرو
انا طبعا مش عارفه اشكرك ازاي
وزي ماقلتلي ماينفعش اشكرك
هو فعلا ماينفعش اشكرك عشان الشكر مش كفايه

شمس النهار يقول...

*سويت فيوليت
شكرا علي سؤالك وشكرا علي تليفون الصبح
ياجميله

Unknown يقول...

انا بسلم عليكى الاول
وبقول الف مليون حمدلله
على سلامة الست الوالدة
ربنا يكمل شفائها على خير
يارررررررررررررررررررررب
ويخليها ليكى ويبارك لكى فيها
هى وبناتك وبنات المسلمين أجمعين.

dodda يقول...

الله
ربنا يتقبل منك...
ويكتبهالى ولكل المسلمين


انت طيبه جدا
وفعلا لما كنت فى العمره نفس المواقف اللطيفه اللى بتحصل من كثره الجنسيات
وانا كمان اتكلمت مع مدرسه ايرانيه بس مدرية انجليزى
والتعليم عندهم هايل وبيحبوا مصر وشايفينا حاجه كبيره..
يا رب يكون عندهم حق

Kiara يقول...

ههههههههههههههههههه موتيني من الضحك لما قلتي نرجع مصر بجد مشكلللللللله

وكمان الي كانت عاوزه تعرف يعني ايه مدونين هههههههههه

**********

الف حمدالله علي سلامه ماما ومش تشكرينا ياشموستى احنا بجد بنحبك

امممممموه

تاني تعليق بعد رجوع الجهاز من المشتفسي

dina يقول...

هههههههههههههههههههههه
بجد البوست رائع و يا رب يوعدنا قريب يا شمس...ادعيلنا و اكتبى اسمى فى رول الحجة الجاية ان شاء الله

و ربنا يتمم شفاء والدتك على الف خير يااااااااااااااااا رب
تحياتىىىىىىىىىى

شمس النهار يقول...

*نورهاتي
الله يبارك لي فيكي
شكرا علي سؤالك
هي الحمد لله كويسه جدا دلوقتي وبتتحسن
شكرا

شمس النهار يقول...

*دعاء
الله يبارك فيكي وعقبال ماتحجي يارب
فعلا التواصل مع الجنسيات الاخري من الاشياء اللطيفه في الحج
وفعلا كلهم بيحبوا مصر جدا
شكرا ليكي

شمس النهار يقول...

*كيار
الف الف حمدالله علي سلامة الكمبيوتر ياريت تاخدي اللاب توب معاكي عطل امبارح ومابيدخلش علي النت
وطبعا جهابزة الكمبيوتر عندي مش فاضيين دلوقتي
شكرا علي تليفونك الصبح ربنا مايحرمني من سؤالك
انت لاعارفه انا ماعرفتش اكتب باقي الحكاوي خالص علشان فيها تقليد وماكتبتش عن الست اللي سألتني مين المدونيين دول

شمس النهار يقول...

*دينا
عقبالك يارب لما تحجي وانتي اللي تكتبينا في الرول
وشكرا علي كلامك الجميل
وماما دلوقتي احسن بكتير

صوت من مصر يقول...

يا بجد يا بختك
هو حسد بس حسد من عين مش بتاذى والاهم انك خلصتى على كل ذنوبك
الله يغفرلك زيتقبل منك ودايما تكونى معانا
ويشفى مامتك
والله انا لو اعرف كنت روحت

بنت الغربة يقول...

الف الف سلامه على ماما...
والحمد لله ان ربنا شافاها...وكويس ان الدكتوور عنده الشجاعه وقال الحقيقه انه غلط...ماحدش بيعمل كده خالص الايام دى...
والف مبروووك على الحج ياجميل ...والله فرحتلك قوى...عقبالى يارب...
انا عملت عمرة مرتين...ومرة منهم كانت فى رمضان والحمد لله قدرت اوصل والمس الكعبه ...بس حاولت اوصل للحجر الاسود ...بس ماعرفتش..
يارب ينولهالى تانى ...ياااارب..
تحياتى ياجمييل والف سلامه على ماما ..

قوس قزح يقول...

الف سلامة على ماما
ربنا يشفيها ان شاء الله

و حج مبرور ان شاء الله

شمس النهار يقول...

*صوت من مصر
الله يخليك وعقبالك لما تحج يارب
وشكرا علي سؤالك علي ماما
هي كويسه دلوقتي وكأنك جيت بالظبط

شمس النهار يقول...

*بنت الغربه
الف سلامه عليك انت ويارب تكون عينك كويسه دلوقتي
العمره جميله جدا وخصوصا لما تكون في وقت فاضي
انا كنت في عمره شهر 4 اللي فات وكانت الكعبه فاضيه جدا وقدرت المس الحجر الاسود واصلي براحتي في حجر اسماعيل واقعد براحتي امام مقام ابراهيم وكنت بطوف بجوار العبه تماما
لكن في الحج ماحاولتش اعمل اي حاجه من دي خالص عشان الزحام
عقبالك لما تحجي ان شاء الله

شمس النهار يقول...

*قوس قزح
الله يسلمك وشكرا علي سؤالك علي ماما
هي كويسه دلوقتي الحمد لله
وعقبالك لما تحجي ان شاء الله ونصيحه حجي وانت صغيره عشان الحج محتاج صحه

الازهرى يقول...

الحاجة شموسة

لا يوجد اجمل من ذكريات تلك الرحلة المقدسة اعادها الله عليكى بالخير واليمن والبركة وكتب لنا جميعا اللقاء على عرفات
وادعوا الله ان يتقبل منك الحج وصالح الاعمال

تامر علي يقول...

أنا برضو حجيت السنه دي :) وفعلاً كانت رحلة جميلة جداً ...ربنا يعيدها على كل المسلمين بالخير... كويس إنك ما قابلتيش هنود ... كله كوم والهنود كوم :)
صديق ...رفيق .... عاوز أرميه بالمنجنيق :)

شمس النهار يقول...

*الازهري
عقبالك لما ان شاء الله تحج
انا حصل لي حاجات اكتر من كده بكتير بس ماحبيتش اطول عليكم
اخبار الحرب الدائره بلا هواده عندك في المدونه ايه اقول لك اروح انا اشوف بنفسي

شمس النهار يقول...

*تامر علي
اهلا بيك وحج مبرور وزنب مغفور بأذن الله
بس مين ده اللي هترميه بالمنجنيق
وليه الطيب احسن

Eno يقول...

الف سلامه علي مامة حضرتك يامدام شمس

اتمني تكون دلوقتي احسن ان شاء الله

دعواتي ليها بالشفاء العاجل :)

شمس النهار يقول...

*اينو
شكرا علي سؤالك علي ماما
وهي بخير الحمد لله دلوقتي
شكرا ليكي

ذو الوجه المبتسم يقول...

السلام عليكم ورحمة الله وبركاته
اولا الف سلامة على ماما
ويارب تكون بخير
لو اعرف تليفونها كنت اتصلت وكلمتها
واطمنت عليها بنفسي
لو اعرف انك بالحج السنة دى كنت جيت وشفتك
هتسالى هتعرفنى ازاى
هاقول لك الشمس بتطلع النهار بس
وانتى بتطلعى بالنهار وبالليل هههههه

مواقف الحج معاكى بجد ضحكتنى جدا
وكويس انك بتقدرى تفتكرى المواقف دى كلها . حلوة بتاعت مارينا وبتاعت الرحمن وبينى وبينك كل المواقف جميلة وضحكتنى
ربنا يتقبل منك الحج
ويجعله حج مبرور وذنب مغفور باذن الله
على فكرة انا كنت متوقع انك آنسة صغنونة مكنتش اعرف انك عجوزة قووى كده هههههههههههه باضحك طبعا
ربنا يبارك فيكى يا شمس النهار ياللى ممكن يكون اسمك شمس
تقبلى مرورى
واتمنى من الله انك تكونى بخير

شمس النهار يقول...

*ذو الوجه المبتسم
انت نسيت والا ايه مش انت كنت بتعمل ورقك عشان تسافر السعوديه وانا بستعد للحج
شكرا علي سؤالك علي ماما هي الحمد لله كويسه دلوقتي
وطبعا انا عجوزه وحاجه كمان
ويارب قريب اكون جده ادعي لي
شكرا ليك

Unknown يقول...

بسم الله الرحمن الرحيم
الحاجه / شمس ....السلام عليكم ورحمه الله وبركاته.
الموضوع ببساطه كتبت البوست الي حضرتك قرتيه...لاقيت ...( كح كح.. آآآآتشي الحمد لله...غفر الله لنا ولكم)عمي فشكول عامل بوست تاني ...وبيعلن الحرب علي ..هو يقول اعلنت عليك الحرب ...وانا غلبان بقول أعلنت عليك الحب ...ونازل ضرب قنابل وكيماويات و...انا في المشتفشي...كح كح

Unknown يقول...

حبيت ارد الأول علي تعليقكم عندي :ــ
اما بخصوص الحج ...فبالتأكيد الرحله ممتعه وخاصه لما تتكلم عنها الحاجه شمس ...ربنا يكتب لك العوده و ترحي تاني وتالت ورابع...وما يحرم واحد من المسلمين من اداء هذه الفريضه ...يارب
=====أدعيلي رنا يعدي حرب فشكول دي علي خير.

شمس النهار يقول...

*فركشاوي ناوي
برضه مافهمتش هو ليه زعلان منك
المهم
شكرا علي التعليق
وعقبال ماتحج ان شاء الله
هي رحله جميله بكل المقاييس

maxbeta3zaman يقول...

دائما تأتى المواقف الطريفة فى أكثر الأمور جدية ..حجا مبرورا وبعودة فى أعوام قادمة ان شاء الله فدعاء الوداع غالبا مايكون "اللهم لا تجعله آخر عهدنا بالبيت العتيق "..ودعواتنا للوالدة بالصحة والتعافى التام بإذن الله

فشكووول يقول...

الحاجه شمس عندنا .. يا مرحبا يا مرحبا
حمدا لله على سلامة الست الوالده وربنا يكمل شفائها على خير
رحلة الحج رحله ممتعه ربنا يرزقنا بالحجه الثالثه ان شاء الله اصل حجيت مرتين الحمد لله

معظم الاسيويين بيعرفوا يقرأوا فىالمصحف لان الالف بيت بتاعتهم هى نفس الالف بيت العربيه زى البنجلاديش والباكستانيين وكمان الايرانيين

فى السعوديه عموما كوكتيل من الجنسيات العربيه والآسيويه وفيهم العجب

الحمد لله ان ربنا فداك من التكارنه اللى بيذقوا الناس بكيعانهم
حج مبرور وذنب مغفور وربنا يكمل شفاء الست الوالده
تحياتى

الوردة البيضا يقول...

السلام عليكم
تقبل الله يا حاجة شمس، وادعيلنا يكتبهالنا يا رب

ألف ألف سلامة على والدتك وربنا يخليهالك ويباركلك فيها

حكاياتك عن الحج شدتني جدا وأضحكتني مواقفها الطريفة من قلبي
دمت بكل الحب والود
تحياتي

دعاء مواجهات يقول...

الف حمدلله ع سلامة ماما

وربنا يتم شفائها على خير ياارب

اشكرك لكلمات الرقيقة عندى

بيس


ادعوكى لزيارة

http://mhlpyaaa.blogspot.com/

بنوتة يقول...

السلام عليكم
اولا الف سلامة على والدتك والحمد لله على شفائها
ثانيا تقبل الله وعقبال ما تكرريها وعقبالنا يا رب
ثالثا
واضح ان الحج فيه مآرب أخرى
هههههه
غير الحج ذات نفسه
اسلوبك في الحكى جميل جدا ومواقف فعلا حلوة اوى
رابعا ربنا يرزقك بحفيد ولد صالح

تحياتى ليكى

شمس النهار يقول...

*ماكس بتاع زمان
اهلا بحضرتك وعقبال ماتحج ان شاء الله
وشكرا علي سؤالك علي ماما هي بخير والحمد لله

شمس النهار يقول...

*فشكول
الله يخليك
وعقبال ماتحج الحجه التالته ان شاء الله
وشكرا علي سؤالك علي ماما
هي بخير الحمد لله

شمس النهار يقول...

*الورده البيضه
الله يبارك فيكي
وعقبال ماتحجي ان شاء الله الحج من اجمل الرحلات الايمانيه واللي بتبرهني فيها علي الطاعه للطاعه
وشكرا ليكي علي السؤال

شمس النهار يقول...

*دعاء مواجهات
اهلا بيكي يادودو
وشكرا علي سؤالك علي ماما
هي بخير دلوقتي والحمد لله
وحاضر من عينيه هروح اكل مهلبيه :)

شمس النهار يقول...

*دعاء مواجهات
دخلت يامهلبيه يا وماعرفتش انشر التعليق مش عارفه ليه هحاول تاني