الأحد، 3 مايو 2009

رأي بكل بساطه


الحقيقه حبيت اني اسيبكم تعلقوا من غير مااكتب رأي عشان ما اثرش علي حد برايى ده
الموضوع ده مؤلم جدا للمحب بس هو بيحاول عشان يرضي نفسه بعد الانفصال
ومايجيش يندم بعد الانفصال ويقول ان لو كان عمل كذا يمكن او سكت عن كذا يمكن
وميت عذر وميت لو وميت سكوت
ويفضل المحب يجي علي نفسه جري وراء الامل يمكن ينصلح الحال
ويحس بيه وبعطائه
وتحت كل المسميات دي يفضل المحب يعطي ويعطي يمكن حبيبه يصحي ويفوق
وبيبقى عنده امل ان حبيبه ده يتغير زي اللي مستني معجزه من السماء
والحقيقه ان ماحدش بيتغير وعلي فكره لو مش من الاول الحب متبادل بمقدار الي حد ما متساوي مع فروق النوع عمر المقدار ده مابيتغير
المهم بيفضل المحب ده يكافح ويجي علي اعصابه مستني المعجزه
و للأسف بيحصل العكس هذا الحبيب اللاهي بيتجبر اكتر وياخد اكتر ويدوس اكتر ظنا منه انه ملك هذا المحب تماما بدليل انه هامله ومش مديه حقوق و لا مديه مشاعر وكل مايشتكي يسفه من شكوته تحت مسميات كتيره ومختلفه
وهو واثق ان هذا المحب المجنون بيه عمره ماهيفكر يسيبه عشان لوكان في نيته يسيبه كان سابه من زمان
وياخده الغرور من منطلق ليه تتعب نفسك وتدي مادام مابتديش حاجه وبتاخد كل حاجه
الي ان تقع الواقعه والقشه اللي قسمت ظهر البعير
هنا هذا الحبيب المتجبر بيجيله عادة ذهول ومابيصدقش في الاول وبيفتكر ان هذا المحب الذي اعتاد الذل عمره ماهيسيبه وده تهديد وهنرجع احسن من الاول!!! ويقول حصل ايه ماكنا كويسين ؟!
صح
هو صح هو الوحيد اللي كان مبسوط كان بياخد كل اللي هو عايزه وقت ماهو عايزه
صح
همه كانوا كويسين بس علي حساب مين؟علي حساب هذا المحب الغلبان اللي كل غلطته انه وهب حبه وروحه وكيانه وحياته لشخص مايستهلش
كان بيستغله من عواطف وعطاء بلاحدود وعلي فكره هو بيبقى عارف انه بيستغل حبيبه واعتقد انه كان مستمتع انه بيعذب انسان جنبه
وعادة بيفوق بس بعد فوات الاوان وبيحاول بشتي الطرق انه يرجع هذا الحبيب المتمرد
بس مش بيعمل كده عشان هو بيحبه لا.....
للأسف عشان هو اعتاد هذا الشلال من العواطف والمشاعر والعطاء والتضحيه
يعني حتي وهو بيحاول يعيد حبيبه اناني جدا جدا
الحب حاجه تانيه خالص!!
------
الحب عمره ماكان استبداد واذلال شخص لشخص
الحب ان ماكنش متبادل ويجعل الانسان سعيد ويضيف له احاسيس ومشاعر ايجابيه يبقا مش حب
طب ايه الفرق بين صحبت من نحب وصحبت من لانحب
ازاي انا اديك سعاده وانت تديني حزن حتي لو خبيته ومااظهرتوش

han elwed Upload Music

هناك 84 تعليقًا:

عمرو يقول...

مساء الخير يا برنسيس :)
على فكره كده بنرجع تانى لنقطة بداية الحوار اللى هى السؤال الخالد الأزلى اللى تقريبا مالوش اٍجابه !!
ما هى نوع العيوب الموجوده فى الطرف الآخر و اللى ممكن أتعايش معاها و أيه هى العيوب اللى لا يمكن أتعايش معاها ؟؟
ممكن من وجهة نظرك الشخصيه تحكمى على تصرفات شخص ما مع حبيبته أنه بيذلها و مطلع عينيها و ربما تظنى أنه بيكويها كل يوم مرتين بمعلقه ملهلبه فتصعب عليكى و تستغربى اٍزاى هى قابله على نفسها هذه المذله و معاملة كفار مكه ؟؟!!
و لكن فى الحقيقه ممكن هى تكون مبسوطه على الآخر و سعيده بطريقة حبيبها فى معاملتها و مستعذبه هذه المعامله اللى من وجهة نظرك تعذيب !!
الموضوع يا برنسيس يخضع لمعايير كل فرد و خصوصياته و تانى أرجع أقول لك أن الأمل هو ما يدفع اٍبن آدم للتمسك بحبيبه على أمل أن ينصلح حاله على الرعم من صحة مقولة أن الطبع بيغلب التطبع و حتى لو أراد الشخص أن يغير من طبعه فده بيكون مجرد قشره قابله أنها تطير فى أى وقت ليظهر لب الحقيقه من تانى ..
معاكى أن الحب مش بهدله و لا وسيلة يتسلط بها الحبيب على من يحبه تسلطا عنيفا لا فكاك منه و لكنه علاقه اٍنسانيه شديدة العذوبه و الرقه و لكنه فى نفس الوقت مش وسيله لخنق الحبيب و تطليع روحه بكثرة العتاب و اللوم و تحسيسه بالذنب لوجود نقص ما فى حبه يعنى الرحمه مطلوبه و الرحمه فوق العدل و الحب حلو و الله بس لو عدا من غير زوابع و هباهيب كل شويه و على الله قصد السبيل و تقبلى تحياتى و تقديرى :)

MǿиY El-Shreef يقول...

ازيك يا شموسه

بصي ياجميله انا قريت رد استاذ عمرو بجد عشره ع عشره

مانقدرش نساوي كل البشر ببعضهم

ده كده وده كده بشرطه :))

SHAPE YOUR LIFE (ABOALI) يقول...

احنا فى الحياه بنكمل بعض
والحياه المبنية على عطاء من طرق واحد تعتبر حياه بارده
والمخطىء هو من يحب
لاءنه سلبى وعنده حياء يجعله لا يحسن اخذ حقوقه

الامام على له مقولة

لا تكن شمعة تضىء للاخرين ثم تحترق

الحياه اسمها حياه
قائمة على الحيوية والسمو والارتقاء
والناس اللى بالمنظر اللى حضرتك ذكرتيهم
دول المغلوب على امرهم الغلابة
اللى حياتهم مبنية على اهى عيشة والسلام

وده بعيد عن الحياه من اساسه


وامثال من يعيشون حياة المغلوبين على امرهم
لا يجب ان يذكروا فى التاريخ
لاءنهم هم الامعة السلبين
اللى دايما يشتكوا ويشتكوا
ولا ياخذون ابدا فعل ايجابى

فمن لم يضع البهارات فى حياته ويصلح من نفسه وغيره
يبقى وجوده مثل عدم وجوده

مع خالص شكرى

سحساوي يقول...

حب
هع هع هع هع ( ضحكات تدل على السخرية الشديدة ) يعني ايه حب هههههه
تيحاتي و كل أسى لانسانة لسه بتتكلم عن خرافة بشرية

♥نبع الغرام♥♪≈ يقول...

السلام عليكم
شموسه حبيبتى
بجد كلامك جميل قوووى
وحاسه بكل كلمة كتبتيها
معتش فيه حاجه اسمها حب صدقينى كلهم بيضحكو على البنات
وانا عشت قصة مريرة والله ياشموسه
لحد ما ربنا بعتالى اللى يقدرنى بجد
وبيموت فيا
يارب يكرمك بإنسان زيه
تحياتى وأدعوكى لزيارة بوستى الاخير لانه شبيه من البوست بتاعك
تحياتى
أختك إيناس

بوح القلم يقول...

الحب لو لم يكن متبادل من الطرفين بدرجه متقاربه يصبح مؤلم للطرف المخلص في حبه .وهذه مشكله يعاني منها الكثير ..وللاسف هناك من يعجبه ذل الحبيب فتجده يستمتع بهذا ..
تقبل مروري الاول على مدونتك ودمة بخير ...وشكراً

عمرو جويلى يقول...

الأخت شمس النهار
السلام عليكم
الحب الحقيقى هو العطاء بلا حدود من الطرفين غير ذلك لا يسمى حبا من وجهة نظرى الشخصية
دمت بكل الحب

تامر علي يقول...

الغريب جداً إن ساعات الحب بيقلب سادية وتلاقي طرف مستمتع بتعذيب الآخر والأغرب إن أحياناً تلاقس الآخر مستمتع بالوضع :)

تحياتي :)

صوت من مصر يقول...

العجيب ان الناس ساعات لما تحب تعيش دور الحاكم الطاغى ؟
وعجبى

mohamed ghalia يقول...

حقيقى لخصتى كل الكلام ياشموسه
مفيش أى إضافة اقدر أضيفها
ربنا يكرمك

صبرني يارب يقول...

عارفه يا شموسه

العلاقه الغير متوازنه لاااااااااا يمكن تكمل ولا تنجح

يعنى انتى بتقولي هو كان مبسوط

لا هو كان بيحاول يقنع نفسه انه كده مبسوط

انما حتى لو انبسط فى الاول العطاء ده بعد فتره بيبقى مالوش معنى
ماهو جايله ببلاش
بيزهده ما بيحسش بوجوده اصلا


كمان الطرف الى اعطى بدون حساب
غلطان ويستاهل الى يجراله

العلاقه لااااازم تكون متوازنه

لو ما كانتش متوازنه هاتفشل فى يوم من الايام

ساعات المحب بيفتكر انه لما يسيطر على الطرف التاني ويخضعه لرغباته هو كده هايبقى سعيد

زي كده الراجل الى بيتباهى انه اسسسسسسد كلامه ماشي على رقبة مراته وحابسها فى البيت و و و

طيب ماشي انت كده سعيد ؟؟

لا يمكن
وان كنت
فى يوم هاتبقى مش كده

صدقوني العلاقه لازم تكون متوازنه

هو ده الحب وهى دي السعاده

مافيش حد حاطط ايده على رقبة حد

تحياتي يا شموسه

Sweet Violet يقول...

اتفق معاك ياشموستى فى كلامك ان الحب المتبادل عمره ماكان اذلال و عذاب

----------

لكن ليا تعليق على رد استاذ عمرو

فى موضوع ان الانسانة بتكون مبسوطة بطريقة تعامل الحبيب

ماشى هنا ممكن نقول ان حب متبادل بين الطرفين الا انه بطريقة غريبة شوية (و بتختلف طريقة التعبير عن الحب من شخص للأخر)

لكن فى الحالة اللى بتقول عليها شموسة بيكون حب من طرف واحد .. الحبيب بيبقى متعذب فعلا لكن الامل الداخلى ان حبيبه يتغير هو اللى بيخليه يستمر لحد ما يفوق على صدمه و جرح كبير

و فى الاخر

مهما كانت المبرارات اللى الواحد بيقنع نفسه بيها علشان يستمر فى العلاقة دى فاهو بردو المسؤول الاول عن عذابه مش الاخر

بسنت صلاح الدين يقول...

عندك حق يا شموسه الحبيب المعطاء ده بيحاول يعمل اللى يقدر عليه عشان لو حصل الانفصال ميندمش على حاجه بالعكس يبقى عارف انه عمل كل اللى يقدر عليه، و ان الطرف التانى هو اللى مقدرش

mahasen saber يقول...

ايوه يا شموستنا الجميله الله ينور عليكى مفيش حب معاه اهانه واستبداد
ولو الحبيب تمادى فى استبداده بتيجى اللحظه للمحب الغلبان ويقول لا ده مبيحبنيش اليى يحبنى ميجرحنيش وميرضاليش اليى مبيرضهوش لنفسه
وعليه بتقوم ثورة التصحيح وبينفطر عقد المحبه الغير متين لان اهم عناصره الاحتواء والامان والمحبه بمععناها الصحيح مش موجوده فبتالى كلا بيذهب اليى طريق

الله ينور عليكى كلمات البوست قلبت عليا ذكريات دفينه

mahasen saber يقول...

كلام لوردنا الغالى مضبوط على فكره ومنطقى جدا جدا

يعنى كلا تابع للطاقه وقدرة تحمل الحبيب
يعنى اليى انا مستحملوش غيرى ممكن يستحمله والعكس
عارفه يا شموسه دايما كلام واراء استاذ عمرو بتخرسنى عن الرد عليها بس يتنيرلى جوانب فى عقلى الفاضى

هى دى مشكلتى يقول...

انا اشكرك اوى على البوستين فعلا دى مشكلتى انا المحبة المجروحة حبيته 7 سنين ولاحظ فى السنة السادسة بالصدفة بعد وقرب تانى لما لقانى حسسته انى نسيته رجع ليا وحبنى او تقولى اوهمنى بعد كل ده بيقولى الظروف الكلمة المشهورة نزلت دموعى وقلتله خلاص بس خلى بالك مش هيفيد ندم بصلى وقاللى خلاص طب خلينا سنة ونشوف عاوزة اقولك انه بيتصل بيا مرة كل شهرين وربنا عالم انا قدمتله خدمات كتييييره فى حياته ومستقبله بس مش بندمعلى ده لانى حبيته بجد انا مشفتهوش من اكتر من سنة بس هو جوايا تقدرى تقولى بحس انه كرهنى فيه حسيت انى ظلمت نفسى بس اللى بيحب بيكون فى دنيا تانيةطلع انانى حب نفسه اكتر من اى حاجة انا عارفة وهيأت نفسى للبعد عنه لانه ميستاهلش أمال لو اتخطبنا هيعمل اكيد كدهبخل فى المشاعر انا مش هفضل ادى طول عمرى انا كمان عايزة اللى يقدرنى انتى عارفة ساعات زميلى يطمن عليا ويهتم بيا اكتر من حبيبى ابص كده واقول ليه؟انا اسفة انى طولت عليكى بس حبيت اشكرررررررك جدا

MaNoOoSh يقول...

فعلا الحب ملوش لزمة لو مكنوش الاحبة يضيفوا لبعض مشاعر ايجابية ويشوفوا العيوب اللى فى نفسهم ويحاولوا يغيروها مع بعض.. ويكونوا لبعض سند فى الدنيا ويساعدوا بعض على طاعة ربنا.

غير معرف يقول...
أزال أحد مشرفي المدونة هذا التعليق.
الربان يقول...

تحياتي

اعتقد ان الحب هو عطاء متبادل...لا يستوي الا أخذا و عطاءاً...يعني عطاء فقط او أخذ فقط لا يستوي ..الحب يكون حب أعرج...و ممكن كمان يكون كسيح لو استكر علي هذا الحال و في حالة الكساح يبقي الموضوع انتهي و بمشكله.

لازم نعرف ان المشاعر تقاس علي مقياس الواقع...يعني الحب ليس كلمات تقال...
بل قول يصدقة عمل....

سوء الحظ ممكن طبعا...و نتكعبل في شخص غير ما كان يبدو عليه او يظهر...

لكن دائما الايمان بالله و انني أديت واجبي و لم اقصر يبقي هو الملاذ الوحيد و الاكيد و الاضمن.


تحياتي و تقديري

romansy يقول...

صباح الخير يا شموسه اخبارك ايه
الانسان اللى بيحب بيكون اعمى مش بيشوف غير الحاجات الحلوه اللى حبيبه وبيسمع الكلام اللى عاوز يسمعه من حبيبه وما بيحسش غير حبيبه بس بس اوقات فعلا الحب بيبقى استغلال من احد الاطراف للتانى وبيكون الطرف دا عارف كويس انه بيستغل حب حبيبه
اتمنى اننا نلاقى حب حقيقى فى حياتنا حب متبادل بين الطرفين حب يعطى ولكن لا ينتظر رد العطاء

Eno يقول...

كلام مظبوط جدا ياشموسه بس اللي بيحب وقتها مش بيكون شايفه رغم اني كل اللي حوليه شايفين وعاريفن درجة الاستغلال وهو الوحيد اللي مش شايف وفي بعض الاوقات شايف وعامل نفسه مش شايف :)

تحياتي :)

شمس النهار يقول...

*عمرو
حمد الله علي السلامه:)

كلامك كالعاده كله جميل
بس انا مش بتكلم علي العيوب والميزات

انا بتكلم علي اللي بيحب حبيب بيستغله
بياخد ومابيديش
لااهتمام والا حب والا حنان والا اي شئ مما يتبادله الاحباب

وكمان في نسبة خداع قال حاجه وطلع حاجه تانيه

لكن كلامك انا موافقه عليه في الاتنين اللي في بينهم حب وود وتفاهم بس في بعض العيوب الصغيره
هنا بقا همه مع بعض اللي يقرروا ممكن يستحملوا ايه ومايستحملوش ايه
وشويه عليه وشويه عليها تمشي الدنيا لو في اصرار علي المضي في هذا الحب

كان لي صديقه فيها كل مايتمناه الرجل في المراه مافيهاش غلطه
لكن الحلو مايكملش كانت عصبيه جدا جدا لعيب في التربيه كانت وحيده وكمان لوالدين خلفوا علي كبر
حبت انسان زيها بالظبط في كل شئ ماعدا العصبيه
المشكله انهم حبوا بعض بجنون وماقدروش يبعدوا عن بعض
قعدوا يحلوا الموضوع ده مع بعض بأن اول هي ماتبتدي العصبيه والزعيق مايردش عليها ويسد ودانه عشان مايسمعش الكلام اللي هي نفسها بعد كده بتندم عليه
والدنيا مشيت
وعندهم من الاولاد اتنين ماشاء الله عليهم دكاتره الاتنين
وتشوف صديقتي دي هي وجوزها تفتكرهم متزوجين امس

اما موضوع خنق الحبيب وتطليع روحه دي
انا معاك فيها ماحدش يخنق حد
رايح فين جاي منين اكلت ايه عملت ايه مشوار ايه اللي انت رايحه بصيت يمين ليه ومابصتش شمال
انت لابس كده ليه اتأخرت عشر دقائق ليه ...الخ:)

لكن اللوم والعتاب وان الانسان يحس بالذنب ده مش موافقه عليه

طبعا ماانا لازم اعارضك يعني انا عامله البوست ليه عشان اوافق علي كل كلامك علي طول:)
الحقيقه لو الحبيب قايم بواجبه تمام التمام مش هايهمه لكن لو فعلا مقصر طبعا لازه هيتخنق عشان احساسه بالتقصير

لكن ليه مايعتبرهاش شكوه ورجاء من حبيبه انه يديله اللي هو عايزه
ماهو ياعمرو لو الحبيب مااشبعش حبيبه بكل اللي محتاجه مين اللي هيشبعه
لو ماارضاش غروره واحتياجاته وانس وحدته مين اللي هيعمل كده معاه

المفروض انه يسمعه ويحاول يرضيه مادام هو راضيه وعامل اللي عليه

وخاللي بالك ان المحب طماع دايما عنده عشم واحتياج لحبيبه
طبعا مش توئم روحه

وطبعا الحب حلو وكمان بالزوابع والهباهيب كل شويه!!!

ماسمعتش نجاة اللي عايزه حبيبها يخاصمها عشان كل شويه يقوم يصالحها:)

اصل الصلح خير!؟:)

شمس النهار يقول...

*موني الشريف

حلو موضوع بشرطه ده
خلاص كل اللي بشرطه يحبوا بعض
وكل اللي من غير شرطه يحبوا بعض
ايه قولك:)

شمس النهار يقول...

*ابو علي
موافقه علي كل كلامك

بس في ناس شخصيته بتكون قويه وقادره علي اتخاذ القرار بس بيحاولوا يأجلوه لعل وعسي
بس في النهايه بيخدوا القرار اللي غالبه بيكون طبعا صح

الغلابه همه اللي مش بيقدروا ياخدوا هذا القرار

شمس النهار يقول...

*سحساوي
اهلا بحضرتك في اول زياره للمدونه

يعني ايه حب؟
حضرتك ممكن تقراسلسلة البوستات اللي كتبت فيهارأي المتواضع والمناقشات اللي تمت بين الاخوه والاخوات
عشان تلاقي اجابه لسؤال حضرتك

اما موضوع ان الحب خرافه بشريه
ده اختلف مع حضرتك فيه

مش معني ان الانسان شوه هبه من اجمل هبات الله لعبيده زي ماشوه اي شئ جميل في الحياه
اقول ان الحب خرافه
اللي حول الحب الي خرافه
هو الانسان اللي بتكلم عليه في البوست ده
اللي اتخذ من الحب زريعه ليمارس انانيته ومرضه النفسي
وازي خلق الله
صدقني الانسان هو اللي بيشوه كل شئ جميل في الحياه ويرجع يقول ده مش موجود ده خرافه
زي الصداقه اصبحت من المستحيلات
عشان اصبحت مشوه غير معلومت الجوانب وممكن تلاقي الطعنه جايه صح من مين من صديقك اللي عارف ازاي يوجعك


الحب موجود وكما خلقه الله
مش المهم اننا نلاقي حد يحبنا ونحبه
المهم نختار صح ونحب صح ونحافظ علي النعمه دي صح

شمس النهار يقول...

*عاشقة الاحزان

مافيش حاجه اسمها مافيش حب مش بحب الكلمه دي
في حب وكل حاجه
بس مافيش ناس تستاهل ان ربنا يوهبها الحب ده
وفعلا في شباب بتضحك علي البنات
بس البنت لازم يكون عندها وعي باللي بتقوله وبتعمله وتعرف ان اي حاجه في السر ليها عواقبها
عشان مابيكنش فيها اي التزام من ناحية الشاب
عشان كده بنقول تقوي الله

والحمد لله ان ربنا كرمك باللي يقدرك
بس انت كمان حاولي تستفيدي من تجربتك وماتكرريش الاخطاء
وهقول لك نصيحه اتمني ان انا اعمل بيها شخصيا
ماتدفعيش حد فواتير حد!!!؟

بالنسبه للبوست انا قريته
وعجبني جدا
وعلقت عليه ومسني جدا

شمس النهار يقول...

*بوح القلم
اهلا بيكي في اول زياره للمدونه
وكلامك صح في كتير من الاحوال
وعايزه اقول لك الصور اللي عندك في المدونه عجبتني جدا

شمس النهار يقول...

*اللؤلؤه
عنك حق
الحب الحقيقي والصح عطاء من الطرفين بلا حدود

بس في حالات وخصوصا بين الازواج
طرف يفضل يدي والتاني والا هنا
لحد الطرف اللي بيدي مايمل ويبطل يدي الا القليل القليل
ويقول اهي عيشه والسلام
وتلاقيهم عايشين مع بعض كالاغراب

شمس النهار يقول...

*تامر علي

فعلا بس في الحاله دي بيكون طرف هو ميوله كده بيهوي التعذيب وبيستمر وهو مبسوط
واعتقد ان فعلا الحالات دي موجوده

شمس النهار يقول...

*صوت من مصر

فعلا وخصوصا لما يكون الشاب لسه سنه صغير
بيبقا عايز يعمل ديكتاتور علي اللي بيحبها ويستمتع انه ممشي كلامه عليها سواء صح او غلط

بس علي فكره النوع ده بيفوق علي انها بتزهق منه:)

شمس النهار يقول...

*محمد غاليه
صديقي العزيز الدبلوماسي جدا

بشكرك علي مشاركتك

وادينا بندور معاك علي السعاده:)

شمس النهار يقول...

*صبرني يارب

حبيبتي انت

صح كل كلامك صح ياريس

انا شخصيا مااعرفش اسعد حد حاطت ايده علي رقبتي:)

لازم اكون سعيده عشان اعرف اسعده

هتعملي ايه يوم الجمعه
هي كيارا ماكلمتكيش

شمس النهار يقول...

*سويت فيوليت

انا اللي اعرفه ان الحب سعاده
مش بقول ان الحياه وردي علي طول

بس في فرق لما تكون هناك مشاكل ممكن تتحل بالحب والود والتفاهم بين المحبيين وبين ان طرف يتشبث بكلامه ويقول هي كده


الحب راحه وتفاني في اسعاد المحبوب والوقوف بجانبه في السراء والضراء

فشكووول يقول...

الحاجه شمس
السلام عليكم
عارفه الموضوع بتاعك ده بيقول ايه
بيقول الحقيقه
والحقيقه ان اللى بياخد على طول ما يعرفش يعطى ولو مره واحده
وتحياتى

شمس النهار يقول...

*بسنت صلاح الدين

عندك حق
بس تصدقي ان مره قريت في بريد احدالمجلات المشهوره زمان ان ست كانت معطائه جدا وبتعمل كل حاجه لجوزها مش مخلياه عايز حاجه
بيعترف انه كان عطاء غامر
بس هو ماقدرش يستحمله من كتر ماحس انه مش قادر يجاريها والا يعمل لها زي هي مابتعمل عشان بعترافه عمره ماجرب يعطي
وكان بدل مايشكرها بيعذبها بتسفيه ماتصنع وهي كانت صابره عشان بتحبه
وفضلت تدي وتضحي وهو يدوس عليها وهي كاتمه في نفسها لحد ماماتت وهو باعت يحكي حكايته من ناحيه ضميره صحي وبيعذبه علي اللي عمله فيها والندم مدمره
ومن ناحيه اتجوز واحده بعدها مابتعرفش تدي زيها من نوعية ياله نفسي فامش عارف يعيش معاها
وحاسس بالوحده
وباعت يحكي عشان اي زوج زيه يحمد ربنا علي النعمه اللي في ايده ويحاول يعمل مافي وسعه عشان يسعد زوجته ويتعلم ازاي يعطيها
قبل مايفقد النعمه دي ويندم زيه

ايه رأيك

شمس النهار يقول...

*محاسن صابر

عندك حق البوست ده قلب علي ناس كتير المواجع:)

بس ادينا بننصح واجرنا علي الله

بس عجبتني اوي ثورة التصحيح دي
كمان احنا في شهر مايو ويا15 مايو

شمس النهار يقول...

*هي دي مشكلتي
اهلا بيكي في اول زياره للمدونه

بس ياصبرك 7 سنين
يانهار ابيض
انت بالك طويل
ان شاء الله لما ربنا يبعت لك الحبيب الصح اللي يستهلك وتحسي معاه بالامان والعطاء
هتعرفي قد ايه فعلا انت ظلمتي نفسك
بس المهم انك ماتقفليش قلبك وافتحيه لحب الله ومرضاته
وصدقيني ان الله قادر علي اصلاح حطام قلبك فقط اعطه الحطام

ربنا يهدي قلبك ويرشدك لما فيه الخير

شمس النهار يقول...

*مانوش
انت كده قلتي كلام جميل
طاعة ربنا
اهم حاجه تقوي الله

انت عارفه كمان حب مرضي زي ده ممكن يخاللي الانسان يعمل حاجات يندم عليها بعد كده لما يفوق

شمس النهار يقول...

*الربان
فعلا الحب لازم يكون قول وفعلا ماافضلش اقول انا بحب انا بحب
وعند ابسط المواقف يظهر عكس هذاعلي حاجات تافه يظهر المحب علي حقيقته وانه مايرضاش يتنازل او حتي يضحي بأي شئ

وعلي الطرف الاخر ان يختار الاستمرار في هذا الوضع الاعرج علي حد قولك او لا

في حالات الازواج كتير من الزوجات والقليل من الازواج اللي بيفضل الاستمرار علي سبيل ان من صبر او من صبرت علي زوجها لها الاجر او له الاجر
وكمان عشان مصلحة الابناء اللي مالهمش ذنب ان احد الوالدين اساء الاختيار

شمس النهار يقول...

*رومانسي

الحمد لله ازيك انت

مين بس قال ان المحب اعمي
صدقني المحب بيبقا شايف كل حاجه وعارف كل حاجه بس بيتغاضي عن كل عيب عشان هو حاسس انه مايقدرش يبعد
وفاهم انه ممكن الحال يتغير

ولعلمك اللي بيستغل عارف انه بستغل حبيبه ومستمتع انه بيضخك عليه وبياخد منه اللي يقدر عليه ماهو عبيط وبيحبه

والحبيب المستغل عارف ان حبيبه بيستغله وبيعطي عشان حاسس انه مش بياخد مشاعر طيبه غير لما يدي ويدي اكتر
واحساسه انه لو مااداش حبيبه هيسيبه في رأي ده قمت المأساه

بس المحب المستغل ده لما بيفوق صدقني بيبقا زي محاسن كده ماقالت في ثورة تصحيح

ومابيرجعش تاني ابدا

وفعلا ان الواحد يلاقي الحب المتبادل ده نعمه من ربنا
علي قد ماتدي مشاعر طيبه تلاقي مشاعر اطيب وحنان وود
بس المهم لما نلاقيه نحافظ عليه

شمس النهار يقول...

*اينو
اهلا بيكي
زي ماقلتي كده هو شايف بس عامل نفسه مش شايف
ياريت تقري تعليقي علي رومانسي

شمس النهار يقول...

*فشكول

عندك حق فعلا اللي بيعرف ياخد بس
عمره مابيعرف يدي

وبيفضل كده لحد مابيجيلوه وقت يبقا وحيد مش لاقي جليس والا انيس

سحساوي يقول...

عزيزتي شمس النهار الحب قدر و ليس اختيار هوه مش بلوزة و لا قميص نختاره مش صفقة، اقول الله انا عايز ( من دي ) لأنها فيها و فيها و فيها
قدر صدقيني قدر ليس فيه اختيار كما ترين .
اشكرك تقبلي مروري

ادم المصرى يقول...

شمس

انا جي بجد هكلم وكأن اتحدث الى اختى

وخذى كلامى هذا بكل ثقه

الحب والعطاء والرومانسيه وما يفوق الحب وما هوا اكبر من ان نقول حب موجودان بكل ما يكفى البشر يوجد كل شيئ يسعد اى انسان حتى لا يفكر بأن يقول انى اتخدعت

ولكن مش كل انسان مثل الاخر وممكن يكون الاختيار من الاساس مكنش موفق او الستار مكنش مبين الاخطاء او حبك غطا على عقلك ولكن اقسم بلله انى اعاشر اصدقاء كان فى حاله من الرومانسيه التى يحسدهم عليها كل من رأهم وأنتهى بهم الحال الى الجواز الصادق وحالهم يسعد كل من رأهم لئن هذا حب سيدتى وليس كلام

شمس النهار يقول...

*سحساوي
انا معاك ان الحب قدر مالناش يد فيه والا بنختاره
وياسعده ياهناه اللي القدر يبعتله حبيب يسعده

لكن لو الحب مافيهوش اختيار
فالاستمرار اختيار

يعني مش ممكن الاقي الانسان او الانسانه اللي القدر بعته لي بكل اللي مكتوب في البوست ده واسكت واقول قدر

لا
هنا الاختيار يااكمل واستحمل
يااضع لعذابي نهايه
واختار ان ابتعد وافر بنفسي من الضياع

العقل لابد ان يمشي القلب حتي يكون هناك توازن وخصوصا في الحاله دي

شمس النهار يقول...

ادم المصري

صدقت في كل كلمه قلتها
انا كمان مؤمنه بده
بس كمان مش عيب ان الاختيار يكون خطأ
ولكن الاستمرار مع هذا الخطأ
هو اللي خطأ

ذو الوجه المبتسم يقول...

السلام عليكم
بصراحة معظم التعليقات منطقية وجميلة وواضحة
وكمان ردودك عليها
ولانى باحب حب حقيقي
ولانى باتحب حب حقيقي
باقول لك الحب متعة حقيقية
واى علاقة مفيش فيها تبادل للحب
اعتقد لا تسمى حب متكامل

اسمع عن الحب من طرف واحد لكنى لست
معترف به لان اللى بيحب بجد لازم ياخذ قرار بالارتباط العاطفى ويصارح الطرف الاخر

كلامك موافق عليه

لكن الملحوظة وباكررها تانى

الحب الحقيقي
اسمه علاقة متوافقة بين حبيبين
روح..حياة .. امل .. تضحية .. تفاهم .. احتواء .. كل ماذكرناه بالبوستات السابقة

بصراحة ومن الاخر
لو فيه احتواء بمعناه الحقيقي بين الطرفين معتقدش ان فيه طرف ممكن يفكر بالبعد
موضوع الامل ؟؟؟؟؟ بدون تعليق
--------
هو صح هو الوحيد اللي كان مبسوط كان بياخد كل اللي هو عايزه وقت ماهو عايزه
صح
همه كانوا كويسين بس علي حساب مين؟علي حساب هذا المحب الغلبان اللي كل غلطته انه وهب حبه وروحه وكيانه وحياته لشخص مايستهلش
-----------
اقول على حاجة ومتزعليش
العلاقة بالشكل اللى بتتكلمى عنها دى
بلاش نسميها حب احسن
حطيها تحت اي مسمى تانى
لان الحب الحقيقي اسمه من انه يكون كده ؟

السؤال هنا ؟؟؟
النتيجة النهائية لعلاقة بالشكل ده ؟؟
تفتكرى ممكن تكون ايه
نسيان ... دمار ... تحطيم مشاعر .. حزن ... ؟

تقبلى تحياتى
ومتنسيش الحب الحقيقي بيصنع المعجزات
وبيتحدى كل المشكلات سواء مشكلات شخصية كالتعصب .. او ... او مشكلات خارجية كرفض الاهل او رفض المجتمع ...

شمس النهار يقول...

*ذو الوجه المبتسم

اهلا بيك
فعلا الحب الحقيقي بيصنع المعجزات

عارف ليه عشان الحب الحقيقي بيقوي مش بيضعف
فابيدي قوه لحل اي مشكله
اتنين اجتمعوا علي الحب اصبح كل شئ كان اتنين واحد
يعني قلب واحد عقل واحد كيان واحد تخيل القوه الناتجه عن هذا الاتحاد

القوه دي هي اللي بتقف في وجه اي مشكله
والحب بيكون هو حائط الصد لده كله


ربنا يديم عليك حبك الحقيقي ويبارك لك فيه :)

فوبيا - سايكولاند يقول...

الحب = عذاب

Unknown يقول...

تدوينة جميلة شموسة
بس فعلا ممكن حد بيحب
الحب لذات الحب بيحب الحالة
نفسها من غير ما يبقى عايز مردود
او مقابل وبالتالى بيستمر بالعطاء.
(الناس مزاجات يابرنسيسة شموسة)

لو بطـلـنا نـحـب نـمـووووت يقول...

غاليتي شمس النهار


إن الإنسان قبـل الحب شيء وعنـد الحب كل شيء وبعـد الحب لا شيء



الحب كالبحر حين تكون على شاطئه يقذفك بأمواجه بكرم
فائق يستدرجك بلونه وصفائه وروعته
ولكن حين تلقي بنفسك بين أحضانه لتبحث عن درره يغدر بك ويقذفك في أعماقه
ثم يقذف بك وأنت فاقد لإحساسك




الحب أسطـورة تعجـز البشريـة عـن إدراكهــا
إلا لمن صــدق في نطقهــا ومعناهـــا
الحب يقراء والحب يسمــع والحب يخاطبنــا ونخاطبــه ويسعدنــا ونسعــده
وهو عطـراً وهمساً نشعـر بسعادتـه إذا صدقنـاه في أقوالنـاوأفعالنــا
بالحب تصبح ا لحياة جميلة لكي نحقق أهدافــاً قـد رسمناهــا
ولكن ما يقلق العاشقين فقط هـــو
احتمال أن تكـون الأقـدار تخبئ لهـم فراقـاً لم يكن في حسبــان أي
منهــم




الحب..هو ذلك الشعور الخفى الذى يتجول فى كل مكان ويطوف الدنيا بحثا
عن فرصتة المنتظرة ليداعب الأحساس
ويسحر الأعين.. ويتسلل بهدوء.. ويستقر فى غفلة من العقل ورغما عنك
داخل تجا ويف القلب....ليمتلك الروح والوجدان... ليسطر على كل كيان الأنسان
والحب هو ذلك الشعور الذى يمتلك الأنسان فى داخلة
ويطوف بة العالم حيث يشاء بأفراحة وأحزانة
يجول كل مكان فوق زبد البحر يمشي دون إن يغوص فى أعماقة
الحب.. هو ذلك الوباء الذيذ الذي يصيب جميع الكائنات بدون استثناء
لة مغنا طيسية تجب الكائنا بعضها لبعض وبدونة لن تستمر الحياة على آى كوكب
للحب.. معانى عظيمة وتعاريف عديدة تختلف من عا شق لأخر
فكل محب لدية تصور وتعريف
خاص لمعنى الحب


تعرفي شمس انا بجد بحب وحب حقيقي ويمكن لو افضل لبكرى احكي عن الحب
مش ينتهي احساسي ولا شعوري

بس اللي قلتي بالبوست ده مش حب حقيقي ولا شي ...

الحب الحقيقي اكبر من كده الحب الحقيقي جنه الدنيا وفردوس الحياه انه الامل ...

الحـــب: صداقة شبت فيها النار،، محطة نستريح فيها لحظات
هو الشئ الوحيد الذي لايترك لمن يملكه شيئا يرغب فيه ،، تجربة تبغي لنفسها الخلود ولكنها لاتعيش الا عمر الورود


انا طولت عليك .. بس قلتلك اذا احكي مش حخلص

يسلموااااا على مدونتك الرائعه
مننحرمش منك

لك مني اجمل التحايا وارقها

من غير عنـــوان يقول...

فرأت البوست قبل كده وانشغلت

وبعدين النهارده اللي هو التلات
لقيت مقاله في الأهرام بجوار ابراهيم أصلان
أظن لمرسي يعد الدين
بيحكي شوية عن الحب

ورأي الفلاسفة اللي الناس مش بتحبه

قلت أقول ده هنا

عشان المدونين والمدونات يعرفوا آراء تانيه برضه

تحياتي وأمنياتي وشكري على المجهود الرائع

سيدتي

كيف تطلبين من البشر الذين لم يجتمعوا ( للأسف) على رب البشر

فكبف تطلبين منهم أن يجتمعوا على تفسير كلمة صعبه زي... الحب... على رأي
norahaty
(الناس مزاجات يابرنسيسة شموسة)

Unknown يقول...

معلش يابرنسيسة اسمحيلى
الباشمهندس البنا فيلسوفنا
بيستشهد برأيىّ انا! رأيىّ انا!
يادى الهنا يادى الهنا :):):)

شمس النهار يقول...

*فوبيا--سيكولاند
اهلا في اول زياره للمدون

نعم الحب = عذاب
بس في عذاب لذيذ وفي عذاب الكفار
المقصود انهي فيهم:)

شمس النهار يقول...

*نورهاتي
انت تقصدي الحب من طرف واحد صح
بس انا هنا بتكلم علي الاتنين اللي واحد فيهم بيحب والتاني شكله بيتسلي
وبرضه اوفقك ان الناس امزجه

شمس النهار يقول...

*لو بطلنا نحب نموووووت
اهلا بيكي وطولي زي ماانت عايزه
كلامك جميل واكيد طالما عن تجربه اكيد هنستفيد منه
تسلمي

شمس النهار يقول...

*من غير عنوان
قريت المقال وهو لطيف وكمان عرفت ان اللي بيحب يامجنون يامريض نفسي:)
ادي الفلاسفه وسنينهم:)
طلعونا مجانين والحمد لله
يعني مش همه اللي لاسعين لاسمح الله

علي فكره انا مش عايزه الناس تجتمع علي تعريف لاسمح الله
ايه اكون انا العبده الفقيره الي الله

كل الحكايه ان انا بتكلم علي الحب الحقيقي الصح
عشان انا بصراحه شايفه فعلا جنون
زمان كان الانسان يحب يفضل مخلص لحبه ده
ويكافح لحد مايتزوج بمن احب

دلوقتي الحب بقا تيك اوي
تلاقي الشاب علي مايتزوج يكون حب عشرين واحده
والغريب انه بعد كده يطلب من مامته انها تدور له علي عروسه
فا كل الحكايه اني حبيت ادردش معاكم في موضوع الحب
غلطانه انا ؟:)

صوت من مصر يقول...

انا بمضى حضور اولا
ثانيا فى قائمه الاغانى ممكن ليا طلب صغير نفسى ادخل البلوج هند الاقى اى اغنيه من الاتنين بنتولد او برىء لمحمد منير
ارجوكى بجد

من غير عنـــوان يقول...

طبعا مش غلطانه إنت

وأنا وكل المدونين هنا دايما بنشكرك

بنشكرك على الحوار
بنشكرك على الآراء
بنشكرك على المجهود

أما حكاية إن الفلاسفة مجانين ولا إحنا

أظن أن كلانا نحن والفلاسفة ندور في نفس الفلك
(:

عموما..
الزمن الجميل
فضلت الناس تتكلم عن الكلمة دي كتير.. لغاية ما راح طعمها...

طبعا زمان .. كان الموضوع مختلف... عارفه ليه.. عشان الإختيارات كترت...
كنت أنزل أشتري لبس مع أبويا من محل ولا اتنين على أكثر تقدير
دلوقت الولاد.. عندها 1000 محل في مول واحد

بأسمع أنا و مصر كلها بتسمع تمثيلية الساعه5:15
في نفس الوقت... دلوقت مليون محطه،غير النت والداون لود

فالشباب اتربى على كده

وطلعت كلمه جديده قالتها زمان فاتن حمامه
(ماحبش كلمة صاحبي دي)

صاحبي...
الصحوبية يا شمس هي الموضه...
وبيفتكروها حب..
والحقيقة هي الكلمة دي مالهاش تعريف لا عندي ولا عند الفلاسفة ولا عندك أكيد...

وهي اللي أفسدت الحب...

إنما الحب نفسه يبقى لنهايات العمر

والمحب الحقيقى موجود...
وسيظل موجود
والحبيب.. كذلك موجود..

ولا يوجد إنتظار ..
لنهاية الحب..
لا بجواز ولا غيره..
والزواج قد يزيد أو ينتقص من الحب حسب كل حاله..
كما أن عدم الزواج لا يلغي الحب...

ده موضوع وده موضوع...

( آي ... آي...آي... )

ده أنا باتوجع من الضرب بسبب الكلمه اللي فاتت...
بلاش ضرب...الطيب أحسن...
....
_______________
العزيزة شمس...

باحب كلمه مش فاكر هي قصة ولا شعر ولا فيلم.. اسمها....



ويبقى الحب...




زي ما جويده بيكتب...
ويبقى الشعر

تحياتي

Eno يقول...

قريت تعليق حضرتك عن رومانسي وفعلا عندك حق جدا لما قولتي انه بيكون عنده احساس انه لو اداش حبيبه هيسيبه وده احساس قمه في المأساه
صحيح اجمل حاجه في الحب العطاء بس برضه الدنيا اخد وعطاء والا عمرها ماكانت استمرت :)

تحياتي :)

عمرو يقول...

صباح الخير يا شمسمس .. قصدى البرنسيس شمسمس :)
الله يسلمك ..
أيوه كده بقى المسأله بانت يعنى أنتى عامله البوست علشان تعارضينى ؟؟
ماشى .. بس أنا بأتفق معاكى فى بعض النقاط اللى لا يجوز أن يختلف عليها أتنين يعنى من البديهيات ..
بس برضو مش فاهم يعنى أيه حبيب بيستغل حبيبه و بياخد منه كل حاجه و مش بيديله لا حب و لا اٍهتمام و لا رعايه و أى شىء ؟؟!!
يعنى أيه بقى ؟؟
يعنى فين مقومات الحب هنا ؟؟!!
و لما يبقى فيه طرف بيدى كل حاجه زى ما بتقولى و الطرف التانى سايق فى الأنانيه يبقى الطرف الأولانى حيحبه أصلا ليه ؟؟
و حيتشد له ليه ؟؟
و نضيف على كده كمان أنه مخادع على حسب كلامك و ملاوع و مش دوغرى !!
ما هو الحب ده له أسبابه برضو .. مش كده و لا أنا بأتكلم غلط ؟
ماشى .. علشان خاطرك نعديها دى ..
بالنسبه لصديقتك العصبيه فمعلش هى مش مقياس لأن وضعها شاذ شويه .. و دايما بأقول أنه لا يجوز القياس على الشواذ ( أقصد بالشواذ هنا أصحاب التصرفات الغير سويه )
و هنا بقى فى وضع هذه الصديقه العصبيه بيتضح صحة رأيى أنه من الممكن التعايش مع العيوب اللى ممكنت أن يتقبلها الفرد مثلما عمل زوجها اللى أتوقع له جنات فسيحه تجرى من تحتها الأنهار على صبره على زوجته العصبيه ..
بالمناسبه أنا ممكن أتعايش مع أمنا الغوله و أم رجل مسلوخه و لا أتعايش مع زوجه عصبيه أو صوتها عالى ..
بالنسبه للوم و العتاب .. مش شرط أبدا أن يكون الطرف الواقع عليه الفع العتابى مقصر أو على الأقل يشعر أنه مقصر .. لأنه لو ساوره هذا الشعور حيبقى حيقصر ليه أصلا ؟؟ يعنى هو الواحد عاوز يحافظ على حبيبه و لا يطفشه ؟؟ ما هو أكيد التقصير ده شىء نسبى و تخيلى فى ذهن كل فرد .. بمعنى آخر أنه اللى تشوفيه أنتى تقصير ممكن أشوفه أنا شىء طبيعى لا غلط فيه و ده بيرجع لتكوين الشخصيه الفرديه و عوامل تانيه كتيره مش مجال الكلام عنها هنا ..
بس المتفق عليه أن كتر اللوم و العتاب بيخلق حالة تبلد لدى الفرد و بيشككه فى كل تصرفاته و شويه شويه بتضيع منه الثقه فى نفسه و بيهتز و بتبقى مش فارقه معاه و بمرور الوقت بياخد العتاب و اللوم بشىء من الاٍستهزاء و التريقه لحد ما يوصل لمرحلة : بصراحه بقى أنا كده و مافيش أمل فى تغييرى !!
فلازم يعنى توخى الحرص الشديد فى التعامل مع أسلوب اللوم و العتاب بالذات مع الأشخاص عديمى التجارب ..
معلش يا برنسيس ..
مش معاكى أن الحب حلو حتى بالزوابع و الهباهيب .. لأن الحب حلاوته فى شعور الراحه اللى بيعيشه المحب فى هدوء و سلام و وئام مع حبيبه و مع العالم من حوله .. أما موضوع نجاة ده فمتهيألى أنه حاله فرديه و يحتاج صاحبها للعلاج النفسى المستعجل لأن أيوه الصلح خير بس مش طول الوقت مشاكل أمال اٍمتى بقى يستمتع المحبون بالهدوء و الوئام ؟؟
صباح سموك مارون جلاسيه و نص تفاحه و بونبونايتين :)
بالذمه عمركم شوفتم حد بيفطر كده ؟؟؟!!

شمس النهار يقول...

*صوت من مصر
حاضر يافندم من عينيه

بس سؤال علي الماشي كده اشمعنا؟
في مدون دخل اسموه سيكولاند هتلاقيه فوق شويه
زور مدونته هتنبسط جدا من البوست اللي هناك

شمس النهار يقول...

*من غير عنوان
موضوع الزمن الجميل عمر الكلمه دي ماهيروح طعمها خالص
عشان هي جوه كل واحد فينا
ولكل جيل زمنه الجميل
حتي بنتي الصغيره 19 سنه بتقول فاكره ياماما زمان واحنا صغيرين
هي كمان عندها زمنها الجميل

اما الزمن الجميل اللي بصحيح هو اللي الانسان بيعيشه سعيد نسبيا طبعا

اما موضوع مابحبش صاحبي دي
هو ده كمان من الاسباب اللي خالتني برضه اكتب في الحب
اختلاط المفهوم عند الشباب الان بين الصداقه والاعجاب والحب
انا عندي اصدقاء هم الان رجال لهم مراكزهم في الدوله
تربينا سوا وطلعنا زي الاخوه مع بعض
ايام الشباب كنا نعي يعني ايه احنا اصدقاء وجيران كانوا بيحفظوا علينا اكتر من عينيهم
والي الان زوجاتهم اصدقاء لينا واولادهم اولادنا

اما موضوع الزواج حاجه والحب حاجه
خلاص انا مش هتكلم فيه تاني معاك خالص
كفايه اللي عملته فيك صبرني يارب:)
وانا مالي

وفعلا ويبقا الحب
دايما هيكون في حب صح وحب غلط

وحبيب صح وحبيب غلط

هي دي سنة الحياه
بس ارجع واقول لكل انسان عقل ربنا وهبه له مش كمالة اجهزه لا عشان يستخدمه ويعقلها شويه

والحب لازم والابد يقرن بتقوي الله في الحبيب
عشان الدنيا تمشي صح
ربنا بيعين علي الخير

وبعدين احنا في المدونه دي مابنضربش حدخالص
نحن لانحب العنف

شمس النهار يقول...

*اينو
اهلا بيكي
فعلا الدنيا اخد وعطاء

صدقيني في كل حاجه الدنيا اخد وعطاء

حتي الام اللي المفروض ان عطائها بلاحدود
ومابتنتظرش اي مردود من الابناء
بس برضه الكلمه الحلوه واللفته الحلوه من اولادها بتسعدها
بدليل مهما عدلت ظاهريا بين الابناء تلاقيها مياله اكتر لأحد ابنائها الاكتر حنيه وملاطفه ليها

شمس النهار يقول...

*عمرو
:)
اوكي يالورد
مش هعرضك المره دي
ماشي كلامك
اما بالنسبه للفطار
ليه الفضايح دي يالورد
انا عارفه مين اللي قالك :)
في مدون عندي هنا عامل مدونه اسمها سيكولاند
كاتب بوست ماشاء الله مبهدل فيه النساء ياريت تزور مدونته وتعلق هناك

موناليزا يقول...

معاكِ حق
اللى بيحب بيسعد حبيبه مش بيسبب له حزن

د. ياسر عمر عبد الفتاح يقول...

كلام جميل
لا وكمان صحيح 100%
وليه دلائل كثير في حياتنا اليومية
وفي قصص بنسمعها كل يوم

ربنا يكرمك بجد
كل موضوعاتك مفيدة جداً

شمس النهار يقول...

*موناليزا
الحب بين اتنين اصلا لازم يكوون فيه الكثير من السعاده والراحه النفسيه
يعني السكن

شمس النهار يقول...

*دكتور ياسر عمر عبد الفتاح

شكرا ليك علي المجامله اللطيفه يادكتور

tarek momen يقول...

مش مركز بس متابع
الوقت بقي بيجري بسرعة
ياتري دي مقدمة لحاجة معينة
مش عارف

شمس النهار يقول...

*طارق مؤمن
اهلا ياحاج يعني متابع ماشي
لكن مش مركز ازاي يعني

ايوه مقدمه زي مقدمة بن خلدون

في ايه ياحاج انت زعلان والا ايه
مره تقول لي هتعملي دكتوراه ودلوقتي بتقول لي مقدمه

ده ياحاج بدل ماتشجعنا وتدلي بدلوك وتكتب لنا من خبراتك :)

assafo anaroze يقول...

شمس النهار
يسعد صباحك
الحب عمره ماكان انانية و حب الذات و تعذيب الاخر
الحب تضحية فوق ما يتصور البشر دون استغلال هذه التضحية من اجل عذاب شريكنا
الحب ليس تملك و استبداد بل حياة تشاركية في كل شيء في العواطف في الامال و الرغبات
تاكدي شمس انه مهما حبينا شخص معين و هو مابيحبيناش حنعرف يعني حنعرف و حننفصل بس بالنسبة الي عمري ما حندم اني حبيت لاني ليس حكم على قلبي و لا انا اللي برمجة فيه المشاعر بل على العكس كل تجربة حب فاشلة باعتبرها بداية لنجاح اذا حاولت الخروج من الازمة و الاستفادة من اخطاء التجربة الاولى
مودتي

أنترنتاوي يقول...

نصيحة
الزواج التقليدي أفضل شيء و معظم قصص الحب بتنتهي بالفشل إن لم يكن كلها , الحب يأتي أثناء الخطوبة و يستمر مودة و رحمة بعد الزواج

حقى اهرتل يقول...

يا جماعه الحب اكبر بكتير من سنكم لسه هتتعلموا ازاى تحبوا بعدينيعنى انا اتعلمته بعد التسعين

ميرال حشاد يقول...

الحب من طرف واحد يبقى اصعب حب

شمس النهار يقول...

*اسافو اناروز
الحقيقه كلامك جميل ولطيف زكله صح
وانا معاك في اللي قلته في السطرين دول

(كل تجربة حب فاشلة باعتبرها بداية لنجاح اذا حاولت الخروج من الازمة و الاستفادة من اخطاء التجربة الاولى)

لأن في ناس كتير الفشل بيكسرهم مش بس في الحب في اي حاجه تانيه

وفي الحب بالأخص بيدمروا جدا وبيفقدوا الثقه في كل شئ

مع ان اي تجربه الانسان بيمر بيها سواء مرت بنجاح او فشل
بتضيف للأنسان خبره والمفروض تكسبه ثقه في نفسه

شمس النهار يقول...

*انتر نتاوي
اهلا بيك
واكيد دي وجهة نظر يجب احترامها
بس مش في كل الحالات بيكون الزواج التقليدي صح ومش في كل الحالات غلط

ومش كل قصص الحب فاشله

وبعدين مااحنا هنا بنقول ليه هي بتفشل وليه هي بتنج:)
اعيد من الاول يعني :)

شمس النهار يقول...

*حقي اهرتل
اهلا بيك في اول زياره
:)عجبني تعليقك جدا
بس انت نسيت تقول 90 قبل والا بعد 100:)

بجد هرتلتك لطيفه:)
نورتنا

شمس النهار يقول...

*عاشقة عمرو
اهلا بيكي في اول زياره للمدونه

الحقيقه مش في كل الاحوال بيكون صعب
لو الطرف التاني مش مرتبط بزوجه او خطيبه او حبيبه بيبقا الامل
لكن لو مرتبط بيكون هنا الاستحاله
ولو المحب حاول ان يستميل هذا الطرف حاجات كتير بتتلخبط والحب هنا يقلب بكارثه

والمحب هنا بيعذب نفسه بيده
وكمان بيحرم نفسه من فرصة حب حقيقي تانيه مع شخص يبادله الحب

الازهرى يقول...

شموستنا الغالية

من غير ما ادخل فى النقاش لانى فى قمة الارهاق بسبب الامتحانات والشغل وحاجات تانية كده

انا موافقك على رأيك بالكامل فيما عدا

ازاي انا اديك سعاده وانت تديني حزن حتي لو خبيته ومااظهرتوش
صدقينى ممكن ويعندى اسباب مقنعة جدا اهمها تجربتى الشخصية
واسمحى لى فى عدم ذكرها


تحياتى دوما

فوبيا - سايكولاند يقول...

شمس النهار
ايه ياجميل الدعية اللى انتى عماله تعمليها للمدونه بتاعتى ديه
ربنا يخليكى يا عسل بس على فكرة
زى ما قلتلك قبل كده
الحب فعلا عذاب بلا داعى او اقدر اقولك بكل ثقه
ان ما فيش حاجه
اسمها حب والبنت
بتخدع نفسها
وبتعيش نفسها
فى اوهام لدرجه لما تتصدم وتعرف الحقيقه بتتحول للبوست
اللى عندى تتحول لدراكولا
وحتى داركولا هيكون ارحم
والولد دايما بيفكر بعقله وبياخد اللى ممكن يقدر ياخده وبعد كده بيحاول يتخلص من البنت
باى طريقه ولو البنت مكلبشه فيه هيوريها ايام سوده
عشان تسيبوه ده طبيعى
على فكرة طالما العلاقات مش سليمه او فى اطارها السليم اللى هو الجواز والبيت ولو الذل والبهدله حصلت بعد الجواز يبقى الاتنين
احسنلهم يدوروا على حياه جديده لانى من انصار ان احنا
بنعيش مرة واحده بس ما ينفعش نعيشها فى نكد دائم او زعل او اى حاجه وحشه

ميرال حشاد يقول...

الى بيحب حقيقى مش المفروض يياس من حبه و لازم يفضل وره حبيبه لحد ميحس به لو فعلا بيحبه بجد!
*انتى اكتر وحده محظوظه فى الدنيا عشان كده مش حسه بوجع الى بيحب من طرف واحد
ميرسى ليكى و لنصيحتك

شمس النهار يقول...

*الازهري
اهلا اهلا يادكتووووور ازيك
ماشي مش هسأل وموافقه كمان

يارب تكون موفق في الامتحانات والشغل
ربنا يعينك

شمس النهار يقول...

*فوبيا...سيكولاند

الحقيقه المدونه لطيفه وتستاهل الدعايه واسلوبك الادبي جميل بغض النظر عن انك مبهدلنانحن نون النسوه في البوست

بس انا معترضه علي ان مافيش حب
لأ في حب بس قليل جدا بسبب السلطه العاطفيه اللي حاصله اليومين دول

اما باقي الكلام موافقه علي اغلبه
وفعلا ساعات الست بتكون دراكولا
وكمان الرجل ساعات بيكون التعلب المكار علي الذئب المفترس في نفس واحد :)

بس بالنسبه للحياه الزوجيه دايما انادي ان الطرفيين يحاولوا يدرسوا بعض شويه في فترة الخطوبه عشان الزمن غير الزمن والبنت دلوقتي غير البنت زمان والرجل دلوقتي غير الرجل زمان

وبعد الزواج عدد ضحايا الاختيار الغلط كبير اخطرهم الاولاد اللي غالبا همه اللي بيدفعوا التمن
اهو الاب بيتزوج والام بتتزوج واللي بيحتار بين الاتنين همه الاولاد فقط