ختامه مسك

تحديث ونداء
عمرو البوست ده بوستك ياريت ترد معايا وخصوصا علي الرجال المعترضين
اوك :)

الحقيقه ياجماعه البوست ده اخدته كده كله من عند عمرو بدر(حبشتكنات فلسفيه) هونشره زمان وهوبوست لطيف جدا حبيت اختم بيه السلسله دي معلش ياعمرو اعتقد ان ده اقتباس قانوني :)

نشوف البوست كده

(الواد مايكل ويب ده كاتب أمريكانى أشتهر بالصدفه هناك بكتاباته اللى بيعالج فيها العلاقه العاطفيه بين الرجل و المرأه من واقع خبرته اللى واضح منها أنه واد مخربش و لافف و داير .. و من هنا جات نصايحه الثمينه للرجال فى كيفية الاٍستيلاء و غزو قلوب الجنس الناعم اللى هما نص الدنيا و سكرها و بهائها بغير شك ..
الواد مايكل أتكلم كتير عن الأساليب اللى بتحبها المرأه و اللى تخليها ما تستحملش غلوتين و تستسلم لحبيبها و تقوله : حبك بيفرحنى فرح الطير بطيرانه , حبك مش فاكر أيه بأغصانه ..

تعالوا كده نبص بصه فى الحيل المكاره اللى كتبها الواد مايكل و اللى أنا ترجمتها مع اٍستبعاد طبعا ما لا يتناسب مع أخلاقيتنا كشرقيين و مع ما لا يجوز ذكره فى دنيا المدونات الشريف العفيف حتى لا نخدش حياء القراء ..
بصوا كده :

*- الحيله الأولى : لو حبيبتك مسافره كام يوم كده قولها أنك قلقان عليها و حتبعت معاها بودى جارد من عندك علشان ياخد باله منها و روح مديها دبدوبه صغنونه شكلها رقيق !!

*- الحيله التانيه : ألزق على السقف فوق السرير نجوم من اللى بتلمع فى الضلمه و أكتب لزوجتك رساله بالنجوم دى زى مثلا : بأحبك يا زوجتى فلانه .. علشان لما تبقى الدنيا ضلمه تقراها و تعرف أنك بتحبها .. (يا عينى ياض يا مايكل حلوه دى خاصة أن النور بينقطع كتير)

*- الحيله التالته : أختار مناسبه حلوه كده و أشترى لحبيبتك 11 ورده حمرا و حط وسطهم ورده بلاستيك حمرا برضو و أكتب لها كارت قول فيه : يا نور عينيا حأفضل أحبك لحد ما تدبل آخر ورده !! (اللى هى البلاستيك يعنى اللى عمرها ما حتدبل :) )

*- الحيله الرابعه : أعمل لحبيبتك موقع على الأنترنت أو حتى أعمل بلوج بأسمها و أسألها يا ترى يا هلترى يا فلانه يا حبيبتى عمرك عملتى سيرش على اٍسمك ؟ و لما تدور و تلاقى الموقع بتاعها حتلاقيك حاطط لها كلام حلو كده و صور ليك و ليها تقوم على طول تسورء من المفاجأه و تقولك بأحبك يا سيدى يا تاج راسى ..

*- الحيله الخامسه : أشترى لها مرايه من اللى بتتمسك فى الاٍيد و معاها كارت صغنون و أكتب فيه : بصى فى المرايه دى يا قلبى و أنتى حتشوفى أجمل بنت فى الدنيا .. (أشجينا يا عم مايكل أشجينا و النعمه غلبتنى)

*- الحيله السادسه : فاجىء مراتك و لا خطيبتك و لا
و أبعت لها بوكيه ورد حلو كده و شيك بس ما يكونش كبير على مكان شغلها و من غير ما يكون فيه مناسبه معينه .. كده بقى هى حتفرح بيك و كمان حتفرح أنها بقت محط أنظار زمايلها ..

*- الحيله السابعه : و أنت بتتمشى كده و أيدك فى أيد المدام وطى و ألقط زلطه ناعمه و شكلها حلو و قول لها بصوت حنين : أنا يا حبيبتى يا أم عيالى حأحتفظ بالزلطه دى لامؤاخذه كذكرى لليوم الجميل ده .. و بعدها بكام يوم أديهالها كهديه بعد ما تكون خليت جواهرجى يحفر لك عليها : بأحبك يا فلانه و أعملها فريم دهب و عليقه علشان تنفع تتعلق فى سلسلتها ..
*- الحيله التامنه : لو حبيبتك أضطرت ترجع من الشغل متأخره و طول النهار طفحاه و راجعه تعبانه ألحقها بصندوق صغنون شيك كده و حط جواه حاجات لذيذه زى مثلا شيكولاتيه .. كيكه .. علبة عصير .. يعنى حاجات من اللى بتحبها و أربط العلبه بشريطه حمرا و فيونكه شيك و أكتب على الصندوق مثلا : علبة فلان لاٍغاثة حبيبته ..

*- الحيله التاسعه : مرجح المدام .. هى كده .. قصده لما تبقوا ماشيين فى مكان فيه مراجيح لا تتردد عزيزى الزوج أنك تاخد المدام و تقعدها لامؤاخذه على المرجيحه و تفضل تمرجح فيها بغض النظر عن ضهرك المقطوم و لا فقرتك القطنيه اللى بتنقح عليك علشان ترجعها تانى لذكريات الطفوله فتقوم تحبك أكتر .. (أكيد الحيله دى ما تنفعش يوم الجمعه)

*- الحيله العاشره : لو المدام شغلها بالليل و بترجع متأخره و أنت قاعد فى البيت مع العيال اٍحرص أنها لما ترجع تكون نيمتهم و محضر لها البانيو بميه دافيه و حاطط فيه معطر من أبو 31 جنيه الاٍزازه و كمان اٍزازة زيت للمساج و أنتوا
عارفين بقى الباقى .. (الواد مايكل ده بلوى بجد)

*-الحيله ال 11 : حضر سي دي
عليه موسيقى من اللى كنتم بترقصوا عليها أيام الخطوبه و خد المدام فى رحله بالسياره لمكان بعيد و قولها تحبى ترقصى يا حبيبتى ؟ حتقولك آه يا حبيبى .. تروح مشغل السي دي
و مديها واحده من السماعات فى ودنها و التانيه فى ودنك و تفاجئها بالمزيكا اللى ليها عندكم ذكريات حلوه و تمسك أيدها و على وشك نظرة هيمان (بس لا تنشغل بغير الطريق أكتر من كده)

*- الحيله ال 12 : لو حبيبتك عندها قطه أو لا مؤاخذه كلب ما تنساش تشترى هديه لحيوانتها اللى بتحبها تقوم تعرف أن أنت حنين عليها و على كمان حيوانتها فتحبك أكتر .. (قالك زمان لأجل الورد ينسقى العليق)

*- الحيله ال 13 : و أنتم على شط البحر اْرسم على الرمل المبلول بالميه قلب كبييير و أقعد جواه أنت و المدام و أتفرجوا على منظر الغروب و أنت أيدك فى أيدها و فى حالة صمت و تأمل و يا حبذا لو حطيت راسها على كتفك .. (يا مسهل يمكن تيجى بفايده مين عارف؟)

*- الحيله ال 14 : لما تبقى المدام خارجه رايحه الشغل الصبح و أنت لامؤاخذه قاعد فى البيت حطه يا بطه لأى سبب يعنى ودعها على الباب و بوسها على جبهتها باى باى .. و قبل ما تركب عربيتها تكون بعت لها رساله على الموبابل بتقولها : وحشتينى يا نور عينيا ! و لما توصل شغلها تلاقى منك اٍيميل فيه نفس الكلمتين دول .. نروح هى مبتسمه و فاكراك على طول و تفضل فرحانه بيك طول النهار لحد ما ترجع البيت ..

*- الحيله ال 15 : لو المدام شعرها طويل اٍعرض عليها أنك تسرحهولها و لو مش بتعرف حاول تتعلم و خد وقتك الكافى لهذه المهمه لأنها حتحس قد أيه أنت رقيق و بتحبها .. (الواد مايكل ده واد آخر بهججه)

*- الحيله ال 16 : أبعت لها شريط كاسيت متسجل عليه موسيقى فيلم مهمه مستحيله بتاع الواد توم كروز و بعد الموسيقى سجل لها بصوتك : دى مهمتك يا فلانه لاٍنقاذ شاب وسيم بيحبك موت و لابس كذا و كذا و قاعد مستنيكى فى المكان الفلانى الساعه كذا و الشريط ده حيدمر نفسه بعد 10 ثوانى و تروح مسجل 10 بيبات من الستوب واتش و بعدين بصوتك تقول لها : أنتى صدقتى يا حبيبتى ؟؟ هىء هىء طيب أنا مستنيكى فى الميعاد و بأعد الثوانى .. (أنا شايل المراره يا أخوانا على فكره و ربنا يستر على اللى فاضل)

*- الحيله ال 17 : أسأل أهل خطيبتك من وراها هل كان فيه حاجه هى عاوزاها و هى طفله و ما حدش جابهالها ؟ عروسه معينه مثلا .. لعبه .. حاجه كده يعنى و لما تعرفها فاجئها بيها كهديه لطيفه فتقوم تعرف أنك مهتم بيها و بتنبش فى ماضيها .. (بس بلاش تنبش فى ماضيها أوى يعنى لحسن تكعبل فى حاجه تكون سبب فى فسخ الخطوبه)

*- الحيله ال 18 : عند مصوراتى شيك أعمل صوره متركبه ليك و ليها – صوره عاديه يعنى – و حطها فى برواز شيك و خبيها فى دولابها مثلا و خليها تلاقيها بالصدفه و أتفرج بقى على فرحتها و دهشتها فى نفس الوقت ..

*- الحيله ال19 : ما تنفعش أبدا أبدا أنى أقولها علشان ما تباتوش فى التخشيبه ..

*- الحيله ال 20 : الحيله دى حلوه أوى .. أنزل أنت و المدام و أشترى لها شجره صغيره من أى مشتل و دور على مكان مناسب و أزرعوها أنتم الأتنين و كل سنه فى نفس الميعاد خدها و روحوا أتفرجوا عليها و قول لها بصوت هامس كده و عينيك كلها حنيه : شجرة حبنا يا حبيبتى بتكبر يوم ورا يوم زى ما حبنا بيكبر برضو يوم بعد يوم .. (بس على الله تلاقوا الشجره أصلا و ما تكونش أتسرقت زى ما حصل معايا)

*- الحيله ال 21 : لو أنت بتستحمى الأول و قبل ما تخرج من الحمام أعمل شبورة بخار و أكتب لها على المرايه : حمام الهنا يا روحى فلان بيحبك و تروح راسم قلب و كمان ممكن تعمل ده على اٍزاز العربيه لو الدنيا برد ..

*- الحيله ال 22 : شوية شمع ملون كده حوالين البانيو .. و موسيقى هاديه .. و علبة شيكولاته و كلمتين حلوين كده من بتوع حبيبى دائما .... و بس

*- الحيله ال 23 : لما تبقى الدنيا بتمطر خد حبيبتك و أنزلوا أتمشوا فى الشارع تحت المطر من غير لا شماسى و لا حاجه و أعمل نفسك كأنك بتغطيها و بتحميها من المطر و لما ترجعوا البيت نشف لها شعرها و قول لها أنك ما حسيتش لا بالمطر و لا بالبرد لأنك قلبك دافى من حبها .. (غالبا الحيله دى حتخلص على اٍلتهاب رئوى فخد بالك يعنى)

*- الحيله ال 24 : بعد المدام ما تخلص مذاكرة العيال و هرتك البيت و تلاقيها قاعده كده على كرسى شبه محطمه تعالى من وراها و أعمل لها مساج فى كتافها و رقبتها و قولها بصوت هامس فى ودنها : كلنا بنحبك و ربنا يخليكى لينا و أنت شغال مساج فى كتافها برضو .. تقوم هى بالشويتين دول تنسى التعب بتاع اليوم و تقول لك : و يخليك يا حبيبى يا أبو عيالى ..

*- الحيله ال 25 : من غير مناسبه كده تحط لها ورقه صغيره فى مكان ظاهر فى البيت قبل ما تروح شغلك و تكتب لها : حبيبتى فلانه و أنتى جنبى كل أيامى أعياد حب .. متشكر ليكى أنك فى حياتى .. (قديمه ياض يا مايكل)

*- الحيله ال 26 : لو المدام عيانه – بعد الشر يعنى – خد لك يوم أجازه و أقعد معاها فى البيت و فضى نفسك ليها خالص فى اليوم ده .. و أظهر لها اٍهتمامك بيها من غير مبالغه منك يعنى مثلا تعمل لها شوية شوربة لسان عصفور و لا شوربة خضار أو كوبايتين عصير فريش .. و تدفيها بالبطاطين كويس و كل ساعتين كده تقيس لها الحراره و تديلها الدوا بأيدك فى مواعيده و تطبطب عليها بحنيه و تقول لها سلامتك يا حبيبتى اٍن شاء الله حاتصحى و تبقى كويسه ..

*- الحيله ال 27 : حاول تعرف منها كده أيه الحاجات اللى كانت بتتمنى أنها تعملها قبل ما ترتبط بيك عاطفيا و تحاول تحققها لها .. مثلا حتقولك : كان نفسى أركب طياره ! بسيطه أحجز تذكرتين طياره لأسكندريه و فاجئها بيهم فى يوم غير متوقع فيه السفر .. حتقولك مثلا : كانت عندى رغبه قويه أنى أتعشى فى مكان شعبى بجد مش ديكور ! برضو بسيطه خدها فى مره مثلا عشيها عند بحه فى الناصريه أو عند زيزو المنتن فى الجماليه و هى تتوب عن أكل الحوارى طول عمرها .. ممكن برضو تقولك : طول عمرى يا محسن نفسى أتجوز شاب وسيم و غنى و ذكى ! فى الحاله دى بقى تروح قالب سحنتك على سحنة محمود المليجى و تقول لها : موش أنا اللى تقصديه بالتأكيد يا حبيبتى روحى دورى عليه بعيد عنى يا مجرمه !! و تبقى كده خلاص أرتحت من همها و دلعها ..-

*- الحيله ال28 : أملا شنطة العربيه بلالين متعبيه هليوم من اللى بتطير دى و خدها على مكان عالى زى المقطم مثلا و أنزلوا من العربيه و كأنكم بتتفرجوا على المنظر من فوق و بعدين أديها المفتاح و قول لها : اٍلهى لا يسيئك يا حبيبتى ناولينى الجاكت من شنطة العربيه لحسن البرد بهدل عضمى .. فتروح فاتحه الشنطه تلاقى البلالين طارت فى السما و تكون حاطط ورقه كبيره فى الشنطه كاتب عليها : على قد البالونات دى ما تعلا يا حبيبتى فلانه على قد ما بأحبك .. (مش بطاله الفكره دى)
*- الحيله ال29 : لما بتبقى بتتعشوا فى مطعم خد حاجه من اللى فىطبقك بالشوكه و أكلها لها بأيدك و قول لها : دوقى دى يا حبيبتى من أيدى .. فتروح هى كمان عامله كده .. و هكذا تبقوا بتتشاركوا فى الأكل و ده حيقرب بينكم أكتر ..

*- الحيله ال 30: دايما جاملها و أتكلم عنها كويس و أشكر فى أكلها قدام أصحابكم و اٍياك ثم اٍياك عزيزى المحب أن تعيب أو تتريق على أى شىء بتعمله أو بتطبخه بالذات لما يبقى صابح تانى يوم أجازه و ألا حيبقى ذنبك على جنبك ..

*- الحيله ال 31: على الزوج أن يختار يوم خميس و يسرب العيال عند مامته أو حد من القرايب و يعمل جو حلو كده علشان المدام تحس أنها فاضيه ليه كلية و هو كمان فاضى لها .. و على ضوء الشموع يتعشوا و فى وسط الكلام يمسك أيدها ويقول لها بحب : فاكره يا حبيبتى أول مره أتقابلنا ؟ أنا مش ممكن أنسى اليوم ده أبدا .. حتروح مبتسمه بحب و بخجل و حاتقول : و ده يوم يتنسى يا حبيبى .. (لا ينصح بذلك لو كانت أول مقابله تمت فى وسيلة مواصلات أو فى طابور العيش)

*- الحيله ال 32: أشترى عزيزى الزوج مخدتين محشيين بالريش و أعمل فتحه فى كل مخده و أفتعل مع المدام خناقه على سبب هايف و أضربها بالمخده كده ضربة دلع يعنى تروح هى كمان مستعمله المخده فى الخناقه و تلاقوا الريش ملا المكان و بيطير من حواليكم فتروحوا ضاحكين و الباقى بقى كل واحد و شطارته ..

أيه رأيكم ؟ دول شويه من الأفكار الرومانسيه ال 101 اللى أوردهم الواد مايكل ويب فى نصايحه للرجال لغزو قلب مراته أو خطيبته أو...... ..

تفتكروا النصايح دى تنفع عندنا ؟؟ يعنى الكلام ده ياكل معانا و لا الحاجات دى ليها ناسها اللى يكون بالهم رايق و جيبهم عمران و بكره بتاعهم متأمن و تمام التمام ؟؟

صراحه أنا شايف أن بعضها عادى يعنى و عمايله سهله و مش حتكلف غير شوية محبه صافيه و اٍهتمام من الرجل حيكون مردوده مدهش على مشاعر أنثاه .. وفقنا الله و اٍياكم لما فيه خير الوطن و زيادة أعداد المواليد و أدينا بنعمل اللى علينا و الباقى على الله و عليكن .. و السلام عليكم و رحمة الله .... (تصفيق
حاد )

*بجد ياجماعه مش خير ختام:)*

daret elayam Music Upload