الجمعة، 15 أكتوبر 2010

عبرنا الهزيمة يا مصر ياعظيمة 2

قبل ما ابتدي البوست عايزة اوضح معلومة انا مش بكتب تاريخ

انا بحكي عن خواطري عن فترة عيشتها فعلا ممكن يكون تفاعلي مع الاحداث غير اي حد ثاني لكن يبقا الحدث واقع وتاريخ لا يمكن تغييره

اتكلمت عن الهزيمة اللي سميت نكسه فيما بعد علي غرار تحريك الاسعار وتاني يوم الاسعار ترتفع وتولع نار

:)

البلد حزين كل بيت كل اسره كل شارع فيه ياشهيد يامفقود ياجريح

واصلا الشعب كله جريح مصدوم مافيش طعم لأي شئ والهم والانكسار رامي ظله علي كل شئ الناس الشارع الفن الثقافة

ده غير ان كل شئ في البلد كان موجهه للجيش سنوات من شد الحزام

وخصوصا في المواد التموينية

ومن الاغاني اللي لسه عالقة في زهني لليوم مدد مدد شدي حيلك يا بلد لمحمد نوح

ويا بيوت السويس لمحمد حمام والدرس انتهي لشاديه كلمات صلاح جاهين اللي غنتها لأطفال بحر البقر الشهداء ومش هننسي شهداء مصنع ابو زعبل

26547

( بعض انقاد مصنع ابو زعبل والشهداء)

ومدرسة بحر البقر وغيرهم من شهداء الغارات الاسرائيليه الجبانة علي المدنيين

index

فاكره كويس ازاي كانوا بيحذرونا ما ناخدش اي شئ لامع من الارض او شئ علي شكل قلم او لعبه عشان ده لغم

كما تم تدريب الكثير من الشباب علي الدفاع المدني والفتيات علي التمريض

وكان لازم يرجع للناس وللجيش ثقتهم بنفسهم وبقوتهم من الاحباط والهزة النفسيه

وبعد وقف النار10يونيو ابتدأت حرب الاستنزاف اللي مهدت تمهيد قوي للنصر في اكتوبر

وعندما قرأت الان عن هذه الحرب اللتي بهرتني عرفت معني حديث الرسول ان المصريين خير اجناد الارض

مافيش 3 اسابيع من قرار وقف اطلاق النار وعزفت قوات الصاعقه المصريه لحن جميل في راس العش موقعه لقنوا فيها اسرائيل كده درس علي خفيف الناس الاول كانت فاهمه انه كدب زي بيانات 67 وكانت بداية رفع الروح المعنوية للجيش

فغع

(ابطال راس العش)

و مع الوقت رجعت الثقة وخصوصا ان مافيش اسبوعين من راس العش ونسور الجو المصريين اللي انضربت طيارتهم علي الارض اخذوا جزء من تارهم وعرف العدو انهم نسور وملوك الجو علي حق

قاموا بسلسلة من الهجمات ضد التشكيلات المدرعة للعدو شرق قناة السويس

index

و لسه فرحانين باللي حصل من رجال الصاعقه ونسور الجو إلا و البحريه المصريه تسجل للتاريخ اول استخدام للصواريخ في المعارك البحريه بزوارق الطوربيد لتغرق المدمره ايلات امام سواحل بور سعيد وتدرس هذه المعركة في مراكز الدراسات ألاستراتيجيه في العالم

indexindex

وهناك العديد من البطولات ايضا كانت تحكي في كل بيت مش بس في الاعلام

كل جندي راجع اجازة بيحكي عن بطولة عملها هو وفرقته وطبعا تناقلت هذه الحكايات من كل بيت لكل بيت

وابتدأت الروح المعنوية للجميع ترتفع ومستنين الليله الكبيرة ومش فاهمين هي ليه اتاخرت ده كله

وافتكر ان قامت مظاهرات تطالب السادات بالحرب ومن خبث الرجل قال احارب ازاي وقال شواية اسباب واهية

وقامت المظاهرات والدنيا ولعة

والرجل مصمم علي كلامه انه مش هيحارب

واتضح بعد كده انه كان بيموه رحم الله كل شهداء الوطن الشرفاء

وللحديث بقيه عن النصر

هناك 44 تعليقًا:

Sweet Violet يقول...

اوووول تعليق
حجز لحد مانرجع
:)

شمس النهار يقول...

:))
بتجيبلنا الكلام ياشيكو
دلوقتي اخونا ازهري

يطلع يقول لك كوسه
:))

يعني مسافر وماعهوش كمبيوتر وعايز يكون اول تعليق

:))

Haytham Alsayes يقول...

انا بقي من جيل الاستسلام والتطبيع
والله خواطرك جميلة وياريت كلنا نحس بشعور الانتصار
كفاية هزيمة نفسية
بس ياريت تقولي ان بعد الانتصار
بدأت اسرائيل تبث روح الهزيمة في الشعب المصري واكيد نجحت

بس عندى امل ان مصر اكيد هترجع تاني
استحالة يبقي الوضع كما هو عليه

تحياتي لكي

غير معرف يقول...

حلو اوي البوستات دي

بس باين انها من وجهه نظرك

اللي مش باين بصراحه انك ممكن تكوني عاصرتي الحاجات دي .... اكيد بتضحكي علينا :)

تحياتي

adel يقول...

الريدر ضحك عليا وبعتلي البوست متاخر

علي فكرة الكلام حلو قوي قوي
بس الاحلي ان الواحد واثق من الكلام و حاسس بنفس الاحاسيس من الكلام
مش هنقراه من كتب نصه مزور و بيجامل
:)

أندروميدا يقول...

يقول المولى تبارك و تعالى : ( من المؤمنين رجال صدقوا ما عاهدوا الله عليه فمنهم من قضى نحبه و منهم من ينتظر و ما بدّلوا تبديلاً ليجزي الله الصادقين بصدقهم ويعذّب المنافقين إن شاء أو يتوب عليهم إنّ الله كان غفوراً رحيماً )

ويقول المصطفي (ص) .." من سأل الله الشهادة بصدق بلغه الله منازل الشهداء و إن مات على فراشه" ( رواه مسلم).

فتحية الي ابطالنا الشجعان ... وسلاما علي الشهداء منهم ... فهم احياء عند ربهم يرزقون .

ونسال الله ان يجمعنا بهم علي خير

تحياتي لقلمك الرقيق

فشكووول يقول...

السلام عليكم شمس هانم
تحياتى
يا هانم انا فاكر كويس ايام النكسه كنت فى االاعداديه وكانت البلد ايام نكسة 67 وانا كمان كنت فى نكسه موازيه كنت جايب كعكه فى الاعداديه فى مادة الجبر لكن كان ممكن الواحد ينجح بكعكه
وبما ان انا من الفلاحين وعشان اروحك المدرسه كان لازم اركب الحلزونه واعدى على بحور وجبال وبلاد تركب الافيال عشان اروح لمدرسة المركز ... مازلت فاكر كل حاجه كأنها من اسبوع او شهر
كنت اركب الاتوبيس والناس هس ولا كلمه ولا حد يقدر يبص فى عين حد وكنا نجيب الراديو بالليل ونسمع الاذاعه الاسرائيليه وكانت بتقول يا مصريين عبد الناصر بيضحك عليكم .. كل بلد كان فيها 4 او 5 مآتم مع بعض .. كان الاسوب اللباس السائد فى هذه الايام وكل يومين او تلاته عربية جيش تيجى عند الجبانه بتاعة بلدنا جايبين شهيد عشان يففنوه فى مسقط رأسه والـ 21 طلقه على قبره .. واللباس العسكرى اللى كان يشرف مديريه كان ماده للتريقه.
الادهى من كدا ان جات لمصر فرصه ذهبيه لم تقتنصها .. وهى تنحى جمال عبد الناصر .. وبصرف النظر عن انى كنت معه او ضده لكن كان لازم تستغل هذه الفرصه فى اعطاء شرعيه جديده ومبدأ جديد للوطن .. لكن انا وكنت زى ما قلت فى الاعداديه ويا دوب رايح اولى ثانوى ... ازاى تتنحى يا ريس .. احنا من غيرك يتامى يا ريس .. ومنظمة الشباب الاشتراكى عامله عمايلها .. باختصار اعطينا للمهزوم جائزه بدلا من ان يحاكم او على الاقل نسأل ايه اللى حصل .. المشكله اننا كنا فاهمين انها نكسه ... ما كناش نعرف مقدار المشكله التى وقعنا فيها.. وابتدينا نفوق وابتدينا نفهم ونعرف ونستوعب واول مره نرفع راسنا كانت بعد معركة رأس العش ( شوية عساكر وصف وضباط باسلحه خفيفه يتصدون لدبابات ومدرعات وطائرات ..طبعا اللى ما دخلش الجيس مش يعرف يعنى ايه معنى الحكايه دى

فشكووول يقول...

المدمره ايلات
سقوط الطائرات الاسرائيليه على شط القنال كما الغربان
- حرب الاستنزاف التى لم يعرف تاريخها حتى الآن ولم يزاح الستار عن كل اسرارها
- روح المصريين التى ارتفعت معنوياتهم الى السماء
وبعديــــــــــن
200 طياره تعدى قنال السويس فى اتجاه الشرق
2000 مدفع شغالين الله ينور واعداد كبيره من المدفعيه الصاروخيه - حشود كبيره من البشر تعبر قنال السويس فى جرأه وشجاعه مع ان الموت كان فى كل شبر خلف وامام وفوق وتحت كل جندى ومع ذلك بيعبروا وصحيح كان المدد من الله وكانت البلد شدت حيلها

فشكووول يقول...

عارفه يا هانم
مشكلة اسرائيل مع مصر ... هى مش فى قوى مصر ولا فى جيش مصر .. مشكلتهم معانا ان ما لناش امان .. مهما كنا ضعفاء ما حدش عارف ممكن نعمل ايه ... العقل المصرى المتشبع بآلاف السنين من الحضاره لا احد يتوقع رد فعله .. صحيح احنا اللى دهنا الهوا دوكوا واحنا اللى عبينا الشمس فى قزايز .. دا لما نحب ننصب على بعض
لكن لما نحب نشتغل بحد فنحن بناة الاهرامات كفونا مصر الكلام عند التحدى .. نحن تاج العلاء فى مطلع الشرق ودراته فرائط عقدى .. انا فى اتجاه الغرور تانى
كفايه احسن اتغر اكتر من كدا لان الغرور بدأ يركبنى

تحياتى يا حاجه

الازهرى يقول...

أقول إيه بس ؟
كوووووووووووووووووووووووووسة
وكمان نوووووووووم
يعنىأنا على المدونة عندى 24 ساعة وتقولوا على مسافر
ولو اختفيت يومين هتقولوا إيه بس
مات ؟
حسبنا الله ونعم الوكيل فى اللى بالى كلهم


ما بعد النكسة هى فترة من أثرى فترات التاريخ المصرى
وعلى فكرة الضربات المصرية بدأت قبل التلات أسابيع دول بكتير
فى كتاب عبده مباشر عن أسد الصاعقة إبراهيم الرفاعى والمجموعة 39 قتال تلاقى إنه قدر يقوم بضربات فورية أثناء انسحاب قواتناساهمت وكانت من الأسباب المباشرة فى منع تطويق قواتنا المنسحبة وكانت هتكون مدبحة
وككمان كان فى معارك أثنا الإنسحاب وقله وبعده داخل عمق سيناء لم يكتب لها سعة الإنتشار وطبعا دا بفضل مجهود إعلامنا الرائع
يعنى الشاذلى وطريقة انسحابة وخسارته 10 % بس من إجمالى قواته واللى كان يعتبر معجزة وسط الهرجلة اللى كانت حاصلة وقتها وكان تفكيره حكيم جدا
وكمان الفرقة اللى كانت فى رفح وقدرت تعبر الحدود وتدخل غزة ودى كتب عنها أنيس منصور وكمان السباعى الله يرحمه صحيح لفرقة دى أبيدت لما الطيران خلص على مصر من جوة ورجع لها وهى من غير حماية جوية بس كفاية وقفتها الصلبة ودحرها للهجوم البرى على مواقعها وكان فى ذهول عام من القيادة الإسرائيلية مع معرفتها بحجم تسليح وتعيينات الفرقة اللى كان أقل بكتير منحجم نيرانها وكفاءتها القتالية والكلام ده مكتوب فى كتبهم مش كتبنا لا سمح الله

وكمان لسان التمساح كان فى 3 مواقع حصينة استغرق وقوعهم فى إيد الإسرائيليين شهور وفى النهاية لقوا 20 عسكرى وتعيينات تقول إن اللى كانوا ببيدافعوا مش بشر لإنه لا يكفى أكل ولا شرب ولا ذخيرة ونفس المواقع دى وقعت فى إيدينا فى 73 فى 48 ساعة بس

والتاريخ يشهد بس مين يعتبر

وداد يقول...

موضوع جميل جدا

ما شاء الله عليكي

مميزة بالتعبير وكتابة ما بداخلك

تشرفت بوجودي بمدونتك

غير معرف يقول...

شكرا جدا

ghada mOhsen يقول...

رااااااائع البوست ده

بجد تسلميلنا يارب

خواطر أنعشتني ومتعتني

ويارب يكتبلنا النصر أكتر من الخسارة

فأيام النصر طعمها حلو أوووي

^_^

mrmr يقول...

خواطرك وذكرياتك لها كل تقدير

Foxology يقول...

مبسووط جداااا من التدوينات دى خصوصا انها سرد بسيط جدااا لحداث عظيمة أثرت كتير فى تاريخنا

اتمنى ان الاعلام ينبه بحاجات زى دى لكن طبعا امنيتى بالصعود للمريخ اسهل :)

تحياتى وفى انتظار القادم

سواح في ملك اللــــــــــــــــــه- يقول...

حلو الكلام

كلمات من نور يقول...

جيلنا أحلى جيل والله رغم انه جمع بين نكسة ونصر .الجيل الجديد مع الأسف جيل تراجع واستسلام ..جيل خذلوه الكثيرون ويفكر معظمه في الهرب ....ربي يهدي أبنائنا وبناتنا ويوفقهم لما يحب ويرضى


منورة نور أعلى من نور أي موقع تاني (:

شمس النهار يقول...

* Haytham Alsayes

مين اللي استسلم وطبع

لا في استسلام ولاتطبيع

صدقني

بالظبط احنا عندنا هزيمه نفسيه
وثقتنا بنفسنا راحت
ومابقاش في قدوة صالحه

سيبنا نفسنا نستعمر بتيارات فكريه دخيله
حتي شببنا الغلبهم مسخ من كل شئ

عارف بقا انا مين مديني الامل اللي انت بتتكلم عليه ده

انت ياهيثم وكل الشباب الواعي المثقف الوطني
اللي لم يستعمر نفسيا ولا ثقافيا

ربنا يكرمك وانتو اللي تقدروا تغيروا للأحسن

:)

شمس النهار يقول...

* فتاه من الصعيد

:)

شكرا علي كلامك اللطيف

لا الحمد لله عاصرتها وكنت شاهد عليها

من كرم ربنا عليا بصراحه

:)

شمس النهار يقول...

* adel

:)))

حتي الريدر كمان
هو مابقاش في حاجه عدله في البلد دي ولا ايه

:))

كلامك صح ياعادل
اغلب الكتب عن المواضيع دي فيها كلام كتير متفبرك
واللي يحس بيه الناس اللي كانت موجوده

بيبقا في اهداف من ده
لكن الناس اللي حضرت زي حلاتي بيحكوا حصل ايه

:)

SHAPE YOUR LIFE (ABOALI) يقول...

جميل احساس الكلمات وروحها
على الرغم من حالة الانكسار والشعور بالانتكاس
الا ان هناك من كانوا يكتبون كلمات فى سطور تسرى عن الشعب وتحاول ان تخرجه من احزانه وتدعوه للصبر ثقة فى نصر الله لهم
لذا اشارتك لبعض الاغانى واعتبارها كسلاح خفى مهمة جدا
فاءن لم تشبع البطون كانت هناك الكلمة تواسى وتدعو للصبر والتحلى بالحلم
لذا يجب ان يكون عندنا وعى ان ما نكتبه
يمكن ان يكون له تاءثير عميق فى نفوس منا يقرء او يسمع

لذا التحرى فى كتابة ما يفيد مطلوب ودور الكلمة مثل دور السلاح

رفع الحالة المعنوية ايضا من خلال التجارب الفعليه التى تعيد مرة ثانية الجندى الى محراب حب وطنه وزيادة اليقين
ان النصر قادم كان مهم

واشارتى اليه فيه اغراق المدمرة والطلعات الجوية وهكذا

التجربة التى تكتبيها هنا مهمة جدا فى اعادة رسم ملامح نضال شعب ان تم اتاحة الامكانيات له

كان من البواسل دائما

ادعو الله ان يكتب لك بما تسطريه حسنات وهبات من الخير

ومنتظرين التفاعلات القادمة

تقديرى

شمس النهار يقول...

* اندروميدا

شكرا علي التعليق الجميل

والكلمات اللطيفه

:)

شمس النهار يقول...

**فشكووول

لا اجد رد علي تعليقك الجميل

غير ان لازم حضرتك تكتب عن الهزيمه والنصر ومابينهما

يعني تحكي لنا مذكراتك في الفتره دي
وخصوصا ان حضرتك كنت في سن 14 عشر

يعني فاكر ايام النكسه كويس
ياريت تحكي للشباب

شكرا علي تعليق حضرتك

شمس النهار يقول...

* الازهرى

يابني بعد الشر عليك

ربنا يحميك

علي فكره انا بتكلم عن حرب الاستنزاف اللي كانت بعد وقرار وقف اطلاق النار
كل ماتم قبل القرار يعتبر من وقائع الحرب نفسها
مش من حرب الاستنزاف

وعلي فكره حرب 67 وايامها السودا ماكنتش تخلوا من بطولات

لكن انا بتكلم هن فترة حرب الاستنزاف
ومش بكتب تاريخ بكتب اللي انا سمعته وشوفته بعقليتي وقتها

وبنبسط اوي بالتعليقات اللي بتحكي عن مااكتب عنه
بحس ان في تفاعل بناء وجيد

:)

شمس النهار يقول...

* وداد

شكرا للمرور

:)

شمس النهار يقول...

* يوميات شحات

الشكر لله

:)

شمس النهار يقول...

* ghada mOhsen

شكرا علي تعليقك اللطيف

ومتابعتك

ومكملين لحد النصر ان شاء الله

:))

شمس النهار يقول...

* mrmr

شكرا علي كلامك ياجميلة

نورتي

:)

شمس النهار يقول...

* Foxology

شكرا علي كلامك المشجع

اما الاعلام حدث ولاحرج

الناس اللي اشتركوا بيموتوا وماحدش لم قصصهم وبطولاتهم

حتي الاطفال اللي اتربوا بعد ابوهم مااستشهد والان كبروا ونجحوا ماحدش حاول يلقي عليهم الضوء حتي

ولا ارامل الشهداء

همه فالحين في الكليبات البايخه وبس
:)

شمس النهار يقول...

* سواح في ملك الله-

شكرا علي المرور

:)

شمس النهار يقول...

*كلمات من نور

شكرا علي مجاملتك اللطيفه

النور نورك ياجميلة

الجيل الحالي كبر مالاقاش قدوه
كله بيتخانق

كله عنف

كرتون وافلام عنف اتنقل للشارع
وافلام اغلبها حريمه والباقي معروف

برامج كلها عراك الديوك شربوهم انهم مايعرفوش لايسمعو ولا يتكلموا
ولا يحترموا الراي والراي الاخر

جيل اولي الامر خزلوهم

واللي بيتعمل في البيت من تربيه وتوجيه بيبوظ بره البيت

:)نورتيني

شمس النهار يقول...

* SHAPE YOUR LIFE (ABOALI)

شكرا علي تعليقك
بجد انا استمتعت واستفدت من اغلب التعليقات
اكتر من كتابتي للبوست

شكرا علي تشجيعك

وشكرا للدعاء

:)

غير معرف يقول...

عايز اقرا بتمعن بس للأسف مش لاقي وقت

بس اعتقد انك بتتكلمي عن اكتوبر 1993 مش كدا

ما تقوليش لأ
مش انتي عندك عشرين سنه

طيب خلاص يبئا 93

فشكووول يقول...

السلام عليكم
يا هانم انا كتبت السنه اللى فاتت عن اكتوبر وبعض المدونين اتريقوا على وعلى اكتوبر عشان كدا ما كتبتش السنه دى لان دا اصبح تاريخ والاولاد بيقرأوه بدون مشاعر لكن اللى عاش الفتره دى وفقد اقرباء واصحاب وندماء فى المعسكر هما اللى حاسين بيه .. لكن حكايات التاريخ لا تثير العواطف ولا تثير اى انفعال سواء ايجابى او سلبى لدى ابناء اليومين دول
تحياتى

Hadota ... حدوتة يقول...

والله انا كمان عجبنى الكلام اوى وحسيت بروح وطنية خالص

نسأل الله خيرا .. ان الروح دى تبقى ثقافة عندنا كلنا .. ومش بس تبقى احساس .. لا كمان تبقى واقع بنعيشه وبنطبقه .. متبقاش مجرد شعار بنردده او امنية نفسنا فيها

ودى الخطوة اللى لازم ناخدها .. نعمل كل حاجة واحنا حاسين اننا كبار ومنتصرين وعدينا حاجات صعبة ومسيرنا هنعدى الاصعب .. ونلغى من قاموسنا كلمات الاحباط وكل ما يمت له بصلة

:))

تحياتى سعدت بالمرور بمدونتك :))

الغاردينيا يقول...

ذكريات جميلة :)

وذكرياتنا انواع اجملها ذكريات الوطن

تحية عطرة حبيبتي

rack-yourminds يقول...

سيدتي اشعر في كلماتك بروح ونسمات وعبق هذا الزمن العظيم

لا تتخيلي قد ايه اعشق كل حديث عن جيل اكتوبر

جمعهم الله مع الصديقين والنبيين والشهداء

شمس النهار يقول...

* مصري جدا

ايوه يافندم عشرين بعد 31 علي طول
:)

شمس النهار يقول...

* فشكووول

وعليكم السلام
لقد قرات بوست حضرتك اكتوبر السنه الماضيه
وهو رائع

وان شاب واحد استفاد يبقا الحمد لله
ان ماكنش من شارك في الحرب يحكلنا مين هيحكي

ياريت حضرتك تحكلنا عن مشاركتك في الحرب
صدقني دي امانه
وبعد اذنك ساضع اللينك في البوست القادم

شمس النهار يقول...

* Hadota ... حدوتة
ياريت كل الشباب يتكلموا زيك
بس للأسف الشباب دلوقتي
اغلبه زهقان محبط

وعلي فكرة حتي اللي عنده كل حاجه برضوا زهقان ومحبط

عارفه ليه علشان مافيش هدف

:)

شمس النهار يقول...

* الغاردينيا

شكرا علي كلامك اللطيف

وان شاء الله مكملين مع بعض الباقي

:))

شمس النهار يقول...

* rack-yourminds

شكرا لك علي كلماتك الجميلة
فعلا كل من شارك في هذه الملحمة
تحس له شخصيه مختلفه

وكأن روح اكتوبر تلاحمت مع هذه الشخصيه

:)

ريحانه يقول...
أزال المؤلف هذا التعليق.
ريحانه يقول...
أزال المؤلف هذا التعليق.