الأربعاء، 1 ديسمبر 2010

ملاحظات علي البلوجر


بعد غياب عن البلوجر حوالي 3 اشهر
بسبب انشغالي وكذلك صدمتي
في بعض شخصيات البلوجر الذين يقولون مالايفعلون
وعلي المدونة شئ وفي الحقيقة شئ تاني
ونسيوا نظرية تستطيع ان تخدع الناس بعض والوقت ولاتستطيع ان تخدعهم طول الوقت!!!!!
ولما رجعت وبعد فتره من الرجوع ليه بعض الملحوظات :
******
ناس كتير من المدونين هجروا التدوين!!!
*
وناس كتير انضموا لأسرة التدوين وعملوا مدونات من اروع مايكون
وانضم مدونين صغار السن جدا بس ماشاء الله بيكتبوا جميل جدا
**
اغلب المدونين مش بيتناقشوا مع بعض في موضوع البوست كل واحد بيدخل يرمي تعليق ويجري
كنا الاول بنتابع ونتناقش مع بعض
يمكن علشان العدد كبر جدا الان
***
كان مدون او اتنين عاملين اشراف علي التعليقات علشان كان في حد بيدخل يتطاول عليهم
دلوقتي ماشاء الله الاغلبيه عاملة اشراف وبالتالي ده اثر علي النقاش
مع المدون صاحب المدونة
او المدونين المعلقين بينهم وبين بعض
****
اغلب المدونين بيدخل البلوجر ينزل بوست ويجري لا بيزور حد ولا بيتطلع علي اخبار باقي المدونات
******
اغلب المدونين هجروا التدوين وراحوا الفيس لسهولته عن البلوجر واحتفظوا بالمدونة يكتبوا فيها من وقت للتاني
صحيح الفيس اسهل واسرع ومتابع للحدث اول باول والتواصل اسرع
بس المدونات ارسخ واعمق من الفيس
******
البلوجر شكله وجوه اتغير بجد زعلت
بقا حالة زي حال اي حاجه في مصر
اعتقد انه فقد كتيير من بريقه
وفعل نظرية الغربال الجديد كان له شده
*********
كتير من المدونين فرحتلهم جدا
نشروا كتبهم سواء كانت اصلا تدوينات او مؤلفه مخصوص
وبعتبر دي فرحه للبلوجر كله
وبقول لهم كلهم مبرك
:)
دي ملاحظاتي علي البلوجر بعد فتره من العوده
:))

هناك 72 تعليقًا:

dr.lecter يقول...

اغلب الللي انت كاتباه بينطبق عليا

بس انا مبقاش ليا رغبه اعلق علي البوست بتاعي باسيب الناس تكتب اللي هي عايزاه وخلاص

شمس النهار يقول...

* dr.lecter

طيب ليه انت مابقاش عندك رغبه انك تعلق او ترد علي حد
؟؟؟

صيدلانيه طالعه نازله يقول...

اصباح الخير اولا

اعتقد ان حال البلوجرز بقى فعلا من حال المجتمع

مالوش طعم ولا لون

معظمنا فقد بريقه

اغلبنا اسلوبه فى الكتابه اتغير

كنا فى الاول بنناقش مشاكل مجتمعنا

دلوقت كل واحد مننا بقى عنده مشكله خاصه

قفل على نفسه وبقت المدونه وسيله التنفيس

عن نفسه فقط

الفيس بوك فعلا لسهوله التواصل والتفاعل

بس عن نفسى بحاول اتوازن بين الفيس بوك والمدونه

عشان تعبى اللى تعبته فى فرابه تلات سنين حرام يضيع

ياريت الكدب والزيف والخداع يختفوا من مجتمعنا التدوينى

لان بصراحه الحكايه هاصت اوى زادت عن حدها

شمس النهار يقول...

* صيدلانيه طالعه نازله

صباح النور

عارفه ليه حصل كده

علشان مش كل مايلمع ذهب

لما الحقيقه بتبان مش كل الناس بتقدر تستوعبها
في ناس بتتصدم فابتفضل انها تبعد
وفي ناس اتكشفت علي حقيقتها وبرضوا بعدوا لما اتكشفوا

وكانت النتيجه ان مدونين كتير من احسن وافضل المدونين هجروا التدوين بسبب اخرين مزيفين

واوافقك ان( ياريت الكدب والزيف والخداع يختفوا من مجتمعنا التدوينى

لان بصراحه الحكايه هاصت اوى زادت عن حدها)

بس للأسف ياصيدلانيه الناس دي متخفيه حلو اوي
وزي ماقلتي مش هنسيب مدونتنا علشانهم ونضيع تعبنا وحبنا للمدونه

صيدلانيه طالعه نازله يقول...

عارفه يا شمس انا اكتر حد تعب بسبب الكدب والناس

المذيفه والمتخفيه تحت ستار الطيبه والوداعه والشياكه

وفعلا انتى قولتيها كلمه ليس كل ما يلمع ذهبا

ليس كل من يتكلم كلام جميل فهو اهله

نفسى اقود حمله اسميها

لا للمذيفين ومجهولى الهويه

لان دول اكتر نا س بيتسللوا وسطنا وبيبثوا افكارهم المسمومه

adel يقول...

بعد التحية والسلامات
انا عن نفسي مازالت زي ما انا بتابع الكل وبعلق عند الكل وبرد عندي
حكاية الاشراف متحتطش غير بس بسبب قلة الادب من البعض

مبكتبش كتير بس لان ببساطة الدماغ فضيت وبعيد شحنها بس لو حطينا في الاعتبار الكتابة السينمائية يبقي انا بكتب اسبوعيا بدون توقف بقالي سنتين ويمكن اكتر

بالنسبة للناس نفسهم فدول قلة الكلام عنهم احسن
فبقيت بخلي بالي وكل واحد حر يقول رأيه بس من بعيد لبعيد لانها مش طالبة حوارات وامراض نفسية تطلع علي الواحد كفاية اللي بنشوفه في الواقع

بالنسبة للفيس وتويتر بقي انا شايف ان كل واحد ليه ميزة
تيوتير هو مجرد خبر او حالة في 149 كلمة ده بيعلم التقصير واسرع وسيلة في العالم لانتشار الاخبار
الفيس بوك عملي واجتماعي في المعرفة والصداقة وميضرش اني انشر فيه ساعات قليلة قوي لان في ناس مش بتدخل مدونات

اما المدونة فهي عندي اول مكان للكتابة زي ماهي وبنشر هنا قبل الفيس ده اصلا لو نشرت علي الفيس

حروف يقول...

عندك حق اعتقد ان انا اول حد اخترع عدم الرد علي تعليقات الاخرين عندي
دة مش تعالي او برمي كلمتين واجري بس لاني شايفة ان التعليقات حق للاخر مش ليا ومش بكتر العدد يكفيني القليل طالما اسعدني وفيه ما يفيدني

بعدت جدا جدا وبتابع في اضيق الحدود بسبب زيف الشخصيات والاقنعة اللي سقطت " اني ابقي عارفة قصص الف ليلة وليلة عن الاخرين " شيء محبط ويسبب عدم القة في الاخرين

بقيت بنشر علي الفيس اكتر من المدونة
"يمكن عشان تعليقات البعض اللي شايف ان التدوين شيء محافظ جدا غير مسموح بالافكار الجديدة او الملائكة والاجنحة التي يرتديها بالبعض من اجل الاسقاط علي الاخرين ونقد الاشخاص وليس الكتابة مع ان التدوين في الاول والاخر حرية التعبير المفتقدة في المجتمع وتحت تقنين ايضا " لان مفيش حرية بالمعني الكامل لاسباب كتيرة مش مرتبطة ببعض

بفتد الجو القديم اللي كان موجود بس للاسف اكتشفت ان اغلبه كان مجاملة

حاجات كتير فقدت معناها بنسبالي في التدوين
د يكون رأي صادم بس دة الواقع المؤلم
يمكن لاني كنت غلطانة لاني كنت فاكرة ان مجتمع التدوين هو نخبة من المثقفين او المنفتحين عقليا بس اكتشفت انه تحول لغرفة من غرف الشات ويقاس بعدد الكومنتات وعدد المدونات في الريدر وعدد الزيارات.....الخ الخ
يمكن لاني كنت بدور علي مدينة فاضلة وتخيلت وجودها هنا في التدوين ونسيت ان التدوين جزء من المجتمع

انا حاسة بمرارة في تعليقي بس دة اللي انا حاسة بيه " للاسف "

دمتي بخير وساظل اتابعك دوما ان شاء الله ووحشاني

Dr Ibrahim يقول...

ملاحظات انا لاحظتها برده
بعد عودتى من غياب فترة كبيرة بسبب الامتحانات اللى لسه خلصانة باقلها شهر
محنا بندرس 12 شهر فى السنة حاجة تفقع المهم ماعلينا
قضية ان اللى بيقرأ التدوينة ويعلق اى تعليق وخلاص
على فكرة انا بعرف مين اللى قرأ الموضوع كامل ومين اللى قرا اول سطرين ورد فض مجالس وخلاص..كله عاوز ينحز يلحق يعمل واجب وخلاص...
بس يالله هنعمل ايه
تحياتى لكم

SHAPE YOUR LIFE (ABOALI) يقول...

يا هلا بالناس الجميلة
اولا البلوجر هو جزء لا يتحزء من سلوك الانسان خارجه
فهو ان كان يفقد حماسه بسرعة فى حياته الاعتيادية
فهكذا سيكون فى البلوجر
ثانيا
هناك بعض يعتقدون انهم ينفخون فى كيس مثقوب
يعنى الكلام لا يؤخر ولا يقدم
فبعد فترة يشعر بملل وحالة ضيق
ثالثا
نضوب الفكر وقلة قراءت المصرين تجعل الافكار ثقيلة ويشعر انه لن يقدم او ليس عنده جديد
رابعا
انعدام المسئولية
فالتدوين مسئولية تحتاج ان ينمى فيها الشخص من قراءته واطلاعه على غيره
سواء بالايجاب او الاستفادة من السلبيات لعدم تكرارها
خامسا
نقل حالة الشارع الى المدونات خطأجذرى
لاننا نعرف مايدور فى الشارع
لذا الذى يكتب عليه ان ينير لغيره مصباح
يعيد اليه طاقته و ويشحن عزيمته

اختصارا
من يحب التدوين سيستمر لانه نافذة له
افرزت كيان مفكر قادر على كتابة بعض ما يدور فى حياته
ويقينا لو استمر بعيدا عن المنظرة والكلام فى الهايف
سسيستفيد ويفيد غيره

اما عن التعليق عند الغير
ده مهم ايضا
ولكنى عن نفسى
احصر تعليقاتى بعد مرور وقت فى التدوين وانا فيه
على بعض من الاشخاص
قد يزيدون او ينقصون
ولكنهم نموذج دائما كتاباتهم تنير عقلى وتدفعى الى افق رحب

موضوعك يفتح لنا ابواب نقاش عديدة
ويجعلنا ندق ناقوس اننا يجب الا نحمل الهموم ونسير بها الى غيرنا فنبكى معا
وانما نحمل الهموم عن ظهورنا ونضعها امامنا لنبدء طريقة مواجهتها


تقديرى بالفعل لانسان قدير

جايدا العزيزي يقول...

اولا صباح الفل ياست الكل

انازيك اول حاجه صدمتنى بجد وجايز هزتنى جدا واثرت فيا كتير

ان اكثرهم يقولون ما لا يفعلون

حقيقى فيه ناس ممكن تلبس الف قناع

وعلشان انا قويه جدا

قررت الا اكون مثلهم وان اكتب ما احبه

واؤمن به وان اكون صادقه مع نفسى قبلهم

وايضا سبحان الله بكره الفيس بوك جدا

يدوب بدخله دقائق ااقبل الصدقات

ولو حد سلم عليا اسلم

ولوحد عايز اى مساعده بساعد

واخرج وكانى خرجه من سجن

والميل ماكنتش بفتحه خالص

بس لما اصدقاء طلبوا منى مساعدتهم فتحته بس بدخل اوف

وبقبل البنات بس

اما التعليقات فانا حريصه ارد

على اى موضوع جديد للمدونات الصديقه

واذا كنت مشغوله بحس انى مضايقه

لانى اتاخرت عليهم

فى البدايه كنت برد على التعليقات عندى

لكن فى الفترة الاخيرة زيارة شهر زاد

اخدت بعض وقتى واول ما ادخل

الاقى عشرات الرسائل اسئله

وطلب مساعدات

ااقول ارد عليهم اولا واحيانا احل لهم بعض المشاكل العائليه

يعلم ربى اننى لا اخفى شئ عنى او اتجمل

كل من عرفنى معرفه شخصيه اخبرنى

انهم عندما تعرفوا عليا وجدونى

افضل كثيرا من جايدا العزيزى

اعترف انى طعنت كثيرا من اغلب

المدونين برغمانى مددت لهم يد العون كثيرا

ولكن لم اعاملهم ابدا بالمثل

مدونتى هى نفسى ومرائتى

والله على ما اقول شهيد

تحياتى

Foxology يقول...

كلام حضرتك صح تماما والمشكلة الكبيرة من وجهة نظرى ان فى الأول كان فى اهتمام يمكن علشان كانت حاجة جديدة لكن البرود بدأ يزحف على البلوج عامة وفعلا ناس كتيرة سابت البلوجرز او بقت بتهمل حتى متابعة الردود

تحياتى

لــــ زهــــــراء ــــولا يقول...

سيدتى الفاضله

قرات موضوعك باهتمام وبالفعل رغم انى منصمه الى عالم التدوين منذ عام تقريبا ولكننى كنت متابعه من قبل انضمامى لاحظت بالفعل الكثير من كلام حضرتك ...

باكون فرحانه اوى لما اكتب بوست واجد تفاعل وادخل اتنااقش واعلق واجد رد ممن ترك لى تعليق واشعر بنوع من التفاعل وعلى الجانب الاخر هناك من يدخل ليقول شكرا وفى انتظارك فى مدونتى المفروض وقتها انا ادخل اقوله شكرا برضه لكن هذه الطريقه لا تستهوينى
عندما ادخل اى مدونه اقرا واتناقش واحلل لان دى طبيعتى يمكن دخولى اصبح مش لكتير من المدونات لكن عندما اترك تعليق لانى قرات وفهمت الكلام وربما فهمت كلمات بين السطور وحروف لم تكتب بعد

احترم ملاحظاتك واقدرها
واتمنى ان كل واحد يبدا بنفسه ويشوف ايه اللى المفروض يعمله


زهراء

أنا - الريس يقول...

ازيك يا شموسة ، أنا عارف إني أول المقصريين .. بس من فترة كنت مش بقرا الحد ودلوقتي بقرا لناس كتير واحيانا الوقت لا يسع لكتابة تعليق
أنا مش بقولك اني مش فاضي لا أنا فاضي وعند وقت لكن يوجد في الحياة الكثير غير البلوجر .
يعني لو انا صحيت الساعة 6 الصبح لسه راجع حالا من الشغل الساعة 3:38 برجع مهدود لو ريحت وممكن أقابل صحابي واروح عند قريب أو اشتغل شوية علي الكمبيوتر أو أقرا مدونات أو أقعد علي الفيس اكتب كلام يمكن يفيد غيري .
أنا حاسس إن الوقت معدش فيه بركه
قبل لما كنت أشتغل في المدرسة كنت ببقي فاضي معظم اليوم . لكن حاليا بجد انا بقيت أخلف مواعيد وحجات تانية كتير .
المشكلة اللي انا بوجهها دلوقت
أنا كنت مفكر اني بكتب حلو
لكن اكتشفت إن ممكن مش يخش عندي لو مش دخلت عنده بوست واحد أو بوستين .. وعلي فكرة حاجة دي ديقتني جدا مع إني كنت فاكر ان مش هضايق

أحيانا بعلق وأجري مع إن الموضوع يختلف معي فكريا ويمكن عقائديا كمان وبتكسف أقول رأيي ولو قلته أقوله ممكن المدون يزعل أو يعتبرني متعصب .

وأحيانا الواحد يقرا من غير ما يعلق برضوا

elsha3er يقول...

أولا انا اتفق تماما مع كلامك
ثانيا فعلا انا واحد من الناس هجرت المدونة وبكتب حاجة كل فين على عكس زمان وبطلت ازور كتير من الناس بس حوضح لية
اولا فجأة لقيت الناس اللى اتعودت عليهم وحبيتهم اختفوا لو حضرتك تفتكرى معايا أكون او لا أكون محاسن صابر برينسيس بيرى محمد غالية وغيرهم وغيرهم وانا من الناس اللى ما بتعرفش تكون صداقات بسرعة وما بعرفش أتعود على حد بسرعة
اما بالنسبة للفيس هو أسهل بكتير بس عيبه ان الناس اللى فيه مهتمة أكتر بالسطحيات ما عندهاش نوع من العمق الثقافى

كل اللى أقدر أقوله ان الناس اللى عرفتهم وحبتهم فى التدوين وحشونى اوى اوى اوى اوى

أنا وحماتي يقول...

فعلا معاك حق
انا لسة جديدة صحيح بس فعلا لاحظت كلامك ده..بلاقي ناس بتكتب كلام مالوش دعوة باللي مكتوب ف البوست اصلالا
وكمان في ناس مبتتقبلش النقد اطلاقا
عايزين فعلا سعة صدر اكبر ومناقشات اكتر وبحيادية

رحاب صالح يقول...

انا شوفت البوست ده بعد الضهر وكتبت لك تعلي قجميل بس للأسف ان الكهربة قطعت وانا لسة مكملتش ..
مش مشكلة اكتب تاني ...
في البداية انا عملت مدونتي من ثلاث سنوات لكن مبدأتش التدوين الفعلي الا قريب من سنة وشهر تقريبا ...بعدها بدأت ادخل المدونات واعرف العلم ده وعرفت مدونين وعرفت ناس بجد محترمين لكن في المقابل عرفت ناس العكس كمان والحمد لله اني تجنبتهم ...
بشوف احيانا الكومنت المكتوب هو هو واحد في كل المدةونات يعني ناس بتعمل حضور وانصراف زي الموظفين وبس يعني مبتشوفش الموضوع ولا بتقراه اصلا ...وانا بتغاظ واضايق جدا ..بحب اقرا بجد وافهم وبعدين اكتب التعليق اللي يطلع من قلبي ومن ذمتي وضميري فعلا مش مجاملة ...
وللأسف في ناس بتزور مدونات بس عشان ترد لهم الزيارة مش اكتر وانا بدخل مدونات كتيرة مش عشان رد الزيارة والله بل العكس عشان استفيد وكمان اطلع بفكر وعلم ومعلومة غايبة عني مثلا ...وكمان انا قفلت الفيس بوك عشان ظروف معينة ...بس الصراحة المدونات ارقي بكتير ...بس لو في مجال فعلا للمناقشة والنقد البناء فعلا وليس السباب والشتائم وفقط ...
اسفة للاطالة
دمت بخير

Maha Shahen يقول...

اولا حمدالله علي سلامتك يا شموسه وبالله ما تفكرى تعملى زيهم مهما اتضايقتى او زعلتى علي الوضع اللى انتى شيفاه
بس شكلها حاله عامة من الاحباط الشديد بسبب او بدون واكيد هتروح بشوف الفيس بوك والمدونات مرتبه كتير عنه هنا مكان الكتابه مش هناك
متشغليش بالك ان شاء الله كل حاجه تبقى تمام هنا ولا هناك اللي عايز شموسه هيجى لحد بيتها ومدونتها يا احلى شموسه تفاءلى

الف حمدالله علي سلامتك

سواح في ملك اللــــــــــــــــــه- يقول...

سيدتي /
هو عالم كاي عالم
وصداقات كاي صداقات ولكن من وراء

الشاشات وانتي تنتقين من تحادثي
ومن تهملي
فعيب من الغربلة
وميزة هذا العالم انه بلاقيود او ارتباطات
واكيد كل انسان مع الوقت بيعلن عن نفسه دون ان يدري
تحياتي

غير معرف يقول...

معاكي حق

كنت فاكر من كتر ما شفت اني بطلت اتصدم


بس مع الاسف لازلت اصدم

بس مش مشكله

اللي بيصدمني بيتعور زيي بالظبط ويمكن اكتر شويه

الحوار والنقاش

أعتقد ماحدش عندو نفس لأحتمال اختلاف وجهات النظر

مستنزفين تماما

كلنا

غير معرف يقول...

السلام عليكِ وعلى زوارك الكرام يا مدام شمس

متفق مع أغلب ما طرحتِ كما يتسن لي إداركه من مساحة الرؤية المتاحة لي

باحث عن حب يقول...

السلام عليكم
شمس
كلامك صحيح ميه ميه والله
عندك حق
موضوع تعليق وخلاص ده صح واللى بيحصل كمان
فعلا
مفيش خوض فى الموضوع
كانه بيثبت حضور وبس وممكن يكون مش بيقرا البوست كمان
موضوعك صح ميه فى الميه
يا شمس

Haytham Alsayes يقول...

عندك حق طبعا
بالنسبة لي البلوجر منتفس عظيم لافكارى وكتابتي اللي بجد بادعي ربنا انها تستمر
ومبطلش تدوين لاني اتعلمت كتير من التدوين والناس الحلوة والجدعة اهل البلوجر الكرام

بانسبة للتعليق علي التعليقات
في مدونتي الفردوس برد وبتناقش علي اللي عوز يتناقش طبعا لكن في مدونة صهيون سايب كل واحد يكتب بدون تناقش مش عارف دة صح ولا لا بس انا بحس لو تناقشت هاقول ايه كلام مكرر في موضوع الصهاينة وغيره بس هاحاول اتناقش وياريت اتناقش فعلا لاني اساسا انا رغاى جدا

لا البوست دة جميل جدا
وملاحظات قوية جدا وربنا يكرمك عليها


تحياتي وتقديرى

mrmr يقول...

ملاحظاتك يا شموسه فى محلها
يمكن انا من الاشخاص اللى تعليقى بيكون مؤجز جدا
بدون مناقشات وكلام كتير
يعنى ممكن اتكلم فى جزئيه صغيره من الموضوع بس مش معنى ذلك انى مش قريت الموضوع بكامله
لكن ممكن تقولى لضيق الوقت او عدم قدرتى على المناقشه ده شئ جايز
لكن تعليقى مش تاديه واجب وخلاص
ممكن اقرا البوست من غير ما اعلق لانه فعلا بوست جدير بالقراءه ومهم وممكن اطلع منه بمعلومه مهمه واتعلم منه شئ يبنينى روحيا وعقليا

لــــ زهــــــراء ــــولا يقول...

عوداً حميداً
الكلام فيه وفيه صح
هو المدونات كترت والمتابعة بقت قليلة لكتر المدونات
والاشراف زاد بدرجة تغيييييييييييييييييظ
لولا

حلم بيعافر يقول...

همبقاش فيه نقاش عشان المدونات كترت جدا جدا جدا ولما كترت كتر الغث وغطى على الثمين

دعاء العطار يقول...

عندك حق

عارفه انا اول ماابتديت تدوين كنت حاسه بروح تانيه خااااالص بين المدونين غير اللى حاساها دلوقتى

هى حاله عامه مش خاصه بيا لوحدى

ومااعرفش ايه سببها بجد

بقيت احس ان فيه ناس بتكتب لمجرد الكتابه مش عشان هى حاسه حاجه ونفسها تطلعها

تانى حاجه بقى بالنسبه للناس اللى يقولون مالايفعلون

فده مش غرررررريب خاااااالص فى اى مكان بتلاقى الناس بتحاول تجمل نفسها حتى لو بالكذب .. فمابالك بتدوين فى عالم افتراضى مانعرفش اىىىى حاجه عن الشخص غير اللى عايز يعرفهالنا بسسسسسس

::::::::::::::::::

حاجه بعيداً عن الموضوع

http://ywmyat-shbab.blogspot.com/2010/12/blog-post.html

ده لينك اول توبيك فى يوميات شباب متمرمط

عارفه انك استنيتى كتير اووووى

فحبيت افرحك

(: (:

Mahmoud Ahmed يقول...

حمد الله على سلامه حضرتك
و نورتي البلوجر من جديد
و انا كمان كنت غايب شويه
و برجع من وقت للتاني و هتبقي العوده الكبيره بقي في 20/12 ان شاء الله

dina يقول...

كل التعليقات بتاعة حضرتك أنا متفقة معاها جداااااا
فعلاً كل دا أنا كمان ملاحظاه

mohamed ghalia يقول...

بتفق معاكى أنا واحد من الى مقصرين فى حق التدوين

تامر علي يقول...

ملاحظات حضرتك كلها في محلها :) للأسف

مسألة البريق دي بالذات صحيحة

تحياتي :)

أشبال أون لاين يقول...

كلامك جميل جداً

وعندك حق في جميع الي انت قولتيه

ودا تعليق من واحد في الصف الثاني الاعدادي

Lady E يقول...

ملحوظاتك كلها صح

ويلكم باك

فشكووول يقول...

كل كلامك مظلوط
بس ايه رأيك فى الموضوع ده

ولا فيه اى حاجه

الدوله المصريه بجلالة قدرها وبتاريخها العريق الضارب فى اعماق التاريخ وبأأجهزتها الداخليه والخارجيه .. حصلت على صفر فى الموندبال
الدوله القطريه .... بارك الله فيهم... حصلت على حق تنظيم بطولة كاس العالم 2022.... ولا تعليق الف مبروك لقطر

شمس النهار يقول...

* صيدلانيه طالعه نازله

صدقيني بيتكشفوا بيتكشفوا

كل الزيف بيجي له يوم ويبان

بس عايزة اقولك ان اللي بيبقوا كده مابيهمهمش انهم يتكشفوا

شمس النهار يقول...

* adel

اهلا ياعادل

تعليقك عجبني
حسيتك ماسك العصايا من النص
لا بره البلوجر ولا هاجره

اما الامراض النفسيه دي في كل مكان مش في البلوجر بس

شمس النهار يقول...

*حروف

لا ياحروف ماتبعديش
البلوجر فيه وفيه
صحيح الزيف كتير بس مش بيصمد صدقيني

وحكايات الف ليله وليله انا زيك فيها
بس مش همشي واسيب هنا
هو ده اللي عيزينه
هما جايين البلوجر لأهداف اخري خالص
داخلين يصطادوا مش اكتر
لكن الناس الكويسه كتير
وللأسف بيمشوا
وفي فعلا نخبه من المثقفين
عارفه كان غلط ان الناس تعرف بعض علي المستوي الشخصي
علشان كان في ناس فاهمه الحريه غلط
الحريه مش انحلال الحريه قيد اخلاقي
ومسؤليه كبيره
ومش كل الافكار الجديده غلط مادامت في اطار الاخلاق والشرع
حاولي تتواصلي تاني في مدونتك وماتتخليش عنها
وادينا بنرجع من تاني اهو
انتي كمان وحشتيني
وشكرا علي تعليقك اثري النقاش

شمس النهار يقول...

* Dr Ibrahim

ان شاء الله ناجح بتفوق يادكتور

عارف ده نفس اللي بيغظني ان حد يعلق في سكه تانيه يعني ماقراش اصلا


انا كتير اقرا بوستات مره واتنين وتلاته ومابلاقيش تعليق اقوله
يااما بيكون في شئ انا بقرا عنه لأول مره او مافيش عندي تعليق وخصوصا الخواطر والاشعار
كان نفسي يكون في البلوجر لايك زي الفيس

شمس النهار يقول...

* SHAPE YOUR LIFE (ABOALI)

حمد الله علي السلامه

عجبتني جدا كلمتك التدوين مسؤليه

هو كده فعلا علشان دي افكار متداوله

وحتي من غير تدوين لازم الانسان ينمي فكره وينوع في مايطلع عليه

وكمان ماذكرته عن المنظره
واضيف معاها موجة الالفاظ اللي مش لطيفه

الهموم والمشاكل لاتحل بالرمي ورا الضهر
بتحل بالمناقشه وايجاد الحلول
همه دول مبيد الهموم والمشاكل الاوحد

شكرا علي تعليقك

شمس النهار يقول...

* جايدا العزيزي

مساء الخير ياجميلة

تعليقك عجبني فيه نقاط كثيرة
بالنسبه للفيس انا عندي اكونت عليه بس ده للأسره فقط ومافيش فيه اي غريب

عجبني فيكي صدقك في الرد والتعليق

ربنا يبارك فيكي ياجايدا

شمس النهار يقول...

* Foxology

والله ياابو يوسف

البرود اصاب الحياة عامه

تحس الناس مابقاش عندها رد فعل لأشئ
غير طبعا في خناقات السواقه والشارع

شمس النهار يقول...

* لـــولا وزهـــراء

كلامك مظبوط وطريقتك صح
اصلا البلوجر لنشر الافكار والابداعات

ومناقشتها

والا هيتحول الي جماد وماحدش يتفاعل مع حد

طيب اللي مش عايز يتفاعل ويناقش عامل مدونه ليه

وفعلا نظرية ابدابنفسك دي صح

شمس النهار يقول...

* MR.PRESIDENT

ايوه ياريس الوقت مافيهوش بركه

انت فعلا بتكتب حلو وببساطه شديده جدا

عارف في ناس كتير انا بروح عندهم واقرا واعلق وهمه مش بيجوا عندي
انا اللي يهمني انه يرد عليا لما اعلق عنده علشان هو ده التواصل والزوق
لكن اللي مش بيرد عليا مش بروح له تاني
لكن في ناس انا عارفه قد ايه مشغولين
فاممكن يفوت بوست مايردش
ده بعزره
لكن اللي هو ده طبعه مابعلقش عنده تاني
وفي ناس رحت عندهم وعلقت وردوا عليا بس حسيت في استهانه في الرد وتقفيل علي المناقشه فامابرحش اعلق لكن كتير ادخل عندهم واقرا بوستاتهم

ومافيش حاجه اسمها انك تخاف تختلف ماهو لازم نختلف البلوجر في اتجاهات كتير فكريه
واللي يزعل ومايحترمش الراي والراي الاخر يبقا خلاص ماينفعش لاتزوره ولا يزورك

شمس النهار يقول...

* elsha3er

اهلا بشاعرنا الهوووومام

فعلا ناس كتير اختفوا وحاليا بيرجعوا

محاسن مشغوله في الراديو عندها عذرها

وبرينسس ماعرفش عنها حاجه
ومحمد غاليه مشغول فيكتابه

وبعدين مااحنا موجودين اهو ياشاعر
الفيس ده عامل زي التيك اوي سطحي علي الاخر
ماتحسش انه راسخ
زي نشرة الاخبار كده

حاول انك ترجع اللي تعرفه
ونرجع اصدقاء البدايه مع الاصدقاء الجدد

شمس النهار يقول...

* أنا وحماتي

كتييير جدا فعلا ناس تدخل تقول حاجه مالهاش دعوه بالموضوع

بس اللي بحس انه مابيقبلش النقد مش بزوره تاني ولو كتاباته عجبني بروح اقرا ومابعلقش

شمس النهار يقول...

* re7ab.sale7

معلش يارحاب تعبناكي معانا
:))

بتتأسفي ليه علي الاطاله المدونه هنا ترحب بالاطاله والنقاش

الفيس مش زي البلوجر البلوجر للي عايز النضج والمناقشات
والبلوجر منظم اكتر وارسخ
وتقدري تطلعي علي تاريخ المدونه بسهوله
وخصوصا المدونات القصصيه

موضوع الحضور والانصراف ده اللي جديد اوي
ممكن اوقات تقري بوست مايكونش ليكي تعليق عليه
لكن ده مره مش كل مره
:)

شمس النهار يقول...

* nour shahen

حمدالله علي سلامتك انتي
غايبه ليه؟

ماتخافيش انا بانيه مدونه ملك مش ايجار وان شاء الله مش همشي قاعده

بس ساعات بيكون في مشاغل او مرض بيشغلني عن المدونه شويه

وشكرا علي كلامك اللطيف

نورتيني

شمس النهار يقول...

* سواح في ملك الله

كلامك صح
الحلو بيبان والوحش بيبان

بس مهما كان مافيش قيود ولا ارتباطات

فاده اكبر مسؤليه لمن يعرف حقيقة الامانه والمسؤليه

شمس النهار يقول...

* مصري جدا

الحقيقه انا بعدت جدا
وبرضه لسه بتصدم
وفي ناس كنت اعتقد انهم فوق الصدمة

اللي بيصدمني فعلا بيكون هو اصلا متعور بس مش حاسس
هو متعود علي التعوير انا لا

مش لازم لما نتناقش ونتحاور نتخانق
تمت مناقاشات هنا علي المدونه كانت من ارقي واجمل المناقاشات

هو حتي من غير حاجه مابقاش حد مستحمل الراي والراي الاخر

اغلب البلوجر بقا عامل زي الفيس ناس عايزة تهيس وتطلع من غلبها

وكله موجود اللي عايز يهيس يهيس واللي عايز يتناقش يناقش
واللي عايز يعمل الاتنين ماحدش هيعرضوا

شمس النهار يقول...

* أحمد شريف

شكرا علي مرورك يااحمد

شمس النهار يقول...

* محمود(باحث عن حب)

لا ده كتير وخصوصا لما يكون الموضوع مكتوب بتطويل

يتقرا الاول والنص والاخر

واي تعليق واجري
بس تصدق انا مش بزعل

:))

شمس النهار يقول...

* Haytham Alsayes

انت تدعي واحنا نقول امين انت من المدونات الثريه الجميلة اوعي تقفلها ياهيثم

في اعتقادي لازم تناقش في كلا المدونتين
من غير كلام مكرر

واكيد بتكون في تعليقات تحمل استفسارات
لناس عايزة تفهم

التواااصل ياهيثم
واللي مش عايز يتواصل اعتقد احسن يقفل التعليقات
علشان ماينفعش حد يكلمك وانت ماتردش عليه
خصوصا ان مدوناتك من المدونات الدسمه واللي بيزورها بيكون فعلا مهتم بمواضيعك التاريخيه

شكرا ليك

شمس النهار يقول...

* mrmr

كل واحد اكيد بيتناقش في الجزء اللي يحب مش شرط نتناقش في الموضوع كله

المهم اننا نتحاور ونتناقش

وخفي علي الصعايده
:))

شمس النهار يقول...

* لـــولا وزهـــراء

فعلا المدونات كترت جدا
وبقي الموضوع عايز وقت كبير علشان نعرف نتابع
واكيد مش بنزور كل المدونات في يوم واحد
يعني الناس اللي بتنزل كل يوم بوست كتير مش بعرف اتابعها

شمس النهار يقول...

* حلم بيعافر
عندك حق المدونات كترت جدا

بس اكيد انت مش بتزور الغث بتزور الثمين
وبتزور المدونه اللي بتلاقيها تستحق وقتك فعلا

شمس النهار يقول...

* دعاء العطار

شوفي يادعاء انا بعتبر المدونه دي زي ماقال الشاعر نجم موكنه كده
يعني ركن صغير اوي الواحد بيتكلم فيه
وبيقول هو بيفكر ازي وليه وبينفس فيه
ممكن لكل واحد اسبابه للتدوين

بس اهم شئ التواصل

لا طبعا مش غريبه دا ده وارد اكتر حاجه
ان يقولون مالايفعلون بس ماكنوش فضحوا نفسهم كده
واذو غيرهم يعني

ومبروك علي المدونه الجديده فرحت جدا طبعا ورحت وعلقت كمان
انا اقدر اتأخر
:))

شمس النهار يقول...

* سبايدرمان

الله يسلمك حمد الله علي سلامتك انت

وان شاء الله ترجع نااااجح وبتفوق

:)

شمس النهار يقول...

* dina
اديني بأعلن المشكله لعلي افيد اللي بيعمل شئ مش صح
يصلحه
:)

شمس النهار يقول...

* mohamed ghalia

اهلا يامحمد
فعلا انت مقصر واحنا مفتقدين بوستاتك

انت انشغلت بكتابك والفيس

ياريت ترجع تاني البلوجر

شمس النهار يقول...

* تامر علي

اهلا بيك
انت كمان بعد ماكنت منتظم في النشر
بقيت مابتنشرش غير كل فين وفين
مع ان مدونتك من المدونات الجميلة الدسمه

ياريت ترجع تدون تاني بنتظام

شمس النهار يقول...

* الشبل

اهلا وسهلا بيك

انا زرت مدونتك وعاقت هناك وان شاء الله هتابع
مش شرط ان الانسان يكون كبير علشان يبدع الانسان بيولد بالموهبه
وتظل تنتظر انه يكتشفها

شمس النهار يقول...

* Lady E

اهلا بيكي

انا زرت مدونتك وعجبتني جدا

:))

نورتيني

شمس النهار يقول...

* فشكووول

حضرتك زعلان جدا واضح

بس هو ده الواقع
مصر مابقتش فاضيه للكلام ده
احنا عندنا اولويات اخري ازاي نبقا دولة رجال اعمال ماصين دم الشعب
احنا بنصعد لتحت وبنسير للوراء
المهم انها راحت لدولة عربيه وامريكا بتندب حظها
الفلوس مع التخطيط مع الوعي بيصنعوا المعجزات

المصوراتي يقول...

السلام عليكم
انا و الحمد لله من المدونين الجدد
من حوالي ثلاث شهور
علي قدي :)

ملاحظات كلها صح ما شاء الله

بس السبب ان طريقة عرضنا ممكن تكون لا تتناول او تستفز القاريء في انه يكتب تعليق استكمالي او سؤال

و اللي بيعلق بيرمي الكلمتين و يجري
مش ميدخل تاني غير لما يكون في بوست جديد

تحياتي
المصوراتي

اسماء عبدالعزيز يقول...

بجد فعلا ياقلبي عندك حق في حاجات كتير قولتلها
انا بجد جديده في موضوع التدوين لسبب
انى ماكنتش بعرف استعمله في الاول ومقتصره على مواقع مخصصه للادباء
وبنزل شغلى كله فيها
لكن انا بكتب للشباب وعايزاهم يقروا رواياتى عشان كده قررت اعمل المدونه واشوف ارائهم ايه
واسعد جدا للنقد البناء
واحب من يناقشنى فيما اكتب
والاختلاف فى الراي لا يفسد للود قضيه

كوني بالف خير حبيبتي

صبح يقول...

يا ستي احنا عملنا مدنة جديدة بطلتها اختنا مخبوطة من غزة بتحكي عن العرسان في حياتها في حكايات الف خيبة خيبة حكايات واقعية لطيفة خفيفة مكتوبة بطريقة هايلة مضحكة
و مستنيين تنويرك نقدك او مدحك المهم زورينا تابعينا لان بجد حبيت كلامك و طريقتك و مدونتك باين عليها من التقال
بارك الله فيك

عنوان البيت

http://1000khybawkhyba.blogspot.com/

شمس النهار يقول...

* المصوراتي ( عيوني كاميرا )

اهلا وسهلا بيك في عالم التدوين

كلامك صح بس مش كل البوستات بتكون مافيهاش نقاش

لااعتقد

مبروك المدونه
وهروح ازورها حالا
:)

شمس النهار يقول...

* اسماء عبدالعزيز

انتي منورة البلوجر فعلا يااسماء
وكتاباتك جميلة

وياريت الشباب يدخل ويناقش من المناقشه هتتفتح امامك افق جديده للكتابه
زمان كان بيتعمل صالون ثقافي يتناقشوا فيه مع الكتاب عن ابدعاتهم
انا بعتبر البلوجر صالون ثقافي كبير
للجادين فقط
ده مش معناه اني ضد الكتابات الخفيفه اللطيفه
بالعكس دي بتقطع الملل
نورتيني

شمس النهار يقول...

* صبح

اهلا بيكي ياصبح

وحاااضر هروح اشوف المدونه حاااالاااا

:))

مذكرات موززه عانس يقول...

بجد انا كنت بسمع عنك قبل كده ومش عارفه اتابغك جاتلى الفرصه دلوقتى وعجبتنى مدونتك جدا ويصراحه عايزه استعير تعليق كان قاله مدون مذكرات مريض نفسى ان مهما كان الفيسبوك فإن جو البلوجر أدفى بكتير انما الفيس عامل زى التيك اواى وبخصوص المدونين اللى ظهروا جداد أنا واحده منهم واتمنى تشرفينى فى مدونتى وتعجبك

abo-bder يقول...


شركة تسليك مجارى بابها
شركة عزل اسطح بأبها
شركة عزل خزانات بابها
شركة نقل اثاث ابها
شركة تنظيف بتبوك
شركة تنظيف منازل بتبوك
شركة تنظيف فلل بتبوك
شركة تنظيف بالجبيل
شركة تنظيف بجازان
شركة وايت شفط الصرف الصحى

abo-bder يقول...


شركة تركيب باركية بالرياض

شركة تركيب باركيه

شركة تركيب الباركيه بالرياض

شركة نقل العفش بالرياض وجميع انحاء المملكة

شركة تركيب باركية فى الرياض

شركة تنظيف موكيت بالرياض
شركة فك وتركيب المكيفات بالرياض


abo-bder يقول...



شركة نقل عفش داخل وخارج المملكة


شركة تركيب اثاث ايكيا بالرياض


شركة تركيب اثاث بالرياض



وايت شفط الصرف الصحى

تركيب اثاث ايكيا بالرياض

تركيب اثاث ايكيا بالرياض

اثاث ايكيا



شركة تركيب اثاث ايكيا بالرياض