الأربعاء، 30 مارس 2011

ان شاء الله رايحة ميدان التحرير+تحدييييييث هام

الحمد لله ومبرووووووووووووك
علي تغيير رؤوس الفساد في الصحف المصرية
واخص بالذكر اسامة سرايا اللي شتم الثورة والثوار
وكمال عبد الله اللي ماسبش فضائيه اخباريه وغير اخباريه الا وشتم الشعب المصري فيها

الحمد لله عقبال باقي عصابة الوطني كل مكان

ان شاء الله رايحة ميدان التحرير
من بعد ماتنحي اللامبارك ما رحتش ميدان التحرير وقلت خلاص اتجه للمصابين والشهداء
لكن كده بقا في حاجات مش مفهومه
والثورة كده بتتشفط واحدة واحدة
وحلو اوي موضوع تجريم التظاهر ده عجبني اوي يعني ياثوار جعلناكم مجرمين ماشاء الله
انا ضد الوقفات الفئوية لكن نجرم التظاهررررر
تاااااااااااااااااني
وحتي الوقفات الفئوية تم التعامل معها غلط في غلط
وانا تدخلت في وقفتين واحدة منهم في كفر الشيخ
اللي كان عاملها عمال النظافة
وبصراحة كان عندهم حق وتم التعامل معهم بطريقة غبيه
وكان هم رئيس المدينة انهم يرجعوا شغلهم وبس
من غير مايعمل اللي همه عايزينه اللي هو المفروض وزير القوي العاملة والماليه
طلعوا بيه قرار
تثبيت العمالة المؤقته اللي بعقد ودي ناس علي قدهم
وهبقا اتكلم عن كفر الشيخ في بوست لوحدة
ان شاء الله
ومافيش اي حاجه بتتعمل واضحة وظاهرة والناس مافيش علي لسانهم غير الاستقرار والخوف
مش عارفة خايفين من ايه مااخر بعبع اهو خلاص مش قالوا البورصة بتنهار
وماشاء الله البورصة المصرية ضربت كل التوقعات وبالعكس بتسترد كمان الخسارة بسرعة غريبه غير متوقعه ماحصلتش حتي في نيويورك وقت 11سبتمبر
في ايه تاني خايفين منه
حتي بعبع امن الدولة خلاص
ليه كل المنحرفين متسابين بره يبرطعوا ويعملوا لنا ثورة مضادة
ويبلطجوا في الشوارع علي الناس
ليه العدالة بطيئه ليه المحكمات بتتأجل بالشهر
وليه التلاتي المرح شريف وسرور وزكريا
متسابين كده يعني ايه جمال اللامبارك بيتجول عادي خالص
وهو من افسد الحياة السياسيه والاقتصاديه وضحي بزميله في الاجرام عز
الاعلام ليه لحد النهاردة في ايد اللي ضللوا الشعب المصري وخوفوه
وماحدش يقول لي شالوا الفقي والشيخ
اذرعتهم لسه في المبني
بدليل الاعلام المصري واللي عملوا في الاستفتاء الغريب المريب اللي طلع بنعم والخطوات اللي بتتعمل دلوقتي خليط بين لا ونعم يعني حاجه تالته خالص غير اللي كان عليها الاستفتاء
وكل شوية قرارات غريبة
ياريت نرجع للتاريخ ونقرا ثورة يوليو عملت ايه واي ثورة علي مستوي العالم عملت ايه
والا الشعب المصري مابقاش قد الثورة والثوارات
حد حس بأي فرق لحد دلوقتي من قبل وبعد الثورة؟؟

هناك 55 تعليقًا:

مصري جدا يقول...

مع الأسف لا فارق أطلاقا

لكننا سنحدث الفارق

المصوراتي يقول...

انا حاسس بفرق

وانا مؤيد لوقفة التحرير يوم الجمعة و لكن فقط لنقول اننا مازلين محافظين علي ثورتنا و لم تلهنا حياتنا عنها

و هذه الميزة و هذه الثقافة لم تكن عند اجدادنا في سنة 1954 عندما خرجوا الي ميدان عابدين

و رجعوا بيوتهم لمجرد امر من احد الضباط يقول لهم انصرفوا ايها الاخوة اثابكم الله

هذا الضابط اعدم بعد سنة من هذه الحادثة

و لا اري افضل من ثورة يناير علي مر التاريخ المصري

لما بها من ميزات عددية

انها سلمية و ليس كاي ثورة قامت من قبل في اي مكان في العالم فعندهم دائما تكون دموية

نظيفة فما رأينا من قبل ثوار ينظفون مكانهم

و غيرها من الميزات منها الوعي و الفهم و الرقي و المعامله الحسنة ........


جزاكِ الله خيراً و اتمني تكوني متابعه لسلسلة هكذ كانت ثورتي علي المدونة لدي

واحد من الناس يقول...

بصراحه أنا مختلف معاكي

في إن مفيش فرق

لأ طبعا فيه فرق
وفرق كبير

ع الأقل دلوقتي نمتلك الأرض الصالحه لصناعة مصر جديده بإذن الله

هو فعلا التقدم أقل من تقدم السلحفاه

وفعلا فيه حاجات مش واضحه

لكني برده متفائل

أنا مع نزول ميدان التحرير تاني وتالت ورابع

وبرده مع تجريم - مؤقت - للتظاهرات الفئويه في أوقات العمل الرسميه

بصي

ده مش ضد الديموقراطيه

لكن فيه ناس عاوز يتظاهر وميشتغلش وياخد مرتب وحوافز ومكافآت

ودول مينفعش معاهم اللين بصراحه

اشتغل وانتج وبعدين طالب بزيادات

مانت شغال من تلاتين سنه ، وبتاخد اللي يفيض منهم ، جاي دلوقتي ومصر مش لاقيه تحطلها العقده في المنشار

وبعدين تعطيل العمل في مصلحة مين ؟؟؟؟


ربنا يهدي الجميع ويصلح الحال

Foxology يقول...

مهى دى أحد أسباب اكتئابى :)

مفيش فايدة بجد احنا عاوزين 85 مليون ثورة بعدد شعب مصر علشان نتغير كلنا على بعضنا كدة

ربنا يرحمنا برحمته

كلمات من نور يقول...

الله الله عليكي

شدي الهمة يلا

موناليزا يقول...

الشعب يريد أن يعيش بدون بلطجية

mrmr يقول...

للاسف انا حاسه اننا بنرجع مش بنتقدم والرعب والخوف ملو قلووب البنات والستات والبلطجيه منتشرين بشكل مخيف وحالات الخطف والاغتصاب بقيه على ودنه مكناش بنشوف الحالات بالعدد ده
يارب بقى يتحركوا ويحاكموا كل مذنب ويلموا البلطجيه

ربنا يستر علينا وعلى بناتنا

الازهرى يقول...

اتفرجى على الاعلان الدستورى وانت تعرفى ان كان عندى حق

عندى بطولة يوم الجمعة هابدأها مع الناس وارتبها وبإذن الله أحصلكم على هناك

شمس النهار يقول...

*مصري جدا بما ان حضرتك محامي

هسألك هل راضي عن طريقة محاكمة الحراميه؟؟

هل حضرتك راضي عن الوضع الان مع وجود كل الحراميه بره
وخصوصا ابراهيم سليمان والقضايا المحفوظة بعد التحقيق القضائي وبكده ماينفعش تتفتح تاني
؟؟؟؟؟

شمس النهار يقول...

*المصوراتي

كنت متغيبه عن البلوجر بسبب الظروف اللي الحمد لله اتحسنت شوية وطبعا هقرا مذكراتك عن الثورة ده شئ يسعدني وياريت كل اللي اشتركوا في الثورة يكتبوا عن تجربتهم

اما اللي اتكلمت عنه ده كله تم بيد الثوار
انا بتكلم عن الحياة السياسيه
وعن اللي بيحصل الان مازال الحزب الحاكم يسيطر علي الحياة في مصر بنظرة سريعه علي كل النقابات والمجالس المحلية والجامعات ورؤساء البنوك والجرائدو الغرف التجارية
وعلي سبيل المثال لا الحصراسامة سرايا اللي شتم الثورة والثوار في جميع الفضائيات وعلي الاهرام
لحد دلوقتي قاعد وليه عين يتكلم ويدس السم في العسل
اللامبارك مشي نص نص صدقني

شمس النهار يقول...

* واحد من الناس

علي فكرة انا مش مختلفة معاك وده اللي قلته انا ضد الوقفات الفئوية
لكن في نفس الوقت ضد التعامل معاها
وماحدش يقول لي البلد هتقع مصر مليانه ناس زي الفل يعني اللي هيتشال هيجي غيره احسن منه بكتير
وتعيين العماله المؤقته ده طلع بيه قرار لكن علشان لسه المسيطر علي الدنيا الحزب الحاكم اللي في كل قيادة في البلد علشان كده القرارات مابتتنفذش علشان الوقفات تستمر

في حاجه غلط

شمس النهار يقول...

* Foxology

لما حضرت امبارح المؤتمر جالي نفس شعورك
وحسيت ان حد بيسرقني

والشعب المصري ماتغيرش اغلبه
لسه ولسه بدري

عايزين كل واحد مننا يغير ويغير اللي حواليه

ان شاء الله هنعمل مؤتمر في الوراق وهقول لك علي الموعد

شمس النهار يقول...

* كلمات من نور

والله بنحاول بس ياريت نحاول مع بعض

واللي محزني ان في تيارات بتستغل الناس البسطاء في السياسه وبتوهمهم بحاجات مش موجوده اصلا

زي الاستفتاء اللي دخلوه في الدين
للدرجة دي هان علينا دينا ندخله في لعبة السياسه دينا اطهر من كده بكتير

شمس النهار يقول...

* موناليزا

للأسف البلطجيه اللي مسيبهم علينا البلطجيه الكبار اللي مايعرفوش غير اللفة دي في الحوار

وموضوع البلطجيه ده مش هينتهي غير لما الشعب يتصدي لهم بنفسه

وسبق وقلت لازم الشباب يتحد مع الشرفاء من الشرطه والجيش

شمس النهار يقول...

* mrmr

علي فكرة البلطجيه موجودين من قبل الثورة همه اللي ربوهم

لكن الاشاعات اكتر من الحقيقه

وواحدة صحبتي قالت لي علي قصة قلت لها اتصلي باللي قالتهالك وقولي لها شوفتي بعينك وان قالت لك افضلوا ورا اللي قالتها لحد ماتعرفوا مين اللي حكاها في الاول هتلاقوا انها اشاعة

التحرش والخطف والاغتصاب وسرقة الشنط من زمان بس ماكنش معمول عليهم فوكس كده
لكن دلوقتي معمول لغرض اكبر
من يومين لاقينا ست بتصوت تحت البيت عندي الساعة واحدة وواحد نازل فيها ضرب واضح انه كده وكده لزوم الصويت الشباب في ثواني نزلوا ومسكوهم وطلعت تمثيليه علشان يتقال ان في خطف
صاحب العربيه مالحقش يجري بالعربيه الشباب مسكه طلعوا اصلا من الشرقيه
وعارفين بعض ونزلها علي الناصيه وهي كملت مشي علشان يبان كأنه كان هيخطفها ولما صوتت جري
ربنا يحمي شباب الشارع فضحوا الموقف
وسلموهم للقسم
ايه رأيك؟؟

شمس النهار يقول...

*الازهرى

فاتك المؤتمر كان هايل

الاعلان الدستوري لسه بتمعن فيه

ومش هقول غير نازلة ان شاء الله يوم الجمعة
مش بيقولوا الثورة مالهاش صاحب والجيش بيعمل اللي هو عايزه
ماشي صاحب الثورة نازل يوم الجمعة
يقول عايز ايه

لـــولا وزهـــراء يقول...

انا ضد الوقفات الفئوية لكن نجرم التظاهررررر
" هو اصحاب الوقفات الفئوية جزء من مطالب الثورة الكبيرة لازم نكون معاهم ونساندهم ونشوف طلباتهم بس العملية محتاجة تنسيق مندوب يروح لكل فئة ليها مطالب يسمع طلباتهم ويجمعها مكتوبة ويحدد جدول زمني لحلها ويخلي عجلة الانتاج تدور لحد ما يلبي طلباتهم انما مافيش للأسف هندنا تخطيط جيد ولا تفكير منظم .."
لولا

لـــولا وزهـــراء يقول...

هو نفس الاحساس اللي عندك عندي!!! الثورة بتتشفط
لولا

دعاء العطار يقول...

أنا كمان مش فاهمه ايه اللى بيحصل

وحاسه اننا فى مفترق طررررررق

اما الثوره تكمل على خير

واما نرجع زى ماكنا بل اسوا وكأن شيئا لم يكن

خايفه بجد اوووى او ممكن تقولى مرعوووووبه

بس لازال عندى أمل

دعاء العطار يقول...
أزال المؤلف هذا التعليق.
شمس النهار يقول...

* لـــولا وزهـــراء
هو ده نفس راي يالولا

التعامل معاها غريب مريب
ومن خلال تعاملي مع وقفتين حسيت ان التعامل فعلا بغباء لييييه؟؟
علشان المسؤل اللي بيتعامل مع الوقفات تبع النظام القديم يبقا هيحلها ازاي واحنا هدينا العش عليهم
طيب الجيش ساكت ليه
وكلنا شفنا اللي بيحصل في كلية الاعلام مع عميد اصلا رمز من رموز الفساد والمنفذ الاساسي لحملة المعلم وابنه
ربنا يستر وادينا نازلين نشوف ايه الموضوع

سواح في ملك الله- يقول...

الدكتور المهندس ممدوح حمزة
قال لفظ جميل اوي
قال انا مش شايف حاجة حصلت غير ان
الحرس القديم حط الحرس الجديد في السجن

شمس النهار يقول...

*دعاء العطار

لا مش لدرجة اننا نرجع زي زمان
ان شاء الله مصر مش هينفع ترجع زي زمان
عايزنا نرجع زي زمان قول للزمان ارجع يازمان

لكن الثورة بتتشفط والتحقيقات غريبه مريبه
واحمد شفيق سامحه الله اداهم فرصة يبرطعوا اوي

بس لسه عندي امل
ان شاء الله الثورة هتنجح وهننزل يوم الجمعة نشوف ايه الموضوع

شمس النهار يقول...

* سواح في ملك الله

صح مليون صح

المعلمين ضحوا بصبيانهم
طبعا المعلم مايقعش
بس ان شاء الله المعلمين هيقعوا ومش هنسمي عليهم

أسطى في زمن البلي يقول...

يا أستاذتي

مطلوب من الشجرة المصرية الجدر و الفروع الرئيسية و بس .. و الباقي يتم قطعه .. و جدر الشجرة المصرية كفيل انه ينبت نبتة نضيفة


اللامبارك كان نموذج صارخ للغباء .. و اللامبارك كانت اختياراته لأنصاف الشخصيات و أنصاف الكرامة .. كدا نفهم التركة اللامباركية شكلها ايه


تيتا سوزي اللي امها انجليزية و اللي اصولها مالطية يهودية .. كانت بتجهز جمال ابنها( يعني مسلم رسميا و يهودي بالدم حسب التعريف اليهودي ) انه يبقى رئيس مصر

تيتا جيجي كانت الوسيط لجدو حسني عند جدو أنور علشان ياخده نائب

اصل تيتا جيجي و تيتا سوزي من نفس الفصيلة العنجليزية

جراند تيتا .. تحية بيه كاظم .. الايرانية الشيعية اللي كانت من كبار الاقطاب البهائية و اللي كانت حرم زعيم القومية العربية المقدم جمال بيه عبد الناصر و اللي خاله كان ماسوني

سؤال غريب شوية
ازاي مقدم يتقدم الصفوف قدام عقيد و قدام لواء ؟ دا حتى التقاليد العسكرية ترفض دا
ازاي عبد الناصر يكون قدام يوسف صديق و اللواء نجيب ؟

فتشي كواليس الماسونية


حضرتك ابحثي في يوتيوب بالعبارة دي
( سلسلة الماسون العرب )

فيه شخصية مصرية انضمت للماسونية سنة 1958 و بقى لها شان جامد بعد كدا


أستاذتي

حسب فهمي .. فيه حدود معينة للتدرج لغاية مستوى معين .. بعدها بيكون الاختيار بمعايير مختلفة .. معايير مش بالضرورة في مصلحة الوطن .. لا .. في مصلحة الأسياد


كدا اظن كلامي بقى واضح


انا عاوز اتجوز و اجيب عيال و اقعد في البييييييييييت


.

sony2000 يقول...

طب تمام
يبقي تيجي معانا فتجمع المدونين

http://sony2000-sony2000em.blogspot.com/2011/03/blog-post_31.html?showComment=1301526206701#c280027068705387348

MR.PRESIDENT يقول...

أنا مع التظاهرات المليونية .. بس مش مع التظاهرات الفئوية حاليا حتي لو بحق يا شموسة .

مع احترامي طبعا لرأيك بس المفروض كلام الجيش حاليا يتم سماعه لأن الناس دول أكيد لهم طاقة . ولو ميشنا إحنا في وضع أسوء بسبب غباء اللامباركين أجمعين .

اللي بيغيظني شوية : إن ائتلاف ثورة الشباب مش بيمثلوا قطاع كبير وهما يقولوا للناس روحوا يروحوا .. أنا عارف إن كتير بيروح بقناعة .. بس تخايلي مثلا فزاغة الشعب الاخوان مع اختلافي الفكري معاهم قالوا للناس روحوا التحرير الجمعة دي .. الدنيا هتتألب عليهم ..

ربنا يستر ..

ويوفق دكتور عصام شرف لما فيه خير للبلد .. وأنا أتوسم فيه الخير .

Hu-man يقول...

لا طبعاً ماينفعش نقول ما فيش حاجه اختلفت ... ده في اجحاف للثورة
طبعا أكبر مكاسب الثورة
الاطاحة بمبارك ظاهريا فقط ... لم يقدم ولم يستدعى للتحقيق معه

الغاء آمن الدولة .. وكان بدلاً منه الدفاع الوطني باين .. المهم غيروا الاسم

تم اسقاط الدستور واعلان بيان دستوري مؤقت لم يختلف كثيرا في نقاطه عن الدستور الا في نقاط الانتخابات الرئاسية وشروط الرئيس ...

تقديم بعض أكباش الفداء في حين يرتع رؤوس الفساد من اول المعلم الكبير والمعلمة والاتنين عياله والثلاثي المرح

لم نرى محاكمات عاجلة تشفي غليل المواطن بل تأجيلات في تأجيلات في تأجيلات

لذا هاهي مكاسب الثورة

عرفة فاروق عبد لله يقول...

انا نفسى محستش بفرق كتير

جيجي يقول...

ضرورى كل الناس تنزل الجمعه اللى جايه دي بنفس اهميه ايام الثوره


ربنا يكرمك

حمد الله على سلامه نور الدين باشا يارب يخليه ليكم ويجعله دائما قره عين ليكم

hasona يقول...

السلام عليكم

هناك فرق (فارق)كبير
أينعم هناك سلبيات كثيرة حضرتك عرضتي بعضها هنا
لكن البلد عايزة جهد أكبر وتفكير أكتر
ولابد من استثمار طاقة وقوة الثورة لتتوجه الي أكثر من اتجاه(اقتصاد - سياسة - تنمية بشرية -00000الخ) لا يجب أن ينصب كل اهتمامنا فقط علي السياسة

شمس النهار يقول...

* أسطى في زمن البلي

ايوة اسطي بجد انت فعلا جبت التشبيه الصح
فعلا الجدور اصيلة وهتنبت ناس زي الفل

بالنسبة للمعلومات اللي اوردتا اعرف بعض منها والاخر غريب عليه

بس عبد الناصر كان من الاخوان قبل مايغدر بيهم
وموضوع الماسونية ده اشك
اما تحية ايوة اهلها من الاعيان ومن اصول غير مصرية

وثورة يلوليو كان لها اخطأ كتير قاتلة نتيجت انهم استأثروا بالبلاد والحكم

:)))
وهدعيلك ربنا يبعت لك بنت الحلال ست البنات وتتجوز وتقعد في البيت
:))))
ماتخافش امن الدولة اتحل اه
لكن بيشتغل من منازلهم
:))

شمس النهار يقول...

*sony2000

ان شاء الله طبعا نازلة التحرير
بس مش طول النهار هنزل شوية كتير كده وارجع علشان الزمبليطة اللي عندي

وان شاء الله اكيد هنشوف بعض

شمس النهار يقول...

*MR.PRESIDENT

ازيك ياريس:))

وماحدش مع الوقفات الفئوية ولا انا قلت كده
ومن اول يوم انا ضدهل حتي لو هي بحق
انا ضد شعللتها والتعامل الغلط معاها
ده كان في بوست مخصوص للموضوع ده

وماتخافش الجيش باله طويل وصبور وقاعد
علي فكرة يوم الجمعة ده مش بس الاتلاف هو اللي دعي ليه عندنا في الجبهة كمان
وحتي الناس العادية ومن يوم 28 يناير ويوم الجمعة دايما في ناس في التحرير
لكن الفرق بيبقا في العدد مش اكتر
الشعب واعي وماحدش هيسوقه تاني

شمس النهار يقول...

*Hu-man

:))
انت شايف ان مبارك مشي فعلا

وامن الدولة اتهدت مساكنه بس بيشتغل من منازلهم
ووالله مامقصر في شئ
:)

اما الاعلان الدستوري نخلي الفقهاء الدستوريين اللي ماليين الفضائيات يقولوا رايهم فيه وخصوصا في اختصاصات المجلس الاعلي
وهنسمع سمع!!

اكباش الفداء دول مش خرفان دول زغاليل المعلمين لسه بره
والنائب العام اصلا هو ده اللي حبك وقفل قضية ابراهيم سليمان وخلاها ماتنفعش تتفتح تاني
اثق فيه ازاي انا بقا دلوقتي

وان شاء الله يوم الجمعة ننزل نشوف التأجيلات دي علشان مين ولصالح مين
والشخصيات اللي لسه قاعدة علي قلبنا دي قاعدة ليه

شمس النهار يقول...

*عرفة فاروق عبد لله

الفرق الوحيد اننا كل شوية نطلع مظاهرة نطالب بأسقاط النظام اللي لسه مااسقطش اصلا

شمس النهار يقول...

* جيجي

الله يسلمك ياجميلة

يوم الجمعة اهميته ان الشعب هيقول
الشعب يريد اسقاط النظام اللي لسه لم يسقط بعد

نظرة سريعة علي المراكز والوظائف الكبيرة هتلاقي ماحدش مشي

شمس النهار يقول...

*hasona

مين قال ان الاهتمام كله بالسياسة ده حتي احنا الشعب الفريد الجميل اللي ثورته كوكتيل في جميع الاتجاهات ماشاء الله

في بلدان كتير الثورة عطلت الحياة فيها لسنين

وفي النهاية السياسة والاستقرار السياسي والرسم الصح للحياة هو ده اساس كل شئ واساس الاستقرار اللي هيعدل كل مايلة في البلد
من اول التعليم الي عيشة بياع البطاطااللي كان من ضمن المعتصمين في التحرير

مامة مازن يقول...

السلام عليكم
رغم انى كنت هقول نعم الا انى وبعد تفكير قررت ان لا هى الانسب ولما سالت زوجى قبلها بليلة قالى لا
واخترنا لا فى الاستفتاء وكنا واثقين انها هتكون نعم وهيكون الفرق بسيط فى النسبة بين نعم ولا اللى فاجئنى انها كانت 77 كتير قوى بس عموما احترمت النتيجة لان مبررات نعم انا نفسى كنت مياله ليها فى الاول

المهم يا حبيبتنا احنا بنحارب نفسنا دلوقتى علشان نتمسك بالامل بنحارب حتى الافكار المنطقية اللى مخنا بيرتبها بس علشان منفقدش الامل
انا خايفة جدا فى حد مش عايز تقوم لنا قومة فى حد مش عايز مصر تتقدم او تنجح فى حد عايز يحجمنا ويعجزنا
انا عندى ظن وربنا يسامحنى لو غلط ظنى ان الدول العربية نفسها مش اسرائيل او غيره هى اللى عايزانا نبقى اقل من كده كمان

انا فعلا بدور على الامل خايفة جدا
زوجى متشائم جدا وبيقولى خلاص كل حاجة راحت فى مؤامرة داخلية كبيرة وانا بقوله لا مش هيفلتوا كل واحد هيتحاسب يقولى فين دى المحاكمات بتؤجل اغلب شك نفسى واديله الامل ان بكرة احسن رغم انى انا نفسى بدور ع الامل ده
اسفة جدا للاطالة

لورنس العرب يقول...

انا موافق على تعليق foxology
بصراحه جاب من الآخر

ماجد القاضي يقول...

السلام عليكم

من غير ما أصدعك وانتي عندك تحرير بكره..

لو فيه بصامة إلكترونية، يبقى ببصم على تعليق (واحد من الناس).

تحياتي وبالتوفيق غدا إن شاء الله..

Dr Ibrahim يقول...

لا الصراحة انا حاسس بفرق كبير جدا بين قبل الثورة وبعدها..على الرغم من المماطلة فى بعض الامور مثل محاسبة الفاسدين..ولذلك هناك حق فى الجمعة المليونية..

بس اللى ملاحظه من كلام حضرتك ان اللى قال نعم دا مجرم ومن فلول النظام السابق ومحرض من الإعلام المصرى على الرغم ان الامور ماشية بسلاسة فى موضوع الدستور .. واللى هيبقى جديد بعد انتخابات مجلس الشعب إن شاء الله

شمس النهار يقول...

* مامة مازن

اهلا بيكي وكولي زي ماانتي عايزة المدونة هنا علشان نتكلم مع بعض ونطول ونفهم مع بعض واللي فاهم يفهم اللي مش فاهم نساعد بعض يعني
:))))
ودايما منوراني في التعليقات

هو الموضوع ماوصلش للتشائم
بس الحكايه غريبه حبتين تباطئ غريب في كل شئ حتي المحاكمات
وكل مانقول في مليونيه يحيلونا بحاجه زي كده رؤساء الصحف اللي كانوا المفروض يتشالوا من اول يوم

ان شاء الله خير ومش هنمل ولا نكل ومش هيضيع حق وراه مطالب

الغلط اننا نسكت

نورتيني

شمس النهار يقول...

*لورنس العرب

فوكس قلقان جدا زي اغلب المصريين

بس ان شاء الله خير
عندي امل

شمس النهار يقول...

*لورنس العرب

فوكس قلقان جدا زي اغلب المصريين

بس ان شاء الله خير
عندي امل

شمس النهار يقول...

*ماجد القاضي

وعليكم السلام ورحمة الله وبركاته
الحقيقه كل التعليقات جميلة مفيدة واثرت البوست
واعتبرها اهم من البوست نفسه

شمس النهار يقول...

* Dr Ibrahim

الفرق غير ملموس
الثورات تصنع تغيرات جزريه كبيرة
واحنا لسه متعطفين علينا بتغيير رؤساء التحرير امبارح مع ان المفروض ان الاعلام اول شئ بيتغير في بداية اي ثورة

لأنه بيكون لسان العهد اللي المفروض سقط

بس انت جبت منين اني بقول ان كل من قال نعم مجرم ومن فلول النظام الفاسد
:))
دورت في البوست كله مالقيتش الكلمة دي خالص
من قال نعم مصري ومن قال لا مصري
ومش علشان انا قلت لا يبقا كل من قال نعم يبقا مجرم
ومش علشان قلت نعم يبقا كل من قال لا مجرم
يبقا فين احترام الراي والراي الاخر
وفين الديمقراطية
وعموما سواء لا او نعم
الشغل اللي بيتعمل دلوقتي كوكتيل بين الاتنين يعني حاجه تالته خالص
:)
يجب ان تقبل الاخر ونجيد فن الاختلاف
لازالت ثقافة الفكر الواحد تسيطر علي المجتمع المصري
ولازم طالما لانتفق يبقا نتخانق
لسه شوية اللي بيحصل جديد علينا
ان شاء الله مصر هتكون وهترجع من ارقي الامم
:)

أسطى في زمن البلي يقول...

أستاذتي


انا قرات من زمان انه المقدم جمال بيه عبد الناصر كان عضو في جماعة الاخوان .. و كان شيوعي
كان اخواني لدرجة البكاء على السجادة في وجود احدهم .. و كان شيوعي لدرجة الثمالة بالخمر قدام احدهم التانيين
مسالة الماسونية لسه عارفها من تلات ايام بس

و انا لا اشك فيها مطلقا

ليه ؟

قراءاتي للتاريخ اللي فات .. و قراءاتي في صفحة التاريخ اللي عشته .. و قراءاتي في صفحة الحاضر .. كل دا بيعطيني مؤشر اقدر احدد بيه علامات واضحة على طريق التاريخ


الاستعمار كان موجود بيحكم

الاستعمار لما شاف ان وجوده بيكلفه اكتر من مكاسبه قرر الرحيل .. يرحل .. لكن يسيب تأثيره في دنيا المستعمرات

ازااااي ؟

يحط ناس تنفذ اجندته

يخلق بؤر توتر تمنع تآلف مستعمراته ( فرق تسد )

..

الكلام بيجرجرني


انا حاسس في تاريخنا الحي الوقتي انه فيه ضغوط هائلة على المجلس

ضغوط من الامام .. من الشعب بمطالب عادلة .. و ضغوط من الخلف .. من قوى خارجية بإملاءات ثقيلة
علشان كدا .. فيه عدم توازن في التصرفات

تيجي نوضح ؟

اللي قالوا لا كانوا عاوزين يفضوا مولد القديم و يعملوا اعلان دستوري و مجلس رئاسي من مدنيين و واحد عسكري .. و يصدر قانون احزاب .. و تتعمل انتخابات للبرلمان بعد سنة مثلا

بتوع نعم .. كانوا موافقين على الترقيع .. يعني نرقع و نمشي بالدستور المترقع


طب الوقتي ليه رجعنا للاعلان الدستوري ؟
ايه كان لزوم الاستفتاء ؟

طب كلامي دا ايه المستفاد منه ؟


لاااااااازم الضغط الشعبي النهار دا يكون شديد جدا .. علشان محصلة القوى تبقى في اتجاه المفيد لوطننا

..

هو لسه بيشتغل من منازلهم ؟


و حضرتك بتقولي ربنا يرزقني بست البنات ؟ و انا هاكون ايه ؟ جد الاولاد ؟

ماشي .. ربنا يكبر المقام




صباحنا نادي يا فندم

.

جايدا العزيزي يقول...

لكن كده بقا في حاجات مش مفهومه
والثورة كده بتتشفط واحدة واحدة

وانا اؤئيدك اختى

مش متافئله خير

ربنا يلطف بمصر وشعبها

تحياتى

شمس النهار يقول...

*أسطى في زمن البلي

قررت اني هدور واقرا في المواضيع اللي ذكرتها دي

وموضوع لا ونعم محيرني ومضايقني
ومش فهماه

معترض ليه بقا علي بنت الحلال
:)))))
:))))

شمس النهار يقول...

* جايدا العزيزي

بس تصدقي بعد اللي شفته في ميدان التحرير النهارده
لا نسبة الامل عندي ارتفعت

أسطى في زمن البلي يقول...

ههههههههه


يا أستاذتي


انا اتكلمت عن ( ست البنات )

فاذا كانت هي : ست البنات

يبقى اعتبر نفسي : جد الاولاد


و على فكرة

و بدون استغراب


انا جد من زماااااان



و بس

.

شمس النهار يقول...

*أسطى في زمن البلي

ماشاء الله عليك انا دخلت عندك المدونة وشوفت الاوتوبيس والتوكتوك
:))
شكلك مش جدو خالص

ربنا يباركلك في عمرك وفي اولادك

أسطى في زمن البلي يقول...

.

( ربنا يباركلك في عمرك وفي اولادك )

شكرا جزيلا يا فندم


دي دعوة كلللللها مستقبل واعد


الرضا و النور


.

Dr Ibrahim يقول...

تمام يا فندم منا قولت
انا اللى حاسس بتغيير بالنسبة لحياتى انا :) او المحيط اللى انا ساكن فيه بالأمارة الموضوع دا

نسيم الحرية فى هواء جامعة المنصورة !

وفعلا الثورات بتصنع تغيرات جذرية
وقلت فى تعليقى برده ان هناك مماطلة فى محاكمات الفاسدين السابقين. :D
مفيش اختلاف فى النقطة دى

اما بالنسبة لموضوع التعديلات الدستورية
حضرتك ذكرتى "بدليل الاعلام المصري واللي عملوا في الاستفتاء الغريب المريب اللي طلع بنعم"
اللى انا فهمته ان اللى حرض على نعم هو الإعلام...على الرغم اللى انا اعرفه ان وسائل الإعلام كان معظمها اتجاه ترجيح كفة لا..!

وهو فكرة التعديلات الدستورية
انا كان رأييى ان الجيش يطلع ويعمل الاعلان الدستورى بدون حكاية الاستفتاءات الدستورية اللى وجعت دماغ الشعب المصرى كله بدون اى داعى
ولاكن انا اجدها عبارة عن أفيون شعوب او مجرد خطة للإلهاء بعيد عن شىء معين لا أعلم ما هو؟!

وربنا يوفقنا لما فيه الخير والفلاح

وحضرتك والله انا مبتخانقش ولا حاجة :D
بالعكس انا متقبل جدا للرأى الاخر وأسعى لتحقيق الرأى الاخر ان كان افضل من رأييى
وفى كل حياتى اتخذ مبدا المشورة حتى فى ابسط الامور على الرغم من وجود حلول فى عقلى ولكنى أسأل فقد أجد أراء أفضل وحلول افضل وأكتسب خبرات أكثر..