الأربعاء، 27 أبريل 2011

تاااااااااج الثورة

عجبني الاسم
:))
صديقتي وحبيبتي مدونة كلمات من نور
عزمتني علي تاج الثورة
نقول بسم الله
===
هل توقعت ثورة 25 يناير؟
مش بالظبط لكن كنت علي يقين ان ساعة انتخابات الرياسة هتحصل مجزرة في البلد بمعني مجزرة
ولما قامت ثورة تونس قلت كده اهو اهل تونس لبسونا الطرح وكتبت ده علي الفيس الشخصي عندي وبعض الشباب من العيلة زعلوا
ولما اتعملت الدعوي للثورة علي كلنا خالد سعيد واتعمل جروب 25 يناير اللي اختفي خالص مش عارفة ليه
بصراحة اتريقت وقلت ياسلام هنضرب مواعيد لبعض كان المفروض تكون سريه مش اوي كده يكون التحدي وكنت حاطه ايدي علي قلبي
=====
وهل كنت من ثوار ميدان :
التحرير _ الكنبة _ الكمبيوتر _ حدد الميدان الآخر الخاص بك

:)))
التحرير والكمبيوتر الاتنين
والحمد لله ان ربنا مد في عمري واشتركت الي اخر يوم

واشتركت في اللجان الشعبيه كمان كنا بنمونهم بالغذاء والمشروبات والاسلحة
:))))))
وعندي صور وفديوهات ان شاء الله هعمل لهم مدونة لوحدهم خاصة بالثورة
======
مالم تنجح الثورة في تحقيقه هو .................... : اختار شيئا واحدا
في حاجات كتير وان شاء الله تتحقق علي المدي الطويل واحدة واحدة
بس في شئ مستحيل:))
ان المصريين فعلا يتغيروا فعلا

نزلوا نضفوا الشوارع ونظموا المرور وبعدين اتبهدلت تاني وماقدرناش نحافظ عليها نظيفة وعلي تنظيم المرور
رجعت الهرجلة تاني للشارع المصري

======

أكثر شىء فرحك في هذه الثورة هو ......................... اختار شيئا واحدا
برضوا حاجات كتير فرحتني في الثورة
بس اكتر حاجه فرحتني ان الشعب المصري فاق اخيرا واتحرك
كل واحد كان ماشي يندب حظه ويشتم في البلد واللي بيحصل وماحدش بيتحرك
علشان كده كنت مستنيه الانتخابات الرياسيه بفارغ الصبر
علشان كنت واثق ان هي دي اللي هتحرك الشعب
بس برضوا كتير من الناس مااشتركتش ولا سابت اولادها يشتركوا وفي منهم كان بيروحوا التحرير من وراء اهلهم وكنت بحاول اقنع اهلهم انهم يسيبوهم ينزلوا كانوا خايفين ان اللامبارك ينتصر واولادهم يتقبض عليهم
======
الشخصية التي أعجبتك خلال الثورة
الشخصية المصرية نفسها بكل طوائف المجتمع وخصوصا الباعه الجائلين اللي وقفوا في ميدان التحرير يبيعوا للشعب هناك سواء المقيمين او اللي بيروحوا وبيرجعوا لبيوتهم وصورتهم واتكلمت معاهم وعلي فكرة برضوا يوم موقعت الجمل كانوا مشتركين يعني ثوار وبيشتغلوا
:))
======
الشخصية التي احتقرتها بسبب الثورة
اللامبارك وحاشيته كنت الاول بكرهه بس لكن بعد اللي عملوا فينا من اول 25 يناير خلاني احتقره وبشده
=====
أطرف ما سمعته خلال الثورة ؟ تعليق _ نكتة _ حدث _ أخرى
حاجات كتير جداااااااا وخصوصا التلميذ اللي كان عايز الثوار ينجزوا
=====
القناة التي تابعت من خلالها أحداث الثورة هي
كله مافيش قناة ماتابعتهاش وعلي النت رصد واخر الانباء وكله
=====
الجريدة التي كنت تقرأها لتتابع الثورة هي
المصري اليوم ورقية وساعات الفجر والقاهرة
واليوم السابع علي النت والدستور والشروق
وبمااني بجيب الاخبار والاهرام علي طول كنت بتابع من خلالهم العالم دي بتوهم الشعب ازاي
زي التليفزيون المصري ماكان جايب لنا كورنيش النيل
====
الكاتب المفضل خلال الثورة هو

كنت بقرا لناس كتير بس كنت حريصة اني اتابع بلال فضل اكتر واحد
وبعض مماتكتبه اسعاد يونس لسخريتها من الاحداث
====
المذيع (المذيعة) المفضل خلال الثورة هو
ماحدش معين كنت بتابع القناة مش المذيع بس طبعا بما اني عندي القلب كنت بتجنب تامر واخواته
:))
====
كلمة تقولها لشهداء وجرحى 25 يناير
الشهداء مش هينفع نقول لهم احنا القضاء هو اللي هيقول لهم ويارتني كنت معاهم وانول الشهادة
اما الجرحي لما رحت وزرت بعضهم مالقيتش كلام اقوله غير ان جراحكم وسام علي صدرنا
=====
متقولش إيه إدتنا مصر وقول حندي إيه لمصر
عندك حاجة تديها لمصر ؟

كل واحد من مكانه ممكن يدي مصر واللي في ايده يعملوا في المحيط بتاعه
ممكن الناس العواجيز اللي زي يشتركوا في محو الامية او اي عمل تطوعي
العمل التطوعي في مصر مش منتشر واغلب الناس ماتعرفش عنه حاجة
=====
من سترشح لرئاسة الجمهورية ؟ ولماذا ؟
لسه بدري علي الاجابة لما الناخبين يستقر عددهم وافاضل بينهم في كل شئ في تاريخهم وسابق اعمالهم وانتمائهم وافكارهم هيعملوا ايه وان شاء الله اكيد هقول
اصل اللي لازم يحكم مصر في الفترة الجايه لازم يكون راجل جدع
علشان الشيلة كبيرة وعلشان يعرف يرجع لمصر والمصريين هبتهم في العالم تاني
صحيح الثورة عملت ده بس لسه شوية علاقات خارجية عايزة تتظبط شوية
:))
=====
لو أصبحت رئيسا لمصر ما هي أول ثلاث قرارات لك ؟
اول قرار هعمل وفورا وزارة للنظافة
وهعمل شوية قوانين هتخلي البلد زي الفل هو كده لازم قوانين وتتنفذ علشان البلد تنضف
ومش بس تنضف لا والزرع والورد يملا الدنيا
عايزين نشوف مناظر عدلة في الشوارع
ثانياهعمل وزارة من الغفراء ايوة جمع غفير هي خفير ولا غفير
المهم
علشان يقف فوق راس كل مسؤل في البلد اي مسؤل
وفي ايده نبوت اول ماضمير المسؤل يحاول يعكرت يروح مديله ضربه علي ام نافوخه
يحوله يعدله اهو يفكره ويصحصح له ضميره في التو واللحظة
ثالثا هعمل ائتلاف بين وزارة الصحة والتربية والتعليم والمالية والشؤن الاجتماعية(الاسم الجديد مش عاجبني)
الائتلاف ده لييييييييييه؟؟؟
علشان نعدل حال الاسرة المصرية من التلات اشياء دول المرض والفقر والجهل
====
لو أعطوك نصيبك من المليارات المسروقة , ما توقعك أن يكون نصيبك منها وماذا ستفعل بهذا المال ؟
طبعا ده سؤال فانتازي :))
بس ماشي نعتبر ان الفلوس جت
هدور علي ناس عندهم حلم احاول اجمعهم واحقق لهم الحلم ده
======
الحمد لله التاج خلص وياريت كل اللي يزور المدونة يتفضل التاج بالهنا والشفاء
:))))

هناك 26 تعليقًا:

رحاب صالح يقول...

صباح الورد
عجبني حكاية الخفير والنبوت دي اوووووي
بحسدك بجد انك كنت ف التحرير
تاني اتمني اني اكون من سكان القاهرة
وتاني اتمني اكون شاب ولست فتاة لاني ساعتها كنت خرجت مثل الاف الشباب
ولكن لان فتاة والخوف زيادة اكيك من أهلي فدة كان مستحيل اروح التحرير ده غير اني اصلا مش من القاهرة وببعد عن القاهرة ثلاث ساعات
اجاباتك جميلة اووي
وجزاك الله خيرا لما فعلت

تخاريف مترجــِــمة يقول...

متفقه معاكي يا شموسه ف اغلب اجاباتك

وخاصة مالم تنجح الثورة في تغييره

أعتقد إن اغلبنا متفقين ف النقطة دي ، من خلال الردود الللي قرأتها للمدونين كإجابات للتاج :)

بس برضه نقول الحمد لله فيه كتير الثورة صحيتهم ..

تسلمي حبيبتي ، وتسلم لنا جرأتك ف الميدان :)

لــــ زهــــــراء ــــولا يقول...

صباح الفل يا اجمل شمس

انا زرت المدونه وقرات بس بصراحه مش ليا فى موضوع التاج كفايه انى اتمتع بقراءة كل كلمه لكل احبابى

عجبنى اوى الائتلاف الوزارى ونخلى اسمه وزراة شمس والمقصود ان الشمس تنور جوه بيوتنا وعقولنا وقلوبنا ده فى حالة انقاذ الاسره المصريه
اما بقى حكاية النبوت والغفير اوا لخفير وايا كان المسمى بصراحه شديده وجديده كمان واتمنى انها تتنفذ بس ياريت يكون مش نبوت عادى يكون شومه عشان ياخد واحده على ام دماغه تخليه يقول ان الله حق

ياااارب مصر بكره تبقى احلى بكل الناس اللى فيها واللى خايفين عليها

صباك فل ابيض وياسمين ابيض وقشطه بيضا كمان


زهـــــــراء

Foxology يقول...

وزارة الخفراء دى هتبقى تحت رقابة مين ؟؟ رئيس الوزراء ولا رئيس الجمهورية ؟؟؟

لو كدة انا عاوز الوزارة دى :))

تاج جميل واجابات منطقية وحقيقية

تحياتى

غير معرف يقول...

تاج الثوره

لحاف الثوره

حتى البقالين بيعملوا عروض الثوره

وحاليا وبنجاح ساحق

تاج الثوره

!!!!!!!!!!!!!!!!!!!!!!!!!!!!!!

الظاهر قريبا هنحتاج ثوره للثوره

الازهرى يقول...

يب انا جيت
هل دا معناه انى اتدبست فى التاج ؟
طبعا لأ
يعنى هاجاوب أقول إيه
اانا اعرف ايه عن الثورة ؟
انا كنت نايمم فى بيتنا لا بى ولا على
لقيت الناس بتقول الريس تنحى
ريس مين يا جدعان ما انا سايبه لسه من ساعة
قالوا لأ مش الريس سيد
دا ا لرئيس مبارك
قلت لهم مين دا ، هو دا اللى فى الواسطى بتاع الخردة
قالوا لأ برضه دا رئيس الجمهورية
ودى كانت أول مرة أعرف لما شرحوا لى يعنى ايه رئيس جمهورية اننا عندنا رئيس

يبقى اعمل ايه بالتاج

Haytham Alsayes يقول...

حلو اوى التاج والاجابات كمان



تحياتي

سواح في ملك اللــــــــــــــــــه- يقول...

شفت في اجاباتك
الام المصرية البطلة اللي خايفة
علي بلدها
اعطيكي التاج بجدار ة
وارفعلك القبعة واهنيكي
تحيتي
ياام الابطال

غير معرف يقول...

التاج ده جميل واجابات حضرتك اجمل :)

كل ثوره وانتي طيبه

الاحلام يقول...

انا معكى فى اجاباتك وكلماتك تسلمى ويسلم قلمك الجميل وان شاء الله تظهر بوادر التغيير علينا فى الفتره القادمه دمتى بخير تقبلى تحياتى الاحلام

Unknown يقول...

أولاً أحي حضرتك بشده انك كنت من ثوار التحرير و أمي و أبي و أخي و زوجي كمان كانوا هناك لكن طبعاً لما تيجي من الأمهات بيبقى ليها طعم و معنى تاني مُشرف جداً.
اجابات حضرتك رائعه و أجمل حاجه موضوع الغفير ده ياااريت كان ينفع :)
تحياتي لأجمل شمس في المدونات

rack-yourminds يقول...

سيدتي اجاباتك جميله

وما قمتي به ايام الثوره يجعلك تفخرين به امام نفسك وامام الناس والاهم امام الله يوم العرض عليه
__

بارك الله فيكي

كوارث يقول...

اجابات ممتازة بس كان المفروض يتحط سؤال لو خيروك تدي حاجه لمبارك هتديله ايه ؟
ده كان هيفتح آفاق جديدة للابدااااااع

mrmr يقول...

اجاباتك متميزه يا شمس الشموسه
وبالهنااااا
هههههه

صوت من مصر يقول...

صباحك فراولة صيفى لذيذة متلجة
وحشنى جدا ادخل مدونات مش عارف ليه بس دخلت .
1. اجاباتك كلها زى باقى اجابات اى مصرى فايق .
2. اظن حوار النظافة ده ولو بعد 400 سنة ........... بس فى فى دماغى مشروع كده هبقى ابلغك بيه هيعجبك كتير

Maha Shahen يقول...

انا اول حد هيديلك صوته بس انتى اترشحى واعتمدى علينا
من اجمل ما قريت من لافتات برضو بتاعت ارحل انا عايز اتجوز والله كان فى كتير وكتير صعب افتكرهم كلهم بس الغالبيه كانت بتهلك ضحك والله زى ما بيقولو هم يبكى وهم يضحك
وعلي رأيك والله يا شموسه احنا محتاجين وزارة للنظاقه وقبل ما تكون للشوارع تكون للضماير تكون للقلوب تكون للنفوس ونعمل بقى فيها شركة ومعدات واماكن تلم زبالتنا بدل الشركات الاجنبيه اللي كنا بنصرف ليها دعم علشان تشتغل والله حاجه تفرس

SHAPE YOUR LIFE (ABOALI) يقول...

ماشاء الله
اجابات نموذجية خرجت من انسان غيور على البلد

اهم وزراتين حاليا الاعلام والتعليم
لو انصلح حال التربية والتعليم مع الاعلام
ان شاء الله هاتكون هناك نهضة لكل الناس فى 3 شهور على الاكثر
لان الفطرة تتجه الى النقاء وليس الى الغباء

ربنا يهبك الخير ويقربك منه

كل التقدير

Tamer Nabil Moussa يقول...

اجابات بسيطة

ومن القلب

تسلمى عليها


مع خالص تحياتى

ذو النون المصري يقول...

هاخد التاج و اجاوب عليه عندي

دعاء العطار يقول...

انا كل مااقرا لحد التاج ده والاقيه نزل التحرير ازعل اوووووى انى ماشاركتش بس بجد كان نفسى اشارك بس الظروف بقى

اجاباتك كلها عجبتنى اوى

وضحكت على موضوع الغفير .. فعلاً والله محتاجينه

ربنا يفرحنا كمان وكماااااااان يااااارب

Unknown يقول...

السلام عليكم

طبعا أنت تعرفين أن رد فعلي كان مثلك تماما عند بدء الدعوة العلنية للثورة!!!! ولكن تاني يوم كتبت بوست (كنت غلطان) بس مش للشباب، فما زلت ارى أن الموضوع جاء ارتجالي والله وحده هو الذي قدر له الاستمرار والنجاح، لكن تأسفت للشعب المصري لأنني اعتقدت أنه سيخذل الشباب.. ولكن الحمد لله لم يفعل!!!

استمتعت بمعظم إجاباتك واشترك مع الكثير منها..

جديدة إسعاد يونس .. محدش جاب سيرتها في التيجان اللي قبلك :)

وجديدة وطريفة فكرة الخفراء (في الفصحى بالخاء على فكرة)..

ومتعجب ما شاء الله من قدرتك على متباعة كل هذا الكم من الجرائد!!!

تحياتي أختي (اللي مش عجوزة ولا حاجة)..

sony2000 يقول...

بجد بجد
عندك حق فكل كلمه قلتيها:)

الشوكة الناعمة يقول...

جميل اوى التاج ده
تعرفى ايام الثوره كنت حاسه ان فى مجزره هتحصل مش اكتر ماتخيلتش الصراحه كل اللى حصل
كنت حاسه ان بعد المظاهرات دى كلها اننا هنكون كلنا خالد سعيد فعلا
تحياتى

الربان يقول...

السلام عليكم ورحمة الله

مررت علي بروفايلك الجميل...و كالعادة استفدت من تدويناتك الجميلة

بالتوفيق دائما و لك خالص التحية و التقدير.

الربان

كلمات من نور يقول...

تسلم الأيادي يا ماما ستو

حقيقي التاج داه من أجمل التاجز اللي حصلت في المدونات وبافكر اجمع كل تاج عملناه في ملف من جمال ردودكم كلكم

جزاك الله كل خير

غير معرف يقول...

ثقافة الهزيمة .. العتبة الخضراء‏

و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار.

و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير. ..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!!

باقى المقال ضمن مقالات ثقافة الهزيمة بالرابط التالى www.ouregypt.us