الخميس، 12 أبريل، 2012

ان كيدهن عظيم


ده شعار المرحلة القادمة
بما اني ارشح نفسي يبقا نساء الدولة هيغلبوا علي رجال الدولة
ومش شايفة ناس كتير حجزوا وزارات
ياريت نخلص علشان نعلن التشكيل الوزاري
:))))
نيجي بقا
لحازم والست الوالدة الامريكية واللي هو بيلعب بالقانون في الحتة دي
وماحدش فاهم حاجة
وعلي فكرة اخويا امريكي من 25 سنة
ومافيش ورقة فيكي يامصر تقول انه امريكي
الا لو الخارجية هي اللي خاطبت امريكا
زي حسين سالم كده
اي مصري امريكي لما بيجي مصر بيدخل بالباسبور المصري
ولما بيروح اي حته في العالم بيروح بالباسبور الامريكي
الجرين كارد ده بيتاخد يااما انت مقيم اقامة كاملة في امريكا
يااحد الوالدين امريكي
بالنسبة للزيارة
والدتي بتزور اخويا بقالها20 سنة
وبتجدد التأشيرة كل 5 سنين
ومابنحتجش علشان نزوره الجرين كارد
لما كنت هناك اخر مره ادوني 6 شهور اقامة
ولو عايزة اقعد اكتر بعد الست شهور
اروح كندا وادخل تاني
انا مايفرقش معايا والدته امريكية ولا لأ
لكن يفرق معايا ان واحد عايز يبقا رئيس جمهورية
وبيلعب بالاجراءات ليه وعشان ايه
المقيمين في امريكا وخصوصا نيويورك
يعلموا تماما ان والدته دكتورة في الشريعة امريكية
تحمل جواز سفر امريكي
وللأسف ده ماينفعش يتثبت الا لو هي عملت جريمة وامريكا تقول لأ دي امريكية
زي اسبانيا وحسين سالم
او حد من اولادها او اخوتها يطلب اثبات تجنسها
وطبعا في طرق كتير
مش هتخفي علي اللي عايزين يطيروا
حازم ابو سماعيل
وطبعا الموضوع لازم يطول شوية ويبقا فيه ساسبنس
علشان نتلهي شوية عن اللي بيحصل
في التأسيسية والمحاكمات اللي شغالة اليومين دول
والمرشحين والحركات
والله الموفق والمستعان
:)))

هناك 20 تعليقًا:

الازهرى يقول...

‏‎ ‎يا رب أول تعليق

الازهرى يقول...

‏‎ ‎أنا مش محتاج اختار
إنت عارفة إني مش هأنفع غير في الدفاع

أما بخصوص الحكم
فدي قضية سياسية واللي يدور علي القضاء فيها أكيد مغيب

ابراهيم رزق يقول...

بصى يا شمس الشموس

لو فى تاجر مخدرات خد براءة عشان اتقبض عليه الساعة 9و نصف و الظابط كتب فى المحضر الساعة 9 و نصف و دقيقتين و تصريح النيابة 9 و نصف و خمسةالكل بيبقى عارف انه تاجر مخدرات المحامى و الظابط و القاضى نفسه
انا لايهمنى امه معاها الجرين كارد و لا معهاش
اللى يهمنى انه كذاب
و ان نظريتى صحيحة و انه زى 99 % من المحامين كذابين و مزورين و بيلعبوا با لبيضة و الحجر و قرشهم حرام

سلام يا سيادة الملكة

Dr Ibrahim Samaha يقول...

طب اخو حضرتك أمريكى ازاى؟ ومصرى فى نفس الوقت؟
لان عشان ياخد الجنسية الأمريكية لازم ياخد إذن من وزارة الداخلية طبقا للمادة 10 والا سقطت عنه الجنسية طبقاالمادة 16 من قانون الجنسية!!

المادة 10 بتقول
لا يجوز لمصرى أن يتجنس بجنسية أجنبية إلا بعد الحصول على إذن بذلك يصدر بقرار من وزير الداخلية وإلا ظل معتبرا مصريا من جميع الوجوه وفى جميع الأحوال ما لم يقـرر مجلس الوزراء إسقاط الجنسية عنه طبقا لحكم المادة 16 من هذا القانون.

ويترتب على تجنس المصرى بجنسية أجنبية، متى أذن له في ذلك زوال الجنسية المصرية عنه.


جزء من المادة16
يجوز بقرار مسبب من مجلس الوزراء إسقاط الجنسية المصرية عن كل من يتمتع بها في أية حالة من الأحوال الآتية:
1. إذا دخل في جنسية أجنبية على خلاف حكم المادة 10.


اذا لو والدة الشيخ حازم اخذت الجنسية الامريكية يبقى فى وزارة الداخلية ما يثبت ذلك!

Dr Ibrahim Samaha يقول...

والمحكمة قالت ان الداخلية قدمت اوراق خلت من اى شىء يثبت ان والدة الشيخ تجنست باى جنسية اخرى!

حضرتك هتقولى ان معظم المصريين المغتربين كده معاهم الجنسيتين!

طيب عشان الحصول على الجنسية يشترط تسليم الجرين كارد لاستلام جواز السفر الأمريكى بعد الحصول على الجنسية!!

طيب الشيخ حازم معاه الجرين كارد
يبقى خادت الجنسية ازاى؟

خالد يقول...

الحل بسيط للي عايز يثبت إنها مش أمريكية
1- وزارة الداخلية تطلع مستند يثبت إن أخته -اللي هو اعترف بنفسه إنها تحمل جواز سفر أمريكي- غير مقيدة في سجلات مصلحة الجوازات و الهجرة على إنها مزدوجة الجنسية و بكده هيظهر للعالم كله إن فيه ثغرة فعلا في قوانين الإجراءات عندنا
2- أي مواطن مزدوج الجنسية -يفضل جنسيته الأخرى أمريكية- يذهب لمصلحة الجوازات و يستخرج شهادة بإنه غير مزدوج الجنسية و بعدين يطلع في أي مكان (تليفزيون أو صحافة أو إنترنت) و معاه الباسبور الأجنبي بتاعه و شهادة الداخلية اللي بتثبت إنه لا يحمل أي جنسية أخرى

وقتها هنعرف إذا كان فعلا استغل ثغرة قانونية أو لا

غير معرف يقول...

هو انتو حازم واكلكو كده ليه

انتوا عايزين حازم عشان هو هيعرف يمشيكم ازاى
عايزين تتصرمحوا و تخرجوا ززى مانتوا عايزين
حازموووووووووووووووووووووون

zizi يقول...

شمس الشموسة ..صباحو عسل وسكر سنترفيش ..طيب مش تقوليلي من بدري شوية على حكاية الوزارة دي عموما انا شايفة التعليم ما نفعش معاه الرجالة يمكن تنفع العبدة لله وادينا بنجرب ابتدائي خمس أو ست سنين مش فارقة مهو كده كده العيال بيطلعوا مش عارفين يكتبوا اساميهم ..اما بقى الثانوية العامة ممكن نعملها تلات سنين يعني من ساعة ما يدخلوا الثانوي وهمّ في رباط "جزمة"الى لما يسيبوها للجامعة العمالية ..ويكون ابهاتهم كلهم خلاص جابوا جاز وقعدوا يولولوا في السيدة نفيسة ..وانا بقى اكون خدت على كل كتاب اتطبع او لم يطبع او في نيتهم طبعه مبلغ وقدره وبس يا حبيبتي يا شموسة اطلع بقى واعمل بيزنس وتبقى العملية قشطة ومش عايزة منك اكتر من سنتين والله لو حتى حلفتوا عليا مانا مكملة اصل انا نزيهة واحب قوي ادي الفرصة لغيري إنه "يطول" التعليم ..بذمتك شفتي وزيرة مسالمة زيي ..احجزيلي في اول صف في الوزارة لحد ما اجيلك ..تحياتي

Mohamed Amer يقول...

متهيالي جبتي من الاخر

شمس النهار يقول...

ماشاء الله ماشاء الله علي الدفاع المستمين عن حازم :))))

انا كنت هرد بس تعليق ابراهيم رزق كافي
:)))

لازم نفرق بين الفكرة
وبين الشخص
علشان نعرف نحكم صح
بس هقول ايه احنا المصرين لما نحب حد نعمله ملاك

شمس النهار يقول...

انا هقول لدكتور ابراهيم بس ان مافيش مصري بيعمل اللي انت بتقوله ده اصلا
وانا عارفة بقولك ايه

مصري جدا يقول...

هو النساء لسا هيغلبوا الرجاله؟؟؟؟؟؟؟؟؟؟؟؟؟؟؟


قضي الأمر من زماااااااااااااااااااااان



بالنوسبه لوضوع الجنسيه ده

بصرف النظر عن أمه هو شخصيا تبع مين؟

أعتقد ده السؤال الصحيح

مصري جدا يقول...

الغير معرف


عندي رد بس احتراما لصاحبة المدونه هحتفظ بيه لوقت اخر

رؤى عليوة يقول...

ملكتنا الجميله

طبعا فاكرة انى عايزة وظيفه مش لازم وزارة وفيه طلب تانى ممكن بعدين بقى هههههههه


المهم بقى
حتى لو انا مش هرشح ابو اسماعيل بس بجد مبسوطه انه فاز بالقضيه

الموضوع ليه لا كان متلفق لان شعبيته كبيره

البلد لسه من غير رابط ولا ظابط ومستنيينك بقى هههههه


دمت بخير

سواح في ملك اللــــــــــــــــــه- يقول...

شموسة البلوجر

والملكة المحتملة لرئاسة الجمهورية

بصي ياست الكل

احنا بقي زي مانتي قلتي نقلبها ملكية

وفي انجلترا والدول المتقدمة

منصب الملكة منصب شرفي

يعني رئيس الوزراء هو الكل في الكل

وانتي طبعا وعدتيني بمنصب رئيس الوزراء

وانا موافق طبعا

من اجل خدمة الوطن وعشان الوطن في ازمة

قررت احمل عبء رئاسة الوزراااااء

واضجي براحتي وحريتي عشان هااااذا الشعب

العظيييييم

تحيتي ياشمس البلوجر

وملكتنا المحتملة

Dr Ibrahim Samaha يقول...

حازموووووووون برده :)
منا قولت لحضرتك اغب المغتربين معاهم الجنسيتين ومبيعملوش زى ما انا قلت :)

بس فيه اوراق مع الشيخ حازم تثبت انها ليست امريكية منها تذكرة علاج فى امريكا وتم علاجها على انها مواطنة غير امريكية..معاه الجرين كارد..واثباتات اخرى

والداخلية والحمد لله سلمت محامى حازم ابو اسماعيل اثبات انها لاتحمل جنسية اخرى..

صاحب الحبر الأسْوَد يقول...

ياريت التشكيل يتم بسرعة عشان الشعب مستني يتصرمح براحته : )
احنا كشعب بنموت في الصرمحة الحقيقة
نعم للشهيصة وشامسووووووووووووون حتي النهاية

بخصوص جنسية والدة الشيخ حازم فانا متفق معاكي جداً ان كان في البوست او التعليقات

بس المشكلة ان ماهنش عليه ولا علي حد من انصاره انه يعترف بان القانون نفسه عقيم عنصري غير متعارف عليه في المجتمع المصري من دساتير او عادات اوتقاليد او شرع ولا في اي حتة في العالم
سلطة زبادي بالبيض والسمك

وبقيت الفكرة انه يثبت ان امه مش امريكية وطززززز في اخته اللي ابنها وحفيدها هيعيش طول عمره حاسس انه غير نقي الجنسية وممنوع من الترشح للرئاسة في مصر ومسموح له في امريكا
مع انهم ممكن يكونوا شرف وفخر للعرب والمسلمين والمصرين واكثر وطنية من غيرهم

بس للاسف المصلحة اولاً

الاحلام يقول...

الكل له الحق انه يترشح والشعب كله له الحق انه ينتخب الى هو حاسس انه هيجعل بلدنا جنه الله المستعان ندعوه بان يولى من يصلح فى الفتره القادمه لانها فتره حساسه جدا جدا
تحياتى ابوداود

re7ab.sale7 يقول...

اولا انا لا يهمني حازم ولا غيره
اد ما يهمني انهم اصلا معرفوش الا دلوقت
يعني اصلا دي لعبة
وكل اللي متأكدة منه ان كل المرشحين عايزين المنصب وبس
وبعدين المفروض ان يكون في شروط مقنعة وخاصة ومحددة ومش اي حد يرشح نفسه
احنا مش هنعيد القرف بتاع انتخابات اتلشعب والشوري اللي دخل فيها بتوع النظام السابق كأن شيء لم يكن
بالنسبة للترشيح
انا بطالب بدولة نسائية وسيبك م الرجالة دي
احنا الي هنظبط البلد
وبطالب تاني بالتربية والتعليم
واذا حد خدها
يا ستي يا شموسة انا هقولك ادين التعليم العالي وبلا شالبحث العلمي اصلي مبحبوش
هههههههه
بجد عايزة التربية والتعليم يا التعليم العالي
بقالي تسعتاشر سنة خدمة ف ثانوي ...قصدي ف التعليم وقرفانة منه وم اللي بيحصل فيه
فيمكن ربنا يعدل حاله علي ايدي

فافى يقول...

بصى انا بتضايق اوى من حكاية اللى عايز يطيره دى مع احترامى لرأيك لانى لو انا كنت فى ايدى سلطه كنت لفقت له100 تهمه عشان يطلع من السباق الرئاسى لو حد عملها وطيره يبقى كتر خيره ده واحد من الناس اللى بتتعامل مع المرأه على انها كلها على بعضها عوره ووجها مثل فرجها وعشان كده لازم نقمعها ونلئحها فى البيت عشان هى ماتنفعشى لحاجه غير الفراش
وبس
وواحد بالعقليه دى سايب الناس اللى بتاكل من الزباله وقاعد يحرم المكياج وغيره من الحاجات التافهه اللى زى بيبسى كده
حاجه لطيفه اوى اننا نقضى نص ساعه عشان بس نتكلم على بيبسى فى برنامج المفروض انه دينى هو ده اللى هايحكم مصر ؟؟؟؟؟
لهث وراء السلطه لا يتفق مع زهد العلماء
بصى من الاخر ياكشى يولع حازم ابو اسماعيل ومع عميق شكرى للى طيره
تحياتى :)