السبت، 11 أغسطس، 2012

لسه بدري

الايام بتجري
والله لسه بدري
ياشهر الصيام
الاغنية دي مرتبطة معايا بالبيت الكبير
بيت جدي لأبويا
وكل اعمامي وزوجاتهم واولادهم وعماتي وازواجهم واولادهم
وجدي وجدتي الجميلة جداااا
ايوة كانت ست جميلة
شديدة البياض وانفها كانت صغيرة جدااااااااا
وكلنا ملمومين حوالين التربيزة الكبيرة جدااااااااا
والاغنية دي شغالة في الراديو الجميل
اللي كان علي رف خشب ورد
وعليه مفرش ابيض جميل
عليه رسم بالحرير ومنشي ومكوي
الراديو كان شكله جميل حاجة تفرح
بالرغم ان اللمة اتفركتش
وانا كبيرة وام كمان
الا اني الي الان لو سمعت الاغنية دي
احس بحنين كبير للبيت الكبير اللي اتباع اصلا
والي التربيزة الكبيرة
ولجدي اللي كان بيقعد علي راس التربيزة يضحك معانا
فاكرة ضحكه وكلامه لحد النهاردة
رغم مرور 29سنة
حتي بعد مابقيت تيته
ابكي لمجرد سماع الاغنية
الحنين للبيت الكبير
ولجدي ولجدتي
ولأعمامي وابي وعمتي
اللي رحلوا عننا
وتركوا لنا الذكريات ِ
لنترحم عليهم وعلي زمن اللمة
الجميلة الدافية
والله لسه بدري بدري
ياشهر الصيام

هناك 32 تعليقًا:

rack-yourminds يقول...

البركه فيكي انتي بقي واولادك وتعملوا عيله كبيره

كل سنه وحضراتكم بالف خير

faroukfahmy58 يقول...

شمس نهارنا وضياء انوارنا
عزم شهر رمضان ان يرتدى لباس المغادرة
والله لسه بدرى والله ياشهر الصيام
خاطرتك حركت فىّ الشجون الى من غادرونا بدون عوده
رحم الله الراحلين واسعد الله الباقين
وكل رمضان وانت طيبه يا شمس

غُفرَانْ يقول...

الذكريات تَتجددُ دائماً في هكذا مناسبات :"(
و راح رمضان حاملاً معه الكثير ~
اسـال الله أن يتقبله منا

سواح في ملك اللــــــــــــــــــه- يقول...

كل سنة وانتي دايما بخير ياشموسة

وتعمليانتي نفس اللمة انتي والعائلة الجميلة

ونور الدين واخواته وولاد خالاته

تحيتي ياأطيب شموسة

semsma ahmed يقول...

رجعتيني معاكي لزمن جميل انا كمان بحس بالحنين لأيام زمان لما كنا بنتجمع مع اللي بنحبهم ومهما عدي من العمر برضه هنفضل نشتاق لأيام زمان.
ربنا يتقبل من ومنكم صالح الاعمال

رؤى عليوة يقول...

الله على احلى الذكريات
كتير بفكر فى لمتى انا واخواتى دلوقتى واقول يارب نبقى جدات وجدود ونقعد نفتكر

يمكن انا معشتش لمة الجدود ولا لمة الاعمام والعمات
لان ببساطة لا فيه اعمام ولا عمات ولا خالات والجدود الله يرحمهم :)

كل سنة وانتى طيبه
وهى الدنيا كده شهر ولازم تعدى
ربنا يعيدعه علينا سنين كتير

دمت بخير

أحمد أحمد صالح يقول...

ربما إنشغالنا بما هو آت أطال فترة تصفحنا لكتاب الذكريات، ربما هو سؤال احترت فيه -و ربما الجميع- و هو ، لماذا دوما الذكريات جميلة ؟!
و الغريب اننا قد لانجد أيامنا أو حياتنا الأن جميلة و لكن ربما أولادنا أو أحفادنا من بعدنا يتغنون بجمال تلك الحياةو تلك الأيام التي قضوها بصحبتنا !
..
أشتاق لبيت جدي الذي أصبح مغلق خرب و لم أذهب - وربما غيري- إلية منذ سنوات طوال، أشتاق لجدي و حكاياته التي لم أكن أمل منها أبدا و لدروسه في الحياة التي تلقيتها في سن مبكرة جدا،و أشتاق لجدتي بطيبتها و جهلها الذي كانت تعتبره أكثر العلوم تقدما !!
..
كل سنة و انت بألف خير أستاذة شمس،و ينعاد عليكي و على كل الأصدقاء و على كل الأمة الاسلامية بالخير و اليمن و البركات..تحياتي.

حلم بيعافر يقول...

كل سنةوانت طيبة
الايام بتجرى

لـــولا وزهـــراء يقول...

ست الكل
كل سنه وانتى بخير وطيبه
باعشق الاغنيه دى بشكل غير عادى وخاصة لما بتقول يا هالل بفرحه ومفارق بفرحه
باخاف ان رمضان القادم اكون فقدت حد غالى عليا او حتى اكون انا تحت التراب ومش اقدر اصومه وارجع واقول كل ايام العمر بتجرى بسرعه بس على رأى ماما بتقولى احنا اللى بنحسب ايام رمضان ووقته عشان كده بنحس ان الايام جريت بسرعه
يارب تعود عليكى الايام بفرحه وسعاده وخير


زهــــراء

حمدى جعوان يقول...

والله انا كمان نفس الحنين لايام زمان ... كل سنة وانتى طيبة
:)

شمس النهار يقول...

*rack-yourminds

الله يبارك فيك

ايوة ماهي كده جيل يسلم جيل

كل سنة وانت طيب وبخير وصحة وسعادة

شمس النهار يقول...

*faroukfahmy58
رمضان بالذات مصدر شجون كثيرة

وقد ارحل انا واكون مصدر شجون لمن هم بعدي
هي دي الدنيا
جيل بيسلم جيل
المشكلة ان كتير الانسان بيحس بغربة من غير الراحلين

كل سنة وحضرتك طيب

شمس النهار يقول...

*غفران
حلو اسم غفران ده
:)
حولتيني كل شوية اسم

انا اعشق الذكريات
تقدري تقولي هي ونيسي الدائم

شمس النهار يقول...

* سواح في ملك اللــــــــــــــــــه
وانت بخير وصحة وهنا ياخالد

ربنا يكرمك
وان شاء الله انت كمان تعمل اسرة كبيرة جميلة

وشكرا علي دعوتك الجميلة:)

شمس النهار يقول...

*semsma ahmed

دايما زمان اجمل
علشان مش بنفتكر منه الا الحاجات الحلوة
كمان ذكريات الطفولة اجمل علشان من غير مسؤليات
:)

شمس النهار يقول...

*رؤي عليوة
ربنا يكرمك وان شاء الله اللمة تكبر
وتتجمعوا مع الاولادكم واحفادكم
واولادكم يبقالهم ذكريات معاكم

شمس النهار يقول...

*احمداحمدصالح
الانسان دايما بيفتكر الذكريات الجميلة والعقل ينحي الذكريات الغير جميلة جانبا اي بيعمل لها بلوك

البركة فيكم الاحفاد لموا بعض وروحوا نضفوا البيت وافتحوه واتجمعوا فيهم
امبارح كنا بنقول لو سابوالنا البيت الكبير كنا رحنا فتحناه واتجمعنا فيه

كل سنة وانت بالف خير

شمس النهار يقول...

*حلم بيعافر

اهلا اهلا
ازيك انت فين يارب تكون بخير

كل سنة وانت بخير وصحة وسعادة

شمس النهار يقول...

*لولا وزهرا
ربنا يخليكي ويبارك لك في عمرك

وان شاء الله ماننقصش حد خالص

وربنا يكرمنا بصومه وقيامه ويتقبل منا

كل سنة وانتي طيبة وبخير وصحة وسعادة

شمس النهار يقول...

*حمدي جعوان

الذكريات هي عمر الانسان
والحنين ليها هو روح هذا العمر
كل سنة وانت طيب وبخير وصحة وسعادة

ذو النون المصري يقول...

لسه بدري فعلا
بنتمني ان السنه كلها تكون رمضان
بس يا خسارة
كل عام انتم بخير
تقبل الله منا و منكم

P A S H A يقول...

"والاغنية دي شغالة في الراديو الجميل
اللي كان علي رف خشب ورد
وعليه مفرش ابيض جميل
عليه رسم بالحرير ومنشي ومكوي"

__________________________


الله بجد على الجمال .. وصفك في منتهى الروعة والله .. حلو جــداً .. ومعبر أوي :))
تسلمي ع الكلمتين الجامدين دول :))

* بس ما عرفناش برضة بيعتوا البيت على كام ؟؟
D:

الازهرى يقول...

روقااااااااااان

كانت أيام جميلة

وذكريات رااااااااائعة

شمس النهار يقول...

*ذو النون المصري

نتمني ان نكون كل السنة في ثواب رمضان
كل سنة وانت طيب

شمس النهار يقول...

*P A S H A

:)

كل ايام ربنا جميلة بس الايام دي لما بفتكرها بطلع مني كلام انا بستغربني اني كتبته
:))

البيت اباااااااااااع ب.....
:)))
مش فاكرة :))

شمس النهار يقول...

*الازهري

ايوة روقان الروقان

وجمال الجمال
:))

Bent Men ElZman Da !! يقول...


الاغنيه دى بتوجعنى اووووى
مش بحب اسمعها خالص
بالرغم انها بتحسسنا بقرب العيد خلاص وده بالنسبه لينا من واحنا اطفال حاجه حلوه اوى
بس فكره ان رمضان خلص بسرعه كده مش بحبها
كل سنه وحضرتك طيبه :))

اندروميدا يقول...

ازيك حضرتك يا فندم ... وفعلا ... رمضان زائر خفيف ... يمضي سريعا في كل مرة ... رغم ما يأتينا به من خيرات .... أسأل الله ان يتقبل منك الصيام والقيام وصالح الأعمال .... وان يرزقك الفرحة بالعيد المبارك ... انتي وكل اسرتك الكريمة .

كل عام وانتم بخير ... وعيد سعيد .

سواح في ملك اللــــــــــــــــــه- يقول...

كل سنة وانتي طيبة ياست الكل بمناسبة عيد الفطر المبارك

اعاده الله عليكي وعلي اسرتك بالخير والبركة

أمل حمدي يقول...

كل عام وأنت بخير وسعادة يارب شموسة وكل حبايبك يارب

منجي باكير يقول...

أهلا

كل عام و أنت بخير و عافية و رضاء

اللهم وحّد الأمّة و أزل الغُمّة

منجي

http://zaman-jamil.blogspot.com/

MindEktomia يقول...

لما المشاعر بتكون حقيقية .. بتبقى كلمة واحده او لحن فى اغنية كفاية اوى عشان يرجع الحنين للماضى ..