طلبتني صديقه وهي منزعجه
وقالت لي حطيتلك صوره علي الفيس شوفي المكتوب فيها
رحت لاقيت الصوره المنشوره دي
طلبتها وقلت لها ممكن تكون متفبركه علي الرجل
منين عذراء ومنين متزوجه
واحنا عارفين كويس ان دي معجزة سيدنا عيسي وستنا مريم
ومذكوره بالنص في القرآن
لو اشاعه ليه ماطلعش وكدب واتشير التكديب
ولو صح تبقا مصيبه سوده وحطت علي دماغنا
مافيش نص بيقول ان كان عندها 12 سنه
وحتي لو كان عندها 12 سنه
هل نقيس المعجزات بالحياة العاديه
اومال هي معجزات ليه ان شاء الله
بجد
المشايخ دي لازم يتحط لهم حد
زي الدكاتره ماينفعش يمارس المهن الا لماياخد تصريح علمي
زمان الاذاعه المصرية ماكانتش بتسمح لحد يغني الالما لجنة الاستماع تديله تصريح
اوم احنا نسيب حفنه من انصاف المشايخ تلعب في رؤس الناس كده
كل ده علشان يجوزوا البنات من 9 سنين
هو البلوغ بلوغ جسدي فقط
البلوغ بلوغ عقلي اكتر منه جسدي
مسؤولية الزواج وتحقيق السكن منها
هينفع تقوم بيها طفله
الحمل والولادة هينفع تقوم بيها طفله
ده بجد شذوذ واسفه اني بقول كده
علشان اللي تهون عليه ضناه يعرضها للزواج وهي لسه طفله يبقا انسان شاذ فعلا
وماحدش يقول لي ستنا عائشه وسيدنا محمد عليه افضل الصلاة والسلام
هتكلم في الموضوع ده التدوينه الجايه
دلوقتي انا متنرفزه ودي سيره عطره ماينفعش نتكلم فيها ساعة غضب
هناك 23 تعليقًا:
....
بصى انا شايف ان الامر مضحك اصلا
تسعه ايه الى بيتكلموا فيها
ولو كان الاخوة الشيوخ والدكاتره بيتكلموا فى زواج الانثى تسع سنوات
سابوا ليه اغلب بنات مصر عوانس وتخطوا الخامسه والعشرين
يا عمنا الشيخ يا عم الجامد جداً اعتقد كونك تعف واحده اوشك قطار الزواج على فواتها اعظم بكثير من ان تنكح من تحلم بمدينه الملاهى وعروسه المولد وبلالين العيد
اخوانا اعضاء التأسيسيه استقيموا يرحمكم الله
او لا تستقيموا يأخذكم الله ويبدلنا خيراً منكم
تحياتى
....
شمس الشموس
ريليكس ريليكس ريليكس
اولا دول مش شيوخ
الشيوخ الشيخ الشعراوى الله يرحمه
الشيخ عبد الحليم محمود الله يرحمه
الشيخ شلتوت الله يرحمه
الشيخ محمد المسير الله يرحمه
الشيخ فرحات المنجى الله يرحمه
الشيخ عطية صقر الله يرحمه
ايه ده هما كلهم الله يرحمهم
كده طب ربنا يرحمنا احنا منهم
تحياتى
شموسة الطيبة احناعارفين ان الكلام ده غير منطقي
ولايحدث وأن حصل فبيحصل من اب عايز يبيع بنته
والللي عاوز يبيع بنته هيبيعها بجواز او من غير جواز
انما الراجل المحترم اللي عنده كرامة
مش ممكن يبيع اولاده ولا بملايين الدنيا
اما من ناحيةهذا الشيخ المغمور
فلايجب ان نحمل ألاسلام شطحات احد
ولايحاسبه ربه
*momken
كل كلمه من كلامك صح
تخيل ان دول اللي هيضعوا الدستور
مش معقول
تخيل ان دول اللي ناس بتسمعهم دلوقتي
الناس البسطاء جداااااااا
الناس دي بتوصل لهم وبتقنعهم
العيب مش عليهم العيب علي اللي سايبهم يعملوا كده
وحسبي الله ونعم الوكيل
*ابراهيم رزق
ريلاكس ايه بس
دي ناس مش طبيعيه خالص
هم دول اللي بيعتلوا المنابر ياربي
كل الناس الحلوة ماتت
تفتكر الشيخ الشعراوي لو كان عايش كان عمل ايه
فعلا ربنا يرحمنا قادر كريم
*سواح في ملك اللــــــــــــــــــه
ياخالد احنا عارفين
لكن البسطاء من الناس
مايعرفوش
والناس دي هي اللي بتوصل لهم بيروحوا لهم لحد عندهم
وهمه دول القوة التصويتيه في البلد
ولو شطحاته علي نفسه ماشي
انما دول بقوا همه الموضه واللي بيتكلموا وكلامهم مسموع
سمعتش حد من الفقهاء الكبار اتكلم عن الكلام الفارغ ده ؟؟؟
كل خايف طبعا
المصيبه انه في التأسيسيه يعني دي عقليت اللي بيحطوا الدستور
ربنا يستر
ماهى كل المصايب دى جايه من تحت راس تدخل الدين فى السياسه وهو ده اللى نقصده بالتدخل اننا نحط زيد على عبيد
حاجه تقرف بجد !
*مذكرات موززة عانس
همه لاعندهم علم بالدين ولا علم بالسياسه
ولا تتنرفزى ولا حاجه
الموضوع ان سقف الدار حيقع على دماغنا كلنا
الموضوع يا ستى ان المشايخ دى بتقول الكلام الشاذ ده عشان الفضائيات تستطيفهم وطبعا عارفه ايه معنى ان واحد يطلع فى برنامج فى الفضائيات .. فلوس .. فلوس .. فلوس كتيييييييررررره بالآلاف وكلما شذ الشيخ اللى تحت العمه بتاعته قرد زادت الفلوس وبرنامج على برنامج .. شوفى بقى العداد يعمل كام ميت الف ويجعله عامر
بصى .. بينى وبينك انا حاسس ان هى متفبركة .. فتنة ..
هتقوليلى الراجل ما ردش ليه ؟ .. والله عندك حق
بس هقولك مش كل الناس ليها فى جو النت والفيس بوك .. وممكن حجات كتير تفوتها
واخدة بالك ..
فكرتينى بحاجة حصلت معايا
من كام سنة كده لما خلصت معهد اعداد الدعاه اول مرة اخرج فيها قابلت شيييييييخ من بتوع الايامدى المفروض انه هو واخوه ائمة فى مساجد مش فاكرة كانت البداية ازاى بس اللى فاكراه انى غسلتهم يومها وامهم كانت موجوده متضايقة طبعا بس معرفتش ترد وفى الاخر غيروا الكلام
للاسف لما نعرف ان الفاشلين واللى جايبين اقل المجاميع فى الثانوية هما اللى بيدخلوا اصول دين يبقى لازم نتوقع الانحطاط الاخلاقى والثقافى وربنا يسترها بقى
انا بتكلم بشكل عام مش على الصورة دى بالذات لكن الواقع فيه اكتر من كده
بابا واخواتى كل يوم جمعه يلفوا على اكتر من خمس مساجد فى بلدنا عشان يختاروا الخطيب واهو كله زى بعضه
معلش معلش
قدرنا
دمت بخير
فى جيل مشايخ طالع كدة معلوماته صفر وبيدخل فى اى حوار ولسانه شبرين وبيجاهر بالجهل
مشايخ زمان كانوا بيتقوا ربنا وبيفتوا صح دلوقتى الواحد بقا بيخاف يسأل شيخ فى اى مسألة يفتى فيها غلط ويودينا فى داهية
صباحك ثكر
*فشكووول
اهلا بيك ياعمنا
:)
سبحان الله
شيخ ويشتري الدنيا
ويبيع علمه ودينه
اذا نحن في زمن الفضائيات واللاحاليح
:)
*well
عايزة اقولك انهم عندهم لجان الكترونيه وبيقروا كل حاجه
وعارفين اللي بيتكتب
وساعات بحس انهم بيعملوا كده علشان البلبله
ويلهوا الناس بقضايا فرعيه
*رؤي عليوة
اهلا انتي فين مش باينه
يارب يكون بخير
تاعلي اسمعي السبع مساجد اللي حواليه
ماتلاقيش خطبه واحده تقدري تسمعيها اصلا
ربنا يستر علي البلد دي بجد
*الست حشريه
فعلا انا واحده قالت لي
انا مابحبش اسأل المشايخ دول
انا بحب اسأل الدكتوره سعاد صالح
ست عارفين تعليمها جاي منين
*الازهري
يا اهلا يااهلا
:))
المصيبة بالنسبة لي مش انه شيخ افتراضي
المصيبة انه عضو باللجنة التأسيسية للدستور
هم دول اللى المفروض بيكتبو مستقبل مصر؟؟؟؟؟؟؟؟؟؟؟؟
*MaNoOoSh
ماهي دي مصيبتي
ان هو بيوصل للناس وانه عضو في التأسيسيه
:(
اكتر من نص الحاجات اللي سمعنها في الفتره اللي فاتت طلعت اشاعات واخر اشاعه كانت بتاعت المتحدث الرسمي للرئيس مطلوب في مكتب النائب العام بتهمة قتل الثوار عشان كده بطلت اقرا اخبار وصور بفضل اني اسمع من الشخص سواء من الاسلاميين او الليبرالين او الاشتراكيين او اي حد
*eng_semsem
الحياة بقت كلها اشاعات
بس للأسف لازم يترد علي الاشاعات دي
علشان دي اشاعات في الصميم
الفرس حاولوا يشوهوا بعض الدين فادسوا اخبار عن السلف الصالح
ومن اكتر الناس اللي شوهت سيرتهم هارون الرشيد
وكتب كتير دافعت عنه حتي تصلنا السيره الصح عنه
للاسف جهلنا بديننا اصبح حاجة تكسف
مريم العذراء ام سيدنا عيسى بعد انجابها لسيدنا عيسى ببضع سنوات وعندما كانت بالثانية عشر من عمرها تزوجت بالفعل من يوسف النجار وكان بالتسعين من عمره ومن لا يصدقني يدخل على مواقع المسيحين على النت ويضع معلومة على جوجل زواج العذراء من يوسف النجار
إرسال تعليق