الأحد، 18 نوفمبر 2012

مش هنعمل اي حاجة

الحلول موجوده
بس ماحدش بيفكر فيها
ليييييييييييييه
؟؟!!
يعني موضوع القطارات والمزلقانات اللعينة
يتحل بمنتهي اليسر
كل منطقه فيها مزلقان
يتعمل لها مزلقان من بتوع زمان
اللي كان له رافعتين ينزلوا اول ماجرس المزلقان يرن 
ان في قطار جاي
ومايسمحوش لأي حاجه علي اربع عجلات
ولا اي بني ادم يعدي
هيقولوا منين الفلوس
يخربيت كده 
ماانتوا بتدفعوها تعويض اهو للضحايا
ومع هذا 
ماشي
نلمها من الجمعيات الاهليه اللي في المنطقه 
اللي هيتعمل فيها المزلقان
ننشط شويه العمل التطوعي الجماعي
نصحصح شوية رجال الاعمال معانا
ومافيش مانع نعلق لهم اعلانات في المزلقانات دي 
ببلاش طبعا 
نظير تبرعهم لعمل المزلقان
لو بنحبها صح 
هنعمل كل شئ صح
 وبسهوله
---------
اسيبكم مع يابلادي انا بحبك يابلادي 
الاصليه اللي متاخد منها الاغنيه الجديده بتاعة الثورة
من فيلم العمر لحظة 
وتصوير لمدرسة بحر البقر

هناك 16 تعليقًا:

محمد سلامة يقول...

والله الحلول كتير بس اللى يعمل
ويخلص فى العمل

عمرو يسرى يقول...

وهى ديه المشكله للاسف ان احنا معندناش فلوس نتلافى بيها الحوادث لكن عندنا فلوس ندفعها تعويض لضحايا الحوادث
وهذه هى المسخره المصريه
تحياتى

لــــ زهــــــراء ــــولا يقول...

الاغنية مبكية جداااااااا

واقتراحك سليم يارب يوصل للمسئولين بدل اللخبطة اللي احنا فيها دي


لولا

رحاب صالح يقول...

غلطة
مشتركين فيها كلنا
مش غلطة عامل محطة
ولا سواق قطر ولا سواق اتوبيس
الغلطة مش غلطة عامل محطة دي غلطة ناس كتير
غلطة وزير مش عارف ان في عامل انسان له احتياجاته من النوم والراحة وبيخليه يشتغل اتناشر ساعة
غلطة سواق واخد معاها اضعاف اضعاف العدد
غلطة ناس عايزين يعدوا ف الغلط وبس لان في ناس بتعدي من المزلاقان غصب عن العامل
غلطة اهالي سكتوا كتير عن الغلط
غلطة رئيس انه عارف الغلط وساكت عنه

سواح في ملك اللــــــــــــــــــه- يقول...

طب وليه ميتعملش كوبري اونفق فوق او تحت اي مزلقان

شمس النهار يقول...

*مسلم مصري

لا في حد عايز يعمل
ولا حد مخلص لأي حاجه في اي حاجه

شمس النهار يقول...

عمرو يسري

ده هو القانون الغير موضوع
طول مالالدنيا ماشيه اوكيه
لماالمصيبه تقع يبتدوا يتصرفوا بقا
ولعلمك همه يومين وكله هينسي

شمس النهار يقول...

*لولا وزهرة
ماهي دي الاغنية الاصليه
اللي اعادوا توزعها وعملوهالشهداء الثورة

رؤى عليوة يقول...

اااااه والله افتكرت بحر البقى امبارح

واهالى الضحايا حاجة تقطع القلب

ليه هو السؤال اللى مبقاش ينفع نسأله فى بلدنا

الله يهون عليهم وعلينا

دمت بخير

شمس النهار يقول...

*رؤي عليوة

ربنا يصبر قلب اهالي الضحايا

Unknown يقول...

ثورية حد الجنون
هل لي بشرف تشجيعك وزيارتك

هبة فاروق يقول...

اعتقد ان اقتراحك هو ابسط الحلول ولكن لا احد يسمع او يستجيب
حسبى الله ونعمه الوكيل
وربنا يصبر اهالى الاطفال الابرياء

Mahmoud Ahmed يقول...

هو مفيش حاجه في البلد دي بتتعمل الا بالتبرعات من الجمعيات الاهليه

امال الحكومه دي بتعمل ايه ؟
امال الفلوس بتاعه البلد دي بتروح فين ؟؟
يعني مبارك على كده كان مظلوم بقي و احنا كنا مفتريين ؟؟

شمس النهار يقول...

*mhomed elwakeel

اهلا بيك نورتني
وحاااضر طبعا اتشرف بزيارة مدونتك

شمس النهار يقول...

*هبه فاروق

مصر رجعت تاني ماحدش سامع حد

رجعنا تاني نكلم نفسنا

شمس النهار يقول...

*Mahmoud Ahmed

فلوس البلد دي بتروح علي تأمين المسؤلين

لكن مزلقان يتكلف 150 الف جنيه لأ