الأحد، 14 أبريل 2013

اللي يحب مصر

بنتي نشرتها لي 
كانت قاعده معايا وانا بكتبها
 قالت لي هاخدها انشرها 
وعلشان تتنشر لازم ننشرهااحناالاول
المهم اخدت التدوينه ونشرتها
زي ماهي كده
:))
بس لمابعتتها نشروها باسمها
:))
(وادي التدوينه اهي)
اللي يحب مصر مايخربش مصر
الكلمه دي اتكررت كتير في بدايه الثورة
وكانت تمام التمام
ايه بقا اللي جري
؟؟
مافيش مانع تتظاهر تعتصم اعمل اللي انت عايزه
ولكن
تخريب ليه؟
انت بتتظاهر عايز حقك ليه تعتدي علي حقوق الاخرين
انت علشان تتظاهر 
تحرق عربية واحد تاني الله اعلم شاريها ازاي
ولا لسه عليه اقساط
انت علشان تتظاهر تخلي واحد غلبان يقفل محله اللي بياكل منه عيش هو واولاده
ماتتظاهر بعيد عنه ولا بطريقه ماتضروش
ليه مطالبتك بحقك اعمتك عن حقوق وحريات الاخرين
انا مش ضد التظاهر بالعكس معاه قلبا وقالبا
ولكن
ضد التخريب والحرق والتكسير والاضرار بالمال العام والخاص
المال العام :اي خراب حصل لأئ مبني عام هيتصلح من جيوبنا وعلي حساب حاجات تانيه عائده علينا
المال الخاص:اي خراب حصل لأي شئ يملكه مواطن هيتصلح علي حسابه والوقت صعب وحسابه ده اليومين دول يادوب مكفيه
بحزن لما بلاقي اي تخريب في اي حته
وفي اماكن غريبه ؟؟!!
يعني اي متظاهرين لما بيهاجموا مبني الحي او المحافظه ويكسروه استفادوا ايه ؟؟
الا لو فعلا بلطجيه وواخدين فلوس
يعني اللي اقتحموا وزارة الماليه استفادوا ايه اخدوا حقهم؟؟
مااخدوش حاجه ومش هياخدوا!
اللي حصل في جامعة مصر الدوليه من تخريب وضرب للطلبه
مين اللي استفاد منه؟
وازاي يحصل كده في جامعه خاصه اصلا
واللي بيحصل في المنصورة الان محسسني ان الجامعات بقت ساحة قتال
وطلاب جامعة الازهر والتسمم الجماعي وماتبعه من احداث
والكاتدرائيه واللي حصل فيها اللي ماحدش عارف لحد دلوقتي الحقيقه فين
ولا عرفنا حقيقة اي حاجه في اي حاجه
ومرسي كل شويه يقولك التحقيقات هتبين
ايه كم العنف ده
ايه كم التربص ده
ربنا يحمي مصر من اللي عايزينها تقع
مصر درة الشرق وربنا حاميها
واللي نفسه مصر تقع وعمال يصرف فلوس علشان يدمرها
احب اقوله وفر فلوسك
فوق ياشعب مصر يرحمك الله

هناك 20 تعليقًا:

أسماء فتحي يقول...

معاكى حق ياشموسه والله
الناس من كمية الغضب اللى جواهم مش بقوا بيفكراوا صح كل اللى بيعملوه انهم بيخروج الشغور بالكبت والقهر والغضب والاحساس بالظلم في تكسير اى حاجه وكل حاجه بياخدوا اى حاجه في طريقهم الكويس في قلب الوحش حقهم مع حق غيرهم ده وده بيضيعوه وللاسف فى الاخر بتيجى على دماغهم متخيلين لما يكسروا مصلجه حكوميه الحكومه هتخاف او هتتغير وفي الاخر الموضوع بالنسبه للحكومه ولا ااااااااااى اندهاش لانهم ببساطه مش بيصلحوا اللى اتكسر احنا الشعب العبيط اللي بيصلح اخطائه واخطاء حكومته


تحيــــــاتي
كانت هنا ورحلت

Asmaa Fathy

zizi يقول...

لأكن انا اول من يصرخ معك تلك الصرخة من أجل مصر ومستقبل مصروعمار مصر ..لتكن كل ايادينا للبناءوليست للهدم ولو لم تستطع أن تبني فعلى الأقل لاتمد يدها بالهدم..موضوع هام يستحق من الجميع الإهتمام به ..

النسر المهاجر يقول...

ربنا يخليهالك ويحميها وفعلا هى قالت الى بيدور فى عقولنا كلنا
ولمست الحالة المزريه الى بيعشها الشعب المصرى كل واحد بقى مبداه انا والطوفان

شكرا على عرضك لهذا الراى الذى نال اعجابى الشخصى وسينال اعجاب الكثيرين

ابراهيم رزق يقول...

شمس الشموس

تصدقى ليها حق بنتك تاخد البوست ده

انا مفتكرش وقفت او مشيت فى مظاهره و حصل فيها عنف
نحن حاليا و مش لاقى وصف دقيق غيره فى حالة اسهال وقفات و احتجاجات لدرجة ان المظاهرات و الاحتجاجات فقدت تأثيرها و ده مقصود
طبعا مفيش حد يقدر و يرضى يبرر العنف
و لكن احيانا و بقول احيانا يكون العنف رد فعل لعنف
لان لكل عنف رد عنف مضاد له فى الاتجاه و قد يزيد فى المقدار
و الرسول بيقول
لعن الله قوم ضاع الحق بينهم
صدق رسول الله صلى الله عليه و سلم
و ده لب الموضوع
الحق و الحقوق

تحياتى

مصطفى سيف الدين يقول...

قلتها زمان و لسه بكررها
لو عايزين مصر حالها ينصلح
تقفل على نفسها 30 سنة كده تكبر دماغها عن كل الاوضاع الخارجية و ميهمهاش غير حالها الاقتصادي و بس
30 سنة متشاركش لا في مؤتمرات سياسية و لا تشتم بشار و لا تهادن اسرائيل و لا غيره
احنا في حالة يرثى لها محتاجين تصليحها الأول
30 سنة يبقى مالناش سياسة خارجية غير حماية مصالح مصر و ابنائها اللي بيعملوا في الخارج بس
30 سنة نعمل لنفسنا شخصية مستقلة بعد ما خربها المخلوع
بعدها هنقدر نتكلم باريحية و نبقى دولة كبيرة
اللي بيحصل دلوقت غير كده حلم الخلافة الاخوان عايزين يطبقوه بدري جدا
نبقى دلاديل لقطر او الامارات مش مهم
حاجات كتير اوي سببها سياسات خارجية غبية

ستيتة يقول...

انتي بتكلمي ناس مش ها تسمع لعدة أسباب

1- أغلب اللي بيخربوا ثبت بما لا يدع مجال للشك إنهم قابضين..بس مش من جهات خارجية بس..ده إحنا بقينا في ملعب سايب على رأي إيهود باراك ابن الصرمة

2- فيه ناس بتخرب كبت..واحنا شعب لو مية النيل أطباء نفسيين ميكفوش الكبت اللي فيه

3- اللي مش بيخرب ومش موافق على التخريب وفاهم الفولة والتتة دول بس اللي بيقرأوا..ونادرين هم

فيه شيء مهم جدا يا شمس الشموس
احنا معندناش حاجة اسمها اللي يحب مصر
إلا لو تقصدي الأغاني وافلام الحرب وكده
لو حللنا بالمنطق
احنا معرفناش لسه نحب مصر لأن مصر مش بتطيق وشنا

صباح الهنا

شمس النهار يقول...

*asmaa fathy

كلامك صح
علشان كده لازم نهدئ شويه ونفكر صح
الغضبان زيادة عن اللزوم بيخسر حق علشان بيعمل تصرفات غير مسؤله

ربنا قال ان يمين الطلاق ساعة الغضب الشديد لايقع
لأن الانسان ساعتها بيبقا مغيب
ونقول يارب

شمس النهار يقول...

*zizi

ربنا يستر يازيزي

التخريب بقاطايل كل شئ واي شئ
والبلطجمالناش غير ربناه بقت في كل حته

شمس النهار يقول...

*Gamal Abu El-ezz

التدوينه انااللي كتباها ولما عجبتها نشرتها عندهم في المجلة
بس القائمين علي المجلة افتكرواان دو هي اللي كتباها:)

شمس النهار يقول...

*ابراهيم رزق

شوف العنف الان غير مبرر
بالعكس احنا في فترة صراع فكري
العقل لازم يغلب هنا
ولازم نتحد كلنا لأن التيار شديد وياريته في الاتجاه الصح

العنف الان اغلبه مدفوع الاجر
يعني زي الخناقه تبتدي اتنين وتلاقي كله بقا بيتخانق
يعني اتنين قابضين يعملوا تخريب تلاقي كله دخل في الهيصه

faroukfahmy يقول...

شموستنا اتكلمنا كتير وكل ما نتكلم تزيد الميه على الطين عشان توحلّ بدل متنحلّ
مسكينه بنتك وبناتنا من اللى حوالينا من المنحل

شمس النهار يقول...

*مصطفي سيف الدين

والله كلامك زين ياقناوي
وهو ده اللي عمله السادات ساعة ماكان بيحضر للحرب
كبر دماغه من اي حاجه الا مايؤدي للحرب وفي سريه تامه
وهوب راح محارب

بس الموجودين الان مستعجلين علي الرز فاخلاص يكلوه ني بقا :)

شمس النهار يقول...

*ستيته
صباح الفل
والكلام اللي من الاخر
عندك حق
فاكره لما كنا في الميدان 7يوليو والناس كانت كتيييير جدا
كانت مليونيه مافيهاش موقع قدم
وماحدش عمل اي شئ
ساعتها انتي قلتي كلمه مش هنساها
(اناخلاص مش قلقانه عددنا كبير)
وفعلا الناس المعتدله عددها كبير ومصر بتلفظ اي فكر مشوه
ان شاء الله هتبقا جميله بس هتاخد وقت
:)

ليلى الصباحى.. lolocat يقول...

فوق ياشعب مصر يرحمك الله

آآآآه ياشمس بلوجر ...قلبى عليك يامصر

قرأت البوست وقرأت تعليقات الاصدقاء ولما اتى دورى فى الرد والتعليق مالقيت كلام يناسب مشاعرى واحساسى و ( حسرتى ) بسبب اللى بيحصل فى مصر

يارب نفوق بقى علشان الامر زاد واصبح سخيف وملامحنا وصفاتنا المصرية اصبحت مجرد تاريخ للاسف


احييك على البوست اللى من القلب بارك الله فيك واسأل الله ان يستجيب كل مصرى لدعوتك ويفوق قبل فوات الاوان

تحياتى بحجم السماء

Foxology يقول...

شعار المرحلة الراهنة : محدش فاهم حاجة !! لكن اﻷكيد ان في ناس بتخرب بتمويل ومعروفين لكن لسه مبياتخدش ضدهم اجراء ؟؟؟

تحياتي

سواح في ملك اللــــــــــــــــــه- يقول...

الله ياشموسة بجد روعة

تصفيق حاد هكذا هي الوطنية

شمس النهار يقول...

* ليلى الصباحى.. lolocat

اهلا بيكي وبكلامك الجميل

الموضوع بجد بقا غريب مش من طبع المصرين انهم يخربوا ولا يغدروا

اللي بيحصل ده غريب مريب
حاسه ان مصر عروسة ماريونت وكل طرف بيشد من حته لحد ماهتتفصص
ربنا يستر

شمس النهار يقول...

* Foxology

كلامك صح ياابويوسف
والغريب ان ليه ماحدش بياخد اجراء
هو ده اللغز

شمس النهار يقول...

*سواح في ملك اللــــــــــــــــــه

صدقني مش من طبعنا المصرين الهدم
المصري من ايام الفراعنه وهو بيعمر حوالين النهر

شمس النهار يقول...

* faroukfahmy58

اولا بعتذر عن عدم الترتيب
لأن تعليقك نشر في توقيت كنت عديت ردي علي التعليقات

لكن لاقيت نور جاي فالاحظت تعليق حضرتك
:)

الجيل الحالي والاتي ربنايستر عليهم