الأربعاء، 24 أبريل 2013

بلد الحريات والحلابوظة :)

واحد امريكي صديقنا ماكنش جه مصر 
بس عاشق لمصر 
والفراعنه
جه مصر اليومين دول
قالك انا قتيل البلد دي 
انا هقعد هنا
وهشتغل هنا
ده بلد الحريات :)
قالك هو في حرية اكتر من كده
كل واحد بيعمل اللي هو عايزه
مافيش ممنوعات
ولا تيكت علي اي مخالفه
وبعدي الشارع من اي حته تعجبني 
وبمشي في وسط الشارع مش علي الرصيف
وبرمي ورق في الشارع وماحدش بيكلمني 
وبشوف ناس سايقه عكس الاتجاه عادي
وكل عماره مافيهاش دور شبه التاني
والجيران بتضايق بعض عادي
والمحلات في وسط البيوت 
ومافيش محل مش طالع  علي بره
والقهاوي في الشارع وعلي الرصيف 
(مبهووووور بالقهاوي) 
اللي علي الرصيف في وسط بحر الطريق
حريه مالهاش حدود
وكان يوم مالوش معالم لما اخدوه العتبه:))
بقول لكم ايه العتبه جزاز والسلم نايلوا في نايلوا

هناك 22 تعليقًا:

سواح في ملك اللــــــــــــــــــه- يقول...

ههههه كلها يومين ويزهق مالحريات لما

تعطلو عن شغله

والناس تجور علي حقه

والا اقوللك خليه يركب توكتوك بس بالدي

جي اللي فيه

وهوعلي اول طيارةمش راجع هنا تاني هههههه

well يقول...

شمس النهار ..
..
تصدقى .. انا بعد ماقريت الكلام ده .. امنت ان بلدنا فيها حريات ..
تحياتى
well

النسر المهاجر يقول...

طول مالحكومة بتدور على الصوابع لمخربه فى مصر وهما مش هيلاقوها بس ليهم عذرهم لما يلاقوا الصوابع الى بتخرب مصر هيبدتوا يصلحوا كل حاجه

بس مفروض إن الحاجات الى بتقولى عليها دى تتعمل من الشخص ذاته يعنى أداب عامه أو تربيه يعنى لما أرمى ورقه فى الشارع دى قلة أدب إنما لو رمتها فى الباسكت فكده أكيد أنا متربى ومعنى كده إن 90% من الشعب المصرى محتاج تربيه من جديد لانه إتعود ميحترمش الناس ولا المكان إلا بالقوه ( شرطه وجيش )

للأسف واقع مهين ومرير الى بيعشه الشعب المصرى ونسال الله أن يرأف بمصرنا وأهلها

Mahmoud Bahgat يقول...

كان فى كتاب اسمه شكلها باظت هى بصراحة باظت قوى
تخيلى امبارح راكب ميكروباص مش هاقولك تكتك فى منطقة شعبية لا ميكروباص فى شارع الهرم و بيلف عكس أمام قسم الهرم جنب المحافظة مش بس كده لا السواق و اللى جنبه بيشربوا حاجة يا حشيش يا بانجو و بيبادلوها سوا و عادى الصراحة انا كنت اخر سلبية سكت و ما اتكلمتش و كل العربية عملوا زى
بس اتضايقت اننا وصلنا لكده و ده مش ذنب الثورة لا ده ذنب مبارك برده

Days and Nights يقول...

الأخت الغاليه / شمس

هو دا الحال اللى مش عارفين نخلص

منه .

شوفى بقالنا كام سنه بنقول يا ناس

يا خلق ..أسمعونا .. أفهمونا .. ولا

حياة لمن تنادى.

إجمالا كل سنه وأنتى طيبه بمناسبة

تحرير سيناء؟

تحياتى لروحك الطيبه

تامر

غير معرف يقول...

دي مش حريه دي فوضويه
بوست رائع فعلا
تقبلي مروري
تحياتي

شمس النهار يقول...

* سواح في ملك اللــــــــــــــــــه

لأ ده هو مبسوط جدااااا بالفوضي دي

بيقولك كله بيجي متأخر وماحدش بيزعل من حد
:))

شمس النهار يقول...

*well

طبعا ده مصر ام الحريات وام الدنيا :))

شمس النهار يقول...

* Gamal Abu El-ezz

ان الله لايغير مابقوما

هي الحكومه اللي بترمي الزباله في الشوارع لو كل شارع حافظ علي نظافته هتبقا الدنيا زي الفل

لو كل محل نظف امام محله هتبقا الدنيا زي الفل

كل بواب عماره لو نظف امام عمارته عتبقا الدنيا زي الفل

في عمارة عند ناس اصحابي كانوا بيلموا الزباله في الصندوق اللي قصاد العماره جه الولد الزبال بينقضها علشان يفرز وياخد منها فاطبعا طلعها من الصندوق وبهدل بيها الدنيا وقفوا له لحد مالمها تاني واتقاله لو عملت كده تاني نوديك القسم بعد مانضربك انت جيت لاقيتها جو الصناديق مش هنمنعك انك تفرزها بس ماتبهدلش الدنيا والا هنمنعك

شمس النهار يقول...

*Mahmoud Bahgat

هو مبارك عمل فساد مش هنكر بس ماخبطش علي كتف كل واحد فينا قاله افسد

كل واحد متعلق من عرقوبه زي المثل المصري مابيقول
وربنا هيحاسبنا علي افعالنا
طول عمر مصر كان فيها ناس بتاخد مخدرات بس كان ليهم اماكنهم دلوقتي الفرق ان بعد الثورة كله بقا بيجهر بالسوء لغياب الداخليه اللي بتعاقب الشعب طبعا

Mahmoud Bahgat يقول...

المشكلة.مش فى الداخلية برده المشكلةفينا اننا بقينا نستمتع بالفساد و بنقبله على انه عادى

شمس النهار يقول...

*Days and Nights

معاك بس اهو كل واحد يغير من نفسه ومن اللي حواليه

انا رحت عمارة جديدة حاولت اخلي السكان يدهنوا مدخل العمارة فشلت مع ان الايجار زهيد جداااا

رحت دهنته انا بأمكنيات اقل بس اهو بقا نضيف

كل سنه وانت بالف خير

شمس النهار يقول...

* salwa abdelhalim

طبعا دي فوضي
بس لو تشوفي همه معمول فيهم ايه هناك
مايستجريش يبقا في ورقة قصاد بيته
جوه بيته هو حر لكن بره باب البيت مليون ممنوع

الوردة البيضا يقول...

مستحيل واحد أمريكي تعجبه الفوضى المرعبة اللي عندنا دي ويعتبرها حرية... للأسف احنا اللي مفهومنا للحرية خاطيء ووصلنا للمرحلة الحرجة اللي احنا فيها دي... ربنا يلطف بينا... البوست لطيف ودمه خفيف... تسلم الأيادي

أسماء فتحي يقول...

مش عارفه اضحك من اسلوبك في السرد ولا ابكي علي المحتوى ومعنى البوست
للأسف احنا بنطبق القوانين بمزاجنا وبنطالب بيها لما تكون في صالحنا
وبس يعني فين القانون من رمي الزبالة في الشارع سمعت ان في غرامة بس مشفتهاش
بتتطبق فين القانون من القهاوي
اللي موجوده بدون تراخيص اصلا وفي اي مكان فين القانون من المشي عكس الاتجاه
فين وفين وفين
صحيح احنا علينا العامل الأكبر
لاننا لابنراعي ربنا ولا بنحب بلدنا صح
علشان نحافظ عليها


عموما تحيـــــاتي
كانت هنا ورحلت
Asmaa Fathy

شمس النهار يقول...

* Mahmoud Bahgat
طبعا ده كلام مظبوت
من كتير مااتحاصرنا بالفساد وبقينا نشوفه بقا عادي بالنسبه لنا
ده حتي دلوقتي لما اتنين بيتخانقوا في الشارع ماحدش بيحوش بينهم بالعكس الناس بتقف تتفرج:)

شمس النهار يقول...

*الوردة البيضة

للأسف احنا فاهمين ان الدول دي فيها حريات الدول دي ديكتاتوريه منظمه
يعني الامريكي ده ماشي علي عجين مايلخبطه في امريكا فين الحريه بقا
تعالي نشوف في السياسه ماعندهمش حريات
هناك علشان تتظاهري لازم اذن بالتظاهر مسبق ولو اتظاهرتي من غير اذن تعتقلي علي طول
ولو حد من الممثلين ولا الاعلامين دخل شمال في اليهود بيضيع علي طول
ارجعي للي حصل في انجلترا وشوفي البوليس عمل ايه في ومع الشباب واهليهم وماحدش فتح بقه ليه علشان ماكانوش واخدين اذن تظاهر وكمان خربوا وسمحوا للحراميه بفعلتهم دي يسرقوا ويكسروا
الناس دي مفهمانا ان عندهم حريات وهمه من بعد الحرب العالميه عملوا قوانين تحميهم من حرب تانييه ان المجتمع يتظبطت علشان يبنوا نفسهم تاني
نورتي

شمس النهار يقول...

* asmaa fathy

شوفي ممكن تضحكي لحد مادموعك تنزل :)

هو طبعا متشبشب في بلده مايستجريش يرمي سجارة في لشارع
ولا يركن غلط مش هيلاقي العربيه وكمان هيدفع دم قلبه علشان يرجعها :))
السؤال هو هيعرف يعيش هنا ولا بعد شويه هيحن للشبش ويرجع بلدهم:))
نورتيني:)

أسماء فتحي يقول...

هههههههههههههه
حلوه متشبشب دي :)
لا هو هيتخنق اكيد من الفوضى لان اللي اتعود علي النظام صعب يتأقلم مع كمية الفوضى الموجودة عندنا بجد مش هيطيقها ودايما هيقارن وهتكسب الشبشبه ههههههههههههه
بحب بوستاتك وروحك المرحه فيها دمتي بود

شمس النهار يقول...

*asmaa fathy

لأ هيقعد في اجانب كتير قاعدين في مصر ومبسوطين علي الاخر:))

سندباد يقول...

لله الامر من قبل ومن بعد ربنا يرحمنا ويعفو عنا
تقبلي مروري
سندباد

Ramy يقول...

أأأأأأه

من الهم اللى يضحك (((:

دى مش حريات دة أستعباط

ههههههه

............

أنا أسف على التاخير جدا جدا جدا

و كنت سعيد جدا جدا جدا جدا انى قابلت حضرتك و اتعرفت على حضرتك شخصياً

بأذن الله يبقى فيه يوم تدوينى و اقدر اجى
(: