الأحد، 1 سبتمبر 2013

مش مبسوطة :(

مش مبسوطة
:(
لييييييييييييه؟
مش موافقه وزعلانة جداااااااااا
ان امريكا بقيادة طفل الشوارع اوباما هتضرب سوريا
والله اعلم سوريا هتبقا عراق تاني ولا لأ
وعلي فكرة لو عايزين فعلا يخلصوا من بشار هيخلصوا منه من غير مايضربوا سوريا
وامريكا ليها سوابق كتير ويامااغتالت ناس وزاحتهم من وشها
وان كنتم نسيتوا اللي جري هاتوا الدفاتر تنقرا
ماعلينا
مش مبسوطة كمان من اللي بيتطاولوا علي الجيش
الجيش المصري عارفين يعني ايه الجيش المصري
وكمان زعلانة من المتعلمين اللي مش قادرين يفرقوا بين المجلس العسكري بقيادة طنطاوي اللي غرقنا
وبين جيش مصر فخر العروبة
مش مبسوطة من المتعلمين اصحابي اللي بيقولوا الخلافة الاسلامية
خلافة ايه مش عارفة
ولما كانوا المسلمين تحت خلافة عملوا ايه خسرنا من اول الاندلس لحد فلسطين
ياريت نفوق
مش مبسوطة من المتعلمين اصحابي اللي بيقولوا ان الخلاف الان بين الاسلام والمش
مش فاهمه ليه وعلشان ايه
الخلاف سياسي ياسادة سياسي بحت
وخلاف بلدي اوي ياحسين
يعني ياريت خلاف شيك 
زعلانة من اللي بيقولوا ان اعتصام رابعة كان سلمي
والاقي منطقة رابعة متدمره
وعلشان ماحدش ينط يقولي يعني انتي مبسوطة بالدم
لأ مش مبسوطة بالدم
بس برضوا مش مبسوطة بالدمار والحريق
وانك تقول لي سلمي واسلامي وتدبحوا وتسلخوا الناس احياء
ومش مبسوطة ان رجالة المنصة يفضلوا يهددوا واللي هددوا بيه عملوه
وبعد كده مايطلعوش رجالة ويتنكروا ويهربوا
ولما يتمسكوا يقولوا ماقلناش يابيه
زعلانه منهم اوي
صدام لما كان بيتحاكم القاضي نده عليه بأسمه مجرد قاله اسمي سيادة الرئيس 
وكان القاضي مرعوب منه اصلا
مش مبسوطة ان الاصحاب بقوا مش اصحاب من كتر الخناق علي تويتر والفيس والحياة
ومش عارفين يختلفوا بحب
زعلانه من سواق الميكروباص الاسكندراني اللي خبطني وانا واقفة ونزل يزعق
وبشكر شباب اسكندرية اللي همه اجدع ناس اللي لقنوه درس وعرفوه انه لما يغلط ويخبط حد 
مش عيب يعتذر مش يبجح وهو غلطان
ويفعل نظرية خدوهم بالصوت قبل ما يغلبوكوا
في حاجات كتير مش بسطاني بس كفاية عليكوا كده

هناك 22 تعليقًا:

P A S H A يقول...

ألف سلامة عليكي يا أستاذة .. طمنينا عليكي انتي كويسة الحمد لله ؟؟

يا رب تكوني بخير إن شاء الله

شمس النهار يقول...

باشاااااا
ياهلا ياهلا ازيك يارب تكون بخير

انا الحمد لله بخير بس العربية لأ
ضرب لي الباب اليمين بالرفر ضربه زي الفل
يالا خير والحمد لله
صراحة اول مرة اروح اسكندرية وارجع في ست ساعات وتلت
وكمان اعمل حادثة خير

Bent Men ElZman Da !! يقول...

الف سلامة عليكي كفاية إنك بخير

عموما أى حد عاقل لازم يزعل بكل اللي إحنا شايفينه ده !!

النسر المهاجر يقول...

ربنا ميكتب عليكى زعل

لكن ما يحدث طبيعى جدا لاسباب منها

أولا الأخوان كل ميتمسك عليهم حاجه يقولوا مش بتاعتنا فلازم يلاقوا ناس تصدقهم

والناس الى بتصدقهم فى الغالب بيصدقوهم لسبب برضه ممكن منفعه عدم وعى بيتابع الجزيرة كتير أى حاجه من دى

ثانيا الخلافة الإسلامية فكره كويسة بس يا ترى هتبقى زى خلافة الخلفاء الراشدين ولا العصور الى بعدهم ولا عصر مرسى أظن الخلافة الوحيدة الى حافظة على الإسلام وكان فيها عدل خلافة الخلفاء الراشدين وعمر بن عبد العزيز من بعدهم انما الخلافة الى يمسكها حرامية سورى وبعدين إحنا فى 2013 يعنى ممكن نعمله اتحاد
ثالثا مخطط أمريكا اضعاف الجيوش العربيه علشان يستنزفوا خيراتها مجانا مقابل الحماية بعد كده وإن شاء الله الحق غالب ويا ريت امريكا والأخوان يفهموا ان الدماء الى بتسيل كلها فى رقبتهم لانهم سبب رئيسى فيها

دا غير ان العرب عموما ينقصهم ثقافة الإختلاف فى الراى واحترام راى الاخر

والحمد لله على سلامتك يا شمس تنير صفحات المدونين

شمس النهار يقول...

* Bent Men ElZman Da !!

الله يسلمك
الحمد لله بس كانت عكننه علي عكننتي علي البلد كمان
يالا الحمد لله كل مايعمل يعمل للخير

شمس النهار يقول...

* Gamal Abu El-ezz

كلامك صح الصح
وخصوصا احترام راي الاخر
لما بروح الفيس او تويتر والاقي اللي كانوا اصحاب اتقلبوا اعداء بزعل جدا
فين بقا اعتصموا بحبل الله ؟

الغرب هياكلنا واحنا لسه بنختلف

شكرا ليك ربنا يكرمك

أحمد الصعيدي يقول...

المنح تكمن في المحن يا استاذتنا الغالية فلا تحزني مما يحدث

تجمع الملسمين علي قلب رجل واحد لن يحدث إلا بما كتبه الله انتظري الفرج قريبا بفرحة عارمة للمسلمين جميعا

سعيد لأنني كنت هنا


لــــ زهــــــراء ــــولا يقول...

ست الكل شمس الشموس

الف سلامه على حضرتك من الزعل وياترى هو ده السبب الوحيد اللى ممكن يزعلنا يووووووووووووووووووووووه لو كل واحد كتب الحاجات اللى زعلان بسببها هتبقى مشكله كبييييييييييييييره

ربنا يبعد عنا الزعل

زهــــراء

ابراهيم رزق يقول...

شمس الشموس

ما عاش اللى يزعلك

معاكى حق و الله العظيم
اهم حاجة حمد على السلامة
و شمس فى خير و خير فى شمس

تحياتى

شمس النهار يقول...

*احمد الصعيدي

اهلا بيك يااحمد بلوجر نور

لااملك الا التمسك بالله واملي في الله كبير

صعبان عليا ان يكون العرب والمسلمين بهذا الضعف
بس هو ده اللي قالوا الحبيب المصطفي فينا

شمس النهار يقول...

* لــــ زهــــــراء ــــولا

اهلا بيكي يازهراء

ده حته كده من اللي مزعلني
ده انا لو كتبت اللي مزعلني عايزة تلاته اربع بلوجر في قلب بعض
:))

شمس النهار يقول...

*ابراهيم رزق

:)
الله يسلمك
حلوة خير في شمس وشمس في خير دي
:))

كريمة سندي يقول...

ومين منا مبسوط الحال أصبحت حال لا تسر عدو ولا حبيب الله معنا

الازهرى يقول...

سيبك من الرغى بتاعهم
الموضوع مش بالسهولة دى

صباحك ثكر

لــــ زهــــــراء ــــولا يقول...

معترضة وبشدة ومستنكرة على ضرب سوريا ولكن سناريو اخر الزمان يحتم ذلك !!!
حصار
العراق
فلسطين
سوريا
لبنان


لولا

أحمد أحمد صالح يقول...

مساء الخير أستاذتنا.
لو أردنا الصراحة فأكيد أغلب- ان ما كنش كل- اللي حوالينا ما يبسطش أبداً، لكن في نفس الوقت مش لازم نبص حوالينا وبس، لازم نبص جوانا، وإذا لقينا خير وحب فلازم ننبسط ويبقى عندنا أمل، لأن طالما ده جوانا فأكيد إنه كمان جوا ناس غيرنا وده في حد ذاته شئ رائع ومبشر ويحمل أمل عظيم بأن حالنا في يوم من الأيام سينصلح.
..
لن أعلق على النقاط التي أثرتيها فأنا أعتقد أن رؤانا تتفق في الكثير منها. وأظننا كمان متفقين إن الأمل جوانا مافيش حاجة ممكن تقتله.
كل التحية والإحترام أستاذتنا.

شمس النهار يقول...

*كريم سندي

ربك كريم

ربنا يزيح عننا

شمس النهار يقول...

*الازهري
اسيبني من مين ولا مين ولا مين

ده الناس مقطعه بعض

شمس النهار يقول...

* لــــ زهــــــراء ــــولا

اهم عمالين يرغوا بقالهم اكتر من ساعة وشكلهم مش هيضربوا
ربنا هيستجيب لدعواتنا
قولي يارب

شمس النهار يقول...

*احمد احمد صالح
مساء الفل

الخير موجود والشر موجود بس الشر اليومين دول مشرفنا حبتين
لكن الامل في الله ممدود
ونقول يارب

ذو النون المصري يقول...

اولا الف سلامة عليكي
والله احنا مقصرين في المتابعة لكن و الله غصب،،ظروف سفر و ملل من التدوين
الزعل في مصر الان اصبح بين الاخ و اخوه واحد اخواني و غيره مش اخواني في بيت واحد بينهم مشاكل و اصلا هم اخوة في البيت
مصر بحالها بقت قطعتين
احنا في حالة اندهاش مما نسمعه
سمعنا ان سينا كان جزء كبير منها معروض للبيع لكن مفيش واحد في الحكومة راضي يطلع ياكد او ينفي رغم ان خبراء امنيين قالواها علنا في التليفزيون لكن كلامهم لا يكفي
الواحد مش عارف يزعل علي ايه وز للا ايه؟؟؟؟

شمس النهار يقول...

* ذو النون المصري

ربنا معاك ويعينك علي غربتك :)

وتنورني في اي وقت

كان في بيت هيتخرب زوجه اخوان وزوجها مش اخوان
وصلنا لمرحلة بايخة

اما الحقيقة دي فاعند الله