الأربعاء، 30 أكتوبر 2013

نصيحة علي الماشي كده :(

نصيحة كده علي الماشي
ماتغيرش حد حبيته
:(
اصل انت لما حبيته حبيته كده
لو غيرت في الهارد وير بتاعه مش هيبقا اللي انت حبيته
ممكن تغير شوية في السوفت وير بتاعه
بس يكون هو مستجيب وموافق
وحبة سوفت وير من عندك علي حبت سوفت وير من عند حبيبك
هتمشي
لكن تصمم تطير الوندوز والهارد
يبقا انت كده حبيت حد تالت مش تاني غير الاولاني 
خد حبيبك كده علي بعضه زي ماهو 
ماتحاولش تلعب في الثوابت عنده
ولو حبيتوا بعض وماعرفتوش تتفاهموا ومااتفقتوش 
خااااالص
والثوابت عندك غير الثوابت عنده
يبقا خلاص كده 
ده حب منقوص
مهما كان حب شديد وانجذاب اكبر
لأن الحب تفاهم في ثوب مشاعر
ومشاعر في ثوب تفاهم
وواحدة واحدة مع كل خلاف
الحب ده بيتهز
وواحدة واحدة الحياة بتبقا نكد
وواحدة واحدة 
الخلاااااااااافات 
بتزيد
والحب مابيعرفش يعيش في الحزن والهم
الحب ممكن يواجه الصعاب واعتي المشاكل 
الحبيبين ممكن يواجهوا جبروت العالم لو ضد حبهم
لكن مايقدروش يواجهوا اختلافهم في الثوابت وخصوصا لو مابيعرفوش يتفاهموا مع بعض
مابيعرفوش يعملوا حوار ولا يقدروا يوصلوا لحل وسط
الحب بيهرب منهم
لو لاقيت الحب الحقيقي الصح
اوعي تخليه يهرب منك
وخد حبيبك كده زي ماهو
علشان تعيش سعيد
لأنك لو عملت العكس هتعيش من غيره
صحيح حبه هيبقا في قلبك مونسك
لكن هيبقا برضوا حب منقوص
لأنك بعيد عنه
**
أنغام

هناك 9 تعليقات:

النسر المهاجر يقول...

أوقات بيكون الإختلاف أجمل حاجه بين الحبيبين وفيه أشخاص كتير بيتقبلوا ده
ومع الوقت أكيد فيه حاجات هتقربهم لكن لما التقريب ده بيجى لواحده أحسن من قصد التغير فى الحبيب من أجل التقارب

مفيش حاجه مسلية أو جديدة بين اتنين متشابهين لكن الإختلاف وسيله للتقارب والتعلم كل واحد بيعرف الى مش فيه

Tarek Mageed يقول...

اهلا يا شمس :

اللى بيحب حد بيحاول يرضية علشان هو كمان يرضى. الحب هو ارضاء الحبيب والذوبان والاحساس انهم فى كيان واحد. اما موضوع حب حبيبك زى ما هو انا مختلف لان هناك متعه كبيرة بين العشاق والاحباء هى التفانى فى رضا الحبيب. متعه لا يحسها الا من جربها وحس بجمالها وبحلاوتها
اما الكلام عن السوفت وير والويندوز دى كلها متغيرات واللى بيحب حد هيحمل سوفت وير جديد متوافق مع جبيبه وكدة الكل هيستريح. اما هندسيا ( الصنعه بتحكم) ما فائدة هارد وير ممتاز وسوفت وير مش تمام . لازم الكل يتوافق
الثوابت الوحيدة التى لا تقبل العبث هى الثوابت التى حددهاالمولى عز وجل وامرنا بها عدا ذلك كل شىء قابل للنقاش والتغير .
انا معاكى ان الحب تفاهم في ثوب مشاعرومشاعر في ثوب تفاهم لكن كمان الحب تضحبه وتفاتى فى رضا الحبيب وعمر الخلافات البسيطة ما تهز الحب الأصيل لان لو اخلافات البسيطة هزت الحب يبقى دة مش حب من الاصل .
لكنى اعتقد الخلاف بين الحبيبين بيكون فى تعريف الثوابت مرة تحت مسمى الغيرة ومرة تحت مسمى الحريه ومرة تحت مسمى الكرامه ومره العند ووووووو المسميات كتير .
لكنى اعتقد كل واحد عارف يحب حبيبه ازاى وعارف يخلى جبيبه يحبه ازاى وكل واحد قادر يثمن الغالى ويبيع الرخيص.
فى ناس كتيربتعيش وتموت ومتقابلش الحب الحقيقى. فنصيحه اللى يلاقى الحب الحقيق ده انسان محظوظ ولازم يتبت فيه بايدة وسنانه لان كل شىء يتعوض بما فيه (السوفت وير) الا الحب الحقيقى
عفوا للاطاله

ابراهيم رزق يقول...

شمس الشموس

حضرة قاضى الغرام

طبعا لازم فى نقاط اتفاق

لكن نقاط الاختلاف دى اللى بتملى الفراغات و بتعشق فيه

تحياتى

شمس النهار يقول...

* Gamal Abu El-ezz

في فرق بين الاختلاف
والخلاف اللي بيخلق النكد
يعني اتنين مابيعملوش حاجة غير انهم يختلفوا ويتخانقوا

تفتكر يعملوا ايه ؟

شمس النهار يقول...

* Tarek Mageed

طبعا الحب تضحيه ده اكيد
بس انا مش بتكلم عن الاتجاه اللي حضرتك بتتكلم فيه انا بتكلم عن الخلافات المدمره
ان يكون احد الطرفين بيضايق الطرف الاخر
والنكد عرض مستمر
تعليقك اثري التدوينة

شمس النهار يقول...

*ابراهيم رزق

بس في خلافات مدمره
من كتر الخلاف ممكن احد الطرفين يتخنق

مصطفى سيف الدين يقول...

احسن بوست الواحد ينهي بيه يومه :)

يا سيدي على الروقان

الله عليكي يا شموسة

شمس النهار يقول...

* مصطفي سيف الدين

ياصباح الفل ياقناوي

ربنا يسعدك ويروق قلبك

لا تابع هنا تاني ده انا هعمل تدوينة مكملة ارد علي الناس دول فهموا غلط خااااالص

abo-bder يقول...



شركة نقل اثاث من الرياض الى الامارات
شركة شحن اثاث من جدة الى الامارات
شركة شحن اثاث من مكة الى الامارات
شركة شحن اثاث من الدمام الى الامارات
شركة نقل اثاث من الرياض الى الكويت
شركة نقل اثاث من الرياض الى جدة
شركة نقل اثاث من الرياض إلي مكة
شركة نقل عفش من الرياض الى البحرين