الأربعاء، 5 نوفمبر 2008

عميتها

جيت اكحلها عميتها
حبيت اعمل للمدونه نيو لوك اشمعنه هي يعني
وبعدين عيب علي لما ابقه فنون جميله وشكل المدونه مافهوش حركات
رحت مبوظه الدنيا
الحمد لله الاصابات ماكانتش كتير
والمريضه فاقت من الغيبوبه
بس للأسف فقدت القايمه
وهقعد اكتبها تاني ياصبر ايوب
ده غير التريقه اللي اخدتها من القبيله ولسه انتوا كمان
معلش سمحوني مش هعرف مين كتب ومين ماكتبش لحد مااعمل القايمه تاني
مش عايزه حد يتريق
مواساه في الفقيده ماشي اه

هناك 82 تعليقًا:

م/ الحسيني لزومي يقول...

ارجو قبول اعتذاري لان كلامك صحيح لكن لاني بادعوا للحملةوبادخل علي مئات المدونات في اليوم فانا كاتب هذا الاكلاشيه وباعمل كوبي وبست فارجو المعذرة مرة اخري

عمرو يقول...

ضيعتى القايمه يا شمس ؟؟؟؟!!!!!!!
خدى بالك بقى من المؤخر

سبهللة يقول...

كدة فضحتينا
اصل انا فنون تطبيقية وما افرقش عنك كتير
معلش ربنا يعوض عليك

سبهللة يقول...

قوليلى هى جيهان السادات فرست ام كلثوم ازاى؟؟
اصل انا ما فهمتش

عمرو يقول...

بس ممكن القايمه تتصلح و ترجع تانى بسهوله

صابر وراضى يقول...

وعليكم السلااااااااااام

الحمد لله انها جات فى الطيطه
خدى بالك المره الجايه

وتعيشى وتضيعى

رئيس جمهوريه نفسى يقول...

كلنا كنا كدة اتعلمنا وتعبنا كتير علشان نعمل لوكات لمدونانتنا عموما ربنا يكرمك ويقدرك وترجعى القائمة تانى ان شاء اللة

nabil يقول...

يا خسارة، يعني كده هأكتب لنفسي لغاية ما تظبطي القايمة تاني، محدش بيرد عليه غيرك والله ^_^

يا رب تخلصي بسرعة *_^

SHAPE YOUR LIFE (ABOALI) يقول...

ههههههههههههههههه
القايمة ضاعت
والخلع جاى
اه يا عينى
طيب انا الحق نفسى واسجل نفسى فى القايمة
جنب الانترية
ولا اقولك على الباب
ولا اقولك روحى وانتى ................
حرة

فشكووول يقول...

ولا يهمك خيرها فى غيرها اللى عمل الأولى يعمل التانيه وبعدين شفت فرحة الشعب الامريكى بنجاحهم فى انتخاب باراك اوباما رئيسا للولايات المتحده .. يا بختهم ببلادهم ويا تعسنا

mohamed ghalia يقول...

البقاء لله
زعلتينى على القائمة عشان كان اسمى فيها ههههههههههههههه
تحياتى
والى عمل القديمه يعمل الجديد
تحياتى

mido يقول...

خدت الشر وراحت

حطى بقى كل المدونات فى قايمة واحدة فقط

romansy يقول...

تتعوض
فداكى الف قايمه
دايما كلنا بنقع فيها
مش لوحدك يعنى

Mohamed Hesham Safa يقول...

ولا يهمك ...

prince4ever يقول...

و لا يهمك
اللي يهمنا انك انتي دايما موجوده في قوايمنا و دايما نتابع جديدك الجميل
تحياتي

Unknown يقول...

أشكرك علي تشجيعك لي ..وتنويرك لمدوني ..زورينا و نورينا اكتر و اكتر

كـــيــــــــارا يقول...
أزال المؤلف هذا التعليق.
كـــيــــــــارا يقول...

ولا يهمك ياشموستي نحنوا في ايتها خدمه

ايي خدعه :)

أحــوال الهـوي يقول...

شكرا علي النصيحة لاني باحاول اعمل نيو لوك و اخللي مدونتي شيك و جذابة و فشلت بعد ما شحت من اصحاب المعرفة من الشباب يعلمونا و ما فلحتش

خلينا كلاسيك و المهم المضمون و ليس الشكل

ارجو ضم مدونتي الي دائرة اهتمامك

تحياتي

وردشان smilyrose يقول...

ولا يهمك ياشمس الشموس


الف الف قايمة وتتعوض يا جميل

ومش تقلقى احنا معاكى موجودين

يا بنتى بتحصل فى احسن المدونات

سلاموز

smilyrose

روح الحب الصادق

Empress appy يقول...

ههههههه بطلى لعب يا حبيبتى التمبلت والحركات دى سهله بس محتاجه شرح شويه
وبعدين اعملى ريدر احسن ومتعمليش لينكان اسهل والله

Sweet Violet يقول...

تتعوض ان شاء الله

المهم انك بتعملى بنفسك مهما كانت الخسائر

هاتتعلمى بعدها و ان شاء الله كل شئ يرجع كما كان

و انا مع راى آبى اعملى فعلا الريدر افضل

saragebaly يقول...

حصلت معااااااااااية
بس لحقتها على آخر لحظة
وطلبت الاسعاف على آخر دقيقة

ولا تزعلى نفسك
كله هيبقى تمام التمام

د/ رامي شهاب الدين يقول...

ربنا معاكى

إللى عمل القايمة مرة يعملها مرااات

تحياتى

شمس النهار يقول...

*م/الحسيني لزومي
شكرا علي الرد
وخلاص المسامح كريم

شمس النهار يقول...

*عمرو
طبعا فرحان فيه
انت فاكر انكتبلي قايمه
ابويا قاله قايمة ايه يابني هو انا بمضيك علي شقه مفروشه
لو زعلت بنتي مايكفنيش فيها حاجه
والمؤخر شيخ القبيله خاف لو لاقدر الله مات العيال يستندلوا ومايدونيش المؤخر ويبقي هو مديون لي
راح مديهوني
كده خلاص ياعم لافي قايمه والامؤخر
ده بغض النظر يعني اني قلت مش عايزه تريقه
ماشي ماشي

ابو على يقول...

فداكى فداكى فداكى

تررلملم


اول مرور معلش مش لاقى حاجه اعلق عليها





امممممممم

فداكى فداكى فداكى


::d

شمس النهار يقول...

*سبهلله
انت زومل بقه
ماشي
طيب تعالي نتسند علي بعض
وبعدين احنا فنانين
مش كمبيوتاريين
شوفي ياستي
ام كلثوم كانت واخده علي انور
وبتهزر معاه
والبلد كلها بتحب ام كلثوم
وبغض النظر عن ان ام كلثوم كانت لسانها طويل ومش ملاك زي ما المسلسل عملها
بس كانت ست جدعه قوي
وكمان العرب اللي مااجتمعوش علي حاجه عمرهم كله اجتمعوا علي حب ام كلثوم
قوم ايه الست جيجي غارت منها
وكانت ام كلثوم بتعمل اعمال خيريه وعامله مشروع كبير
قوم جيهان فطستهولهاالوليه اتحسرت
وكمان ام كلثوم كانت واخده لقب صاحبة العصمه وجمال كان مسميها سيدة مصر الاولي
طبعا اصل جمال بغض النظر عن سياسته كان صعيدي حمش والست تحيه ماطلعتش بره الدار ومابانتش علي الشعب مع ان ابوها كان بيه
المهم
راحت جيجي قايله لما مغنيه تكون سيدة مصر الاولي امال انا ابقه مين
وهوب الجرايد
بقة تكتب عن جيجي سيدة مصر الاولي
ام كلثوم راحت في الباي باي بعدها
حلو طقم النميمه ده علي الصبح
ياستي

شمس النهار يقول...

*صابر وراضي
وعلكم السلام
ادعي لي اعرف اعملها تاني

شمس النهار يقول...

*رئيس جمهورية نفسي
ربنا يكرمك ياامير ياللي ماتريقتش عليه
الاهي مايمسح لك قايمه

شمس النهار يقول...

نبيل@
ماتخافش كل يوم هدخل مدونتك اشوف عملت ايه
انت فعلا بتكتب مواضيع كويسه جدا
ماتقلقش
انا جاي ونبي انا جاي

شمس النهار يقول...

*ابو علي
كده بتتريق علي في قصيده
ماش ماشي
بكره ارجعها لبيت الطاعه

شمس النهار يقول...

*فشكول
شكرا علي المواساه ربنا يكرمك
مانيجيلكش في حاجه وحشه
علي فكره انا رديت عليك عندي في البوست بتاع السعاده وعملت رد تاني عندك
ارجوا ان تري الاثنين
الشعب الامريكي فرحان عشان عمل اللي هو عايزه
ده لو كان هو ده اللي عايزه وماتوجهش لده
امريكا حبت تغير صورتها وتقول انا مش عنصريه والابكره المسامين
اهو الريس اسود من اصل افريقي وابوه مسلم وامه بيضه
يعني كوكتيل عنصريه في بعض
ونبي مفصلينه تفصيل
ايه الحلاوه دي
همه جابوه منين ده علي المقاس
اوعوا تقولوا ان امريكا فيها عنصريه والا بتكره المسلميت والا السود مش واخدين حقهم
واهو المؤسسات حاكمه البلد واربع سنين تفوت والاحد يموت

شمس النهار يقول...

*محمد غاليه
مانجيلكش في حاجه وحشه
ان شاء الله هنعيد بناء القايمه واسمك ينور فيها تاني
وهأمن عليها كمان ماتعرفش شركة تأمين كويسه

شمس النهار يقول...

*ميدو
ياسلام عليك ياريق انت
ده عشان اعمل كده عايزه يوم بحاله
ماتشوف ايه موضوع الريدر ده
ينوب ثواب كده علي الماشي
ونبي ماتشد شعرك

شمس النهار يقول...

8رومنسي
ربنا يكرمك ويخليك ليه
شكرا علي المواساه الرقيقه مش زي الشريرين اللي بيتريقوا عليه

شمس النهار يقول...

*محمد هشام
شكرا يامحمد
دايما انت المختصر المفيد

شمس النهار يقول...

*برنس 4ايفر
شكرا علي الكلمات الجميله دي ربنا يكرمك
ان شاء الله هعملها تاني

شمس النهار يقول...

*فركشاوي-ناوي
انت اللي نورتني
شكرا علي كلامك الجميل

شمس النهار يقول...

*كيار
ربنا يخليكي ليه ياجميله
انت عرفت ان فشكول هيكتب بوستات عن الفراعنه
وبعدين ايه موضوع الريدر ده
تعرفي حاجه عنه لحسن ميدو(ادهم)ممكن ينتحر بسببي

شمس النهار يقول...

*احوال الهوي
شوف لازم الانسان يجرب ويفشل وينجح
هي الحياه كده
القايمه اتمسحت ان شاء الله هعمل غيرها
عشان اعرف اخباركم اول بأول
ومش عايزه نيو لوك
خليه لصحابه
ماله الطبيعي

شمس النهار يقول...

*سميلزروز
شكرا علي مواستك الرقيقه
ربنا يخليكي ليه
وان شاء الله هعمل واحده تانيه
وتكوني منوره فيها

شمس النهار يقول...

*ابي
كده ياابي حتي انت
مش عايزاني العب
ماشي
ايه بقه موضوع الريدرده
وبيتعمل ازاي
صحيح عملتي ايه في موضوع المدون اللي اسمه الغزالي عرفتي ليه كان بيرخم علي الشباب في البرنامج

شمس النهار يقول...

*ضد التيار
يعجبني حماسك وتحديكي لكل صعب
شكرا علي تشجيعك
بس انا ماعرفش الريدر ده ايه اصلا والابيجبوه منين

شمس النهار يقول...

*ساره جبالي
مالحقتهاش ياختتتتي
هب مالقيتهاش
اختفت والا ونش متروا الانفاق

شمس النهار يقول...

*د/رامي شهاب الدين
الله الله ايه الدعوه دي
مرراة ايه
يعني انت بتتنبأان هي هتتمسح تاني
خلاص ياعم مش هعملهاتاني

شمس النهار يقول...

*ابو علي(اجديد)
اهلا بيك ترالملم ترلملم
نورتي
ترالملم

مصطفى محمود يقول...

حمد لله على السلامة
تعيشي وتكسري :D

مشفتش انا الشكل القديم
بس دا شكله جميل
ربنا معاك
ومتبقيش تلعبي في حاجة تاني

سلام

شمس النهار يقول...

*تيفا
الله يخليك
وشكرا علي المجامله
ادينا بنحاول نصلح حال المدونه
هنفشل مره
وننجح مره
نورتني

من غير عنـــوان يقول...

أولا كل سنه وانت بخير وحب وسعادة

وياريت الناس تحب بعض على قد ما تحب عيد الحب
ولا هو كلام والسلام


بالنسبة للنيو لوك.... شكله ظريف... وتعيشي وتاخدي غيرها

أنا كمان حصلتلي مرة
ومش عايز اتعب نفسي في جرافيك وخلافه... وان كان انا عارف انه مهم وحذاب ...

شمس النهار يقول...

*من غير عنوان
انا مالحقتش اصلا اعمل حاجه المدونه هي هي ماحصلش اي تغيير
غير فقد العزيزه الغاليه القائمه
بالنسبه لعيد الحب
آمين

ابو على يقول...

انا عملت بوست جديد ياريت تقوليلى رايك فيه

مستنيكى

Sweet Violet يقول...

شموسه انا بعت الاجابه على السؤال

على الميل اللى فى البروفايل

و لو فى اى حاجه انا موجوده (:

شمس النهار يقول...

*ضد التيار
شكرا ليكي بس هو ماوصلش
ياريت تبعتيه تاني
وكمان اكتبي العنوان يا شمس النهار يا ضد التيار باللعربي
عشان مابفتحش غير الميل اللي اعرفه بس
شكرا علي اهتمامك

Sweet Violet يقول...

هابعته تانى دلوقتى على الاميل اللى فى البروفايل عندك

و حاضر هاغير العنوان (:

Foxology يقول...

للفقيد الرحمة :)

حصل خير الحمد لله :)

شمس النهار يقول...

*ضد التيار
شكرا ليكي
اهتمامك
ان شاء الله توصل
واي وقت تحبي تبعتي لي ميل اعملي كده
عشان مابفتحش اي ميل

شمس النهار يقول...

*فوكس لوجيا
البركه فيك
الحمد لله انها جت علي قد كده
والمدونه كلها ماراحتش
قضاء اخف من قضاء
هااااه مدونات

Sweet Violet يقول...

شموسه لو ماتبعتش برضه

ممكن لو مافيش مشاكل اعمل الشرح فى التعليق عندك

أنا و دماغي يقول...

معلش :)

بس على رأي عمرو .. حد يضيع القايمه :)

مفكر يقول...

ضيعتي القاية!!!!!! أانا كل أملاكي مكتوبة فيها......هههههه

يلا خيرها في غيرها....متنسنيش بقى....


أخوك في الله

مفكر (مش عايز أقول مفكر مين)

مفكر يقول...

السلام عليكم:::::::

أتمنى اشوفك في الحدوتة الجديدة :::الأميرة القمرية...في مدونتي طبعاً...

شمس النهار يقول...

*ضد التيار
ماوصلش اشمعنه انت
ده بيوصلني عليه من كل حته
هو بيديك انه اتبعت
معلش اكتبي الشرح هنا
بس اكيد في حاجه غلط في الميل
shams_elnahar@live.co.uk

شمس النهار يقول...

*سيسم
كده ماشي
بس شوفت الجديده
علي طول نقع نقف علي طول

شمس النهار يقول...

*مفكر
ماش ياسيدي
عموما مع ان القايمه مش موجوده دخلت مدونتك وعلقت كمان
بس شوفت الجديده
كله مكتوب

نوسه وريمان فى هاكونا مطاطا يقول...

السلام عليكم

مش عايزه اضحك

ههههههههه

معلش معلش
مش مشكله
بس ابقى خلى بالك بعد كده
وحصل خييير

وابقى اسالى حد يكون عارف عشان مش تبوظى الدنيا كده

مع تحياتى

الازهرى يقول...

البقاء لله
فى الفقيدة الغالية

طبعا بدون تريقة او جات الحزينة تفرح ملقتلهاش مطرح
ولن اقول باب النجار مخلع
او ما الى ذلك
فانت تعلمين اننى لن اسخر بالطبع

تحياتى

شمس النهار يقول...

*حسام وريمان هاكونامطاطا
ماشي ماشي
بس الحمد لله عملتها تاني

شمس النهار يقول...

*الازهري
لاسمح الله انت لااتريقت والا حاجه بصراحه
ماش ماشي
عموما عملتها تاني وامنت عليها كمان

blue-wave يقول...

ههههههههههههههههههههههههههه
معلش
اصبرى بس وهاتعمليها تانى
ربنا يعينك بقى:)))

Sweet Violet يقول...

انا فعلا بعت على الميل ده

مش عارفه فيه ايه الصراحه

عموما انا هانزل الشرح هنا

-------

بتروحى لصفحه لوحة التحكم الرئيسية بتاعتك على بلوجر

و بتدوسى على إنشاء مدونة إلكترونية

و بعدين بتملى المطلوب الاسم و النطاق بتاع المدونه و الكلمه التاكديه

و بعدين بتختارى القالب و هى بتنزل اتوماتك فى البروفايل بتاعك زى اللى عندى كده

-------------
و لو لوحه التحكم عندك بالانجليزى مش العربى

يبقى الخطوات

بنروح على

dashboard

و منها بنختار

Create a Blog

بتكتبى برضه الاسم و النطاق و الكلمه التأكديه و بعدها

القالب

و لو فى اى شئ مش واضح انا موجوده

تحياتى

شمس النهار يقول...

*بلو-ويف
الحمد لله عملتها تاني
مانجيلكش في حاجه وحشه

شمس النهار يقول...

8ضد التيار
شكرا لك
تعبتك معايا
نردها في الافراح

شمس النهار يقول...

*ايه موضوع النطاق ده مالاقيتوش
خالص
مش المفروض بكتب اسم مدونتي الاصليه عشان ينزل عندها
بيقولي ليه غير متوفره
هو ماله مزاجي كده

Sweet Violet يقول...

شموستى

لما بتعملى انشاء مدونه جديده

بيجيلك 3 اختيارات

اول واحد اسم المدونه الجديده

بتكتبى الاسم اللى انتى عايزاه

تانى واحد عنوان المدونه الجديده اللى هو النطاق

يتكتبى العنوان اللى انتى عايزاه

مش اللينك الاساسى بتاع المدونه الرئيسيه ده

shams-elnahar

لان كده هايقولك انه غير متاح

ممكن لو عايزة تحتفظى بنفس الاسم زودى ارقام

تالت واحد الكلمه التأكيديه

و بعدها بدوسى استمرار

بتروحى على الخطوة التالته و هى اختيار القالب

و بعدها كده يبقى المدونه اتعملت و نزلت عند فى البروفايل

و لو فى حاجه مش واضحه انا موجوده

Unknown يقول...

السلام عليكم
ورحمة الله تعالى وبركاته
ولا يهمك ياشمس يا ما ضيعنا
قوائم ومدونات أول ما بدأت
التدوين لكن شوية شوية الواحد بيتعلم والتكرار يعلم الشطارررر

شمس النهار يقول...

*ضد التيار
شكرا لك الف شكر
شوفتي هنطبخ كلنا مع بعض
بشكرك علي صبرك معايا
نردها في المطبخ مع بعض

Sweet Violet يقول...

مبرووووووووووك شموسه

عايزين بقى احلى أكل (:

شمس النهار يقول...

*ضد التيار
ان شاء الله هعلم البنوتات الحلوين ازاي يطبخوا

شمس النهار يقول...

*نور هاتي
الاسم كده صح
معلش عشان بكسل اقلب انجلش وبعدين عربي
شكرا علي المواساه
والحمد لله عملت غيرها
نورتيني ابقي تعالي في المطبخ

maxbeta3zaman يقول...

÷ذا مأصابنا وكتبنا فيه القصائد من الغيظ ..لقد تاهت منى مدونه أولى انشأها لى صديقى البلوجاوى المخضرم شريف ..ضاعت من غير تكحيل ولا دياولو ..فاستعوضت ربنا ومن الأول عملت بلوج تانى ...والله المستعان ..هى البلاليج كده زرار واحد غلط والموضوع يروح فى الدليت دوغرى

شمس النهار يقول...

*ماكس بتاع زمان
كلنا لها
معلش لكل جواد كبوه
وناخد بالنا المره الجايه
كل مااعمل حاجه ادقق قبل ماادوس
نورتني ومانجيلكش في حاجه وحشه