الأحد، 9 نوفمبر 2008

عاجل من وادي الملوك من عمر

عاجل .. عاجل .. عاجل

أزيكم الأول ؟ .. طيب الحمد لله ..

أنا لسه راجع من الهيئة العامة لمش عارف أيه و أيه و التنمية الزراعية و مقرها خلف المتحف الزراعى بالدقى ..

رجاء حار من الأعزاء اللى بيدخلوا المدونه و اللى يعرفوا أى حد شارى أرض فى منطقة وادى الملوك بالكيلو 52 طريق القاهره الاٍسكندريه الصحراوى من مدحت بركات يبلغوه بالآتى علما بأن اللى حأقوله بينطبق بصفه عامه على كل واضعى اليد و لكن أرض وادى الملوك بصفه خاصه لأن الهوجه قايمه عليها اليومين دول :

1- عمل محضر اٍثبات حاله بقسم الشبخ زايد و معاك أصل العقد و صورتين منه و كمان المخالصه لو وجدت .. و أصل بطاقة الرقم القومى أو جواز السفر .. عند سيادة النقيب أحمد حافظ و يفضل بعد العاشره مساءا علشان الزحام و ما تنساش و أنت ماشى تاخد رقم المحضر ..

2- عمل خريطه مساحيه هندسيه بالقمر الصناعى و المهندس اللى بيعملها اٍسمه محمود و ده رقم موبايله 0106948616 و بتتكلف 300 جنيه و بتاخدها تانى يوم أو تالت يوم بس ده يستلزم أن أرضك أصلا تكون عارف رقمها كويس و تكون محددة الأركان الأربعه و لو بحدايد ..

3- سرعة زراعة قطعة أرضك على وجه السرعه لأن اللجنه بتاعت التفتيش خلاص نازله الموقع و لو ماكنتش عملت شبكه أو زرعت فأعلم أخى المواطن و أختى المواطنه أن شبكة الرى للفدان بتتكلف حوالى 1200 جنيه شامله كل حاااااااااااجه و الزراعة للفدان بتاخد 200 شتله على أبعاد 5 فى خمسه و طن و ربع جله لا مؤاخذه سعر الطن بنقله 350 جنيه و أنت و شطارتك مع العمال بس بتتراوح زراعة الفدان بما فيها حفر الجور و غرس الشتله و ريها حوالى من 100 ل 150 جنيه .. مع مراعاة أخى المزارع تخمير الأرض جيدا بالجله و المياه لمدة يومين قبل غرس الشتلات .. و لازم تكون الشتلات طولها تتناسب مع تاريخ شرائك للأرض علشان ما يبانش اٍنها حركه أمريكانى كده و كده .. و الحوار ده كله مش بياخد أكتر من 4 أيام أو خمسه بالكتير ..

4- بعد كده أيها المواطنون .. تنووا خير و تتكلوا على الله ساعة الصبحيه على الهيئة العامه للى مش عارف أيه و أيه و التنمية الزراعيه اللى خلف المتحف الزراعى فى الدقى و تدخلوا من الباب الرئيسى و تحودوا يمين حتلاقوا مبنى دور واحد مبنى بالألوميتال و يكون معاكم أصل الخريطه المساحيه لأنهم بياخدوا الأصل + سى دى اللى مع الخريطه + أصل العقد + صوره من أصل العقد + بطاقة الرقم القومى أو الباسبور + صوره منهم .. و خدوا بالكم أن لو فيه أكتر من اٍسم فى العقد فلابد من حضور جميع الأطراف بتحقيق شخصياتهم .. و هناك فيه الأستاذ / منير موظف شاب زى البلسم يعرف ربنا و صدره متسع لكل الاٍستفسارات حيديكم نموذج مطبوع من عدة ورقات تملوه وش و ضهر و ما تنسوش أهم حته فى ورقه منهم اٍثبات سند الملكيه تروح كاتب قدامها الزرع + عقد الشراء و ما تنساش تاخد معاك قلم جاف علشان أنا أتبهدلت على ما حد رضى يشحتنى قلم .. الأستاذ منير بيراجع الأوراق و بيستلمها منك و بيديك رقم و خلاص على كده ..

5- نصيحه أخويه لما اللجنه تنزل أرضك اٍنشاءالله أوعوا حد يفكر يصبح أو يمسى عليهم بطريقة المصريين الفهلويه لأنهم ناس دوغرى مالهمش فى الكلام ده و منهم واحد عنده 3 زبايب فى قورته من أثر السجود يعنى أوعى وشك ..

6- طيب اللى حيسألنى يا باشا لو واحد مسافر بره يعمل أيه ؟ حأقوله : و يسافر بره ليه أصلا ؟؟ ما علينا .. ببساطه يعمل توكيل لحد من قرايبه فى مصر و يبعتهولوه بعد ما يوثقه من السفاره المصريه و يبعت له الأوراق اللازمه لأستكمال الاٍجراءات ..

7- سمعت كده طراطيش كلام أن الفدان حيندفع عليه من 5 ل 7 آلاف جنيه للهيئه على حسب تميز القطعه و بعدها أو قربها من الطريق بيتقسطوا على 5 سنين ..

8- أنا شايف أن ده حل مش بطال للخلاص من الورطه اللى أتحطينا فيها .. و ربنا هو صاحب العوض ..

أرجو بقى من اللى يقرا الكلام و يعرف حد شارى فى وادى الملوك أو من أى شركه على الطريق الصحراوى أنه يبلغه و لو حد عاوز يستفسر عن حاجه خاصة بالموضوع أو بالزراعه أو لأى سبب يراسلنى على : amrbadr70@yahoo.com

هناك 25 تعليقًا:

عمرو يقول...

و الله يا شمس مش عارف أشكرك اٍزاى .. ربنا يخليكى لينا
أدعى لنا يا شمس

SHAPE YOUR LIFE (ABOALI) يقول...

لا تعليق
حاسس انى فى حرب عصابات فى البلد
والقلعة ها يتم احتلالها

طيب
لا تعليق

romansy يقول...

جميله روحك يا شمس
ربنا معاكى وتقدرى تساعدى الناس كمان وكمان

Foxology يقول...

ربنا يكرمك والله على الموضوع ده وربنا يكرم الناس اصحاب الحقوق ويرضيهم ويعوضهم خير ان شاء الله :)

Teawater يقول...

ايه السرقه الي عيني عينك ديه يا مامتي ديه البلد خربت خالص بذمتك يا مامي
ايام زمان الجميله كان فيه فساد كده يا مامتي؟؟


بالنسبه للطبخ بقا انا مش لقيت حاجه في البلوج التاني يا مامتي ليه انا عاوزة ابقا طباخه شاطورة وعاوزة اتعلم البتزا والفطاير منك زي ما باتعلمها من ماما

شمس النهار يقول...

*عمرو
تشكرني علي ايه
احنا اللي المفروض نشكرك انك حاولت تزرع وتعمل حاجه مفيده وتحي الزراعه اللي للأسف تاهت زي مااي حاجه حلوه في البلد دي تاهت
صدقني بدعيلكم كلكم وربنا يستجيب لدعائي

شمس النهار يقول...

*ابو علي صدقت
زي مايكون البلد مستهدفه من بعض اهلها لا مااعتقدش دول اهلها

شمس النهار يقول...

*رومنسي
كل سنه وانت طيب وعقبال 100 سنه

شمس النهار يقول...

*فوكسلوجيا
ربنا يكرمنا جميعا

شمس النهار يقول...

*تيويتر
هتعرفي ايام زمان منين ياشقيه انت
النهارده اول طبخه
هرد علي اصدقائي واروح اكتبها قصدي اطبخها

Unknown يقول...

شمس النهار طالعه...والدنيا حر ولعه.
ياسمش أقرأي الموضوع وفكري فيه ...تفهمي الي تحبيه فركشي الاسئله وجاوبي لوحدك وبهدليها بهدله ..
وايه الي انت بتسألي عليه بالضبط وعايزه تفهميه؟ تحت أمرك...

10 نوفمبر, 2008 11:47 ص

Geo Amr يقول...

جزاكى الله خيرا وربنا يجعل هذا العمل فى ميزان حسناتك وربنا يرحمنا برحمته

أحــوال الهـوي يقول...

نسيتي في و صفة الزراعة ان تقولي ان شمس النهار مهمة جدا لنمو الزرع
اكرمك الله لان كل المعلومات لم تاتي لك علي طبق من ذهب بل بتعب و تحري و لانك انسانه فاضله وده واضح جدا من وهب الخير للناس بلا انانيه

تحياتي و دعائي الي الله ان يجزاك الخير برحمته و منه ثم بصالح عملك و طيبة قلبك

شمس النهار يقول...

*فركشاوي ناوي
هو انت لازم تتعبني
ماتفهمني علي طول
كل حاجه لازم اتعب فيها نفسي
وبعدين النهارده انا مش فاضيه بطبخ
للمدونين
هتقول الافركش.........

شمس النهار يقول...

*جيو عمر
ربنا يكرمك شكرا لك المجامله

شمس النهار يقول...

*احوال الهوي
صحيح ازاي عمرو ماجبش سيرتي في الموضوع ده
وبعدين مش انا اللي كاتبه البوست انا جبته من عند عمرو
وشكرا لك علي المجامله
انت شفت طبيخ النهارده

Amr Abdel Azim يقول...

دعوة لزيارة مدونة سوسيولوجيا الحياة اليومية ....
http://sociology4me.blogspot.com
تمتع بتحليل سوسيولوجى لابرز الموضوعات والتعليقات والاطروحات والافكار والاستشارات الاجتماعية
مدونة متخصصة فى علم الاجتماع

رئيس التحرير يقول...
أزال المؤلف هذا التعليق.
FREE EGYPT يقول...

فلتسمحى لى بهذه المساحة الإعلانية

اذا أردت ان تكتشف من وراء مقتل سعاد حسنى ، فالاجابة لدى فى المدونة

سري للغاية
www.toptop-secret.blogspot.com

الازهرى يقول...

العزيزة شمس النهار

انضم الى ابو على رأيه بشده

وللاسف اما ان نصمد او نموت تحت الاسوار


جزاك الله خيرا على العمل الطيب

دعاء مواجهات يقول...

والله جزاك الله خيرا بجد

وكتر من امثالك


انك ترشد الناس للطريق اللى مفروض يمشوا فيه ف مشكلتهم

تحياتى ليك

أحــوال الهـوي يقول...

شمس النهار
سيدتي الفاضلة
اصبت كما انت دائما المهم الحب
و لكنها قضية جانبية لا تقدم ولا تأخر لكنها طبيعة البشر لمحاولة معرفة اسباب كل شئ السعادة الحب لانهم يبحثون دائما عنهم و يحسبون ان الحب وصفة او طريقة و لكنها هبه من الله يهب من يشاء و قت شاء

.......... اعلم ان عمر قاص جيد و احترم قلمه و رأيه و انا لا اختلف مع احد اذا كان النقاش هادئ و منطقي و لا يهمني اذا انتصر راي فوق راي و لكنني رجل مسالم و لا احب الانفعال و تلقي الاتهامات الشخصية
انا اتابع ما يكتب و لا اشارك بالراي
تحياتي

شمس النهار يقول...

*الازهري
هو حتي مااتسبش لنا اسوار نموت تحتها

شمس النهار يقول...

*مواجهات
الحقيقه الشكر لعمرو انه عمل البوست ده عشان يعرف الناس
وكمان اداهم خلاصت الموضوع

شمس النهار يقول...

*احوال الهوي
هيفضل الحب لغز زي النفس البشريه
اما موضوع عمرو اكيد هنلاقي لغه مشتركه
بينا ان شاء الله
الصلح خير