الخميس، 5 مارس 2009

الكدب و سنينه .. تحديث

تحديث للكدب و سنينه : أدعوكم لمدونة اٍينو ( رقة الاٍحساس ) عامله بحث لطيف عن الكذب الحلال ..
***************************
موضوع الكدب ده شاغل دماغي بقاله فتره وكان نفسي حد تاني يكتب فيه بس ماحصلش
اصل انا مابعرفش اكتب كويس والا احلل كويس
فاقلت نكتبه سوا يعني كل واحد وواحده يكتب في التعليق رأيه في الكدب وانواعه وليه الانسان بيكدب
انا في اعتقادي ان الكداب يامخادع.. يانصاب ..ياخايف ..يامكره ...ياهوايه... ياعاده اتعود عليها من الصغر... يابيستمتع انه ضحك علي الاخرين..ياعايز ياخد حاجه مش من حقه
يادمه خفيف زي ابو لمعه كده
وفعلا الغريب عادتا ان الكداب دمه خفيف جدا
والغريب ان اغلب العاشقين كدابين ليه مش عارفه هو الحب بيفتح نفسهم علي الكدب
مع ان الحب مبني علي الصدق والثقه
المهم ليه الكدب وماحدش يقول لي ان في كدب ابيض واسود وبمبه الكدب كدب اه

انتم عارفين ان الحيوانات والحشرات بتكدب كمان عشان تخادع الصياد او الفريسه
ملحوظه
------بعد مانخلص تعليقات هعمل بوست اجمع فيه كلامكم ونعمل ملخص لحالةالكدب

هناك 49 تعليقًا:

عمرو يقول...

يا برنسيس طبعا اللى بيحب بيكدب يعنى يقولها بأحبك و لكن فى الحقيقه هو بيعشقها من كل قلبه :)
الكدب هو تعود من الشخص و بيبقى حاله اٍعتياديه بيمارسها على الدوام
و غالبا بيكون الكداب عنده شعور قوى بالنقص و بيعوضه بالكدب و لا يزال يكذب حتى يكتب عند الله كداب
الكدب ممكن يكون حاله مرضيه و محتاجه لعلاج نفسى و متابعه و غالبا بيكون سببه معامله خاطئه فى الطفوله من الكبار زى مثلا العقاب الشديد من الأبوين و المدرسين فلا يجد الطفل أمامه سوى اللجوء للكذب للنجاه من العقاب خاصة مع تضخم و تجسد مقولة اٍن الكدب منجى و هو و لا منجى و لا حاجه
بالعكس الصدق و الصراحه هم اللى بينجوا من كل المواقف الصعبه
و أسوء أنواع الكذب هو اللى بيمارسه الكبار أمام صغارهم زى مثلا لو حد طلبنى فى التليفون قولوا له بابا مش هنا !!
طيب أهو بيكدب أهو يبقى ليه أنا كمان ما أكدبش ؟؟
يعنى القدوه مهمه جدا لتعويد الصغار على الصدق
و أحسن من عبر عن حالة الصدق هو محمد منير لما قال : خايف أوعدك ماتلاقيش أقول لك فيه تلاقى مافيش !!
يعنى هو أدرى

فضه يقول...

بصى يا شمس انا عن نفسى اعتقد ان الكذب ده فى حد ذاته ناتج هن عدم الثقه بالنفس او الشعور بالنقص.....
وله عده اسباب فممكن مثلا يكذب علشان يطلع من موقف معين محرج وممكن يكذب علشان يضيف لنفسه صفات مش فيه .......وممكن يبالغ فى الكلام مثلا علشان يضحك غيرة واصحابه يقولوا عليه دمه خفيف...
وممكن يكذب لانه خايف ......
حاجات كتيرة قوى وكلها ناتجه عن عدم احترام الانسان لذاته ......
واكيد مهما كان الصدق هو بر النجاه دائما.....
شكرا لموضوعك وتقبلى مرورى الاول لمدونتك

فليسيتى

mohamed ghalia يقول...

أكيد طبعا الكدب ملوش لون
كله كدب
وبعدين ده حاجة بسبطة جنب البلاوى الى البشر بقى يعملوها ههههههههههه
ربنا يهدى الجميع

حواء يقول...

الكدب
موضوع حلو اوي
انا اقولك
يعني انا مثلا بكدب ( وطبعا اللي هيقول انا مبكدبش يبقي كداب ) ههههههههه
نرجع للموضوعنا
انا لما بكدب بكون خايفه علي زعل اللي قدامي فقط لاغير
لكن اكدب بقي علشان اهرب من حد
او اكدب بقي علشان مظهري ومنظري لا
انا لما اتزنق ميكونش قدامي غير الكدب
اعترف علي طول
وتصدقي
بكبر في عين اللي حواليا اوي
في ناس مريضه بداء الكذب
وفي ناس كانت بتعيب وابتليت
وفي ناس كانت بتستمتع بانها بتكذب
انا هتكلم علي البنت صحبتي لما كنت في المرحله الاعدايه
كنت في درس خصوصي
وكنت متصاحبه علي بنت وفوجئت انها غاويه تكدب
وفي مره قولتلها لو كدبتي تاني قدامي هكشفك قدام الناس كلها
اوك . فسكتت
فجه معاد الدرس الاسبوعي
والمدرس بيسئل علي الواجب وكان الواجب في كتاب خارجي
وطبعا هي قالت نسيت الكتاب في البيت
وهي اساسا مجبتوش
مش قصر ذات اليد
لا
غتاته
وبالفعل روحت قايله روحي هاتيه من البيت انتي بيتك قريب جدا عقبال ما المدرس يصحح لينا الواجب
ولقيت وشها احمر
وقولتلها قدام الكل انا حذرتك
وفي الاخر راحت بس جابت كتاب واحده تانيه
والمدرس قالها اعلملك الواجب الحصه الجايه
أما اكتر حاجه بتستفذني جدا
ان انسان كداب ويتهمك انتي بالكدب
وانتي عارفه اني بسبب الكدب هنهي حياتي الزوجيه
إلا اذا بقي اعترف انه كداب
وانا اشك 100 % ان ده يحصل
تحياتي ليكي شموسه
وياريت متكونيش زعلتي من تعليقي عليكي البوست اللي فات

Tamer Alhosiny يقول...

عزيزتي شمس النهار
طبعا موضوع جميل ودعوة لعرض الافكار حول الكدب
طبعا انا كنت اتمني الحق الموضوع في الاخر علشان اشوف كل اراء الناس
وكمان علشان انا عايز اتكلم علي حالة خاصة من الكدب
صاحبها ممكن نسميه الكداب المجبر
طبعا في حجات كتير في الحياة بتجحبر الاننسان علي الكدب
وطبعا ده مش مبرر للكدب بالعكس
دي وسيلة اختبار
للانسان ومدي صدقه مع نفسه
واكيد الكداب من جواه حاسس قد ايه هو انسان فاشل
وانه ميستحقش اي شيء بيحصل عليه بالكدب

بس في نوع ناس عندها خصوصيات مش ينفع تظهرها ولا ينفع
تتكتمها
وبالتالي بتطر تكدب علشان تخفي الحقيقة الاي ممكن تكون مؤلمة ليه او مؤملمة للاي بيكلمه

يعني مثلا لو كدب علي واحد مهدد بالموت وقاله انت هتعيش واطمن وخلي ثقتك في ربنا
او كدب علي حد بيحاول يوقعه في اي ضرر
كل دي حجات كدب
بس بيتهيئلي فعلا ان للاسف الكدب انواع
وان في كدب ابيض اكيد
مش اقصد طبعا النوع الاي بيقولو عليه مش بياذي حد
لا اقصد بيه الكدب الاي المقابل بتاعه
نهاية شيء جميل

لو مش مقتنعة
ممكن نعمل موقف ونشوف هتقولي فيه الحقيقة ولا لا وهتقوليها اذاي

تحياتي
تامر الحسيني
انسان عاشق حر

Eno يقول...

الكدب ده موضوع طوووويل اوووووي

بس اللي بيحب بجد مش ممكن يعرف يكدب علي حبيبه اول لما بيشوفه بيقر ويعترف بكل حاجه

الناس اللي قبلي قالو كلام انا متفقه فيه جدا معاهم
بس انا عاوزه اضيف جزء كده وممكن لو تحبي اعمل عنه بوست عندي

هو انا قريت في كتاب الي حبيبين عن حاجه اسمها الكذب الحلال !

الموضوع مكتوب طويل اووووي علي اني اكتبه في كومنت
بس ملخصه انه ممكن الزوجه تكدب علي زوجها وتكون تقصد من الكدب ده حاجه خير مش ضرر ولا ليها ولا ليه
او بمعني اخر بيسموه التجمل وليس الكذب !!
وفي الموضوع مستعين بأحديث شريفه واخري مع امير المؤمنين
لكن انا فكرت هو انا ارضي عن نفسي انه الطرف التاني يكذب عليه الكذب الحلال هكون مبسوطه بيه !!

لقيت الاجابه لا خالص !
اذن اللي انا مش هرضي بيه عليه مش هرضي بيه علي حد

تحياتي لااجمل قلب مجمعنا حوليه دايما :)

شخـا بيــط مـحـجـوب يقول...

موضوع جميل جدا ويستحق الطرح

بس فعلا الكدب ملوش رجلان

وكل الكدب واحد ملوش الوان

تحياتى ليكى دمت بكل خير

شخابيط mahgoub

Tshandny يقول...

اسوء انواع الكذب
وهو ان الكاذب يكذب الكذبة ويصدقها
ويعيشها ويمارس حياته عادي لانها بتكون جزء من تكوينه

تحياتي ليكي

صوت من مصر يقول...

على فكره انا كداب وكلنا كدابين محدش بيقول الحقيقه كامله وللاسف الكدب ليه فوائد وليه عيوب

صبرني يارب يقول...

شموستي

ده موضوع كبيركبير كبير


عايزله قاعده طيب فاضيه ؟

المهم

شوفي يا ست الكل

الكدب ده انواع واصناف واشكال

فى البدايه بتكون فى الطفوله طبعا .
مافيش طفل ما بيكذبش لكن المشكله فى مواجهة الكذب ده ومعرفة اسبابه .

يعنى مثلا انا لما حد من ولادي احس انه بيكذب عليا احاول انى اعمل نفسي مصدقاه لو كان ينفع من خلال الموقف يعنى واقول واكد داااااايما فى نفس الموقع ان فلانه ما بتكذبش ابدا

والنتيجه حاجتين
انها بتتكسف من نفسها اوي انى واثقه فيها وهى مش اد الثقه وبتكذب

والتانيه انها بيترسخ فى ذهنها انها مش كذابه بالتالي بتطلع مش كذابه

انما لما بالاقي ام دايما تقول لولادها يا كذااااااب بابقى عايزه اولع فيها

بعد كده يجي بقى الكذابين الكبار

فى واحد بيكذب خوف (من البشر طبعا )
وفى واحد بيكذب نقص (بيحاول يظهر بمظهر غير حقيقته )
وفى واحد بيكذب عشان يداري بلاوي سوده
وفى واحد بيكذب عشان يريح دماغه(مش عايز يواجه مشاكله ولا حياته فبيهرب منها بالكذب )

وكل دول يندرجوا تحت بندالايه الكريمه الى بتقول :

أتخشى الناس والله احق ان تخشاه

لو كنا نخاف من ربنا اكتر ما نخاف من الناس كنا ما نكذبش ابدا

المشكله بقى ايه

ان الحالات الى فوق دي بعد كده بتحول الكذب عند بعض الاشخاص دي ان لم يكن كلهم الى هوايه
مرض بقى وماشي فى دمهم

تلاقيهم بيكدب على الفاضيه والمليانه

وبيكذبوا لمجرد الكذب

وبيكذبوا كلعبه

وهما دول بقى الى قال عليهم الرسول عليه الصلاة والسلام :كتب عند الله كذابا

وشويه شويه حتى لو كان ماهر فى الكذب او دمه خفيف او غيره بينكشف كذبه للناس وبيبقى معروف عنه ده عشان فعلا فعلا الكذب مالوش رجلين

اما بالنسبه للكذب فى الحب

فانا شايفه ان الحب مالوش دعوه

البنى ادم الكذاب فى حاجه كذاب فى كل حاجه

الى بكذب على مديره فى الشغل
بيكذب على مراته
بيكذب على ولاده

الكذاب كذاب والصادق صادق

اما موضوع الكذب الابيض

فى رايي هو الى لا يعد فقط هو مثلا انك تقولي لجوزك والله انت احلى من رشدي اباظه فى زمانه
ويكون هو شبه ..... احمد مظهر مثلاااااااا
هههههههههههههه

او ان الراجل يجامل مراته ويقولها التايير ده احلى على من الموديل الى كانت لابساه
عاااااااااااادي

لكن صدقينى الى بيتعود لسانه على الصدق ما يعرفش يكدب

ودايما اقول لنفسي طيب الواحد يكذب ليه ؟؟؟

مين فى هذه الدنيا زعله مهم ولا هو شخصيا مهم اهم من ربنا عندي

طزززززز يا فندم فى البشريه كلها بس نقول الصدق ونحط دماغنا على المخده ننام بالليل فى هدوء


ايه لسه ايه لا كتير الرغي ده خلاص بقى كفايه
تحياتي ليكى يا جميل على الموضوع

elsha3er يقول...

انا مش عارف والله بس احيانا الناس بتكدب عشان تعيش لان احنا بنتعلم ان اللى يكدب يرح النار والحق حينصفك لكن فى الحياة اللى يكدب يعيش اللى يكدب ياكل اللى يكدب يترقى اللى يكدب يبقى فى ايدو فلوس اللى يكدب ما يرحش المعتقل هى دى حياتنا صح لا الكدب دلوقتى بقى بينجى


بس المهم اللى بيكدب بيروح النار

الكبيررررررررررررررررررررررررررررة

تحياتى


احمد الشاعر

صبرني يارب يقول...

ايه ده

ما كنتش شوفت تعليقات الناس

ايه الى بيقولوا كلنا بنكذب دول

لا كل واحد يتكلم عن نفسه يا ريت

بس فعلا كل واحد بيشوف الدنيا والناس بمرايته

سوري يا جماعه لكم بس دي حقيقه لسه فى ناس ما بتكذبش فعلا

واحيي تشاندي على الراي لان فعلا فعلا
اسوأ انواع الكذب كضرر لحياته وشخصه هو الكذب على النفس

ممكن واحد يكون مش بيكذب فعلا على الناس الا انه اساسا بيضحك على نفسه وبيكذب على نفسه ومصدق نفسه

وده دايما يحب يعمل نفسه شهيد ومظلوم وحظه وحش و و و ويدور على شماعات كتير ينجي نفسه من خلالها من اللوم


تحيااااتي



هو انا رغايه ؟؟؟

الربان يقول...

تحياتي

فعلا الكذب اصبح آفة تتملك الكثيرين منا.... وهذا للاسف نتيجة ابتعادنا عن المفهوم الصحيح للدين... و محاولة
تبرير الكذب بأنه أبيض او كذبه صغيرة
لا تضر...او الي ما شابه ذلك من مسميات يحتال بها الشيطان علينا.

اود ان أشير الي :

- من يحب رسول الله صلي الله عليه وسلم
لابد ان يقتدي به...فهو " الصادق الامين "... يعني لابد ان نكون صادقين
في السر و العلن.

- الكذب بكل اسمائه و مسمياته حرام
في الاسلام...الا نوعين فقط من الكذب
و هو بين الزوجين....و الثاني للصلح بين خصمين....
مثلا الزو ممكن يقول لزوجته انت اجمل النساء في عيناي...او هي تقول له نفس الشيء....هذا مستحب .

الرجل او المرأة الذي يصلحبين متخاصمين ممكن يقول لاي منهما ان الطرف الاخر يحترمك و يشكر فيك و دائما ما يعبر عن مشاعر طيبة تجاهك ان ذكر اسمك....و هكذا ...حت تهدأ
النفوس و يتم التراضي و التصالح وهذا
من قبيل الاصلاح بين الناس...

في رأيي ان الكذاب شخص ضعيف...لا يقدر
علي المواجهة و لا يستطيع التعبير بدقة عن نفسه و ايصال حجته الي الغير
بطريقة يكتسب فيها احترامهم و تقديرهم....

الكذب ان زاد تحول الي مرض يستدعي العلاج...
و في الحجيث الشريف ما معناه: ما زال الرجل يكذب و يتحري الكذب حتي يكتب عند الله كذابا....و ما وال الرجل يصدق و يتحري الصدق حتي يكتب عند الله صديقا....
او كما قال صلي الله عليه و سلم...

وعلي كل واحد منا ان يتخير مكانته عند الله.....


تحياتي و تقديري و اشكرك لمحاولة الكشف عن السلوكيات المرفوضة في مجتمعنا و محاولة الفهم و التقويم لها.

princess يقول...

خلى بالك كمان ان فى ناس الكدب عندهم مرض يعنى ساعات بيبقوا مش محتاجين اساسا يكدبوا ويكدبوا لانهم مرضى
وفى ناس كمان بتكدي وهيا نفسها بتصدق

أمل حمدي يقول...

ازيك يا شموسة
ان شاء الله تكوني بأحسن حال والوالدة تكون بخير يارب

فكرة جميلة جدا اننا نتشارك في موضوع ونتحاور فيه

والموضوع جميل جدا وخصوصا أنه أصبح وباء
إلا من رحم ربي

أنا اعتبر إن الذي يكدب انسان مريض يحتاج الى التقويم والعلاج والمواجهة

وعلى فكرة بيكون ضعيف يحاول اثارة انتباه من حوله

أنا عن نفسي اذا كذب أحد عليا أفقد الثقة فيه ويصبح أي كلام له كأن لم يكن

ربنا يهدي كل عاصي

اللهم أمين

فيه موضوع جميل برضه

ياريت تكتبي فيه ونتشارك معاكي

هو موضوع الافتراء فهو أصبح ايضا وباء

ربنا المستعان

تقديري لشخصك الكريم

ودمتي بحفظ الله

Sweet Violet يقول...

الانسان اللى بيكدب بيكون ده نابع من ضعف شخصيته و شعوره بالنقص

و الخوف من اظهار الحقيقه و الخوف من العقاب

اوقات بيكون سببه شعور الشخص بالكراهيه تجاه الاشخاص و حبه فى الانتقام منهم

اوقات بيكون نوع من انواع الانانيه او الغيره اللى بيها ممكن يسئ لسمعه شخص ما قدام الناس

و اشد انواع الكدب الانسان اللى بيكدب و بيصدق فعلا كدبه و ده بيكون بارع للأسف فى تمثيل دور المظلوم و انه مضطهد من الكل

لاستعطاف قلوب الناس و ده بردو بيكون راجع لشعوره بالنقص و عدم ثقه فى النفس

و فى انسان بيكدب كدب منطقى لخداع الناس وتحقيق مصلحة شخصية

الكدب من ابشع الامراض اللى ممكن فعلا تصيب الانسان لانه اساس اى شر

تحياتى ليك ياشموسه (:

SHAPE YOUR LIFE (ABOALI) يقول...

الكدب
حلو ولذيذ
فيه كده معانى كتير
واللى مايعرفش
يقول كانى ومانى
الكدب انواع
حلال وحرام
حلاله فى الاصلاح
بين زوجين
وكمان الكدب على الاعداء
وكمان لسه هناك حلال كتير
اما الحرام
معروف
بين العاشق والملهوف
بين الواصل والموصول
بين الفاجر والكافر
بين العاصى والزانى
طبيعة بقى
بس الكل فانى

خير الانام قال
المسلم ليس بكاذب



تحياتى

blue-wave يقول...

الكدب هو افه المجتمع بجد
وفى حديث فيما معناة انهم سألوا الرسول صلى الله عليه وسلم عن مجموعة من الصفات الذميمه هل من الممكن ان تتواجد فى المسلم قال نعم لكن حين سألوة ايكون المسلم كاذبا قال لا
وذلك لأن الكذب هو مقدمة كل الذنوب
فان لم تكدب لن تزنى مثلا حتى لا تكذب اذا سألك الناس اين كنت وماذا تفعل
وهكذا
والكذب جبن
فالكاذب جبان يخشى الناس او يحاول الظهور بما ليس فيه كى يكسب احترام الناس بالباطل
تحياتى لبوستك المميز

مفكر يقول...

السلام عليكم:

أخبارك ايه؟

أنا الحمد لله خلصت الإمتحانات وربنا ييسر وأحاول أتابعكم

موضوعنا النهاردة:::

الكذب=تزييف الواقع لأهداف مختلفة

dina يقول...

حلو التفاعل يا شموسة....الكدب و اه يانى من الكدب....انا معاكى ان مفيش كدب الوان...الكدب كدب و مفيش اى حاجة فى الدنيا تبرره....مقتنعة كمان ان اقصر طريق بين نقطتين هو الخط المستقيم بجد...فى ناس بتحس ان الكدب ممكن ينجيها من مواقف معينة انما على رأى اللى قالوا الكدب مالوش رجلين.....سببه ايه مش عارفة...ممكن تكون قلة ثقة او ضعف و فى حالات بيكون مرض و تعود للاسف تلاقى شغال(كذيبة فى كذيبة)لحد ما يبقى كداب كبيييييييير و ساعتها صعب انه يبطل العادة دى(مش مستحيل طبعا).....المشكلة ان الكدب بقى مرتبط بحاجات حلوة فى حياتنا ... فى الشعر مثلا بيقوله ان اجمله اكذبه و فى الحب زى ما قلتى...انما انا مش مقتنعة .... و عمر الكلام لو مطلعش من القلب ما حيوصل للقلب سواء انا كاتبة و بكتب و لا بحب و بكلم اللى بحبه و لا ابنة و بتكلم ابوها مثلا او فى اى تفاعل بين الناس.....تقريبا جوانا مقياس كدا و احساس بيعلى اوى بالصدق و الكدب مش بيأثر فيه و حتى لو أثر مش بيبقى بجمال الاحاسيس الصادقة
جملة احمد حلمى الشهيرة...كلنا بنكدب مش عارفة مدى صحتها بصراحة...عاوزاكى تقولى رأيك فيها بقى فى بوستك الجديد اللى ان شاء الله يبقى جامد
فكرة جميلة و بتخلق حالة حوار حلوة
تحياتى

بنوتة يقول...

السلام عليكم
موضوع مهم
عارفة الناس ليه بقت بتكدب كتير ؟
عشان بتغلط كتير... والناس ليه بقت بتغلط كتير ؟
عشان بعدت عن ربنا كتير؟
تحياتى ليكى
وسلام

من غير عنـــوان يقول...

أولا أنا آسف إني اتأخرت أكتب عن الكدب..ماكنتش عارف انه مهم بالنسبه لك كده...

المهم

الكدب في الإسلام من المحرمات التي قال عنها الحبيب المصطفى عليه أفضل الصلاه والسلام فيما معناه أنه ممكن أن يكون المسلم كذا وكذا إلا أن يكون كذابا..

لأنه مفتاح لكل المبيقات والخطايا والذنوب..

ثانيا هناك تعريف صوفي( وأنا لست بصوفي ) يقول التعريف: أن الكذب شرك أصغر... لأن أصل الكدب الخوف... ولا يصح أن نخاف إلا من الله تعالى

ثالثا لا يسمح بالكذب إلا في 3 حالات:
* خدعه العدو
* الصلح بين الناس
* الزوج لزوجته حتى لا يغضبها

رابعا: أكيد مافيش كدب أبيض ولا ألوان...

خامسا: يجوز التعريض في الكلام.. يعني ممكن لما حد يسألني في التليفون: إنت فين ... وأنا مش عايز أرد... أقوم أعرّض.. مثلا... أنا بره المكتب.. أنا في الشارع..دون تحديد..

سادسا:يقولون أن الصدق منّجي.. أي أن الصدق دائما يؤدي إلى السلامه...
وقد قال الإمام الشعراوي في ذلك.. إذا كنت كذوبا.. فكن ذكورا... أي تذكر ما كذبت به.. حتى لا تقع في الكلام..

سابعا: أتخيل أن قصه إحسان: إني لا أكذب ولكني أتجمل قد أوضحت الكثير مما قد ينجم عن الكذب...

8: الكذب إذا كان منذ الصغر فغالبا ما يكون بالقدوة... تليفون بيرن... بابا موجود... قوله نزل... خلاص... الطفل ده لازم يطلع كذاب...

9: الصراحه وتقبل الآخر...والرأي الآخر.. وعمل الجماعه... من الأشياء التي تساعد على عدم الكذب.. وعدم تحميل النفس فوق طاقتها...
وعدم جلد الذات... كلها تساعد على عدم اللجوء للكذب...

10: وقانا الله وإياكم شر الكذب والفتن ...

أظن كده كفايه

أمنياتي

Foxology يقول...

يا حاجة شمس زى ما قولتى حضرتك ان الكدب كدب مفيش الوان :)

من رأيى ان الكدب برضه زى ما قولتى حضرتك انه بييجى من الصغر بمعنى ان الطفل لما بيكدب ومن أول مرة محصلش وقفة بيتحول لعادة وطبع أصيل فى الأنسان وبيبقى زى الدم كدة مينفعش يخرج من الجسم الا ما رحم ربى بأة

اياك كان حجم الكدب فهو مكروه ومفيش حاجة اسمها الواحد مكره أو مجبر انه يكدب كنا زمان بنقول >> الصدق منجاة

تحياتى :)

عاشقه وغلبانه يقول...

الناس بتكدب ليه.........؟؟؟
امممممممممم
اقولك انا ليه
انا مثلا اوقات بكدب
مافيش حد فينا مابيكدبش
اوحش انواع الكدب انك تكدب علي روحك
واصعب انواع الكدب انك تكدب الكدبه وتصدقها
يانهار ابيض
اه والله في ناس كده
بترسم لوحها حياه من الكدب وتعيش جواها
بيتوهوا جوه الكدبه دي
في ناس بتكدب علشان خايفه
وده بيبقي لانها غلطت غلطه ومش قادره تتحمل نتيجه الغلطه دي فبتكدب
وده راجع لضعف الشخصيه
في ناس بتكدب علشان تاخد حاجه مش بتاعها
تسرق يعني
وفي ناس بتكدب علشان تضر غيرها
وتعمل مشاكل بين عده اطراف
وفي ناس بتكدب وهي مش عارفه ان الكدبه دي هاتعمل مصايب
وفي ناس بتكدب علشان تحافظ علي اللي بتحبهم
وده اجابه سؤالك لما قولتي ليه اللي بيحب بيكدب
لانه غالبا عايزيحافظ علي حبيبه
ومن وجهه نظره ان كدبته دي مش هاتخليه يبعد عنه
وفي ناس بتكدب علشان ترسم لروحها صوره حلوه زي فيلم انا لا اكذب لكني اتجمل


علي فكره
الصدق منجي
هههههههههههههههههههه

kmt يقول...

السلام عليكم ورحمة الله وبركاته

كنت بفكر في نفس الشئ اليومين دول
بس مش هاكتب تعليقي دلوقتي يعني هافكر شويه علشان اديكي التعليق اللي يستحق انه يُكتب في بوست زي ده بس يارب ماتأخرش

تحياتي
الى اللقاء

حاسوباتيه يقول...

بصي انا مش هقول ان عمري ماكدبت لا انا كدبت بس طبعا كنت اصغر من كده وطبعا اضربت على كده وانا صغيره وده الي الاهل مش بيعملوه التربيه اصل الكدب ده عاده وفي رايي الكداب كداب من صغره مافيش حد قاله لا كده غلط او حرام وللاسف بيعيش بقى في الكدب ده عادي ده رايي

mahasen saber يقول...

وحشتينى قوى قوى ولما كنتى بتتصلى كنت بصلى وانشغلت بتلفونى لبيرو

بس وحشانى وحشانى وحشانى يا ارق خلق الله

اما الكدب فطول عمرى بكره ان يتكدب عليا وده مش معناه انى ملاك ومبكدبش انما بكره يتكدب عليا جدا جدا بس ان ده استغفال لفخامتى انما مفيش حد فينا ساعات بيحور فى الموضوع او يوصله بشكل ظريف عشان ميخبطش اليى قدامه فى وشه يعنى ممكن نصلح بين اتنيين ونقول انهم بيحبوا بعض وهما مش طايقين بعض

ده كدب بمبه مسخسخ زى ما بيقولوا

عاشقه الرومانسيه يقول...

بصراحه
ومن غير كدب
ههههههههههههه
انا بعد كلام الناس الجميل ده مش لاقيه كلام ممكن يتقال
بس انا معالرأى اللى بيقول أن الانسان ممكن يكدب لانه خايف
فبيعوض خوفه ده بالكدب
او لانه شايف ان فى ضغط عليه من قوه اكبر منه ولو قال الصراحه ممكن تتسبب له فى مشاكل وبيدارى ده بالكدب اللى بيقولوا عليه ابيض
انا كمان ساعات باكدب بس مش كتير
ياحبيبتى كلنا كدابين
سواء بنكدب على اهلنا او مجتمعنا
او نفسنا
بنكدب لما ننافق حد له سلطه اعلى مننا
الكدب هو رأس كل الشرور


ويكفى ان قدوتنا كان صاااادق امين

هى فوضى يقول...

السلام عليكم ورحمة الله وبركاتة
ازيك يا شموسة
بصى الكدب فى بلدنا فى التربية
كلنا اتربينا بطريقة فيها كدب
وعشان كدة بقى طبع فى اغلب الناس
ربنا يبعدنا عنه

( آلاء)daughter of egypt يقول...

والله انا عن نفسي عندي كدبه بيضه وسوده ورصاصي ودايما بكذب الكذبة البيضة ونادرا الرصاصي وابدا السوده من الاخر كده كلنا كذابين واللي يقول غير كده كذاااااب

leeno يقول...

تقدري تقولي اني بكره الكدب و بكره احس ان في حد بيخدعني بمشاعره برأيه بتصرفاته او باي حاجة و ممكن اسامح في حاجة الا الكدب

لكن انا نفسي في مرات بلاقيني مضطرة اكدب و في حالات البني ادممبيقدرش يقول الحقيقة خصوصا لو كانت الحقيقة فيها اهانة لكرامته او لكرامة الطرف التاني

حقولك مثل

لما تبقي متدايقة من وجود حد فحياتك و مخنوقة من تصرفاته مع انه بيعاملك كويس جداااا و طيب جدااا لكن في تفاصيل بتحصل مدايقاكي و يسالك فجاة ان كنتي بتحبيه او لا او متدايقة منه او لا .. صعب جداااتقولي الحقيقة مراعاة لمشاعره و لانك برضه مهما كان مش عايزة تخسري انسان كويس

مثل تاني

تبقي بتحبي حد و الحد دة ارتبط فجاة كدة و ميعرفش انك بتحبيه و بتشوفيه بشكل يومي و فيوم يقللك انا حاسس انك مش زي عوايدك في حاجة تعباكي؟ (هو مش فاهم طبعا السبب الحقيقي ) تقدري متكدبيش و تقوليلو الحقيقة؟ عن نفسي مقدرش !!

مثل تالت

حد بيسالك عن وحدة صاحبتك فسخت خطوبتها ليلة فرحها ... و انتي عارفة السبب اللي خلاها تفسخ الخطوبةمع انه مفهوش اهانة لاي طرف تقدري تقولي للناس على السبب دة لا ممكن جدا تكدبي و تقولي معرفش مكلمتهاش في الموضوع محبتش اجبرها تتكلم في خصوصيتها

مثل رابع

مديرك في الشغل انسان مش مزبوط اووووي و انتي عارفة دة بس مش في ايدك دليل لو اي حد سالك مش حتقولي الحقيقة بناء على احاسيس لازم يبقى في ايدك دليل

مثل خامس

زوجك راجع من الشغل و مبسوط و له نفس يخرج و يتفسح و حاسس انه موده حلو و متفائل كدة و انتي في حالة نفسية تمااااما عكس حالته ... حتقوليله انت متفائل و مبسوط على ايه؟؟ حتلاقيكي بتلبسي وش المبسوطة و تجاريه و انتي ممكن تبقي مش طايقة تخرجي او تعملي اي حاجة بس بتخبي الحقيقة و ممكن تكدبي و تقولي انك مبسوطة عشان متنكديش عليه

و في امثلة كتير...ساعات الكدب بيبقى سكينة بتدبحنا و ساعات بيمنع اننا نجرح ناس او نجرح كرامتنا
لو حتكلم بالمثاليات حقللك انه ابشع شيء على الارض هو الكدب لكن الحقيقة في كتيير احيان بتبقى ابشع و الواقع حاجة و المثاليات حاجة


و مع كدة انا وحدة من الناس اللي ممكن اغفر اي حاجة الا الكدب


موضوع رائع تسلم ايدك

mostafa rayan يقول...

يقولون ان اعذب الشعر اكذبه
معك انمافيش كذب ابيضواسود وبمبةالكذب كذب لكن في حالات يجوز الكذب فيها مثل الاصلاح بين المتخاصمين ومداعبة الازواج بعضهم
لكن ايضا يجب ان نفرق بين المجاملات والكذب
تحياتي لك ودمت بخير

موناليزا يقول...

يكفى ان اكبر الخيانة ان يحدث الرجل اخاه كذبا وهو له مصدق

funckydoctor يقول...

هو فيه كدب مباح فعلا
ولكن ما عداه كذب
مافيش حاجة اسمها أبيض و اسود
زمان كنت بعامل كل الناس انهم صادقين وما زلت لكن بدأو يشتغلونى ويقولو خيال علمى
وربنا بقى يهدينا

prince4ever يقول...

سلام عليكم يا استاذتي
لفت نظري حتة الكدب الحلال دي... لا مفيش كدب حلال... اللي هو بنقول عليه مجامله او لطافه يعني.. انا مشكلتي مع الناس اني معدتش مجامل اني مور... انا كنت زمان مجامل و واد بياع كلام و كسبت ناس كتير... بس اتغيرت و بقيت ستريت و اقول رايي صراحة و اللي مبيعجبنيش يا اسكت عليه يا اقوله كده... بس المفاجأة اني كسبت ناس اكتر..ناس احترمت الصراحه و الصدق... و يمكن الكدب الوحيد اللي ممكن استعمله في حالة بس لما اوفق بين اتنين متخاصمين... مع اني مببقاش راضي عن نفسي بس اهو طريقه لاصلاح ذات البين

مممم... انا مبكتبش ليه؟... والله مكسل... عندي اربع خمس قصص في دماغي و خطوطهم ع الورق بس مكسل اقعد ساعه عالوورد اكتب فيهم... مش مشغول اينعم.. بس حالة انتخه كده بعيد عن حضرتك ... و كل ما اقول هقعد اهو ارجع اقول خليها بكره..بعده.. و الايام بتجري...
بس بجد متشكر على سؤالك... وتحقيق جميل يا رب نطلع منه بطاقه ايجابيه
احييكي يا استاذه

وردشان smilyrose يقول...

حبيبتى شموسة

فعلا وبلا جدال الكذب ليس له مبرر

وتكون عواقبه وخيمة

وليس من حق اى انسان ان يخدع او يكذب

ولكن اذا كانت الحقيقة قد تؤلم شخصا

او قد تتعسه ايجب ان يعرفها

لا اعرف فقد توقفت عند هذه الكلمات

الا يطر احدنا للكذب

وهل سيكون كذب ام انه مبرر

لأمر ما

تقبلى مرورى

smilyrose

وردشان

روح الحب الصادق

Mohamed Hesham Safa يقول...

زي ما قريت في أول تعليق ان الكدب ممكن يكون محاولة لتعويض احساس بالنقص ... دي حاجة

لكن ممكن الكدب يكون كدب أبيض ... ايه المشكلة ، هو كدب برضه وغلط وكل حاجة ... بس بيكون قصده خير ... زي الاصلاح بين اتنين مثلا او منع خناقة او كده ، متهيألي ساعتها ممكن يكون ليه مبرره ...

بس انا متفق معاكي انه في الآخر كله كدب ... وان الكدب مالوش رجلين

بس الصراحة محدش فينا بيعيش من غيره ... ولا ايه ؟؟؟

و(لي عودة ان شاء الله

سمكه واحده يقول...

انا محولتش ابص علي تعليقات عشان متأثرش
اولا يا شموسه اذيك
ثانيا بسرعه كده تلت تربع الستات مش ستات من غير كدب سواءكدب صغير او كبير حلال اوحرام ابيض او اسود
انا يا شموسه كدااااااااابه كبيره تقولي هوايه تقولي ابو لمعه (وش مكسوف)
بس اكدب يعني واقولك مبكدبش لا بكدب ومبخفش اه
بس انا مش بسميه كدب بالمعني المتعارف عليه مش بيضر او بقول حاجه مش في نفسي او كدب وحش اقولك بستهبل كتشير هههههه
بس بيني وبينك الكدب كدب اه بلاش استهبال يا سمكه وبطلي بقي
بس والله غولبانه وعبيته خالص
شوفتي بقي بكدب ازاي اصلي مش سهله انا انا شريره(ضحكات شريره متقطعه)
والله موضوع الكدب في الناس الكبيره وخاصه الراجل مش بحترمه نهائي اوحش صفتين الكدب والبخل
كمان اللي يكدب يعمل اي حاجه تانيه تتوقعي منه اي حاجه معادا انا اكدب بس معلش حاجه تانيه(وش بيغمز)
موضوعك مهم جداااا
تحياتي يا جميل

سمكه واحده يقول...

ده انا بكدب كل كدبه واختها يا جدعان
بت ياسمكه مردش عليهم ال يعني خلاص نمت
افصل النت علي اخويا واقول مش انا النت هو اللي فاصل
التليفون يرن ومردش
اشد فيشه الدفايه علي بابا وهو نايم واطلع اجري اكمل نوم
اكل الاكل واتهم في اي حد
بس سعات كتير بكدب عشان اصلح مواقف وللصلح والله يعني اكدب علي ماما واقولها ده بابا كان بيشكر فيكي وهو عمال..... يشكر يشكر بصراحه الراجل
بعمل كل حاجه وانكر
تفتكري ده نقص يا اخوتشي ولا عدم ثقه
ولا جبن

مـجـنـووون يقول...

والله الكدب كدب مهمها كان صفته والا الغرض منه

وأنا عن نفسي بعمل بالمثل إلي بيقول

الكدب ملوش رجلين

تقبلي مروري
مجنووون

عمرو جويلى يقول...

السلام عليكم
الأخت الفاضلة
أسعدنى زيارتك وتعليقك
أما عن الكذب فهى آفة إنتشرت فى المجتمع وأعانى أنا شخصيا منها لأنى لا أحب الكذب ولا الكذابين وكما قال رسولنا الكريم إن الصدق يهدى إلى البر وإن البر يهدى إلى الجنةومازال الرجل يصدق حتى يكتب عند الله صديقا
صدقت يارسول الله
وجزاك الله خيرا على هذا التحليل الطيب

أنا - الريس يقول...

لا..يا..شموسه..أنا..لا..أرفض..التربير..
للكدب إلا..في..حالتين..إما..زوجة..
بتقول..لجوزها..إنه..اقوي..الرجال..أو..
زوج..يقول..لمراته..إنها..أجمل..النساء..
علي..الإطلاق.
أو..الجاسوس..حتة..إن..الكداب..ده..
خفيف..مش..شرط..والله..وكده..هتخلي..
الكل..يفشر..عشان..خفة..الدم..
اثارتك..للموضوع..تشكري..عليه..وربنا.
يوفقك..لما..تحبيه..ويرضاه

سمكه واحده يقول...

كل سنه وانتي بالف خير يا شموسه
واللهم صلي وسلم علي حبيبنا رسول الله وعلي اله وصحبه وسلم
اللهم ارزقنا حبه
صلي علي النبي طول اليوم انهاردهوطبعا كل يوم
تحياتي

Beram ElMasry يقول...

شمس النهار
السلام عليكم ورحمة الله وبركاته
فى يوم ميلاد المصطفى صلى الله عليه وسلم ادعو الله لى ولك بالخير وجميع اهلك ومن احببتم بالسعادة والسرور
لك تحياتى والسلام عليكم ، ولا سلام مع اليهود

Unknown يقول...

اللى بيحب مش بيكذب !
لكن بيتكلم بلسان المحب!
وبيشوف بعيون المحب!
وبيسمع بأذن المحب!
حتى كمان بيشم بأنف المحب!
وبالتالى بيقول اللى هو حاسس
به هوه مش اللى غيره او الحقيقى !
يعنى هو شايفها ملكة جمال الكون !
لما يقولها ياملكة جمال الكون ما
بيقى بيكدب ساعتها لأ احساسه
هو اللى بيتكلم ساعتها !

مـجـنـووون يقول...

كل سنه وأنتي بالف خير

وصلي الله علي سيدنا محمد وعلي اله وصحبه وسلم

تقبلي مروري
مجنووون

أنا حر يقول...

الكذب زي حتة الشيكولاته حلاوتة بتنتهي بسرعة مع نهاية قطعة الشيكولاته
وبعد كده بنبدا نعالج المشاكل اللي سببهالنا
تحياتي

طوبه فضه وطوبه دهب يقول...

حلو اوى بجد الموضوع ده هروح اقراه وهرجع تانى وفعلا فكره حلوه ربنا يديم عليكى الافكار الجميله دى

عمرو جويلى يقول...

السلام عليكم
الأخت شم النهار
أسعدنى زيارتك وهذه القصة هى تشبه حالنا اليوم من ضعف وذلة وخنوع
أما عن الكذب فلا مبرر لصاحبه ولكنه آفة ونعانى نته أيضا
دمت بكل الود