الثلاثاء، 1 مارس 2011

خلطبيته ثورية

ان شاء الله هرد علي تعليقات البوست السابق ماشاء الله كلها تعليقات اثرت البوست فاعايزة ارد علي رواقه

بس عايزة اتكلم في كام حاجه كده

اولا:قعدت ابحث في كل ثورات الدنيا اللي طبعا ليها اسباب ونتائج
الا ثورتنا ليها اسباب والنتائج غريبة الشكل واللون
ثورة يعني مطالب ثوريه لازم تحقق علشان نقدر نقول الثورة نجحت
الثورات ليسها لها الا قانون واحد هو الثورة علي الحاضر اللي بمجرد قيامها بقا ماضي
لكن ثورتنا ماشاء الله الماضي حاضر معانا وبيطلع لنا لسانه
عدم الاسراع في تحقيق مطالب الثورة هيخلي الفيران تتصرف وتعمل لها جحور تانيه
حد يقولي كل ده مالقيوش حاجه علي صفوت الشريف ولا زكريا عزمي وسرور
همه فين دلوقتي الاخ الشريف اللي استفز المصريين وقعد يقول واقفين صامدين شامخين
والكل عارف ماضيه
حساه بيطلع لسانه للشهداء والجرحي والمصريين بيمارس شمخه بتهريب اللي بيقدر عليه وبيقطع الاوراق اللي تفضحه

ثانيا :اللي بيحصل دلوقتي من اعتصامات فئويه ومظاهرات مين اللي بيحركها
للأسف العناصر الفاسده اللي متسابه لحد دلوقتي علشان يتقال اهو ادي الثورة هتخرب البلد
موضوع عمال المحله ماكان خلص ورجعوا شغلهم لكن الخفافيش ماسكتتش بلعبه سخيفه خبيثه

اللي حصل ان العمال عملوا مظاهرات علي خفيف مع اعتصام جزئ مش كلي
مطالبين بعودة الاربع مهندسين اللي اتنقلوا نقل تعسفي 2008 بسبب احداث 6 ابريل
وتم حرمانهم من كل الحوافز والبدلات والعلوات
والاستناد الي حكم المحكمه بعودتهم مع دفع غرامه ماليه لهم قيمتها 7500
وكذلك شيل رئيس مجلس الادارة
وتم لقاء اللواء محمود حجازي وعرض الامر عليه
فأصدر قرار بعودتهم مستند لحكم المحكمه والعمال كانوا في منتهي السعاده وقرروا العودة
وعند دخولهم الي المصنع وجدوا منشور من الحاكم العسكري للمحلة
(المحلة لها حاكم عسكري من وقت احداث 6 ابريل ويرفضون دخول الشرطه)
بيقول ايه المنشور انه سينظر في عودتهم من عدمه
طبعا العمال اتجننوا واتهموا الجيش انه بيضحك عليهم
عملوا اعتصام ومظاهرات وتم نقل الخبر الي اللواء محمود حجازي
واطلاعه علي المنشور الصادر من الحاكم العسكري فااعطي وعد برجوعهم العمل فورا وعلي مسؤليته
وكذلك شيل رئيس مجلس الادارة
وتم كل ذلك فعلا والعمال في مصانهم والمهندسين رجعوا والمحله هديت
يبقا مين هنا اللي بيقوم الدنيا ومين اللي بيهدي الدنيا
كان المطلوب ان العمال تصعد وبدل مااضراب جزئ يبقا كلي
وتهيص المحلة لصالح مين الله اعلم شوفوا مين اللي له مصلحه والحدق يفهم

لمصلحة مين يشب حريق في الدور اللي تحت الدور اللي فيه كل اوراق الفساد في مجمع التحرير
مين له مصلحه يعني الثوار ولا الشعب
فتش عن السوس فتش عن اللي له مصلحة
اللعب بقا زيادة وعلي المكشوف

ثالتا: الفريق شفيق رجل عسكري يعني عنده كرامه وعزيت نفس شايف الدنيا هايصه والاغلبيه مش عيزاه
قاعد ليه ايه السبب
مايستقيل من نفسه ولو بيحب مصر ووطني مايخاف علي مصر ويلم الدور ولا كل واحد فاهم ان مافيش زيه
مصر كلها ناس كويسه وماشاء الله الكنوز البشريه ابتدت تظهر بعد ماكان الفساد دافنها بالحياة

الفساااااااااد لسه موجود انا بقول اهو
رؤوووس الفساد لسه موجوده حره طليقه وبتنخرب زي السوس
لازم يتقبض عليهم لازم البكره تكر والا كل اللي حصل ده راح
لو باقي المطالب ماتحققش
هننزل التحرير يوم الجمعة
خالينا رايحين جايين
المهم مايتسبش علي ارضك يامصر فاسد فاجر
====
شئ فرحني جدا كنت بجيب صديقه من المطار وانا داخله بالعربيه علشان اخدها هي والشنط لاقيت شباب بملابس مدنيه ومافيش غير واحد اواتنين شرطه
المهم الشباب واقف ينظم المرور امام البوابه وواحد منهم شال لنا الشنط وحطها في العربيه
وطلعت 5جنيه وبديهاله زعل جدا وقال لي انا مواطن مصري بساعد هنا في المطار لحد باقي الامن ماينزل تاني
انا مش شرطه علشان اخد منك فلوس
لما تلاقيني لابس بدله سوده ابقي اديني
هو ده شباب مصر وهي دي مصر
اظن دلوقتي عرفنا مين اللي بيخربها ومين اللي بيحافظ عليها ومين اللي بيعمرها
وان شاء الله هكتب بوست عن المشاريع التنمويه اللي بيعد لها شباب اللأتلاف
ومن المشاريع اللي مشتركه فيها مشروع الريسيكل
ومعانا مجموعه من الدكاتره
علي رأسهم
دكتور خالد طولان خبير الريسيكل
وهيكون في ندوة في ساقية الصاوي
وهكتب لكم الموعد للي يحب يحضر الندوة

هناك 26 تعليقًا:

Foxology يقول...

اتفق مع حضرتك تماما فى موضوع المحلة وموضوع رؤوس الفساد اللى لسه موجودة وزى ما قال الدكتور علاء الأسوانى ان الشعب أسقط رأس النظام لكن باقى النظام لسه موجود للأسف

الشاب المصرى اللى فى المطار نموذج من حقنا نفتخر به واحنا الحمد لله اثبتنا اننا قد المسؤولية ونقدر نحافظ ع البلد من غير شرطة ولا جيش واللجان الشعبية خير دليل على ده

فى انتظار تحديد موعد ندوة الساقية عاوزين نشتغل للبلد

تحياتى

♥نبع الغرام♥♪≈ يقول...

ربنا معاكم يا شموسه
وبجد كان نفسى احضر
بس هتابع معاكم عبر المدونه

كونى بخير

وعلى فكرة انتى وحشتينى اوووووووووووووووووووووووووووى

أفلح اليعربي يقول...

سيدتي الكريمة شمس

تحية طيبة

مصر قضيتها لا تكمن في نظام فاسد ولا مجرد سقوط شخص أو نظام

هناك من لا يريد لمصر أن تعيش حرة أبية

لذا كان لابد من الألتفاف ولو بطيقة السرك الخادع على ثورتكم المجيدة .

ربما بإسقاط شخص ككبش فداء أو بضع أشخاص لا يهم المهم أن تبقى مصر مفصلا يتحرك من خلاله لأجل أقوام أخرين .

مصر لا يكفيها أن توقد فيها ثورة ، مصر تحتاج لقائد وحاليا لم أرى إلا الأذناب تتقدم كقادة لترث نجاح الأبطال الحقيقين ( أقصد بالأبطال هو السعب ) .

للأسف سيدتي

مصيركم أمريكا تتمسك به لأنه يعني لأسرائيل الشيء الكثير .

أعتذر عن طرحي المتشائم لكن ثقتنا فيكم بأنكم على وعي أظهرتموه لنا بقوة وستنتصرون بعزة الله .

لك تقديري

أفلح اليعربي يقول...

سيدتي الكريمة




تحية طيبة

بصفتك أحد أفراد الطبقة الواعية في هذه الأمة

أرجو منك التكرم بالمشاركة في هذا الموضوع وأبداء رأيك بصراحة

رأيك يهمني جدا ، فأرجو منك عدم التردد في المشاركة وذكر رأيك بصراحة بعيدا عن المجاملات .


أرجو أن تقرأوا الموضوع كاملا ثم بعد ذلك تضعون رأيكم


الموضوع تحت هذا الرابط

http://ahdmari.blogspot.com/2011/03/blog-post_01.html


أشكر لك حسن تعاونك

mrmr يقول...

بلا شك ان فى تماطل فى تحقيق لطلبات الثوره والفساد ما زال موجود
خايفه فى يوم من الايام نحس ان دم الشباب راح هدر وكانك يا ابو زيد ما غزيت
ربنا يوفقكم يا شموسه

سواح في ملك اللــــــــــــــــــه- يقول...

اقوللك اولا عن الاسباب
اعلمي اختي ان لناشريكا في ثورتنا
وهو الجيش المصري العظيم
لذلك تجدين الامورنصف مكتملة
لانه حيث كلف بتولي شئون بلادنا
فهويريد ان يخرج بالبلد من ازمتها
باقل خسائر ممكنه
ثانيا
هناك تقاعس واضح من جهاز الشرطة
يجب ان يحاسبهم الجيش عليه
فلمصلحة من يتركون البلاد للفوضي
اليست بلادهم ايضا

tarek momen يقول...

خالد طولان ده يبقي خالك؟؟؟؟؟

الازهرى يقول...

الأحداث المتعاقبة مخليانى ومتفائل
الشعب بدأ فعلا يفهم إن فى ثورة

Haytham Alsayes يقول...

الحزب الواطي قاعد لغاية دلوقت ليه
حضرتك في ثلاث حاجات تتقال في السوس اللي بيخرب
الثالوث المفسد

امن الدولة
الحزب الواطي
صفوت وعزمي والشلة الفاسدة

دول يجب التخلص منهم
وفوق البيعة شفيق وابو الغيط اللي فضحنا في جميع الامم لازم حكومة وطنية تمسك البلد مع الجيش ونهيكل الشرطة ومحمود وجدى يغور برده لانه فاسد مفسد وكان مهندس التعذيب في المعتقلات ولما الاسلاميين طلعوا قالوا دة وحذرونا منه عذبهم عذاب لايوصف لدرجة انهم كان بيجبرهم فيما يقال اثناء الصلاة انهم يقولوا مبارك اكبر بدل الله اكبر
المعلومات دي من موقع الدستور

لازم النماذج العار دي تتشال فورا
وننزل التحرير ونعتصم تاني ونتخلص منهم

تحياتي

ذو النون المصري يقول...

المطالب الفئوية هي امر خطر علي الثورة لا جدال في ذلك...علي اقل تقدير سوف تعمل ارتباكات في اي قرارات تتخذها قيادة الجيش التي تدير البلاد الان....
و المطلوب في هذه المرحلة و لمدة سنه علي الاقل ان نتفادي الوقوع في فخ المطالب الفئوية حتي ننتهي من المطالب العامة التي تخص كل الشعب ثم تبدا كل فئة في تحديد ما ينقصها و لو استمر الوضع علي ما هو عليه لا اظن ان النهاية ستكون خير....اقل شر سيحدث هو تعطيل القيادة عن اداء عملها الطبيعي و تاخير الاصلاح و سيطول زمن الخطوة الاصلاحية من يوم الي يومين او ثلاثه...و نحن الخاسرون في النهاية

شمس النهار يقول...

* Foxology

مبارك سقط ولم يسقط النظام النظام قائم حتي الان

وان شاء الله هكتب الموعد هنا في المدونة قبلها

وان شاء الله تحضر معانا

شمس النهار يقول...

* ♥نبع الغرام♥♪≈

الله يخليكي ياايناس انتي كمان وحشتيني
وان شاء الله هتترفع الندوة لما تتم علي اليو تيوب وابقي تابيعها ان شاء الله

صوت من مصر يقول...

للاسف مازلنا فى مرحله تطهير بلاعه المجارى
واظن اننا بنحاول على الاقل ده كويس
وانا من مكانى اطالب بشكل واحد وهو حل جهاز امن الدولة والنبى

شمس النهار يقول...

* أفلح اليعربي

كلامك سليم جدا وكنا امس بنتكلم علي ان الثورة ليس لها بطل يتمتع بكريزما عاليه يلتف حولها الثوار وفي نفس الوقت يكون بطل بما تعنيه الكلمة
مشكلة ثورتنا انها ثورة بلا صاحب محدد الصحاب الوحيد لهذه الثورة هو الشعب المصري بكل طوائفه وفئاته واعماره
من الاطفال حتي الشيوخ

ولازم طبعا الفساد مايستسلمش بسهولة
وحالا هروح الموضه واعلق
:)
واشكرك علي كلامك وتقديرك لي
ماانا الا مواطنه مصريه لاادعي اني سياسيه محنكه ولا كاتبه متمرسه ولا محلله سياسيه
انا اكتب كمواطنه مصريه تكتب ماتحسه وتلاحظه من الاحداث
ولك تقديري وشكري

شمس النهار يقول...

* mrmr

ماتخافيش يامرمر

ان شاء الله خير

عارفة رغم كل اللي بيحصل ده بس برضوا عندي امل
علشان في النهايه لايصح الا الصحيح
والحق لابد يوم عن يوم ينتصر

الازهرى يقول...

http://www.facebook.com/photo.php?fbid=196257663727824&set=a.191412130879044.43504.191115070908750&theater

الازهرى يقول...

عقبال الباقى

شمس النهار يقول...

* سواح في ملك الله

نحن نثق في الجيش بس مش لازم تكون ثقه عمياء
علمتني الدنيا ان لاتثق في اي حد ثقه عمياء

اما الشرطه فا دي حطها علي جنب
همه عايزين يعقبونا علي اللي اتعمل فيهم يوم جمعة الغضب
بصراحه الشعب طلع هليهم الجديد والقديم
وبعدين همه عارفين انهم اصبحوا وكانوا ومازالوا مكروهين من الشعب

شمس النهار يقول...

* tarek momen

:)))

ياسلااااااااام
طبعا يعني ماانتش عارف ياحاج
وبما انك رجل صناعه هتشترك معانا انت كمان ومش بمزاجك
بالغصب
علشان دي مصر

شمس النهار يقول...

* الازهرى

صحححححح

الناس ابتدت تستوعب وتفهم

كانوا ملخبطين بين التصحيح والثورة
علشان اغلب الموجودين حضروا ثورة التصحيح بتاعت 15 مايو اللي عملها السادات وشال ناس كتير

شمس النهار يقول...

* Haytham Alsayes

يامسهل ياهيثم اهي امال عثمان قدمت ملف فساد في الشريف
ونقول يارب

عارف شريف ده لو اتجاااااب هيجيب كلها اصله مش هيرضي يقع لوحده

وان مطالب الثورة مااتحققتش التحرير هو بيتنا

علشان واضح ان الضغط علي المجلس وشفيق كبير
واول مايتشال شفيق الدنيا هتهدي شويه

وان شاء الله هنكنس ونرش والبلد هتبقا فله

شمس النهار يقول...

* ذو النون المصري

ماهي المطالب الفئويه خطه من الحزن الوطني
المصريين اكبر من ده

والمصري سياسي بطبع
وبيحب مصر
ودينه
اللي انا مستغرباه فين دور رجال الدين في الموضوع ده
مابيرحوش الاماكن دي مع السياسيين وناس من المجلس ويتكلموا معاهم ليه
الحلول كتير بس في رحرحه شديدة

بس ان شاء الله كله هيبقا جميل

شمس النهار يقول...

* صوت من مصر

هتنضف وحياتك لتنضف
بسافو برابسوا هتنضف
وان مانفعش هنجيب مية نار
:))

وحاضر من عينيه هبلغ المجلس ان كيمو مش طايق امن الدولة
:))
ان شاء الله هيتشال

شمس النهار يقول...

* الازهرى

مبرووووووووووووك

:)))

Unknown يقول...

السلام عليكم

معاك قلبا وقالبا في المقطع الأول..
(أول مرة أعرف موضوع الحاكم العسكري بتاع المحلة!!!! شكرا)

-------------

أسعدني جدا المقطع الثاني (بتاع المطار).. وهو دليل قوي على كلامك في المقطع الأول بالفعل.

تحياتي أختي شمس.

شمس النهار يقول...

* ماجد القاضي

وعليكم السلام

انا برضوا كنت اول مرة اعرف موضوع الحاكم العسكري ده
لما حصل موضوع المحلة
والغريب انه هو اللي يشعل الفتنه

وفعلا شباب مصر قد المسؤليه

ربنا يحمي مصر