الأحد، 13 مارس 2011

الحقوا الحكومة من الاعلام

انقذوا الحكومة من الاعلام هيبوظها ابتدي فريق النفخ الاعلامي يشتغل
الناس دي جايه من الشعب لأول مره صحيح مش كلهم
بس سيبوهم مش لازم (واحتضن الشاب الضرير في حنان الاب )مش فاهمه رئيس وزراء بيحضن انسان موهوب هيحضنه بحنان الفيل يعني
بلاش ارجوكم تلميع اعلامي وتأليه للحاكم بلاش الناس بتحبهم كده كده
كان ده بيتعمل مع الناس النص كم لكن دول ان شاء الله يكونوا اسم علي مسمي حكومة شرف

وبندعي للشعب السوري ربنا معاه وان شاء الله منصور وياريت الاخ الاسد يقصر ويجيب من الاخر ويورينا عرض كتافه
ويختار له اي سيناريو يايهرب زي بن علي يايرخم شويه ويتنحي زي مبارك
يايفضل يضرب في شعبه ويستعدي العالم عليه ويخرب بلده زي القذافي وبرضوا
هيمشي
يايفضل يلاعب في الشعب والشعب يلاعب فيه ولاتوم وجيري زي علي صالح وبرضوا هيمشي
كل الاصنام دي هتمشي ماعدش حد هيستعبد الشعب العربي ابدا
مش هنبقي ورث تاني خلاص

بالنسبة لموضوع الدستور لحد دلوقتي مش قادرة اخد قرار اسمع دول اقتنع اسمع دول اقتنع في النهايه لازم نفهم علشان نعرف ناخد القرار الصح ومانضيعش الدنيا
بس اللي فهمته ان الثورات بتسقط اي دستور
مين فين ليه ده اللي عايزين نركز فيه علشان نختار صح
وياريت كل اللي فاهم حاجه يعمل بوست وينشره كمان علي جروب مدونين علي الفيس علشان يطرح للنقاش
ماتنسوش تدعوا لليبيا وسوريا واليمن

هناك 39 تعليقًا:

غير معرف يقول...

معاكي حق
الخوف يصدقوا

الحل
نسرع من خطوات التغيير

نقر التعديلات

وننتخب رئيس ومجلس تشريعي واحد

ونبدأ في اعداد دستور جديد

وتتوالى تعديلات كل ما هو فاسد وتالف

الميكروباص يقول...

لو أي بلد في الدنيا خربت بيكون الاعلام هو السبب
من شهر واحد كان هناك تمجيد لمبارك وسيده مصر الاولى، اما الآن أفتح يوميا الجريده واقرأ جمال الحديث عن عصام شرف -حتى قبل ان يعمل- والسب واللعن في مبارك وزوجته
الاعلام لا مبدأ له ويتحدث بالكلام الذي يحب الناس سماعه

Foxology يقول...

اه انا اتفقعت لما قريت الموضوع ده فى الأهرام :(((

ربنا يسترها

بالنسبة للتعديلات الدستورية معاكى حق ان الثورات بتلغى الدستور وبرضه انا اسمع دول اقتنع واسمع دول اقتنع ومحدش فاهم حاجة

ربنا مع سوريا وان كنت مش لاقى أى اخبار عنهم

اليمن وليبيا هاااانت اوى وفرجه قريب

تحياتى

كلمات من نور يقول...

إعلام محتاج تأهيل و إصلاح وتهذيب والله

ويارب ينصر أمة محمد آجمعين يا شموسة

سواح في ملك اللــــــــــــــــــه- يقول...

http://waelk.net/node/38
في الرابط ده هتلاقي التعديلات

مامة مازن يقول...

حبيبتنا شمس النهار
المهم انك متقوليش هقاطع
الكلمة دى صعب وتنرفز
تدوينة شعبية بسيطة كتبتها عن تفكيرى وتفكير دايرة بسيطة حواليا عن الموضوع ده
شكرا لسعة صدرك لنا

مامة مازن يقول...

مش صعبان عليا قد بتوع ليبيا
المفروض الرؤساء يخضعوا لتقييم سلوكى وسيكولجى وكل تقييم ممكن لنضمن اننا امام شخص سوى
هو خايف يسيب التكية ليه رغم انه حاله ماشى فى سوق التكاتك:)

Dr Ibrahim يقول...

إن شاء الله عن نفسى نفسى هقول نعم للدستور...
الأستاذ ماجد القاضى كان كاتب مقال ممتاز من هنا والله الموفق

Dr Ibrahim يقول...

قصدى نعم للتعديلات.

أنا - الريس يقول...

ربنا يستر
أنا قاعد أفاضل
وهحاول أشوف
الفكر العام وربنا
يستر .

حلم بيعافر يقول...

موضوع الدستور لسه فيه اخد ورد معظم الناس لسه مااخدش قرار

إيمان هلال يقول...

اعلامنا محتاج إباده جماعيه ، بفكر اسفره ليبيا

أبو مصعب يقول...

الحرية مطلوبة ولكن لابد من قيود


اوافق على التعديل والا الحاكم العسكرى هيظبطنا

shoshta_ joker يقول...

السلام عليكم....

ازيك يا شمووووس ....

عندك حق بس خلاص احان كمان زمان كنا معاهم بنلمع فى الناس اول منلاقى حد ها كويس وممكن نتعلق فى قشته بامل جديد بس احنا دلوقتى مش بقينى بنلمع فى حد حنشيد بالى بيشتغل والى مش بيشتغل فى ستين داهية ومش حنرضى بحد فاسد باينى تانى


ع الرغم انى لسه مش كملت 18 سنة 18 الا شهرين يعنى مش حينفع اروح يوم الاستفتاء للاسف
بس انا كمان مش عارفة اخد قرار لحد دلوت بسمع كلام المؤيدين اقتنع والمعارضين اقتنع بردو
الموضوع محتاج حبة تركيز وتفكير
بس كل الى اعرفه ان كل حاجة فى دنيا عشان تتعمل محتاجة خطوات مش ينفع ننط مرة وحدة ع مرحلة جديدة
زى ما فى حكومة انتقالية لحد وجود الرئيس الجديد اعتقد ان ازم يبقى فى دستور انتقالى كمان وممكن نعتبر ان التعديلات دى دستور انتقالى فى مرحلة الحكومة الانتقالية
عشان لو عوزنا بردو نعمل دستور جديد دلوقتى فى الوقت الصغير دا ممكن نطلع مواد مش تعجب الجمهور بردو ومش حد يوافق عليه وتلاقى ناس طلعة تقولك احنا معترضين ......


دومتى بخير
فى رعاية الله shemo

ثـــوره الــغضب يقول...

الامه كلها محتاجه اعاده تئهيل

اعلام فاشل قايم على الماديه الحاده

التواطؤ بقه اساس الزين يزعمون انهم اصحاب الثوره

mrmr يقول...

تعب قووووى
حاسه بنوع من الاحباط والحزن
نفسى بقى نفووووق من الكابوس ده
ربنا يستر

شريف صابر يقول...

اكيد ربنا ينصر ليبيا واليمن والبحرين
انا هقول نعم للتعديلات الدستوريه
وان شاء الله تكون الامور افضل من ذى قبل
تحياتى ليكى

Unknown يقول...

السلام عليكم ورحمه الله وبركاته
تكلمت من زمااان عن موضوع الأعتام الاعلامي...و مصيبته اكبر من مصيبه قمل الدوله ...ياريت يتلموا بقي وينضفوا
....موضوع الدستور شموسه محير الكتير لكن مُش لازم نستعجل كل شيئ بأوانه ...
تحياتي...

شمس النهار يقول...

* مصري جدا

طيب تفتكر ان مجلس الشعب اللي اغلبه حزب وطني واخوان هيبقا قوي دول هيعندوا بعض
ولو ان مجلس الشعب المره دي هيبقا الهليبه يمتنعون
لييييييه؟؟
علشان اللي متعود علي الصرف بهبل علي الناخبين مش هيعمل كده
لييييييييه؟
علشان هو كان بيصرف مليون ولا اتنين تلاته وعارف انه لما يدخل مجلس الشعب هيلمهم في اقل من ست اشهر
لكن دلوقتي
خلاااااص مافيش لاسرقة ولاتهليب يبقا هيصرف ليه
المهم لحد دلوقتي ماقررتش
بس متوغوشه من تأييد الاخوان والحزب الوطني
ياتري ايه اللي جمع الشامي والمغربي

شمس النهار يقول...

* Foxology

تصدق من كتر ماسمعت وقريت عن الدستور

تعبت وقلت خلاص مش هقول لا لأ ولا نعم

في حته كده في الدستور بتقول ان لازم مجلس الشعب يوافق علي تغيير الدستور
تفتكر مجلس شعب منتخب في الاوام اوام هينفع للمسؤليه دي
اشك
وفي نفس وقت نعم للأستقرار عايزين ننجز ونخلص
بس برضوا ننجز ليه ورانا ايه والجيش مستعجل ليه
ماالحكومة شغاله والبلد شغاله
يعني رئيس الجمهورية كان بيعمل ايه ولا سيد قراره كان بيعمل ايه غير يحرق دمنا ويقول موافقه علي قوانين مشبوه

شمس النهار يقول...

* كلمات من نور

الاعلام ده عايز يتفور او يتنسف زي انسف حمامك القديم
ونبتدي اعلام علي نضيف

ربنا ينصرنا ويحمي ثورتنا

شمس النهار يقول...

*سواح في ملك الله

شكرا ليك علي اللينك

بس لسه مارستش علي بر هقول لا او نعم

شمس النهار يقول...

*مامة مازن

اهلا بست الكل ام مازن

ادعي لي اعرف اخد قرار

اقول لا او اقول نعم

شمس النهار يقول...

*Dr Ibrahim

يابختك يادكتور ابراهيم رسيت علي بر

حاسه ان في رقبتي امانه لازم اكون قدها

شمس النهار يقول...

*MR.PRESIDENT

المشكلة ان تسمع اللي بيقولوا نعم تقول خلاص نعم

وتسمع بتوع لا تقول خلاص لا

ربنا يلهمنا الصواب

شمس النهار يقول...

* حلم بيعافر

طيب هنفضل لحد امتي ماناخدش قرار

دماغي تعبت من كتر التفكير والمقارنة

ربنا يلهمنا الصواب

شمس النهار يقول...

*اعقل مجنونه

عارفة لو بعتنا اعلامنا ليبيا
هيبيد الشعب الليبي
ويرجع هوه سليم زي القرد
:))

شمس النهار يقول...

* أبو مصعب

اوافقك علي السطر الاول
لكن السطر التاني لا

الحاكم العسكري هيظبطنا ازاي
تفتكر الشعب اللي عرف يقول لا
هيسكت لحد يظبطه تاني

شمس النهار يقول...

*shemo_ joker

وعليكم السلام ورحمة الله وبركاته

الله يسلمك

عندي امل ان ارسي علي بر

بس ياريت قبل يوم الانتخاب
ادعي لي

واحد من الناس يقول...

الإعلام عندنا اتعود ينافق وخلاص

ويا ابني أنا عاةوز ألمعك

فلما جالهم واحد نضيف ومتلمع جاهز مش عارفين يتعاملوا إزاي

مش واخدين ع النضافه

عامة هو إعلام تافه ورخيص وأنا مبطله من زمان :)


التعديلات الدستوريه

كنت شبه مقرر أقول لأ

وباسمع كلام كتييييييييييييير خلاني أعيد التفكير من تاني

عاوز أقول لأ عشان الدستور القديم فاسد يكفي ما يعطيه لرئيس الجمهوريه من صلاحيات

لكن برضه كلمة لأ هترجعنا لورا ، وهنرجع تاني عاوزين نشوف حل لمشكلة الدستور ، وهنضطر نأجل الإنتخابات

المفروض إني أفاضل دلوقتي أنهو أفضل للبلد

الخيارين - بالنسبة لي - أحلاهما مر

ربنا يوفقنا للخير

شمس النهار يقول...

* ثـــوره الــغضب

اهلا بيك ياادم

هي مدونة ثورة الغضب راحت من عندي في البروفايل ليه؟؟

عارف في ناس كانوا ضد الثورة اصلا
دلوقتي عاملين حبايبها واصحبها

شمس النهار يقول...

* mrmr

مالك بس يامرمر خايفة ليه
ده مش كابوس
ده ولادة عسرة للحرية والديمقراطيه

شمس النهار يقول...

*شريف صابر

بنبسط جدا لما بعرف ان حد رسي علي بر وعرف هيعمل ايه
ادعي لي

شمس النهار يقول...

*فركشاوي ..ناوي

وعليكم السلاااام ورحمة الله وبركاته

اهلا اهلا

مش لازم نستعجل يبقا هنقول لا ونبني علي اساس متين صح
ويبقا نتريث علشان مانندمش
صح

شمس النهار يقول...

* واحد من الناس

عارف المشكلة انك لو احترت علي اساس انك عايز تخلص يبقا الاختيار هنا تحت ضغط انك زهقت وعايز تخلص
لكن
انك تختار انك ماتستعجلش وماتكملش بدستور ماتعرفش ممكن رئيس الجمهورية يعمل ايه وتاني نبقا تحت سيطرته ونرجع نعمل ثورة يونيه ولا اغسطس

حيييييييرة
ادعي ربنا يلهمنا الصواب

Unknown يقول...

ربنا يوفق أهلنا في ليبيا وسوريا واليمن وينصرهم

بالناسبة أنا ليه رأى في التعديلات يا ريت تقريه علل المونة بتاعتى

تحياتي (:

shoshta_ joker يقول...

السلام عليكم....

لا ياشموسة بنكتب وفى بوست بعد الفلنتين الى انتى علقتى عليه وباذن الله فى واحد فى الطريق قريب ...وع فكرة انا مش بكتب فى مدونة لوحدى معايا الjoker من شباب اون لاين

دومتى بخير
فى رعاية الله

شمس النهار يقول...

*حاتم عبدالفتاح

هروح اقراه حالا انا تعبت بس الحمد لله اخدت قرار
وهنزل بيه بوست حالا

شمس النهار يقول...

*shemo_ joker

ايوة انا متابعه وبعلق بس في فترات زمنيه بين كل بوست وبوست
واحنا في وقت محتاج كلام واظهار لقاضيا كتير