السبت، 14 أبريل 2012

حسبي الله ونعم الوكيل

اليوم السابع كتبت الخبر
ده
كله غلط في غلط
الاوتوبيس ده لونه اصلا برتقالي
والناس اللي فيه كانوا من ضمن قافلة اربع اتوبيسات تابعة لشركة سياحة
تقل عائلات شركة فاليو رايحين يقضوا اجازة شم النسيم في دهب
وسواق الاتوبيس نمرة 4 اللي كانت فيه اسرة بنتي
كان بيسوق بسرعة جنونية
وقالوا له اكتر من مره ومافيش فايدة
وفي منحني شديد الفرامل سابت وانقلب الاتوبيس
ومات اربعة فعلا وقطعت ارجل شاب
واتنين في حالة خطرة
وطبعا اترموا علي الرمل بعد مااتنطروا من الاتوبيس وهو بيتقلب اكتر من مره
ومافيش عربية اسعاف الا بعد ماالمصابين وقفوا العربيات علشان يكلموا الاسعاف علشان المكان مافيهوش شبكة
وطبعا عربيات الاسعاف فيها مسعفين الله اعلم بيهم
واللي انقذ الموقف مرور دكتور ايطالي يعم
ارتباطل بالمستشفي الايطالي بالقاهرة مسافر
اسعف الناس علي قد ربنا ماقدره
وذهبوا الي مستشفي طابا اللي مافيهاش اي امكنيات
والحالات الحرجة راحت مستشفي شرم الشيخ
طبعا المصابين رجعوا بالطيران ليلا واخدناهم لمستشفي كيلوبترا اللي عملنا فيها خناقتين تلاته
لتعامل بعض العاملين معانا بغرابة وتناحة يحسدوا عليه
وطبعا ازعجنا دكتور الاطفال من نومه علشان يكشف علي الاطفال
ورجعنا بعد الفجر
ومش هقول غير حسبي الله ونعم الوكيل في كل اهمال فيكي يامصر

هناك 25 تعليقًا:

سواح في ملك اللــــــــــــــــــه- يقول...

للاسف هوده حال الاسعاف واالطب عندنا

الدكتور بيتعاملمع المريض علي انه حالة

ومش فارقة معاه ينقذه بقه ماانقذوش

مش فارقة معاه حاجة

لسة قدامنا كتير اوي عشان نعرف

قيمة البني ادم اللي ربنا كرمه ياشموسة

قلوبنا معاكي ياست الكل

مصطفى سيف الدين يقول...

على فكرة بالنسبة لصورة الاتوبيس مكتوب في الخبر انها صورة ارشيفية يعني مش الصورة الحقيقية
بالنسبة للاهمال فهو مستشري اكتر من الفساد في مر
كل مواطن فينا جواه كائن مهمل و نادر اللي بيشوف شغله و يخاف على غيره
حمد الله بسلامة اسرة بنتك و ربنا يرحم المتوفين و يسكنهم فسيح جناته و يشفي المصابين اللهم امين
تحياتي

غير معرف يقول...

طمنينا طيب على الاقارب

ابراهيم رزق يقول...

السلام عليكم
ارجو انك تطمنينا
لان البوست مش مطمنى

دعاء يقول...

حسبي الله و نعم الوكيل بالفعل على هذا الأمر ..

آه ..
أسأل الله أن يصلح حال مصرْ ..

دمتِ بخير شمس ..

تحيآاتي لكِ ..

Dr. Ibrahim يقول...

معظم الصحف المصرية بتكتب الاخبار خطأ وتحس انها بتكتبها على مزاج محرريها..
ما علينا

المنظومة الصحية فى مصر كغيرها من المؤسسات والمنظومات يعتيرها فساد كبير وخلل كبير..واللى بيضيع هو حق المريض الغلبان..من فترة قليلة جدا ومع بداية احتكاكى بتلك المنظومة كتبت ذلك المقال بعنوان تدنى مستوى الخدمات الصحية فى مصر!
من هنا

أندروميدا يقول...

الف سلامة علي بنت حضرتك ... وربنا يلطف بيها ... واللي كانوا معاها ... ويقومهم بالسلامة ان شاء الله .

وفعلا ... حسبنا الله ونعم الوكيل في كل ظالم ومهمل .

Baskouta يقول...

لا حول ولاقوة الا بالله

طمنينا بليييز على اسرة بنتك
يارب يكونوا بخير

وفعلا حسبي الله ونعم الوكيل في الاهمال والتهور اللى ضيع ارواح ناس مالهمش ذنب

ربنا يتولاهم برحمته

شمس النهار يقول...

*سواح في ملك الله

الاسعاف قالتلهم ماكناش جاين اصل مافيش بنزبن

الحمد لله الناس اللي علي الطريق وقفتلهم علي ماالاسعاف باشا جتلهم
الحمد لله ياخالد همه كويسين بس نفسيتهم تحت الصفر من اللي شافوه

P A S H A يقول...

لا حول ولا قوة إلا بالله العلي العظيم ، ربنا يطمنك عليهم يا رب ويحفظهم لك من كل سوء آمين

Foxology يقول...

أولا : قدر الله وماشاء فعل وحمد الله على سلامة الأسرة.

ثانيا : الإهمال الطبى فى مصر تؤلف فيه مجلدات وانا شخصيا ليا معاه ذكريات أليمة للغاية ... مفيش فايدة بجد لأن المشكلة مش نظام وزارة صحة ولا نظام مستشفيات حتى لو خاصة .. المشكلة مزدوجة : وزارة وموظفين كمان

الحمد لله على كل شئ

تحياتى

شمس النهار يقول...

*مصطفي سيف الدين

ان شاء الله نزل صور للحادثة

الله يسلمك يا مصطفي

وشكرا علي دعواتك

شمس النهار يقول...

*مصري جدا

الحمد لله عملنا لهم اشعات علي كل حته علشان همه اتنطروا من الاتوبيس علي بره

والحمد لله كله سحقات وجروح وكدمات

شمس النهار يقول...

*ابراهيم رزق

شكرا علي تليفونك

ربنا يكرمك

شمس النهار يقول...

*dodo, the honey

شكرا ليكي يادودو

ربنا يكرمك

شمس النهار يقول...

*Dr Ibrahim Samaha

المشكلة ياابراهيم ان حتي علي مستوي الاشخاص مع بعض

بنتعامل ولا الكفرة مع المؤمنين

الاشخاص نفسهم غاية في الاستهتار
تخيل يدوني حقنة منزوعة السن
فيها مادة مخدرة ويقولي افضلي ادي للولد لحد ماينام علشان نعرف نعمل له الاشعات
تخيل !!!
هو انا دكتورة افرض اديت الولد اوفر دوز
ولما اخويا زعقلهم جت ممرضة تتعامل مع الموقف
ومواقف كتير مش ممكن مش مصدقة وده في مستشفي خاص وكمان من اللي بيتهدوا علي الاصابع

لــــ زهــــــراء ــــولا يقول...

من فضلك طمنينا عليها يا حاجة شمس
الله يعافي كل مصاب

لولا

Tamer Nabil Moussa يقول...

الف الف الف سلامة على اسرة حضرتك حمد الله على سلامتهم

انا اسف بجد لسة عارف انا كنت اغلقت المدونة الكم اليوم اللى فاتوا

الاهمام هيفضل موجود ياشمس طول مفيش حساب عسير للمهمل

مع خالص تحياتى

شمس النهار يقول...

*اندروميدا

الله يسلمك وشكرا علي دعواتك

السواق مقبوض عليه حاليا وهيترفع علي شركة السياحة كم من القضايا يبقوا بعدها يعرفوا يربوا السواقين علي الاستقامة وعدم الاستهتار

شمس النهار يقول...

*Baskouta

الحمد لله والشكر لله كوسين ماعدا بعض الكدمات والاجروح نتيجة طردهم من العربية عن طريق الشبابيك

وحسبي الله ونعم الوكيل في السواق المتهور المستهتر

شمس النهار يقول...

*P A S H A

شكرا ربنا يخليك ويكرمك
همه الان احسن وبخير

شمس النهار يقول...

*Foxology

المشكلة مش في وزارة الصحة ولا في الجدران
المشكلة في الانسان المصري
اللي هو اساس اي شئ
تحس ان في استهتار بكل شئ
مافيش ضمير
ياريت الضمير يصحي هتصحي معاه كل الاشياء

شمس النهار يقول...

*لـــولا وزهـــراء

الحمد لله همه كويسين الان
الا من جروح وكدمات وبنتي مش قادرة تمشي من ضهرها

والحمد لله علي كل حال

شمس النهار يقول...

*Tamer Nabil Moussa

الله يسلمك ويباركلك

ايوة ياتامر طول مامحدش بيتحاسب هنفضل كده
بس هيترفع ان شاء الله كم من القضايا علي شركة السياحة هيعرفوا ينقوا السواق بعد كده

ليه كنت قافل المدونة؟

Haytham Alsayes يقول...

لا حول ولا قوة الا بالله
طيب هما كويسين ؟