الأحد، 10 فبراير 2013

الندوة بقا:)2

نتكلم بقا عن الندوة الرائعه
الندوة كانت في راديو ارابيسك في وسط البلد
ادار الندوة شاب من شباب المدونين 
اسمه فاروق 
ماشاء الله عليه ينفع مذيع وبجداااااره
ادار الحوار بحرفيه وذوق وشياكه
والناقدة والكاتبه
 مني طه اتكلمت كلام جميل جدااااااا
عن الادب وعن بلوجر 
وطبعا انا انشكحت جداااااا
علشان هي اتكلمت عن بلوجر صح الصح
انسانه هاديه رقيقه كلامها مترتب جداااااا
وعارفه بتقول ايه
 بكلمات بسيطه مش معقده زي اغلب النقاد
وحسيتها بتضيف في نقدها للكاتب 
الفراشة شيرين 
كالعادة اتكلمت زي مابتكتب بقوة رقيقه وصدق صادم
بس هي اتكلمت صح وماخافتش تقول رأيها خالص
وطبعا قالت شعر جميل قوي رقيق زيها
وان شاء الله شيرين هتبقا من اقوي الكاتبات الشابات
مصطفي سيف كان صعيدي صريح زي الكتاب مابيقول
عارف بيكتب ايه وعارف بيقول ايه
وقال رأيه بصراحع عجبتني وخصوصا لما اتكلم عن دور النشر
اللي بقت تطبع كتب زي افلام المقاولات زمان
يعني هو انا قاعدة ماما شمس كده اونطه
لألألألألأ
اتكلمت برضوا 
اه وربنا 
اتكلمت ودافعت عن امثالي من قاطني بلوجر 
اللي مالهمش في الكتابه
طيب هو علشان انا مابعرفش اكتب ادب ماجيش هنا
ولا عشان اكتر من نص البوست فيه غلطات املائيه 
مااجيش وارغي معاكم
هو يعني علشان انا مبوظه اللغه العربيه ابقا وحشه :))
وكمان طبعا مانسيتش انم في كلامي 
عن الناس اللي لماطبعت كتب هجرت بلوجر
:))
كمان طبعا نميت وذميت في تويتر والفيس 
اللي اخدوا مننا الناس الجميله والصحبه الحلوة
لحد كده جميل خالص
اذ نحن قاعدين يجي نور الدين :)
بعد السلامات قعد نور الدين وابتدي يتكلم عن شيرين الاول وصمت الجميع وعلي رؤسهم الطير
نور الدين قال كلام جميل جداااااااااااااااااا
عن الادب النسائي
قلت بس نور هيولع الدنيا ده بينم علي الادب النسائي :)
بس صراحه كلام صح
ومافيش لحظات وشكر في شيرين 
ونقد ماتكتب بحرفيه انااحسده عليها 
طبعا ده غير اني حسداه علي لغته السليمه واسلوبه في الكلام المرتب الرائع
وبعدين اتكلم عن مصطفي سيف 
واتكلم عنه كلام رائع
كنت اتمني ان الاديبه مني طه كانت تقعد واسمع حوار بينها وبين نور الدين
نسيت اقولكم ان طول ماالكلام ده شغال 
ازهري وساليناز شغالين في اكل الشوكلاته اللي كانت جيباها ريم سعيد المدونة الجميلة اللي هجرت بلوجر هي كمان
:))

هناك 33 تعليقًا:

شمس النهار يقول...

يانهااااااااااار ابيض
كل دي تدوينه
يالا انشاء الله ماحد حوش
:))
مره من نفسي اعمل تدوينه كده
:))

مصطفى سيف الدين يقول...

هي التدوينة دي طويلة؟
يا لهوي
اومال التدوينات اللي باكتبها يتقال عليها ايه لما دي طويلة؟
نورتينا يا شموسة و بجد انتي كنتي منورة و بعدين انتي تدوني و تكتبي براحتك احنا بنتعلم منك دايما
بجد مداخلاتك في الحفلة كانت مهمة جدا و بالذات حديثك عن كون الرسم عبارة عن قصة قصيرة كان الجزء ده ممتع جدا
بالنسبة للجيزاوي الراجل قال كلام حلو جدا في حقي و حق شيرين و باشكره عليه هو كمان
استمتعت بشدة في الحفل و فرحان اني قضيت يوم زي ده و اني قابلت حضرتك
و مش هانسى انك سيبتي كتب كتاب أخوكي علشان تحضري
مهما قلت مش هاوفيكِ امتناني

ابراهيم رزق يقول...

شمس الشموس

هههههههههههههههههههه

انتى لازم يعنى تسيحىلازهرى و ساليناز

فعلا الندوة كانت جميلة و دسمة
و انا واحد من الناس مكنتش عايزها تخلص

تحياتى

الازهرى يقول...

حتى هنا اسمى فى المحضر

طب وأنا ذنبى إيه بقى ؟؟؟؟
حد قال لكم تعزموا حد جميل زي ريماس
وهى تجيب شيكولاتة رائعة زيها ؟؟


مظلوم وربنا أنا

أسماء فتحي يقول...

هههههههههههههههههه

احسن حاجة في الموضوع الاتنين اللي علي جنب بياكلوا الشيكولاته

هي فعلا الشيكولاته متتفوتش لا ندوة ولا غيرة

بلوجر ايه دي كمان اللي الناس هتسيب علشانها الشيكولاته وتقعد تسمع عنها

دمك خفيف في كتاباتك كالعادة

وكويس انك خدتى مكانك

رضوا اه وربنا اتكلمت ودافعت عن امثالي من قاطني بلوجر اللي مالهمش في الكتابه طيب هو علشان انا مابعرفش اكتب ادب ماجيش هنا ولا عشان اكتر من نص البوست فيه غلطات املائيه مااجيش وارغي معاكم هو يعني علشان انا مبوظه اللغه العربيه ابقا وحشه :))

لا خالص امال مين اللي هياخد جايزة نوبل في الادب لو حضرتك مخدتيشها بالتشريد اللي عملاه لكتاباتك ده

افتكر ان نجيب محفوظ ادوله نوبل علشان كده

هههههههههههههههه

تحياتي

Asmaa Fathy

Do3aa El_attar يقول...

آيون آيون غيظوني بقى كدهون :(

أنا جيت 3 فبراير عشان أشوفكم كلكم عملتوا حفلة تانية بس الساعة 6 وطبعًا مش ينفع الميعاد نوهائي لواحدة من طنطا :(

بس خير تتعوض بإذن الله ويجي يوم يجمعنا كلتنا :)

ريهام المرشدي يقول...

لا مش طويلة قوي بس اتكبيلنا المرة اللي جاية الآراء دي يا ريت :) علشان اللي محضرش زيي كدا .

نور الدين (محمد الجيزاوى) يقول...

ماما شمس الحياة الطيبة
يارب ميحرمنيش من حضرتك ومن دعمك ومن أياديكِ البيضاء على كل شباب التدوين بدعمهم
حمممممممممممم دة على اساس انى شاب واوعى تقولى لحد انى داخل على (35
..
انا كنت مبسوط بوجود حضرتك ومنى ماهر فعلا حد راقى ورائع وكان ليا معاها ندوة سابقة وإن شاء الله لو فى فرصة لقاء تانى هعرفك

معلش انا دوست على الادب النسائى لأنى زى ماقلت :) عادة بيجيب تسلخات فكرية :)

لكن مش كله طبعا وفى اقلام كتير هايلة
..
ميرسى جداااااااا على تنويه حضرتك وإطراءك اللى يارب يكون فى محله

Unknown يقول...

تحياتي و تقديري

/ الزّمن الجميل:دعوة لإيقاظ روح الزمن الجميل و إعمال العقل لبناء الحاضر و المستقبل، تدعوك لتصفّح ورقاتها و ترك بصماتك ، شكرا لجميل التفاعل
http://zaman-jamil.blogspot.com/

Unknown يقول...

الندوة كانت جميله بيكم و حضرتك بالذات :)
أشكرك على كلامك اللي كتير عليّه جداً و الله
فرحانه إني شوفتك تاني
و يا رب تفضلي دايماً شمس المدونات المشرقه

سواح في ملك اللــــــــــــــــــه- يقول...

شموسة البلوجرالرقيقة

امتعتينا بتدوينتك الجميلة

ووصفك الرائع للاخوة الاعزاء

تحيتي لكي ولهم

شمس النهار يقول...

*مصطفي سيف الدين
يامصطفي الجمهور مش متعود مني علي كده :)
الجمهور متعود مني علي كلمتين وبس
لكن انت خلاص امرنالله اتعودنا نقرا دفتر احوال
:))
بس اروع دفتر احوال في الدنيا
:))
وبجد بجد الحوار كان رائع وجميل
ومن زمان اناماحضرتش ندوة رائعه كده
ده انا كنت بطلت احضر ندوات من كتر ماحضرت ندوات هايفه:))
لكن دي ندوة كانت بطعم الجلاب (مصطفي)مخلوط بالمارونج لاسيه (شيرين )
:)))

شمس النهار يقول...

*ابراهيم رزق

:))
ايوة طبعا لازم اشهر بيهم :))

دي شوكلاتة مصطفي

:))
ساليناز كانت منورة الدنيا

شمس النهار يقول...

*الازهري

تصدق ماحد هيعملك محضر غيري
:))

دي مش ريمااااااااس
دي الجميلة ريم سعيد
:)
ريماس الرقيقة مش من مصر اصلا
انت خلاص ياازهري تركيزك راح في الشوكلاته
:))

شمس النهار يقول...

* asmaa fathy

ده انا هاخد جايزة نوبل في تبويظ اللغة العربية

:))
انا حسيت في الندوة وانا بسمع نور الدين اني عايزة ادور علي مدرس لغة عربيه ينقذ مايمكن انقاذه

:))

شمس النهار يقول...

* doaa elattar

ماعاش اللي يغيظك يادودو
ده انا اعملك ندوة مخصوص
:))

ونجيلك طنطا كمان :))

شمس النهار يقول...

* نور الدين

برضوا من شباب المدونين
:))

انااعتقد ان الاديب عمره مايشيب
فهو في شباب دائم مع شخصيات رواياته
:))

فعلا استمتعت جدا بكلامك المرتب اللي مش عارفه بترتبه كده ازاي :))
وفعلا لو في اي ندوة تجمعك مع الاديبه مني طه ياريت تقولي

وطبعا انت تستاهل كل خير يانور
ربنا يديم عليك موهبتك

شمس النهار يقول...

*منجي بكير

اهلا بيك دائما في مدونتي المتواضعه

شمس النهار يقول...

*شيرين سامي

الفراشة الرقيقة
انتي تستهلي كل خير
وموهبتك

ومن نجاح لنجاح ودايما منورة:)

شمس النهار يقول...

* سواح في ملك اللــــــــــــــــــه

كان نفسي تكون معانا
ان شاء الله تبقا معانا المره الجايه
:)

شمس النهار يقول...

*((ريهاااااااااام المرشدي))

ااااااسفه جداااا

علشان مافيش صورة مااخدتش بالي بس لما راجعت لاقيت في نور جاي من هنا:))

ومن عيني هكتب الاراء اهو :))

الازهرى يقول...

هع هع هع هع هع هع هع

لا وحياة تيتة الغالية على قلبى
ريماس هى اللى جابت الشيكولاتة

ولو مش مصدقانى اسألى ريم

أنا صحيح دماغى ضايعة بسبب الإمتحانات
بس الشيكولاتة مفيش فيها تهريج

عندى امتحان النهاردة ادعى لى
علشا نسيتى تدعى أول امبارح :))

الصور وصلت ؟؟؟؟

رؤى عليوة يقول...

شكراااااااااا على التدوينه الجميله واللى مش طويله ابدا
واجمل ما فيها التلقائية واسلوبك اللى بموت فيه وعفوا للغة العربيه :)

هو صحيح شئ جميل اوى ان تكون لغتنا سليمة بس على بال محنا اللى بنلخبط نتعلم هنكتب ونتعلم برضه


كده حاسة انى حضرت معاكوا ومنقصنيش الا انى اشوف حضرتك بجد



دمت بخير

شمس النهار يقول...

*الازهري
:))
يابني مش ريم اللي داخله وشايله الشوكلاته
مش ريم اللي اديتنا الشوكلاته
فين ريماس دي بقا
:))؟؟

لسه مافتحتش الميل اصلا هروح اشوف :)
بس انشر التشريده التالته للندوة:))
ده انتوا هتندموا انكم اخدتوني الندوة
:))

شمس النهار يقول...

رؤي عليوة

:))
شكرا علي كلامك وتشجيعك :))

وان شاء الله هيكون لينا لقاء وان شاء الله يكون اجمل واجمل

:)
رغم انف ازهري

الازهرى يقول...

يعنى ياقول لك وحياة تيتة
وبتكدبينى ؟؟؟؟

طب أجيب لك منين أغلى من كده واحلف بيه :((((

رحاب صالح يقول...

ماما شمس
التدوين بالنسبة لي مش كتابة ادب
التدوين بالنسبة لي فضفضة لاني مش بعرف اقول اللي جوايا لحد
واية انت مبوظة اللغة العربية دي طيب احنا بقي نبقي اية ؟؟
المهم نكتب
وانا مهما كتبت ومهما نشرت مش هسيب بلوجر ابدااااا
حد يسيب ابنه يا ناس
مدونتي دي بنتي مش ممكن اسيبها ابدااااا

شمس النهار يقول...

*الازهري

تصدق انا هكلم ريم
ولا انت تقصد من الاسم معناه ولا ايه

:))

شمس النهار يقول...

* re7ab.sale7
الكتابه كلها فضفضه
مش لازم تكون خنقه وبنفضفض بيها

اي ابداع هو موهبه بتضغط علي صاحبها علشان يخرجهاللنور

وانتي من الناس اللي بحب كتاباتها جداااا

امااللغة العربيه فادي ممكن نقوم يوم الصبح نلاقي محضر بيخبط معلش ياجماعه اللغة العربيه رافعه عليكم قضيه ومجرجراكم علي الاقسام
:))

Remas يقول...

شموووسة الجميلة

انا لقيت في مناقشة انا ريم ولا ريماس
والحقيقة انتوا الاتنين صح :)

انا اسمى ريماس فعلا يا شموسة بس اسم ريم هو اللى اكتر الناسات تعرفنى بيه
تقريبا بقى الكل يقولى ريم فقررت ارجع لريماس بعد ما ابتديت انسى اسمى
الحقيقي

حقيقي يا شموسة انا كتير مبسوطة انى شفتك واليوم كان جميل بيكى :)

شمس النهار يقول...

* reem

اسم ريم جميل
وريماس اجمل

ربنا يحفظك ياجميله:)

محمد فاروق الشاذلى يقول...

بداية أتقدم بأفضل التحية لحضرتك يا مدام شمس، كمان لازم أشكر حضرتك جدا على الكلمتين الحلوين اللى قلتيهم فى حقى وإنى أنفع مذيع، خسارة بس إن ماحدش من الفضائيات عرف الرأى ده :)
سعدت بتواجدى هنا واعدك أن أعود إلى عالم بلوجر فى القريب إن شاء الله
تحياتى واحترامى

شمس النهار يقول...

* محمد فاروق الشاذلى قلب مصرى

اهلا اهلا باحد طيور بلوجر المهاجره
:))

انت فعلا مذيع جيد ومحاور جيد جدااااا

واعتقد ان مش كل كاتب ناجح ينفع مذيع او محاور ناجح
انت جمعت الاتنين

ياريت فعلا ترجع بلوجر وتنور مدونتك
علي فكره اي حد مضلم مدونته هيسحبوا منه عداد النور
:))

نورتني واسعدني تعليقك جداااا
ويارب داايما هنا