الاثنين، 18 فبراير 2013

رجيم يابلوجر

التدوينه دي عايزة  انشرها بقالي شهر
لحد ماقريت تدوينه عند ذو النون المصري 
عن علاقة الطبيعه بالشريعه
قلت بس مابدهاش انشري بقا
وده تعليقي هناك
(( الشريعه تخدم الفطره وتهذبها 
وتضع لها الكتالوج للأستخدام
يعني الفطره والطبيعه بتقول ايه لما تجوع
تعالي نشوف الكتالوج
تعمل عمل شرف
يأتي بمال حلال
تشتري به طعام حلال
وعندماتأكل هذا الطعام لاتسرف
تلت لطعامك تلت لشرابك تلت لنفسك
الي اخره
))
******
كل ماحد يقابلني يقولي انتي رفيعه كده ازاي
ايه مابتكليش
اقولهم لأ باكل طبعا وباكل كل حاجه كمان
وبحب الشوكلاته والبطاطس المحمره :)
وبمووووت في الجيلاتي :)
طيب انتي كده ازاي
اقول ده الرجيم الرباني
يعني ايييييه !!؟
الرسول الكريم قال ايه:
(( ما ملأ آدمي وعاء شرا من بطن ، بحسب ابن آدم أكلات يقمن صلبه ، فإن كان لا محالة : فثلث لطعامه ، وثلث لشرابه وثلث لنفسه ))
رواه الترمذي ..

يعني مانقعدش ناكل ناكل ...
لحد مانبقا مش عارفين نشرب ميه فين 
ومش عارفين نتنفس 
وندور علي مهضم وفوار :) 
هو ده الرجيم الجميل الرباني  

هناك 20 تعليقًا:

faroukfahmy يقول...

اشكرك بالنيابه عن جمعنا ايقظت نصائح ديننا بعد ان كادت ان تنسى
نرجو المزيد والمزيد
من يتمتع بالرشاقه والنحاله مثلك واكاد ان اكون مثلك يود ان ينتحل جميع الناس نحالته
شكرا مع جزيل احترامى لما تسطرين

سواح في ملك اللــــــــــــــــــه- يقول...

وشوفي بقي ياشموسة حكمة الصيام واثره الايحابي علي صحة الانسان

!!! عارفة ... مش عارف ليه يقول...

والله برافوا عليك

نفسي اعمل زيك كدة بس مش قادر

على العموم هحاول اخد بنصيحتك يمكن تظبط معايا :)

أسماء فتحي يقول...

المصريين بييجوا قدام الأكل وينسوى نفسهم

مش بيقسموا تلت وتلت وتلت لالالالالالا كله للأكل
ولو ينفع استلف معدة اللي جنبي علشان نملاها هنعمل ده ههههههههههه

بس الحمد لله انا ضد التخن

انا مش بحبه اصلا

عموما بوست يفتح النفس بطبق الفاكهه ده

تحيــــــــاتي
كانت هنا ورحلت
Asmaa Fathy

رؤى عليوة يقول...

صح والله
احيانا بنقابل ناس لما نقولهم ان كل حاجة لها حل فى الشرع يضحكوا
بس اللى ميعرفهوش انهم بيضحكوا من جهلهم

انا من الناس اللى مقتنعين جدا ان الدين هو الحل بجد لكل مشاكلنا ولو فيه مشكله مش لاقيين حلها فى الدين بيكون من جهلنا مش لان الحل مش موجود

ربنا يرحمنا


دمت بخير

SHARKawi يقول...

جميل جدا .
وصحيح ما نقعدش ناكل ناكل لعند ما نلاقيش مكان نتنفس منه .
دا حتى فية ناس بتموت من التخمة . من كتر الاكل .

كامل احترامي وتقديري . تشكراتي .لكي مني دعواتي وتحياتي

ابراهيم رزق يقول...

شمس الشموس

و الله العظيم نفسى فى الرجيم الربانى ده

بس نعمل ايه فى المياه الغازية

انا مدمنها
لو كانت المياه الغازية رجلا لقتلتها
ههههههههههههه

تحياتى

الازهرى يقول...

طب والناس الغلبانة
اللى مش بتاكل
ولا بتحب الشيكولاتة
تعمل إيييييييييييييييييه ؟؟؟؟؟؟؟؟؟

شمس النهار يقول...

* faroukfahmy58

في الدين حلول لكل شئ كل شئ
بس احنا بننسي

تصدق حتي طريقة مسح الارض موجوده برضوا :)

نورتني:)

شمس النهار يقول...

* سواح في ملك اللــــــــــــــــــه

لأ ده الصيام ده موضوع تاااااااني خالص

سبحان الله
طبيا ونفسيا واجتماعيا الي اخره ...

الصيام رياضة روحيه ونفسيه رهيبه
خصوصا التطوع
بس لو عملته فعلا لله من غير ماامة لااله الا الله تعرف

وماحدش يعرف ثوابه ايه

شمس النهار يقول...

* !!! عارفة ... مش عارف ليه

ياهلا ياهلا
ازيك ياوليد يارب تكون بخير يارب
:)
شوف ماينفعش تقول مش قادر خدها واحده واحده اقلل بمنهجيه تنازليه :))
شوفت الكلام الكبير :))
بجد اقلل كل اسبوع عن اللي قبله
اي رجيم بيفشل علشان مبني علي الحرمان
والممنوع مرغوب اكيد

:))

شمس النهار يقول...

* asmaa fathy

اومال لو شوفتي الامريكان والا الايطالين وهمه بياكلوا

بس الامريكان اللي في بلدهم مش اللي في التلفزيون
تندهشي وتنبهري من كم الاكل اللي بياكلوه
:))
طبق الفاكهه ده للي زي حالتنا كده :))

شمس النهار يقول...

رؤي عليوة

اهلا بيكي ياجميلة

دينا في كل حاجه جميله وحلول بسيطه تتفق مع الفطرة السليمه

بس ننفذها زي ماهي
بلا تنطع ولا تشدد

الوسطيه هي الحل ودينا دين الوسطيه

شمس النهار يقول...

* SHARKawi

اهلا بيك كنت فين غايب يارب تكون بخير
:)

ايوة فعلا المعدة بتضغط علي الحجاب الحاجز ومابيعرفوش يتنفسوا كمان الاكسجين بيندفع للمعده علشان تقدر تتحرك وتهضم فاالدنيا بتتلخبط :)

شمس النهار يقول...

*ابراهيم رزق

:))
البيبسي واخوتها بيعملوا ادمان
وفي منتهي الخطوره بيعملوا هشاشه في العظم قدام

ممكن تبطلها لو عايز وواحده واحده
هتلاقي نفسك خلاص
سبتها
ماتخليش حاجه تستعبدك
:)

شمس النهار يقول...

*الازهري
تعمل ايه في ايه
ماخلاص مالكش في الاكل
انتهي
هيبقا تلت هوا وتلت مايه وتلت هوا
:))

حنين محمد يقول...

صباح الغاردينيا شموستنا
كل حاجة رباني ليها طعم غير
ربنا يديكي الصحة والعافية
وكمان الرشاقة حلوة آوي :)"
؛؛
؛
لروحك عبق الغاردينيا
كانت هنا
reemaas

شمس النهار يقول...

*ريماس

صباح الهنا والياسمين
ريماس الجميله

ايوة كل شئ طبيعي له حلاوة طبيعيع

نورتيني ونورتي التدوينه

amiraali يقول...

كانك بتتكلمي عليه بالظبط,,,,مهما كلت مبيبانش عليا ... رشيقه :)

شمس النهار يقول...

* amiraali

اللي بيحصل انك بتكلي كل حاجه بس كميه قليله :)
فابتاخدي اللي انتي محتاجاه وبس
فامابيبقاش في فائض يتحول الي سمنه