الأربعاء، 6 فبراير 2013

الغريب اديب

الغريب اديب 
مثل قديم 
بهمس بيه في ودن اخوان العرب اللي في مصر
لييييييييييييه؟؟
زمان ايام الغزو بتاع العراق علي الكويت
 كتير من الاسر الكويتيه جت مصر هربا من الغزو
علي عينا وراسنا طبعا
كان في وقعه حصلت غريبه اوي
كنت راكنه مستنيه صديقه تنزل من بيتها 
وتاكسي ركن جنبي ينزل اتنين ستات واضح انهم عرب 
وجت الست تحاسبه السواق 
قال لها مش عايز حساب ياست هانم احنا لبعضينا
 انا ياما عشت عندكم في الكويت 
ماكان من الست الا انها صرخت فيه وشتمته 
شتايم بمامعناه انت ياجربوع هتبقشش عليا انا
رد فعل غريب عنيف
 حتي لو كان بيجاملها بس وهياخد اجره 
ترد عليه احسن من كده وتديله حسابه
سواق التاكسي قال لها كتر خيرك 
مش هرد عليكي انتي مهما كان ست 
وكمان غريبه وضيفه
 راحت شتماه وراميه له فلوس من الشباك
راح هو واخد عربيته ومشي 
وهو بيقول حسبي الله ونعم الوكيل
طيب ياشموسه ايه اللي فكرك بالكلام ده 
؟؟؟
هقولكم
كنت في سوبر ماركت ماركاتوا
 وكان الاتنين ستات اللي قصادي علي الكاشير عرب
ولما حاسبوا 
الست اللي دفعت قالت للبنت اعطيني العشره جنيه خمستين البنت ردت بكل ادب
( وده غريب طبعا علي البياعات المصريات)
 مافيش يافندم خمسات
 راحت الست قالت لها قلت لك اعطيني فكه 
فاالبنت قالت لها تاخديهم معدن ؟؟
قالت لها لا ورق
 البنت فتحت لها الدرج وقالت لها شوفي يافندم مافيش خمسات خالص
ماكان من الست الا انها نتشت منها الباقي بعصبيه 
وشتمت البنت وقالت لها انتوامعاملتكم زباله 
وانتوا زباله
البنت كانت هترد عليها
 انا برقتلها انها ماتردش وتسبها تمشي
بعد الست مامشيت طيبت خاطر البنت بكلمتين وخلاص
ده حال اغلب العرب في مصر 
في بلدنا وبيتعملوا معا الناس بطريقه بايخه
وعايزة اقوللهم 
الغريب اديب
ومش مستغربه طبعا عليكم ده
اللي يسيب بلده وهي محتاجاه يعمل اكتر من كده
مش مبسوطه بأغنياء العراق وسوريا اللي في مصر
 وفاتحين محلات وعاملين بزنس
 مش مبوسطه باللي يجري من بلده وقت العسر
ممكن اكون غلط
بس لنا في اهل غزة اسوة حسنه

هناك 25 تعليقًا:

ابراهيم رزق يقول...

شمس الشموس

و لنا فى اهل غزة اسوة حسنة
ده صحيح يا شموسة
و فى نماذج كتير كده

و فى كمان العكس
لكن اكثر حاجة بكرهها هى العنجهية و الغطرسة

تحياتى

سواح في ملك اللــــــــــــــــــه- يقول...

شموسة ومصرية اصيلة

لما بتحكي تطلع منها

حكمة جميلة

الـسـيـدة نـون يقول...

:(

رؤى عليوة يقول...

احنا مش كل المرات غلط
لكن هما غالبا قللات الزووووق جدا هنا ولا هناك
هما مجرد شولة فلوس مش اكتر ويقال فى المثل ال.. معبية فلوس هى ايييه ؟؟

طبعا مش كلهم لكن غالبا هما كده

انا لو مكان البنت لو اخر يوم ليا فى الشغل كنت عرفتها قيمتها بدون عصبيه


المهم

شكرااااااااا للاتصال الرقيق جدا واللى اسعدنى جداجدا

دمت بخير

إبـراهيم ... يقول...

طبعًا هوا موقف عابر
بس ما ينفعش فيه التعميم
عرف ناس كتير بتشكَّر ف أخلاق السوريين مثلاً ومعاملتهم ..
مش قاعدة

Unknown يقول...

سبحان الله
مواقف صراحة أذهلتنى
المصريون دائماً يتحملون حماقة القلة من هؤلاء وهذا قدرنا

zeze يقول...

صحيح في ناس بتعمل كدا ،بس بردوا في مصريين بينزلوا من نفسهم علشان الفلوس وطبعا اكيد مش هيحترموهم ،مش عارفة حاسة انه البعض منهم حاسس انناممكن نعمل اي حاجة علشان الفلوس ،علشان ممكن الواحد يسيب بلده ويروح يشتغل عندهم اي حاجة ،انا عارفة انه الظروف بتحكم ،اكيد دا مش مبرر لسوء المعاملة
ربنا يبارك فيكي ياحبيبتي

محمد سلامة يقول...

لا نحكم على أحد من موقف ولا اثنين ولا عشرة
دى شعوب بأكملها فيها السئ والحلو
والوطنى والخاين واللى مش فارقة معه
والضعيف اللى لا حيلة له والجبان وغيرهم
ده احنا يا مصريين بقينا نقول ده صعيدى وده منوفى وده بورسعيدى
ربنا يرحمنا برحمته وينصر عباده فى كل مكان
تحياتى المعطرة

Do3aa El_attar يقول...

:(

أعتقد إن السبب في كده إحنا مش هما ومش إحنا كشعب لاء كحكومة .. لفترات طويلة وإلى الآن وأقربها حادثة حمادة والاتحادية المصري بيهان وإلى الآن كرامته آخر حاجة في الحسابات .. أعتقد ده رسخ عند ناس كتيرة أفكار غلط عننا وللأسف :(

البوست يوجع ويصدم :(

faroukfahmy يقول...

ولنا فى اهل غزة اسوة حسنه
المحترم محترم يا شمس لا بالغنى ولا بالفقر
الغنى غنى النفس والفقر فقرها الى الاخلاق
الفاروق

رحاب صالح يقول...

انا يحضرني موقف اخر
هو في احمد المنتديات العربية قال احد المصريين للعرب الموجودين بالمنتدي احنا عايزين نعرف مفردات اللهجة عشان نتقنها ويكون العرب جميعهم بيعرف لغة بعضهم
فما كان منه بعد كلام مينفغعش اقوله انه احنا بنففهمم يا مصرين بس انتم اغبيا ومستحيل نعرفوا توصلوا لنا ولا حتي تتقنوا لهجتنا لاننا بنكرهكم
كلام غريب وعجيب
احنا بطبيعتنا كمصريين ودودين ومحبين للغير
لكن العرب مختلفين عنا
وقابلت منهم كثيرون
قليل منهم من هو في مستوي فكري وعقلي وديني تستطيعين التعامل معه بحميمية

الازهرى يقول...

دى التدوينة اللى قلت لك عليها

http://fritend.blogspot.com/2009/09/blog-post_26.html

وحاولت ابعت الصور على الميل مش راضى

حاولى تبعتى لى ميل وأنا هأرد ببالصور

شمس النهار يقول...

*ابراهيم رزق

العنجهيه والغطرسه دي من الصفات المزمومه
والكبر علي اهل الكبر صدقة
واللي يتكبر يتكبر علي نفسه
:)
صباح الهنا

شمس النهار يقول...

*سواح في ملك اللــــــــــــــــــه

اهلا بيك ياخالد
يامجامل ياطيب

ياللي غايب عن الدنيا مش عارفه ليه :)

شمس النهار يقول...

*بنت خيخه واي كلام
:))

طب سلام حتي :)

شمس النهار يقول...

*رؤي عليوة

الفلوس عمرها مابتعمل بني ادمين
البني ادم بأخلاقه وذوقه
وطبعا انا مش بعمم
والامثال دي للناس العوجه بس

والبنت كان هيتقطع عيشها والست دي كانت هتنبسط جدا انا حرمتها من الانبساط ده
ايوة في ناس بتنبسط من اذية مخاليق ربنا

انا كمان انبسط جدااااا من المكالمه وكان نفسي تبقا لقاء بس معلش تتعوض
:)

شمس النهار يقول...

*ابراهيم....معايا
اهلا بيك ياابراهيم

انا ماعممتش خالص
لكن دي نماذج بنقابلها واحب اتكلم عنها
والامثال اتعملت للناس دي:)

انا ليه اصدقاء من الدول العربيه اخلاق جداااا واعتز بصداقتهم وفيهم من يرجع صداقتنا من السبيعينيات ايام الكليه والي الان نتواصل وعمرنا ماحسيت منهم انهم اغراب

شمس النهار يقول...

*zeze

في ناس كده
وفي ناس عايشين وسطنا زي الفل
مصر مش بتاعة المصرين بس مصر بتاعة كل العرب
حتي الاجانب الفرنجه:) برضوا ليهم في مصر
طبعااااا
مش ام الدنيا

بالنسبه للعمال المصرين البسطاء اللي راحوااشتغلوا هناك للأسف العرب بيقيسوا عليهم باقي المصرين

نورتيني

شمس النهار يقول...

*مسلم مصرى

ياريس انا مش بعمم
دايما احنا بنتكلم عن السلبيات ونعريها
والايجابيات ونشكر فيها
:))
اومال احنا هنا بنعمل ايه
:))
بنم طبعا :))

اماموضوع بنقول صعيدي ومنوفي :))
الكلام ده من زماااااااااااان
وشوف بعض الامثال القديمه علي المنايفه والدمنهوريه والاسكندرانيه :))
والشرقاوه والدمايطه
:))

شمس النهار يقول...

*doaa elattar

يااهلا يااهلا يادودو
انتي فين مش بتيجي ليه :)

كلامك صح
وشوفي تدوينتي عن الست اللي جوزها بيقول لها ياعورة :)

شمس النهار يقول...

*faroukfahmy58

صح كلام حضرتك صح

الانسان المحترم محترم بذاته

نورتني :)

شمس النهار يقول...

*re7ab.sale7

ده موقف صادم اخر
تخيلي لما يتقال كده في ندوة
بها اعرق حضارة

واول اي شء في الفن والادب
انا ساعات بحس ان اللي بيعمل كده حاقد مش اكتر
كان يتمني ان دي تبقا بلاده
مع ان مصر بلاده فعلا
وزي ماقلت مصر مش بس بتاعة المصرين دي بتاعة العرب كمان

شمس النهار يقول...

*الازهري

شكرا ياريس
:))

هبعتلك حاضر ميل

:))
يالا زي بعضه

صاحب الحبر الأسْوَد يقول...

للاسف قليل جداً لما يحصل موقف زي ده من سائح اجنبي غير عربي
اعتقد ان المسألة خلط عن بعض السائحين العرب
في انهم بيعتقدوا ان المال هو وسيلة تشتري بيها الشخص اللي قدامك ( وده زمن العبيد اللي انتهي )
مع انه وسيلة انك تشتري سلعة صنعها الشخص اللي قدامك ومش بتاخد عليها كرامته هدية

دايماً بشوف النماذج دي في نظري مُحدثين مال للاسف فاهمين الحياة والناس غلط

انا عارف اني دايماً بطول بس الموضوع شدني
تحياتي لقلمك



ذو النون المصري يقول...

الغريب اديب اول مره اسمعه و مقتنع به فعلا لكن اغلب المصريين في الغربة ليسوا ادباء