ظلام تام
ولما النور رجع
لاقيت حاجات كتير اختفت وحاجات كتير اتبدلت
ايوة ده بيتي بس مش ده بيتي خالص
دي اوضتي بس مش هي خالص
عارف لما تخرج وترجع تلاقي بيتكم مش موجود
بخ
بخ
وبرضوا عندك بيت بس مش ده خالص بيتي
زي ماتقولوا كده فقدان نصفي للذاكره
الاماكن والاشياء اختفت مش موجوده ولا الشخصيات
لكن الذكريات موجوده
لكن الذكريات موجوده
يعني الاماكن متغيره والشخصيات مش موجوده مشيت
مافيش حاجه موجوده غيرك انت والذكريات وبس
ذكريات جواك بالاماكن والشخصيات بتضغط عليك
وماحدش شايف ولا حاسس بده غيرك انت
وماحدش شايف ولا حاسس بده غيرك انت
اشخاص كانوا محور حياتك
بخ
حل محلهم ناس تانيه خالص
بخ
حل محلهم ناس تانيه خالص
تحس بغربه
تحس بتوهان
الدنيا ليه اتشقلبت كده
الناس اختفوا ليه
طب راحوا فين
طيب انا مين اصلا
طيب اشمعنا ده كله اختفي وانا لسه
طيب انا مين اصلا
طيب اشمعنا ده كله اختفي وانا لسه
الحمد لله
كل مايعمل يعمل للخير
هناك 24 تعليقًا:
الذكريات هتهون الوحدة ... وكله هيرجع تااني صدقيني لمكانه الصحيح ...
لولا
أنا صعبان عليا "أم محمد" قوي .. محمد وداها إمبارح بالليل المستشفى علشان تعمل عملية في عينيها وراح قافل موبايله وما جاش ياخدها النهارده !! والست كبيرة في السن بتاع سبعين سنة ومن المنصورة يعني مش من القاهرة كمان !!
بقت قاعدة في الميكروباص تعيط وتقول : كده يا محمد يا ابني ؟؟ ده أنت كنت زي البلسم وحنية الدنيا فيك إيه يا ابني اللي غيرك ؟؟ جبت القسوة دي منين يا حبيبي ؟؟ .. وبعدين قعدت تحكي عن مراته اللي اتخانقت معاها وفتحت الشبابيك وزعقت بعلو حسها وفرجت عليها الجيران علشان شافتها فتحت أوضة في شقة ابنها من غير إذنها !!! .. قالت لها انتي بتدعبسي على إيه من ورايا ولا تكوني هاتحطي لي عمل ؟؟ .. الشقة أم تلتميت ألف جنية اللي محمد اتغرب عشر سنين في السعودية علشان يجيبها ويفرشها وفي الآخر كتبها باسم الهانم مراته هي والعربية .. "أم محمد" حلفت ما تدخل بيت ابنها تاني بعد اللي حصل ، بس اللي حارق قلبها أنه سابها في المستشفى من امبارح بالليل وما جاش ياخدها وهو عارف أنها عاملة عملية في عينيها ومش هاتعرف تمشي لوحدها .. حتى كان وصلها لحد رمسيس واتطمن عليها لحد ما تركب !!
وكل شوية تقول أنا هارجع المستشفى تاني استناه قدام الباب .. هو أكيد هاييجي ياخدني بس تلاقيه عنده شغل كتير .
الله يسامحك يا محمد الله يسامحك
هو موضوع البوست كان عن إيه علشان مش فاكر ؟؟
أنت غريبة في عالم بات بالفجر والفسوق والعصيان يفتخر نعم خير لك ان تكوني غريبت حتى رسولكم الكريم قالها ذات مرة طوبى للغربا
المهم انتي
اما الدنيا فهي دار غربة
http://www.ahlalhdeeth.com/vb/showthread.php?t=233966
ابواب الجنة وربنا يكتب لنا ولك دخولها دون سابقة عذاب أو مناقشة حساب
صباح الرضا
شمس النهار
دائما يتغير الاشخاص الذين يمرون علينا فالصغير يكون مع اقران من سنه وعندما يكبر يجد أصدقاء جدد وفى كل انتقال له يجد أشخاص جدد حتى فى الحياة وهو عاذب يكون مع أهله وعندما يتزوج يعيش مع شخص أخر قد كان غريب عنه وأصبح هو بئر اسراره
فسنة الحياة تقتضى ذلك وهذا حكمة من الله تعالى فتغير الأشخاص من حولنا يكسبنا خبرات حياتيه أكثر وفن فى التعامل مع الاشخاص
* لــــ زهــــــراء ــــولا
الذكريات احيانا كتير مابتهونش الوحدة دي بتزودها
:)
* P A S H A
صباح الفل ياباشا:))
هو نفس موضوع ام محمد
الاحساس بالغربه في وسط الناس
علي فكره ام محمد عندها زهايمر وفي من كده كتير اوي
ربنا يلطف بيهم ويجنبنا هذا الداء اللعين
نورت ياباشا
* fara7.lebanon
صدقتي يافرح طوبي للغرباء
*ستيته
صباح الفل عليكي
بجد الناس بقت مش ناس
مش عارفه تتعاملي مع حد
كله بيكدب وبيراوغ
والفوريجيه كتروا
والفهلوه بقت سيد الموقف ربنا يرحمنا
من دي غربه
والدت واحدة صحبتي بقول لها كده ياتانت مش بتسألي عليا:)
قالت لي مااقدرش مااسألش عليكي ده انا ماسكه فيكي انتي ووالدتك بايدي وسناني ده انتوا واللي زيكم اللي رابطني بالدنيا
والا حسيت بالغربه مش عارفه اتكلم ولا اتعامل معد حد
نهارك سعيد يادكتورة
*Gamal Abu El-ezz
المشكله في تغير الناس من حولك
الناس هي هي بس ايه غيرهم
راحوا فين الناس الوجوه هي هي بس مش همه
ايه حصل ماتعرفش
هوه ده الحب الحقيقى ليس له مثيل ولا نستطيع عنه تبديل
كلامك متجدد وملذذ بطعم الكريز
امبارح قرأت تعليق على الفيسبوك لصديق بيقول كلمة صعبة اوى اوى... بيقول ( كفرت بالوطن )
زعلت شوية منه بس لما قعدت مع نفسى سألتها وانت ايه اخبارك مع الوطن لقتنى من جوايا عايزة اقول كل كلمة انت قولتيها هنا ويمكن شوية حب وشوية امل وتفاؤل خلونى ارفض اصرح باللى قاله الصديق ده على صفحته واللى انا حساه مثله
بس اللى انا مصدقاه انى فعلا اشعر بالغربة اوى اوى اوى الايام دى وانا فى بلدى :(
اصعب الغربة انك تحس بيها وانت فى حضن بلادك
دمت بأمل وسعادة وتفاؤل
لعل القادم خير ان شاء الله
تحياتى لك غاليتى بحجم السماء
شموسه
اولا سورى انى مش بدخل عندك بقالى كتير مشغوليات بقى
طبعا طلما بنحس بغربه كتير
بس انا اول مره احس انى عايزه اعلق على تعليق مش على بوست
مس عارفه ليه حاسه ان تعليق سعادة الباشا كان قصده يوصلك رساله معينه وانتى مخدتيش بالك منها
ويمكن اكون غلطانه وعايزه اعمل عليكم اخصائيه نفسيه :)
تحياتى
مساء ملون بـــ....
احساس بيغمرني دايما ان كل يوم مش بس كل سنة الناس بتتغير من حواليا كل شيء بيتغير بس الا انا
بحاول اني متغيرش واذا غيرت اتغير للأحسن
بحاول اني اتماسك ويكون عندي دايما امل اني مع كل مرحلة الاقي الناس احسن صحيح بقابل الاسوأ بس دايما بفكر ف ناس افضل
صحيح قابلت ناس كتير أذوني واذوا احساسي ومشاعري بس معرفتش اعمل زي ما هما عملوا
بحاول دايما ان الخير جوايا ميغلبوش الشر
بخاف من اني اتغير للأسوأ عشان كدة دايما بحاول اعمل الخير علي اد ما اقدر
بحاول وبحاول
صحيح بتعدي عليا اوقات مش بلاقي حد جنبي ف اشد ما بكون محتاجة لهم خصوصا اللي بتحس قلبك قريب منهم وبيعملوا العكس
بس بردو بعاند وبعاند عشان يفضل الأمل جوايا يغلب الالم
تدوينة توجع القلب وكلام باشا وجعني اوووي
انا مش عارفني انا توهت مني انا مش انا
الدنيا كده فعلا حاجات بتضيع وحاجات بتروح واحنا بنفضل نتفرج عليهم ونعيشهم ونعيش فقدانهم
تحياتي
نبكي على الدنيا و ما من معشر جمعتهم الدنيا فلم يتفرقوا
المصيبة يا شموسة ان ده بيحصل دايما و احنا مطالبين اننا نواكبه و نتأقلم معاه
* faroukfahmy
هو بقا لسه في حب حقيقي يااستاذنا ماخلاص
ده بقا تيك اوي:))
* ليلى الصباحى.. lolocat
احساس الغربه بقا بيتملك الجميع
مش هي دي مصر ومش همه دول اهلها الطيبين الودودين المحبين
الامل في الله وحده يااخت ليلي
نورتيني
*فافي
اهلا اهلا
:)
هو الباشا حب يقول لي احمدي ربنا
وكمان يحكي عن غربه تانيه
:)
ماالست دي واضح ان عندها زهايمر
وده غربه لاقبلها ولا بعدها غربه
* re7ab.sale7
ياصباح الفل
:)
المساء ده ملون ب ايه:))
ادعي انك ما تتغيريش علشان من عاشر القوم 40 يوم بقا منهم
تمسي بماانتي عليه
وماتعمليش الناس بمعاملتهم
لا
تعاملي معهم من منطلقك انتي
هتكسبي رضا نفسك علي نفسك
ربنا يثبتنا جميعا علي الخير
*eng_semsem
ايوة بالظبطت كده
والحاجات اللي بتقع دي مابنعرفش نجيبها تاني مهما حصل
ومش هنقول غير يامثبت العقل والدين يارب ثبتنا علي الخير
*مصطفي سيف الدين
ماهو مافيش حاجه ببلاش ياقناوي
لو صبرتم اجرتم وامر الله نافذ
يعني هناخد اجر الصابرين
يعني الاحساس دا مش بس اللي انا عايشة فيه ... دا احساس مالي الكون كلو ...
بس والله احساس صعب اووي ...
كلامك دمع عنيا ... هقول ايه بس ... الهي عوضنا يااا رب برحمتك يا أرحم الراحمين
أول مرور ليا وان شاء الله ميكونش الاخير
"كن فى الدنيا غريب او عابر سبيل "
وانصحك بالذكر ده " يا الله يا قريب غير بعيد يا مؤنس كل وحيد "
..
..
تحياتى
إرسال تعليق