الثلاثاء، 16 أبريل 2013

غربه

عارف لما تلاقي حياتك فاجأة اتطفي النور 
ظلام تام
ولما النور رجع 
لاقيت حاجات كتير اختفت وحاجات كتير اتبدلت
ايوة ده بيتي بس مش ده بيتي خالص
دي اوضتي بس مش هي خالص
عارف لما تخرج وترجع تلاقي بيتكم مش موجود 
بخ
وبرضوا عندك بيت بس مش ده خالص بيتي
زي ماتقولوا كده فقدان نصفي للذاكره
الاماكن والاشياء اختفت مش موجوده ولا الشخصيات
 لكن الذكريات موجوده
يعني الاماكن متغيره والشخصيات مش موجوده مشيت
مافيش حاجه موجوده غيرك انت والذكريات وبس
ذكريات جواك بالاماكن والشخصيات بتضغط عليك
وماحدش شايف ولا حاسس بده غيرك انت
اشخاص كانوا محور حياتك
 بخ 
حل محلهم ناس تانيه خالص
تحس بغربه
تحس بتوهان
الدنيا ليه اتشقلبت كده
الناس اختفوا ليه
طب راحوا فين 
طيب انا مين اصلا 
طيب اشمعنا ده كله اختفي وانا لسه
الحمد لله
كل مايعمل يعمل للخير

هناك 24 تعليقًا:

لــــ زهــــــراء ــــولا يقول...

الذكريات هتهون الوحدة ... وكله هيرجع تااني صدقيني لمكانه الصحيح ...


لولا

P A S H A يقول...

أنا صعبان عليا "أم محمد" قوي .. محمد وداها إمبارح بالليل المستشفى علشان تعمل عملية في عينيها وراح قافل موبايله وما جاش ياخدها النهارده !! والست كبيرة في السن بتاع سبعين سنة ومن المنصورة يعني مش من القاهرة كمان !!
بقت قاعدة في الميكروباص تعيط وتقول : كده يا محمد يا ابني ؟؟ ده أنت كنت زي البلسم وحنية الدنيا فيك إيه يا ابني اللي غيرك ؟؟ جبت القسوة دي منين يا حبيبي ؟؟ .. وبعدين قعدت تحكي عن مراته اللي اتخانقت معاها وفتحت الشبابيك وزعقت بعلو حسها وفرجت عليها الجيران علشان شافتها فتحت أوضة في شقة ابنها من غير إذنها !!! .. قالت لها انتي بتدعبسي على إيه من ورايا ولا تكوني هاتحطي لي عمل ؟؟ .. الشقة أم تلتميت ألف جنية اللي محمد اتغرب عشر سنين في السعودية علشان يجيبها ويفرشها وفي الآخر كتبها باسم الهانم مراته هي والعربية .. "أم محمد" حلفت ما تدخل بيت ابنها تاني بعد اللي حصل ، بس اللي حارق قلبها أنه سابها في المستشفى من امبارح بالليل وما جاش ياخدها وهو عارف أنها عاملة عملية في عينيها ومش هاتعرف تمشي لوحدها .. حتى كان وصلها لحد رمسيس واتطمن عليها لحد ما تركب !!
وكل شوية تقول أنا هارجع المستشفى تاني استناه قدام الباب .. هو أكيد هاييجي ياخدني بس تلاقيه عنده شغل كتير .


الله يسامحك يا محمد الله يسامحك

هو موضوع البوست كان عن إيه علشان مش فاكر ؟؟

غير معرف يقول...

أنت غريبة في عالم بات بالفجر والفسوق والعصيان يفتخر نعم خير لك ان تكوني غريبت حتى رسولكم الكريم قالها ذات مرة طوبى للغربا

ستيتة يقول...

المهم انتي
اما الدنيا فهي دار غربة

http://www.ahlalhdeeth.com/vb/showthread.php?t=233966

ابواب الجنة وربنا يكتب لنا ولك دخولها دون سابقة عذاب أو مناقشة حساب

صباح الرضا

النسر المهاجر يقول...

شمس النهار

دائما يتغير الاشخاص الذين يمرون علينا فالصغير يكون مع اقران من سنه وعندما يكبر يجد أصدقاء جدد وفى كل انتقال له يجد أشخاص جدد حتى فى الحياة وهو عاذب يكون مع أهله وعندما يتزوج يعيش مع شخص أخر قد كان غريب عنه وأصبح هو بئر اسراره


فسنة الحياة تقتضى ذلك وهذا حكمة من الله تعالى فتغير الأشخاص من حولنا يكسبنا خبرات حياتيه أكثر وفن فى التعامل مع الاشخاص

شمس النهار يقول...

* لــــ زهــــــراء ــــولا

الذكريات احيانا كتير مابتهونش الوحدة دي بتزودها
:)

شمس النهار يقول...

* P A S H A

صباح الفل ياباشا:))
هو نفس موضوع ام محمد

الاحساس بالغربه في وسط الناس
علي فكره ام محمد عندها زهايمر وفي من كده كتير اوي

ربنا يلطف بيهم ويجنبنا هذا الداء اللعين

نورت ياباشا

شمس النهار يقول...

* fara7.lebanon

صدقتي يافرح طوبي للغرباء

شمس النهار يقول...

*ستيته

صباح الفل عليكي

بجد الناس بقت مش ناس
مش عارفه تتعاملي مع حد
كله بيكدب وبيراوغ
والفوريجيه كتروا
والفهلوه بقت سيد الموقف ربنا يرحمنا
من دي غربه
والدت واحدة صحبتي بقول لها كده ياتانت مش بتسألي عليا:)
قالت لي مااقدرش مااسألش عليكي ده انا ماسكه فيكي انتي ووالدتك بايدي وسناني ده انتوا واللي زيكم اللي رابطني بالدنيا
والا حسيت بالغربه مش عارفه اتكلم ولا اتعامل معد حد
نهارك سعيد يادكتورة

شمس النهار يقول...

*Gamal Abu El-ezz

المشكله في تغير الناس من حولك
الناس هي هي بس ايه غيرهم
راحوا فين الناس الوجوه هي هي بس مش همه
ايه حصل ماتعرفش

faroukfahmy يقول...

هوه ده الحب الحقيقى ليس له مثيل ولا نستطيع عنه تبديل
كلامك متجدد وملذذ بطعم الكريز

ليلى الصباحى.. lolocat يقول...

امبارح قرأت تعليق على الفيسبوك لصديق بيقول كلمة صعبة اوى اوى... بيقول ( كفرت بالوطن )

زعلت شوية منه بس لما قعدت مع نفسى سألتها وانت ايه اخبارك مع الوطن لقتنى من جوايا عايزة اقول كل كلمة انت قولتيها هنا ويمكن شوية حب وشوية امل وتفاؤل خلونى ارفض اصرح باللى قاله الصديق ده على صفحته واللى انا حساه مثله

بس اللى انا مصدقاه انى فعلا اشعر بالغربة اوى اوى اوى الايام دى وانا فى بلدى :(

اصعب الغربة انك تحس بيها وانت فى حضن بلادك

دمت بأمل وسعادة وتفاؤل
لعل القادم خير ان شاء الله

تحياتى لك غاليتى بحجم السماء

فافى يقول...

شموسه
اولا سورى انى مش بدخل عندك بقالى كتير مشغوليات بقى
طبعا طلما بنحس بغربه كتير
بس انا اول مره احس انى عايزه اعلق على تعليق مش على بوست
مس عارفه ليه حاسه ان تعليق سعادة الباشا كان قصده يوصلك رساله معينه وانتى مخدتيش بالك منها
ويمكن اكون غلطانه وعايزه اعمل عليكم اخصائيه نفسيه :)
تحياتى

رحاب صالح يقول...

مساء ملون بـــ....
احساس بيغمرني دايما ان كل يوم مش بس كل سنة الناس بتتغير من حواليا كل شيء بيتغير بس الا انا
بحاول اني متغيرش واذا غيرت اتغير للأحسن
بحاول اني اتماسك ويكون عندي دايما امل اني مع كل مرحلة الاقي الناس احسن صحيح بقابل الاسوأ بس دايما بفكر ف ناس افضل
صحيح قابلت ناس كتير أذوني واذوا احساسي ومشاعري بس معرفتش اعمل زي ما هما عملوا
بحاول دايما ان الخير جوايا ميغلبوش الشر
بخاف من اني اتغير للأسوأ عشان كدة دايما بحاول اعمل الخير علي اد ما اقدر
بحاول وبحاول
صحيح بتعدي عليا اوقات مش بلاقي حد جنبي ف اشد ما بكون محتاجة لهم خصوصا اللي بتحس قلبك قريب منهم وبيعملوا العكس
بس بردو بعاند وبعاند عشان يفضل الأمل جوايا يغلب الالم
تدوينة توجع القلب وكلام باشا وجعني اوووي

eng_semsem يقول...

انا مش عارفني انا توهت مني انا مش انا
الدنيا كده فعلا حاجات بتضيع وحاجات بتروح واحنا بنفضل نتفرج عليهم ونعيشهم ونعيش فقدانهم
تحياتي

مصطفى سيف الدين يقول...

نبكي على الدنيا و ما من معشر جمعتهم الدنيا فلم يتفرقوا
المصيبة يا شموسة ان ده بيحصل دايما و احنا مطالبين اننا نواكبه و نتأقلم معاه

شمس النهار يقول...

* faroukfahmy

هو بقا لسه في حب حقيقي يااستاذنا ماخلاص
ده بقا تيك اوي:))

شمس النهار يقول...

* ليلى الصباحى.. lolocat

احساس الغربه بقا بيتملك الجميع
مش هي دي مصر ومش همه دول اهلها الطيبين الودودين المحبين
الامل في الله وحده يااخت ليلي
نورتيني

شمس النهار يقول...

*فافي
اهلا اهلا
:)
هو الباشا حب يقول لي احمدي ربنا
وكمان يحكي عن غربه تانيه
:)
ماالست دي واضح ان عندها زهايمر
وده غربه لاقبلها ولا بعدها غربه

شمس النهار يقول...

* re7ab.sale7

ياصباح الفل
:)
المساء ده ملون ب ايه:))

ادعي انك ما تتغيريش علشان من عاشر القوم 40 يوم بقا منهم

تمسي بماانتي عليه
وماتعمليش الناس بمعاملتهم
لا
تعاملي معهم من منطلقك انتي
هتكسبي رضا نفسك علي نفسك
ربنا يثبتنا جميعا علي الخير

شمس النهار يقول...

*eng_semsem

ايوة بالظبطت كده

والحاجات اللي بتقع دي مابنعرفش نجيبها تاني مهما حصل

ومش هنقول غير يامثبت العقل والدين يارب ثبتنا علي الخير

شمس النهار يقول...

*مصطفي سيف الدين
ماهو مافيش حاجه ببلاش ياقناوي
لو صبرتم اجرتم وامر الله نافذ
يعني هناخد اجر الصابرين

زينب علي حبيب يقول...

يعني الاحساس دا مش بس اللي انا عايشة فيه ... دا احساس مالي الكون كلو ...

بس والله احساس صعب اووي ...

كلامك دمع عنيا ... هقول ايه بس ... الهي عوضنا يااا رب برحمتك يا أرحم الراحمين

أول مرور ليا وان شاء الله ميكونش الاخير

well يقول...

"كن فى الدنيا غريب او عابر سبيل "
وانصحك بالذكر ده " يا الله يا قريب غير بعيد يا مؤنس كل وحيد "
..
..
تحياتى