الحب
الحب انواع
منها الفطري زي الحب بين الاسره الواحده يعنى الطفل بيتولد يحب والده والدته اخوته ماحدش بيتولد بيكرهم والا بيتولد كاره حد اصلا ده الحب اللي بيتولد مع الانسان وبيكبر معاه
جايز الانسان يحب والده اكتر من والدته او العكس نتيجة عوامل كتيره و ممكن يحب جدته لوالدته اكتر من اللي لوالده وعمته اكتر شويه من خالته و وارد برضه انه يكره حد من عيلته وبتكون هناك اسباب برضه بس الفطري ان الاسره كلها بفروعها تحب بعض
وكذلك هناك الحب بين الاصدقاء والصديق هنا انت اللي بتختاره ماحدش بيختاره لك خالص بدليل ان في حالات بيكون صديق صديقك انت مش صديقه وممكن كمان ماتستلطفوش اصلاولو ان عادة الاصدقاء بيكونوا متآلفين مع بعض وغالبا بتكون ميولهم متقاربه ما هى ده قاعدة الاختيار اكيد مش هأختار صديق انا متنافر معاه اصلا
والحب بين الاصدقاء نسخه من الحب الحقيقي بأغلب ملامحه من تضحيه واخلاص ووفاء وتفاهم و ود وخوف علي مصلحة بعض ومشاركه في الفرح والحزن والوقوف مع بعض في الازمات
وهناك حب الاعجاب يعنى اتنين بيتقابلوا و بيعجبوا ببعض و بيبقى هو شايف فيها فتاة احلامه وبعد التقارب يلاقيها كابوس مش حلم وهي تفتكره الشاطر حسن يطلع دراكولا و بعدها يحصل الانفصال وهنا لينا رجعه كبيره في بوست لوحده عشان نشرح حالة الاعجاب والكوارث اللي بتحصل بسببها نتيجة واحد من الاتنين عادة بيكون حب التاني وحاجات كتيروعلي فكره نص حالات الاحزان والجروح بتكون نتيجة حالة اعجاب مش حالة حب
اما الحب الحقيقي بين الرجل والمراه يا تري ايه تعريف الحب عند كل واحد فينا ؟
بالنسبه ليا الحب هو احساس بيتولد بين اتنين من غير هم نفسهم مايعرفوا السبب وتبتدي بينهم كيمياء غير معلومة المصدر ومجال مغناطيسي يشد الاتنين لبعض بشكل غريب ويبتدي التقارب النفسي بينهم ويدخلوا في حاله من المشاعر الجميله وسعاده من نوعيه جديده علي كل منهما يعني كل واحد حاسس انه مش سعيد غير بنصه التاني و مش شايف ليه وعشان ايه ؟ هومش بيسأل نفسه اصلا و مستسلم للحاله الجميله دي و يبتدي الكلام والحوارات والمناقاشات والتوغل في فهم كل منهم للأخر ويبتدي هنا المشوار وعادة بيكون المحبين متفقين في حاجات كتير في الشخصيه وده بيكون تفعيل لنظرية ان الارواح جنود مجنده ماتعارف منها ائتلف وماتناكر(تنافر) منها اختلف---------------وان كل روح مقسومه نصين بيدوروا علي بعض ويابخته اللي يلاقي نصه التاني و هنا الحب بياخد اشكاله الطبيعيه واحواله الجميله اللي هنتكلم عليها مع بعضالنهارده بس عايزين نعرف معني كلمة حب وعايزه اسمع منكم والمفروض اللي يدخل يقرا البوست زي مااتفقنا و يقرا التعليقات كمان عشان نفتح باب المناقشه وياتقنعني يااقنعك :) في ود وحب و رحابة صدر هو ده فهمي لتلك القوه الجباره الغير مرئيه والمحسوسه فقط واللي بتصنع المعجزات
|
هناك 218 تعليقًا:
«الأقدم ‹أقدم 201 – 218 من 218شموسه
يا حياتي الرز باللبن خلص والله اهو تحت امركم
ههههههههههههههههههههه
تعقيب بس على كلام مجنون
لا انا باتكلم هنا اساسا على الاطار الشرعي بببببببببس
اي حاجه طبعا تانيه ما لهاش اي مكان ولا مجال نتكلم فيه
مش محتاجه نقاش انها غلط
واعتقد لو اثنين بيحبوا بعض فعلا مش هايعملوا حاجه زي كده فى حرام
ده ما يبقاش حب ده يبقى مش اكتر من زنا وبس مالوش وصف تاني
*صبرني يارب
الله ينور ياجميل ايه الكلام الكبير ده بس في ردك علي مجنون انت دخلتي شويه علي الحياه الزوجيه اعتقد انه يقصد السلطه اللي حاصله دلوقتي واللي بنقرا نتايجها في الجرايد
مش بيتكلم علي الزواج امال يعني اللي بيحبوا بعض هيتجوزوا افلاطوني
همه ليه سموه افلاطوني دي
شفت عمرو بدر بيقول ان النت واقع من عنده عشان كده غاب عن ارض المدونه
*محاسن صابر
سلامتك الف سلامه ياام بيرو ليه كده انت اخدتي يرد والا ايه خاللي بالك من نفسك وحاسبي علي بيرو لحسن يتعدي منك
ان شاء الله تخفي وتدخلي ارض المدونه وتشتركي في النقاش
سلامتك ياحوريه
كيارا
مافيش حاجه اسمها حب من اول نظره الحب اهم واعلى واشمل من كونه يتولد كده فى لحظه
لكن لما حد يقول انا حبيت من اول نظره
اقوله لا
انت اعجبت بيها والكيما والفزيا بتوعكم جم على بعض
والظروف والجوابات باعتكم مشيت مع بعضها وكملتوا
والاعجاب ده بقى حب
عشان كده انا دايما باعترض على علاقات ما قبل الجواز
وباقول ليه ما يكون التطور الطبيعى للحاجه الساقعه
قصدي للحب
انه يكون اعجاب خطوبه حب جواز ؟؟؟
ماله الترتيب ده ؟؟؟
لازم نلف شوارع وارصفة البلد كلها عشان يبقى حبينا قبل الجواز
ما علينا مش موضوعنا
وصدقينى يا كيارا بتحصل اثنين ما يكونش بالعين بعض تماما
لكن ما تعرفيش بيحصل ايه بعد الجواز ويحبوا بعض
اللللللله اعلم
سبحانه مقلب القلوب
*صبرني يارب
اهلا اهلا
شكرا علي الرز باللبن بس انا مالييش فيه اوي والا ليه في الحلويات والا الاكل اصلا انا اكل ما يجعلني علي قيد الحياه
بالنسبه لمجنون فهمتك اصل دلوقتي الموضوع بقا سلطه خلاص
ربنا يكرمك ويخلي لنا كلامك اللطيف
اخبار اليمام ايه اوعي العيال يكلوا اولادها:)
*صبرني يارب
كلامك صح واكبر دليل ان في زواج الصالونات
لما بيشوفوا بعض اول مره يابيتنفروا يابيتوافقوا الحاله الاولي نتيجتها معروفه
الحاله التانيه لما بيحصل خطوبه وتقارب نفسي وفكري وتفاهم بيحصل الحب وبيكون قوي جدا عشان كده الزواج بيكون سليم جدا ومبني علي اصول
لأن طبعا في الاول كان هناك التقارب العائلي بين الاسرتين ماهو لو مش موجود مش هيوافقوا اصلا علي اللقاء
وبعد كده النظره الاولي اللي بتقول حصل استلطاف والباقي معروف
والزواج ده بيكون من اقوي حالات الزواج لأنه اطاره سليم جدا وبيحافظ علي اللي جواه
هو مش نو
اتفق معاك انها مجرد نظره قد توقع القبول والاعجاب انما مش الحب
انما حب من النظره الاولى كده خبط لزق وكميا وفيزيا
على راي البت اختي البيئه عند امه يا فندم
اه بالمناسبه
زوجها لمن يتقى الله ان احبها اكرمها وان لم يحبها لن يظلمها
ده قول الحسن البصري
تمام يا باشا
شموسه يا حياتي
يا بختك
هههههههههههههههه
انا بقى باحب الاكل وبكل صراحه
هههههههههههههههههه
بدأنا ف الصفحه التانيه طب ايه
هههههههههههههههههه
هانروح فين بعد كده
محااااااسن
تعااااااالي يلا دي شموسه هاتطير ورانا فى الاخر
وتقولنا اييييييه كل واحد على مدونته يلااا
ههههههههههههههههه
يلا تصبحوا على خير بقى
اجيلكم الصبح اشوف السهره اسفرت عن ايه
تصبحي على خير يا حجوجتي يا عامله قلق فى البلوج كله يا جميل انت
*صبرني يارب
:)
ماتخافيش مش هجري وراكم اتكلموا زي ماتحبوا يجعل مدونات المؤمنين عمار
وانت من اهله
ان شاء الله بكره كملي وادخلي علي الصفحه التانيه والتالته براحتك ياجميل
مرحبا بالجميع
يبدو ان الموضوع ساخن جدا هنا
التعليقات كلها جميلة ومفيدة
الحب من وجهة نظرى حياة مستقلة
قد تتفاوت درجاته
لكن فى النهاية هو حب
قد يرتبط بغرائز اخرى لكن برده هو حب
اتمنى لو ان الحب بشتى انواعه واشكله يعم جميع الكائنات
لو بطلنا نحب نموت
تقبلو تحياتى
لا ااااااااااااااا ياشموستي انا مش قصدت انه حب وطب وجري من اول نظره
لاااااااااااااا انا بس اختصرت التعلييق دا عشان مش اتفهم غلط فقط لا غير
*لوبطلنا نحلم نموت
اهلا بيكي في اول زياره للمدونه
وفعلا لازم الحب يسكن قلوبنا عشان نقدر نستمتع بالجمال اللي ربنا مديهولنا
ونحسه
*كيارا
علم يافندم الدنيا هاديه ليه النهارده
كله من الرز بلبن بتاع صبرني
صحيح هي فين النهارده خرجت زي هي كمان
السلام عليكم
احيي حضرتك على هذه المدونة الرائعة
دي اول زيارة لي وان شاء الله مش الاخيرة
مزيد من التوفيق
قلم رصاص
يا حاجه شمس
انا كمان حافتكس واقول وجهة نظر مفتكسه جدا
اولا : بيقول لك كل واحد بيبحص عن نصفه التانى ويحبه.
عارفه لو فيه سجلات قديمه ترجع لاصل كل واحد الى آدم عليه السلام
حتلاقى فشكول بن .... بن . وهكذا دواليك حتى سيدنا ادم
وحتلاقى ام اسامه بنت ... بنت وهكذا دواليك اليى يوم آدم
وحتلاقى لهم اصل جينى واحد واصل وراثى واحد ويمكن يكونوا فى الاصل كانوا توأم فى جين واحد ... وكلام مفتكس من فشكول كتير
نتكمل بقى من وجهة نظر تانيه
احنا بنحاول نجيب تعريفات واسباب وتعليلات للحب .... مش شرط ... هو زى عضةالكلب ما لوش سبب ... ولو جه ما تصدقيش ان الانسان ممكن ينساه ... مش قلت زى عضةالكلب... الحب لا يتنسى ابداااا لكن ممكن الواحد يحب كمان مره ويفشل يقوم يحب تالت مره ... وغالبا كله بيفشل...
نقوم بقى نتكل على الله ونختار شريكة حياتنا او شريك حياتنا كيفما اتفق...
وياتيجى عوره يا تيجى مفتحه وانت ونصيبك
لكن الحب ليس له تحليل وليس له تعليل مهما حللنا ومهما عللنا
انت بقى عايزانى اقرأ ال206 تعليق يعنى عايزه تقعدينى عندك 216 يوم .. طب هاتى بقى الشائ يا ام اسامه وهاتى سندوتشات عشان اشوف ايه حكايةالحاجه
اعزك الله
*قلم رصاص
اهلا بيك في اول زياره
وشكرا علي المجامله اللطيفه الحقيقه قبل ماارد عليك هنا ذهبت الي مدونتك وجدتها اكثر من رائعه
*فشكول
اهلا بيك منور ومدام القعده عندنا ليه نتعب الست ام اسامه
الشاي والسندوتشات علينا حضرتك
إرسال تعليق