نبتدي الزيارات

طلعنا علي المركب بعد واقعة المطعم

والمرافق بتاعنا قال لنا ممكن تناموا لحد الساعه 12 وبعد كده تتغدوا ونبتدي الزيارات علي الساعه واحده

قلنا ماشي
طبعا عايزين ننام احنا في المطار من الساعه اتنين ونص بالليل

نمنا وفي عز النوم لاقيت صبرني يارب بتتصل بيا وصحتني خير اللهم اجعله خير
اليوم ان شاء الله هيكون جميل

المهم علي الغدا اتصلت بيه( رشا دودو) وبعدها (ورد شان)

الكل كان عايز يطمن ربنا مايحرمني منكم

ابتدينا اول زياره للمسله الناقصه
يعني ايه المسله الناقصه يعني كانت تحت الانشاء ولم تكتمل لعيب في الرخام
وهي دي اللي لما اكتشفوها عرفوا ازاي كانوا بيعملوا المسلات الطويله دي وحته واحده


بصراحه اعجاز الناس دي كانت عندها دماغ عاليه وبيشتغلوا بدقه وذكاء
مش هعرف اشرح الطريقه بس هي موجوده علي النت بكل تفاصيلها الدقيقه المزهله

وبعد المسله اخدنا الباص وعلي السد العالي



بجد حاجه جميله جدا وفخر للمصريين انهم عملوا حاجه زي دي

المكان جميل ونظيف جدا جدا




الصورد دي من فوق جسم السد شايفين لون النيل جميل ازاي والا بحر مرسي مطروح
علي فكره احلي لون للنيل في المنطقه دي


لكن الحلو لازم في مصر مايكملش
شوفت بحيرة ناصر اكبر بحيره صناعيه في العالم




طيب لما هي كلها خير كده ليه مابنعملش مصانع اسماك علي حدودها والسد موجود والكهربا موجوده والايدي العامله العدد في الليمون

لأ وايه فيها حوالي 35 الف تمساح الله الله
طبعا بيتغذوا علي الاسماك
طيب ليه مانصيدهمش والتمساح كله فوايد
جلود ولحم يتم تصديره للخارج ماهو في بلاد
بتاكل التماسيح
ولما قلت كده للمرافق اللي معانا وهو من اهل اسوان قال لي بطيبه شديده ماهو مصنع السمك هناك اهو
مصنع يتيم واحد
احنا بنتكلم علي ملايين الاطنان

تحسوا ان مصر دي ماشيه بالبركه
عندنا كنوز كتير ومش عارفين نستغلها ونقعد نندب في حظنا
لا عارفين نستغل بحر احمر ولا ابيض ولا نيل ولاحتي البحيره اللي غرقت الدنيا
ومليانه سمك سيبينه


بعد السد العالي قال ايه عايزين يرجعونا المركب
قلت لأ طبعا فين المتحف النوبي
قالنا انه مش في البرنامج ولو عايزين تروحوا ترحوا لوحدكم
قلت ماشي وعلي عهد المصريين لم نتفق علي كلمه
ناس رجعت المركب وناس جت معايا علي المتحف النوبي الجميل جدا جدا جدا

ده المدخل الخارجي




امامه ساحه كبيره والارضيه من الرخام وتصميم جميل جدا فخر لأسوان

وده المدخل الداخلي



المتحف منظم جدا ومبني علي التراز النوبي من الخارج
ومن الداخل متقسم بطريقه ماتتوهش وكل حاجه مكتوب جنبها ايه الموضوع

ومن اجمل الحاجات فيه التماثيل اللطيفه اللي بتمثل حياة الانسان المصري النوبي
وهسيب الصور هي اللي تحكي





بعد كده رجعنا علي المركب اتعشينا ونزلنا البلد نتفرج عليها

والبوست الجاي نتكلم عن معبد فيالا اوفيلا وجزيرة النباتات وصور تاني

::))