الجمعة، 1 يوليو 2011

العاصفة(يامصر قومي وشدي الحيل

الشعب المصري خلاااااااااااااص مش هيضحك عليه تاني
بالرغم ان في كتير من الشعب مش مع اللي بيحصل الان من الثوار
لكن برضوا الشعب المصري مش هيضحك عليه
ياشعب مصر انت اللي نجحت ثورتك لما حضنتها
ولحد النهاردة الثورة ماجابتش لك حاجة
حتي القصاص لم يحدث واللي حكمك بالحديد والنار وقتل ولادك
من اول اللامبارك لحد اصغر امين شرطة كان بيبهدل اولادك في الاقسام والكمائن
لحد دلوقتي مش عارفين راسنا من رجلينا في البلد دي
خلاااااااااص الشعب مش هيضحك عليه تاني
ياناخد حقوقنا كاملة يابلاش
وقبل كده قلت
عايزين ثورة كاش مش بالتقسيط
وادي اخرت التنقيط اللي احنا فيه
ده من فبراير لحد النهارده مافيش حكم واحد ظهر
هي الادلة والشهود علي امين الشرطة اقوي من الادلة علي حبيب العادلي وشركاه
وسايبين ظباط الشرطة اللي قتلوا الشباب في اماكنهم يطلعوا لسانهم لأهالي الشهداء والجرحي
ومستكترين علي اهالي الشهداء يقولوا
آآآآآآآآآآآه
وسايبين الناس اللي بتخرب في البلد
ونفسها البلد تولع
يعملوا فينا اللي همه عايزينه
هي دي اخرت مشي السحلفة
الشعب مش هيسيب ثورته لحد يختالها
-------
ودي موسيقي العاصفة ليني علي ماارجع باذن الله
---------
وماتنسوش الاستفتاء بتاع اختيار تدوينة من تدويناتي خلال شهر يونيو علشان ابعتها اشترك بيها في استفتاء 100 تدوينة الالكتروني
---------

هناك 13 تعليقًا:

مصطفى سيف الدين يقول...

تروحي وتيجي بالسلامة ان شاء الله
بصراحة تعبنا من كتر الكلام لاننا بنكلم نفسنا محدش بيسمعنا سالتك سؤال البوست اللي فات ومجاوبتنيش حضرتك مع محكمة عادلة لمبارك حتى وان كان طمث كل الادلة التي ضده ومحاكمة عادلة ممكن تبرئه؟ ولا مع محكمة تفتيش معلوم حكمها من قبل انعقادها وهي الاعدام له ولكل من معه؟
السؤال ده مهم جدا وهيفسر كل حاجة
القضاء المصري الشيء الوحيد اللي لازم منفقدش الثقة فيه لاننا فقدنا الثقة في كل حاجة تانية ولو مفيش حد وثقنا فيه هنبقى زي الطيارة الورق اللي طايرة من غير ما تربطها اي حاجة بالارض بيشيلها الهوا شوية يمين وشوية شمال لازم حاجة تربطها تحدد اتجاهها والا هنضيع مع نسمة هوا
بالرغم من غضبي على حكاية امين الشرطة اللي اتحكم عليه غيابي وسابوا كل رؤساؤه ومقدروش يحكموا عليهم لكن برضه مش قادر افقد ثقتي في القضاء وبحاول اقنع نفسي ان القضاء المصري مش فاسد ومش بينفذ تعليمات حد الا القانون والعدل
بحاول اقنع نفسي وان شاء الله هاقدر اقنعها
تحياتي

شمس النهار يقول...

شوف يامصطفي القضاة المصريين الان بيشتغلوا في ظروف صعبه جداااا
تحت ضغط من الراي العام

يعني سمعت من مصدر موثوق فيه ان في ظباط ماعليهومش اي حاجه في اي حاجه ويد القضاة مرتعشة من ان تبرئهم

وفي ظباط مدانييين حتي الثمالة ازاي القاضي هيتعامل مع الوضع

وايوة في قضاة مرتشين وماحدش يقول لي مافيش ارجع لأرشيف الاهرام صفحة الحوادث هتلاقي اكتر من قضية لمرتشين
وبيتمسكوا
القضاة بشر فيهم الطالح واغلبهم الحمد لله الصالح
بلاش نألهم علشان نعرف نحاسبهم

اما مبارك
انا لحد دلوقتي لاشايفة محاكمه ولا يحزنون علشان اقدر اختار بين عادله مدنيه او كامجرم حرب
لما يبتدوا يحاكموه هقدر اختار
لكن انا شايفة انسان مدلل ولا الكلب اللولو

بس عندي امل ان الايام الجاية هتفرق كتير في ثورة مصر السلمية
وهتفضل سلمية رغم انف البلطجية اللي في الداخلية

وبنبسط جدا يامصطفي من المناقشة معاك حتي لو اختلفنا مناقشاتك راقية تسلم وربنا يبارك فيك اللي مصبر الواحد علي البلد دي من زمان الشباب اللي زيك ربنا يحميكم

mohamed ghalia يقول...

الشعب لسه محتاج يصحى
الى بيتكلموا وفهمين بالمقارنة قليلين جداا

Mahmoud Ahmed يقول...

ده من فبراير لحد النهارده مافيش حكم واحد ظهر

ولا هيظهر حاجه ، مش عارف كل دي محاكامات ليه ؟؟؟

sony2000 يقول...

السؤال الاهم
هوا ليه قتله خالد سعيد برغم من مرور سنه
مااتحكمشي فالقضيه دي؟

Tarkieb يقول...

بصراحة انا عازر الفلول والنظام اللي شغال من ورى الستارة لما الميغة دي تروح منهم لناس بيتخانقو على فتات وشوية كراسي في مجلس شعب لا ح يقدم ولا ح يأخر..يتخانقو على كاميليا..بيتخانقو على هدف دي سيلفا وقرعة حسام حسن..بصراحة مفيش امل ...وعلى راي المثل اللي خدته القارعة تاخده ام الشعور .

إيمان هلال يقول...

عندما يؤمن شعبى بالحريه ، أستطع ان أخبرك ان الثورة نجحت سيدتى

ابراهيم رزق يقول...

بصى انا راجل غلبان و راضى بالتقسيط احنا مش قد الكاش
بس اللى بيدفع القسط يلتزم معايا مش كل ما ياتى موعد الدفع يقوا نأجل شوية

اما موضوع القضاء ده شرحه يطول ماذا ننتظر من وكيل نيابة نجح بمقبول و بابى و مامى عينوه بواسطة

تحياتى و رحلة سعيدة

givara يقول...

فعلا عايزين ثوره كاش ومش تقسيط
كواضيع شائكه جدا
لأن ومن الاخر لو حدث وصدق ظنى فى المجلس العسكرى
فأن ما حدث هو اكبر واحقر عملية نصب فى تاريخ البشريه
لكى منى تحياتى

Foxology يقول...

يا شمس البلوجرز انا قلتها كلمة حكمة : الكلاب مبتعضش ودان بعضها !

تروحى وترجعى بالسلامة ان شاء الله

تحياتى

تامر علي يقول...

الفساد المتوغل في جنبات مصر طولاً وعرضاً لم يكن متمثلاً في مبارك أو عز فقط لكن كانت له أذرع طويلة في المؤسسة العسكرية والقضاة والشرطه وإلا فكيف كان مبارك ينفذ أوامره وكيف كان يكسب ولاء المؤسسات إلا بنشر الفساد داخلها
لذلك عندما اختفى مبارك لم تحدث الطفرة المتوقعة لأن الفساد الذي انتشر مازالت له الكلمة
الثورات تعني ابادة الطواغيت وليس محاكمتهم محاكمة عادلة وإلا فالشيطان يستحق محاكمة عادلة

غير معرف يقول...

الله يرجعك بالسلامه شموسه
منذ مده وانا منقطعه عن التدوين وعن النت بشكل عام
لكن حبيت اقول انكم شعب بطل ويشار اليه بالبنان وكنتم وستبقون قدوه ومثال مشرف لكل الشعوب الضعيفه والقويه على حد سواء الله ينصركم ومايروح تعبكم هدر

وتدويناتك كثير حلوه كلامك من القلب ويوصل للقلب بسرعه
ربي يحميكِ

الاحلام يقول...

ربنا يصلح الحال وان شاء الله من احسن لاحسن تيجى بالسلامه وان شاء الله كله خير
تقبلى تحياتى الاحـــــــــــلام