الخميس، 30 يونيو 2011

بقينا اخر الشهر

كنت بوضب بوست عن الورد معشوقي
علشان اخليه اخر بوست
وخصوصا انه هيستني فتره علي ماانشر بوست تاني
علشان ان شاء الله هسافر اسبوع

لكن الوضع الان علي الساحة مؤلم وماخلاش للواحد مزاج في حاجة
بس عايزة اقول استمتعت جدا اني اكتب تدوينة كل يوم
التزامي بالاشتراك خالاني مهما كان عندي من مشاغل او مشاكل التزم اني اكتب
وبالتالي كتبت كل ملاحظاتي عن الاحداث يوم بيوم
وبشكر اصحاب الفكرة اللطيفة اللي خالتني كمان اكتشف مدونات جميلة لناس اجمل
وهسجل هنا اللي كتبته ساعة انلاع احداث التحرير علي الفيس وتويتر
======
=تاني تاني تاني خلاص بقا كده خلصت ياداااااخلية وجنت علي نفسها براكش بتتشطروا علي امين شرطة مهربينه وتدوه اعدام وسايبين اسياده يخربوا في البلد
--------------------------
=النظام القديم ندم ان ماعملناش زي ليبيا وسوريا واليمن وحب يقلب الترابيزة ولا ايه دي بلدنا تعدادهم ربع شبرا ده المصريين هيقرقشوا مبني الدخلية
------------------------------
سؤاااااااااااال هو البلطجية دول مصريين يعني زينا كده بني ادمين ولا دول شحتناهم من مكان تاني
------------------------------
إبراهيم عبدالمجيد: هناك من جلب بلطجية بالسيوف للاعتداء على أهالي الشهداء والمتضامنين معهم في عابدين
-----------------------
أ. إبراهيم عبدالمجيد: عندما اعتدى محامي على وكيل نيابة أخذ 5 سنين في أسبوع .. وبعد 5 شهور لم تصدر أحكام على من قتلوا ألف شهيد
----------------------------------------
القصااااااص الحل هو القصاااااااااص ماتمرمتناش علشان في النهاية مبارك يجيله ناس من المانيا والعصابة قاعدة لحد دلوقتي بندلعها
----------------------------
حاسة الجو هو هو بتاع اللامبارك مش فاضل غير مبارك يطلع يقول خطاب ويقول لنا انتوا صدقتم نفسكم انا اهووووووووو رجعت لكم
---------------------------
حد يديني عقله الناس اللي عايزة تدخل بالعافية البالون لحقوا يأجروا تلات اوتوبيسات امتي وجابوا العصيان منين
----------------------------------
قولوا للي في التحريرماتركبوش المصابين الاسعاف اقول لكم من الاخر كل الاحتياطات اللي كانت ايام الثورة اعملوها دلوقتي واضح ان مبارك نفسه معانا
----------------------------------
إمام مسجد عمر مكرم ينادي في ميكوفون المسجد مطالبا الشرطة بالإنسحاب الفوري من ميدان التحرير
------------------------
بلطجية بتقولوا بلطجية مش همه دول اللي طلعتوهم من السجون والاقسام علشان يربونا ماقبضتوش عليهم ليه اشربوا اهو شباب الثورة طلع لكم ياشرطة سايبة
------------------------------------
قبل ماتكرموا اهالي الشهداء وتعملوا لهم حفلة تضحكوا بيها عليهم هاتوا حق اولادهم اللي لحد دلوقتي راح هدر
---------------------------------
تاااااااااااااني ياشرطة بتضربي شباب مصر تاني واي ظابط ضرب شاب مصري هيدفع تمنه غالي عايزين تبينوا انهم بلطجيه علشان كده قتلتوهم طيب اشربوابقا
---------------------------------------
مين حسام عمار ده المتحدث بأسم ائتلاف الثورة هو الفقي رجع ماسبيرو من ورايا ولا ايه؟؟؟؟؟؟؟؟؟؟؟؟هو بيتكلم عن انهي شرطة
--------------------------------
هيعملوا المباراة في موعدها علشان اللي في التحرير يروحوا المباراة يايرجعوا يتفرجوا عليهااااااا:)))شغل الستينات هيبتدي:)))
---------------------------
التحرير الان يحتاج رجالة جدعان مش رجالة اغبية
----------------------------------------------------------
الضرب بغباوة في الشوارع الجانبيه عند الداخلية ده
كلام موثوق فيه من اللي في التحرير الان
-------------------------------------
الناس بترجع علي التحرير كل كلمة بكتبها هنا علي الووول من ناس في التحرير مش من اي قناة او اي حته غير ارض الواقع
----------------------------
وائل بيناشد الناس تنزل ميدان التحرير
----------------------------------
الشرعية من ميدان التحرير وياريت نتعامل بشفافية مع الشعب هناك اطراف تريد نتشويه من في ميدان (وائل عباس)من ميدان التحرير
------------------------------
اصل خبطة المحليات دي جامدة اصل اخونا البعدا كانوا معتمدين عليهم مع كبار قادة الشرطة في الانتخابات الجاية كده فوتنا عليهم الفرصة
---------------------------
الاحزاب الكرتونية نااااااااااااااااااااااااااااااايمة ننه هووووووووووو
--------------------------
الحل للوضع الان ياشرطة اطلعوا باللي عمل الليلة دي واعتذروا للشعب والظابط اللي شتم امبارح في الميكريفون يتعرف ويتحاكم والشعب يعرف
-----------------------------
ايه ده ايه الشعب اللي كله بلطجية دكاترة ومهندسين ومحاسبين ومحاميين ومدرسين وادباء وسياسييين وفنانين ايه الشعب الغريب ده
----------------------
الغريب المريب ان الكباتن بتوع الترشيح للرياسة والاخوان والسلفيين وال........الخ من التيارات اللي طلعت لنا في المقدر ساكت ومافيش حس ولا خبر
-----------------------
كله اشاعات هنبتدي بقا البسطاويسي في الميدان ولا مش في الميدان المهم الناس اللي في الميدان وبيضربوا
----------------
الناس اللي طلعه لنا كل شوية في الفضائيات يرغوا لوك لوك لوك نايمين لسه ولا ايييييييييييييييييييه فين كلمة عصام شرف ولا نفس الصمت اياه
--------------------
رد علي البيان65 الشعب يهيب بالمجلس ان يعجل بمحاكمة القتلة والحرامية اللي في طره وبره طره
----------------------
ياخوفي لا البلطجيه يعملوا مليونية يبرؤ بيها نفسهم من الزج بهم في كل صغيرة وكبيرة
--------------------
الحل للوضع الان ياشرطة اطلعوا باللي عمل الليلة دي واعتذروا للشعب والظابط اللي شتم امبارح في الميكريفون يتعرف ويتحاكم والشعب يعرف
--------------------------
واضح ان الاستوديو اللي ادوه لقناة الجزيرة في مدينة الاعلام عامل شغل كويس والجزيرة موجبه مع المجلس
----------------------
خيم تاااااااااااااني فين عصام شرف ينزل الميدان ويعمل حاجه مش هو من الميدان اصلا وقال لوعجزت هنزل معاكم تاني ماكنتش حابة اعتصام تاني
----------------
علاقتي بالكورة زي علاقتي باللغة اليابانية بس اناشد كل الكويرة في البلد مهما كانت نتيجة المبارة ارجوكم بلاش شغب مصر فوق الكورة والجميع ارجوكم
----------------
اسلمي يامصر وربنا يستر كان نفسي مايبقاش في اعتصامات تاني
حسبي الله ونعم الوكيل
ربنا ينتقم من كل انسان يريد شر بهذا البلد

هناك 21 تعليقًا:

مصطفى سيف يقول...

الورد اللي فتح في جناين مصر مبقاش له ريحة ورد خايف يكون زعلان مننا
ورد مصناهوش
يا ريت بقى نشوف نعمل ايه علشان الورد ترجع ريحته
القصاص طبعا كلنا عايزينه وحضرتك بتقولي انه الحل بس انا مش شايف انه حل
القصاص علاج لعرض من الاعراض بس هنلاقي حاجة تانية بعد ما نقتص من المجرمين علشان نضيع برضه ريحة الياسمين
هنلاقي حاجة نتخانق بسببها ناس هتطلع تقول الدستور اولا وناس هتطلع تقول احترموا ارادة الشعب وبين الاتنين يقف المجلس العسكري لا يعمل بكلام ده ولا كلام ده ويعمل بحاجة جديدة في دماغه ولما تساله ليه ده بيحصل هيقول لانكم مفتتين لما ترسوا على راي علشان كده فشلت مظاهرات 27 مايو ومحدش يقولي نجحت النجاح مش بالعدد النجاح بتحقيق المطالب ومفيش اي مطالب اتحققت لمظاهرة 27 مايو بالعكس دي زودت الوقيعة بين التيار الاسلامي والليبراليين
الورد بيصرخ ويقول فينكم يا شباب ياللي كنتم مفتحين في 25 يناير مزهرين في كل انحاء مصر في 28 يناير روايحكم الذكية ازكمت انوف الطغاة وخلت الباغي ينسحب
الورد زعلان ويمكن يكون دبلان مش لاقي حد يرويه وسط ترويج الاشاعات والاكاذيب حتى مع القصاص هتلاقي الورد برضه مش راضي يزهر زي ما كان بيزهر من كام شهر
هو الربيع خلص ؟ واحنا داخلين ع الخريف؟
هو الوقت بيسرقنا كده؟ ولا احنا اللي مبقيناش بنحس بقيمة الوقت
سؤال اخير لحضرتك
هل حضرتك شايفة اقامة محاكمة عادلة للقصاص حتى لو كانت الادلة طمست ضد الطغاة وممكن منلاقيش دليل ضدهم وممكن يفرج عنهم؟
ولا شايفة اقامة محاكمة تفتيش معلوم فيها الحكم وهو الاعدام لكل الطغاة من غير قاضي ولا قضاء ارضاء للشعب
لو سالتيني عن رايي هاقولك بكل تفاؤل معرفش
لاني مبقتش قادر افهم حاسس ان انفي مبقاش بيحس بالروايح من كتر الروايح القبيحة اللي شمناها سنين مبقيناش حاسين بالورد لما ريحته تزيد
حضرتك كنتي عايزة تكتبي بوست عن الورد كتبتلك انا تعليق طويل عن البنفسج عن الحزن اللي حاسين بيه
تحياتي واسف للاطالة

الازهرى يقول...

اصل خبطة المحليات دي جامدة اصل اخونا البعدا كانوا معتمدين عليهم مع كبار قادة الشرطة في الانتخابات الجاية كده فوتنا عليهم الفرصة


ما قلت لك قبل كده
المحليات هتتحل مع انتهاء امتحانات طلبة الجامعات
يبقى فين المفاجأة فى كده ؟؟؟؟؟؟؟؟؟؟؟؟؟

عموما لاوضع هناك يفرح
والدني روقان أنا رجعت أريح ورايح لهم تانى

وراهم لحد ما أجيب البلد من تانى

ابراهيم رزق يقول...

الشعب يريد ان يفهم
ابتديت اقتنع انى من الغباء لانى لا استطيع الفهم

قبل الكون قبل الطوفان ما يجى خلتنى اخاف عليكى يامصر
و احكيلك على المكنون
مين العاقل فينا مين اللى مجنون
مين اللى مدبوح من الالم
مين الظالم فينا مين اللى مظلوم

الشعب يريد ان يعرف من العاقل و من المجنون
الشعب يريد ان يعرف من الظالم و من المظلوم

تحياتى

سواح في ملك الله- يقول...

هناك من يسعي لتقزيم الثورة

واظنهم اكثر المتضررين من سقوط النظام

سفرية سعيدة باذن الله

شمس النهار يقول...

*مصطفي سيف

موضوع الشهداء هنا يامصطفي
موضوع اننا نبرد قلب اهل كل شهيد
مش علشان نريح ضميرنا ونخلص ونلتفت للباقي
لا
الباقي ده مشاكل اعمق من كده
وهيفضلوا يتخانقوا لحد ما الدنيا تتظبط عارف بحس ان اللي بيحصل دلوقتي عامل زي مايكون ناس محشورين في كورة بلور وعمالن يتخانقوا جواها وهي رغم كده الكورة عماله تجري
:))

بحس ان المصريين فيهم ناس كتير مش معترفين ان دي ثورة
ودي في حد ذاته كارثة
لما تيجي النهارده تقول الثورة ماحققتش اهدفها تلاقي اللي يقول لك عايزين ايه تاني
هو احنا خدنا اي حاجه اصلا
ماعلينا الموضوع كبير والشجون اكبر

وطول بالعكس المدونة ترحب بالتعليقات الطويلة الجميلة المفيدة
ومش هرحمكم من بوست الورد تقروه هتقروه

شمس النهار يقول...

*الازهري

قابلت الباقي ولا ماقابلتش حد

بس هي كده اتحلت بدري لسه الامتحانات شغالة وكليات العملي شغالين في المشروع والثانوية العامة لسه شغالة

بس مش مهم المهم انهم غااااااااااروا

شمس النهار يقول...

*ابراهيم رزق

هو انت بس ياابراهيم اللي مش فاهم
كلنا مش فاهمين
حتي اللي مصدعنا في الفضائيات مش فاهمين

اتحدي اي حد فاهم حاجه في البلد دي غير طبعا المجلس العسكري

وتقريبا كلنا مجانين وهم العقلاء

شمس النهار يقول...

*سواح في ملك الله

الثورة هي فين الثورة

الثورة بتتحارب من نص الشعب
امبارح الناس ماشية تشتم في الشباب

شكرا ليك وان شاء الله ارجع منها ببوست جميل

سبايدرمان يقول...

ربنا يستر
ربنا يستر
ربنا يستر
ربنا يستر

شمس النهار يقول...

*سبايدرمان

ان شاء الله الستر من نصيب مصر
بتطحن من الالالالالالاف السنين
وربنا سترها بعطفه ورحمته بناسها

♥نبع الغرام♥♪≈ يقول...

حسبى الله ونعمه الوكيل فى كل من يأذى مصرنا الحبيبه

وربنا يلطف بينا يارب حبيبتى

تسافرى وترجعى بالف سلامه
وياريت تخلوا بالكم من نفسكم
لا اله الا الله
بحبك اوى

الازهرى يقول...

ما قابلتش حد من المعارف لسه

المحليات لم ينفذ قرار حلها بعد
الثاوية خلصت وأغلب الجامعات الأسبوع الجاى وفى نهايته أو الأسبوع اللى بعده يصدر قرار وزير التنمية المحلية بالحل

اللى صدر قبل كده قرار المحكمة إنما التنفيذ حاجة تانية


واستنى أحداث الأسبوع الجاى
هتبقى كوارث حقيقية واشتعال أكبر للأحداث

اعقل مجنونه يقول...

ترجعى بالسلامة يا قمر

تامر علي يقول...

بداية مبروك على نجاح الحملة وعقبال الناس التانين :))
ثانيا ترجعي بالسلامة
ثالثاً ما حدث في التحرير هو مجرد اعلان عن الوجود وردة فعل من قوى الشر الكامنة معنا في هذا البلد والمعركة معركة النفس الطويل
ولكن كما سترنا الله في الأولى بغير حول لنا ولا قوة
سيتم نعمته علينا ويسترنا في الأخرة بغير حول لنا ولاقوة :)

تحياتي

فتافيت يقول...

الحمد لله انك ما كتبتيش عن الورد
اصلي ما بحبهوش خاااااالص

اللي حصل في التحرير مصيبة بتقول،،
لسه الطريق طويل

وعلى رأي الشاعر اللي معرفش اسمه
يا مستني الأمن من الشرطة
يا مستني الرقاصة ترجع النقطة

شمس النهار يقول...

*♥نبع الغرام♥♪≈

الله يسلمك ياايناس

تكرمي ياحبيبتي

شمس النهار يقول...

*الازهري

الثانوية العامة تخلص بكره المستوي الرفيع انجليزي

والجامعة تخلص بعدهاباسبوع لسه مشاريع الكليات العملي شغالة

ماانا عارفة ده لسه حكم محمكمة محامي قالي بعد صدوره بخمس دقائق
وربنا يستر في التنفيذ

وربنا يستر علي الجاي
بس انا متفااااائله
الشعب ماحدش هيضحك عليه تاني

شمس النهار يقول...

*اعقل مجنونه

الله يسلمك ياجميلة

شمس النهار يقول...

*تامر علي

اهلا اهلا

:))

ماكنتش مصدقة في الظروف اللي انا فيها دي اني ممكن اكمل الحملة بس الاحداث حوالين الواحد كتير

وانا متفائلة وعندي ايمان بان الشعب ده مش هيضحك عليه تاني

شمس النهار يقول...

*فتافيت

انتي كمان مش بتحبي الورد بنتي نمره اتنين مش بتحبه

:))))

ضحكني المثل اللي كتبتيه جداااااااا

رسل القرآن معنا يقول...

السّلام عليكم ورحمة الله وبركاته .....

أخواتي الكريمات ....
يسر إدارة الحلقات الإلكترونيّة لتعليم القرآن الكريم للنّساء عبر برنامج الاسكايب :
**********************************************************
الإعلان عن بدء التّسجيل في الدّورة المقامة في شهري شوال و ذي القعدة بإذن الله
وعلى الرّاغبات في الالتحاق بالدّورة إرسال إميل للإدارة بطلب التّسجيل
سائلات المولى جلّ وعلا التّوفيق والسداد

البريد الإلكتروني للإدارة :
quran.manager@hotmail.com