الجمعة، 17 يونيو، 2011

انتخابات نقابة التشكيليين


البوست ده يعتبر تدوين مني لأحداث النقابة احب اضيفة لمدونتي
------
نبتدي من الاول
في يوم من ذات الايام لاقيت زميل لي يتصل ويقول لي
في اجتماع في النقابة علشان سحب الثقة من المجلس الحالي
قلت له مجلس ايه مين فين
؟؟؟
قال النقابة !!
نقابة التشكيليين
قلت له ان ماكانتش الثورة زودت عندي الزهيمر المجلس مدتة انتهت من شهر 12
وهيقوم بالاعمال الي اخر الانتخابات الجديدة
وكان المفروض اننا داخلين علي انتخابات واللي فكراه انك مرشح نفسك
قال مش فاهم حاجه من اللي كلمني بس اللي فهمته ان عايزين توقيع 100 علشان سحب الثقة
وهنروح كلنا نشوف في ايه
قلت اوك هاأكلم باقي الزملاء والزميلات ونيجي
وفي اليوم الموعود عدت عليا زميلتي ودار بينا حوار في السكة
اننا زعلانين من النقيب والمجلس علشان النقابة الوحيدة اللي مااشتركتش في الثورة وكل اللي نزل
نزل لوحده مش تمثيل للنقابة
المهم وصلنا دار الاوبرا المصرية وركنا العربية ومشينا من الباركنج
الي باب الدخول للنقابة
الامن وقفنا رايحين فين حضراتكم
قلت له حضرتنا رايحين النقابة
قال ممنوع اللي رايح النقابة يدخل من هنا
ليه ياكابتن ماطول عمرنا من يوم ماالنقابة اتنقلت هنا واحنا بندخل من هنا
قال معلش دي اوامر والنقابة لها باب تدخلوا منه
قلت له ماشي ده علي اساس ان الفنانين التشكيليين ارهابين وهندخل نفجر المكان
ولفينا من خارج دار الاوبيرا مسافة لطيفة علشان ندخل النقابة ووصلنا لاقينا اييييييييييه باب النقابة مغلق قلت للأمن خير في ايه النهاردة
قال لنا معلش الباب مغلق بناء علي طلب النقابة والدخول من باب قصر النيل
قلت اه الموضوع في انه وشكلها مش حلو من اولها
المهم
لفينا تاني واحنا داخلين لاقينا سكرتيرة مصطفي حسين بتتخانق مع الامن
وبتقول لهم في ايه ومين اللي قال لكم تعملوا كده ومافيش قرار طلع بكده ويعني ايه اللي حصل ده
سلمنا عليها وقالت لنا مصطفي حسين مايعرفش حاجة عن الموضوع ده
وانتوا بقا جايين تسحبوا الثقة النهاردة من مجلس مدتة انتهت
قلت لها ده الخبر انتشر بقا
قالت طبعا ومصطفي حسين جاي وهيجتمع بيكم
قلت لها يعني اللي عمل كده بيجامله بقا وعايز يدوخ اللي جايين
:))
المهم لما قربت من الحديقة الغنااااااااااااء بتاعة النقابة
جاني حالة زهول وقلت لصديقتي مين دول يااميرة
قالت مش عارفة مين دول صحيح
اعداد من البشر عمري ماشفتها في النقابة اطلاااااااااقا
وكلهم ماشاء الله شباب
وعمري ماشفتهم لافي الجمعية العمومية ولا كنا بتلاقي حد يمضي علي شكوي هنعملها ولا حتي قاعدين في النقابة في الايام العادية
المهم دخلنا الاجتماع وجه مصطفي حسين وابتدي الاجتماع
والقي احد الثوار اللي جايين يخلعوا الفنان مصطفي حسين بيان سحب الثقة بين زمجرة الجالسين وبعد ماخلص لاقيت هتافات تنادي بالتغيير والتبديل والاحلال وكان من ضمن الكلمة نتيجة السلبيات
مسكت انا بقا في الكلمة وقلت للخطيب اللي هو اصلا فنان تشكيلي معروف
قلت له طيب انت وانا وحوالي عشرة في القعدة دي عارف السلبيات بس انا شايفة وجوه جديدة خااااااااالص مش برضوا من حقها تعرف السلبيات ولا هيبصموا علي كلامك
لاقيت ولا حرب النجوم وهجوم عليا بالهتافات لدرجة اني ماقدرتش احوش نفسي من الضحك
فا مصطفي حسين ضحك وقال لهم خلاص يعني انتوا عايزيني اقدم استقالتي
اوكيه ياله استقالة جماعية
المستشار القانوني بتاع النقابة جه يتكلم ويقول ده غير قانوني القانون بيقول ....
راح مصطفي حسين قايل له خلاص استقالة يعني استقالة
وقعد يضحك معانا المجموعة اللي هو عارفها
نسيت اقول لكم ان لما مصطفي حسين اعلن الاستقالة في شاب قام وقف علي كرسي وبطريقة غريبة حبتين فضل يقفل ايده ويفتحا ورافع راسه للسماء وعمال يقول تحيا مصر تحيا مصر الله اكبربصوت اعتقد ان اللي في السودان سمعوه
ولا اللي حرر القدس:))
الشاب ده طلع اصلا مش من النقابة ولاحتي خريج اي كلية فنية
:)))
المهم طبعا قانونا كل اللي حصل كان غير قانوني
ومصطفي حسين بخبرته في الحياة قال لك ايييييييييه طاطي براسك تعدي الريح
وطبعا بعد القعدة ايوة قاعدة مش هسميها جمعية عمومية علشان دي قاعدة غير قانونية اتكلمت مع بعض من الشباب ده وفهمتهم ان القاعدة غير قانونية قالوا الثورة تلغي ده كله قلت لهم بكره تشوفوا ان ولا حاجه هتحصل وكل شئ هيمشي زي ما القانون بيقول
اصل الثورة مش معناها فوضة ولايصح الا الصحيح
بس هو ده الفرق بين حماس الشباب اللي مش متوظف صح وبين العواجيز اللي تجارب السنين علمتهم
عارفين ايه اجمل شئ ان يجتمع حماس الشباب وحكمة الشيوخ
المهم
اتفض المولد بدهاء مصطفي حسين
واتفتح باب الترشيح للمجلس
وخالوا بالكم ان المجلس قاااااااااااائم قانونا الي اخر يوم ويقوم بأعماله عادي واي حد دفع الاشتراك وطلع كارنية كان عليه امضاء مصطفي حسين
وان الورقة اللي مضينا عليها ماعملتش حاجه علشان كانت غير قانونية
بالرغم اني اتهاجمت علشان قلت كل اللي بيحصل ده مش هيغير من الوضع شئ
زميلي اللي كان هيرشح نفسه قال لي مش هرشح نفسي في الجو ده
ده جو ماحدش هيسمع حد وماحدش هيستمع لصوت العقل والمنطق
وبعد اسبوع لاقيته بيكلمني وبيقول لي لا هرشح نفسي ومش هنسيب الدنيا كده ان شاء الله اسقط بس لازم نتواجد لعمل توازن
وانتي كمان ترشحي نفسك
اناااااااااااااااا!!!؟؟؟
قال لي ايوة ونروح ونتكلم
بعد مداولات اقتنعت وقلت ماااااشي نرشح نفسنا ياريس سعد
ورشحنا نفسنا وللأسف اي مؤتمر للمرشحين ماكنش حد بيحضروا غير المرشحين واصحابهم يعني ماكنش في مؤتمرات حقيقية
الاعضاء هينتخبوا ناس ماتعرفهاش ازاي
هينتخبوا بالشكل ولا بحجم الدعايا ولا ايه
بصراحة ماعملتش مجهود كبير من ناحية الظروف عندي كانت اتلخبطت خالص
ومن ناحية مااقتنعتش باللي بيحصل
المهم
اوصل بيكم لما قبل الانتخابات بأسبوعين
كنت اشتريت القانون الداخلي للنقابة وذاكرته كويس جدااااااااااااااا
لاقيت ايه بقا ان في ظل تعطيل القانون 100بتاع الانتخابات
كل نقابة تعمل حسب قانونها الداخلي
هووووووووبا
طيب قانون النقابة اللي علي اساسة انور السادات صدق علي عمل النقابة في سنة
1976
بيقول ايه بقا؟؟؟
ان ماينفعش يصوت ولايرشح نفسه الا من سدد الاشتراك للنقابة قبل تاريخ الانتخابات بشهر بالتمام والكمال
هووووووووبااااااا تاني
ويكون عضو عااااااااااااااااامل
جميل؟؟
يعني اغلب شباب الفنانيين مش هينفع يرشح نفسه
واغلب شباب الفنانيين مش هيعرف يصوت ويختار اللي هو عايزه
وكمان اغلب الجمعية العمومية مش هيعرفوا يصوتوا
اخدت اللايحة ورحت قابلت المستشار القانوني بتاع النقابة
يااستاذ الكلام ده هتطبقوه ولا علشان الظرف الاستثنائي اللي فيه البلد هنعديه
قال لا هيتنفذ ده القانون عايزيني مااطبقش القانون
قلت له لا ودي تيجي
طيب ليه ماقلتوش للناس الكلام ده في الجمعية العمومية
اللي كانت في 18 فبراير علشان يعملوا حسابهم
قال مااعرفش المفروض ان الكل عارف
عارفين منين دول متعودين انهم يجوا يوم الانتخابات يدفعوا الاشتراك ويطلعوا الكارنيه وينتخبوا ويمشوا
قال ماليييش دعوة ده القانون
قلت له ماشي ده القانون لو البلد عادي
بس مين اللي هيخرج من بيته في ظل الامن الغائب علشان يجي النقابة
وفي ظل حظر التجول علشان يدفع الاشتراك في اول السنة كده
وخصوصا ان النقابة مابتشتغلش غير بالليل من 6الي 9
قال هو ده القانون قلت له ماشي يسويها ربنا
وفي يوم الانتخابات ناس كتير رجعت علي يومين وتلاته
فرق توقيت التصويت انا سمتها كده ساعتها
المهم والانتخابات شغالة والناس كلها موجوده
طلبت من مرشح زميل فنان نحات وفي نفس الوقت محامي يكتب لنا تظلم
علشان كده ماينفعش وبفضل الله لميت حوالي 350 توقيع
والزميل الفنان سلم نسخه لمندوب العدل اللي كان موجود
ونسخة لمصطفي حسين
ولا اي شئ حصل ولا حد عبرنا اصلا
وكانت الهوجة اللي حصلت زوبعة في فنجان
وفضل المجلس القديم يقوم بمهامه الي اخر يوم من بعد انتخاب المجلس الجديد
المهم
يوم الانتخابات الاول عدي بخيره وشره
اه شره ماانا نسيت اقولكم ان لما رحنا الصبح الساعة عشره
لاقينا الحديقة الغناء بتاعت النقابة مافيهاش لاشمسية ولا خيمة والناس قعدت اتسلقت في الشمس من عشرة الصبح لخمسة بعد الضهر
وده حديث ليه لجريدة الاهرام بعلق فيه علي الاعادة
ماعلينا اليوم انتهي ان الاصوات لم تكتمل بالنصاب القانوني وعليه هيكون في اعادة
جميل
خلال الاسبوعين بين الجولة الاولي والاعادة حاولنا ننقذ الموقف ماامكنش
يوم الانتخابات
الحمد لله جابوا لنا خيمة كبيرة
وعدي اليوم وتم فرز الاصوات وشرفنا المجلس القديم بنجاح 6 افراد منه
من 14
اما اختيار النقيب ماحدش خد اصوات اغلبية
فاحسم بين اتنين
الفنان حمدي ابو المعاطي والفنان طه قرني
وكانت الاعادة وفاز الفنان حمدي
اللي هو في الاصل كان وكيل النقابة في عهد مصطفي حسين
والاسبوع الماضي لأول مره في تاريخ النقابة
يحلف اعضاء المجلس اليمين المهني
ونتمني ان المجلس الجديد يعمل علي الرفع من شأن النقابة
وفي الخلفية لجنة للحكماء تم تجميعها في مابين اعضاء الجمعية العمومية لمراقبة المجلس الجديد مع التهديد بالمائة امضاء بس المره دي هنمشي قانوني
وده اول تصريح للنقيب الجديد
:))
وتوته توتة فرغت الحدوتة
وفي حدوتة تانيه عن معرض فينيسيا وتكريم الشهيد احمد بسيوني
والهجوم علي الدكتور اشرف رضا رئيس قطاع الفنون التشكيلية

هناك 18 تعليقًا:

سواح في ملك الله- يقول...

خيرها في غيرها يامدام شمس

اول مرة اعرف ان مصطفي حسين

لم يكن ينتوي الترشح

تحيتي

شمس النهار يقول...

*سواح في ملك الله

هو قال من الاول انه مش هيترشح تاني علشان صحته مش مساعداه

والحمد لله اني مانجحتش كده احسن هنعرف نناكف فيهم علي رواقة لو ماعملوش البرامج بتاعتهم اللي علي اساسها انتخبوا

أحــوال الهـوي يقول...

الانتخابات لا تعني اختيار الافضل و لكن تعني الذي يعرف قواعد اللعبه و يستخدم دهائه و يرسم خططه لعمل تربيطات لجمع الاصوات .....شغل من وراء الكواليس


لكن الدخول بدعوي مجرد المشاركه يخدم اصحاب المصالح و يفتت الاصوات

هي دي السياسه بصورتها المصغرة

تحياتي

لـــولا وزهـــراء يقول...

"وقعد يضحك معانا المجموعة اللي هو عارفها
نسيت اقول لكم ان لما مصطفي حسين اعلن الاستقالة في شاب قام وقف علي كرسي وبطريقة غريبة حبتين فضل يقفل ايده ويفتحا ورافع راسه للسماء وعمال يقول تحيا مصر تحيا مصر الله اكبربصوت اعتقد ان اللي في السودان سمعوه
ولا اللي حرر القدس:))
الشاب ده طلع اصلا مش من النقابة ولاحتي خريج اي كلية فنية
:)))
"

شموسة اجمل شمس نهار (: ... ضحكتني دي قوووي وانا بسترسل باستمتاع الحكاية ... لأ وايه طلع مش من النقابة هههه بس باين عليه بيشجع اللعبة الحلوة

لولا

وجع البنفسج يقول...

يبدو أن السياسة تدخل في كل شيء في حياتنا حتى الامور النقابية ومايتعلق بها من انتخابات وتكتلات وخلافه ..
الحمدلله انه يومك عدى على خير ..

:::::

دمت بخير وبصحة.

Foxology يقول...

كل لما أقول بكرة أحلى أرجع وأقول : مفيش فايدة :(

ربنا يسترها

تحياتى

rack-yourminds يقول...

نعم ما اجمل ان يجتمع حماس الشباب وحكمة الشيوخ

ENG./ELSAYED,PMP يقول...

شوفى ... مفيش حاجة فى بلدنا دى مش متفصل ليها قانون ... بل ان مصر بتشتهر باكبر ترسانة قوانين على مستوى العالم ... القوانين دى بقى محدش يعرف عنها حاجة الا حفنة من البشر مع ان هذه القوانين داخلة فى كل تفصيلة وصغيرة وكبيرة فى حياتنا ... زمان كنت بستغرب لتصرفات بعض الاشخاص من حرصه على تجديد الكارنيه بتاعه فى الجمعية التعاونية الزراعية الصناعية للعاملين فى مركز ومدينة كفر علاولاه ... أتارى المواضيع بيبقى فيها إن وأن وكأن وليت ولعل كمان ...!
تحياتى

حمدى جعوان يقول...

بالتوفيق لكى وللنقابه ان شاء الله

sony2000 يقول...

وربنا انا تهت
ههههههههههههههههه

بالتوفيق يارب

اللهم امين

ملحوثه:
عوزاكي فالموضوع الجديد اقريه وقليل رايك وعوزين نشوف ممكن نعمل ايه؟

شمس النهار يقول...

*أحــوال الهـوي

عندك حق الانتخابات تربيطات واتفاقيات وموضوع غريب
والاغرب هذا التناحر علي موقع خدمي
والواضح انه علشان المنظره علشان يبقا عضو مجلس النقابة مش اكتر
ولكن في اللي دخل المجلس علشان فعلا يخدم الناس
هي كانت تجربة مهمه ليه بصراحة خالتني اشوف جانب شبه مجهول بالنسبة ليه

شمس النهار يقول...

*لـــولا وزهـــراء

:))
طلع ياستي صاحب الشباب اللي جاي وجاي معاهم يساندهم وعلي فكرة هو شاب لطيف جدا واتكلمت معاه وقلت له ماينفعش نختلف نتطاول علي اللي اكبر مننا وبغض النظر عن فشل مصطفي حسين الاداري فاهو استاذنا كلنا نختلف معاه ونسحب منه الثقة لكن لانتطاول عليه
بصراحة قام واعتذر له وباس راسه

شمس النهار يقول...

*وجع البنفسج

السياسة هي العمود الفقري للحياة عموما الان

واللي حصل في النقابة صورة مصغرة من اللي بيحصل في البلد

اهلا بيكي

شمس النهار يقول...

*Foxology

لا ان شاء الله في فايدة
بس عايزة صبر شوية
واصرار علي النجاح

شمس النهار يقول...

*rack-yourminds

بس لما يتفقوا انهم يجتمعوا
مش الكبار يترفعوا عن التواصل معهم
والشباب يستهتر بالكبار ويرفض التعامل معهم

شمس النهار يقول...

*ENG./ELSAYED,PMP

اقولك حاجه مدهشة ان فتحي سرور بيتحاسب دلوقتي باقوانين اللي هو وضعها وحبكها حول المتهم
:)))

شمس النهار يقول...

* حمدى جعوان

شكرا ليك
وانت غايب ليه لعله ان شاء الله خير

شمس النهار يقول...

* sony2000

:)))
تهتي ليه بس ياسوني
:)))
ده انا حتي كتباها بختصار شديد
:)))))))))))