الجمعة، 10 يونيو 2011

القمح الليلة ليلة عيدة

الخبر المحزن: حريق في صومعة قمح بوادي النطرون
يعني كنا فرحانين ان محصول القمح الي الان الحمد لله مدي بشاير تفرح القلب الحزين
اوم ايه الصومعة تولع والقمح اللي مااتحرقش يبقا قمح مبلول
يعني تقريبا خسرنا حوالي500 طن قمح
واسباب الحريق غريبة مريبة قالك ايه قيام بعض الاشخاص!!!!!!
بحرق بعض الاشجار !!!!
بجوار الصومعة!!!!؟؟؟؟؟
مين الاشخاص مين الاشجار ايه الصومعة الغريبة المريبة دي اللي لما يقع عليها جريد نخل مولع تولع
واصلا ايه اللي يوصل النار لجريد النخل العالي
انا لاهتكلم ولا هقول اي حاجة خاااااالص
ولا هقول يد بتعبث بالبلد ولا العصابة اللي اتحبسوا بفلوسهم اللي هي من دمنا بيشتروا معدومي الضمير من المصريين علشان يعملوا كل اللي بيحصل يمين وشمال
وماحدش يقول لي لا طبعا احنا هنعلق كل شئ علي الثورة المضادة
لا ياسيدي دي مش موضوع ثورة مضادة ده موضوع انتقامي بحت
يعني انت عايز تهد عروشهم وتاخد اموالهم وتسجنهم وخلاص همه بقا يسكتوا
ويتوبوا وينيبوا الي الله
لا طبعا لازم يعكننوا علينا عيشتنا بالفوضي والبلطجة يمين وشمال
بس برضوا ده مش هيخرجكم من السجن
وتااااااااااااااااني يابلطجية يامعدومي الضمير من المصريين اللي بيشتروا ضمايركم بالفلوس علشان تضروا مصر
الناس دي هتغور وانتوا مش هتلاقوا فلوس تاني وهتترموا زيهم في السجون ان شاء الله
بجد احنا شعب اغلبنا طيب جداااااااا

هناك 18 تعليقًا:

rack-yourminds يقول...

طبعا رجال النظام السابق اصلي مش معقول بعد الثوره هيسلموا كده بسهوله

Ramy يقول...

و كأن ديل الكلب

عمره ما يتعدل

حاتم عبدالفتاح يقول...

لأ بقة هي ثورة مضادة بقة
واللى مش عاجبة يروح طرا (:

مصري جدا يقول...

المشكله مش في المخلوع ولا عصابته دول أنتهوا وخلاص

المشكله الفعليه فيمن تخلقوا بأخلاقهم

Tamer Nabil Moussa يقول...

احنا صح ياشمس اغلبنا طيبين واهل خير لكن ديما بيوجد الشر ايضا فى قلوب البعض

ربنا ينتقم من كل واحد غرضة قهر وظلم لمصر وناسها

مع خالص تحياتى

سبايدرمان يقول...

انا مبقعنعش بموضوع شويه اشجار و اتحرقوا
وهما الى عملوا كده
المفروض يحصل تحقيق كامل
ازاي ده اتحرق
بس تحقيق بجد و تظهر النتجيه بجد

حسبي الله و نعم الوكيل

فتاه من الصعيد يقول...

معلش حسبنا الله ونعم الوكيل

سواح في ملك الله- يقول...

صح والله

اكير صح

تعرفي لو جهات التحقيق قبضت علي منفذي هذا

الحادث

محدش يقوللي محاكمة عادلة

دول يتعدموا علني من اجل الردع

من تسول له نفسه العبث بالبلاد

ياواكل قوتي ياناوي علي موتي

تامر علي يقول...

معلش كل شيء له تضحياته
لكن عار مبارك لن تمحوه مثل هذه الحوادث التخريبية

عار مبارك لن يموت معه ولن يتعفن مع جثته المقيته
سيظل عاره إلى الأبد في التاريخ كأول رئيس مصري يخلعه الشعب بعد أن ضج بفساده

تحياتي :)

شمس النهار يقول...

* rack-yourminds

لا طبعا دول لو سلموا يبقوا ملايكة
وهمه اصلا عصابة

شمس النهار يقول...

* Ramy

ايوووة
لاهيتك ماتلهيت والطبع فيك غالب
وديل الكلب ماينعدل لو علقوا فيه قالب
:)))))

شمس النهار يقول...

* حاتم عبدالفتاح

اصل بقا كلمة ثورة مضادة دي بتعمل ارتيكاريا للناس
مع ان مافيش ثورة حصلت في العالم الا واتعمل لها ثورة مضادة

شمس النهار يقول...

* مصري جدا

ماهمه دول اللي كانوا بيستفيدوا من وراهم اللي يعتبروا الصف التالت والرابع عايزين بقا يبقوا الصف الاول
:))))

شمس النهار يقول...

* Tamer Nabil Moussa

ايوة المصريين اغلبهم طيبين

واحنا شعب غريب جدا المتسامح متسامح اوي
والشراني شراني اوي
:))

شمس النهار يقول...

* سبايدرمان

انا ماشفتش ولا سمعت عن اي تحقيقات لحد دلوقتي
المتبع الان يتخبط الخبر في وشنا
وبعد كده لايقولوا ايه اللي حصل ولا اي حاجة
عايشين مش فاهمين حاجه

شمس النهار يقول...

* فتاه من الصعيد

لانملك الا كلمة معلش فعلا
ونحسبن عليهم
ربنا ينتقم منهم

شمس النهار يقول...

* سواح في ملك الله

ما الاغلبيه بتنادي بغير كده
انا من راي ان البلطجيه لازم يتحكموا عسكريا وبسرعة ويعلن ده علشان الباقي يتردع

شمس النهار يقول...

* تامر علي

كل شئ حصل وبيحصل وهيحصل معلق في رقبة هذا اللامبارك

والتاريخ هيذكره بكل سوء اسوء رئيس حكم مصر