الأربعاء، 15 يونيو 2011

عجلة الانتاج+تحديث


ياريت ياجماعة تقروا ردودي علي التعليقات
علشان تعرفوا وجهة نظري صح
وياريت ماننساش الخصخصة واللي عملتوا في عمال وموظفين مصر
اللي احالتهم علي المعاش وهمه في عز شبابهم
واغتالت احلامهم بدم بارد
=======
بالنسبة لعجلة الانتاج اي بيسكليتة الانتاج اتحدث
بعت عربيتي ورحنا الشهر العقاري بتاع العربيات نعمل الاجرائات المتبعة
لاقيت ماشاء الله مصر كلها هناك بتشتري وتبيع عربيات وماكنش ده يوم سوق العربيات الشهير ب م نصر
قلت الله ماالناس بتبيع وتشتري اهي والدنيا ماشية زي الفل
قالت لي الموظفة ومش اي عربيات كلها عربيات غالية
وفعلا العربيات اللي واقفة بره واصحبها جوه بيبيهوا ويشتروا
عربيات فعلا غالية ومركات عالية الجودة
قلت اومال ذالينا ليها ان البلد مافيهاش فلوس
وان عجلة الانتاج نامت وعايزين الاستبن
المهم قلت لجوز بنتي مادام نزلنا وديني السوبر ماركت يابني اشتري حاجات بالمرة
رحت لاقيت السوبر ماركت ماشاء الله زحمة ولا ليلة العيد قلت الله ماالناس بتشتري اهو والدنيا ماشية
هو السوبر ماركت مش الحاجة اللي فيه ياانتاج مصري يبقا المصانع شغالة
يامستوردة يبقا المواني وشركات الاستيراد شغالة
يعني العجلة هنا كمان شغالة اهو
اومال العجلة النايمة دي فين دلوني عليها بس
والمدرسين شغالين الله ينور والامتحانات شغاله زي الفل
وموتيسكلات الدليفري رايحه جايه جيبالي صداع
ودي قطاعات وشرائح من المجتمع شغالة اهو
وصديقتي كلمتني من الساحل قالت لي الساحل كله تمام والناس في القري بتصيف ومتوقع هجوم اكتر بعد الثانوية العامة والاسعار هترتفع تاني
طيب ماالدنيا حلوة اوي اهي
اومال محسسني ان مصر قبل الثورة كانت جميلة منتعشة وكل الناس زي الفل
وبيغنوا لا لا لا
ومافيش زحمة مرور ولا هيستريا السواقة
ولا خناقات ولاحوادث ولا جرائم
الدنيا كانت بيس يامان:))
والثورة خربتا وبقا في بلطجة وسرقة والعجلة نامت والناس بتلطم في الشوارع
مش هقول غير ربنا يهدي

هناك 26 تعليقًا:

تامر علي يقول...

فعلاً والله يافندم انا ملاحظ ان البلد رجعت اقوى في الاستهلاك من ايام المدعوق المخلوع

بس ربنا يجملها بالستر لحد الانتخابات بس
وبعد الانتخابات كمان :)

تحياتي لحضرتك وللاسرة الكريمه

سواح في ملك الله- يقول...

بيع وشراء السيارات

مش مقياس حضرتك عارفة ان احنا مش بنصنع

سيارات

يعني ملهاش عندنا عجلة انتاج

وهي مش اكتر من الاول ولا حاجة

وده شئ طبيعي بعد الثورات

والفلوس اللي اتنهبت البلاد بتعيد ترتيب

نفسها

يعني الثورة مش السبب ولا حاجة

لان الثورة لو مكانتش قامت

كان الاخ جمال مبارك باع الشعب المصري نفسه

وكانت الدنيا هتبقي اسوأ

شمس النهار يقول...

*تامر علي

ان شاء الله الانتخابات هتعدي علي خير

بس همه يشدوا حيلهم ويلموا البلطجية
بتوع الانتخابات واكيد دول معروفين عند الداخلية بالاسم والسن والعنوان
:))
كان اولياء الامور خايفين ومرعوبين من لجان الثانوية العامة
ماشاء الله الدنيا ماشية جميلة اهي
ومافيش بروباجندا زي زمان
ولاحد اقتحم اللجان ولا حصل اعمال شغب زي كل سنة
اصل بتوع طره مالهومش صالح بالتعليم دلوقتي همه خربوه في تلاتين سنة صحيح بس دلوقتي مايلزمهمش انهم يعملوا فيه بلطجة

وشكرا ليك ربنا يكرمك

شمس النهار يقول...

*سواح في ملك الله

ازاي مش مقياس

؟؟

كل شئ مبني علي شئ تاني
لو مش معايا فلوس مش هبيع عربيتي واشتري غيرها في اغلب الاحيان بتكون اغلي
والفلوس دي جت من دورة للمال

صدقني حتي الاحياء الشعبية الدنيا فيها شغالة زي الفل والناس زي الفل
واحدة صديقة لي عندهم مصنع قالت لي العمال بيروحوا والدنيا ماشية قلة منهم قليلة كانوا مش عايزين ينزلوا الشغل وعملوا حركات لكن لما لاقوا نفسهم هيتسوحوا ومافيش دخل رجعوا الشغل
اصل في ناس كانت فاكرة ان الثورة يعني اقعد في البيت والوي زراع صاحب الشغل
مش فاهمين انه لما يقعد بيلوي زراع اسرته ومصر كلها

محمد الجرايحى يقول...

فعلاً ربنا يهدى ....
أحييك على أسلوبك المتميز
تقبلى سيدتى تقديرى واحترامى

مامة مازن يقول...

شوفى اهو بيلهوا الناس
وبعدين فى قضية اكبر كانت المفروض من اولويات العمل وبيكفوا على الخبر ماجور
قضية التشغيل التوظيف حرب ع البطالة
طول ما هم بقولوا العجلة مش دايرة مين هيفكرهم بالتشغيل والورق اللى قدمناه كلنا الورق ده تلاقيهم باعوه بالكيلو لبتاع الروبابيكيا :)

هما اكيد نسيوا موضوع التشغيل ده
عادى بقا هو مخهم دفتر

عابرة السبيل = ام بقلظ باشا يقول...

لا هو بس العجله كانت اتخرمت واحتاجت بونته لحام

ولسه بيلحمو فيها وكل شويه يقولو العجله نايمه العجله نايمه

ياختشي ربنا يبارك ربنا يزيد

سبايدرمان يقول...

الناس بتهول الامور و الي عرف او ميعرفش بيفتي

بس فيه ملحوظه برضه لازم نحطها في الاعتبار
ان كل الاماكن الى لفتيها دي بيروحها شريحه معينه من الناس
مش النسبه الاكبر من الشعب المصري !!!

Haytham Alsayes يقول...

ماهو العجلة وخلافه من عاهات الاعلام
لازم الاعلام ينضف علي فكرة
لسة امبارح في برنامج عمرو خالد منعوا البرادعي من الظهور بس احنا عملنا حملة علي تويتر وبهدلناهم يعني رجعوا في كلامهم في خلال ساعة
ناس مبتجيش غير بالعين الحمرا
وربنا يستر لازم نكون مصحصحين

تحياتي

دعاء العطار يقول...

المفروض بعد الثوره وبالمنطق كده والعقل وبعد مااللى كاوا بيسرقوا بيتحاكموا _ ده لو يعنى افترضنا انهم خفوا وان مفيش ليهم ديول - المفروض ان كل حاجه تبقى تمام

وانا بصراحه شايفه ان البلد حالها مش واقف ولا حاجه

الناس اللى كانت بتشتغل بتروح شغلها عادى

هما بس ماشيين بالمثل بتاع " مالاقوش فى الورد عيب "

عايزين يحسسونا دايماً ان الثوره كانت وبال ع مصر وفينك ياايام مبارك

عندك حق فى كل كلمه قولتيها ويارب يكون اللاب توب قام بالسلامه (: (:

شمس النهار يقول...

* محمد الجرايحى

اهلا بيك
وشكرا علي مجاملتك اللطيفة

شمس النهار يقول...

* مامة مازن

اهلا اهلا بالحبايب

ازيك يارب تكوني بخير:)

بالنسبة للورق مره قالوا في التليفزيون انه هياخد وقت طويل حسب سوق العمل
وبما ان العجلة واقفة مابتتحركش علشان نايمة يبقا خلاص هياخد وقت هياخد وقت
:))

شمس النهار يقول...

*عابرة السبيل = ام بقلظ باشا

ماهي المشكلة ياام بقلظ يااختي
انهم مش لاقيين الصنايعي اللي يجي ياخدها بونطة لحام ولا يركب لها داخلي جديد ونخلص
:))))

نورتيني وليه مش بتنشري بوستات جديدة عندك

شمس النهار يقول...

* سبايدرمان

وحياتك كنت امبارح في مشوار مع جوز بنتي في امبابة ونفس الموضوع الناس بتبيع وبتشتري وماشيين اخر جمال

والمشوار كان في شارع ضيق جداا يرمي علي شبه حارة وماشاء الله العربيات اللي راكنة عربيات مركات غالية
مش قر ولا حاجة بالعكس انبسطت جدا
بس زعلت في نفس الوقت من اهل امبابة لييييييييييه؟؟
علشان ماشاء الله الشوارع كلها حتي الجانبية مرصوفة رصف جميل بس كلها زبالة اكوام اكوام
يعني اهل امبابة مش قادرين ينضفوا الحي بتاعهم

شمس النهار يقول...

* Haytham Alsayes

عارف بحس اني عايزة اخد جيركن كلور وبرسيييل علي سبرتو ابيض واعدي علي كل ماينتمي للأعلام اخدهم وش نضافة كده علي الماشي
ده مايمنعش ان في ناس تتمتع بحرفية عالية وكويسين يعني يعجبني يسري فودة
والبرادعي من يوم مانزل مصر وهو شايطينه وشايلينه علي دماغهم

وانا معاك لازم نكون مصحصحين علي الاخر
انت ايه رايك في موضوع الدستور والحوارات اللي حاصلة اليومين دول؟؟؟
ان شاء الله هفتح حوار هنا في المدونة علي الموضوع ده

شمس النهار يقول...

* دعاء العطار

ايوة انتي قلتي المفيد
عايزنا نلطم ونندب علي ايام المخلوع

مين بقا اللي بيعملوا كده مش عارفة
بس الموضوع عايز مننا وقفة ووقفة جامدة كمان

اللاب توب جاري العمل فيه وانا بكتب من علي لاب توب من ولاد الحلال اللي في منزلي
:))))

ماجد القاضي يقول...

السلام عليكم أختي شمس..

البوست جميل قوي لأنه بيطرق على شبهة قوية بتستخدم كتير في الإعلام الأيام دي.. والأجمل إنك جايبة الدليل من الشارع مش من مقالات وإحصاءات وتحليلات..!!!
أحييك أختي الكريمة على هذا الرصد الذكي..

شمس النهار يقول...

*ماجد القاضي

وعليكم السلام ورحمة الله وبركاته

شكرا علي تعليقك ومجاملتك لي

وفعلا هو ده الواقع اللي شفته بعيني
يعني اكدب عيني واصدق الحكومة:)))))))))))

rack-yourminds يقول...

هتقول ايه في اعلامنا اللي محسسنا ان البلد هتخرب وهتشهر افلاسها !!! والتهويل ده كتير من المواطنين بيصدقو
حاجه بجد تغيظ
وكاننا قبل الثوره كانت االبلد بترفل في جنات النظام السابق

لورنس العرب يقول...

على فكره
عمر ما ده كان المقياس
احمد نظيف من ذا سنه قال ان المولات مليانه ناس
لكن اين نزلتي؟ الشهر العقاري- ناس معها فلوس- ناس بتشتري سيارات- سوبر ماركت كبير مليان ناس- المعادي- المهندسين- مصر الجديده
دول مش البلد
البلد في مكان آخر
فعلا فيه مصانع قامت بتسريح العماله لما الخامات سعرها ارتفع
وفعلا فيه اسعار اشياء كثيره في السوق ارتفعت
لكن الناس بتشتري وهاتشتري وهاتفضل تشتري
لكن مش معنى كده انهم مرتاحين
هما بيشتروا واولادهم بياخدوا دروس وبيصرفوا كتير- لكن بردو عايشين تعبانين

ENG./ELSAYED,PMP يقول...

وجهة نظر :)
بس صدقينى ... فيه ملايين فى مصر أشرفوا على الموت جوعاً ... فيه ناس كتير بتبيع شققها علشان تشترى أصغر والفرق تأكل بيه ... فيه عمال كتير اتسرحوا من شغلهم واللى بيعرف فيهم يسوق اهو اخدلوا وردية على تاكسى ... اعرف ناس ... والله الذى لا اله غيره ... لم يكسبوا جنيها واحدا منذ اكثر من ستة اشهر ... ليه بردوا مش شايفة اللى بيبيع عربيته بيبعها بيعة حوجة وعوزة ...مش عايز أطول عليكى يا هندسة بس فعلا البلد رايحة فى مصيبة ... والمشكلة مش مشكلة الناس ( اللى الاعلام مصدرهم انهم مش عايزين يشتغلوا ) المشكلة فى حقيقة الامر فى رؤوس الاموال المحجمة عن الاستثمار ... كنت كتبت مقال عن الموضوع ده ايام الازمة المالية ... اشرح فيه ان هناك حلول ... واعتقد انه يصلح فى مثل هذه الاحوال ... اسمه ... فلنعيد النظر ... وده اللينك بتاعه ... اتمنى من حضرتك قرائته :
http://net-kalem-gad-shewia.blogspot.com/2011/05/blog-post_17.html
تحياتى :)

Tamer Nabil Moussa يقول...

تحليل رائع شمس

تسلمى علية

مع خالص تحياتى

شمس النهار يقول...

*rack-yourminds

هو ده اللي غايظني فعلا فعلا
وكأن البلد كانت طايرة علي سحابة الرغد والفخفخة

الاعلام مش ناوي يجبها البر

شمس النهار يقول...

* لورنس العرب

علي فكرة انا اتكلمت في تعليق فوق ياريت تقراه عن امبابة
ودلوقتي هكلمك عن المطرية كنت هناك النهاردة
نفس القصة الناس بتبيع وبتشتري وبتروح اشغلها
والصنايعية بيروحوا ورشهم وكله تمام
وماتنساش العمال والموظفين اللي سرحوهم ايام الخصخصة
تعرف ان في صنيعيه همه اللي مارضيوش ينزلوا شغلهم
وبالنسبة لغلاء الاسعار ده كده اتحجم الزيادة المنتظرة كانت اكبر من كده بكتيييييير لو الثورة ماقامتش
البلد فعلا كانت داخلة علي كارثة مافيش منها قومة لكن لو في حاجه دلوقتي كلنا هنعمل علي اصلحها
المصانع اللي سرحة العمال دي نوعين نوع كان هيتجنن ويخفض العمالة وماكنش عارف يعملها لما جت الثورة خدها حلوانه في سلوانة وسرحهم علشان ارتفاع سعر الخامات بيتبعه رفع بيع السلعة يعني المصنع نسبته كده كده محفوظة
اما النوع التاني اللي همه فلول ورجال الاعمال اللي في السجن مشرفين
حبوا يعقبوا العمال وكده كده هي بايظة معاهم يبقوا علي العمال ليه وياريت تقرا عن اللي حصل في مصانع عز واللي اتعمل في العمال والموظفين
وبالنسبة للراحة يعني هي المصريين كانوا قبل الثورة مرتاحين
علي الاقل دلوقتي هيكون في تعب ان شاء الله بعده راحة بس احنا نبقا مصحصحين

اشكرك علي تعليقك اللي اثري البوست جدا
وفينك من زمان مش باين
ربنا يكرمك

شمس النهار يقول...

* ENG./ELSAYED,PMP

ياباش مهندس انت اكتر واحد عارف الخصخصة اتسرح فيها عمال قد ايه
واتخرب بيوت ناس قد ايه
وياريت حضرتك تقراردودي علي التعليقات
الناس اللي مش عايزة تشتغل كتير وموجودين من قبل ومن بعد الثورة
اتضح ان اغلب المصريين كسولين جدااااااا
تفسر بأيه ان الصانيعي يصحي الضهر وطول مامعاه فلوس ماينزلش يشتغل وده من زمان
تفسر بأيه ان في اصحاب ورش مش لاقية صانيعية
كله عايز يشتغل بيه
والمحلات للضهر مابتبقاش فتحت
المصريين بيناموا طول النهار ويصحوا طول الليل
:)))
عايشين عيشة فنانين
وان شاء الله اتشرف اني اقرا المقال

شمس النهار يقول...

*Tamer Nabil Moussa

شكرا ياتامر علي مجاملتك اللطيفة